TBP Balochi

آسروک 28 مئی 1998

نبشتہ کار:ندیم بلوچ

دی بلوچستان پوسٹ

“راسکوہ ءِ اِسپیتیں کوھانی سر ءَ”
“چو کپن پوشیں بلوچ ءِ زندگی”

28سوچکان 1998 ھما روچ اِنت کہ اے روچ ءَ بلوچستان ءِ سرزمین چاگی ءِ دل بند راسکوہ ءِ تَلاریں سِنگ گوں جوھری تراکاں آسشانگ بیت ۔ پاکستان پد ماں پد وتی پنچ جوھری ٹوپ چکّاس Test Experiment ءِ نام ءَ راسکوہ ءِ دلبند ءَ دور دنت ۔ کہ ایشی ءَ چہ دنیگت اود ءِ لس مھلوک چو دلوت ئیگ ءَ مِرَگ ءَ اَنت ۔ ءُ دومی نیمگ ءَ پاکستان ھمُک سال اے روچ ءَ ” یوم تکبیر ” ءِ نام ءَ یات داراِیت ءُ شاتکامی کنت ۔ بلے ما بزانکہ بلوچ اے چیز ءَ بے ھیال مہ بہ ایں کہ بلوچستان ءِ لَس مَھلوک ءَ پہ اے روچ چہ مھشر ءَ کمتر نہ انت ۔ پرچہ کہ اے روچ ءَ چاگی ءِ مھلوک ءَ چم ءِ وت وتی زھگ ءُ مردم مَرگ ءَ دیستگ اَنت ، سرسبز ءُ گُلباگیں زمین سُچگ ءُ ھُشک بیگ ءَ دیستگ ، درچک ءُ سبزاوگ گیمُرگ ءَ دیست اَنت ءُ ایشی ءِ سوب ءَ وڑ وڑیں نادُراھی شِنگ اِت چوشکہ کینسر ، ھُونلاپ (Dysentery ), سْیھ تَپ (Typhoid) , ٹِیبی (Tuberculosis) ،نا سرجمیں چُک ءِ ودی بیگ ءُ دگہ بازیں نادُراھی کہ ایش دنیگت اود ءِ مھلوک ءِ چُکچینی ءِ کار ءَ کنگ ءَ اَنت ۔مرچی ما گندیں کہ اے نادُراھی چاگی ءَ ھوار نوشکی ، ھاران ءُ بلوچستان ءِ دگہ بازیں دمگاں شنگ اِتگ اَنت ۔ پمیشکہ پہ بلوچ راج ءُ بلوچستان ءَ اے روچ ” سیاھیں روچ “Black-day ، یا ” یوم آسروک ” ءِ نام ءَ یاد کنگ بیت ۔

ما وھدے جوھری تراکانی پُشدر ءَ چاراِیں گُڑا اے چیز مارا گندگ ءَ کئیت کہ زورآوریں اِستاناں دائم پہ وتی زُور ءُ تاکت ءِ ماں دُگنیا ءِ دیم ءَ منّارینگ ،دژمنیں اِستان آں وتی زُورمَندی ءِ پیش دارگ ، گُلامیں راجانی چُکچینی ءُ ھمے تاکت ءِ برورد ءَ گُلامیں راج ءِ سر ءَ وتی لُٹ ءُ پُل ءَ برجم دارگ ءِ واستا ھمے دابیں شوربندیانی سر ءَ کاربند بوتگ اَنت ۔ مرچی اگاں بلوچستان ءَ اے دابیں شوربندی کارمرز بوھگ ءَ اِنت گُڑا ایشی ءِ سوب اوں ھمیش اِنت کہ زورآور بلوچ ءِ چُکچینی ءَ کنگ لوٹ اِیت-

وھدے دومی جَھانی جنگ ءَ امریکہ ءَ جاپان ءِ شھر ہیروشیما ءُ ناگاساکی سر ءَ جوھری اُرش کُت گُڑا چہ ایشی ءَ جاپان ءِ سرجمیں شھر تباہ بوت اَنت ، جاپانی لَس مَھلوک ءِ چُکچینی بوت، ناگاساکی ءَ کساس 74 ھزار مردم بیران بوت ۔ھمے داب ءَ ہیروشیما ءَ ۱ لکھ ۴۸ ھزار مردم بیران بوت ، موسُمی جاورال مٹ بوت اَنت کہ چہ ایشی ءَ ھزار دروشُمیں نادُراھی ودی بوت اَنت ءُ جاپان سرجم ءَ تباہ بوتگ اَت ۔سرجمیں دگنیا ءَ وھدے جاپان ءِ تباھی دیست گُڑ اِد ءَ چہ جوھری ٹوپانی سر ءَ یک ترانے بندات بوت کہ جوھری ٹوپانی سرءَ بَندش جنگ بہ بیت کہ اے پہ سرجمیں دُگنیا ءَ تاوان ءُ سانمند اَنت ۔ بلے پاکستان سرجمیں دگنیا ءِ پابندیاں لگتمال کنت پرچہ کہ آئی ءَ امریکہ ءِ مدد ءُ کُمک گوں بیت ءُ 1974 ءَ زلپکار الی بٹھو ءِ سرکار ءِ زمانگ ءَ اے پیسلہ بیت کہ آ ھم جوھری ٹوپ جوڑ کن اَنت ۔ 1983ءَ پاکستان ڈاکٹر عبدالکدیر ھان ءِ چیردستی ءَ وتی جوھری سلاھانی کارءَ بِندات کنت کہ دیمتر ءَ ۲۸ مئی ۱۹۹۸ ءَ پاکستان ءِ وتگڑیں سروزیر نواز شریپ ءُ بلوچستان ءِ نام نِھادیں راجدوست سروزیر اکترمینگل ءِ سربراھی ءَ چاگی ءِ سرءَ جوھری اُرش کنگ بیت بلوچستان ءِ وتگڈیں راجدوستیں گَل (بی این پی ) ءُ آئی ءِ مستر اکترمینگل ءَ وتی گَل ءُ سیاست ءِ رکینگ ءِ ھاتِر ءَ روایتی ھساب ءَ ھمے گپ جَت کہ من سَرپد نہ بیتگ آں کہ چُشیں چِست ءُ ایرے ھَست-

بلوچ راج سرپد بہ بیت کہ وھدے پاکستان ءَ وتی ایٹمی ٹوپ بلوچستان ءِ سرزمین چاگی ءَ چکّاس Experiment اِت اَنت ، ھمے چکّاس جاہ ءَ چہ ۲۰ کلو میٹر دُور لس بلوچ آباد بنت کہ پاکستان آیانی پرواہ ءَ نہ کنت۔ اِدا چہ اے پدّر بیت زالم ءُ زورآوَر ءِ گورءَ گُلامیں راج ءِ زِند ءَ ھِچ اَرزِشت نیست ، آئی ءِ گورءَ گلام ءِ زِندگی ءَ چہ گُلام ءِ زمین ، گُلام ءِ مال ءُ مڈی ، سُھر ءُ تِلاہ گیش اَرزِشت دار اَنت ۔ وَھدے ما جَھانی کانُود ءُ راھبنداں چاراِیں گُڑا آیانی رِد ءَ جوھری چکّاس ھما جاہ ءُ ھَنداں کُت کن اِت کہ اود ءَ ۲۰۰ کلو میٹر ءِ دوری ءَ ھَچ مردمی آبادی مہ بیت ۔بلے پاکستان کہ دُگنیا ءِ مزنیں تاکتانی مُپادانی پاھازوک اِنت پہ آئی ءَ چُشیں پابندی دانکہ جھان ءِ مُپاد گوں آئی ءَ بندوک اَنت ۔ پمیشکا ما گِند اِیں کہ پاکستان پہ بلوچ ءِ کُوش ءَ ھِچ وڑیں راہ ءُ راھبند نہ چار اِیت-

ھمے نادُراھی کہ جوھری تراکانی سوب ءَ ودی بنت مرچی چاگی ، نوشکی ، ھاران ، حُضدار ءُ بلوچستان ءِ بازیں دمگ چہ ایشی ءَ سانمند اَنت ۔ بلوچستان مرچی وَبا ءُ نادُراھیانی بُنجل جوڑبوتگ کہ ایشانی تہ ءَ شومُک گیشتر تُرسناک اِنت ۔ یک رپورٹ ءِ رِدءَ بلوچستان ءَ شومُک ءِ نادُراھی ءِ سَوَب ءَ یک سالے ءِ تَہ ءَ ۳۰۰۰ ءَ بُرز مردم بیران بیت ءُ ھمُک سال کوئٹہ ءِ CENAR اِسپتال ءَ شش ۶۰۰۰ ھزار ءَ گیش شومُک ءِ کیس رپورٹ بیت ۔

یک نیمگے اگاں چاگی ءِ مردُم واری ءُ بزّگی ءِ زندے گوازینگ ءَ اَنت تاں دومی نیمگ ءَ ریاست ھمے چاگی ءِ مال ءُ مڈّیاں ریکوڑک ءُ سیندک ءِ وڑیں میگاپروجیکٹسانی نام ءَ لُٹ ءُ پُل کنگ ءَ اِنت ۔ریکوڈک دگنیاءِ پُنچمی مستریں سُھر ءُ پُوپَل ءِ مڈّیانی کَھن گُشگ بیت ۔ ٹی ٹی سی ءِ پَٹ ءُ پول ءِ رِدءَ ریکوڈک اکتسادی ھساب ءَ ۲۰۲ ارب ٹن ءِ کارآمدیں کَھن ءِ بَھرے ، وَھدے ۲۰۱۹ ءَ انٹرنیشنل کورٹ آف جسٹس ءِ نیمگ ءَ پاکستان ءِ سرا شش ارب ڈالر ملام جنگ بیت تاں آ وھدءَ پاکستان ءِ مالی جاور گیگ نہ بنت گُڑا آئی ءَ چاگی ءِ سرجمیں مادن ءُ مڈی وتی نپ ءُ سیتانی دیناں “بیرک گولڈ” ءَ دات اَنت ۔ اے شوربندی ءِ سرا کساس چِل سال ءَ کار بیت کنت۔ بیرک کمپنی ءِ گشگ اِنت سالے چِداں ۸ کروڑ ٹَن سُھر ءُ تانبا کشگ بیت ۔

دُگنیا ءِ بُندپتر ءَ چہ ھرچ جوھری تراکے بوتگ گُڑا آ مُدام نزوریں راجانی ڈیھ ءِ سر ءَ چکّاسگ بوتگ اَنت بزانکہ آیاں مُدام پہ نزوریں راج ءِ چُکچینی ءِ نیّت ءَ اے دابیں شوربندی کُتگ ۔ ایشی ءِ مستریں درور امیریکہ ئیگ اِنت کہ آئی ءَ جاپان ءَ ھوار ویتنام ءِ ایردستیں مھلوک ءِ سرءَ چُشیں زالِمی کُتگ کہ آئی ءِ مول ءُ مُراد تھنا مھلوک ءِ چُکچینی بوتگ ۔ بلے ھما راج ءِ کہ جزبگ مُھر بوتگ گُڑا آیاں جوھری تراکاں ھم ھِچ سان دور نہ داتگ ءُ زورآور ءِ چنگُلاں چہ وتارا رکّینتگ چوشکہ ویتنام ءِ مھلوک ءَ اے کُتگ ءُ پیشداشتگ کہ آ پہ ایردستیں راجاں سکین اَنت ۔ نوں بلوچ راج ءَ لوٹ اِیت کہ آ اِستان ءِ اے دابیں شوربندیانی بگیری ءَ بہ اوشت اَنت ءُ جدوجھد بہ کن اَنت ۔ پرچہ کہ بلوچ ءِ گورءَ گھگیری ءَ اَبید ھِچ راہ پش نہ کپتگ ءُ دُگنیا ءِ تہ ءَ چُشیں درور مارا ھم دست نہ کپ اِیت کہ زورآور وت دراَتکگ اَنت ءُ شُتگ اَنت ۔ چوش بہ نہ بوتگ ۔ اگاں مرچی گُلامیں راجاں وت ءَ زورگیر ءِ دست ءَ آجو کُتگ گُڑا آیاں کُربانی داتگ ۔ اگاں گھگیری نہ کُت ءُ کُربانی نہ دات گُڑا آ ریاست آرام ءِ سرءَ تئی زمین ءِ مال ءُ مڈّیاں پُل اِیت تئی چُکچینی ءَ کنت ۔ کہ اے چیز بلوچستان ءِ تہ ءَ پدّر اَنت ءُ مئے دیم ءَ اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

آس روک

نبشتہ کار: باھڈ بلوچ

دی بلوچستان پوسٹ

28 مئی 1998 ھما روچ اِنت، کہ بلوچ راج اے روچ ءَ آس روک ءِ نام ءَ یات کنت ،ھمے روچ ءَ بلوچ ءِ سرڈگار راسکوہ ءِ دلبند ءَ زالمیں استان پاکستان کہ بلوچ ءِ سرڈگار ءِ سر ءَ زورگِر اِنت، وتی جوھری تاکت atomic bomb test ) ءَ چکاس ایت۔ زالم ءُ مزلوم ءِ میان ءَ ھمے کینگ، جہد ، جنگ کہ جُنزگ ءَ اِنت پہ وتی سرڈگار ءِ آجوئی ءَ دُژمن ھرچ وھد ءَ ھمے جہد ءَ کنت کہ کُجا نہ کُجا من ھمے جہد ءَ ھلاس بہ کن آں جھد ءَ گوں بندوکیں مردم ءُ گلاں ولگوج بکن آں آیاں چہ گیدی ءِ دلبند ءَ ھلاس بہ کن آں۔ ایشی ھلاس کنگ ءُ بلوچ ءِ نیزگار کنگ ءِ ھاتر ءَ ریاست وھد وھد ءِ تہ ءَ نوک نوکیں ءُ جتا جتائیں شور بندی اڈ دَنت چمے شور بندیاں یکے دُژمن ءِ جوھری تاکتانی آزمودگ کاری اِنت کہ دُژمن بلوچ ءِ سرڈگار ءِ سر ءَ کنت اِش ۔ ھمے جوھوری تاکت بلوچ چکچینی (نسل کُشی) ءِ سبب جُوڑ بنت کہ دُژمن پہ زانت بلوچ ءِ سر ءَ ءِ نَسل کُشی یے وبا ءَ دُور دنت ۔ گواچنی بلوچ ھما اِنت کہ اِیردست اِنت مرچی بلوچ ءِ ایردستی ءَ 74 سال سرجم اِنت اے سالانی تہ ءَ جِتاجِتائیں دروشماں بلوچ ءِ چکچینی کنگ بوتگ ءُ انگہ بوئگ ءَ اِنت ، چمے دروشماں چہ یکے ھمے زورگیریں ریاست ءِ جوھری تاکت (atomic bomb) اَنت کہ دُژمن بلوچ ءِسرڈگار ءِ سر ءَ کارمرز اِش کنت۔ گواچنی اگاں ما دُگنیا ءِ بندپتر ءَ بِچاریں گُڑا مارا گِندگ ءَ کیت کہ ھَرچ ھما استان کہ سوپر پاؤر انت ءُ وتی جوھری تاکتانی واھُند انَت گُڈا دگنیا ءِ کانودانی رِد ءَ آیاں وتی atomic bomb ھما جاگہ ءَ چکاس ات کُتگ انت کہ دنیاءِ کانودانی ھساب ءَ آیانا اِجازت دیگ بوتگ ، دگنیائی ھمے کانود کہ پہ استاناں جُوڑ کنگ بوتگ انت آیانی رِد ءَ یک استان ءِ وتی جوھری تاکت ءَ ھما جاہ ءَ چکاس ات کُت کنت کہ اودا ۱۰۰۰۰۰ کِلومیٹر ءَ چہ گیش دوری ءَ بنی آدم جھمنند مہ بنت ، یا زر ءِ آپ ءِ ھما جاہ ءَ کہ چہ اود ءَ ھم اِنسانی آبادی اے کساس ءَ دُور بہ بنت، ءُ الّم نہ اِنت کہ ءَ زمین کہ جوھری تاکت اودا چکاسگ بوگ ءَ اِنت ھما زوراکیں استان ءِ وتی بہ بیت بلکیں استان چہ وتی ھمساھگیں استان ءُ دُگنیا ءِ دگہ استاناں چہ اوں جاگہ لوٹ ات کت کنت کہ اودا وتی جوھری تاکتاں چکاس ات کُت بہ کن انت۔ جاپان ءِ سر ءَ ایٹمی ارش کنگ ءَ پیسر امریکہ میکسیکو ءِ رِیگستانی ءَ وتی جوھوری تاکت ءَ ٹیسٹ کنت کہ اودا چہ ۱۰۰۰۰۰ کِلومیٹر دور اِنسان جھمنند نہ انت، ءُ امریکہ وتی تجربہ ءَ سوبمند بیت گُڑا دیمتر ءَ جاپان ءِ سر ءَ وتی جوھری ارش ءَ کنت ۔

بلے ما وھدے پاکستان ءَ چاریں گُڈا وھدے کہ پاکستان وتی جُوھری تاکت ءَ جُوڑ کنگ ءَ بیت ۱۹۷۶ ءَ ، آ وتی سائنٹسٹانی ٹیم ءِ کہ آئی تہ ءَ دو سائنٹسٹ بنت سرفراز نامیں فوجی سروکے ءِ پاگواجہی ءَ بلوچستان ءَ دیم اِش دنت کہ آ بلوچستان ءَ پہ جُوھری تاکت ءِ چکاسگ ءِ واستہ جاگہ ءِ گِچین بہ کن اَنت ، اے گل فوجی کماندار ءِ سروکی ءَ بلوچستان ءِ جِتاجِتائین دمگ ءُ ھنداں گرد انت آ ھاراں ، ھزدار ، لسبیلہ ، پنجگور ، کلات، چاگی ءُ دگہ بازیں دمگاں پٹ ءُ کوھی جاگہاں چار انت ءُ چاگی ءِ راسکوہ ءَ پہ جُوھری تاکت ءِ چکاسگ ءَ گِچین کن انت ءُ اودا کار کنگ ءَ بِندات کن انت ۔ ھمے زمانگ ءَ چہ چاگی ءَ وتی فوجی بنجلاں گیش کناں کنت وھد وھدانی سر ءَ وتی کچ ءُ کساس ءَ گیش کن انت ۔ بلے ۲۷ مارچ ءَ بِزان کہ ۲۸ مارچ ءِ شپ ءَ ھزارانی کساس ءَ پاکستان گوں وتی آرمی ءَ چاگی ءَ دُور کنت راسکوہ ءِ کَش ءُ گُور ءِ دُرستین لوگ ءُ ھندی مردمان چہ گِساں در کنت بارت ھورکین میدانی ءَ مُچ کنت ، بزگیں مھلوک ءِ ھیال ءَ نہ بیت کہ زورگیر پہ منی کُشگ ءَ منا چہ لوگ ءَ در کنگ ءَ اِنت ، ھمے بزگ ءُ نیزگاریں مردُم کہ لوگاں چہ در کنگ بنت گُڑاں گوں زورگیر ءِ فوجی ءَ دست بندی کن انت کہ مارا اِجازت بِہ دے اِت ما وتی ساماناں زوریں گُوں مئے سرجمین زند مئے مال ءُ مِلکت ھمے لوگاں انت ، ما وتی مال ءُ دلوتاں گُوں وت زوریں بلے زالمیں پوج کہ آ پہ تئی نسل کُشی ءَ اتکگ تئی وُجود ءَ گار کنگ ءِ شُوربندیاں گُوں اتکگ آئی کِرِا تئی مال ءُ دلوت ، پس ءُ گُوکانی زندگی ءِچُونیں بِستارے بیت ۔ اے شپ پہ چاگی ءِ مہلُوک ءَ چہ کِیامت ءِ آ کَم نہ بیت کہ دُرست چہ لوگ ءَ ڈن گرمے سر ءَ کپ انت چُو بے آپ ایں ماھیگ ءَ پلپٹ انت بلے پہ ورگ ءَ گُٹ ءِ آپ ھم دیگ نہ بیت اِشان آں ،شیِر مِچین زھگ سرجمیں شپ چہ گُژں ءَ گِریونت بلے زاِلم ءَ ھِچ سُد ءُ سما ءِ گٗور نیست۔ ءُ راسکوہ ءِ نزیک تریں دمگ کہ “رائیو” اِنت چہ راسکوہ ءَ تھنا ۱ کِلومیٹرے ءِ دُوری ءَ اِنت ءُ ایشی ءِ نِندوک این مھلوُک چاریں نیمگ ءَ ٹٹ کنگ بنت ءُ ڈن ءُ دران روگ ءِ ھچ وڑیں اِجازت دیگ نہ بنت ۔ ھمے مردم کہ لوگ ءَ چہ در کنگ ءُ پٹ ءَ یکجاہ کُنگ بوتگ انت ھزارانی ھِساب ءَ آرمی والہ چاریں نیمگ ءَ نگھبانی کنگ ءَ انت، ءُ ھما دمگ کہ راسکوہ ءِ بگل ءَ اِنت اُودے مھلُوک چاریں نیمگ چہ ٹٹ کنگ بوتگ انت ، ھمیشان چہ وھدے جُوھری ارش ءَ چہ پد جُست کنگ بوتگ چہ اِھوالکار ءُ دَگہ ڈنّی دری پٹءُ پولکاراں گُڑاں ایشان درَّائینتگ کہ ھمے روچ ءَ کہ ما چہ لوگاں در کنگ بوتگ اِنت گٗڑاں دھمی روچ ءَ بِزانکہ ۲۸ مئی ءَ ما چار ۴ بَلاھیں گِرانیں آواز اِش کُتگ کہ چہ راسکوہ ءِ نیمگا اتکگ انت ءُ چَرے آوازاں پد بلاھیں بزیں دُوت ءِ چہ راسکوہ ءَ چِست بوتگ دیم پہ آزمان ءَ گُوں جمبر اں ھوار بوتگ۔ءُ ایشی ءَ ابید ۳۰ مئی ءَ دِگہ انچیں دھماکہ ءِ آواز چہ کوہ ءِ کمبران ءَ اتکگ ءُ کوہ کمبران ءِ راستیں نِیمگ ءَ یک کِلّی ءِ است کہ ۳،۴ کِلومیٹرے دوری ءَاِنت اِدے مردُمانی گُشگ اِنت کہ وھدے دھماکہ بوتگ گُڑاں ما کوہ کمبران چہ زمین ءَ سِدگ ءَ دیستگ کہ چہ زمین ءَ سِستگ ءُ بُرز بوتگ پَدا واتر کہ جَھل ءَ کپتگ گُڑاں زمین ءِ توکا شُتگ ۔ ءُ لھتیں جُوھری سائنسدانانی گُشگ اِنت کہ وھدے یک مُلک ءِ وتی جُوھری تاکت ءِ تجربہ ءَ پہ جاگہ ءِ گِچین کنت گُڑاں اودا سالانی سال کار کنت تاں ھمے ریز (radiation)کہ چہ جوھری تاکت ءِ تِراک ءَ رند شِنگ بنت اے دیم پہ اِنسانی آبادی ءَ سر مہ بنت ۔ بلے ما وھدے پاکستان ءَ گِندیں گُڑا گِندگ ءَ کیت کہ ھمے گار پہ جُوھری سلاھانی آزمودگ کاری ءِ واستہ بُرّگ بوتگ اے انچو جُوڑ کنگ بوتگ کہ ھمے (radiation) آں داشت مہ کن انت ءُ ھمے زھر ءَ پُرایں Radiation دیم پہ آبادی ءَ سر بہ بنت داں بلوچ راج ءَ وڑیں وڑیں جیڑھانی آماچ ءُ بلوچ ءِ زند ءَ جھندم جُوڑ بہ کن انت۔ ءُ مرچی مارا گِندگ ءَ کیت کہ زالم گُوں وتی شُوربندی ءَ سُوبمند بوتگءُ بلوچ انچو بزگ کُتگ کہ مرچی ھمے (radiation ) آں چہ ھزارانی کَساس ءَ بلوچ مرگ آماچ بوگ ءَ انت ءُ ھرکس کہ زندگ اِنت گُڑاں انچین نادُراھیانی آماچ انت کہ ایشانی درمان ھم نیست ءِ مُلک ءَ ناپُرسان ءَ پاکستان ءِ جُوھری ٹوپانی آزمودگ کاری ءِ بلوچ راج ءِ سر ءَ سان۔

چاگی بلوچستان ءِ ھما دمگاں چہ یکے بوتگ کہ اود ءِ مھلوک وتی زندگی ءَ گُوں وشھالی ءَ گُوازینگ ءَ بوتگ، وشھالی ءِ گال بِگندے گُون اِیردستیں راج آں پِٹ مہ بیت کہ اِیردستی ءُ وشھالی بوت نہ کنت ، بلے پہ چاگی ءِ مھلُوک ءَ ھمے زند کہ آ گُوازینگ ءِ بوتگ انت یک پُر ایمنیں زِندے بوتگ کہ مھلوک گوُں ڈگار ءُ مال دلوتاں وتی گُلامی ءِ چاریں روچاں گُوازینگ ءَ بوتگ ءُچہ بے سر ءُ پادیں نادُراھیاں پاک ءُ پلگار بوتگ ۔

بلے راسکوہ ءَھمے جُوھری سلاھانی آزمودگ کاری ءَ پد چاگی ءِ مھلوک ءِ زند ءِ تب ءُ میل پہک بدل بیت، ءُ بلوچ ءِ نسل کُشی ءِ نوکیں رنگ ءُ دروشم ءِ دیم ءَ کیت ءُ نوکین وڈ ءُ ڈولاں گُوں بلوچ ءِ راجمانی ءُ روزیگی لُٹ ءُ پُل بِندات بیت کہ داں روچ مروچی برجاہ اِنت ۔ اے نَسل کُشی ، راجمانی ءُ روزیگی جیڑہ چہ جُوھری سلاھانی تِراک ءَ پد شِنگ ءُ تالان بوتگیں radiation آں چہ بِنا بنت ، زانتکارانی گُشگ ءِ رِدا وھدے کہ جاھے ءَ radiation تالان بنت ھرچ ھما دلوت کہ ترا سما بیت ھمے radiation آنی سوب ءَ نادُراہ بوتگ انت کُشگ بہ بنت ، ھرچ ھما سبزی ، کہ آھانی سر ءَ ھمے گُماں بیت کہ ھمے radiation آنی زَد ءَ اتکگ انت کارمرز کنگ مہ بنت، ھرچ ھما چمّگ کہ سَما بیت آھی آپ ءِ تہ ءَھم ھمے radiation ءِ سان اَست اِنت پہ ورگ ءُ جان شودگ ءَ کارمرز کنگ مہ بنت ۔ بلے وھدے چم کہ چاگی ءَ کپ انت گُڑاں سما بیت کہ چاگی ءِ دلوت ،کاہ ءُ کاھچر، سبزی ، ، آپ دُرست ھمے radiation ءَ وتی زد ءَ کُتگ انت ءُ چاگی ءَجُوھری اسلاھانی کارمرزی ءِ سوب ھمیش اِنت کہ چاگی سرجم ءَ ھمے radiation آنی زد ءَ بئیت داں سرجمیں مھلُوک نیزگار،نادراہ ءُ نیست ءُ نابود بہ بیت ۔ ھمیشانی سوب ءَ چاگی ءَ ھرچ کسان تان مزنین ھلک ءُ میتگ آں ھزاران مردُم مِرگ ءَ اِنت ، مرگ ءِ سوب ھمیشی چہ شِنگ بوتگیں نادراھی کہ ءَ شومک(کینسر)، گُٹ ءِ کچگ، پونز ءِ ھُون دَیگ، چمانی کمزُور بووگ ءِ دُرست ایں نادراھی چہ ھمے زَھر ءَ پُرایں radiation آں چہ تالان بوتگ انت کہ روچ مروچی لاکھانی کساس ءَ چاگی ءِ ھرچ کماش ،پیر ءُ ورنا، زالبول ءُ تِپل کس چہ ءِ نادُراھیاں نہ رک اتگ، وڑوڑیں نادُراھیانی آماچ انت ءُ پدا بد بہتی اِش اِنت کہ گُلامیں راج ءِ گُوارا پہ اے نادراھیانی اِلاج ءَ ھم ھچ وڈیں وس نیست ھمے نادراھی انت ھمُک روُچ مارا کُشگ ءَ اَنت،مروچی چاگی ءَ ھرچ ھما زھگ کہ ودی بیت ھمے radiation آنی سوَب ءَ گُوں ودی بوگ ءِ ھوری ءَ یک نادراھی ءِ آماچ اِنت ، مروچی چاگی ءَ کسان کسان دُرست مازور جُوڑ انت،
اے دُرست ھمے نسل کُشی ءِ دِرچ انت کہ دُژمن ءَ مئے سر ءَ مُشتگ۔

دُومی نیمگ ءَ اگاں روزیگی جیڑھاں چارے گُڑاں گِندگ ءَ کیت ھما مردُم ،ھما گِس کہ مالدار بوتگ انت ھریکی ءِ کرا ۲۰۰،۳۰۰ ءِ کچ ءَ مال ءُ دلوت بوتگ مرچی یک لُنُکہ ءِ نان ءَ چمدار انت بے کساس بیماری آں گُور جتگ انت پہ اِلاج ءَ مال ءُ زر نیست ایشی ءِ سُوب اِش اِنت کہ ھمے ۲۸ مئی ءِ شپ ءَ جوھری سلاھانی چکاسگ ءَ رند سرجمیں مھلُوک ءِ مال ءُ دلوت آرمی والاھاں دُزّی کُتگ ءُ گُوں وت بُرتگ انت ءُ ھرچ دلوت ءِ چہ آرمی والاھاں رکِّیتگ گُڑاں ھمے radiation آنی زَد ءَ اتکگ ءُ مرتگ انت یا انچین نادراھیاں گور جتگ انت کہ ھِچ کارا نَیتکگ انت مَنڈی والا آں ھم پہ بھا نَزُرتگ انت اگاں لہتین منڈی والاھاں زُرتگ انت گُڑاں پنچ ہزار ءِ پس پہ پنچ سد ءَ زرتگ انت ءُ مھلوک انچو لاچار بوتگ کہ دَگہ ھچ راہ پشت نہ کپتگ بیدے ھمیشی سرجمیں مھلوک ءَ وتی بچِّیتگ ایں دلوت کہ ءَچہ آرمی ءُ radiation آں رکیتگ انت لیلام اِش کُرتگ انت ءُ پہ وت دو دپار نان کُتگ انت ۔ ھما مردُم کہ زمیندار بوتگ انت آھانی سرجمیں زند گُوں ھمے زمین ءِ کِشت ءُ کشاری ءَ بندوُک بوتگ چہ ھمے زمین ءَ ھرچ وڑیں سبزی ءُ میوہ اِش رودینتگ ءُ وتی ھَند ءَ ابید شال ءُ دِگہ کَش ءُ گُور ءِ منڈی اِش آباد کُتگ انت ، بلے مرچی سرجمیں ۲۶ سال اِنت ءَ زمین ھُشک انت اِدا ھِچ وڑیں سبزی یا دَگہ کِشت ءُ کِشاری نبیت ھمیشی سُوب َءَ پِراہ ءُ زمینانی واجہ انچو لاچار انت کہ پہ وت دو وھدے نان ءَ شُوھاز کُت نہ کن انت رُوزیگی دُرستیں دَر زالم ءَ گوں وتی جوھری تاکت ءِ چکاسگ ءِ شُوربندی ءَ بند کُت انت ءُ سرجمیں چاگی گُوں راسکوہ ءِ دلبند ءِ ماندارگ ءَ یکجاہ اِشکر کُت کہ مروچی تاں ھم بُن اِنت ءُ وڈوڈ ءَ بلوچ ءَ مانداراگ ءَ اِنت برے گوں نادراھیءَ ءُ برے گوُں شُد ءُ تن ءَ ۔

چرے ءِ سرجمیں کسھاں پدّر بیت کہ 28 مئی بلوچ ءِ راجدپتر ءِ تہ ءَ پہ بلوچ ءَ پاکستان ءِ نیمگ ءَ چہ بوتگیں نسل کشی ءِ یک نوکیں شوربندی ءِ بلے پاکستان ءِ تاریک دان ءُ سیاستداں ھمے روچ ءَ پہ ٹھل دار انت کہ ھمے روچ ءَ پاکستان ءَ وتی ھمساھگ ءُ دُژمن ایں مُلک انڈیا ءُ دنیاءِ دِگہ تاکتورین مُلکانی دیم ءَ وتی جُوھری تاکت ءِ تجربہ گوں سوُبمندی ءَ کُتگ ءُ وتارا دُگنیا ءِ تاکتوریں مُلکانی گوما ھمکُوپگ کُتگ_ھمدا پاکستانی مھلُوک 28 مئی ءَ گُوں وشی آں دارگ ءَ بوتگ بِگندے لاھور ءُ اِسلام آباد ءِ گلی آنی توکا چہ وشی ناچ ءُ گانا جنگ بوتگ بلے اودا بلوچستان ءِ دِلبند ءَ آس روک بوتگ راسکوہ ءِ واہ ءُ زاری بِگندے تہنا چاگیءُ ھاران ءَ اِنّا بلکہ بلوچستان ءِ کُنڈ کُنڈ ءِ کوھاں سر بوتگ انت ھما کوہ کہ بلوچانی پناہ گاہ انت اے روچ ءَ پہ راسکوہ ءِ آس ءَ گیمرتگ ءُ مُلور بوتگ انت کہ راسکوہ بلوچستان ءِ مات کوہ آں چہ یکے کہ اودا آس روک اِنت کہ تُسگ ءِ نام ءَ نزانت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چاغی ءِ سُتکّگیں دلبند

نبشتہ کار: زِر ملار بلوچ

دی بلوچستان پوسٹ

بیست ءُ ھشت مئی ھما روچ اِنت کہ بلوچ راج اے روچ ءَ (یوم ءِ سیاہ) ءِ روچ ءَ یاد کنت ءُ پاکستان اے روچ ءَ یوم ءِ تکبیر یاد کنت۔ اے ھبراں چہ لھتے جست پاد کیت۔ چوشکہ پاکستان ءَ بلوچ ءِ سرزمین ءِ سر ءَ ایٹم بم ءِ ٹیسٹ کجام ھاترا گِیچین کتگ ؟ ریاست ءُ بلوچ قوم ءِ سیادی چے اِنت؟-

۲۸ مئی ۱۹۹۸ ءَ پاکستان ءَ بلوچستان ءِ شھر چاغی ءَ راسکوہ ءِ دلبند ءَ ایٹم بم یا کہ (جوھری ہتھیاریانی) تراک کنگ بیت ءُ راسکوہ ءِ دلبند ءَ آس روک بیت۔ چاغی ءَ ابید سرجمیں بلوچستان ایٹم بمب ءِ  سوب ءَ سانمند بیت۔ روچ ء مروچی  ءَ  بلوچستان آس ءِ تہ ءَ سُچگ ءَ اِنت۔اگاں ما ھما سرجمیں ملک ءَ بچاریں کہ اے وھد ءَ ایٹم پاؤر جوڑ اَنت چوشکہ امریکہ ،روس ، بھارت ءُ برطانیہ، دراھیں ملکاں جوھری تراک وتی جند ءِ سرزمین ءِ سرا نہ کتگ بلکیں ایردستیں سرزمینانی سر ءَ کتگ اَنت۔ اد ءَ چے زانگ بیت کہ کُلّیں کبزہ گیراں ایردستیں سرزمین وتی تجربہ گاہ جوڑ کتگ اَنت۔ امریکہ  دومی جھانی جنگ ءِ سوب مندی ءَ چے پد جوھری تراک (ٹیسٹ) ءَ وتی ایردستیں زمین مارشل آئی لینڈز ءِ سر ءَ کنت۔ روس 400 ءَ چہ گیش جوھری تراک قازک قوم بزانکہ شمالی قازقستان ءِ سرزمین ءِ سر ءَ کنت۔ چین وتی جوھری تجربات لوپ نر سرزمین ءِ سر ءَ کنت کہ چین ءِ کالونی بیت۔ فرانس وتی جوہری ٹیسٹ ءَ الجزائر ءِ سرزمین ءِ سر ءَ کنت کہ یک وھدے فرانس ءِ ایردست بوتگ۔ پاکستان ءِ کِرا زمین سک باز اِنت نیوکلئر ٹیسٹ کنگ ءِ ھاترا پنجاب ، سندھ ، کے پی کے  ءُ شمالی وزیرستان ءِ پَٹ ھست اَنت بلے اے وھد ءَ بلوچستان پاکستان ءِ کالونی اِنت ءُ کالونی چوناھیگا تجربہ گاہ جوڑ کنگ بوتگ اَنت۔ ایٹمی بم  ءَ چے ابید پاکستان وتی گیشتریں میزائلانی ٹیسٹاں بلوچستان ءِ سرزمین ءِ سر ءَ کنت۔ کبزہ گیراں ایردستیں سرزمین وتی تجربہ گاہ جوڑ کتگ ءُ زمین تباہ ءُ برباد کتگ اَنت وڑ وڑیں بم تراک ، راکٹ لانچر ، ایٹم بم ایردستیں راجانی سرزمین ءِ سر ءَ ٹیسٹ کنگ بوتگ اَنت۔

ھمے وڑ ءَ پاکستان وتی جوھری ٹیسٹ ءَ بلوچستان ءِ سرزمین ءِ سر ءَ کنت۔ 28 مئی ءِ ایٹمی دھماکہ بلوچ گلزمین ءِ گِچین کنگ اتتپاک نہ بوتگ بلکیں دژمن ءِ پلان بوتگ۔آ بلوچ ءَ وتی دژمن سرپد بیت ءُ گلام ءُ زوراک ءِ سیادی ھمے داب ءَ بیت۔ پمیشکا پاکستان ءَ وتی میتگ ءِ مردمانی زند ءِ رکینگ ءِ ھاترا وتی ھندانی سرا ایٹمی تراک نہ کتگ۔

ایٹمی دھماکہ ءَ پد بلوچ قوم ءِ اسرات۔ ایٹمی تراک بلوچ ءِ چُکچینی ءِ تچکیں رھبند ے، ایٹمی تراک ءَ پد دراتکگیں کیمیکل ، ریزوڈیل ریڈیشن، یورینم ءُ ائرن مٹریل سرجمیں چاغی ءَ آس دیان انت ءُ روان اِنت۔ مرچی مارا گندگ ءَ کیت کہ شومک ( کینسر )ءِ بیماری گیش بوان اِنت۔ کینسر آماچیں مھلوک ودّان اَنت ۔ شومک ءِ بیماری ءِ سبب ھزارانی ھساب ءَ مردم بیران بوتگ اَنت ھزارنی ھساب ءَ نادراہ اَنت۔ ناں کہ اد ءَ چوشیں کینسر اسپتال جوڑ کنگ بوتگ کہ مردم وتی زند ءَ رکینت کت بہ کن اَنت۔ ایٹمی دھماکہ ءَ چہ پد آپانی چمگ ھشک بوتگ اَنت یا نزور ترتگ اَنت۔ چاغی ءِ سبزیں جنگل ءُ درچک ءُ دار ھشک بوتگ اَنت۔ ناں کہ اے زمین کشت ءُ کشاری ءِ واستا کارآمد اَنت۔ ایٹمی دھماکہ ءَ  چے پد انسان وڑ وڑیں بیماری ءِ آماچ بیت پہ درور انسان ءِ جگر ھراب بنت، ساھیں زیرگ ءِ مسلہ بیت، اسکن ءِ نادرھائی، بلڈ کینسر ءِ مردم آماچ بنت، پاد ءُ دست ءَ چے مردم مازور بنت، چمانی نادرھائی بیت ، اگاں نوکیں چُک ءِ ودی بہ بیت آ نیم انسان بیت۔ ایٹمی دھماکہ ءِ سبب ءَ چاغی ءِ قدرتی نزام ڈالچار بوتگ۔ موسم رد ءُ بدل انت ، گرمی ءُ سردی بے موسم انت۔ ھئور نہ بوئگ ءِ برابر اِنت۔ ایٹمی تابکاری یک مزنیں تاوانے ڈاکٹر پاؤلوایم بوس گوش اِیت کہ” ھمے دلوت کہ تابکاری ءِ اماچ بوتگ اَنت آ کوشگ بہ بنت“ بلوچستان ایٹمی ھتیارانی بنجل جوڑ کنگ بوتگ ۔ اے ایٹمی دھماکہ ءَ بلوچستان تباہ بوتگ دومی پاکستان ءَ ایٹمی ھتیار ءُ بیلسٹک میزائل بلوچستان ءِ ھند خضدار ءَ مزنیں ٹھکانھے جوڑ کتگ۔ ۱۱اگست ۲۰۱۶ءَ دی بلوچستان پوسٹ وتی رپورٹ ءَ جاری کنت کہ امریکہ ءِ یک تحقیقی ادارہ the institute for  science international security)وتی رپورٹ ءَ شنگ کنت ءُ گوش ایت کہ پاکستان ءَ میزائل ءُ کیمیائی ھتیار زیرزمین بنجل جوڑ کتگ ءُ ایر کتگ اَنت۔ ھمے ایٹمی بمباں چہ وھد ءِ ھمرائی ءَ یورنیم ءُ کیمیکل درکائنت ءُ انسان وڑ وڑیں نادرھائیانی آماچ بنت۔ایشانی یکجاہ کنگ ءَ بلوچستان ءِ تہ ءَ بلوچ قوم ءَ مزنیں تاوانے رس اتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وانگ ءُ زانگ ءِ پِڑ ءَ ماشکیل ءِ پدمنتگی

نبشتہ کار: مھراللہ بلوچ

دی بلوچستان پوسٹ

انچوش کہ ما شما درست سرپدیں کہ بیست ءُ یکمی کرن ءُ اے پُر آشوبیں دور ءِ تہ ءَ مئے ءُ شُمئے زندگی ءِ تہ ءَ تعلیم ءَ را چنکریں ٹوھین اھمیت ءُ پزیلتے ھست اِنت دنیا ءِ تہ ءَ ھر کُجا کہ یک مُلکے یا راجے دیمروئی کرتگ ءُ تاں جاہ ئے سر اِنت آئی ءِ بُنیادی سبب وانگ ءُ زانگ اِنت ۔ دنیا ءِ تہ ءَ ھچ چُشیں ملک ءُ قومے نیست کہ آ ابید وانگ ءُ زانگ ءَ دیمروئی بکنت، ھمے علم ءُ وانگ ءِ برکت اِنت کہ مروچی انسان ءَ ھمے اندازہ دیمروئی کُرتگ کہ آ تاں ماہ ءَ سر اِنت۔ دنیا ءِ تمامیں مزنیں عالم، زانتکار ءُ دانشوراں مھلوک ءَ را وانگ ءُ علم ءِ دربرگ ءِ سِکین داتگ ءُ ھمے وڑا مارا مئے دین ھم علم ءِ دربرگ ءَ جھد ءُ کوشست ءِ تعلیم ءَ دنت۔ واجہ رسول اللہ صہ ءِ فرمان اِنت کہ اگاں یک شکسے ءِ علم ءِ دزگرگ کنگ ءَ یک نیمگے یا یک راھے در کیت گڑا اللہ پہ آئی ءَ جنت ءِ راہ ءَ آسان کنت۔ وھدے کہ واجہ رسول اللہ سر ءَ اولی گَشت ءَ وھی بیت گڑا گوشگ بیت “اقرا” چوشکہ بوان-

تعلیم انسان ءَ رُژناہ پکر کنت ءُ یک بھتریں انسانے جوڑ کنت ءُ پد ءَ ھمے جوانیں انسان جوانین چاگرد جوڑ کن اَنت ءُ جوانیں راج تشکیل دے اَنت۔ وانگ ءُ زانگ پہ مرد ءُ جَن ءَ یک وڑا المی اِنت۔ گوشگ بیت کہ راج ھما وھد ءَ وانندگ بیت کہ آئی ءَ جَنین زھگ ءُ زالبول وانندہ بہ بنت۔

ابید وانگ ءَ مردم چو کور ءَ اِنت ، بِل کہ زاھری ھساب ءَ چم ئے بہ بیت ھم بلے شہ بے تعلیمی ءَ نہ گِندیت پمیشا گوش اَنت۔ تعلیم انسان ءَ شَئور دنت، تعلیم مردم ءَ را شہ وتی جندا روشناس کنائین ایت ءُ انسان وتی بارہ ءَ زانت ءُ گیشتر جستجو کنت۔تعیلم مردم ءِ اکل ءُ فھم ءَ شاھیگان کنت ءُ مردم گیشتر پگر ءُ سسّا کنت، سوال کنت۔ وانندگی اِنت کہ انسان ءَ گوں وتی چاگرد ءِ مردمان ءُ گوں تمامیں انسانیت ءَ مھر ءُ دوستی ءِ سِکین ءَ دنت۔مردم ءَ را قوم دوستی ءُ وطن دوستی ءِ سبق ھم شہ وانندگی ءَ رس ایت۔ شہ ھمے زانگ ءَ مردم وتی بُنکی ھکاں سرپد ءُ زانتکار بیت۔ دنیا ءِ ایدگہ راجانی وڑا مئے راج ھم باید وانگ ءُ زانگ ءَ وتی مستریں واھگ جوڑ بکنت۔پرچیکہ کامیابی ءُ ترقی گوں علم ءَ بندوک اِنت۔باید ما گِس گِس ءَ بہ گرداں ءُ مھلوک ءَ را وانگ ءُ زانگ ءِ ارزشت ءَ بگشیں اے مئے درستانی راجی زمہ واری اِنت کہ ما بلوچستان ءِ کُنڈ کُند ءَ ھر کُجام کوچگ ءُ ھلک ءُ میتگاں مھلوک ءَ را سرپدی بہ دئیں۔ ھاس منی شہ ماشکیل ءِ مردماں دزبندی اِنت کہ آ تعلیم ءِ اھمیت ءَ بزان اَنت ءُ وتی بچک ءُ جنکیں زھگاں بوانین اَنت پرچاکہ اے دور ءِ لوٹ ھمیش اِنت۔ انچوش کہ ما گِندگیں مئے مردمانی روزگار گوں باڈر ءَ بندوک اِنت بلے آھاں پہ وانگ ءُ زانگ ءَ ھچ سُد پِر نیست۔ ماشکیل ءِ مردم وتی ھمساھگیں علاقہ واشُک ءُ خاران ءَ بچار اَنت کہ اود ءِ مردم نہ باڈر ءِ واھُند اَنت و نا زر و مال ءِ ھساب ءَ ماشکیل ءِ وڑا اَنت۔ ماشکیل ءِ مردماں اے گُنجائش ھم ھست کہ اگاں بہ لوٹ اَنت وتی زھگاں پہ وانگ ءِ ھاترا کوئٹہ ءُ کراچی ءَ دیم دات بکن اَنت۔ دومی نیمگ ءَ ما گِنداں کہ چہ ماشکیل ءِ مھلوک ءَ واشُک ءُ خاران ءِ تنگدست ءُ غریبیں مردم گیشتر پہ وتی زھگانی وانینگ ءَ کوشست کن اَنت ءُ آوانی زھگ مروچی ھر کُجا دیما اَنت ءُ وانگ ءُ زانگ ءِ پڑا وترا منینتگ اِش ما اے گپّ ءَ ھم سرپداں کہ مئے ءُ شُمئے الاکھانی تعلیمی نزام تباہ اِنت ۔ ھاس ماشکیل ءِ کہ 60 ھزار آبادی اِنت ءُ اودا ھائی اسکول بس یکے کہ اودا ھم وانگ نیست ءُ ٹیچر سرجم نہ اَنت۔اودا کالج ءُ یونیورسٹی ءِ بئیگ باز دوریں گپّے۔۔ تھنا کاروبار، زر ءُ مال ءِ جَم کنگ کامیابی یے نہ اِنت۔ کامیاب ما ھما وھدا باں کہ مئے زھگ زھگ اسکول ءَ برو اَنت، مئے مردم وانندہ بہ بنت، گڑا مئے مردم ،چاگرد ،قوم ءُ ملک دیم ءَ روت، یک شئور یافتہ ایں سماجے تشکیل دنت۔ اے وھد ءَ مارا گوں دنیا ءِ ایدگہ راجاں ھم گام بیگی اِنت و وترا ثابت کنگی اِنت کہ ما علم دوستیں راجے آں-

مراد ساھر گوش ایت:

“نہ علم ءِ شوق نہ قوم ءِ دوستی نہ سُد دنیا ءِ”
“چوشیں بے جوھر ءُ جان دُز ءُ سُستیں جوان ءَ سوچ”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

28 مئی یومِ آسروک

نبشتہ کار: گُھرام بلوچ

دی بلوچستان پوسٹ

28 مئی ھما روچ انت کہ بلوچ آئی ءَ پہ وت ءَ یک سیاھیں روچے سرپد بیت ءُ آئی ءَ یومِ آس روک ءِ نام ءَ دنت ءُ دومی نیمگ ءَ پاکستان اے روچ ءَ یوم ء تکبیر ءِ نام ءَ دنت ءُ ایشی ءَ پہ وت ءَ یک پھرے شانے سرپد بیت۔

28 مئی 1998 سیاھیں روچ! بلوچ ءُ بلوچستان ءِ تباھی ءِ روچ، بلوچستان ءِ ماندارگ ءِ روچ بلوچاں گوں دائمی نادراھیاں دچار کنگ ءِ روچ! کینسر ءِ دابیں بے الاجیں نادراھیانی ماں بلوچستان ءَ ودی کنگ ءِ روچ! یوم ءِ آس روک ءِ پشدر ءِ کسہ چی انت پرچا بلوچ اے روچ ءَ یومِ آس روک ءُ پاکستان یومِ تکبیر گْوش ایت، بیا ات اے بابت ءَ کمو گپ کن ایں۔

28 مئی 1998 ھما روچ اِنت کہ اے روچ ءَ ناشرکاریں پاکستان بلوچستان ءِ دمگ چاگی ءِ دلبند ءَ وتی زھرناکیں ٹوپ ءُ باروداں آس دنت ءُ بلوچ مھلوک ءَ را یک گوں دائمی نادراھیاں دچار کنت بلوچ ءِ زندمان ءَ پُل ایت، راسکوہ ءَ ٹپیگ کنت، کوہ ءُ ڈگاراں آس دنت پُل ءُ گواڑکاں ماندار ایت۔

وھدے ھندوستان وتی ایٹم بمباں چکاسیت گڑا پاکستان آئی ءِ جواب دیگ ءُ وتی تاکت ءِ پیشدارگ ءِ واستا وتی نیوکلیئر بمب ءَ بلوچانی ماتین ڈگار چاگی ءِ دلبند راسکوہ ءَ چکاسیت ءُ بلوچ ءِ نسل کشی ءَ یک کدمے دیم ءَ بارت ءُ پہ وت ءَ ایشی ءَ یک پھرے لیک ایت۔ بہ گندئے اے پنڈی ءُ اسلام باد ءَ پہ شاتکامی ءِ روچے آیانی واستا اے ھم وشی یے کہ آیاں وتی نیوکلیئر بمب چکاس ات انت، دنیا ءِ دیم ءَ وتارا تاکتور پیشداشت ءُ اے ھم وشی یے کہ بلوچ مرت انت ءُ اے ھم وشی یے کہ ایشی ءِ سان دائمی بلوچ ءِ سر ءَ ھست مان انت، بلئے پہ بلوچ راج ءِ واستا اے ھچبر یک شاتکامی ءِ روچے نہ ات بلوچ مرچی اوں اے روچ ءَ موتک کار انت، بلوچ اے روچ ءَ وتی تباھی ءِ روچ سرپد بنت، بلوچ اے روچ ءَ راسکوہ ءِ تپتگیں سنگ، ستکگیں جون، شومَک آماچیں زھگ، جوان ءُ کماشانی اکساں چار انت، اے روچ ءَ بلوچ ءِ چم ھون ءُ ارس گْوار انت اے روچ ءَ بلوچ یومِ آس روک ءِ نام ءَ یات کن انت۔ اے روچ پاکستانی ءِ زوراکیانی چیدگے کہ دائمی مئے مجگانی تہ ءَ نکش انت، اے روچ مئے گوں پاکستان ءِ سیادی ءَ گیشین ایت، اے روچ مارا گلامی ءِ مارشت ءَ دنت، اے روچ مئے گوں زمین ءِ جزبہ ءَ ودین ایت۔

زھرناکیں بمبانی چکاسگ ءِ واستا بلوچستان پرچا گچین کنگ بوت؟

دنیا ءِ ھر ایردست ءُ گلامیں راج ءِ بندپتر گواہ ءُ شاھد انت کہ اے رنگیں کارپدانی سوب بس نسل کشی انت، ایردستیں راج ءِ نسل کشی ءَ پہ کبزہ گیر وڑ وڑیں پندل ساز ایت اے ھم ھما پندلانی یک بھرے۔ چوناھا دنیا ءِ تہ ءَ مزن مزنیں تاکتاں مدام وتی زھرناکیں بمب انچیں ڈیھانی سر ءَ چکاس اتگ اَنت کہ آ ھمے تاکتانی کالونی بوتگ اَنت ءُ پہ وت یک جتائیں استانے لوٹ کنگ ءَ بوتگ اَنت، ھمے وڑ ءَ دومی جهانی جنگ ءَ پد امریکہ وتی مستریں زھرناکین سلاھاں مارشل آئی لینڈ نامیں زروانے(جزیرہ) ءِ سر ءَ چکاس ایت کہ اود ءِ مھلوک آئی ءِ ھلاپ ءَ اوشتوک بنت، وھدے امریکہ ویتنام ءِ سر ءَ کبزہ کنت ءُ ویتنامیانی چکچینی ءُ تباہ کنگ ءَ وتی سامراجی کارپداں پیش دار ایت، گڑا دنیا ءِ نامداریں پلاسپرے برٹنڈرسل یک ٹربیونلےtribunalجوڑ کنت۔ اے ٹریبیونل 1968 ءَ جوڑ کنگ ببیت اے ٹریبونل ءِ تہ ءَ دنیا ءِ بازیں زانتکاریں ، وکیل ، انسان ءِ ھکاں پہ کار کنوک ءُ دگہ بازیں دانشوار گون ات انت ایشانی کچّ 50 ءَ چہ برز اَت ایشی ءَ را International war crime ءِ نام دیگ بوت ایشاں امریکہ ءُ ایدگے ملکانی سر ءَ پاپندی جت کہ اے وڑیں زھرناکیں توپ ءُ بمب کارمرز کنگ مہ بنت بلئے ایشی ءَ چہ ابید ھم بازیں ایردستیں راجانی زمین ءِ سر ءَ اے کارمرزگ بوتگ انت چوشکہ: فرانس الجزائر ءَ وتی جوھری سلاھانی نشانگ جوڑ کنت، شمالی کازکستان کہ مدام روس ءِ بے ھساب مزن مزنیں زھرناکیں سلاھانی چکاس ءِ زد ءَ بوتگ۔ پمیشکا پاکستان ءَ وتی زھرناکیں سلاھانی کارمرزگ ءِ ھاتر ءَ بلوچ مھلوک ءَ چہ مستریں نشانگ گندگ ءَ نئیت ءُ آ وتی “نعرہ تکبیر” ءَ بلوچستان ءَ (بلوچ مھلوک ءِ سر ءَ) بُرز کنت۔

ماں بلوچستان ءَ 28 مئی 1998 ءِ زھرناکین ٹوپانی سان

انچوشکہ برز ءَ نبشتگ اَت کہ دنیا ءِ تہ ءَ ھر وڑیں ملک کہ بوتگ گڑا آیاں وتی زھرناکین بمب مدام ھما کبزہ کرتگیں زمین ءِ سر ءَ چکاس اِتگ اَنت ، اشانی مستریں سوب اِش بیت کہ ایردستیں راج ءِ چُکچینی ءَ یا لَڈ ءُ بار کنگ ءَ کُمک دَئے اَنت، بلوچ زانتکار اوں ھمے گپ ءَ جن انت کہ بلوچستان ءِ زمین راسکوہ ءَ اے تراک ءِ مول ءُ مراد ایٹم بمب ءِ چکاسگ نہ بوتگ بلکیں بلوچ راج ءِ سر ءَ یک ایٹمی اُرشے بوتگ مرچی 26 سال ءَ رند ھم وھدے راسکوہ ءَ زھگ ودی بنت آ لَنگ ءُ مُنڈ انت کسے ءِ چمے گون نہ انت کسے ءِ دست ھراب انت ءُ کسے ءِ دگہ آزھے۔ اِیشانی آس دیگ ءَ چے پد ھمے بارودانی زھرانی اَسر ءَ چہ چاگی ءِ ھند ءَ بازیں مردم بیران بوتگ انت ءُ مزنیں کساسے ءَ مردم وتی دست ءُ پاداں چہ مُنڈ بُوتگ اَنت ءُ ھمے زھرانی سوب ءَ روچ ءِ مروچی آ ھند ءِ مردم جتا جتائیں نادراھیانی آماچ اَنت تھنا چاگی نا ھاران دالبندن، نال، ھزدار، ناگ، بیسمہ، واشک ءُ دگے بازین نزیک ءُ گْور ءِ ھند کہ ھست اَنت دُراھ سانمند بوتگ اَنت انگت ھست اَنت مرچی بلوچستان ءَ ھزارانی کچّ ءَ مردم شومَک ءِ نادراھی ءِ آماچ بوگ ءَ انت، تھنا انسان انا ھمے جاہ ءَ کہ پاکستان ءَ وتی زھرناکیں شُورہ آس داتگ اَنت اے ھنداں ھچ کاہ ءُ درچک ھم نہ رُد اِیت اے ھند ءِ مردمانی سرجمیں زندگی گوں زَمین ءَ بندوک بوتگ، کار ءُ کسب کشت ءُ کشاری بوتگ، مرچی اے زمین ھچ نہ رودین ایت، زمین، کوہ، جنگل، میتگ ءُ بازار ھیوان ءُ انسان سرجمیں سوچگ بوت انت، چاگی ویران کنگ بوت! بلوچستان نادراھیانی کھریں آس ءَ دور دیگ ءُ یل کنگ بوت کہ بلوچستان ءَ روچ ءِ مرچی اوں یک شومک ءِ نادراھ جاھے نہ گواھیت، اے تراک ءِ سرجمیں مول ءُ مراد ھَمیش اَت کہ بلوچ نرم نرم ءَ مِران بہ کَن اَنت ءُ پاکستان اوں میاریگ مہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

28 مئی پہ بلوچ ءَ بدیں روچے

نبشتہ کار : شاہ جان دشتی

دی بلوچستان پوسٹ

27 مارچ 1948 ءَ وھدیکہ پاکستان بلوچ سرزمین ءَ تاکت ءِ زور ءَ ایر دست کنت۔ ھما روچ ءَ بِگر داں روچ ءِ  مروچی ءَ بلوچ ءِ چُکچینی یکشل ءَ برجاہ اِنت۔ کُجام ھم وڑے ءَ بہ بیت، بلوچ پرزندانی آوار جنگ ءُ آھانی ژانگولیں جونانی دور دیگ یا کہ دگّانی وئیلانی دروشم ءَ بہ بنت پاکستان ءَ گوں بلوچ راج ءَ ھچبر مھر نہ بوتگ آئی مھر گوں  بلوچستان ءِ زِز ءُ مڈّیاں اِنت۔ ھمے درگت ءَ آ لُوٹ ایت کہ من بلوچ ءِ چُکچینی ءَ بکن آں ءُ بلوچ بیم ءِ آماچ بہ بیت ءُ آئی ءِ مال ءُ مڈّیانی لُٹّ ءُ پُل ءَ برجاہ بہ دار آں ۔

اے چُکچینی ءِ مستریں درور 28 مئی 1998 اِنت کہ اے روچ ءَ پاکستان میان استمانی کانوداں پادمال کنت ءُ وتی ایٹم بمب ءِ چکاس ءَ بلوچستان ءِ دلبند چاگی، راسکو ءَ کنت ءُ پاکستان پہ پھر گْوش ایت کہ ماں ایٹمک تاکتیں ڈیھے آں پد ءَ اے روچ ءَ پہ پھرے “یوم تکبیر” ءِ نام ءَ یات کنت بلے دومی نیمگ ءَ ھمے روچ ءَ بلوچ ءَ چہ بلوچ ءِ زند پُلگ بیت، آئی ءِ روزگار ءُ دلوت پُلگ بوت انت ءُ بلوچ ءِ سر ءَ یک وباہ یےدور دیگ بوت-

پرچاکہ چاگی ءِ مردمانی زند ءِ تیلانک دیگ ءِ وسیلہ آھانی گور ءَ بس دلوت(پس ءُ گوک) ءُ ڈگارانی سر ءَ کار کنگ ات بلے پاکستان ءِ ایٹمی چکّاس ءَ چاگی ءُ آئی ءِ کش ءِ کِرّ ءِ زمین ویران کُت انت، کاہ ءُ کدیم مرت ءُ ھلاس بوت انت، آپ زھر بوت انت ءُ زیر ءِ زمین شُت انت، موسم بدل بوت انت، ھئوراں گوارگ یل دات، بلوچستان ھپت سال ءَ ڈُکّال ءَ مان پتات ءُ مردمانی دلوت مُرت انت ءُ مردم بازیں نادرائیانی آماچ بوت انت چشکہ شومک ءِ وڑیں وباہ، اُود ءَ کہ چُک ودی بوت انت تاں مازور ءُ نیم توام اِت انت ءُ مروچی ھم کہ زھگ ودی بنت آ نہ سرجم انت یا گنوک بنت 1998 ءَ بِگر داں مروچی 26 سال ءَ پد ھم اے دمگ ءَ ایٹمی تراک ءِ سان ھست انت ءُ  مروچی ھم بلوچ بلائیں نادُرائیانی دیمپان اَنت۔ھمے واست ءَ 28 مئی پہ بلوچ ءَ بدیں روچے، بلوچ اے روچ ءَ ” یوم آسروک” ءِ نام ءَ یات کنت ءُ اے روچ بلوچ ءَ را ھمے سرپد کنت کہ تو پاکستان ءِ گُلام ئے ءُ تئی زند ءَ آئی ءِ کِرّ ءَ ھچ کدر ءُ کیمت نیست، آ کُجام ھم وھد ءَ ترا چِد ءُ مستریں تاوان دات کنت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھُدا

برانز بلوچ

دی بلوچستان پوسٹ

اَچ تو پَد
کپتگیں گِدان
پُرشتگیں بان
مُرتگیں شریش
پُرشتگیں شیشگ ءِ بلور
ڈُرتگیں بانڈُم
کل من ءَ دوست باں
کل منی مڈیاں
ھُدا
اَچ تو پَد
پُوگنزانی سُتکیں پُر
سِگریٹانی دوتّ
دازانی مُرتگیں پیش
سازانی سِستگیں تار
کل من ءَ دوست باں
کل منی مڈیاں،
ھُدا
اَچ تو پَد
کوہانی بُرزیں ٹُل
تیرانی کَپتگیں پَشنگ ،
سَنگرانی مِکیں چیدگ
دور درپشناکیں چراگانی بَرمش
کل منءَ دوست باں
کل منی مڈیاں
ھُدا
اَچ تو پَد !
کِشکانی پَند ءُ پیچ
تَراولیں پاد ءُ سِستگیں سواس
اَبیتکیانی پیتاری ءُ گیابان
اَبرم ءِ بَرھنگیں نِدارگ
کل من ءَ دوست باں
کل منی مڈیاں

چندے دانک پہ سستگیں ھمبل ءَ

نبشتہ کار: کادر ھسرت

دی بلوچستان پوسٹ

سستگیں ھمبل (تیرے فراق میں) شیردل گیب ءِ گِدار اِنت کہ سنگت نئیم جُما ءَ ماں بلوچی ءَ رجانک کُتگ ، نئیم جُما ءَ دیر اِنت گوں لبزانک ءَ بندوک بوتگ بَلے آئی ءَ بھ اشتاپ کاری نہ کُتگ ھمے اشتاپ نہ کنگ ءِ سبب ءَ مرچی آئی ءَ یک انچیں کارے کُتگ ءُ پہ وانوکاں یک انچیں ٹیکی یے دیم ءَ آؤرتگ کہ چہ آئی ءِ وانگ ءَ پد وانوکانی دل ءَ یک انچیں ھدوناکی یے ودی بیت اِنت وانوک اگاں یکبرے آئی ءِ رجانک کُتگیں کتاب ءَ بزاں کہ سستگیں ھمبل ءَ پہ وانگ ءَ دست ءَ بہ کنت گڑا دل ئِے نہ گُش ایت کہ دوبر ایر ئِے بہ کن آں ، وانوک ءَ را اَنچو گوں وت ءَ ملمہ کنت اگاں وانوک کتاب ءَ ھلاس بہ کنت کمو جیڑ ایت کہ اڑے یار دریگتے کمو انگت مستر بوتیں۔

شوکیں کتاب ءِ وانگ ھما وھد ءَ واناک تِر بیت اِنت کہ آئی ءِ تہ ءَ تو وت ءَ را بہ پھم ئے ءُ وت ءَ را شوھاز بہ کن ئے ، وت ءَ ھما لبزانی زِر ءَ گار بہ کن ئے ، ھما سکی ءُ سُوریاں تو وتی تہ ءَ بہ مار ئے ءُ وت ءَ را ھمے کسہ ءِ یک کارستے سرپد بِہ بَہ ئے۔ مرچی اے کتاب ءِ وانگ ءَ پد من ھم وت ءَ را ھمے لبزانی تہ ءَ گار کُت من ھمے جیڑ اِت کہ اے درد ءُ رنج گیب ءِ سر ءَ انا منی سر ءَ آتکگ اَنت گیب ءِ کسہ ءَ را من وتی کسہ پھم ات گیب ءِ وانگ ءَ پد من ءَ ھمے سما بوت کہ گیب ءِ جاگہ ءَ من آں کہ وتی ھمبل ءِ ھاتر ءَ برے شال ءِ اے دمکاں ویل آن ءُ برے آ دمکاں ویل آں۔

گیب ءِ کتاب ءَ من ءَ اَنچو مُلمہ کُتگ کہ ھمے ندارہ سازی کہ گیب ءِ وتی کتاب ءِ تہ ءَ آؤرتگ اَنت آئی ءِ ھمے ندارہ سازی منی چمانی دیم ءَ زاھر اَنت اَنچو گُمان بوگ ءَ اِنت کہ اے ندارگاں من چم ءِ وت گندگ آن ءُ ایشاں مارگ ءَ آں گیب ءِ کسہ تھنا مھری کسھے نہ انت گیب ءَ کہ آ دَور ءَ ھرچی دیستگ ءُ مار اتگ چنچو رنج کَش اتگ شما کتاب ءِ وانگ ءَ پد وت سرپد بہ اِت۔

من نہ گْوش آں کہ من یک زانوگرے آن ءُ من ءَ گدار ءِ بارو ءَ گیشیں سرپدی ھست اِنت سستگیں ھمبل ءِ وانگ ءَ پد من ءَ بے کساس وشی بوت اُمیت کن آں دیمتر ءَ ھم اے رنگیں کتاب مارا پہ وانگ ءَ دست کپ اَنت- “بلوچی زُبان میزران بات”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مَرگ آوریں واپاری پریام

ٹی بی پی شونگال

پاکستان ءِ دری کارانی وزیر ءَ چین پاکستان واپاری گزرانک ءِ سر ءَ کار کنوکیں درانڈیھیانی سر ءَ بیتگیں اُرشانی سرجمیں اھوال دزنویسی پیش کتگ انت، آئی ءِ رد ءَ دوھزار ءُ بیست ءَ داں دوھزار ءُ بیست ءُ چار ءِ وھد ءَ درانڈیھیانی سر ءَ ھشت اُرش بیتگ اَنت چریشاں سی پیک واپاری ءَ ھواریں شست ءُ دو مردم کُشگ بیتگ انت- اھوال ءِ رد ءَ چین ءِ جھمنندانی سر ءَ بلوچستان ءَ دو اُرش، سندھ ءَ چار اُرش ءُ ھیبر پکتونکوا دو اُرش بیتگ اَنت-

چین پاکستان ءِ واپاری گزرانک ءِ بندات ءَ بلوچ، پشتون ءُ سندھی راج واپاری ءِ سر ءَ ناوش بیتگ اَنت کہ واپاری گزرانک آیانی زمین ءِ سر ءَ گوزگ ءَ اِنت بلے ایشی ءِ بَر جتا جتائیں واپاری ءُ بند ءُ ساچی پریامی دروشم ءَ پنجاپ ءَ رسگ ءَ اَنت-

بلوچستان ءُ پکتونکوا ءِ پارلیمانی ءُ در پارلیمانی پاٹی چین پاکستان ءِ واپاری گزرانک ءِ ھلاپ ءَ جتا جتائیں وھداں ناوشی ءِ لیکھی درشان کنگ ءَ اَنت-

بلوچستان ءِ آجوئی ءِ جنز ءَ گوں بندوکیں سلاہ بند ءُ سیاسی ادارہ چین پاکستان ءِ واپاری گزرانک ءَ لُٹ ءُ پُلی پریام گوش اَنت ءُ بلوچ سلاہ بندیں گل سی پیک ءَ ھواریں پریام ءِ سر ءَ یکشلیں مرگ آواریں اُرش کنگ ءَ اَنت – آجوئی لوٹوکیں ادارہ چین ءَ بیھار دیگ ءَ اَنت کہ بلوچستان ءَ بلوچ راج ءِ مَنگ ءَ ابید زرکاری منگ نہ بیت اِنت-

انیگیں جاوراں لھتے چیز پدر بیتگ انت کہ چین پاکستان ءِ واپاری گرزانک ءَ سانمندیں راجانی ناوشی ءَ دور نہ کنت ءُ آیانی جیڑہ ءِ گیشگ ءَ ابید اے پریام ءِ سرجم بوگ نہ بوگ اِنت – اگاں تاکت ءِ زور ءَ پریام ءَ سرجم کنگ ءِ جھد ءَ کن اَنت گڑا اے پریام ءَ ھواریں مردم ھمے رنگ ءَ نشانگ بیان بنت اِنت ءُ واپاری گزرانک ءِ توپان ھلاس بیت اِنت-

لھتیں یات

نبشتہ کار : چراگ بلوچ

دی بلوچستان پوسٹ

پہ شھید ساوڑ جان ءُ شھید اسد جان ءِ یاتگیریں زھیر سوچکیں لیوار ءَ سوچ اَنت کہ یک گپے منی دل ءَ سک کیت اِنت ساوڑ جان تو من ءَ سھب ءِ سر ءَ زنگ جت ءُ گشت کہ جنگے بیتگ من گشت کہ چون کرُباناں گڑا ساوڑ جان ءَ کند ات ءُ گشت تو واب بوتگ ئے من گڑا ساوڑ جان جست کت گڑا منی اسد پُل چون اِنت گشتے وش ءُ سلامت اِنت گڑا ساوڑ جان ءَ گشت کہ کل سنگت وش ءُ سلامت انت من گشت اللّٰہ ءِ شکر اِنت کہ شما رکّ اتگ ات گڑا ساوڑ جان ءَ کند ات ءُ گشت کہ ما دژمن تاچینتگ من گڑا گشت اڑے کربان منی ساوڑ پُل گڑا من گشت کہ اسد جان ءَ گوشی ءَ بہ دئےمن گپ کناں گڑا ساوڑ جان ءَ گشت کہ اسد پُل منی کرِ ءَ نہ اِنت جھل ءَ نشتگ گوں سنگتانی دیوان اِنت گڑا من ھمے توار اشکت اسد جان ء کندگانی توار انت من گڑا ساوڑ جان جست کت اے کے اِنت کندگ ءَ اِنت گشتے اے تںُی گنوکیں اسد جان اِنت کندگ ءَ اِنت من گڑا پدا گشت کہ ساوڑ جان اسد پُل ءَ توار کن من گپ کنانے گوں گڑا ساوڑ جان ءَ توار کت اسد بیا چراگ گش ایت من ءَ کار ھست اِنت پتو گڑا اسد پُل اتک ءُ گوانکوے زرت من ءُ اسد پُل دُروت دراہ بات بیت ایں ءُ گڑا من جست کت تو چون ئے اسد پُل وش ءُ برابر ئے گڑا اسد پُل ءَ پسو دات ما کل سنگت وش ءُ سلامت انت گڑا اسد پُل ءَ جست کت مھلوک پاٹی کل وش ءُ سلامت انت من گڑا گشت اسد پُل کل وش ءُ سلامت انت کرُباناں گڑا اسد پُل ءَ جست کت کہ چون اِنت دمگ تو ھند ءُ دمگ ءِ ھال گپتگ من پسو دات کہ من ھال گپتگ اِلاکہ برباد اِنت گڑا اسد پُل ءَ کند ات گشت کہ انشااللہ ھیر بیت گڑا اسد پُل گشت کہ من لھتیں روچ ءَ پد اِلاکہ ءَ رواں من گڑا گشت کہ اسد پُل انی اِلاکہ چو وش وش نہ اِنت گڑا اسد پُل ءَ کند ات ءُ گشت کہ مردم اِلاکہ ءَ جَنَگ بیت اِنت لاش لوگ ءَ رس ایت اِنت من گڑا پسو دات گشت کہ اڑے اسد پُل چو مگش کرُباناں گڑا اسد پُل ءَ گشت کہ مارا کار ھست اِنت ءُ ساوڑ جان ءِ تبیت وش نہ اِنت من گڑا اسد پُل ءَ جست کت کہ ساوڑ جان چون اِنت من ءَ ھال نہ داتگ ئِے گڑا اسد پُل ءَ گشت کہ ساوڑ جان ءَ ھسابے گوں اِنت پاد ئِے شر نہ اِنت گڑا من گشت کہ اسد پُل ساوڑ جان ءَ جاگھے پیش بدار کہ چوش اِنت گڑا اسد پُل ءَ گشت کہ انشااللہ ءَ وتی کاراں ٹھین ایں ساوڑ جان ءَ پیش داراں گڑا اسد پُل ءَ گشت کہ دگہ وھدے ھال کن ایں انشااللہ انی سپر ءِ تہ ءَ ایں گڑا دو سے روچ ءَ پد ءَ ما نشتگ ات ایں گوانکو ءَ کلوہ ءَ ات ایں من گوانکو زرت ءُ چار ات سنگت ءَ کلوہ کتگ ات کہ پنجگور ءَ گرمکان ءَ تیر ءُ بمب ءِ توار اِنت من گشت کہ لگوریں لشکر ءَ وتی دیم سیاہ کُت گڑا من گڑا گشت کہ اسد پُل ءَ گشتگ کہ من اِلاکہ ءَ کایاں نی من ءَ کار ھست اِنت گڑا منی اسد پُل مرچی لگوُریں لشکر ءِ انگرّ ءَ کپتگ گڑا سھب ءَ ھال ات کہ اسد پُل ءُ ساوڑ پُل شھید بیتگ انت گڑا منی ھیال ءِ تہ ءَ اسد جان ءِ ھمے گپ دل ءَ اَت کہ اسد جان ءَ گشت کہ ماں اِلاکہ ءَ شھید بہ ایں لاش لوگ ءَ سر بنت اِنت ءُ اڑے اسد پُل تو انچوش گشت انچوش بیت تو اِلاکہ ءَ شھید بیت ئے پُل نمیران انت شھید اسد پُل ءُ شھید ساوڑ پُل-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔