شال ءَ بلوچ زھرشانی کنوکانی سر ءَ پاکستانی پوج ءِ لَٹ ءُ کُٹانی بگیری ءَ پنجگور ءَ یکشمبے ءِ روچ ءَ ھک دے تھریک ءِ گوشگ پد ءَ روانک کشگ بیتگ ءُ زھرشانی کتگ-
ھمے میان ءَ زھرشانی کنوکاں شال ءَ پوج ءِ نیمگ ءَ چہ بلوچ زھرشانی کنوکاں سر ءَ لَٹ کُٹ ءُ زالبولانی کم شرپ کنگ ءِ زھر ئِے درشان کنان ءَ گْوشتگ کہ ریاست زورانسری بیگواھیں مردمانی یل کنائینگ جاگہ ءَ کھول سر ءَ لَٹ کُٹ کنگ ءَ اَنت-
وھدے کہ اے درگت ءَ زھرشانی ءِ میان ءَ حاجی موسی ءَ دل ءَ گپتگ نادُراھجاہ ءَ برتگ کہ آ نہ رک اِتگ-
بلوچ ریپبلکن گارڈ ءِ جارکش دوستیں بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بلوچستان ءِ دمگ صحبت پور ءَ مئے سرمچاراں گوستگیں شپ ءَ صحبت پور شھر نزیک ءَ دگ جوڑ کنوکیں شرکت سر ءَ اُرش کتگ آئی ءِ مشینری ءُ لوڈر گاڑی تیرگواری کتگ ءُ مانداشتگ ءُ تباہ کتگ اَنت-
جارکش ءَ گْوشتگ کہ مئے گل اے اُرش زمہ واری ءَ منّ اِیت-
دوستیں بلوچ ءَ دیمتر ءَ گْوشتگ کہ مئے اے وڑیں اُرش بلوچستان ءِ سرجمی آجوئی ءَ تاں برجاہ بنت-
یکشمبے ءِ شپ ءَ مستونگ ءَ تراکے ءِ توار اش کنگ بیتگ-
گوشگ بیگ ءَ اِنت کہ میجر چوک سر ءَ پاکستانی پوج ءِ پانگس سر ءَ دستی بمب اُرش کنگ بیتگ- دستی بمب بُنجل نزیک ءَ کپتگ ءُ تُرندی ءَ ترک اِتگ-
بلے پولیس گوشگ رِد ءَ تراک ءَ جانی تاوان نہ بیتگ – پوج وئیلجاہ ءَ سر بیتگ راہ در بستگ ءَ تُرندیں پٹ پول بندات کتگ-
زورانسری بیگواھیں بلوچ باپاری مردم تاج محمد سرپرہ ءِ لوگ بانُک صالحہ مری ءَ یک تامُربندے ءِ تہ ءَ گْوشتگ کہ منی لوگ واجہ میر تاج محمد سرپرہ ءِ زورانسری بیگواھی ءَ چار سال سرجم بیگ ءَ اِنت، اے درگت ءَ ما بیست جولائی دوہزار بیست چار ءَ شمبے ءِ روچ ءَ ماں لندن ءَ کھول نیمگ ءَ چہ یک زھرشانی یے برجم دارگ ءَ ایں، آئی ءِ تہ ءَ من وتی لوگ واجہ ءُ بیگواھیں بلوچانی پہ سلامتی یل کنائینگ لوٹ کن ایں-
آئی ءَ گْوشتگ کہ من لندن ءَ جھمنندیں سندھی، پشتون، مھاجر، کشمیری ءَ ھوار سرجمیں انسان دوستیں مردماں ھاسکار بلوچ راج ءَ چہ دزبندی کن آں کہ آ اے زھرشانی ءَ بھر بزور اَنت ءُ مئے توار جوڑ بہ بنت-
بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءَ گوشتگ بولان ءِ دمگ مچ ءِ دمگ گیشتری ءَ زور گریں پاکستانی لشکر ءِ چیریں ادارھانی واستا کار کنوکیں لال جان مری تیر گواری کتگ ءُ کُشتگ۔
جارکش ءَ گوشتگ لال جان مری 2017 ءَ چہ کبزہ گیر پاکستانی فوج ءِ رازداریں ادارہ ایم آئی ءِ پیرول ءِ بابت ءَ رپورٹ کنگ ءَ ات۔ تاکشان 2023 ءَ مچھ ءِ دمگ دورنجین ءَ آپریشن ءِ وھد ءَ بی ایل اے ءِ کارندھاں پاکستانی لشکر ءِ کارندہ اسمانی ھرف تنگو مری ءِ چک اوتھے دزگیر کتگ ات کہ آئی ءَ پٹ ءُ پول ءِ وھد ءَ پدر کتگ ات کہ لال جان مری وتی نیٹ ورک ءَ گوں ھمگرنچ انت ءُ زانتکاری ءِ کار ءَ کنت ءُ دمگ ءَ کار کنت۔
آئی ءَ گوشتگ لال جان ءَ بولان ءِ دگہ دمگاں ھوار ماری گیشتری ءَ دژمن ءِ لشکر ءِ فوجی کارروائی ءُ مردمانی زوراکی ءَ بیگواہ کنگ ءِ تہ ءَ دیم پہ دیم کمک کتگ ءُ ھمے دمگ ءَ آ دگہ مردماں لالچ دیگ ءُ مجبور کنگ ءَ ھم ھوار بوتگ کہ آ ایم آئی ءِ ھاتر ءَ ھال رسانی کنوک ءِ بستار ءَ کار بہ کن اَنت۔
جیئند بلوچ ءَ گوشتگ پہ راجی دلاری ءِ مجرم بوگ ءَ لال جان مری کُشگ بوت ءُ آئی ءِ بے نامیں آسر ءَ سر کنگ بوت۔ بلوچ لبریشن آرمی ھما مردماں کدی ماپ نہ کنت کہ آ راجی دروھی ءِ گناہ گار اَنت ءُ آ چو لال جان مری ءَ وتی گڈی آسر ءَ سر کنگ بنت۔
مرگ ءِ رھبند
نبشتہ کار : رودین بلوچ
دی بلوچستان پوسٹ
موتک بژن ارمان وتی جاہ ءَ بلے ھمک نمیرانیں بلوچ مئے ءُ مئے زمین ءِ شان اَنت۔ بلوچستان دگنیا ءِ اے گنجیں زمین آں چہ ھما زمین اِنت کہ آئی ءِ رکینگ ءَ آئی ءِ پرزنداں مدام ھون داَتگ ءُ وتی سر ندر کتگ اَنت۔آ مُدام وتی زمین ءِ رکینگ ءِ ھاترا مدام جد ءُ جھد کنگ ءَ اَنت ءُ اے زمین ءِ ھاک ءِ انچین بوہ ئِے کہ یک برے انسان وتی باتن ءَ سماھے بہ کنت تاں گڈی ساہ ءَ گوں بلوچستان ءِ سرزمین ءَ بندوک بیت انت۔
انسان وتی زند ءِ توک ءَ باز بر ءَ مرگ ءِ نام ءَ ھش کنت وتی کش ءَ گندیت ئے ءُ سرپد بیت۔ مرگ یک انچیں شوکیں چیزیے ئِے نام انت کہ آ ھمک باب ءِ گڈی بھر انت۔ھمک باب کہ آئی ءِ گڈی بھر بیت گڑا آ مرگ گوشگ بیت مرگ ھما جاہ ءَ ودی بیت تو مارے کہ اے منی گڈی ساھت انت۔ اے گڈی ساھت باز شکل ءَ ترا گندگ ءَ کیت انت ءُ بازیں شکل ترا گندگ ءَ کئیت، مرگ اَبرمی اوں ھست انت ءُ لھتے انسان ترا گندگ کاینت کہ آھاں پہ وت ءَ وت مرگ شوھاز اِتگ۔ مرگ یک تنیگیں رستر یے وڑ ءَ کئیت ءُ بارت انسانَ ءَ گستا کنت۔ ترا چہ تئی راج، تئی زمینَ تئی چاگرد تئی ھما وشی کہ گوں تو بندوک انت درسَ ءَ چہ جتا کنت انت ۔
ھر وھد ءَ مارا باز رنگ ءَ نوکیں مرگ یے راھبند گندگ ءَ کئیت ھمک انسان یے بہ بیت یا چاگردے کہ ایردست کنگ بیت گڑا ایردست کنوکیں استان ھرچ وھد ءُ ھالات ءَ نوکیں پندل سازیت ءُ اے پندل مارا اَبرمی جاور گندگ ءَ کاینت بلے چوش نہ انت یا ھمے اَبرمی جاور سرجمیں دنیا ءِ تھا پدر بنت کہ اَبرمی ویل ءُ واکیھے ۔ کجام کہ واکیہ بہ بیت یا دگہ رنگ ئِے بیت یا ھار ءُ توپانے ءِ شکل بیت یا گژنگی ءُ لاپ ءِ شوھازگ ءِ بہ بیت یا اِلَّت ءِ شکل ءَ ماراَ گندگ ءَ کاینت۔ اگاں یک زالے یک چُکے پیداک بیگ ءَ پد زندگ نہ مان ایت گڑا آئی ءِ زمہ وار ھمے استان انت کہ آئی ءَ راج ایردست کتگ ءُ لگتمال کتگ دنیا ءِ ھما بُنکی لوٹ کہ ھست انت چہ آھاں زبھر اِنت۔ دومی اگا یک زندگیں انسانے دگہ دروشمے ءَ مرگ ءِ آماچ بہ بیت مئے راج ءِ دومی بھر ھمے مرگانی راھبند کہ زورآوریں استان ءَ جوڑ کرتگ انت ھمیشی ءِ آماچ انت ءُ چہ ماَ گستا ءُ دور برگ بنت بلے اے وت کوشیں دگ کے مئے راج ءَ چماَ دور بارت اے ھم استان ءِ یک ساز اتگیں پندلے ۔
کُجا ءُ چے پیم ءَ ءُ چون بس کشگی انت ءُ بس کوشی ءُ دنیا ءِ اے نزر ایشراَ اَبرمی ویل اے گوش ایت۔ بیسمہ ءِ دگ ءِ ویل بہ بیت یا وندر ءِ دگ ءِ ویل بہ بیت اے ویلانی تہ ءَ کہ مئے راج ءِ باندات بوتگ انت ءُ مئے راج مروچی کُجام وڑ ءَ یا کجام دروشم ءَ استان ءِ مرگ ءِ راھبندانی آماچ انت ۔
ھمک ایر دستیں راج زندگ بیت یا نہ بیت آئی ءِ دست ءَ انت بلے انچُش گش انت کہ یک ایردستں چاگردیے مرگ وجود نہ دار ایت کئے کجا مر ایت ءُ چون مر ایت بلئے اے کلانی تہ ءَ استان ءُ آئی ءِ تھذیب دست ءُ پالیسی ھوار اَنت۔ ھمے رھبند ما بچاریں گڑا کیچَ ءِ یک بلوچ پرزندے ءَ ڈینگی ءِ بیماری مرگ ءِ آماچ بیت کوہ سلیمان ءَ کینسر ءِ اے شکل بیت ءُ ڈیرہ بگٹی ءَ بے آپی ءِ شکل ءَ گڈی ساہ ءَ دنت یا دالبندین ءَ بے سبارگے ءِ شکل ءَ بیت اے درستانی تھ ءَ استان ءِ دست ءُ آئی ءِ ھونیگیں پنجگ مان انت پہ بلوچ ءِ ایردست کنگ ءَ بلے مئے قومی زمہ واری چی انت مارا اے استان ءِ دیم ءَ چو بولان ءِ پیم ءَ مِک بوگی اِنت۔
اے وھد ءَ یک زندگیں راجے ءِ بستار ءَ بلوچ ءَ پہ وتی ڈیھ ءِ آجوئی ءُ راجی استان ءِ دوبر گرگ ءِ ھاتر ءَ آشوبی جنزے ءِ بار کوپگ ءَ اَنت ءُ گام پہ گام جُنزان اِنت۔ زورگیریں پاکستان ءِ زوراکی ءُ بلوچ ءِ چُکچینی ءَ ھوار پاکستان چاگردی رنگ ءَ ھم چہ بندات ءَ ھمے وڑیں پالیسی اڈّ دیان اِنت کہ چرائی ءَ بلوچ ءَ انچیں مرگ یے آماچ کنگ ءِ جھد ءَ اَنت ءُ پہ بلوچ راج ءَ المی انت کہ اے روشت ءَ بہ پروش اِیت۔ یک زوراکیں ملکے وتی جتا جتائیں پندلاں کارمرز کنان ءَ یک ایردستیں راجے ءَ نزور کنت بلے استان اے دیم ءَ چو کوہ ءِ دروشم ءَ راج ءَ مُچ کنگ ءُ آئی ءِ گون ءَ جنگ بہ کنت دانکہ آ ءُ آئی ءِ آیوکیں پدریچ یات بہ کنت ۔
پہ مزلومیں راجے ءَ جنگ کنگ ءُ دژمن ءَ پروش دیگ ھما یکیں راہ اِنت کہ آزاتی بہ رس ایت ءُ وتی زبان ءُ وتی راجی پجار ءَ بہ رکّین اَنت دنیا ءَ بازیں راجے غلام کنگ بیتگ بلے ھمے غلاماں مدام جھد کتگ ءُ وتی زندگ دارگ ءُ زندگ بوھگ ءَ اولیت دیگ بوتگ کہ مئے آیوکیں پدریچ کسے ءِ چیر دستی ءَ مہ بنت۔ بلوچ ڈیھ ءِ ھستیں لوٹ ھمیش انت کہ ما یکجاہ ءُ تپاک بہ بہ ایں ، ءُ پہ راجی یکمُشتی ءُ تپاکی ءِ ھاتر ءَ الّمی اِنت کہ ما پہ راجی بھر ءُ بانگ ءِ ھاتر ءَ جوڑ کتگیں دژمن ءِ ایدگہ بھر ءُ بانگی ءِ پندلاں سرپد بہ بہ ایں۔ پہ ما الّم اِنت کہ ما بلوچ راجی آجوئی ءِ جُنز ءِ لوٹ ءُ وتی راجی کرد ءَ پیلو بہ کن ایں۔ چیا یک گلامیں راجے ءِ بستار ءَ زندگ بوگ ءُ پشت کپگ ءِ یکیں وسیلہ راجی آجوئی ءِ جنز ءِ برجاہ دارگ انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
شوھاز ءُ نگد ءُ چکاس ءِ مانا
ندکار: شاھد اھمد
سیمی بَھر
دی بلوچستان پوسٹ
دوئیں نیام ءَ یکجاہ سیادی ءِ بیان کنگ ءَ پیسر ، اے گپ ءِ سر ءَ کہ “سسا ساچ” ءِ گوں آیانی سیادی ءِ بیان کنگ ءِ ھاتر ءَ ، اے گپ ءِ زانگ ءِ ھاتر ءَ کہ پیسر ءَ چہ ھستیں سسا ءِ مواد ایشانی دوئیں ھاتر ءَ کجام وڑ ءَ المی انت۔
پٹ ءُ پول، نگد ءُ سسا ساچ کنگ ءِ تہ ءَ سیادی گپ ایش انت کہ پٹ ءُ پول ءُ نگد ساچشت ءِ سر ءَ بندوک انت بزاں اَسَل چیز ساچشت انت۔ ایشی ءِ بید ءَ ایشانی دوئیں ھست بوگ نا بوگ اِنت بلے تاگت ءِ سر ءَ ھیال کنان ءَ نگدی زوراوی چہ سسا ساچ ءَ پیسر ءُ ھمزمان ءَ ھست اِنت پمیشکا الیوٹ ءَ وتی نبشتانک “تنقید ءِ کارکرد” ءِ تہ ءَ ءُ نگدی ءِ سیادی چوش بیان کتگ-
“اَسَل ءَ نبشتہ کار ءِ وتی کار ءِ رِد بندی ءَ آئی ءِ مُزّ ءِ مزنیں بھرے نگد کاری اِنت، بزاں گیچگ، یکجاہ کنگ، جوڑ کنگ، در کنگ، راست کنگ، ارزشت دیگ ءِ کار اِنت۔” اے پریشان کنوکیں مُزّ ھما وڑ ءَ ھژدری انت کہ آ اگلاکی انت۔
وھدے کہ یک ساچشتے وجود ءَ کیت گڑا آئی ءِ چارگ ءَ چہ کدر ءُ رھشونی ءِ رھبند جوڑ بنت۔ ایشی ءَ پد وھدے ازمکار ءِ نیمگ ءَ دگہ ساچشتے وجود ءَ کَیت گڑا آ نگدانک ءِ جوڑ کتگیں رھبندانی بنیاد ءَ وتی ساچشت ءَ گیشتر شرتر کنت۔ اد ءَ اے گپ المی نہ انت کہ آ نگدکارانی ایر کتگیں مواد ءُ رھبندانی سر ءَ سک باز پابندی بہ کنت۔ اے گپ بوت کنت کہ آ چہ آیاں دیم ءَ بہ روت ءُ نوکیں تجربگ بہ کنت، نوکیں نوکیں وڑ ءُ پیمے بہ دنت۔ اگاں چوش اِنت گڑا ازمکار ساچشت کنوک بیت گڑا ساچشت نگدکار بیت۔ بلے آئی ءِ نگد ءُ نگدکار ءِ نگد ءِ دگری ایش بیت کہ: ساچشت کار ءِ نگد آئی ءِ مجگ ءِ تہ ءَ گار ءُ بیگواہ مان اِیت، وھدے کہ نگدکار ءِ نگدی وڑ ءُ ڈول پدر بیت۔ اے رنگ ءَ اے دوئیں اَمَل رند ءِ نبشتہ کار ءُ وانوکاں کارمرز کن اَنت ءُ الھام رس اَنت۔
روان اِنت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان: 170 دگ ءِ وئیلاں 521کھول سانمند ـ دومی سَے ماھی اھوال
دی بلوچستان پوسٹ
دی بلوچستان پوسٹ ءِ ڈیٹا ویژول اسٹوڈیو ءِ کچ ءُ کساسانی رد ءَ 2024 ءِ دومی سَے ماھی اھوالانی توک ءَ سرجمیں بلوچستان ءَ دگ ءِ وئیلانی سبب ءَ 521 کھول سانمند بیتگ اَنت ءُ رپورٹ بیتگیں وئیلانی کساس 170 اَنت-
بلوچستان ءِ دگ ءِ وئیل یکشل ءَ برجاہ اَنت ھمک روچ جتاجتائیں دروشماں پیش اتکگیں وئیلاں بازیں مردم ٹپیگ بوگ ءَ اَنت ءُ ھمود ءَ بازیں کساساں مردمانی جان ءُ ساہ روگ ءَ اَنت-
دومی سَے ماھانی توک ءَ رپورٹانی رد ءَ گوستگیں سَے ماھانی توک ءَ دگ ءِ وئیل گیش بوتگ اَنت ءُ سانمندیں کھولانی کساس کمتر گندگ ءَ اتکگ انت ءُ بیران بیتگیں مردمانی کساس گوستگیں رپورٹ ءَ گیش انت –
کچ ءَ کساسانی رد ءَ اے وئیلاں 145 مردم ءَ گیش مردم مرگ ءِ ارجان بیتگ اَنت ءُ ھمے وڑ 395 مردم زدگ بیتگ اَنت-
درستاں گیش سانمند تریں ھند مستونگ ءَ 23 وئیل، ھزدار ءَ 15 وئیل، شال ءَ 14 وئیل، تربت ءَ 13، لسبیلہ ءَ 10 وئیل، گوادر ءَ 8 وئیل ، سبی ءَ ھپت، نوشکی ءَ چار ، پسنی ءَ پنچ ءُ چمن ءَ ھشت وئیل رپورٹ بیتگ اَنت-
بلوچستان ءَ دیم ءَ اتکگیں وئیلانی سبب گاڑیانی کلنڈی، گیشیں بار، کوھنیں گاڑی، ڈرائیورانی نا استائی ءُ ڈرائیونگ لائسنس ءِ نہ بوگ، ترند روگ ءُ بے پروائی ، دراج کشین سپراں واب ءِ کمی ءُ نشہ آماچی ءِ ھوار اَنت-
اے سبباں پرشت ءُ پروشی دگ، تنک ءُ یک نیمگیں لائنین دگ، دگانی سر ءَ نا گر ءُ داری ءُ نیویگیشن اشارہ نہ بوگ ھوار اَنت ءُ بلوچستان ءَ ٹریپک ءِ ھچ انجنیئر نیست اِنت-
کولواہ
شوکت اَبرار
دی بلوچستان پوسٹ
کندِ اتگ دوشی کوش ءَ کولواہ ءَ
دِرین ءَ نازینک پہ مُراد گوّشتہ
ماہ ءَ مھکانی پہ وڈے شِنگ کُت
اِستالاں روکیں یک رِدا چاپ جت
(کہ) ماھیں مھناب ءِ دیم درا بُوتہ
دُتکگیں سوُری جامگے پِر کت
مِھلبیں جیگ ءِ وشتِریں بوہاں
جنتیں ھلک اِش چار سرا زُرتہ
چاریں آتراپاں مِسک بِرشانتہ
انتر ءِ ھورا گوّربام ءَ گّورتہ
لُڈ اِت پہ دابے ءَ سمین ناز ءَ
میتگ ءِ دمکاں سرگوات ءَ مَل اِت
سے برا بند وارت جمبر ءَ زالے
وھلی ءِ کور ءَ گزّانی سر شُشت
کُمب ءُ آپداراں آپان ءَ مٹ کُت
ھینّاریں بنداں تُن وتی پُروشتاں
گَندہ کور جمّاز اَت چو شِلنگ لاڈ ءَ
بینٹ ءُ سرتلاں جت گَلا نازینک
بوہ ءِ تالاں بوت میتگ ءُ ھلک اَں
شیّریں نوکاپ ءُ لاسیں تُرمپانی
او بھاربوہ ءُ بِھشتیں بالاد ءِ
ملگور ءُ بیکاں تب وتی وش کُت
زُلپاں گوں آپ ءَ مسکرائی کُت
کوکِریں دِلبند ءِ تُرنجاں تامداریں
لُڈ اِت ءُ کندِ ات ، کندِت ءُ لُڈ اِت
بارگیں سِرین ءَ شیرکِنیں دردے
واھگ ءِ اِشکندے کُتاں تامدار
گوھر ءَ منتینت ءُ وتا ژند کُت
درور ءَ ھینزک ءِ نیمگ پدّر بُوت
مئے ءُ تئی زِند ءِ کُل ودار دوشی
سرجم ءَ دوشی بُوتگاں سرجم
کندِاِتہ دوشی کوش ءَ کولواہ ءَ
ماھیں ماھناب ءِ قُرانیں دیم
کوکِریں دِلبند گوں ھدیسان اَت
چو پچیں رِھل ءَ ایراَت ماں دیم ءَ
چار اِت ءُ کنداِت ٹُکر ءَ ماہ ءِ
من وتا شنک جت شوکت ھپت رندا
شھم اِت شھموک ءَ گوں ابرّمی رنگ ءَ
نُگرھیں بالاد ءَ گوں تِلاہ رنگیں
آئی مُراد بکشات ءُ من مُراد زُرتاں
آئی مُراد بکشات ءُ من مُراد زُرتاں
پہ شئے مُرید
نبشتہ کار آر ۔ اس بلوچ
دی بلوچستان پوسٹ
اِے لبز ھما وھد ءَ تئی دیم ءَ کپ اَنت وھدے تو ھَم زان ئے اِے لبزانی چینچو لوٹ بوتگ ترا برے برے باز الّمی بیت کِہ مارا کسے بئیت ءُ دست بِہ گیپت چہ مئے گرانیں کترھانی سرگوز کنگ ءَ ءُ زندگی ءِ نیمگ ءَ آرگ ءَ وتسرا ناگتا انچیں جاور کا اَنت مردُم چٹ پروش وارت، زِندگی ءَ چَہ نا اُمیت بیت ءُ پدا ھمے نا اُمیتیں ساھت ھزاراں ردیں راھاں اومیت دے اَنت ءُ اِنسان باریں چی جیڑ اِیت ءُ پیسلہ زوریت کِہ اِے جیڑگانی توجیل تھنا وتی نُکس دیگ اِنت من مہ باں اِے جیڑہ ھَم نہ بنت ءُ کدی اِے وڑ ھَم جیڑیت اِنسان کِہ منی روگ بازیں کارانی کارگوشادی اِنت ءُ پدا یار چہ گم ءُ گڑتے ءَ انسان رکّ اِیت کسیمں زلیل اِنت چہ ھروچ ئیں مسیبتاں اِے زندمان ءِ نگیگیں جاوراں من زاناں تو ھَم نِشتگ ءُ وتا گوں توجیل سازگ ءَ ئے کِہ چون بِہ گیشیناں وتا چہ اِے اِلتاں ءُ آجو بِہ باں پہ مُدامی ۔
تو چوناھا ھما مردُم ئے کِہ مُدامی ترا چی مردُماناں سیکین رَس اِتگ کسمیں کِہ اِے ستاھے نئے بلکیں راستی یے منی جِند کدی کدی انچیں جاھاں سر بوتگ کِہ من جیڑ اِتگ نوں ھِچّی نہ بیت کُل چیز ھِلاس اَنت نوں تھنا مرگ اِنت بَلے تو من ءَ دست گِپتگ ءُ زِند ءِ نیمگ ءَ آرتگ گڑا پمے ھاتِرا واللہ بَس من کدی جیڑ اِت نہ کناں کِہ تو دمبُرت کن ئے یا مایوس بئے تو دِگہ ھبرے زانئے کِہ تئی ھبر پہ من بلائیں ھاٹیگ ءُ سکین اَنت نوں تئی بوھگ الّمی اِنت داں اِے جھان ءِ اڈ ءُ جنجالاں چی بالا بوت بِہ کناں تئی ھستمانی منی زِندگی ءِ ھما لوٹ اِنت کِہ بید ایشی زند بوت نہ کنت مرچی ماہ ءَ را چاردہ اِنت من ڈن ءَ نیشتگاں ءُ جیڑگ ءَ آں کِہ تو اِے ساھت ءَ ماھ ءِدیم ءَ کِہ نشتگ ئے گڑا تو جیڑگ ءَ ئے چی! پہ مناں!! من اِے ھم زاناں تو انوں ماھے شوکیں اکسے ھَم گیپتگ ءُ پہ من روان دے ئے زوت ۔
مِھروان من تو تھنا چندے روچانی ھمراہ نئے بلکیں مِدتے بیت اِے زِندمان ءِ چندے سال کِہ من گوں تو گوازینتگ اَنت گُڑا اِے سالانی تھا وڑ وڑیں رنج ءُ ملوری بوتگ ءُ ما بازیں وابے دیستگ بازیں وابے سینگار اِتگ ماں دیدگاں ءُ پہ ھمے وابانی مانا ءَ من تو وتی شپ ءُ روچ آسر کُتگ اَنت مِھر ھما مارِشت اِنت کِہ اِنسان وت ھَم نہ زانت کِہ کَد ءُ کجا مناں اِے نادراھی گیپت ءُ پد ءَ چونی ءَ من وتا دراہ بِکناں پمیشکا اگاں ترا یات بیت من ترا مُدامی گُشتگ اَت یار مِھر ماں کنگ ءَ ئے بَلے اِے مِھر کُربانی ھَم لوٹ اِیت اَچ ما ءُ مارا وتی مارشت ءُ بے پناھیں مِھر ءَ را الّم شوکیں آسرے دیگی اِنت ۔
پرچا من تو ھردو زانیں کِہ مئے مھلوک ءِ کِرّا مھر بستار سک کمّ اِنت مارا وتی مھر بستار دیگی اِنت ءُ آسرے ءَ سر کنگی اِنت۔ مِھر ءِ بِندات مُدامی کئولے مردُمانی ءَ شیرکن ءُ شوک اِنت مئے ھَم زِندمان وشّیں ساھت گوزگ ءَ اِت آں گوں یَک دومی ءِ ھیال دارگ ءُ وھد دیگ ءَ ما زندگی ءِ کسان کسانیں زیبائیاں مارگ ءَ اِت اِیں پہ ما زندمان نوک ءُ جلواناک اَت اِے شکر ورنائی مارا وتی دوست بوھان اَت ءُ ما یک دومی ءِ ھیالاں مُدامی ھست ءُ ساجو اِت اِیں وھد گوزان اَت مئے نزیکی گیش بوھاں بوت نوں مارا انچو سما بوت کِہ پہ مارا اِے روچ ءِ بیست ءُ چاریں ادار ھَم کمّ اَنت پہ یک دومی ءِ وھد دیگ ءُ مِھر دیگ ءَ ما ھِچّ چیز ءِ کِمار نہ اُت اِیں تو گوشئے زندگی وشتریں ساھت پہ ما ھمیش اِت آں کہ ما یک دومی ءِ ھیالان اِت اِیں ۔
مِھر پدا انچیں وبالے کِہ روچ پہ روچ ءَ انسان ءَ چہ توک ءَ وران کنت انسان بے کرار بیت لوٹ اِیت من وتی مِھروان زوت دوچار بِہ کپاں آئرا وتی ھمبازاں بزوراں انچوں سما کنت برے برے کِہ بید آئی ھستمانی ءَ دُگنیا شوک نہ اِنت نِدارگ ملور اَنت زِند بے رنگ اِنت جلوانکی نیست ھر کُجا تھنا بے تامی ءُ بے لزتی بس کدی اِے داب ءَ ھَم ما ھردو بوتگیں کِہ مارا یک دومی ءِ ھاجت بوتگ تو گُشت ءَ زِند نوں ھمِد ءَ کُٹ اِتگ ساہ بُرز ءَ نیتکگ بالاد ءَ چی وتی جھلاد بوتگاں انسان بے سکونی ءِ روچاں گوازینان بوتگ ما چُش جیڑ اِتگ کِہ زِند نوں آسر بِہ بیت انچیں بے اوستی ءَ جاہ جتگ ماں باتن ءَ کِہ انسان ءِ کرار پروشتگ آئی دِل ءَ نالتگ پہ دوستدار ءِ یک دیدے ءَ مھروان اِے اُمر کِہ ما گوں ھوری ءَ گوازینتگ من لوٹاں تو اِے ھبر ءَ کدی ھَم مہ شموش ئے کِہ بِلے توری ھرچیز بِہ بیت زندمان تھا مارا چہ اولی ھبر ءَ بے ھال بوھگی نہ اِنت کہ من ءُ تو یک دومی ءِ مھریں ءُ مئے نیام ءَ ھرچیز کِہ ھست بوتگ آ تھنا منی ءُ تئی راز اَنت مئے گوماں کلّ بنت ۔
تو تھنا ھمے یکیں ھبر ءَ مُدامی دِل ءَ بِدار کِہ من ھرکُجا بِہ باں من تئی آں انچوش کِہ زمین ءِ مھر انسان ءِ ھون ءَ کِہ ھوار بیت کدی در نئیت ءُ داں مرگ انسان پہ زمین زِند بیت ءُ پہ زمین تھنا کربان بیت زندمان گْران اِنت ھِچّ نہ زانت مردُم کِہ کد ءُ کجا گوں آئی چی بیت بَلے تو ھم زان ئے کِہ مِھر ابدمانیں شے یے مِھر ھمروچ ودّان اِنت گیش بوھان اِنت دودانی پاسداراں من ءُ تو بِہ گِندئے اِے دوداں مناں ءُ ترا چہ یک دومی ءَ سک دور کُت بَلے ھما کِشک کِہ من ءُ تو گوں وتی ارواھاں کَشّ اِتگ ماں وتی زِرد ءَ آ کِشک مُدام اباد بیت آئی ءَ ھِچّ دودانی گرز نیست لاڑی تئی دود انچوشاں کہ مناں دارگی اِنت وتی دل بَلے تو ھَم زان ئے اِے دِل بے تو ساھتے نہ بیت ءُ پرتو مُدامی زندگ اِنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
