بلوچستان ءِ تیابدپی شھر گوادر جیون ءِ نندوکیں ظہیر نور ءِ گشگ ءِ رد ءَ گوستگیں شپ ءَ پاکستانی لشکر ءَ یک رندے پد ءَ آئی ءِ لوگ ءَ چھاپہ جتگ۔ اے وھد ءَ آئی ءِ کستریں گوھار کہ دل ءِ نادراہ اِنت گوں وت اش برتگ کہ ایشی ءَ پد آئی ءِ بابت ءَ ھچ ھال ءُ اھوال نہ بوتگ۔
زہیر نور ءِ گشگ ءِ رد ءَ آئی ءِ گوھار دل ءِ نادراہ اِنت ءُ پیسر ءَ آئی ءِ دل ءِ آپریشن ھم بوتگ۔ آئی ءَ را مدام علاج، دوائی ءُ جاندراھی ءِ ھیالداری ءِ زلورت اِنت۔
دمگی مردمانی رد ءَ پاکستانی لشکر ءِ کارندہاں 8 ءُ 9 نومبر 2026 ءِ نیام ءَ ضلع گوادر ءِ تھسیل ءِ جیونی ءِ میتگ پانوان ءَ یک لوگے ءِ سر ءَ اُرش کتگ ءُ 21 سالی شائستہ بنت نور محمد کلمتی آوار جنگ ءَ پد بیگواہ کتگ۔
زانگ بہ بیت کہ شائستہ کسان سالیں علی اصغر کلمتی ءِ مستریں گھار اِنت کہ 16 اپریل 2026 ءَ آوار جنگ ءُ دزگیر کنگ ءَ پد پیسر ءَ پاکستانی لشکر ءَ زوراکی ءَ بیگواہ کتگ۔
چمدیستگین ءُ لوگ ءِ مردمانی گشگ ءِ رد ءَ مردین ءُ جنین فوجی کارندہانی یک ٹیمے ءَ یک بج ءِ نزیک ءَ لوگ ءِ سر ءَ اُرش کتگ ءُ شائستہ برتگ۔ یک روچے پیسر ھمے لوگ ءَ لشکری کارندہاں اُرش کتگ ات ءُ کھول ءِ مردم لٹ ءُ کٹ لتگ انت ءُ شائستہ ءِ آوار جنگ ءِ جھد کتگ ات کہ کھول ءِ دزمانجنی ءَ ناکام کتگ ات۔ بلے دومی رند ءَ کارندھاں گوں گیشتریں کارندہاں اتکگ ءُ شائستہ ءَ گوں وت برتگ۔
زانگ بہ بیت کہ اے ھاندان ھم پانوان ءِ دگہ درجناں ھاندانانی وڑ ءَ مچانکی سزا ءِ آماچ بوھگ ءَ اَنت۔ لشکر ءَ اے ھاندانانی لوگ ھم کروتلگ اَنت۔ لوگانی کروجگ ءِ مدامیں وئیل، مدام آوار جنگ ءُ زورانسری ءَ بیگواہ کنگ ءِ سبب ءَ پانوان ءِ مزنیں کساسے چہ دگہ دمگاں ھجرت کنگ ءُ پناہ گزین ءِ بستار ءَ زند گوازینگ ءَ لاچار انت۔