نبشتانک:شوھاز ءُ نگد ءُ چکاس ءِ مانا
نبشتہ کار: شاھد اھمد
دومی بَھر
دی بلوچستان پوسٹ
۳۔ گڈ ءُ اسکیٹس(Good & Scates): پٹ ءُ پول ءِ تہ ءَ جیڑہ ءِ توسیپ کنگ ءِ تہ ءَ بازیں دلگوش دیگ لوٹ اِیت، ءُ جیڑہ ءِ گیشواری ءِ ھاتر ءَ شرتریں راہ ءُ درانی زانگ لوٹ اِیت۔ ءُ ایشی نیام ءَ مدام نادر یا نوکیں چیزے تاگت ءُ راستی ھست اِنت۔
۴۔ کراپورڈ(Crawford): پٹ ءُ پول ءِ بزانت ھما جیڑھانی پٹ ءُ پول کنگ ءِ رھبند ءِ رد ءَ کنگ بیت کہ آھانی گیشواری چہ راستی ءَ چہ تُشّک تُشّک ءَ بزاں (جزوی) یا سرجمی ءَ درکپگ بیت۔
۵۔ پال( Paul): پٹ ءُ پول چے یے؟ اے نا درگیجگ بوتگیں راستیانی یک ھوری ئیں پٹ ءُ پولے ۔ یک روچے کہ مردم جیڑھاں گیش ءُ گیوار کن اَنت ءُ انسانی جاھلیانی سیمسراں کشّگ ءِ جُھد ءَ کن اَنت۔
نگد ءُ چکاس ءِ مانا لبزی بزانت نگد چہ عربی زبان ءِ “نقد” ءِ گالوار ءَ زُرتگ۔ “تنقید” ماں اردو ءِ لبزبلد ءَ بزاں: “چکاس، چکاس ءُ تَچک”۔ یک چکاسے کہ شر ءُ ھراب ءُ پاکیں دروگ ءِ نیام ءَ تپاوت کنت۔”
ھم شوری بزانت نگد ءِ لبز ءِ بزانت ایش اِنت کہ یک وانگ ءُ زانگی یا زانشتی جیڑھے (سرھالے) کہ اَسَل دروشم ءُ دروشم (مواد) کہ اولی پٹ ءُ پول ءِ سبب ءَ ھمے اولی پٹ ءُ پولکار ءِ تہ ءَ یا دگہ پٹ ءُ پولکارے ءِ تہ ءَ انچیں رنگے ءَ پدر بیت ءُ چار ءُ تپاس کنت۔ کہ اے (مواد) ءِ مھکم ءُ نزوریں تب ءُ مئیل، یا آئی ءِ شری ءُ ھرابیاں، انچیں وڑے ءَ دیم ءَ آرگ بنت کہ وانوک اے گپ ءَ منّگ ءَ ابید ھچ وڑ ءَ رکّ اِت نہ کنت کہ اَسَل مواد کِچُّو چینی(فلٹر) ءُ پیش کنگ بوتگ، ءُ اے آئی ءِ شری ءُ ھرابی ھست اَنت ھم شوریان ءِ چندیں توسیپ دیم ءَ داتگ انت کہ آ نگد(تنقید) ءِ بزانت ءَ گیشتر پدر کن انت:
۱۔ ڈاکٹر سید ابداللہ گْوش اِیت: اے نگدکار ءِ کار اِنت کہ آ یک ھستیں موادے ءِ شری ءُ ردی، زیبائی ءُ بدرنگی ءِ سر ءَ پٹ ءُ پول ءُ سوڑگ بہ کنت۔
۲۔ڈاکٹر نگیندر: نگد ءِ لبزی بزانت جھانی رھبند اِنت۔ لبزانک ءِ تہ ءَ نگد ءِ بزانت لبزانکی کارے ءِ الکاپیں چار ءُ تپاس کنگ اِنت۔
گپ ءَ لُکّ کنیں کہ پٹ ءُ پول یک ھیالداریں، سک باز کار ءِ پٹ ءُ پول ءُ مدامیں جھدے، کہ ایشی ءِ تہ ءَ راجمان ءِ راستیانی پدر کنگ، نوکیں راستیانی شوھازگ ءُ راستی ءِ شوھازگ ھوار اِنت کہ آئی ءِ گُپتار آسر پہ درستیں زانتاں کارآمد اَنت۔ اے زانت ءُ ازم ءِ نوکیں راہ ءُ دراں درگیج ایت، نوکیں گوچن دیم ءَ کاینت ءُ نوکیں گال ءُ گپتار پیداک بنت۔ جوڑ بوتگیں ھلاسی یا نزریہ ءِ تہ ءَ اے نوکیں درگیجگ، نوکیں راستی ءُ نوکیں درشاندگ رژنائی ءَ شائیم کنگ بیت۔ ھر انسان ھر چیز ءِ سبوت لوٹ اِیت، پٹ ءُ پول اے سبوت ءَ دنت۔ اے چہ یک جیڑھے یا سرھالے ءَ پیداک اِنت۔ پد ءَ گواچن ءِ شوھازگ ءِ اَمل بندات بیت ءُ مواد یکجاہ کنگ بیت۔ مواد نگدی تجزیہ ءِ بنیاد ءَ چار ءُ تپاس گرگ بیت ءُ سبوت ءِ بنیاد ءَ آسر کشگ بیت۔
روان اِنت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔