TBP Balochi

بلوچستان ءِ دمگ سبی ءَ چیر کتگیں شوروانی تراک ءَ پرپٹ سوارے زدگ بیتگ-

گیشیں ھالانی رد ءَ سبی ءِ دمگ لھڑی ءَ چیر کتگیں شوروانی بمب تراکے ءَ پرپٹ سوارے زدگ بیتگ –

دمگی مردمانی رد ءَ تراک مروچی پیش اتکگ کہ اود ءَ چیر کتگیں شوروانی ترکگ ءِ سبب ءَ پرپٹ سوارے زدگ بیتگ-

دمگی مردمانی رد ءَ تراک ءَ زدگ بیتگیں بیتگیں مردم ٹپانی درمانی ءَ سبی ءِ نادراہ جاہ ءَ سر کنگ بیتگ-

روکپتی بلوچستان ءِ دمگ پھرہ (ایرانشھر) ءَ بس ءِ چَپ بوگ ءَ بیست ءُ ھپت مردم زدگ بیتگ اَنت ءُ یکے بیران بیتگ-

وئیل سھب ءِ ساھت چار ءُ چل ءُ دو ءَ پیش اتکگ ایرانشھر ءَ چہ ھشت سد میٹر ءِ دوری ءَ ریگان ءَ پیش اتکگ –

وئیل یک مردمے بیران بیتگ کہ آئی ءِ پجار عبداللہ علی نژاد ء رستم ءِ نام ءَ زانگ بیتگ-

وئیل آماچیں بس چہ یزد ءَ دیم پہ سیستان و بلوچستان ءَ آیگ ءَ بیتگ کہ راہ ءَ ناگتی کزا ءِ آماچ بیتگ-

واکدارانی گوشگ اِنت وئیل ءَ بس ءِ ڈرائیور واب کپتگ ءُ چریشی ءَ اے وئیل پیش اتکگ بیتگ-

زانگ بہ بیت روکپتی بلوچستان ءَ گیشتر چوشیں وئیل دگانی ناوشی ءُ ڈرائیورانی نادلگوشی گوشگ بوگ ءَ اَنت-

وئیل ءَ زدگ بیتگیں مردم ایرانشھر ءِ نادراہ جاہ ءَ سر کنگ بیتگ انت ءُ اود ءَ آیانی ٹپانی درمانی بوگ ءَ اِنت-

مصری انجینیئر اھمد الحجاوی ءَ ڈیھ ءَ زر ءُ پیداک بوگ ءِ کمی ءِ سبب ءَ الاسماعیلیہ ءِ ھند ءَ کافی ءِ کشت ءُ کشاری ءِ جاہ جوڑ کنگ ءَ سوبمند بیتگ-

الاقتصادیہ ءِ رد ءَ اھمد الحجاوی ءِ گوشگ انت اے روچاں بازیں چیزانی سر ءَ بندشی ھست اَنت -زرکاری ءِ نہ بوگ ءَ بند ءُ ساچی ءِ پھنات یکدم کم بیتگ اَنت ءُ مھلوک بازیں جیڑھانی دیمپان اَنت-

احمد الحجاوی ءَ گوشتگ کپ ڈنی ڈیھاں کافی ءِ آرگ ءَ بازیں چیزانی رکگ ءَ الاسماعیلیہ ءِ ھند ءَ زمینکاری ءِ بازیں جیڑہ گیشنگ بیتگ اَنت-

آئی ءَ گوشتگ اے درچ ءَ پیسر ءَ چکاسکاری کتگ بلے بے سوبی بیتگ اَنت ءُ اے رند ءَ نوکیں ڈولے ءَ کار بندات کتگ-

مصری انجینیئر ءَ گوشتگ کہ کافی ءِ کشت ءُ کشارانی ھاتر ءَ ھنچیں زمین گچین کتگ انت کہ آ زمین سورگ دابیں بہ بیت اِنت ءُ کافی ءِ واستا کمے روچ ءِ ھم پھریزی ھست اَنت-

سرجمیں مصر ھمک سال ھپتاد ھزار ٹن کافی کارمرد کنگ ءَ اِنت – مصر ءَ کافی ءِ پیداگ نہ بوگ ءَ چریشی ءَ ڈنی کافی زورگ کپ انت-

احمد الحجاوی ءَ گوشتگ آ ڈالر ءِ بچگ ءِ ھاتر ءَ کافی کشگ ءَ اِنت ءُ آئی ءَ گیش کشت ءُ کشاریانی درکاری اِنت دانکہ آ گیش کت بہ بنت-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل ” ءَ شنگ کرتگیں درشانے ءَ گوشتگ کہ بی ایل اے ءِ سرمچاراں ھزدار ءُ مستونگ ءَ دو جتائیں اُرشاں پاکستانی چیریں ادارھانی کارمند ءُ زورگریں پاکستانی پوج نشانگ کرتگ اَنت –

جارکش جئیند بلوچ ءِ رِد ء بی ایل اے ءِ سرمچاراں گوستگیں روچ ءَ دیگر ءِ وھد ءَ ھزدار ءِ شھدگ ءَ زورگریں پاکستان ءِ چیریں ادارھانی کارمند ھما وھد ءَ گوں چیر کرتگیں تراکناکیں شورھاں نشانگ کُتگ اَنت کہ آ دو گاڑیانی سر ءَ جھالاوان کمپلیکس ءِ نزیک ءَ گوزگ ءَ بوتگ اَنت – تراک ءِ آسر ءَ یک گاڑی یے ءَ سک باز تاوان بوتگ ءُ آئی ءَ سواریں کارمند مرتگ ءُ زدگ بوتگ اَنت –

جارکش ءِ رِد ءَ زورگریں پاکستانی پوج ء تراک ءَ پد ھمے جاہ وتی انگیر کُتگ ءُ چہ رسانکدر ءَ وتی تاوان ءِ چیر دیگ ءِ جھد کُتگ-

بی ایل اے ءِ جارکش ءِ رِد ءَ مروچی سرمچاراں مستونگ ءَ میجر چاراہ ءِ نزیک ءَ زورگریں پاکستانی پوج ءِ یک گاڑی یے ءَ سواریں کارمندانی سر ءَ ھما وھد ءَ دزبمب اُرشے کُتگ وھدیکہ آ وتی بنجل ءَ پترگ ءَ بوتگ اَنت – دز بمب اُرش ءَ باز کارمند مرتگ ءُ زدگ بوتگ انت وھدیکہ اُرش ءَ پد پروش وارتگیں دُژمن ءَ سک باز تیرگواری ھم کتگ –

جارکش ءَ گڈسر ءَ وتی درشان ءِ تہ ءَ گوشتگ بی ایل اے ءِ اے اُرشانی زمہ واری ءَ منیت ءُ ھمے کول ءَ کنت کہ داں زورگریں پوج ءِ سرجمی ءَ در آھگ ءَ مئے اُرش برجاہ مان انت –

چہ کیچ ءَ دگہ سے مردم زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ مروچی نیم روچ ءِ ساھت یکّ ءِ نزیک ءَ کیچ ءِ بُنجاھی شھر تربت ءَ نادُراھجاہ ءِ ڈن ءَ گاڑیاں ساڑی ئیں سلاہ بندیں مردماں دو برات زھیر ءُ پیر جان ء لشکر خان آوار جتگ ءُ وتی ھمراھی ءَ برتگ

دوئیں براتانی زورانسری آوار جنی ءِ درگت ءَ رستگیں ھالانی رِد ءَ زھیر گوستگیں روچاں تبیت نگیگی ءِ سبب ءَ چہ نادُراھجاہ ءَ الاج ءَ بیتگ، مروچی وھدے آ نادُراھجاہ ءَ چہ موکل دیگ بیتگ گُڑا دوئیں برات نادُرھجاہ ءِ دیم ءَ چست کتگ ءُ بیگواہ کتگ اَنت-

ھمے وڑ مروچی بیگاہ ءَ تربت ءَ سلاہ بندیں مردمانی مزنیں کچے ءَ کیچ بار ایسوسی ایشن ءِ گوستگیں صدر ءُ سنئیر قانون دان عبدالمجید شاہ ایڈووکیٹ ءِ چیمبر ءُ چیمبر ءَ چہ ھمگرنچ دکان ءَ بیڑبرتگ ءُ اود ءَ ساڑی ئیں مردمانی سر ءَ زوراکی کتگ-

سلاہ بندیں مردماں ھمے وھد ءَ قانون دان ءِ چیمبر ءَ کار کنوکیں میٹرک نودربر عادل ء عصاء جھمنند نلی بالگتر آوار جتگ ءُ وتی ھمراھی ءَ برتگ وھدے ھمے وھد ءَ سلاہ بنداں چیمبر ءُ دکان ءَ ساڑی ئیں آ دگہ مردمانی سر ءَ زوراکی کتگ موباھل ءُ دگہ چیز گوں وت برتگ اَنت-

زانگ بہ بیت کہ بلوچستان ءَ زورانسری آوار جنی ءِ وئیلانی تہ ءَ یکشلہ گیشی آھگ ءَ اِنت وھدے کہ ھمے ماہ ءَ زورانسری آوار جنی ءِ تہ ءَ گیش گیشی اَتکگ- ھمے سال ءِ اگست ماہ ءَ بلوچستان ءَ ھوار چہ کراچی ءَ سی ءُ سے ءَ گیش مردم زورانسری آوار جنی ءِ نشانگ کنگ بیتگ اَنت-

انسانی ھکانی ادارہ ءُ بلوچ سیاسی گلانی نیمگ ءَ چہ زورانسری آوار جنی ءَ پاکستانی پوج ءُ آئی اداراھانی نیمگ ءَ چہ جوڑ کتگیں ڈیتھ اسکواڈ ھمگرنچ گوشگ ءَ اِنت ئے وھدے کہ باز رند ءَ زورانسری ءِ نشانگ بیتگیں مردم بیگواھی ءَ پد یل کنگ ھم بیتگ اَنت-

بلوچستان ءِ سیاسی ءُ راجدوست ایں گل مدام چہ میان استمان ءَ انسانی ھکانی ادارھاں چہ لوٹ کنگ ءُ آھگ ءَ اَنت کہ اے زورانسری آوار جنی ءِ گر ءُ دار ءِ ھاتر ءَ اکوام متھدہ ءِ یک فیکٹ فائنڈنگ مشین بلوچستان ءَ راہ بدے اَنت اے گلانی کساس ءَ چہ بلوچستان ءَ گوستگیں بیست سالاں زورانسری آوار جنی ءِ کچ بیست ھزار ءَ گیش اَنت-

روکپتی بلوچستان ءِ دمگ سراوان گوشت ءَ دو روچ ءَ پیش دزکپتگیں لاشانی پجار آیانی کھولان پجار ھانی گل ءُ سمیر ءِ نام ءَ کتگ انت-

گوشگ بوگ ءَ اِنت ھردوکیں.لاش ھاش ءِ سارت جاہ ءَ ایر اَنت-

زانگ بہ بیت گوستگیں ھپتگ ءَ مرد ءُ زال روکپتی بلوچستان ءِ دمگ پھرہ مھمد آباد ءَ ناشناسیں لس پوشاکی دو گاڑیاں سواریں مردماں آوار جتگ بیتگ اَنت ھمے وھد ءَ آیاں تیرگواری ھم کتگ ءُ اے دویں گون وت برتگ انت-

سمیر بلوچ ھمے ماہ ءَ تربت ءَ ناگتی توھین رسالت ءِ بھتام ءَ کشگ بیتگیں روف بلوچ ءِ برات اِنت-

ھانی گل بلوچستان ءَ ھیومین رائٹس ءِ درگت ءَ پرکار بیتگ ءُ آئی ءَ زورانسری آوار جنیانی ھلاپ ءَ کراچی ءُ بلوچستان ءَ بازیں زھرشانیاں بھر زرتگ بیتگ ءُ آئی ءِ گپ بیتگ کہ آ پاکستانی چیریں ادارہ ءُ آئی ءِ گوستگیں دیشتار نسیم بلوچ ءِ ھمراھی ءَ آوار جتگ ءُ پد ءَ بازیں ماھاں بندیگ بوگ ءَ پد یلو کتگ بلے داں انگت ءَ نسیم بیگواہ اِنت-

سربوتگیں ھالانی رِد ءَ پاکستانی پوج ءَ تربت ءِ جھمنندے ڈاکٹرے چہ کراچی ءَ زورانسری آوار جتگ ءُ بیگواہ کتگ – وھدیکہ ھمے ماہ ءَ زورانسری آوار جنگ بوتگیں چار برات یل کنگ بوتگ انت –

گیشیں ھالانی رِد ءَ کیچ ءِ دمگ شے کہن ءِ جھمنند ڈاکٹر رفیق احمد ء مراد محمد چہ کراچی ءَ زورانسری آوار جنگ ءُ بیگوای کنگ بوتگ –

کھول ءِ رِد ءَ ڈاکٹر رفیق پہ زھگانی الاج ءِ ھاتر ءَ کراچی ءَ شُتگ بوتگ کہ آ یازدہ اگست ءَ چہ کراچی ءِ دمگ سدر ءَ آوار جنگ بوتگ –

اھوالکار ءِ رِد ءَ ڈاکٹر رفیق نیشنل پاٹی ءَ گوں بندوک بوتگ وھدیکہ آوار جنی ءَ پد آئی ءِ ھچ ھال اھوال نیست ءُ ناکہ نیشنل پاٹی ءِ نیمگ ءَ اے درگت ءَ چیزے گوشگ بوتگ –

دومی نیمگ ءَ شش اگست ءَ کیچ ءِ دمگ تمپ ءَ تمپ ءَ زورانسری آوار جنگ بوتگیں شش برات یل بوتگ ءُ وتی گس ءَ سر بوتگ انت –

زانگ بہ بیت شش اگست ءَ پاکستانی پوج ءَ تمپ ءِ دمگ پُل آباد ءَ گِسے ءِ سر ءَ بیڑ برتگ برکت ءِ مراد، شوکت مراد، بابت مراد ءُ ایاز مراد آوار جتگ ءُ گوں وت برتگ کہ مروچی یل بوتگ ءُ وتی گس ءَ سر بوتگ انت –

سربوتگیں ھالانی رِد ءَ دھ روچانی میان ءَ شیرانی ءِ دمگ شرن پائے محمد ءَ دو زھگ چہ سھرک ءِ نادراھی ءَ بیران بوتگ انت وھدیکہ دگہ بازینے سُھرک ءِ آماچ انت –

شیرانی ءِ واکدار ءُ جانسلامتی واکدارانی نیمگ ءَ تنی وھدی ھچ وڈیں گامگیج زورگ نہ بوتگ ناکہ اے دمگاں جانسلامتی ءِ کمکی ٹولی دیم دیگ بوتگ انت، دمگی واکدارانی نادلگوشی ءِ سوب ءَ دگہ زھگ ھم نادراھی ءِ آماچ بوت کناں –

دمگی مردماں سرکار ءُ جانسلامتی ءِ واکداراں گوں کمک ءِ لوٹ کتگ ءُ گوشتگ کہ ایندگہ زھگانی رکینگ ءَ زوت گامگیج زورگ بہ بیت –

روکپتی بلوچستان ءِ دمگ میرجاوہ ءَ ایرانی لشکر ءَ یک مردمے آوار جنگ ءَ پد بیگواہ کرتگ-

گیشیں اھوالانی رد ءَ میرجاوہ ءَ ایرانی لشکر ءَ یک چاگردی باسکے آوار جنگ ءَ پد گون وت برتگ-

آوار جنگ بیتگیں مردم ءِ پجار عبدالصمد ریکی جھمنند میرجاوہ ءِ نام ءَ زانگ بیتگ-

اھوالانی رد ءَ عبدالصمد ریکی چاگردی باسکے ءِ ھواری ءَ آ یک نیکراھی کاراں گیشتر دلگوشیں مردمے کہ آ ابید میار ءَ دزگیر کنگ بیتگ-

زانگ بہ بیت روکپتی بلوچستان ءَ بیگواھیانی درچ یکشل ءَ برجاہ اَنت کہ گوستگیں دو روچانی توک ءَ اے چارومی مردم اِنت آوار جنگ ءُ بیگواہ کنگ بوگ ءَ اِنت کہ ایشی ءَ پیش چھبار ءُ پھرہ ءَ ایرانی لشکر ءَ سَے مردم دزگیر کنگ ءَ پد بیگواہ کتگ اَنت-

برکس ءَ پانزدمی سروکی ءَ نیاد سَے شمبے ءِ روچ ءَ جوھانسبرگ ءَ بندات بوگی اِنت – آئی ءِ باسکی ڈیھ برازیل، روس، ھندوستان، چین ءُ زرباری افریقہ ھوار اَنت-

عرب نیوز ءِ رد ءَ یکشمبے ءَ زرباری افریقہ ءِ سروک سیرل رامافوسا ءَ یک نیادے ءَ گوشتگ کہ برکس ڈیھاں ھوار بیتگ ءُ میان اُستمانی زرکاری ءَ پراھگان کنت انت- اے ڈیھ میان اُستمانی زرکاری ءِ پنچمی بھر ا نت ءُ دنیا ءَ چِل درسد ءَ گیش آبادی ءِ بنجل اِنت-

آئی ءَ گوشتگ کہ برکس ءَ ھواریں ڈیھ دنیا ءَ وتی زرکاری ءِ زوت، نھادی ءِ شرکاری، راجداری ءِ گھتری ءُ چاگردی دیمروئیانی سبب ءَ وتی جوانیں کرد ءَ پیلو کنگ ءَ اِنت-

اے سرکشی نیاد بیست ءُ دو داں بیست ءُ چار اگست ءَ برجاہ بیت اِنت ایشی ءَ چِل ءَ گیش ڈیھانی سروک ءُ میان اُستمانی گچینی مردمانی بھر زیرگ ءِ گمان اِنت-

برکس ءِ دری کارانی وزیر ءِ بنداتی نیاد ستمبر دوھزار ءُ شانزدہ ءَ میان اُستمان ءِ جنرل اسمبلی ءِ وھد ءَ برجم دارگ بیتگ ات- زرباری افریقہ ءِ بھر زورگ ءَ پیسر اے گل برکس ءِ نام ءَ زانگ بیتگ –

برکس ءِ بنداتی سرکشی نیاد جون دوھزار ءُ نُھ ءَ روس ءِ شھر ییکترین برگ ءَ برجم بیتگ ءُ ایشی ءَ یک سالے ءَ پد زرباری افریقہ ءِ گل ءَ را بھر زورک ءِ داوت دیگ بیتگ-

برکس ءِ دلگوش سَے گچینی پھنات سیاسی ءُ پھزداری ءُ زرکاری ءُ دیمروئی ءُ دودمان ءِ سر ءَ اِنت-

زرباری افریقہ ءِ سروک ءَ گوشتگ چین ءِ سروک شی جن پنگ وتی چارومی تر ءُ تاب ءَ ماں افریقہ ءَ سر بیتگ-

آئی ءَ گوشتگ اے رند ءَ برکس ءِ بنگپ ءِ سر ءَ باسک بوگ ءِ سر ءُ باوست کنگ ھم بیت اِنت-

زرباری افریقہ ءِ سروک ءَ گوشتگ بیست ءَ گیش ڈیھانی واستا اے گل ءَ بھر مند بوگ ءِ دزبندی روان داتگ انت ءُ لھتے واھگداری درشان کتگ اَنت-

آئی ءَ گوشتگ کہ زرباری افریقہ برکس ءِ باسک بوگ ءِ گیشی بوگ ءِ پلامرزی ءَ کنت اِنت برکس ءِ جوانی اے وھد ءَ باسکانی لوٹانی گیشی اِنت-

آئی ءَ گوشتگ جھد ھمیش اِنت گیش مزن کنگ ءَ دگہ ڈیھانی گون ءَ شریداری ءَ برجم دارگ ءِ درکاری اِنت-