TBP Balochi

بلوچستان ءِ دمگ ھزدار ءَ پاکستانی پوج ءَ یک مردمے دزگیر کنگ ءَ پد بیگواہ کتگ ءُ ھمے وڑ یک بیگواھیں مردمے یل بیتگ-

بیگواہ کنگ بیتگیں ورنا ءِ پجار میران خان ءِ نام ءَ زانگ بیتگ، کہ گوستگیں روچ ءَ جھالاوان کمپلیکس ءِ ھند ءَ پاکستانی پوج ءَ دزگیر کتگ ءُ ناشناسیں جاھاں برتگ –

دومی نیمگ ءَ ھژدہ اگست ءَ پوج ءِ دست ءَ بیگواہ کنگ بیتگیں حفیظ ء مھمد امین جھمھنند سنگین یل کنگ بیتگ ءُ لوگ ءَ سر بیتگ-

زانگ بہ بیت ھمے شپ ءَ پاکستانی پوج ایف سی ءُ چیریں ادارھاں زھری ءَ شفیع کالونی ءَ لوگے ءِ سر ءَ بیڑ برتگ ءُ رزاق جتک ءُ آئی ءِ زھگ منان جتک ءِ ھواری ءَ دزگیر کتگ ءُ ناشناسیں جاھاں برتگ ات بلے دومی روچ ءَ آ یل کنگ بیتگ ات انت ءُ حفیظ گوستگیں روچ ءَ یل بیتگ ءُ لوگ ءَ سر بیتگ –

بلوچستان ءَ تاکتوریں تکانی جھگیریں سَرپانکیں سرکار

ٹی بی پی شونگال

بلوچستان ءَ سرکار ءُ سیاست ءِ پیسلہ سازیں ادارگ پاکستان ءِ تاکتوریں پوجی تاکت اَنت ءُ آیاں بلوچستان یک سیاسی تجربگ جاھے جوڑ کُتگ۔ گوستگیں گچین کاریاں چہ پیش بلوچستان عوامی پارٹی ٹھینتگ اَت ءُ آیاں سرکار دست ءَ دیگ بیتگ اَت ءُ آیوکیں گچین کاریاں پیسر واکداریں تکانی کمک ءَ گوں سَرپانکیں سرکار ٹھینتگ دانکہ گچینکاریانی تہ ءَ اَے دمگانی تہ ءَ پالیسی پیلو کنگ بہ بنت۔

بلوچستان ءَ بلوچ راجی سیاست ءُ سیاسی گامگیجانی سر ءَ جار نہ جتگیں بندش اِنت بلے اَے جاورانی تہ ءَ ھم کسانیں کساسے ءَ سیاسی گھگیری برجاہ اِنت۔ پاکستان ءِ تاکتوریں واکانی کوشست اِنت کہ بلوچستان ءِ تہ ءَ سرجمی ءَ راجدوستیں سیاست ھلاس کنگ بہ بیت پمے ھاتر ءَ وتگڑیں سیاسی کارست ءُ پاٹی بلوچستان ءِ سر ءَ لڈگ بئیگ ءَ اَنت۔

بلوچستان ءَ راجی آجوئی ءِ سیاست کنوکیں ادارگانی سر ءَ بندش اَنت بلے راجدوستی ءِ سیاست ءِ نام گپتانی بلوچستان ءَ وتگڑیں سیاسی کارستانی بلوچستان ءِ سیاست ءِ سر ءَ لڈگ ءِ سر ءَ ھاموشی جُست ودی کنت۔ نیشنل پارٹی ءَ تاکتوریں تکانی جھگیریں انوار کاکڑ ءَ پاکستان ءِ سَرپانکیں مزن وزیر گچین کنگ ءَ وشیں ھالے نامینگ پہ بلوچستان ءُ آیانی سیاست ءَ تاوانبار بیت کنت۔

بلوچستان نیشنل پارٹی ءِ تاکتوریں تکانی جھگیریں مردمانی بلوچستان ءِ سیاست ءِ سر ءَ لڈگ ءِ سر ءَ توار چِست کنگ جوانیں ھال اَنت بلے بلوچستان نیشنل پارٹی ءَ قدوس بزنجو ءِ بلوچستان عوامی پارٹی ءِ سرکار ءَ آکسیجن دیگ ءَ ھوار اَنت۔ بلوچستان نیشنل پارٹی ءَ سرپد بئیگ لوٹ ایت کہ قدوس بزنجو ءُ صادق سنجرانی ءِ پئیمیں کارستانی چیروکائی پلامرزی کنگ ءَ گوں آ بلوچستان ءِ سیاست ءَ تاکتوریں تکانی راھانی دارگ ءَ سوبمند بیت نہ کنت۔

بلوچستان ءَ راجی سیاست ءِ راھانی دارگ ءِ ھاتر ءَ تھنا یک تک ءِ سانمند نہ بیت اِنت بلکیں چریشی ءَ راجدوستی ءِ سیاست ءِ بنیات ءِ سر ءَ سیاست کنگ ءِ راہ بند بہ بیت۔ بلوچستان ءَ سُرپُر کنوکیں سیاسی پاٹی یک دومیگ ءِ ھلاپ ءَ سنگر پچ کنگ ءَ ابید تاکتوریں تکانی نیمگ ءَ بلوچستان ءِ سرءَ لڈاتگیں وتگڑیں سیاسی کارست ءُ پاٹیانی راہ ءِ دارگ ءِ ھاتر ءَ یکجاھیں گامگیج چِست کَنگ لوٹ ایت۔

فٹبال ءِ میان اُستمانی گل فیفا ءَ اسپین ءِ فٹبال فیڈریشن ءِ سروک لیوس روبیلس ءَ زالبولیں کھلاڑی ءِ لُنٹانی چُکگ ءِ پژدر ءَ کَش اتگ-

ھال سر کنوکیں ادارہ رائٹرز ءِ رد ءَ فیفا ءُ شمبے ءِ روچ ءَ شنگ کتگیں وتی درشان ءِ توک ءَ گوشتگ لیوس سَے ماہ ءِ واستا کشگ بیتگ ءُ اے وھداب آ فٹبال ءِ درگت ءَ ڈیھی ءُ دری بزانکہ نیشنل ءُ انٹرنیشنل ءِ کجام ھم ایونٹاں بھر زرت نہ کنت اِنت-

فیفا ءِ رد ءَ لیوس ءِ سر ءَ بندش سرجمی ءَ کنگ بنت اِنت ءُ ایشانی بوگ ھم المی اِنت-

زانگ بہ بیت گوستگیں ھپتگ ءَ آسٹریلیا ءِ شھر سڈنی ءَ وومن ورلڈ کپ ءِ فائنل ءَ اسپین ءَ انگلینڈ یک گولے ءِ دیم پہ دیمی ءَ پروش داتگ ات-

اسپین ءِ کٹگ ءِ وشی ءَ فیڈریشن ءِ سروک فاتح ٹیم ءِ کھلاڑی جینی ھرموسم ءِ لُنٹ چُک اتگ اَنت-

جینی ءَ فٹبال فیڈریشن ءِ سروک گامگیج ءِ سر ءُ نادوستی درشان کتگ ءُ چریشی ءَ پد وومن ٹیم ءِ کھلاڑیاں لیوس ءَ را در روگ ءِ لوٹ کتگ بیتگ-

زالبول فٹبالرز ءَ لیوس ءِ اگدو ءِ یل دیگ ءَ داں راجی ٹیم ءَ نیمگ ءَ نمائندگی ءِ دزکشی کتگ ات ءُ بلے لیوس ءَ دزکشی بوگ رد کتگ ات-

اسپینش فٹبال فیڈریشن ءَ ھم یک درشانے ءَ گوشتگ کہ فیڈریشن ءِ سروک ءِ درگت ءَ جینی ھرموسو ءِ درشان ءِ سر ءَ کانونی گامگیج زورگ بیت اِنت-

ھرموسو ءَ آدینگ ءِ روچ ءَ گوشتگ کہ آئی ءَ لُنٹانی چُکگ ءِ واستا نہ گوشتگ کہ منی لنٹانی چُکگ ءَ منی واھشت ھست اِنت-

بلوچ نیشنل مومنٹ (بی این ایم) ءِ جارکش ءَ شھید اکبر ھان بگٹی ءِ شھیدی ءِ ھبدھمی سالروچ ءِ درگت ءَ شھید ءَ را ستاشانی ندر کرتگ ءُ گْوشتگ کہ شھید اکبر ھان بگٹی یک ھنچیں مزنشانیں ھستی ءِ نام اِنت کہ مرچی ھر بلوچ آئی ءَ وتی ارواہ ءُ گُمان ءِ تہ ءَ مار ایت۔آئی ءَ پیری ءُ نادراھی ءَ ابید گھگیری ءِ راہ گچین کُرت ءُ بلوچ راجی گْوستانک ءِ تہ ءَ دگہ یک درے گیش کُرتگ۔

آئی ءَ گوشتگ انچوش کہ مھراب ھان ءَ انگریز سرکار ءِ اُرش ءِ بگیری ءَ گھگیری کُرت ءُ گْوستانک یک دگہ دْروشُمے دات،ھمے دود ءِ پاسداری ءَ مھراب ھان ءِ رندگیری ءَ شھید اکبر ھان بگٹی ءَ ھم بلوچ راجی زْرمبشت رُژنائی بکش اِت۔

جارکش ءَ گْوشتگ کہ پہ راجدوستی ءِ بنیاد ءَ جُھد کنوکیں سیاسی سروک ءُ کارکن مدام وتی راجی گْوستانک،دودمان ءُ لیکہ ءِ سر ءَ برجاہ بنت ءُ شھیداکبر ھان بگٹی ھم انچیں مردمے اَت کہ آئی ءَ گوں وتی زمین، زبان ءُ دودمان ءَ مھر اَت۔وھدے آئی دیست کہ زمین، راجی ھستی، زبان،دود ءُ ربیدگ تُرس ءِ تہ ءَ اَنت ءُ پاکستان بلوچ سرڈگار ءِ سر ءَ تچکی ءَ آبادی مَٹ کنگ بیگ ءُ بلوچ چہ وتی سرڈگار ءَ کَشگ بیگ ءِ کارشونی دیم ءَ آرگ بیگ ءَ اِنت ءُ گوں لشکری زور ءَ بلوچ راجی ھستی لپاشگ ءُ جتائیں شوربندیانی سر ءَ کار کنگ بیگ ءَ اِنت گڑا آئی ءَ تْرندیں گامگیجے زُرت ءُ وتی جان ندر کُرت ءُ پاکستان ءُ بلوچ ءِ میان ءَ تچکیں کِشکے کَش اِت۔

آئی ءَ گْوشتگ کہ شھید اکبر ھان یک دور چاریں سیاسی سروک ءُ دمگ ءُ جھان ءِ مَٹ بیتگیں شونداتاں شری ءَ سرپد اَت۔آئی ءَ پاکستانی پارلیمان ءِ راہ ھم کارمرد کُرتگ بلے گُڈّی ءَ ھمے نوبت ءَ سربیتگ کہ پاکستان ءِ وتگڑیں پارلیمان ءَ بلوچ راجی جُست گیش ءُ گیوار نہ بیت ءُ پاکستان آؤکیں روچاں پہ بلوچ ءَ سرڈگار ءَ تنک کنت گڑا آئی ءَ گھگیری ءِ راہ گچین کُرت ءُ داں شھیدی ءَ ھمے راہ ءِ سر ءَ پہ مڑاہ برجاہ بوت۔

جارکش ءَ گْوشتگ کہ اکبرھان بگٹی پہ وتی نپ ءُ سیتاں نہ بلکیں پہ راجی ھستی ءُ آجوئی ءَ وتی جان ندر کُرتگ۔شھیدانی کَس بلوچ راج اِنت ءُ بلوچ شھیدانی لوٹ ءُ واھگاں داں منزل ءَ سرکنگ ءَ ھرچ وڑیں دیمونی ءَ چَک ءُ پد نہ بیت ءُ نہ کہ کسے ءَ اے موکل ءَ دنت کہ آ شھیدانی دیمونیانی نام ءَ بلوچ راجی باندات ءِ گون ءَ گْوازی بہ کنت۔

سربوتگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت –

بیگواہ کنگ بوتگیں مردمانی پجار سجاد علی ء عزت خان ءُ محمد یوسف ء محمد نام ءَ بوتگ انت –

بیگواھیں مردمانی پانکجنیً گل ءَ اے مردمانی آوار جنی ءِ ھبر راست کتگ ءُ گوشتگ کہ مروچی ادار سَے ءِ نزیک ءَ سی ٹی ڈی ءُ چیریں ادارھانی کارمنداں ماں کلی نیچار بڑو قمبرانی دگ کوئٹہ بالمقابل کیچی بیگ تھانہ ءَ عزت خان نیچاری ءِ گس ءَ در کانودی بیڑ برتگ ءُ سجاد علی ء عزت خان ءُ محمد یوسف ء محمد بخش زورانسری آوار جتگ ءُ بیگواہ کتگ انت –

دومی نیمگ ءَ چہ ڈیرہ بگٹی ھال آیگ انت کہ ڈیرہ بگٹی ءِ دمگ سوئی ءَ پاکستانی پوج ءَ ھپتاد ءَ گیش بگٹی ٹک ءِ ورنا آوار جتگ ءُ وتی کارگس ءَ برتگ اودا آ سک باز لٹ شاپ کنگ بوتگ انت –

دمگی اھوالکارانی رِد ءَ اے ورنا ھمے واست ءَ آوار جنگ بوتگ انت کہ اے مردماں نمیرانیں نواب اکبر خان بگٹی ءِ نمیرانی سالروچ ءِ درگت ءَ آئی ءِ اکس ما چاگردی ترامجاہ ءَ شنگ کرتگ انت –

اھوالکار ءِ رِد ءَ درسیں مردم لٹ شاپ کنگ ءُ اکبر خان بگٹی ءِ اکس ڈلیٹ کنائیں اِتگ انت ءُ پدا یل داتگ بلے لھتے ورنا ھنگت بیگواہ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشانے ءِ تہ ءَ بلنگور ءَ موبائل ٹاور ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ سرمچاراں کیچ ءِ ھند دشت بلنگور ءِ میتگ دلسر ءَ برجاھیں چینی کمپنی ءِ زونگ موبائل ٹاور ءِ سر ءَ اُرش کتگ ءُ سرجمیں مشین ءُ دگہ ازباب مانداشتگ اَنت –

جارکش میجر گوھرام بلوچ ءِ رِد ءَ اے اُرش بیست ءُ پنچ اگست آدینگ ءِ روچ ءِ یک ءُ نیم ءَ کنگ بوتگ، پاکستانی پوج چین ءُ چینی رھوتکاری شرکتانی پارست ءَ ھندی آبادی ءُ بلوچ سرمچارانی چِست ءُ ایراں چار ایت – بلوچستان ءَ موبائل پون ٹاورانی پارست ءَ جیو فنسنگ تکنیک ءِ کارمرز کنگ ءَ ابید پاکستانی پوج آیانی سر ءَ کیمرہ ءُ دگہ چاریگی ازباب بند ایت ءُ بلوچ سرمچار ءُ مردماں چاریت –

جارکش ءِ رِد ءَ اے موبائل ٹاور چہ بلوچ راج ءِ آسراتی ءَ گیش پہ پاکستانی پوج ءَ آسراتی ءِ کِردے پیلو کنگ ءَ اَنت – ایوک ءَ سی پیک دگ ءَ موبائل ٹاورانی مِک کنگ ءِ مول بلوچ جُھدکارانی زانگ ءُ نشان کنگ ءِ ھواری ءَ ھندی چاریگاں کار گرگءَ انت داں کہ آ دُژمن ءِ آسراتی دیگ ءَ گوں تیزی ءَ کار کُرت بہ کن اَنت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچستان لبریشن فرنٹ داں بلوچستان ءِ آجوئی ءَ زورگریں پاکستانی پوج ،آئی ءِ سیت ءُ لُٹ ءُ پُلی شوربندیانی سر ءَ وتی اُرشاں برجاہ دار ایت –

کراچی ءِ دمگ ہاکس بے ءَ پاکستانی پوج ءُ چیریں ادارھانی دست ءَ زورانسری آوار جنگ بوتگیں داد شاہ بلوچ ءِ کھول ءِ نیمگ ءَ مروچی شمبے ءِ روچ ءَ ماری پور ءِ دگ ءِ سر ءَ زھرشانی ءُ نندانک جنگ بوتگ، نندانک ءَ زھگ ءُ زالبولاں ھوار مزنیں کچے ءَ مردماں بھر زرتگ، نندانک ءَ درنگاز کنوکاں سندھ پولیس ءِ بگیری ءَ نارہ جتگ ءُ داد شاہ ءِ یل کنگ ءِ لوٹ کتگ –

ھمے وھد ءَ ماری پور پولیس ءَ بلوچ زالبولانی سر ءَ لٹ شاپی کتگ ءُ بازیں بلوچ زالبول ءُ زھگے دزگیر کتگ انت وھدیکہ چہ پولیس ءِ لٹ شاپی ءَ بازیں زھگ ءُ زالبولے زدگ بوتگ انت –

درنگاز کنوکانی گوشگ ات کہ کراچی ءِ دمگ ہاکس بے ءَ پاکستان ءِ سی ٹی ڈی ادارہ ءَ شپ ءِ دو ءَ گِس ءَ بیڑ برتگ ءُ پت ءُ لوگانی مردمانی دیم ءَ داد شاہ آوار جتگ ءُ بیگواہ کتگ –

زانگ بہ بیت پاکستانی پوج ءُ چیریں ادارھانی دست ءَ زورانسری آوار جنگ بوتگیں داد شاہ ءِ آوار جنی ءَ پد ھما دمان ء کھول ءَ ماری پور پولیس تانہ ءَ ارزی نبشتہ کنگ ءِ جھد کتگ بلے پولیس ءَ ارزی نبشتہ نہ کتگ –

زھرشانی ءَ ھواریں آئی ءِ کھول ءِ گوشگ ات کہ اگاں داد شاہ ءَ جرمے کتگ گڈا سبوتانی ھمراھی ءَ آمیدگس ءَ آرگ بہ بیت –

درنگاز کنوکاں سندھ پولیس ءِ سر ءَ الزام جتگ کہ آھاں زھرشانی سر ءَ پولیس گردی کتگ –

زانگ بہ بیت اے نندانک ءَ بلوچ یکجھتی کمیٹی ءُ وائس فار بلوچ مسنگ پرسنز ءِ پلامرزی ھم گون بوتگ –

پاکستانی پوج ءُ چیریں ادارھانی دست ءَ زورانسری آوار جنگ بوتگیں داد شاہ بلوچستان ءِ دمگ ھزدار گریشگ ءِ جھمنند انت کہ آئی ءَ لھتے سال بیت کہ کراچی دمگ ہاکس بے ءَ نندوک بوتگ –

روکپتی بلوچستان ءِ دمگ سیب ءُ سوران ءُ ایرانشھر ءَ دو مردم دزگیر کنگ ءَ پد بیگواہ کنگ بیتگ اَنت-

گیشیں اھوالانی رد ءَ سیب و سوران ءَ ایرانی چیریں ادارھاں یک مردمے دزگیر کنگ ءَ پد گون وت برتگ کہ چریشی ءَ پد آئی ءِ درگت ءَ دگہ اھوال دیم ءَ نیتکگ اَنت-

آوار جنگ بیتگیں مردم ءِ پجار بیست ءُ چار سالی ئیں ورنا عبدالباسط پرکی ء واھد جھمنند کورناھوت سیب و سوران ءِ نام ءَ زانگ بیتگ-

دمگی اھوالانی رد ءَ چیریں ادارھاں عبدالباسط ءِ سر ءَ سلاہ بندین گلانی ھوار بوگ ءِ بھتام جتگ ءُ برتگ-

ھمے وڑ ءَ چہ ایرانشھر ءَ سَے شمبے ءِ روچ ءَ گوست ءَ نشہ ءِ بھتام ءَ دزگیر کنگ بیتگین ءُ پد ءَ یل بیتگیں مردمے دزگیر کتگ ءُ گون وت برتگ-

اھوالانی رد ءَ آوار جنگ بیتگین مردم ءِ پجات منصور کنبرزئی ءِ نام ءَ زانگ بیتگ-

اھوالانی رد ءَ منصور کنبرزئی ایرانی سال نود ءُ پنچ ءَ نشہ ءِ بھتام ءَ کرد دمگ ءَ دزگیر کنگ بیتگ ءُ چار سال ءَ بندیگ بوگ ءَ پد یل بیتگ-

منصور زاھدان ءِ جھمنند اِنت آ ایرانشھر ءَ روگ ءَ بیتگ کہ پولیس ءِ چوکی ءَ لٹ ءُ کُٹ کنگ ءَ پد گون وت برتگ-

منصور ءِ سر ءَ پولیس ءَ بھتام جتگ ءُ گوشتگ کہ اے مرد ڈیھ ءِ بگیری ءَ کار کنوکیں گلانی ھمکاری ءَ کنگ ءَ اِنت-

زانگ بہ بیت ایرانی پولیس ءَ گوستگیں دو روچ ءَ پیسر ھم جیش العدل ءِ سَے باسکانی دزگیری ءِ ھال داتگ ات بلے آیانی نام پدر نہ کتگ ات اَنت-

کراچی ءِ دمگ لیاری ءَ رینجرز ءِ کارمندانی کوش ءَ گمانی رنگ ءَ بنجاھی جرمکار ءُ شوٹر ءَ ھوار بلوچ آجوئی ءِ جھد ءِ سلاہ بندیں گلانی سَے باسکانی دزگیر کنگ ءِ ٹاہ دیگ بیتگ انت-

پاکستانی پوج ءِ واکداراں ٹاہ دیان ءَ گوشتگ کہ رینجرز ءِ چیرین ونگ ءِ کارمنداں تکنیکی ءِ گون ءَ دو جرمکار کراچی ءِ ھند بلدیہ ٹاؤن ءَ رائیس گوٹھ ءَ دزگیر کتگ انت کہ ایشانی پٹ ءُ پول ءَ پد بنجاھی جرمکار ءِ شوھاز کتگ ءُ بلوچستان ءِ شھر آواران ءَ بیڑ برتگ ءُ بنجاھی جرمکار دزگیر کتگ-

واکدارانی رد ءَ دزگیر کتگیں جرمکار ءَ پرپٹ ءِ پشت ءِ سیٹ ءَ تیرگواری کتگ ءُ رینجرز ءِ کارمند نشانگ کتگ، دزگیر کتگیں جرماکر آواران ءَ ءُ دگہ دو سیادی چہ کراچی ءَ اِنت – جرمکار بلوچستان ءَ آجوئی ءِ سلاہ بندیں گل بلوچستان لبریشن فرنٹ ءَ گوں سیادی کن اَنت-

سکیورٹی بنشون ءِ رد ءَ چیریں ادارھانی کارمند الشاد لیاری ءِ دمگ بھار کالونی ءَ الفلاح دگ ءَ ھپت اگست ءَ تیرگواری کنگ بیتگ ءُ کشگ بیتگ ءُ چریشی ءَ پد جرمکارانی دزگیری ءَ ٹیم شون داتگ-

زانگ بہ بیت اے کارمند ءِ کوش ءِ زمہ واری بلوچستان لبریشن فرنٹ ءَ زرتگ ءُ بلے دزگیریانی درگت ےَ بی ایل ایف ءِ نیمگ ءَ گپ دیم ءَ نیتکگ اَنت-