بلوچ نیشنل مومنٹ ءِ انسانی ھکانی ادارہ پانک ءِ رد ءَ ضلع گوادر ءِ تحصیل پسنی ءِ میتگ شادی کور ءَ چہ کساس سرجمیں بزان کہ نزیک ءِ پنچ ھزار جھمنند 11 ءُ 12 جولائی 2026 ءَ چہ جند ءِ پت ءُ پیروکی زمیناں زورانسری لڈینگ ءُ در کنگ بیتگ انت۔
درشان ءِ رد اے لڈ ءُ بار لشکر کشی ،زورانسری بیگواھی مزنیں کچے ءَ دزگیری ءُ بُنکی گیپت ءُ گیری وراک ءُ وردنی سامانانی پُجارینگ ءِ سر ءَ پاپندی ءُ پاکستانی لشکر ءِ شنگ کتگیں لڈ ءُ بار ءِ جار ءَ پد دیم اتکگ انت-9 ءُ 10 جولائی ءَ پاکستانی لشکر ءِ کارمنداں جھمنند لوگانی ھالیگ کنگ ءَ گُشتگ انت ءُ پادتراپ داتگ انت کہ کسے در نہ یتک گڑا آیانی لوگ ماندارگ بنت-
پانک ءِ رد ءَ 5 مئی 2026 ءَ پاکستانی لشکر ءُ آیانی چیریں ادارھانی کارمنداں ھشتاد پنچ ءُ سد ءِ میان ءَ مردین دزگیر کتگ انت ءُ آزار دیگ بیتگ انت روچ ءِ سر ءَ درتکگ انت آہ ءُ پریات کنوکانی دپ ءَ سنگ مان ریچگ بیتگ نزیک ءِ 40 دزگیریں مردم شادی کور ڈیم ءِ نزیکیں لشکری بنجل ءَ برگ ءُ بیگواہ کنگ بیتگ انت، چہ آیاں بازینے انگت آیانی دست ءَ زورانسری بیگواہ اِنت-
درشان ءَ گُشگ بیتگ کہ 5 ءُ 8 مئی ءَ تاں سئے روچی لشکری انگر ءِ میان ءَ شادی کور،زرین کوہ،تراتی، گورستانی ءُ کبادہ ءَ رپت ءُ آمد ءِ سر ءَ پابندی بیتگ- ھمے میان ءَ الاج ءَ چہ پد آیوکیں زھگ ءُ زالبولاں ھوار ھشت تاں مردم دو روچ ءَ دزگیر کنگ ءُ دارگ بیتگ انت- مئی ءُ جون ءِ میان ءَ گبدی چیک پوسٹ چہ وراک ءُ وردنی سامان واپس کنگ بیتگ انت-
درشان ءَ سردل ء شیرھان ءِ بابت ءَ ھم گُشگ بیتگ کہ آ 22 نومبر 2025 پاکستانی لشکر ءُ چیریں ادارھانی کارمنداں زورانسری بیگواہ کتگ آئی ژانگولیں لاش 30مئی 2026 ءَ پسنی ءِ نزیک دست کپتگ۔
پانک ءِ رد ءَ بے لوگ بیتگیں بلوچ کھول پسنی ۔اورماڑہ ۔تربت ءُ نزیک گور ءِ شھراں لڈ ءُ بار ءَ لاچار بیتگ انت،چہ آیاں بازیں مردم تمبوانی ءَ تہ ءَ زندگی کنگ ءَ انت۔ نزیک ءِ دہ ھزار ایکڑ کِشت ءُ کِشاری زمین ویران بیتگ انت، چریشی ءَ دھکان کاری ورگی ءُ وانگی آسراتی سِھت ءُ ھمروچگیں کار ءُ روزگار سانمند بیتگ انت-درشان ءِ رد ءَ اے لڈ ءُ بار بلوچ راج ءِ گوں وتی زمین ءَ بُنکی سیادی ربیدگی ءُ راج دپتری پجار ءَ پہ آیوکیں پدریچ ءَ سر کنگ ءِ واستا تاوان بار اِنت۔
پانک ءِ رد ءَ 2025 ءَ 1,355 زورانسری آوارجنی ءُ 225 درکانودی کُوشانی ھال یکجاہ کتگ ءُ نز آورتگ انت۔ جنوری تاں جون 2026 ءِ میان ءَ 556 زورانسری بیگواھی ءُ 227 درکانودی ءُ بیگواھی وھد ءَ کُشگ بیتگیں کُوشانی اھوال یکجاہ کتگ انت۔ ادارہ ءِ رد ءَ اکتوبر 2026 ءَ کلات ءِ ھند شورپارود ءَ ھم نزیک 30ھزار مردمانی لڈ ءُ بار کنگ ءِ جار شنگ کنگ بیتگ ۔
درشان ءِ رد ءَ اُگبالانی لگتمالی ھنکینی ءُ سیاسی ءُ ھکانی بین الاقوامی پیمان (آئی سی سی پی آر) گُزرانکی،چاگردی ءُ ربیدگی ھکانی پیمان (آئی سی ای ایس سی آر) آزار ءِ ھلاپ ءَ کنونشن زمینی لڈ ءُ بار ءِ بابت ءَ اقوام متحدہ ءِ سروک رھبند ءُ ھندی مردمانی آبادی ءِ ھکانی بابت ءَ اقوام متحدہ ءِ چارٹر 10 می آرٹیکل ءِ رد ءَ سک ءَ بے تاھیری سوب انت۔
پانک ءَ زورانسری لڈ ءُ بار ءِ دارگ ،زور بیگواھیں مردمانی دیم ءَ آرگ ءُ آیانی بابت ءَ سرپدی سلھیں پٹ ءُ لوٹ انسانی کمک ھندی جھمنندیں بلوچ آبادیانی پھازگ ءُ دلجمیں واتری مانزمانی ءِ لوٹ کتگ۔