TBP Balochi

میجر آسمی وپا

نبشتہ کار: ھمبل بلوچ

دی بلوچستان پوسٹ

دنیاءِ بُندپتر ءَ لھتیں انچیں کارست بنت کہ آھانی روگ ءَ.پد ھم آھانی یات چہ دلاں درنیا اَنت۔ اے ھما کارست بنت کہ آھاں وتی زاتی زند ءَ چہ گیش پہ راج ءَ زند گوازینگ گیش ارزشت داتگ۔ بلوچ ءِ بُندپتر ھم چہ ھمے وڑیں کارستاں سریچ اِنت کہ آھاں پہ وتی راج ءِ وشیں باندات ءَ وتی گرانبھائیں سر ندر کتگ اَنت۔ اگاں ما انوگیں بِزانکہ پاکستانی ایردستی ءِ زمانگ ءَ بچاریں گُڑا مارا چوشیں سک باز گرانبھائیں سر دست کپ ایت کہ آھاں پہ راج ءِ وشھالیں باندات ءَ وتی ھیشیں زند قربان کُتگ اَنت ءُ وت ءَ بُندپترے تاکانی تہ ءَ زندگ داشتگ۔ چہ ھمےگرانبھائیں سراں یکّے آسمی وپا اِنت۔

آسمی وپا 20 مارچ 1989ءَ کولواہ ڈنڈار ءِ تہ ءَ دلوش بلوچ ءُ بی بی آمنہ ءِ گِس ءَ ودی بیت۔آسمی وپا وتی بِنداتی وانگ ءَ چہ وتی ھلک ءِ یک سرکاری دربرجاھے ءَ چہ دربارت۔ آسمی وپا وتی وانگجاہ ءِ زمانگ ءَ گوں مردماں زوت ھور ءُ تور بوتگ گوں۔ آ مُدام گوں وتی ھلک ءِ لس مھلوک ءَ سک نزیک بوتگ۔ کِرکٹ گوازی ءِ یک زبریں لیبی یے ہم بُوتگ۔آئی ءِ سنگت گْوش اَنت کہ آمُدام بیگاہ ءِ وھد ءَ لیبجاہ ءَ پہ کرکٹ ءِ لیب ءَ شُتگ۔ انچو وھد گْوزاں بیت،آسمی ءِ اسکول ءِ دور ھلاس بیت۔ آئی ءِ مات ءُ.پِت گریبی ءُ بزگری جاہ ءَ آسمی ءَ پہ گیشیں وانگ ءَ تربت شھر ءَ عطاء شاد ڈگری کالج ءَ دیم دے انت ئِے ۔ اے پہ آسمی وپا ءَ یک نوکیں زندے ءَ چہ کم نہ اَت۔آ یک انچیں شھرے ءَ پہ وانگ ءَ روگ ءَ اَت کہ اے زمانگ ءِ بلوچ سیاست ءِ بُنجاہ گُشگ بیت۔ آسمی 2008 ءَ عطاء شاد ڈگری کالج ءَ روت اِنت داں 2010 ھمود ءَ وتی انٹرمیڈیٹ ءِ وانگ ءَ سرجم کنت۔ انٹرمیڈیٹ ءِ وانگ ءَ پد آسمی وپا وتی گریجوشن ءَ ھم چہ عطاء شاد ڈگری کالج ءَ سرجم کنت۔ وانگ ءِ وھد ءَ آسمی کیچ ءَ بیت کہ 2009 ءَ مرگاپ ءِ ویل دیم ءَ کئیت اِنت۔ 9 اپریل 2009 بلوچ سیاسی رھشون واجہ گلام مھمد ءَ ھوار آئی ءِ ھمراہ شیر مھمد ءُ لالا منیر ءِ پاکستانی ایجنسیانی دست زورانسری آوارجنّی ءَ چہ پد آھانی ژانگولیں جون ماں مُرگاپ ءَ چگل دیگ بنت۔ مُرگاپ ءِ ویل آسمی وپا ءَ سک سانمند کنت۔ یکّے تُربَت شھر ءِ سیاسی چِست ءُ ایر دومی مرگاپ ءِ ویل، آسمی ءَ گیش ءَ گیش بلوچ جُنز ءَ گوں ھوار کن اَنت۔

آسمی وپا ءِ سیاسی زند: آسمی وپا وتی سیاسی چِست ءُ ایراں چہ بی این ایم ءِ تلّو ءَ 2009 ءَ بِندات کنت۔ ھمے زمانگ ءَ کہ آسمی کالج ءَ وانگ ءَ بیت اِنت، بی این ایم ءَ گوں ھوار بیت۔ بی این ایم بلوچ راجی جِنز ءِ یک گلے بیت کہ آئی ءِ مول ءُ مراد بلوچ اُلس ءِ سیاسی سنچ دیگ بیت دانکہ لس مھلوک وتی جیڑہ ءِ جند ءَ چہ آژنا بہ بنت ءُ پہ ھمے جیڑہ ءِ ھلاس کنگ ءَ بلوچ راجی جُنز ءَ ھوار بہ بنت۔ بی این ایم ءَ گوں ھوار بوئگ ءَ رند آسمی وپا وتی ھلک ءِ تہ ءِ ھرچ وڑیں سیاسی چِست ایراں بھر زور ایت۔ آسمی بلوچ پہ بی این ایم ءِ گھتری ءُ مُھکمی ءَ مُدام پند جنّگ ءَ بیت۔ آئی ءِ کارانی سر ءَ وھدے بابُل لطیف ءَ جُست کنگ بیت گُڑا بابل لطیف اے رنگ ءَ پسُو دنت کہ آجوئی گِرگ ءِ واست ءَ راہ مُدام نہ وش اِنت، لس مھلوک ءِ واست ءَ اے گرانیں سپرے بابت ءَ جیڑگ ھم سک گران اِنت ،بلے ھمے زمانگ ءَ وھدے آسمی وپا ءِ کاراں ما چاریں گُڑا مُدام پہ وتی پاٹی ءِ کارانی واست ءَ پند جنّگ ءَ بیت۔ ما ھردیں کہ اے ھلکانی نیمگ ءَ سیاسی تر ءُ تاب ءَ شتگ اَنت گُڑا آسمی وپا دیستگ کہ آ مُدام پاٹی ءِ کاراں گوں دزگٹ اِنت۔ اے وڑیں باسک مُدام مئے چمانی چیر ءَ بوتگ اَنت۔

آسمی وتی کار ءُ کِردانی سوّب ءَ اولی رند ءَ ڈنڈار بُنزہ ءِ یونٹ سیکرٹری جوڑ کنگ بوت۔ آسمی ءَ وتی وھد گیش ءَ چہ گیش ھمے چیز ءَ داتگ کہ چوں ڈنڈار ءِ تہ ءَ گل ءِ کاراں شرتر بہ کنت۔ آ مُدام گوں گل ءِ کاراں گلائش اَت، یک ساھتے ھم تو ھُشک ءُ ھالیگیں دست ءَ نندگ ءَ نہ دیست۔ اے میان ءَ آئی ءِ کار گیشتر بنت آئی ءَ ناں تھنا ڈنڈار ءِ بلکیں سرجمیں کولواہ ءِ کش ءُ کِر ءِ کار گوں بنت۔آئی ءِ کار مُدام گوں لس مھلوک ءَ ِنندگ ءُ آھاں سیاسی سنچ ءُ راجی جُنزے درونت ءَ دیگ بیت۔ اے زمانگ ءَ کہ آسمی وپا بنزہ ءِ زمہ واریانی سوّب ءَ جِتا جِتائیں بِنزھانی سنگتاں گوں نند ایت گُڑا آئی ءِ کاراں چہ ھرکس وش بیت، ھرچ باسکے ھمے لوٹ ایت کہ وپا ءَ بائدیں ھنکینی زمہ واری دیگ بہ بیت۔ دو رند ءَ بُنزہ ءِ زمہ دار بوئگ ءَ رند آسمی وپا ءَ ھنکینی زمہ واری دیّگ بیت۔ 2011 ءَ وپا ڈنڈار ھنکین ءِ نائب سدر جوڑ کنگ بیت۔ ھنکینی زمہ واریاں چہ پد وپا ءِ کار گیش بنت۔ آسمی وپا ءِ کار ءُ کِردانی سر ءَ وھدے آئی ءِ دیرگیں سنگت زباد بلوچ کہ اے وھد ءَ وت آواران ریجنل ءِ نائب صدر بیت گُش ایت”من چہ کسانی ءَ آسمی ءَ زان آں۔آ کسانی ءَچہ ھاموشیں مردے بوتگ۔ تُربت ءَ وانگ ءِ روگ ءَ ساری آئی ءِ سیاسی بودشت اے وڑ ءَ نہ بیتگ بلے وھدے تُربَت ءِ وانگ ءَ پد آسمی ءِ تہ ءَ سیاسی مارشت گندگ ءَ کاینت۔ اے تُربَت ءِ سیاسی ماھول ءِ سان بنت کہ آئی ءِ سیاسی رُدوم کتگ اِش۔آسمی ءَ پہ کاراں دمبرگ نزانت۔ مُدام ھمے جھد ءَ اَت کہ وتی گیشتریں وھداں گل ءِ کاراں بہ دنت۔ ھمے کارانی سوّب ءَ آ 2011 ءَ ھنکینی صدر گچین کنگ بیت۔ آ وتی کاران شر ءَ چہ شَرتر کنت، آسمی وپا ءِ وڑیں مردم راستی ءَ بس راجی جُنز ءِ واست ءَ جوڑ بوتگ اَنت ۔ھمے کار کنگ ءُ دم نہ برگ ءِ سوّباں آ دو سال ءِ تہءَ گلے ءِ جتا جتائیں اگدھانی سر ءَ کار کنت-

2012 ءِ ھنکینی لس دیوان ءَ آسمی پد ءَ ھنکینی صدر گچین کنگ بیت۔ اے سرجمیں آسمی ءِ کارانی برورد اَنت ءُ دُرستیں باسکانی بیسہ ھم ھمیش اِنت کہ آسمی ءَ ابید دگہ کس اے کار شریں وڑے ءَ کت نہ کنت۔ آئی ءِ بیسہ ھم ھمیش اَت کہ ابید لس مھلوک ءِ کُمک ءَ ما یک وشیں بانداتے پہ وت جوڑ کُت نہ کن ایں۔ پہ وشیں بانداتے ءَ المی اِنت کہ لس مھلوک ءَ گوں وت ھوار بہ کن اِیں۔ آسمی ءِ کارانی سر ءَ بی این ایم ءِ کار گشاد دلمراد بلوچ گُش ایت ”اے وھد ءَ جاورال سک نگیگ بنت پہ سیاست ءَ۔ بلے ھمے وھدے اگاں ما آسمی ءِ کاراں چارایں یا آئی ءِ سگّ ءُ اوپار ءَ چار ایں آئی ءِ کارانی تہ ءَ مستقل مزاجی ءَ چاراں ،اےدُرست مارا آسمی وپا ءِ کارانی تہ ءَ گِندگ ءَ کاینت۔آئی ءَ کار کنگ ءَ بیھ دم نہ بُرت،آ مدام پہ گلے کارانی واست ءَ جاڑیگ ءَ اَت۔ پہ یک آشوبی ءَ جاورھال بیھ گیگ ءُ گور نہ بنت آمُدام درد ءُ جنجالانی تہ ءَ زندگی کنت۔ اے زمانگ کہ آسمی کار ءَ بیت، پاکستانی زُلم ءُ زوراکی گیش بنت، ھرروچ مردمانی گار ءُ بیگواہ کنگ ءِ یک دِرچے بِندات کنگ بیت۔ بازیں بلوچ ورناھانی ژانگولیں جون دور دیگ بنت بلے آسمی وپا ءِ وڑیں مردمے نہ لوٹ ایت کہ من اے رنگ ءَ نمیران بہ باں بلکیں آ گوں دژمن ءَ دیم پہ دیم بوئگ میڑگ ءُ نمیران بوئگ لوٹ ایت۔ وھدے زُلم ءُ زوراکی گیش ترّنت گُڑا انسانے ءِ کِرّ ءَ ابید ھمائی ءِ زوان ءَ پسّو دیگ ءَ دگہ ھچ پش نہ کپ ایت۔ ھمے کسّہ بلوچ ءِ گوں پاکستان ءَ اَت۔ آسمی وپا ھم ھمے ماریت کہ منی کِر ءَ سلاہ بندیں جنگ ءَ ابید دگے ھچ راہ نیست اِنت گُڑا آ پیسلہ کنت کہ من سلاہ بندیں جنگ ءِ نیمگ ءَ رواں ءُ دژمن ءَ گیش ءَ چہ تاوان دے آں۔آ وتی ھمے گپ ءَ بی این ایم ءِ وتی نزیکیں مردمانی کِرّ ءَ ایر کنت کہ نوں پہ من ءَ سلاہ بندیں جنگ ءَ ابید دگہ ھچ راہ نیست اِنت۔

آسمی وپا 2012 بی ایل ایف(بلوچ آجوئی سنگر) ءِ تلّو سلاہ بندیں جنگ ءَ ھوار بیت ءُ داں زند ءِ گڈی ساہ ءَ گوں بلوچ آجوئی سنگر ءَ گوں بندوک بیت۔ اے میان ءَ 11 سال ءَ داں مزن مردی ءَ گوں پاکستانی لشکر جنگ دنت۔ پاکستانی لشکر ءَ پہ وتی ڈیھ ءَ وشواب بوئگ ءَ نئیلیت۔ اے یازدیں سالانی تہ ءَ آ بلوچستان کُنڈ کُنڈ ءَ دژمن ءِ پْروش دیّ گءَ گون اِنت گوں، برے سیائجی ءِ تْرشت ءُ تلاریں کوھانی سرا ءُ برے بولان ءِ سْرمگیں دلبند ءَ ءُ برے مزبند ،زمران ءُ راسکوہ ءَ گوں دژمن ءَ جنگ ءَ اَت۔ آ مُدام گل ءِ کارانی واستا برے یکجاھے اَت۔ آئی ءِ ھمے مزن مردی،مستقل مزاجی ءُ دلیری ءِ سوّب ءَ پاکستانی لشکر مُدام آئی ءِ نزور کنگ ءِ واست ءَ وڑ وڑیں پندل سازگ ءَ بیت ءُ برے آئی ءَ چہ بلوچ جُنز ءَ چہ دور کنگ ءِ واست ءَ لب ءُ لالچ دیّگ ءِ جھدءَ کنت۔ یک رندے 2021 ءَ پاکستانی لشکر وتی دو چانوگریں بلوچ کاسِد کنت ءُ دیم دنت کہ آسمی ءَ بہ گُش اَنت کہ لشکر گُش ایت ترا چارکروڑ کلدار دیگ بیت تو آجوئی ءِ جُنز ءَ چہ دست کش بو، بلے آسمی راجی جُنز ءِ یک انچیں توانائیں سپائیگے ات کہ آئی ءَ ھچ وڑیں لب ءُ لالچ ءَ چہ راجی جُنز ءَ دور کُت نہ کُت۔ آ مُدام گوں مھکمی ءَ وتی کاران دیم ءَ بران ات۔ ھمے مھکمی ءِ سوّب آ بلوچ راجی سنگر ءِ جتاجتائیں اگدھانی سر ءَ بیت۔اول سر ءَ آ نیٹ ورک کمانڈر ءُ پد ءَ 2022 ریجنل کونسل ءِ نیمگ ءَ چہ میجرے ءِ اگدہ دیّگ بیت۔ آ بلوچی زبان ءِ یک شریں شائرے بیت۔ آئی ءِ شئرانیءِ تہ ءَ بلوچ ءُ بلوچستان گِندگ کئیت اِنت۔ آئیءِ جنگ ءِ تہ ءَ ھنرمندی ءُ دلیری ءِ کسّہ سک باز اَنت انچوشکہ یک سنگتےگُش ایت 2017 گشکور ءِ کیمپ ءَ پاکستانی لشکر فائبرل کیبل جَنگ ءَ بنت۔ ھمے جنگ ءِ کسھاں ءُ آسمی وپا ءِ جَنگی ھنرمندیانی سر ءَ یک سنگتے گپ کنت کہ آ وت اے جَنگ ءِ تہ ءَ گون بیت گوں، گُڑا ھما سنگت کسّہ کنت کہ یک رندے سنگتانی نیمگ ءَ چے اے سوّڑگ بیت کہ گیشکور ءَ پاکستانی لشکر ءِ سر ءَ اُرش کنگی اِنت آسمی ءَ اے زمہ داری دیّگ بیت کہ تو آھانی سُر ءُ پُراں بِچار۔ سُر ءُ پُرانی چارگ ءَ چہ پد وھدے اُرش ءِ وھد کئیت آسمی وپا ءِ ھنرمندی ءُ جنگی شوربندیانی سوّب آ پاکستانی لشکر دمانے جَن اَنت۔ آسمی وپا ءِ جنگی شوربندی ءُ جنگی ھنرمندیانی کسّہ سک باز اَنت کہ آئی ءِ شوربندیانی سوّباں مزن ءَ چہ مزنیں جَنگ کٹتگاں۔ اے جنگانی کسّہ بلکیں یک نبشتانکے ءِ تہ ءَ سرجم مہ بنت۔ آسمی وپا بلوچ راجی آجوئی ءِ جُنزے یک انچیں کارستے اَت کہ آئی ءِ کارانی سر ءَ کتابانی کتاب پُر بنت بلئے آئی ءِ کار ءُ کردانی دیم ءَ اے کتاب ھم کم بنت۔ میجر آسمی وپا 11 مئی 2023 ءَ ھوشاپ ءَ دژمن ءَ گوں دیم پہ دیمی جنگے ءَ گوں وتی 5 سنگت ءَ ھوار، سیٹھ عبدلصمد ءِ محمدرحیم، عارف ءِ علی بخش، جاوید ءِ بدل ، شاہ میر ءِ شکر، علی ءِ بجار دژمن ءَ گوں جوانمردی ءُ مزنیں جنگے ءَ پد نمیران بنت۔ بلئے آھانی داتگیں راہ کہ آھاں مارا شون داتگ آ انگت ھست اِنت۔ مروچی ھما نمیرانیں سرانی برورد اِنت کہ بلوچ راجی جُنز اِد ءَ سر اِنت۔بلئے یک گپے ءَ چہ مارا شُمارا شموشکار بوئگی نہ اِنت کہ ھما راہ کہ مئے نمرانیں سراں مارا شُمارا شون داتگ مارا شمارا ھم ھما راہ زورگی اِنت ءُ دیما برگی اِنت، نوں گُڑا آھانی ارواہ آسودگ بنت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اسد جان ءُ ساوڑ جان ءَ

چراگ بلوچ

دی بلوچستان پوسٹ

داہ گڈی تیری ساھت ءَ من جنگ کناں
نکرزاں چوں اسد جان ءُ ساوڑ جان ءَ من جنگ کناں

نزور نباں گوں لگوریں لشکر ءَ من جنگ کناں
نکرزاں چوں اسد جان ءُ ساوڑ جان ءَ من جنگ کناں

داہ گڈی تیر ءِ ساھت ءَ من جنگ کناں
نزور نباں گوں لگوریں لشکر ءَ من جنگ کناں

ھزاب ءِ توکا تو سوچیں ءُ گار بے
من کاراں پتو ھر کیمت ءَ من جنگ کناں

کلاتاں پروشاں واجیں تںُی سر آں
چشُ کہ نیلیں تو بندیں مںۓ سر ڈگار اے سر آں

نزور نباں گوں لگوریں لشکر ءَ من جنگ کناں
چشُ کہ اسد ءُ ساوڑ ءَ کہ شیر دل ئے

داہ گڈی تیر ءِ ساھت ءَ من جنگ کناں
شاہ جو شھیدیں بنگ ءَ نوش بکن برو

گوں توکل ءُ ھِمت ءَ من جنگ کناں
داہ گڈی تیر ءِ ساھت ءَ من جنگ کناں

نبشتانک:پد ءَ کدی کائے؟

نبشتہ کار: نور بلوچ

دی بلوچستان پوسٹ

مھروان ھر وھد ءَ من وپسگ ءَ باں من ءَ مھروان گیر کیت داں کہ من گوں مھروان ءَ گپ ءُ تران مہ کن آں، آ شپ ءَ من ءَ واب نئیت پرچا کہ من ءَ گوں مھروان ءَ بے کساس مھر اِنت، ھمینچو من ءَ گوں آئی ءَ ھمینچُک ءَ چہ گیش آئی ءَ گوں من ءَ مھر اِنت، مئے مھر ءِ بندات چہ یک سُورے ءَ بوتگ اَت، من ءَ یات اِنت سور ءِ اولی روچ ءَ مھروان آتکگ اَت مھروان ءَ زردیں دوچھیں پوشاکے پِر اَت ءُ بچکندگ ءَ اَت ءُ سک ڈولدار اَت من کہ مھروان دیست ءُ منی چماں تیوگیں جھان رژناہ بوت من ءَ سک دوست بوت من ھرجاہ ءَ شُتاں منی چماں بس ھمے رُژنائی اَت ءُ مھروان ءِ بچکندگانی زیبائی اَت من ھچ پیم بوگ ءَ نہ اِت آں۔

من نہ زانت کہ چِہ وڑ گوں مھروان ءَ گپ ءُ تران بہ کن آں چِہ وڑ مھروان ءِ کِر ءِ برواں منی دل ءَ وس وسے چست بوت کہ الم گوں مھروان ءَ گپ بہ کن آن ءُ کِر ءِ برواں، من باز سر سر جت ھچ وڑ ءُ پیم بوگ ءَ نہ اَت، اناگہ ءَ من ءَ منی ترو ءَ دیست ءُ من ءَ گوانک جت ئِے من ترو ءِ کِر ءَ روگ ءَ سک ملامت بوگ ءَ اِت آں، پرچا کہ آ مچی ءِ تہ اَت زالبولانی کِر ءَ نشتگ اَت، گڑا من بلاھیں اُپارے کِش اِت ءُ شُت آں، ترو ءَ من ءَ گوشت کہ ” تو نی سک مزن ئے، سلام ءُ دوائی نہ ئے”، گڑا مھروان ءَ ھم گوشت ” ھو اے وَ سک مزن اِنت گریباں پجا ھم نیار ایت” منی دپ ءَ لھم لھمیں بچکندے تالان بوت من گَل کُت کہ مھروان ھم ھمد ءَ نشتگ گڑا من ترو ءَ را دروت ءُ دارھی کُت دست ملارینت ءُ ترو ءِ سبب ءَ مھروان ءَ ھم دست مِلارینت مھروان ءِ دست ملارینگ ءَ چہ منی جان ءِ تیوگیں پُٹ برانز گپت اَنت، من دگہ وڑ بوت آں، گند ئے کَرنٹ بہ لگ ایت، من ءَ گُش ئے کَرنٹے لگ اِت، من آژناگ بوت آں، گُڑا من کمو ھمد ءَ نشت ءُ دیوانے ءَ لگ اِتاں چم ءُ ھیال گوں مھروان ءَ اَتاں، ما ھمد ءَ باز دیوان کُت کندگ ءُ مسکرائی بوت داں کہ شپ بوت۔

مھروان گوں وتی دزگھاراں پاد آتک ءُ شُت سور ءِ نیمگ ءَ ورگ ءِ تیاری بوگ ءَ اَت، دراہ مردم یکجاہ بوت اَنت، مھروان ءَ جگ ءُ گلاس دست ءَ اِت اَنت پہ مردمانی آپ دیگ ءَ ما ورگ ءَ آؤرت اَنت ورگ بندات بوت من ھمد ءَ اوشتگ اِت آں، منی ھیال دگہ نیمگے ءَ شُت ءُ مھروان آتک منی دیم ءَ آپ ئِے جَت ءُ گوں بچکندے ءَ گْوشت ئِے “ھاں تو کجا ئے؟ تئی ھیال کجا اِنت، زاناں تئی لانچے بُڈ اِتگ،” من پسو دات انا بس کمو ھیال ٹَل اِت،
گوں بچکندے ءَ گوشت ئِے، ” پریشان مہ بو تئی ھم سور بیت،” من درائینت ھو منی سور وَ بیت بلے من ءَ منی ھمسپر دست نہ کپگ ءَ اِنت، داں ھمسپر دست بہ کپ ایت من پیر بہ آں، کندگ ءَ لگ اِت ءُ گوشت ئِے ” اللّٰہ ھیر کنت زوت ترا تئی ھمسپر دست کپ ایت،” من درائینت اللّٰہ تئی دپ ئیگاں بہ کنت، ءُ من ءَ آپ ئِے دات ءُ یکے ءَ گوانگ جَت ءُ ھماگو شُت گڑا مردماں ورگ وارت پادآتک اَنت، ما ھم ورگ وارت ءُ ھر کس پہ دیم ئِے شُت۔

یازدہ ءِ ساھت بوت سالونک ءِ انی ءِ تیاری بوگ ءَ اَت ھرکس وت ءَ تیار کنگ ءَ اَت ءُ مھروان تیار بوتگ اَت، آتک ءُ لوگ ءِ دپ ءَ اوشتات گش ئے، مھروان ءِ اوشتگ ءَ گوں منی چماں تیوگیں کمپان رژناہ بوت من وتی چم چست کُت اَنت، مھروان لوگ ءِ دپ ءَ اوشتاتگ ءُ سک زیبا اَت من ءَ گیش دوست بوان بوت مھروان ءَ گوں سُٹ ءَ من ءَ ملار کُتگ اَت، منی دپ پچ اَت ءُ ھیران اِت آں، مھروان وتی دزگھارانی نیمگ ءَ روگ ءَ لگ اِت ءُ آتک منی جُپت ءَ سر بوت گْوشت ئِے ” دپ ءَ بند کن مچرے روت” مھروان ءَ آزمانی ئیں سُٹے پِر اَت بے کساس ڈولدار اَت مھروان وتی دزگھارانی نیمگ ءَ شُت، دانکہ درست تیار بوت اَنت سالونک آرگ بوت ڈھول شرو بوت اَنت سالونک ءِ انی کنگ بندات بوت سالونک انی کنگ بوت ءُ دوازدہ ءِ ساھت بوت ڈھولی بچکاں بُرت اَنت چاپ جاہ ءَ بچکانی چاپ شرو بوت بچکاں چاپ پہ وڑے گپتگ اَت، من ھم چاپ ءَ اِت آں سے ءِ سھت ءَ مھروان ءَ گونڈو یے روان داتگ اَت۔

گونڈو ءَ من ءَ گْوشت ” ترا پلانی لوٹگ ءَ اِنت،” من چاپ یلہ دات، چہ ھید ءَ سریچ اِت آں، دیم پہ مھروان ءِ نیمگ ءَ من مھروان ءِ کِر ءَ سر بوت آں، جُست کُت ھاں ھیر اِنت؟ مھروان ءَ درئینت بہ نند زاناں تو اِشتاپی ئے؟ انا من اشتاپی نہ آں، تو من ءَ ھیری لوٹ اِتگ;؟ چوناھا من ءَ وش نہ بوگ ءَ اَت من گْوشت من ءُ تو دیوانے کنیں پمیشکا رو برو، انا نی من نہ رو آں، گڑا من نشت گوں مھروان ءَ دیوان کُت، دیراں من مھروان ءَ گْوشت تو چونیں وشیں گپ جن ئے ءُ من ءَ سک دوست بوگ ءَ ئے، مھروان ءَ گْوشت تو ھم من ءَ دوست بہ ئے بلے من ترا گْوشت نہ کُتگ من اے ھم زانتگ کہ تو من ءَ سک دوست دار ئے۔

گڑا ھمد ءَ بازیں گپ ءُ تران بوت گپے من ءُ گپے مھروان دانکہ پنچ ءِ سھت بوت ءُ مُلا ءَ بانگ دات مھروان ءَ گْوشت کہ نی بِہ وپس شپ ھلاس اِنت من ھم وپس آں، گڑا من شُت ءُ وپت آں، سھب ءَ دہ ءُ نیم ءَ پاد آتک آں جان شُش ءُ تیار بوت آں یازدہ ءُ نیم بوتگ اَت، روچ ءِ ورگانی تیاری بوگ ءَ اَت انچوش وھد روان اَت گڑا یک ادارھے ءَ پد ورگ تیار بوت اَنت، من مردینانی نیمگ ءَ شُت آں اے کار ءُ آ کار روگ دیان ءَ داں سِے ءِ سھت ءَ ورگ بند بوت ورگ دیگ ھلاس کُت چہ دور ءَ آتکگیں مھمان روگ ءَ اِت اَنت مھروان ءِ زئی ھم روگ ءَ اِت اَنت، من مھروان ءِ رُکستی ءَ آتک آں من مھروان رُکست کُت ءُ گڈی ءَ ھمے گْوشت من تئی ودار ءَ آں۔ پد ءَ کدی کا ئے؟ مھروان ءَ بچکند اِت ءُ اِن شاءاللّٰہ گڑا مھروان ءِ زئی دیم پہ وتی میتگ ءَ رھادگ بوت اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

تُن ءُ گوادر ءِ میان استمانی ارزشت

نبشتہ کار: بورتاچ بلوچ

دی بلوچستان پوسٹ

بلوچ ھرچ کجا کہ نشتگ ءُُ آباد انت گڑا الم ءَ گژنگی ءُُ بزگی آئی ءِ ھرروچیگی گُزران اِنت ءُُ آئی ءِ بھت ءِ تالھ چو مدامی وڑ ءَ شکون اِنت باریں پرچا۔۔۔؟ یک گپے پدر اِنت کہ بلوچ وتی ڈیھ ءِ سر ءَ گُلام اِنت ءُ آھاں کہ گُلام داشتگ گڑا آھانی چم پہ بلوچ لس مھلوک ءَ کور اَنت ءُُ آ ایوک ءَ اودے گواچن ءُ مڈیاں چو ھڈّکی ئیں کچک ءِ وڑ ءَ گند اَنت بس۔۔۔اے وَ پدریں راستی یے کہ سامراج ھچ وڑ ءَ لگتمالیں راج ءِ دیمروئی ءِ باروا پگر نہ کنت ءُ آئی ءَ ھر وھد ا جھد ھمئے بیت کہ کجام وڑ ءَ یردستیں راج ءَ لگتمال بکناں ءُُ ھر پڑا پد منتگی آھانی مزنیں دیمروئی بہ بیت۔ھمئے پیم ءَ گوادر یک پدریں راستی یے چیاکہ انیگیں وھد ءَ ھرکسی دپ ءَ ایوک ءَ ھمے گپ اِنت کہ گوادر ءِ دیمروئی سرجمیں بلوچستان ءِ دیمروئی اِنت بلئے دومی نیمگ ءَ اگاں چم پچیں مردم وتی چماں شانک بدینئیت گڑا الم ءَ آھاناں گوادر ءِ بزگیں مھلوک چو البرز ءِ مِکیں کوہ ءَ گندگ ءَ کاینت کہ پہ ترمپے آپ ءِ واستا بیست ءُُ یکمی کرن ءَ تلوسگ ءَ انت ءُُ آھانی نُک چو تلار ءَ ھشک اَنت ۔پہ درور پیش ءَ دُزی ءِ کنگ پہ مھلوک ءَ نوکیں گپے نہ بوتگ بلئے وھدے ماں ھالتاک ءَ اتکگ اَت کہ گوادر ءَ چہ یک لوگے ءَ آپ دُزگ بوتگ گڑا الم ءَ مھلوک اجکہ بوت انت کہ آپ بے بھائیں چیزے ءُُ کسی گت ءُُ گمان ءَ نہ بوتگ کہ آپ ھم دُزی بیت بلئے چے کن ئے کہ نُک ھم تر کنگی اِنت۔۔۔! گوادر ءَ ۔۔۔پرچا چونام کشیتگ ءُُ میان اُستمانی مزنیں جیڑہ ءَ چہ یک جیڑہ ھم زانگ بیت ءُُ پاکستان ءُُ چین ءِ سنگتی ءِ بُن ھشت ھم گوادر ءِ سر ءَ ایر اِنت ۔۔۔ ءُُ بے ابرمیں استان وتی باندات ءِ وش ھالی ءَ ھم گوادر ءِ تہ ءَ پٹ ءُُ لوٹ کنگ ءَ انت۔۔۔وش ھالی ۔۔۔تُنگی ۔۔۔دوجتائیں گالبند اَنت۔۔۔تُنگی مدام بلوچ ءِ پدا گوادر ءِ لس مہلوک ءِ بھت ءَ بوتگ ءُُ تُن ءِ پروشگے واست ءَ مئے گھار اں ھون ھم ریتکگ چُشکہ ازگل بہ بیت یا یاسمین۔۔۔بلئے بے ابرمیں استان نزاناں وش ھالی ءِ شوھاز ءَ کجام دگ ءَ راھی اِنت ۔۔۔اگاں ھما دگ کہ اودا ازگل ءُُ یاسمین ءِ ھون ریتکگ اَنت گڑا الم ءَ آ جاہ تنی وھدی لگُشتانک اِنت ءُُ بے ابرمیں استان ءِ واستا سوب بے سوبی ءَ ابید ھچ نہ بیت۔وش ھالی ءُُ تُنگی چہ اَزل ءَ یکے دومی ءِ بدواہ اَنت پد ءَ بھت ءَ بچار ھمئے دوئیں یک برے پد ءَ ماں گوادر ءِ دگانی سرا دوچار کپگے نزیکی ءَ سر بوئگی اَنت۔۔۔سوب ھر وھدا تُنگیں مردمے دامن ءَ کپتگ چیاکہ بزگی ،لاچاری،واری،تنگی ءُُ ایدگہ ویل ءُُ ازاب آئی مدام دیستگ انت ءُُ نوں کہ وھدے تُن ءِ پروشگ ءَ درکپتگ گڑا آئیءِ دیم ءَ کس اوشتات نہ کنت چیاکہ آ باز تُرسناک ءُُ بیمناک اِنت۔

گوادر پمیشکا ارزشت داریت کہ گوادر پورٹ پاکستان ءِ تہ ءَ سیمی مزنیں پورٹ اِنت ءُُ آبنائے ہرمز(Strait of Hurmuz) ءَ چہ کساس 642 نوٹیکل کلومیٹر دور اِنت ءُُ آبنائے ہُرمز ءِ رودرتکی نیمگ ءَ انت کہ آبنائے ہرمز دُگنیا ءِ یک مزنیں تیل ءِ کشکے کہ اود ءَ چہ ہر روچ کساس ۱۳ ملین بیرل تیل گوازیت اِنت ءُُ گوادر سے(۳) ارزشت داریں ھندانی لوٹاں پیلو کنت بزان میڈل ایسٹ (کہ دُگنیا ءِ تہ ءَ تیل ءِ سوب ءَ نام دار ءُُ ارزشت دار اِنت)،زرباری ایشیا ،سنٹرل ایشیا ءُُ روبرکتی چین ءِ۔۔۔چائنہ پاکستان اکنامک کوریڈور(CPEC)ءَ چہ گوادر پورٹ سنٹرل ایشیا ءِ ملکاں،زرباری ایشیا ءِ ملکاں ،گلپ مُلکاں ءُُ چین ءَ ھوار ادگہ ملکاں یکے دومی ءَ گوں ھمگرنچ کنت۔گوادر پورٹ ءِ بازیں آسراتی ھم است انت چُشکہ مزنیں انبار(گودام)،آبی گراب ءِ مٹ ءُُ سٹ(Transshipment)،ٹرانسپورٹ،تیاب دپی بیپاری(Coastal Trade)،بیپاری ءُُ انڈسٹریل ءِ آسراتی پہ میان اُستمانی بیپاری ءَ ۔۔۔ھاس پہ افغانستان ،سنٹرل ایشیا،زرباری ایشیا،عمان،یو اے ای،سعودی عرب،قطر،عراق،ایران،چین ءُُ دگہ بازیں ملکانی واست ءَ ۔۔۔بلئے چین ءِ چماں گوادر پمیشکہ ارزشت دارایت چیاکہ چین ءِ تہ ءَ یک چوشیں پورٹ ئے نیست کہ سرجمیں سال ءَ آئی ءَ چہ کار گرگ ءُُ کارمرز کنگ بہ بیت ءُُ شنگائی پورٹ چہ چین ءِ انڈسٹریل ھند ءُُ دمگاں کساس 4500کلومیٹر دیر اِنت پمیشکا آھاناں اود ءَ باز وھد درکار بیت ءُُ مزنیں ھرچ ءُُ درچے لگیت ءُُ ایشی نسبت ءَ گوادر پورٹ چہ چین ءِ انڈسٹریل ھند ءُُ دمگاں کساس 2,500کلومیٹر دیر اِنت ءُُ سرجمیں سال ءَ گوادر پورٹ ءَ چہ کار گرگ ھم بیت چیاکہ ایشی ءِ آپ گرم اِنت ءُُ نہ بَد ایت۔کاشگر چہ چین ءِ رودراتکی تیاب ءَ کساس 3,500کلومیٹر دیر انت ءُُ کاشگر چہ گوادر ءَ 1,500کلومیٹر دیر اِنت پمیشکا چین ءَ ھَڈک ءَ کُتگ ءُُ پد ءَ لنگڑیں کُچکے ءَ پہ چانو زندگ داشتگ ءُُ سنگتے کُتگ بلئے پہ چانو زندگ بوئگ سک گران اِنت چیاکہ پہ چانوگ یک مردمے مُدتے ءَ داں زندگ بیت کنت پدا یک ملکے کجا وت ءَ زندگ داشت کنت۔وھدے اے کسہ ءَ گوادر ءِ مید ے گوں وتی چُک ءَ کنت گڑا الم ءَ چُک وتی پت ءَ را جُست کنت ،”ابا اینکا آسراتی کہ گوادر ءَ بیت گڑا مارا آپ ھم پہ سیرا رس ایت۔” گڑا پد ءَ پت ءِ پسو الم ءَ یک پُرشتگیں بچکندے بیت کہ آئی تہ ءَ کرنانی کسہ پہ ماروک ءَ پھک ءَ پدر ءُ سھرا بنت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زاھر ءَ کدی سر جھل نہ کت

نبشتہ کار: سازبان بلوچ

دی بلوچستان پوسٹ

زاھو گوں وتی کساں سالیں بالاد ءَ وتی سیاد ءُ وارساں وتی چَپ ءُ چاگرد ءُ سرجمیں تک ءُ پھناتاں بگر دانکہ پگری ءُ سنجی سنگتاں سَدانی کساس ءَ ژانگولیں جون دست گپت اَنت بلے کدی آ تُرس ءُ بیم ءِ آماچ نہ بوت نیکہ آنزور تر اِت ءُ نیکہ آئی ءَ زوراکیں ھستین دیم ءَ سر جھل کُت، آئی ءَ نااُمیتی، آزاری ءُ دلپروشی ءِ گپ بِھ نہ کُت مدام آئی ءَ گپ ءُ تراناں چہ دیمروئی چیدگ زاھر بوت، جُنزان اَت کدی دمبرگ ءِ نام نہ زانت۔

زاھو ءِ وتی زاتی زند ءِ لوٹ، گُزر ءُ واھِشت یَل کُتگ اِت اَنت آئی ءِ مُول ءُ مُراد بَس زَمین اَت ءُ زَمین ءَ گوں مِھر اَت چیاکہ آھمے زمین ءَ رودینتگ اَت چہ درکسانی بگر دانکہ ورنائی ءِ سمسراں زمین ءِ گوں بندوکیں ھمک جیڑا آئی ءِ باتن ءِ بھر کتگ اَت، وَھدیکہ مردُم ءَ را گوں زَمین ءَ مِھر بِہ بیت آئی ءِ کُلیں ایندگہ واھِشت ھلاس بُوان بَنت۔ زاھو ءَ زَمین ءِ مِھراں گام پَہ گام دیمونی دِئیگ ءِ سِکین داتگ اَت زَمین ءِ مِھراں آ چَہ ساہ ءُ سَراں سَر گوازگ پَرمات، زاھو سرپد اَت کہ مھر کربانی دومی نام اِنت مھر بے کربانی ھُورک ءُ ھالیگ اِنت وَھدیکہ سِتک ءُ دلیں مِھر مردُم ءِ اَندر ءَ جاہ بِہ کَنت گُڑا مِھر زِند ءِ گُڈی سَاھتاں منزل ءَ بارت ءُ سَر کَنت۔

زاھو مھراب ھان ءِ تمردی ءَ سرپد اَت، نوروز ھان ءِ چمانی دیم ءَ آئی ءِ پُسگانی پاھو دیگ ءِ وئیل ءَ سرچکار اَت، چاگی ءِ زیبائیں دلبند ءَ ایٹمی تراک بہ بیت، تپلیں زھگانی نادراھی بہ بیت، ڈیرہ بگٹی ءَ ھستیں ءِ چُکچینی، ناشرکاری، پادمالی ءُ تپلیں زھگ ءُ زالبولانی سر ءَ بمب گواری بہ بیت یا بلوچ زالبولانی پاکستانی پوج ءِ دست ءَ سیاہ کاری کنگ ءُ روانسری آواجنی بہ بیت بلوچ چاگرد ءِ ایردستی ءُ ورنایانی آزانی ٹُکر کنگ ڈیھہ یے ھمک وئیلانی باروا زاھو گوچیں دروشم ءَ زانتگ اَت۔

زاھو زانتگ کہ چنچوں کار جیڑا ترا شر کنگی اَت ءُ تو زانتگ اَت کہ مرگ ھست اِنت اِد ءَ کس پش نہ کپ ایت بلے ھمے زَانت ءَ کہ ترا لیکہ بُرزے کتگ اَت کہ تو پرومی یا پنجگوری نا بلکیں تو بلوچستان ءِ مردمے ئے، تو بلوچ ءِ ئے تو زانت کہ تو ھست ئے اے جنگ ھست انت زلم ءُ زوراکی ھست انت، شری ءُ ناشرکاری استاں، ھمے راستیانی بنزہ کہ استاں تی ودی کُتگیں راستی اِنت۔

زاھو چہ دُرستاں پیسر وتی راجی زبان وانگ ءُ دربرگ لوٹ ایت ءُ نبشتہ کنگ ءِ جھد ءِ کت زُبان دوستی ءُ راجدوستی آئی ءِ تہ ءَ راجی آشوب ءِ بابت سرپدی ءُ راجی جُھد، زبان زانتی ءُ راجدوستی ءِ ارزشت زانتگ ءُ پھمتگ اَت، زاھو تچکیں نودربرے اَت آ گوں دل ءُ ستک بلوچ جُھد ءَ بندوک اَت آئی ءَ مُدام جیڑ اِت وتی سنگتانی بابت ءَ کہ آچینچو سَکّی ءُ سُوری گِندگ ءَ اَنت ، آ چینچو واری ءُ بزگی دیمپان اَنت ، آشَپ ءُ روچ پَہ بلوچ راج ءِ آھوکیں باندات ءِ ھاترا پَند بُرگ ءَ اَنت، پَہ زمین ءِ رَکّینگ ءِ ھاتر ءَ وتی ساہ ءُ سَراں ندر کَنگ ءَ آں، اے زمین ءُ سنگتانی مِھر اِت اَنت کہ زاھو جیڑگ پرمات اش، زاھو ءَ زمین ءِ مِھر ءَ دیوانگ ءُ کنوک کتگ ات آئی ءَ نہ شپ زانت نیکہ روچ پہ بلوچ ءِ آھوکیں بندات ءُ پدریچ ءِ ھاترا مدام جاڑیگ اَت، جیڑگ ءَ اَت کار کنگ ءَ اَت۔

زاھو زالم ءِ درستیں زوراکی، مکرہ ءُ پریب تئی دیم ءَ اِت اَنت تو زالم ءِ ھچ ڈولیں زلم ءُ زوراکی چیر نہ دات۔ زورگیریں زالم ءَ مستری، پادمالی ءُ لگتمالی کُت گڑا تو الم توار چست کت زالم ءِ زوراکیانی بگیری ءَ تو زانتگ اَت کہ ما اگاں توار چست مہ کن ایں ھاموش بہ بے گڑا زالم وتی زوراکیاں گیش وداں کنت ءُ بلوچ ءِ باندات پہ تھاری ءَ ابید دگہ ھچ پشت نہ کپ ایت۔

زاھو بلوچ ءُ بلوچستان ءِ روژنائی کندیل ءِ اَت مدام بلوچستان ایردستی ءِ ھاتر ءَ زھرشانی ءُ روانکاں گوں سنگتان دیم سرپ ءَ آوار اَت انگت بلوچستان ءَ روانک کشگ بوھگ انت بلے تو گوں سنگتاں گون نہ ئے۔ زاھو چہ تی نام ءَ بازیں نودربر جاہ آرگ بیت تو پنجگور ءِ براہ اِت ئے کہ پنجگور ءَ مروچی ھم تئی جھدے روژنائیں پگر شنگ اِت، زاھو گپ ءِ زان ئے تی توار انگت بلوچستان ءِ ھمک چِہ ودی اِنت ھمک نودربر تئی سر ءَ پھر بند اِیت ءُ تئی چارگ ءَ جن اِنت تئی جوزگ ھرچ ورنایے دل ءَ اِنت تو زندگ ئے۔

زاھو تو گپے سرپدے تو پیروز ابیتک کُت ءُ شوت ئے، بیاکہ تئی چاراہ ءِ سر ءَ نیشگ تئی ودار ءَ انت کہ تو دوبر واتر کن ئے، زاھو ترا سما اِنت کہ پیروز گوں درد ءُ گمانی کِشکاں چنچوں پند بُرگ ءَ اِنت گوں رنج ءُ گماں چنچوں دوچار کپتگ یار زاھو تو پیروز تھنا مہ کت ایں، کہ آ تئی مھروان ءُ تی ھم کوپگ ات تئی دردانی ماروک اِت تئی وشی ءُ گمانی ھمراہ اِت زاھو اے ھما پیروز اِنت کہ دُژمن ءَ گار ءُ بیگواہ کتگ اَت ءُ ترا شپ ءُ روچ نیست اَت تئی گپ ءُ کندگ تئی دیوان پرشتگ اِت اَنت۔

بلے تو اے مارت کہ الم یک روچے کیت کہ ما پد ءَ دوچار کپ ایں ھمراہ بے پد ءَ گوست ءِ کسھاں کاریں دیوان کن ایں، بلے زاھو نوں پیروز اے گپ ءَ چوں باور بہ کن کہ تو ھچ بر نیائے ءُ پد ءَ یک جاہ نہ بے ءُ دوچار نہ کپ ئے، گپ کندگ دیوان مسکراہ نہ بیت بلے زاھو تو وتی زمیں رنگیں مات ابیتک مہ کت ایں یار تئی مات ءِ کندگ گار اَنت ءُ تئی اکس امبازاں کتگ ءُ پہ ترا ارس ءِ گوارگ ءَ اِنت یار زاھو ترا مات دل بیت پہ ارس ءِ گوارگ ءَ تو مُدام دومی مردم سرپد کُتگ اَنت کہ مات ءَ بِھ پریشان مہ کن اِت مات ءَ مھر بہ دے اِت بلے تو وت مات پریشان کت ءُ لوگ ویران کُت شُت ئے، ۔زاھو بیا اے لوگ ءَ مات ءَ کندین ملوری ءَ ویران کتگ بیا دوبر اے ھنکیں ءَ آباد کن چون باور بہ کناں کہ رپتگیں مردم واتر نہ بنت اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوادر شھر ءَ ٹٹ ءَ کنگ

ٹی بی پی شونگال

چین پاکستان رھگوزی ءِ سر تاج گوشگ بیوکیں شھر گوادر ءِ شھری ترس ءُ لاچاری جاورھالانی دیمپانی ءِ آماچ اَنت- بلوچ سلاہ بندانی اُرشانی رکگ ءِ ھاتر ءَ چین ءِ سرکار ءِ گوشگ ءِ پد ءَ پاکستان ءِ واکداراں گوادر شھر ءِ کَش ءُ گوراں ٹٹ ءَ کنگ ءِ پیسلہ کتگ- سَے سال ءَ پیسر ھم ٹٹ ءَ کنگ ءِ کار بندات بیتگ بلے مھلوک ءِ ترندی ءَ پد گوادر ءَ ٹٹ ءَ کنگ ءِ کار یل دیگ بیتگ- گوستگیں روچاں پد ءَ دوبر ٹٹ ءِ کار بندات بیتگ-

گوادر شھر ءَ ٹٹ ءَ کنگ ءَ شھر ءِ جھمنند بندیگ کنگ بنت ءُ ھواریں دگہ سَے دمگ پسنی، جیونی، اورماڑہ ءُ شھر ءِ دومی جاہ سربندن، پلیری، چب کلمتی چہ بنجاہ ءَ سِد انت ءُ آیاں گوادر ءِ شھر ءَ پُترگ ءَ ترندیں پھزداری ءَ گوزگ کپ ایت-

گوادر پیسر ءَ جیڑھانی دیمپان اِنت، ھوراں ترندی ءَ سانمند بیتگ بلے بلوچستان ءِ سرکار ءَ دو ماھانی گوزگ ءَ پد ھم ھور ءِ آپانی کشگ سرجمی نہ کتگ ءُ ٹرالنگ ءِ ھلاپ ءَ دریاوردانی زھرشانی یکشل ءَ برجاہ اَنت – ترندیں پھزداری ءِ سبب ءَ گوادر شھر پیسر ءَ مشکلانی دیمپان اِنت ءُ پھزداری ءِ نام ءَ مردمانی کمشرپی ءُ ننگ ءُ ناموس ءِ پادمال کنگ ءِ ھلاپ ءَ پیسر ءَ زرمبشت برجم بیتگ اَنت-

بلوچستان ءِ لُٹ ءُ پلپھانچی شوربندیانی دارگ ءِ واستا دو دھکاں گھگیری برجاہ اِنت ءُ چین ءِ لوٹانی پھزداری ءِ واستا گوادر شھر ءَ ٹٹ ءَ کنگ بیت گڑا ایشی ءَ ھچ شک نیست کہ آئی ءِ ھلاپ ءَ بلوچ مھلوک ءِ ترندیں گھگیری ءِ راہ گچین کنگ بیت اِنت-

پچیں نمدی یے پہ وتی دیدگیں ٹاپُل ءَ

نبشتہ کار: ماہ تاپ بلوچ

دی بلوچستان پوسٹ

ٹاپُل جان من نزانیں اے رواج چہ کُجا ِبندات بوت ءَ چے پیم انت نمدی یے کہ پچیں بلے اے شوکیں چیز ئے کُجا نہ کُجا کسے نہ کسے جاگھے ءَ کوھے ءِ دیما نیٹ ورک ءَ بیت ءُ ایشی ءَ وانیت ءُ پد ءَ گوں تو دپ کپ ایت ترا ھال دنت کہ کسے ءَ پتو نمدی یے نبشتہ کتگ ھئیر زمانگ ءِ کاگدانی مھراں باریں جاگہ دات کنت یا نہ بلے دیریں جیڑ اِتگ کہ ترا گیر بیاراں، پتو زھیر بوتگ ات، بے کساس زھیر، پہ تئی رواجاں پہ تئی سستگیں چوٹ آں، پہ تئی ٹھکاں ، پہ تئی زایاں ھاھاھاھا جیڑ اتگ ات کہ دمانے ءَ گوں تو گپ بکن آں ٹھک بدیاں تئی کِرا چہ لھتیں زاہ دُژمان بواراں بلے اِمروز انت زندگی انت بلوچستان انت جنگ انت، نوں ما باریں کُجا ءُ چوں دپ کپ آں برے برے پد ءَ ترا انچیں سنگت گوں وت زاہ دیگ ءِ آسرا نہ کن ئے ءُ ما ترا زاھے ھم دات نہ کن ایں ٹاپُل جان زی من ڈگار ءِ سرا شتوں چنچو ابیتک ات زناں ترا دیریں کہ تو نیاتکگے ، دمانے ءَ من جیڑ ات کھور ءَ گپ بزانتیں من جُست کُتگ ات ” آ ڈے تو چو گریوگی ئے ٹاپووو زناں انگت واتر نیاتک ءَ ” ٹاپوو کھور اسل ءَ گریوگ ءَ ات مُلا قاسو ءِ وڑیں مردمے کھور ءِ چیرا بہ نند ایت پد ءَ پاد بئیت ءُ بِھ واتر مہ کنت بائدیں کھور بہ مُرتیں بلے اسل ءَ اے کھور زانت کہ اے منی ساھگ ءِ مھر اِنت قاسو واتر کئیت پد ءَ منی ساھگ ءَ نند ایت ٹھک دنت ءُ زمین ءِ کسھاں کار ایت بلے کھور اگاں نہ مُرتگ ات بلے واجو بائدیں بہ مُرتیں بے قاسوو ءَ آ کِشک راھبندانی گوزگ چنچو ازیت کنت اے گپ ءَ واجو زانت بلے واجو ھم چو مئے وڑ ےَ وجودیت پرستے شاعر تبئیں مردمے اے کِشکانی سر ءَ وتی رپتگیں ھمبل ءَ آں گند ایت گوں آھاں گپ کنت ھبر کنت کسہ کنت اڑے پھل کن مردم کہ دپتراں پچ کنت انچو رواں بیت گپ دور روت اسل ءَ ٹاپُل اے ساھت ءَ کہ من نبشتہ کنگ ءَ اوں شپ ءِ دوزدہ بج انت من نزانیں تو کُجایے چی کنگ ءَ ئے بلے منی دل گُش ایت کہ تو سَپر ءَ ئے پرچا کہ تو مُدامی سَپر ءَ ئے ٹاپل اسل ءَ اے ساھت ءَ من پورا ترا گندگ ءَ اوں لاگ سامان ءَ باریں ساری ءَ ایں کُروو رند ءَ پشت کپانیں تو لاگ ءِ کش ءَ گون ئے دیم پہ زربار ءِ بند ءَ رؤگ ءَ ئے ” اِناں من بے ھیالاں لاگ تو پلانی ءِ کاپر ءَ بست ءَ ءُ پلانی ءِ اِسپُست ءَ پہ لاگانی ھاترا دُزی ءَ ئے اڑے ٹاپُل جان اے ڈرون ءُ جاسوس ءُ جھازانی زمانگ ءَ ھرکس سپرے ءَ در کئیت ھرچی جلدی بیت وتی جند ءَ چہ شھر ءُ ڈگاراں کش ایت، تو کیمپ ءَ نزیک ءَ پہ لاگ آں اِس پُست دُزی کن ئے چوشیں بے متلب ایں مھر منی ٹاپُل جان ترا یادیں کہ گُڈی رندا کہ ما دپ کپت آں تو لھتیں گِلگ کُتگ ات
تو گُشگ ءَ ات ئے کہ ماہ تاپ تو مرچاں پیش ءِ مردم نہ ئے تئی دیوان وش نیاں انچو سما بیت ما ترا زور نندارینت ءَ تئی دل مئے کِرا نندگ نہ لوٹ ایت! اے گِلگ منی دل ءَ رُستگ آں-

ٹاپُل اسل کسہ ایش اِنت کہ کار باز اَنت جیڑہ باز اَنت آ زمانگ ءَ کہ من تو نشتگ آں من شعر ونت ءَ وتی آشکانی کسہ آؤرتگ انت ءُ تو وتی جنگانی کسہ، کوھانی تہ ءَ سپر ءِ کسہ ابیتکیانی کسہ وشیانی کسہ اے یازدہ دوازدہ سال چون گوستگ انت تئی کسہ ھلاس نبوتگ انت ءُ مئے جُست. بلے منی ٹاپُل جان زمہ داری مردم ءَ چہ انسانی ءِ کٹ ءَ چہ گوازینیت نوں من ھم بڈ ءُ بار اوں ءُ تو ھم بڈ ءُ بار ئے اِدا کارے برابر کن اودا کارے برابر کن برے جاگایے شپ جاہ ءُ روچ جاھیں مردم، نوں کہ ما ننداں بس مئے جون دیم پہ دیم آں مئے جند باریں کُجا گاریں-

بلے ھئیر اے رندی کہ تو دپ کپے من وت ءَ شوھاز کن آں مئے دیوان سرجم بیت تئی دراھیں کسھاں گوشداراں ٹاپووو جان اے نمدی باریں ترا کُجا سر بیت تو گوں وتی لاگ ءَ زرباری بند ءَ سپر ءَ بہ ئے نوکیں اوتاکے ءَ تئی سر کپ ایت اودا نوکیں سنگتے اتک ءَ ، آ ھر روچ نیٹورک ءَ روت وتی مات ءَ را ھال دنت کہ من میڈیسن لیبارٹریے ءَ کار ءَ اوں اِدا مارا موبائل کار مرز کنئگ نئیل انت من روچے یک برے ترا وت فون کن ایں ءُ تئی ھال ءَ گریں ھمے بچک نیٹورک ءَ چہ کئیت یکے ھالے دنت کہ مئے اوتاک ءَ میجر ٹاپُل اتک ءَ اے سنگت ترا نزانت بلے دمانے ءَ پیسر نیٹورک ءَ ھمے نمدی یے ونتگ ترا ھال دنت کہ پتو ماہ تاپ نامیں مردمے ءَ نمدی یے نبشتہ کُتگ-

ٹاپُل جان دگہ ھئیر اِنت ما جوڑ ءُ سلامت آں اڑے راست گُش ایت تو من ءَ گُشتگ ات کہ من نوکیں اِشک ئے کنگ ءَ اوں ھردیں گیگ ءُ گور بوت ئے اے نمدی ءِ پسو دیم دات وتی نوکیں آشک ءِ کسہ اں الم بکن گوں لھتیں روچ پیسر ما دیوانے ءَ نشتگ ات اِتاں اشک ءِ سر ءَ گپ ءَ اِتاں من ھمے گُشتگ ات کہ اشک ءَ را وھد موسم عمر نیست.. زمین ءِ اشک ءَ گنوک بوتگیں مردم ءِ کِرا گُنجائش کہ وتی دل ءِ تہ ءَ انسان ءِ جاگہ دات بکنت ھئیر اے رندی کہ دپ کپاں گڑا اشک ءِ سر ءَ دیوانے کن آں تو ءُ تئی اشک ھر دو سلامت بات ئے گپ باز اَنت دگہ روچے دگہ نمدی یے نبشتہ کن آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مئے راج ءَ وانگ ءُ زانگ لوٹ اِیت

نبشتہ کار: سُدیر بلوچ

دی بلوچستان پوسٹ

انچش کہ شما سرپد اِت ما پہ چی ءَ وانگ ءَ ایں۔ لھتیں گُش اَنت من پہ وتی واست ءَ وانگ ءَ آں ، من بازیں سنگت دیستگ اَنت منی جند ءَ جُست کُتگ اَنت تو بہ وان ئے چے کَنَگ لوٹ ئے پہ وتی بزّگیں راج ءِ واست ءَ ، لھتیں سنگتاں گُشتگ ما وان اِیں ڈاکٹر جوڑ بہ اِیں ۔

مئے راج ءِ تہ ءَ وانگ ءُ زانگ سکّ کم اِنت بلے کم نہ اِنت لھتیں انچیں سنگت ھست اَنت دیمتر ءَ وانگجاھاں شُت نہ کن اَنت، چہ وتی گریبی ءُ لاچاری ءَ بلے شمئے پِت شُمارا زر دے اَنت گُش اَنت برو اِت دگہ وانگجاھاں بوان اِت ۔ چُش نہ اِنت کہ دگہ جاھاں پہ وانگ ءَ شُت اِت ءُ وتی ماتی زُبان نہ ونت ءُ وتی ماتی زُبان ءَ بے ھیال کُت چُش نہ اِنت ۔مارا مئے وتی ماتی زُبان الّم وانگی اِنت۔

من انچیں سنگت دیستگ پوسٹ ءِ سر ءَ بلوچی ءَ انچیں کمِنٹ ءُ کلوہ دے اَنت۔ مردم آیانی وانگ ءَ ھم نہ زانت بلے پہ وتی ماتی زُبان ءَ وانگ ءُ زانگ ءِ جُھد ھم نہ کن اَنت ، پہ وانگ ءَ دگہ ملکاں ءُ ڈیھاں رو اَنت زر گْوازینت کن اَنت بلے مئے وتی زُبان گوانکو ءِ تہ ءَ ھم وانگ بیت۔ وتی زُبان اِش شموشتگ دگر ءِ زُبان ءَ کلوہ کن اَنت ، اُنو ما بہ چار ایں انگریزی مئے ماتی زُبان نہ اِنت ما ایشی ءِ سر ءَ انچو کپتگ اِیں ۔ ھمے انگریزی ءِ واست ءَ ما چنچو زر گْوازینت کن ایں بلے وتی زُبان ءَ نہ وان ایں باید اِنت کہ ما پیسر ءَ گوانکوانی تہ ءَ وتی ماتی زُبان ءِ وانگ ءِ جُھد ءَ برجاہ بہ دار ایں ۔

پرچا کہ ما بلوچ ایں مئے زُبان بلوچی اِنت مئے پوشاک بلوچی اِنت۔ ھما سنگت ھست اَنت کہ یونیورسٹی ءُ کالج ءُ اسکولاں وانگ ءَ اَنت۔ گوں ھمایاں دست بندی اِنت وتی ماتی زُبان ءَ بہ وان اِت ۔ نبشتہ بہ کن اِت ۔ الّم نہ اِنت ایوک ءَ بلوچی کتاب وانگ زان اِت بس اِنت کہ من وانگ زانت لھتیں سنگت اَنچُش گُش ایت من بلوچی وانگ زانت بس اِنت چوش نہ زانت کہ بلوچی آب چِنکس اَنت تھنا وانگی نہ اِنت نبشتہ کنگ ءِ جُھد ھم بہ کن اِت ۔

انوں دامگ ءُ (انٹرنیٹ) ءِ زمانگ اِنت وتی ماتی زُبان ءِ وانگ ءُ نبشتہ کنگ ءِ جُھد ءَ بہ کن اِت گیشتر نبشتہ بہ کن اِت سے ماہ لگ ایت بلے من وت چُشیں زانتکارے نہ آں بلے من کلوھے پہ نودربراں دے آں ۔ وتی ماتی زُبان ءَ بہ وان اِت ۔اگاں ما وتی زُبان ءَ مہ وان ایں دگہ کسے نئیت مارا چُش نہ گْوش ایت کہ وتی ماتی زُبان ءَ بہ وان اِت ءُ دیمروی بہ کن اِت ۔ بلوچ راج ءُ بلوچی زبان زندگ بات ۔
سلامت بات اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پچیں نمدی یے پہ بیگواھیں هیات جان ءَ

نبشتہ کار: سعید احمد

دی بلوچستان پوسٹ

ھیاتو! مُردنی من تئی بیگواھی ءَ ھچ اجکہ نہ آں پرچا کہ ما هما ایردستیں زمین ءِ جھمنند اِیں کہ اِد ءَ هَمُک روچ تئی دابیں رُستگیں ءُ لائکیں ورنایاں گِر اَنت بندیگ کن اَنت کُش اَنت ءُ دؤر دئے اَنت، کسّ جُستے هم نہ کنت اِش اَنچُش کہ بلوچی زبان ءِ شائرے گوش ایت:

“مردمے نیست کہ هُدا ءَ بہ گوشیت”
“ابرم ءَ بازیں هُدایے استیں”

هیات جان ما اَنچو بے وس اِیں مئے وتی جند ءِ شھرانی تہ ءَ دو سد یا سَے سد درامدیں سُپاهیگانی بُنجل اَنت ھمے بنجلاں تئی دابیں پُلگدیں ورناہ ھزارانی کچّ ءَ بندیگ اَنت ما انچو تُرس اِیں کہ اشانی نیمگ ءَ چک هم جت نہ کن اِیں-

هیات جان مئے ڈیپارٹمنٹ ءُ مئے بیچ ءَ بندات ءَ ما دوازده نودربر اِت اِیں پد ءَ داں هشت ءَ سر بوت اِیں بلے ما هشتیں اَنچو هور ءُ هوار اِتیں کہ تھنا فیکلٹی ناں بلکیں سرجمیں یونیورسٹی ءَ مئے وتی یک جتائیں ٹولی یے اَت کہ مدام مسکرا ءُ کندگ ءَ اِت اِیں……هیات جان ترا هما لیبارٹری والا شر یات اِنت گندئے تئی گپ دائم همیشی ءِ سرا اِت اَنت-

یار هیات تو سرپدئے تئی بیگواهی ءَ پَد من ءَ کےَ ءَ جُست کُت؟ هما منظور ءَ گِندئے تو مدام کلاگ گپتگ ءُ ستائینتگ سک بژنیگ اَت یار گُشیت “یار خدا حیات کی حفاظت کرے” یار پد ءَ اے بیچارگ سرپد نہ اِنت کہ هیات تو همایانی گْور ءَ بندیگ ئے کہ اے زمینی هُدا اَنت ءُ آزمان ءِ هُدا ءَ هچ مان نیاراں-

هیاتو یار مئے اولی ءَ داں پنچمی سمسٹر ءَ تو اولڈ هاسٹل ءِ نامی ئیں مردماں چئے یکے اِت سرجمیں هاسٹل ءِ مردماں ترا پجہ آورتا بلے یکّیں تو بوتگے وتی زندگی ءَ گوں همگرنچ بوتگے وتی فون وتی کلاس ءُ هاسٹل ءُ روم ءُ وتی زندگی-

یار پد ءَ من تئی آور جنگ ءَ رند سرپد بوت آں کہ ترا ڈینگی ءَ سک نگیگ کُتگ ءُ تو سک نادراه بوتگ ئے یار سلامت مردم ایشانی گْور ءَ بیمار بنت تو وَ بیماریں مردمے اِت ئے بس همے گُوش آں آجو بات ئے گوں کُل بندیگیں براتاں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نودربرءُ فیروز بلوچ

نبشتہ کار : عامر بلوچ

دی بلوچستان پوسٹ

بلوچستان یک انچیں دمگے کہ اود ءَ انسان بازیں بنکی لوٹاں چہ زِبھر اَنت آیاں چہ یکے وانگ اِنت.ھر انسان ءِلوٹ ءُ واھگ ھمیش اِنت کہ من بہ وان آں ءُ باندا پہ وتی مات ءُ پِت ءِ واستا یک وش ءُ وشھالیں بانداتے سازِت کُت بہ کناں۔بلوچستان ءِ تہ ءَ سک باز نودربر ھَست اَنت کہ آوانگ ءَ سک باز ھُب ءُ واھگدار اَنت بلئے بد بھتی ءَ نودربر اود ءَ وَنت نہ کن اَنت-

بلوچستان ءَ وانگ ءِ آسراتی نیست اگاں لھتے وانگ جاہ ھست گڑا ھسابی اَنت اگاں وانگجاہ ھست گڑا رھدربر نیست ءُ اگاں رھدربر ھست گڑا وانگجاہ نیست ءُ لھتے انچیں دمگ ھست کہ اود ءَ مردماں وتی لوگ ءُ جاگہ پہ وانگ جاہ ءِ ھاترا داتگ اَنت اود ءَ نودربر چار پنچ تبک ءِ وانگ ءَ پد پہ گیراج ءَ کار ءَ رٶت ، لھتے گوں مستریاں سیمٹ ءُ لِچ کاری ءَ رٶت ءُ لھتے ءِ سر پہ نشہ ءَ کپ ایت.

بلوچستان ءِ تہ ءَ وانگی چاگرد نہ بوھگ ءِ سوّب بازیں نودربر وتی ھلک ءُ میتگاں یلہ کن اَنت پہ وانگ ءِ واستا اسلام آباد ءُ پنجاپ ءِ مزنیں شھرانی نیمگ ءَ رو اَنت۔ھمے درچ ءَ یک نودربرے کہ آئی ءِ نام فیروز بیت وتی لوگ ءَ چہ دور اسلام آباد ءُ پنجاپ ءَ کئیت پہ وتی پِت ءُ مات ءِ دلی واھگانی پورہ کنگ ءِ واستا کہ آئی مات ءُ پِت ءِ واھگ بوتگ کہ مئے بچ مزنیں شھدربرجاھے ءَ چے بہ وان اِیت ءُ پہ وتی ھلک ءُ میتگ ءِ واستا شریں ماسٹرے جوڑ بہ بیت۔ سکیں ھاموش تبیں بچکے اَت بِھ گپے نہ کُت۔اگاں تو گپے جت ترا پسوے دات وت بِھ گپے نہ جت. سنگت مارا چہ پیسرا اتکگ ات اسلاآباد ءَ ما لھتے روچ پد اتکگ اِت ایں پرچاکہ انگت کلاس بندات نہ اِت اَنت. من اولی رند ءَ سنگت دیستگ اَت واب ءَ چہ پاد اتکگ اَت جانے شُشتگ اَت ءُ اتک سلام ءُ دعا ءُ ھال پرسی یے کت. پد ءَ سھتے ءَ پد پجاری دیوانے بندات بوت. ھر کس ءَ وتی پجار کناں کت ءُ وھدے سنگتے باریگ اتک گڑا گُشتٸے کہ منی نام فیروز اِنت من تُربَت ءَ نشتگ اَنت ءُ اد ءَ منی ایجوکیشن ڈپارٹمنٹ ءَ داکلہ بوتگ. ھمے میان ءَ کسے ءَ چہ جُست کُت فیروز جان ماسٹرے پرچہ جوڑ بوئگ لوٹ ئے تو۔ گُڑا ھمے دمان ءَ پسّو دات کہ منی مات ءُ پِت واھگ اِنت کہ من شریں ماسٹرے جوڑ بہ باں ءُ دومی بلوچستان منی ءُ تئی دیم ءَ اِنت کہ وانگجاہ نہ بوئگ ءِ سوّب چینچو مردم وتی ھلک ءُ میتگاں یل کن اَنت پہ وانگ ءَ پنجاپ ءُ پاکستان ءِ دومی مزن شھراں رو انت اگاں کسے ءَ گُنجائش نہ کنت گُڑا وتی وانگ ءَ ھمد ءَ چے یل کنت۔ من ھمے جیڑآں ما شُما ھمد ءَ بہ وان ایں باندا پہ وتی چاگرد ءِ واستا کارآمدیں مردم جوڑ بہ بِئیں۔وتی چاگرد ءَ شریں بانداتے دات کُت بہ کن ایں۔

بندات ءَ من پھم اِتگ اَت کہ سنگت چہ مارا سینئر اِنت بلئے پجار ءَ رند من زانت کہ منی ھم مکتب اِنت پد ءَ مارا سنگت ءَ بُرت ھوٹل ءَ ناشتہ ءِ کنگ ءَ ءُ اود ءَ داں دیراں ھندی ھال ءُ اھوال بوت پد ءَ ما اتک ایں وتی کوٹی ءَ لھتے روچ ءَ پد کلاس بندات بوت اَنت.کلاس ءِ تہ ءَ ھم سنگت ھاموش اَت ءُ وانگ ءِ ھم ھُب ءُ واھگ ئے ھست ات. وانگ ءَ جوان ات کلاس کہ ھلاس بوت اَنت سنگت گوں ما ھوار ورگ ءَ اتک گوں پد ءَ تو ھر وھد ءَ لائبریری ءَ دیست ھر وھد ءَ گوں کتاباں گوں گلائیش اَت بیگاہ ءِ وھد ءَ یونیورسٹی گراؤنڈ ءَ لیب ءُ گوازی ءَ گوں ھوار اَت ۔ یک روچے کلاس ءِ تہ ءَ کہ بچکے ءَ گُشت اے نو کلاسی گُد اَنت ترا گورا اَنت گڑا سنگت ءَ ھچ نہ گشت ءُ بچکند اِت. کلاسانی تہ ءَ پہ بلوچانی گوما اے وڑیں روشت نوکیں گپ نہ بوتگ اَنت بازیں نودربراں زانتگ ھم کہ ما بلوچی پُچ ءُ پوشکاں گور ءَ کناں گُڑا اِد ءِ ماسٹر ءُ نودربر مئے گوما انچیں وڑ ءَ گپ کن اَنت۔بلے آھاں اے گپ ءُ ھبر یک دیم ءَ کُتگ اَنت وتی دل ءُ دیم گوں وانگ ءَ داتگ انت ئے۔ یک بیگاھے ءَ وھدے آ چہ وتی کوٹی ءَ چے در کئیت وتی کوٹی ءِ سنگتاں ھمے گپاں گُش ایت کہ من لائیبریری ءَ روگ ءَ آں شپ ءَ تک کایاں بلئے ھما اِنت انگت واتر نئیتکگ۔ ھما روچ ءَ بِگر داں روچے مروچی ءَ منی مجگ ءَ یک جُستے رُدوم زوران اِنت کہ فیروز ءِ وڑیں نودربرے ءِ چے گناہ ءُ میار بیت کہ مروچی دو سال سرجم اِنت بے گُناہ تھاریں کوٹیانی تہ ءَ اِستان آزاراں سگگ ءَ اِنت ۔باریں آچونیں ازیتیں زندے اے ازارجاہ ءِ تہ ءَ گوازینگ ءَ اِنت۔ آئی ءِ دگہ ھچ گناہ میار نیست اِنت گناہ میارے ھمیش اِنت کہ فیروز یک ایردستیں چاگردے ءِ تہ ءَ ودی بوت ءُ ھمے چاگرد ءِ تہ ءَ آئی ءَ وانگ ءِ واب دیست زانگ ءِ واب دیست پہ وتی چاگرد ءِ واستا شریں ماسٹرے بوئگ ءِ واب دیست ۔ ھمے گناھانی سوّب اِنت کہ مروچی دو سال پُر اِنت آ تھاریں کوٹیانی تہ ءَ وڑ وڑیں آزار سگگ ءَ اِنت۔ اے میان ءَ آئی ءِ گِس والا چونیں ازیت سگگ ءَ اَنت اے گپ ءَ ھما مردم زانت کُت کن اَنت کہ اے وئیل آئی ءِ سر ءَ چے گوزگ ءَ اِنت۔

یک زھگے ءَ مات 9 ماہ ءَ لاپ ءَ کنت چنچو بزگی کش ایت ءُ رودین ایت کہ باندا روچ منی پش پد بیت بلئے زالم ھچ نہ چار اَنت بلوچ کنت ءُ بر اَنت. آ سنگت نوکی گام جنگ ءَ اَت پیسرا زالماں وتی اَرجان جت سنگت ءِ انگت دومی سمسٹر سرجم نہ اَت بلوچستان ءِ تہ ءَ یک نودربرے در کٸیت پہ وانگ ءَ اسلام آباد ءُ پنجاب ءَ آ وڑ وڑیں جیڑھانی دیمپان بیت آ توری کلاسانی تہ ءَ استاد بہ بنت کہ یک بلوچ نودربرے ءَ چوں ڈیل کنت ءُ کجام چماں چار انت یاکہ یونیورسٹی ءِ گیٹ والا یے بہ بیت وڑے ناں وڑے ءَ بزگ کنت یاکہ یونیورسٹی ءِ تہ ءَ پنجابی نودربر بہ بنت جاھل گُش اَنت جنگلی گُش اَنت بلوچ اگاں بلوچستان ءَ بہ بیت یا پنجاب ءَ وڑے نہ وڑے ءَ اے چیزانی دیمپان بوگی اِنت ئِے اے چیز پہ بلوچ نودربراں نوکیں چیز نہ اَنت بلکیں 75 سال بیت بلوچ ءَ گون اَنت ءُ پیداک اَنت بگندئے چیزانی تب مٹ بوتگ اَنت بلئے استان ءِ مول ءُ مراد ھمیش انت کہ کُجا نہ کجا بلوچ ءَ وڑے ناں وڑے ءَ بزگ بکن آں آھاں چہ وانگ ءَ دور بہ کناں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔