TBP Balochi

سر بیتگیں ھالانی رد ءَ روکپتی بلوچستان ءِ دمگ سیب ءُ سوران ءَ ناشناساں تیرگواری کتگ ءُ ایرانی لشکر ءِ یک کارندھے کُشتگ ءُ یکے زدگ کتگ-

سراوان ءُ ھاش ءَ ھواریں دمگ سیب و سوران ءَ ناشناسیں مردمان ایرانی لشکر ءِ گشتی ٹولی ءِ سر ءَ تیرگواری کتگ ءُ چریشی ءَ یک کارندھے کشتگ ءُ یکے زدگ بیتگ-

کُشگ بیتگیں کارندہ ءِ پجار سکینڈ لیفٹننٹ علی بژنی زیبا ءِ نام ءَ زانگ بیتگ-

اھوالانی رد ءَ تیرگواری ءَ پد دو کارندہ زدگ بیتگ انت کہ ھردوک نادراہ جاہ ءَ برگ بیتگ انت کہ اود ءَ یکے ءَ ساہ داتگ انت-

روکپتی بلوچستان ءَ گوست ءَ ھم ایرانی لشکر ءِ سر ءَ اُرش بیتگ اَنت کہ لھتیں اُرشانی زمہ واری جیش العدل نامیں گلے ءَ پہ وت ءَ زرتگ اَنت بلے مروچی بیتگین اُرش ءِ زمہ واری کس ءَ پہ وت ءَ نہ زرتگ-

جیش العدل ءِ سر ءَ ایرانی لشکر ءِ بھتام اِنت کہ آ ڈیھ ءِ بگیری ءَ پرکار اِنت ءُ گوستگیں روچ ءَ ایرانی پولیس ءَ ماں ایرانشھر ءَ جیش العدل ءِ سَے باسکانی دزگیری ءِ ٹاہ داتگ بیتگ ات-

جیش العدل روکپتی بلوچستان ءَ سُنی پلامرزی ءُ شیعہ ءِ بگیری ءَ گیشتر کار کنگ ءَ گندگ اتکگ کہ آئی ءِ سروک عبدالمالک ریکی گوست ءَ ایران ءَ دزگیر کتگ ءُ پاھو داتگ بیتگ چریشی ءَ پد جیش العدل یک پرمیانیں وھدے ءَ بے تواری ءَ گندگ بیت –

کورونا وائرس ءَ میان اُستمانی وبا ءُ نھادانی گیشی ءَ ایشیا ءِ دیمروئی کتگیں ڈیھاں کساس ھپت کروڑ مردم یکدم نیزگاری ءِ پانچلانی آماچ کتگ انت-

ھال سر کنوکیں ادارہ روئٹرز ء رد ءَ ایشین ڈویلپمنٹ بینک ءَ پشمبے ءِ روچ ءَ شنگ کتگیں درشان ءَ گوشتگ گوستگیں سال ءِ کچ ءُ کساسنی رد ءَ ایشیا ءُ پیسیفک ءِ دیمروئی کتگیں ڈیھاں کساس پانزدہ کروڑ ءُ پنجاہ ءُ دو لک چوشکہ دمگ ءِ بزانکہ سَے ٹک نشان نُھ درسد مردم یکدم نیزگاری ءِ زند ءَ گوازینگ ءَ اَنت-

دیمروئی کتگیں ایشیا ءِ جاپان، آسٹریلیا ءُ نیوزی لینڈ ءَ ابید ایشیا پیسفیک ءِ چل ءُ شش زرکاری تَک ھوار اَنت-

ایشین ڈویلپمنٹ بینک (اے ڈی بی) ءِ چیف اکنامسٹ ایلبرٹ پارک ءِ گوشگ اِنت ایشیا ءُ پیسیفک ءِ ڈیھ سبک سبک ءَ کورونا ءَ چہ گیشگ ءَ اَنت بلے گرنھادی ءَ گریب ءُ نیزگاری ءِ گام یکدم پرکار کتگ اَنت-

دوھزار ءُ ھبدہ ءِ کچ ءُ کساساں یکفم دو ٹک پانزدہ ڈالر روچے ءَ کم نھادی زندگی گوازینوکانی بیتگ –

گیشتریں ڈیھاں گوستگیں لھتیں سالاھان ھما برزیاں سر بیتگ اَنت ءُ ھمیشی ءَ لھتیں مردم ھم ھما کساس ءَ نیزگار ءُ لاپ دست بیتگ ءُ آ ھم گیش سانمند بیتگ اَنت-

گریبانی واستا ورگ ءِ ورگ ءُ تیل ءِ ھرچ ءُ درچ کنگ یکدم مشکل بیتگ ءُ ایشی ءِ ھواری ءَ جانسلامتی ءُ وانگی وڑیں چیزانی بنکی آسراتیانی ھم بچینگ ءَ بے تھمبل اَنت-

ایلبرٹ پارک ءَ گوشگ ات کہ نیزگاریں مردمانی چاگردی پھریزگی نیٹ ورک مھکم کنگ ءُ زرکاری ءِ دیم ءَ برگ ءِ زور ءَ ملازم ءُ دیمروئی ءِ موکل دیگ بنت اِنت کہ ایشی ءَ بازیں ڈیھانی زرکاری ءِ پَلگ چست بیت کنت اِنت-

اے ڈی بی ءَ جولائی ءَ گوشتگ ات کہ ھمے سال ءَ دیمروئی ءِ گام ایشیا ءِ ڈیھاں گندگ بیگ ءَ پد چار ٹک نشان ھشت درسد ءَ سر بیتگ ءُ گوستگیں سال ءَ اے درسد چار ٹک نشان دو بیتگ-

یک نیمگے ایشیا زرکاری ءِ دیمروئی ءِ گپ ءَ جنگ ءَ اِنت ءُ دومی نیمگ ءَ اے ڈی بی ءِ گوشگ اِنت سال دوھزار ءُ سِی ءَ داں دمگاں سِی درسد ٹک نشان یک اربے ءُ بیست ءُ شش کروڑ مردم زرکاری ءِ پھناتاں نیزور بنت اِنت-

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ایرانی پولیس ءَ جیش العدل ءِ سَے باسکانی دزگیری ءِ ٹاہ داتگ-

پولیس ءِ سروک ءَ ماں سرکاری رسانکدراں گپ کنان ءَ گوشتگ کہ پولیس ءَ سیستان و بلوچستان ءَ سَے ناشریں مردم دزگیر کتگ اَنت-

آئی ءَ اے ھر سئیں مردمانی سیادی ایران ءِ بگیری ءَ اُرش کنوکیں گل جیش العدل ءَ اِنت کہ آ دزگیر کنگ ءُ آیانی درگت ءَ پٹ ءُ پول بوگ ءَ اِنت-

پولیس ءَ ھرسئیں مردمانی پجار دیم ءَ نیاؤر اتگ اَنت ءُ نانکہ آیانی بارو ءَ دگہ چوشیں گپ جتگ اَنت-

زانگ بہ بیت چد ءُ پیش ھم پولیس ءَ راسک ءُ جکیگور ءَ جیش العدل ءَ بندوکین مردمانی دزگیری ءِ ھال شنگ کتگ بیتگ اَنت-

بلوچستان ءِ دمگ کلات گوستگیں شپءَ پاکستانی لشکری ءُ چیریں ادارگانی کارمنداں بیڑ بُرتگ ءُ یک مردمے دزگیر کنگ ءَ پد بیگواہ کُتگ۔

پاکستانی لشکریانی دستءَ بیگواہ بیتگیں ورناھے پجار اعجاز ء میراحمد ءِ نام ءَ چہ بیتگ کہ آ یک نودربر ءُ فٹبالر اِنت۔

اھوالانی ردءَ بیڑءِ وھدءَ لشکری کارندھاں لوگءَ جاڑیگیں مردم لٹ شاپی ءِ آماچ کُتگ اَنت ءُ پدءَ چمانی سرءَ پُچ بستگ ءُ یک کوٹی ئے تہءَ بند کُتگ اَنت ھمے ورناہ گوں بُرتگ اِش۔

بیگواہ بیتگیں ورناھے برات سعید احمد ءِ گُشگ اِنت کہ گوستگیں شپءَ ادار دو ءَ پاکستانی پوج ءِ کارندھانی مزنیں کساس ءَ مئے دمگ منگچر انگر کُتگ ءُ مئے لوگ سرءَ بیڑ بُرتگ ءُ مئے برات دزگیر کُتگ ءُ گوں وت برتگ۔

آئی ءَ پولیس تھانہ ارزی نبشتہ کنائنگ ءِ دزبندی کنان ءَ گُشتگ کہ منی برات چدوپیسر ھم زورانسری بیگواھی ءِ آماچ کنگ بیتگ ءُ نی یکبرے پدءَ دزگیر کنگ ءُ بیگواہ کنگ بیتگ۔

انڈیا ءِ نیمگ ءَ دیم دیگ بوتگیں چندریان سَے پرآھگی جھاز ءِ سوبمندی ءَ ماھے سر ءَ ایر اتکگ –

چندریان سَے چار شمبے ءِ روچ بزاں مرچیگیں بیگاھ ءں کساس ادار شش ءَ ماھ ءِ زرباری نیمگ ءَ ایر اتکگ –

انڈیا اولی ڈیھ انت کہ ماھے اے بھر ءِ سر ءَ وتی پرآھگی جھاز ایر گپتگ ءُ امریکہ، گوستگیں سوویت یونین ءُ چین ءَ پد سافٹ لینڈنگ کنوکیں چارمی ڈیھ انت –

انڈیا ءِ پرآھگی بنشون ءَ وتی کارگس ءَ اے مشن ءِ آپریشن سینٹر ءِ اکس ھم مروچی شنگ کتگ انت کہ سائنسدان ءُ ٹیکنیکل اسٹاف درسیں جاورانی ٹپاس ءَ کنگ ءَ انت –

چندریان سَے ءِ مزنیں ٹارگٹانی تہ ءَ یکے “چہ آپ ءَ جوڑ بؤکیں برپ ” ءِ شوھاز انت – سائنسدانانی گوشگ انت کہ چندریان اے برپ ءِ شوھاز ءَ سوبمند بوت گڑا باندات ءَ ماھ ءِ سر ءِ نندگ ءَ مردماں کمک رسیت –

چندریان سَے ءِ پرآھگی مشن چاردہ جولائی ءَ انڈیا ءِ زرباری ریاست آندھرا پردیش ءَ بندات بوتگ ءُ چِل روچانی دراجیں سپر ءَ پد مروچی ماھے زرباری لمب ءَ ایر اتکگ –

اسرو ءَ چدوپیش دو رند ءَ ماھے زرباری لمب ءَ وتی مشن دیم داتگ انت بلے بے سوب بوتگ انت بلے پدا ھم چندریان سَے ماھے سر ءَ ایر آیگ ءَ سوبمند بوتگ –

چہ مستونگ ءَ زورانسری آوار جنگ بوتگیں لیویز کارمند سعید احمد شاھوانی ءِ مات ءَ مروچی شال ءِ پریس کلب ءِ دیم ءَ برجاھیں بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ شُتگ ءُ وتی زھگے یل کنگ ءِ لوٹ کتگ –

آئی ءَ گوشتگ کہ منی زھگ ءِ زورانسری آوارجنی ءَ بیست ءُ نھ اگست ءَ دھ سال سرجم بوگ اِنت –

آئی ءِ مات ءَ گوشتگ کہ چُک ءِ بیگواھی ءَ منی زند ازاب ءِ تہ ءَ گوزگ ءَ انت بلے اے ملک ءِ تہ ءَ ھچ کسی گوشاں مورے نہ وارت کہ مارا انساپ بہ دنت –

زانگ بہ بیت لیویز کارمند سعید احمد بیست ءُ نُھ اگست سال دوھزار سینزدہ ءَ پاکستانی پوج ءَ چہ مستونگ لدھا ءِ نزیک ءَ زورانسری آوار جتگ ءُ بیگواہ کتگ کہ ھنگت بیگواہ انت –

زانگ بہ بیت سعید ءِ پت ھمے سال ءَ فروری ءِ ماہ ءَ بیران بوتگ وھدیکہ آئی ءِ پت ءَ باز براں مستونگ ءِ کمشنر ءِ گور ءَ وتی ارز برتگ ءُ ھمے گوشتگ کہ اگاں منی چُک ءَ چیزے کُتگ گڈا آمیدگس ءَ آرگ بہ بیت –

ھمے درگت ءَ آئی ءِ پت ءَ یکبرے بلوچستان ءِ سروزیر ءِ گور ءَ ھم وتی ارز سر کنائینتگ ءُ سعید ءِ آوار جنی ءِ درگت ءَ سرپد کتگ آئی ءِ آوار جنی ءَ پد آئی ءِ نادراھیں ماتے کسہ ھم گوشتگ ءُ لوٹ کتگ کہ آ یل کنگ بہ بیت –

سعید احمد پت ھم لیویز ءِ ریٹائر کارمندے بوتگ ءُ سعید احمد ءِ ھمراھی ءَ بیگواہ بوتگیں ائی ءِ وارس ھم لیویز کارمندے بوتگ ءُ وتی کارے سر ءَ بوتگ انت –

سعید احمد ءِ پت ءَ بیست فروری دوھزار ھژدہ ءَ یک نمدی ءِ میجر ندیم انجم ءَ ھم سرکتگ بوتگ ءُ آ باور کنائینگ بوتگ کہ آئی چُک یل کنگ بیت انت بلے ھنگت یل.کنگ نہ بوتگ – کھول ءِ رِد ءَ مستونگ ءِ ڈی سی ھم مدام کول کنت ءُ پدا بج ایت دگہ نیمگے رؤت –

روکپتی بلوچستان ءِ دمگ سرباز ءَ چار گاڑیاں ٹکر وارتگ ءُ چریشی ءَ زالبولے ءَ ھوار دو مردم بیران بیتگ اَنت ءُ شش زدگ بیتگ انت-

گیشیں اھوالانی رد ءَ سرباز ءُ راسک ءِ میان ءَ تیل کشی گاڑی ءُ سواری گاڑیانی میان ءَ کزا بیتگ کہ چریشی ءَ زالبولے ءَ ھوار دو مردم بیران بیتگ اَنت ءُ شش زدگ بیتگ اَنت-

وئیل مروچی گرم ءِ وھد ءَ پیش اتکگ کہ اود ءَ گاڑیاں آس کپتگ ءُ چریشی ءَ سواری گاڑی ءَ سواریں زالبول ءُ مردینے بیران بیتگ اَنت-

وئیل ءَ بیران ءُ زدگ بیتگیں مردمانی پجار نہ بیتگ اَنت ءُ زدگ ءُ بیران بیتگیں مردم نادراہ جاہ ءَ برگ بیتگ اَنت-

زانگ بہ بیت مروچی سھب ءَ داں انیگ ءَ دو مزنیں وئیل بیتگ اَنت کہ ایشانی تہ ءَ سرجمی ءَ سِی ءُ چار مردم زدگ ءُ سَے کس بیران بیتگ اَنت-

سربوتگیں ھالانی رِد ءَ چہ کیچ ءَ دگہ سَے مردم زورانسری آوار جنگ ءَ پد بیگواہ کنگ بوتگ انت –

گیشیں ھالانی رد ءَ بلوچستان ءِ دمگ کیچ ءَ یکیں روچ ءَ شش ورنا زورانسری آوار جنگ بوتگ انت – پاکستانی پوج ءُ چیریں ادارھانی کارمنداں سے شمبے ءِ روچ ءَ کیچ ءِ جتا جتائیں ھند ءُ دمگاں شش مردم زورانسری آوار جتگ ءُ بیگواہ کتگ انت –

زورانسری آوار جنگ بوتگیں ورنایانی پجار شاھجان ء عطاء، احمد ء شگولا ءُ شوکت ءِ ناماں چہ بوتگ انت اے ھر سئیں ورنا کیچ ءِ دمگ بالگتر ءِ جھمنند انت –

زورانسری آوار جنگ بوتگیں ورنایانی تہ ءَ احمد خان ایرڈ ایکگریکلچر شھدربرجای روالپنڈی پنجاپ ءِ نودربر یے –

زانگ بہ بیت چدوپیسر چہ تربت ءَ سَے مردم آوار جنگ بوتگ اِتاں کہ دو برات زہیر ءُ پیرجان ء لشکر خان چہ تربت نادراھجاہ ءِ نزیک ءَ آوار جنگ بوتگ اِتاں وھدیکہ تربت ءِ بازار ءَ پوج ءَ عادل ء عصاء جھمنند نلی بالگتر آوار جتگ ءُ بیگواہ کتگ ات –

گوستگیں روچ ءَ چہ بلوچستان ءُ کراچی ءَ سرجمی ءَ ھپت مردم آوار جنگ بوتگ انت وھدیکہ ھمے ماھے بیست ءُ دو روچانی تہ ءَ سرجمی ءَ چِل مردم آوار جنگ بوتگ انت چدوپیسر کیچ، ھزدار، کراچی، پنجگور، شال، نوشکی ءَ ھوار بلوچستان ءِ جتا جتائیں ھند ءُ دمگاں زورانسری آوار جنی ءِ ھال سر بوتگ انت –

بلوچستان ءِ دمگ چہ کیچ ءَ دزکپتگیں لاشانی پجّار بیتگ اَنت- سئیں مردمانی چمّ ءُ دست بستگ ءُ تیر جتگ ءُ کُشتگ اَنت-

لاشانی پجّار ڈاکٹر حامد بلیدی ، بھروز ء ڈاکٹر حامد ءُ برازتک عبدالباسط ناماں چہ بیتگ اَنت-

زانگ بہ بیت ھرسئیں مردم سالے نیم ءَ ساری ایران ءَ روگ ءَ بیتگ ءُ راہ ءَ بیگواہ بیتگ اَنت- تنی وھدے اشانی کھول نیمگ ءَ اے لاشانی پجّار ءِ پدر نہ کتگ-

وئیل سوب انگت زانگ نہ بیتگ-

زانگ بہ بیت پیسر ءَ بلوچستان ءِ جتاجتائیں دمگاں چہ تیرسُپتگیں لاش دزکپتگ اَنت اشانی تہ ءَ گیشتر زورانسری بیگواہ بیتگیں مردم بیتگ اَنت-

چار شمبے ءِ شپ ءَ شال، کراچی ءِ بسانی واھنداں کوسٹ گارڈ ءِ ھلاپ ءَ وندر ءِ ھند ءَ شھدگ بند کتگ-

شھدگ ءِ بندی ءِ سبب ءَ ھردوکیں نیمگاں گاڑیانی دراجیں کتار لگ اتگ اَنت -کراچی، شال ءُ مکران ءَ روکیں ھزارانی مساپر زھرشانی ءِ سبب ءَ وتی منزلاں سر بیت نہ بوتگ اَنت-

زانگ بہ بیت بلوچستان ءِ ٹرانسپورٹرزاں اے درگت ءَ بازیں رنداں وتی لیکہ ءُ ھیال درشان کتگ اَنت کہ ٹرانسپورٹانی نیمگ ءَ سرجمیں بلوچستان ءَ شھدگانی سر ءَ چیک پوسٹانی ھلاس کنگ ءِ لوٹ کتگ بیتگ انت-

ٹرانسپورٹرانی گوشگ اِنت کوسٹ گارڈ ءِ رویش زُلم ءِ تہ ءَ اِنت ءُ مزنیں واکداراں لوٹ کن ایں کہ شھدگانی سر ءَ ابید زلوری چیک پوسٹ لڈینگ بہ بنت-