زھرشانی نندانک
ٹی بی پی شونگال
بلوچستان ءَ ھمک گوزوکیں روچ ءِ ھمراھی ءَ زورانسری آوار جنی بیگواہ بیتگینانی یل کنگ ءَ زھرشانی نندانک گیش بوان اَنت – چہ بلیدہ ءَ زورانسری آوار جنگ بیتگیں مردمانی کھول دومی رند ءَ تربت ءَ ڈپٹی کمشنر ءِ کارگس ءِ دیم ءَ زھرشانی نندانک دیگ ءَ اَنت ءُ بلوچستان ءِ بنجاھی شھر شال ءِ گچینی دگ سریاب دگ ءَ چہ شش روچاں بند اِنت- اود ءَ زھیر بلوچ ءِ یل کنگ ءِ واستا آئی ءِ کھول زھرشانی نندانک ءَ نشتگ انت-
پاکستان ءِ آمیدگس انساپ دیگ ءَ بے سوب بیتگ اَنت، بلوچ نودربرانی یل کنگ ءِ کیس اسلام آباد ھائی کورٹ ءَ دو سالاں چہ گوشدارگ بوگ ءَ اِنت – زورانسری نودربر یل نہ بیتگ انت ھمے ڈول ءَ چہ پنجاب ءَ انگت ءَ نودربراں زورانسری آوار جنگ ءَ اَنت-
بھاوالدین زکریا شھدربرجاہ ءِ نودربر انیس بلوچ ءِ زورانسری بیگواھی ءَ پد پولیس ءِ دست ءَ دیگ بیتگ بلے آئی ءِ کھول ءُ وکیلاں داں پیشدارگ نہ بیتگ، کانونی درچاں سرجم کنگ ءَ ابید ریاستی ادارہ وتی آمیدگسانی رھبندانی مانیارگ ءِ سبب، مردمانی ستک آمیدگس ءُ انتزامیہ ءَ پرشتگ ءُ زورانسری بیگواہ بیتگیں مردمانی یل کنگ ءِ واستا تھنا زھرشانی ءِ راہ پشکپتگ –
بلوچستان ءِ نام گپتیں سرکار ءِ وزیر زورانسری بیگواھیانی سنگینین جیڑہ ءِ گیشنگ ءَ ابید وتی درشانانی توک ءَ بیگواھیں مردماں سلاہ بندیں جد ءُ جھد ءَ جوڑینگ ءَ اَنت، کہ اے راستی ءِ چپ اِنت – نام گپتیں سرکار ءِ اگاں ھمے رویش برجاہ بیت گڑا آیوکیں وھداں زورانسری آوار جنگ بیتگیں مردمانی کھول زھرشانی ءُ نندانکاں سرجمیں بلوچستان ءَ برجاہ بنت اِنت-