نبشتانک: شوھاز ءُ نگد ءُ چکاس ءِ مانا
نبشتہ کار: شاھد اھمد
اولی بھر
دی بلوچستان پوسٹ
ما گیشتر سے چیز ءِ سر ءَ چمشانک نہ دے اِیں ءُ ما باید شوھاز ، سسا ساچ ءُ نگد ءُ چکاس ءِ سر ءَ کار بہ کنیں بلے بازیں نودربراں اے چیزانی سر ءَ بِھ دلگوشی نہ داتگ۔ من لھتے بُنکی چیزاں پیسر ءَ شمارا سرپد ءُ پوہ کنائینگ لوٹ آں ءُ پد ءَ بَھر بھر ءَ دیم ءَ روان کنیں۔
شوھاز ءُ نگد ءُ چکاس ءِ مانا ءُ آیانی یکے دومی ءَ گوں سیادی ، شوھاز بزاں (تحقیق) یک عربی گالے، کہ گوں ھورتی ءَ درشانگ ءَ چہ: حَقَّقَ، يُحَقَّقُ، تَحْقِيقُ، مُحَقَّقُ (پٹ ءُ پولکار) یا (پٹ ءُ پول کنوک) ءَ چہ دراتکگ۔ وھدے کہ گْوشگ بیت: “ھکّک-پلان” گڑا ایشی ءِ بزانت ایش اِنت کہ پلانی ءَ پٹ ءُ پول کُتگ، بزاں “پدر کُت، درگیتک، درگیتک، پٹ ءُ پول کُت”۔
لھتیں جھل ءَ جتائیں کواساں شوھاز ءِ بابت ءَ وتی وتی بزانت نبشتگ پٹ ءُ پول ءِ گالبند ءِ مانا وانگ ءُ زانگ ءِ جیڑھے (سرھال) ءِ انچیں رنگے ءَ پٹ ءُ پول کنگ اِنت کہ آئی ءِ راستیں دْروشم زانگ بہ بیت یا نا زانگ بہ بیت انچیں رنگے ءَ دیم ءَ آرگ بہ بیت کہ آئی ءِ تہ ءَ ھچ وڑیں بے درشانگ مہ بیت۔ شوھاز کاراں پَٹّگ ءِ ھم شور (اصطلاح) وتی وڑ ءَ بیان کتگ کہ ایشی ءَ چہ اے گپ ءِ سرپدی رس اِیت کہ پٹ ءُ پول پہ آیاں چے انت۔ اے رد ءُ بند ءِ لھتیں سرجمیں بزانت دیم ءَ داتگ اَنت:
۱۔ رسک (Rusk): پٹ ءُ پول چی یے؟ چار ءُ تپاس، ءُ جست ءُ پرس ءِ یک راہ ءُ درے ءِ سر ءَ جیڑگ ءِ راہ اِنت۔ اے ھما جُستاں چست کنت کہ انگت چست نہ بوتگ اَنت ءُ آیانی پسو ءَ گوں یک ھاسیں، ٹھی ئیں رھبندے ءَ دیگ ءِ جُھد ءَ کنت۔ اے بلکل نزریا سازی نہ اِنت بلکیں راستی ءِ درگیجگ ءِ جُھد اِنت ءُ وھدے کہ یکجاہ بنت گڑا یک یکجائیں شکلے ءَ آیانی دیم ءَ دارگ ءِ جُھد اِنت۔ ۲۔ اسمتھ (smith)پٹ ءُ پول ءِ تہ ءَ پَھریز ءُ نگدی پٹ ءُ پول ءُ چکاس ، راستی یا رھبندانی شوھاز ءَ ، ءُ ھمے رنگ ءَ رنج ءُ مدامیں پٹ ءُ پول ، راستی ءِ شوھاز ءَ ھم ھوار انت۔
روان اِنت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔