TBP Balochi

شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زورانسری آوار جنیانی بگیری ءَ اے دراجکشیں زھرشانی بنجل ءَ مروچی پنچ ھزار ءُ یکسد ءُ پنجاہ ءُ دو روچ سرجم بوتگ انت –

چہ ھاران ءَ سیاسی ءُ چاگردی باسک سعداللہ بلوچ، خیر محمد بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

گل کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ پوجی لشکر کشیاں بازیں سالے بیت کہ برجاہ انت اے بلوچستان ءِ تہ ءَ چارمی لشکر کشی انت کہ سال دوھزار دو ءَ بگر تاں ھنو ھنگت برجاہ انت کہ ھزارانی کچ ءَ بلوچ پاکستان ءِ چیریں ادارھانی کارمنداں آوار جتگ ءُ ریاستی زنداناں ازیت سگگ انت –

آئی ءَ گوشتگ کہ ھزارانی کچ ءَ بلوچ پرزند درکانودی شھید کنگ بوتگ انت کہ آھانی ژانگولیں جون بلوچستان ءِ جتا جتائیں ھند ءُ دمگاں دست کپتگ انت – توتک ءِ یکجاھیں کبرانی تہ ءَ سدانی کچ ءَ بیگواھیں مردمانی جون دست کپتگ انت کہ زورگیریں ریاست ءِ رستری ءِ سبوت انت – ریاست وڈ وڈیں زوراکی بلوچ ءِ سر ءَ چکاسگ ءَ انت تانکہ بلوچ راج لگتمال کنگ آئی ءِ چکچینی ءُ مال ءُ مڈیانی لٹ پُل ءَ برجاہ بہ داریت –

ماما قدیر بلوچ ءَ گوشتگ کہ میان استمان ءُ جھان یکبرے بل درساں پیش بلوچ ءَ وت ءَ زانگ لوٹیت کہ بلوچ ءِ یکجاھیں کبرانی دست کپگ یا ھمک روچ جاھے ناں جاھے ژانگولین جونے ءِ دست کپگ، بلوچانی نشانگ کنگ کشگ یا ھمک روچ آئی چادر ءُ چاردیوالی، آبرو ءِ لگتمال کنگ یا مئے جگرانی کپ ءِ پوج ءِ دست ءَ آوار جنی اے درسانی بندات ھمیش انت کہ بلوچ ایردست کتگیں راج یے اے درساں زورگیریں سرکار کنگ ءَ انت –

بلوچستان ءِ دمگ نصیر آباد ءَ تیرگواری ءِ دو جتائیں وئیلاں زالبول ءِ بیران، وھدیکہ دو مردم زدگ بوتگ انت – زدگ بوتگیں مردم سول نادراھجاہ ڈیرہ مراد جمالی ءَ برگ بوتگ انت وھدیکہ کتکار تچگ ءُ روگ ءَ سوبمند بوتگ انت –

گیشیں ھالانی رِد ءَ نصیر اباد ءِ دمگ پولیس تانہ منگولی ءَ شمن علی گوٹ ءَ ناشناسیں سلاہ بنداں زالبول ءِ تیرباران کتگ ءُ کشتگ تتکگ انت –

دومی نیمگ ءَ نصیر اباد ءِ دمگ پولیس تانہ سٹی ڈیرہ مراد جمالی دھرپالی ءَ سلاہ بندیں مردماں تیرگواری کتگ یاسین ءُ نصیر احمد نامیں دو مردم سک باز زدگ کتگ انت، ءُ کتکار تچگ ءُ روگ ءَ سوبمند بوتگ انت –

ھال ءِ سر بوگ ءَ دمگی پولیس ءَ وت ءَ وئیل جاہ ءَ سر کتگ زدگ بوتگیں مردم نادراھجاہ ءَ برتگ انت وئیل ءِ درگت ءَ پٹ ءُ پول برجاہ انت –

بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءَ گوشتگ بلوچ سرمچاراں یکشمبے ءِ روچ ءِ سَے ءُ بیست ءَ کیچ ءِ بنجاھی شھر تربت ءَ پاکستانی لشکر ءِ سرویلینس کیمرہ ءُ موبائل پون ٹاور ءِ سر ءَ اُرش کُرتگ ءُ تباہ کُرتگ اَنت۔

جارکش ءَ گوشتگ ڈنک ءَ اے کیمرہ پاکستانی لشکر ءَ پہ چاریگی کنگ ءِ مول ءُ مُراد ءَ بستگ اَنت۔سرمچاراں سرویلنس کیمرہ ءُ آیانی ڈیوائسز ھمے تباھکاری کارروائی ءَ تباہ کُرتگ ءُ پد ءَ موبائل ٹاور ءِ مشین ءُ سامان تیر جتگ اَنت ءُ زوال کُرتگ اَنت۔

آئی ءَ گوشتگ اے سرویلینس کیمرہ ءُ ٹاور 29 جولائی ءِ شپ ءَ ھم بی ایل ایف ءِ یک کارروائی ءَ تباہ کنگ بیتگ اِت اَنت بلے اُرش ءِ سیمی روچ ءَ پاکستانی لشکر ءَ پد ءَ شر کُرتگ ءُ بستگ اَنت۔

گڈی ءَ میجر گوھرام بلوچ ءَ گوشتگ بلوچ سرڈگار ءِ سر ءَ پاکستانی لشکر ءِ شوربندی بلوچستان لبریشن فرنٹ ءِ نشانگ ءَ اَنت ءُ آیانی بگیری ءَ گل ءِ اُرش برجاہ بنت۔

ھانی شر اِنت کُشگ بوت

نبشتہ کار : شےمؔزار

دی بلوچستان پوسٹ

بلوچ انو یک انچیں جاورے ءَ دچار کپتگ نیکہ پشت ءَ کِنز اِت کنت نیکہ دیم ءَ بلوچ ءَ بس اے باور بوگی اِنت مارا مِرگی اِنت شہ ھاک ءَ سِستگیں مردم کُشگ بوتگ اَنت ھاک ءَ نِشتگیں مردم کشگ بوتگ اَنت ریاست ءِ دست چیر ءِ مردم کشگ بوتگ اَنت ریاست ءِ مردم نہ بیتگ اَنت آ ھم کشگ بوتگ اَنت اے جیڑہ بس بلوچ ئیگ اِنت مئے دژمن انچیں دژمنے کہ ایشی ءَ را وتی مردم ءَ ھم نہ بیت پد ءَ من ءُ تو آئی ءِ ھِلاپ ءَ جنگے کوپگاں زُرتگ۔

بیا نی ھانی بلوچ کہ بوتگ پرچا کشگ بوتگ ؟

پرچا کشگ بوتگ اے جیڑہ بِھ ھل نہ بیت چیاکہ دژمن مئے انگت مارا جنگ ءَ اِنت مئے دژمن ءَ مارا یل نہ کُتگ مارا مئے ھمراہ یل کُتگ انت زیکی ھانی کہ گار اَت مارا بےبلا گنگی ءَ چاگرد کُتگ اَت ما ھچ نہ دیت نہ گش ئے بلوچ زالبولے بیگواہ اَت، مارا اے جیڑگ پر نیست اَت بلے شر بوت کہ ھانی تو شھید کنگ بوت ئے انگت ناں تو شھید مہ بوتین ئے ترا اے مردماں( یوسُپ کعتہ) ءَ رسینتگ ات مئے کشوک زان اَنت مارا کش اَنت وھدے آ مارا مہ کش اَنت پد ءَ مارا مئے چاگرد ترگ ءَ نیل اِیت زِاھریں شِگان کُش اَنت مردم ءَ تھ پروش کن اَنت گڑا گھتر مردم دژمن ءِ دست ءَ شھید بہ بیت اگاں مرچی ایوک ءَ سمیر کشگ بوتین ءُ تو یل کنگ بوتین ئے ترا اے چاگرد ءَ وت کُشتگ اَت بلے شگر اِنت تو کشگ بوت ئے بگند ئے کوم ءِ دپ ءَ گپے پش مہ کپ اِیت یات مارا بہ گند ئے نہ کنت بلے گپے ءُ شگانے پش نہ کپ اِیت مارا چینچو اپسوز اِنت وتی بلوچی ءِ سر ءَ ھانی تو شہ نسیم ءِ گار ءُ بیگواھی پد تو سالے ءَ شش ماہ ءَ ”پریس کلبانی“ دپ ءَ نِشتگ ءُ دھرنان دات چیھانٹ کُت اے تو پہ کے کُتگ ھدا بزانت بلے ما ترا وتی بدواہ لیک اِتگ پیری تو چِست کنگ بوت ئے ما دپ یک کُت گوشت ھانی ءَ زیکی نسیم چِست کنائینت ءُ مرچی پد ءَ سمیر بلے زان ئے ما پہ گشگ ھیل کُتگ ھرچی بیت مارا گشگی اِنت، تاں کشگ نہ بیت مئے ستا ھرچی بیت مرگ ءَ پد ما آئی کتگیں کرد ءَ، کسھاں، داتگیں کربانیاں کہ آر ءَ ا چینچو کربانی داتگ آر ءَ ا چینچو مزن کن اِیں بلے بژن مئے گور ءَ پیسر ءَ ھچ نیست ھرچی بیت مرگ ءَ رند !-

(ھانی شر اِنت کہ کشگ بوت)

ھانی تئی ھستی زاناں ھژدری نہ اَت ؟ یا تو اے پدمنتگیں راج ءَ ھچ نہ کُتگ اَت تئی بیگواھی مردم ءَ سما نہ کُت۔تاں تئی لاش ماں ویرانگ ءَ نہ دیت بلے مارا تئی لاش ءَ باز دربرائنیت (بہ کھول ء بانک کریمہ ئیگ ءَ موکہ پرست ءُ مردگ پرست) بلے ھیراں کہ ما مردگ پرست جوڑ نہ بوتگ اِیں نیکہ موکہ پرست جوڑ بوتگ اِیں ما دوئیں دیم ءَ ایں، مرچی تو در بیاتکین ئے گڑا ما اے گوشتگ اَت کہ (آئی سی آئی ءِ) داشتگیں مردماں شہ یکے، بلے کشگ بوتگ ئے ما ھم موکہ کُتگ کہ باید ھانی ءِ وڑیں انسانے ءِ کرد گُمسار کنگ مہ بیت اے ھم مئے موکہ پرستی اِنت بلے ما اے موکہ ءَ بھ نہ کُتگ نہ کن ایں ھم، کہ آ زندگ اِنت ما آئی ءِ توار بہ بہ ایں، آئی واستا توار چست بہ کن اِیں، اپو اے موکہ ءِ باریگ ءَ وت ءَ ٹپین اِتگ اَت ھچ نہ گوشت تئی گرگ ءَ پد مردمانی دپ ءَ ھدا بہ دار اِیت کہ ترا باریں چے چے گشتگ اِش، بلے تئی توار بوت نہ کتگ اِش آ روچی تو گار اِت ئے مئے دپ ءَ ھرچی دراتک ما ترا گشت۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءُ انیگ ءَ مشھد ءِ جھمنندیں پانزدہ سالی ئیں ورنا گوستگیں روچ ءَ یل کنگ بیتگ –

اھوالانی رد ءَ شش روچ ءَ پیش چہ مشھد ءَ دیم ءَ زاھدان ءَ اتکگ بیتگیں فرامرز براھوئی ء ناسر جھمنند مشھد ءُ زاھدان ایرانی لشکر ءَ دزگیر کتگ بیتگ-

اھوالانی رد ءَ فرامرز براھوئی چہ ھما کھولاں یک کھولے کہ آ گوستگیں سال ءَ ماں زاھدان ءَ زھرشانی ءِ وھد ءَ جنگ بیتگ انت کہ ھمے وئیل ءَ آئی ءِ برات ھم جنگ بیتگ ات گوں-

اھوالانی رد ءَ آئی ءِ یل کنگ ءَ سِی میلیون تومن ایرانی جرمدار کنگ بیتگ –

زرباری بیروت ءَ ھواریں دمگ ءَ اسکول ءِ چکاس ءِ دیم ءَ آیگ ءُ سوبمندی ءِ وشی ءَ تیرگواری ءَ ھپت سالیگیں جنکو نایا ھنا ءَ وتی زند ءِ روچ آسر کتگ انت-

نایا ھنا کورکائی تیر ءِ نشانگ بیگ ءَ زدگ بیتگ ات سَے ھپتگاں داں جاندراھی ءَ درمانی ءَ بیتگ بلے داں گڈی ءَ آئی ءَ ٹپانی درد نہ سگ اتگ ءُ بیران بیتگ-

آئی ءِ سر ءَ یک تیرے ھما وھد ءَ لگ اتگ ات کک آ سکول ءَ گوازی ءِ گراونڈ ءَ جاڑیگ بیتگ ءُ چریشی ءَ پد آ کومہ ءَ شتگ –

اے وئیل ءَ لبنان ءِ مھلوک گم ءُ زھر درشان کنگ ءَ اِنت – چاگردی ترامجاھاں آیوکیں وھداں اے وڑیں سر ءَ ترندیں گامگیج زورگ ءِ پرمان ءَ کنگ ءَ اَنت-

الشرق الاوسط ءِ رد ءَ زرباری بیروت ءِ ھند الحدث ءِ بلدیہ ءَ تیرگواری ءِ وئیل ءِ بارو ءَ گوشتگ نایا وتی مات ءُ پت ءِ یکیں زھگ بیتگ ءُ آیاں وشی ءِ سر ءَ تیرگواری کنگ ءَ تپل ءِ ساہ گپتگ اَنت-

لبنان ءِ وزیر تعلیم ءُ ھیلکار عباس الحلبی ءَ ٹویٹ کتگ ءُ گوشتگ کشندہ ءَ وشی ءِ تیرگواری ءَ بے کسوریں نایا ھنا ءِ زندگی ھلاس کتگ-

آئی ءَ گوشتگ کہ ھا ما وتی وشیانی سر ءَ بے کسوریں انساناں جنازھانی تھت ءِ باھوٹ کن ایں ؟-

پبلج پراسیکیوٹر ادیب عبدالمسیح ءَ یک کانون ءِ یک تاکے ءَ نایا ھنا ءَ موسوم گشتگ چریشی ءَ تیرگواری کنوکاں ترندیں سزا دیگ ءِ لیکہ داتگ-

کجام ھم مراگش ءِ سر ءَ برزکائی تیرگواری جنگ ءِ سر ءَ بندش جنگ بہ بیت اِنت ءُ ھما مراگش کہ آئی ءِ سر ءَ تیرگواری کنگ بیت اِنت آئی ءِ بھر زیروک ءُ سروک مجرم گوشگ بہ بنت اِنت-

کانون ءِ تاک ءِ رد ءَ تیرگواری کنوک ءَ پولیس ءِ دست ءَ دیگ ءِ زمہ واری مراگش ءِ برجم داروک ءِ بیت اِنت-

انسانی ھکانی کمیٹی ءِ سروک ڈاکٹر میشال موسیٰ ءَ گوشتگ بے کسوریں نایا ھنا ءَ کورکائی تیر لگگ ءِ سبب ءَ آ وتی زند ءَ زبھر بیتگ ءُ ایشی ءِ گناہ چی بیتگ ءُ نزاناں اے وڑیں جرمکارین پرکاریانی سر ءَ کدی بندش جنگ بیت اِنت-

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ ورنایے آوار جتگ ءُ بیگواہ کتگ –

گیشیں ھالانی رِد ءَ مروچی یکشمبے ءِ بیگاہ ءَ پاکستانی پوج ءُ چیریں ادارھانی کارمنداں رشید ء حبیب جاھمنند ظہور شاہ میتگ زورانسری آوار جتگ ءُ بیگواہ کتگ –

اھوالکار ءِ رِد ءَ رشید ھما وھد ءَ پاکستانی پوج ءَ زورانسری آوار جتگ ءُ بیگواہ کتگ وھدیکہ آ وتی پرپٹ ءِ سر ءَ وتی گِس ءَ در اتکگ ءُ دیم پہ نیا آباد ءَ رؤگ ءَ بوتگ –

زانگ بہ بیت بلوچستان ءِ تیاب دپی دمگ گوادر ءَ ھوار ایندگہ ھند ءُ دمگاں پاکستانی پوج ءُ چیریں ادارھانی کارمندانی مردمانی زورانسری آوار جنی ءِ درچ یکشل ءَ برجاہ انت –

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ بلوچستان ءَ ھچ چشیں ھند ءُ دمگے نیست کہ اودا پاکستانی پوج ءِ نیمگ ءَ زوراکی کنگ ءُ مردم زورانسری آوار نہ جتگ ءُ بیگواہ نہ کتگ انت – اے وھدی بلوچستان ءَ پنجاہ ھزار گیش مردم زورانسری آوار جنگ ءُ بیگواہ کنگ بوتگ انت –

سربوتگیں ھالانی رِد ءَ بلوچستان ءِ دمگ ھزدار ءِ دمگ کھنڈ، جعفرآباد لنک دگ ءَ ناشناسیں سلاہ بندیں مردماں ایس او ءُ سی ٹی ڈی مراد جاموٹ ءِ گاڑی ءِ سر ءَ تیرگواری کتگ –

بلے اے اُرش ءَ ایس ایچ او سی ٹی ڈی مراد جاموٹ چہ تیراں رک اِتگ وھدیکہ آئی ءِ گاڑی ءَ سک باز تیر وارتگ –

اُرش ءَ پد پھازگی کارمنداں دمگ وتی انگیر ءَ کتگ ءُ اُرش کارانی شوھاز بندات کتگ ءُ سرجمیں شھر ءِ دگ بند کتگ ءُ پٹ پول برجاہ انت –

سربوتگیں ھالانی رِد ءَ بلوچستان ءِ دمگ کیچ ءِ بُنجاھی شھر تربت ءَ ناشناسیں مردماں پوج ءِ نیمگ ءَ جنگ بوتگیں چاریگی کیمرہ ءُ موبائل ٹاور ءِ سر ءَ اُرش کُتگ، دومی نیمگ ءَ پنجگور ءَ سلاہ بندیں مردماں پاکستانی پوج ءِ سر ءَ ھم اُرش کُتگ –

گیشیں ھالانی رِد ءَ تربت ءَ پوج نیمگ ءَ جتگیں کیمرہ ءُ موبائل ٹاورے ءِ سر ءَ ناشناسیں سلاہ بندیں مردماں اُرش کتگ ءُ تاوان داتگ انت ، اِھوالکارانی رِد ءَ ٹاور ءُ کیمرہ تربت ءِ دمگ ڈنُک ءَ نشانگ کنگ بوتگ انت –

زانگ بہ بیت کہ گوستگیں ماہ ءَ ھم اے موبائل ٹاور ءُ چاریگی کیمراھانی سر ءَ سلاہ بندیں مردماں اُرش کتگ ات ءُ تاوان داتگ ات اَنت کہ اُرش ءِ سیمی روچ ءَ پد پوج ءَ ٹاور ءُ کیمرہ پدا جوڑ کتگ اَنت، آ اُرشانی زمہ واری بلوچستان لبریشن فرنٹ ءَ من اِتگ ات انت –

دومی نیمگ ءَ بلوچستان ءِ دمگ پنجگور ءَ کیڈٹ کالج ءِ سر ءَ برجاھیں پاکستانی پوج ءِ پانگس ءِ سر ءَ سلاہ بندیں مردماں اُرش کُتگ ءُ در شُتگ انت –

ھالانی رِد ءَ اُرش ءَ پوج ءَ تاوان رستگ بلے تنی وھدی سرکاری واکدارانی نیمگ ءَ اے درگت ءَ ھچ گوشگ نہ بوتگ –

زانگ بہ بیت اے ھند ءُ دمگاں پاکستانی پوج ءُ موبائل ٹاورانی سر ءَ بوتگیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّ انت بلے تنی وھدی اے اُرشانی زمہ واری ھچ گل ءَ نہ منّ اِتگ انت –

کیچ ءِ تھسیل تمپ ءَ سلاہ بندیں مردمانی تیرگواری ءَ زلحیہ حیات نامیں زالبولے ٹپی بیتگ-

اِھوالکارانی رِد ءَ گوستگیں شپ ءِ ساھت نُھ ءَ تمپ کور جو ءَ ناشناسیں سلاہ بندیں مردماں لوگ سر ءَ بیڑبرتگ ءُ تیرگواری کتگ چریشی ءِ آسر ءَ چہ حیات ءِ جنک بانُک زلحیہ ٹپی بیتگ ، آ پہ لاج ھاتر ءَ تمپ ءُ پد ءَ تربت ءِ نادُراھجاہ ءَ برگ بیتگ-

دمگی مردمانی گوشگ اِنت اے سلاہ بندانی سیادی دمگی ڈیتھ اسکواڈ ٹولی ءَ اِنت چہ-

زانگ بہ بیت اشی ءَ ساری پاکستانی پوج ءَ 2022 ءَ زلحیہ حیات ءُ امیر حیات زورانسری آوار جنی ءِ نشانگ کتگ ءُ بھتام جتگ اَنت کہ آ پدائی کنگ ءَ روگ ءَ بیتگ اَنت-

زلحیہ حیات ءِ کھول ءَ گْوشتگ کہ ما مدام پاکستانی پوج ءُ آیانی جوڑ کتگیں ڈیتھ اسکواڈ کارندھانی زوراکی ءِ دیمپان اِنت – ما بلوچ راج، سیاسی ءُ چاگردی گلاں ھوار سانکدری باسکاں گوں دزبندی کن ایں کہ آرمی ءِ زُلم ءُ زوراکیاں چہ رکگ ءِ ھاتر ءَ توار چست بکن اِت-