TBP Balochi

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں وتی یک درشانے ءِ تہ ءَ سبی ءَ مروچی بیتگیں بمب اُرشانی زمہ واری منّ اِتگ اَنت –

گل ءِ جارکش ءَ وتی درشان ءِ تہ ءَ گْوشتگ کہ مئے سرمچاراں سبی ءِ دمگ خجک دامان ءَ پاکستانی پوچ پوسٹ ھاتر ءَ آپ بروکیں ٹریکٹر گوں چیرکتگیں بمبے ءَ نشانگ کتگ، تراک ءِ آسر ءَ ٹریکٹر ءَ سک باز تاوان رس اِتگ وھدے کہ اشی ءِ ڈرائیور ٹپی بیتگ-

جارکش ءَ دیمتر ءَ گْوشتگ کہ دومی اُرش سبی ، لونی دگ سر ءَ پاکستانی پوج دستی بمب اُرشے ءَ نشانگ کتگ، تراک ءِ آسر ءَ زورگریں دُژمن ءَ جانی ءُ مالی تاوان چست کنگ کپتگ-

دوستین بلوچ ءَ گْوشتگ کہ اے دوئیں اُرشانی زمہ واری ءَ مئے گل منّ اِیت – زورگریں پاکستانی پوج ءَ را بلوچستان ءَ چہ دراھگ ءَ تاں مئے اُرش برجاہ بنت-

بلوچستان ءِ دمگ سبی ءَ یک دگہ تراکے، واٹر سپلائی لونی دگ ءَ ورلڈ بینک ءِ کار ءِ سر ءَ دزبمب تراکے کنگ بیتگ-

گیشیں اھوالانی رد ءَ ناشناسیں مردماں واٹر سپلائی سائٹ ءِ سر ءَ دزبمب تراکے دور دیگ بیتگ کہ ترندی ءَ گوں تَرکتگ –

تراک ءَ ھچ جانی تاوانانی اھوال سر نہ بیتگ اَنت – وئیل ءَ پد ھال ءِ سر بوگ ءَ سیکورٹی پورس وئیل جاہ ءَ سر بیتگ اَنت-

زانگ بہ بیت مروچی سبی ءَ بیوکیں اے دومی بمب تراک اِنت کہ ایشی ءَ پیش بارودی سرنگ ءِ زد ءَ اتکگیں یک مردمے زدگ بیتگ ءُ ٹریکٹر ءِ یک بھرے سرجم ءَ پروشتگ-

بلے داں انگت ءَ ھردوکیں وئیلانی زمہ واری ھچ گل ءَ پہ وت ءَ نہ زرتگ اَنت-

 بلوچستان لبریشن فرنٹ ءِ جارکش میجر گْوھرام بلوچ ءَ رساندکر ءَ شنگ کتگیں درشان ءِ تہ ءَ گْوشتگ کہ سرمچاراں 29 اگست ءِ روچ ءِ ساھت سَے ءَ دشت ءَ جنگل بازار ءُ پیروتگ ءِ میانجی ءَ برجاھیں چینی شرکت زونگ موبائل پون ٹاور ءِ سر ءَ اُرش کُرتگ ءُ دُرسیں مشین گوں سولراں مانداشتگ اَنت۔
 
زووگریں پاکستان ءُ چین بلوچستان ءِ جتائیں دمگاں آجوئی ءِ جُھدکار ءُ ھمدردانی نشان کنگ ءُ زانگ ءِ ھواری ءَ پہ وتی چاریگ ءُ لشکریانی آسراتی ءَ موبائل پون ٹاور مِک کنگ ءَ اِنت۔

ھمے وڑ ءَ سی پیک دگ ءِ پھریزگ ءَ موبائل پون ٹاور مِک کنگ بیگ ءَ اَنت ءُ اے شوربندیاں بلوچ ءُ بلوچستان ءِ دیمروئی ءِ نام ءَ دیگ ءُ مئے مڈیاں لُٹ ءُ پُل کنگ ءُ مئے ایردستی ءِ دراجکش کنگ ءِ پندل سازگ بیگ ءَ اِنت۔

بلوچستان لبریشن فرنٹ داں زورگپتگیں بلوچستان ءِ آجوئی ءَ زورگریں دُژمنیں لشکر ءُ آئی ءِ زورگری شوربندیانی مئے اُرش برجاہ بنت۔

ھزدار ءِ دمگ زھری ءِ جھمنندیں بیگواھیں غلام فاروق ءِ لاش دزکپتگ-

لاش شال ءِ دمگ قمبرانی دگ ءَ انگور ءِ باگ ءَ دزکپتگ ءُ اود ءَ چہ نادراہ جاہ ءَ برگ بیتگ-

غلام فاروق ء مھمد وارس 27 اکتوبر 2022 ءَ چہ مستونگ ءَ ھما وھد ءَ آوار جنگ بیتگ کہ آ اود ءَ مزوری ءِ واستا جھمنند بیتگ-

دمگی مردمانی گوشگ اِنت کُشگ بیتگیں ورنا مزوری ءَ بیتگ ءُ آئی ءَ وتی لوگ والینتگ – ءُ اے تک ءَ آ گیشتر مستونگ ءُ آئی ءَ ھواریں دمگ منگچر ءَ شتگ بیتگ مزوری ءِ کتگ-

گوستگیں سال ءِ 27 اکتوبر 2022 ءَ ھمے درچ ءَ آ مستونگ ءَ جاڑیگ بیتگ کہ پاکستانی پوج ءُ لس پوشاکی گداں ھواریں کارندھاں آ مستونگ ءِ مزنیں شھدگ ءَ دزگیر کتگ ءُ ناشناسیں جاھاں برتگ بیتگ-

بیگواہ بیگ ءَ پد ورنا ءِ درگت ءَ ھچ وڑیں اھوال دیم ءَ نیتکگ اَنت ءُ مروچی آئی ءِ لاش دزکپتگ-

چین ءَ زوت ءَ آروس کنوک ءُ زھگ ءِ ودی کنگ ءِ سنچ ءَ دارگ ءِ پژدر ءَ مرد ءُ جن ءَ را داد دیگ ءِ جار جنگ بیتگ-

برتانیہ ءِ ھال سرکنوکیں ادارہ روئٹرز ءِ رد ءَ چین ءَ یک میتگے ءَ جار جتگ کہ اگاں بانور ءِ اُمر بیست ءُ پنچ سال ءَ کم بیت گڑا بانور ءُ سالونک ءَ یک ھزار چینی یوآن داد دیگ بیت اِنت-

اے دادی زرانی جار ورنایاں آروس ءِ نیمگ ءَ آرگ ءُ ودی بوگ ءِ کمی ءِ پژدر ءَ کنگ بیتگ-

اے گپ ءِ جار شان شین کاؤنٹی ءَ چاگردی تکانی تندجای ءَ کتگ بیتگ-

چینی واکدارانی رد ءَ شست سال ءَ پد یک رندے پد ءَ آبادی ءِ کم بوگ ءِ سما بوگ ءَ اِنت چریشی ءَ پد آیانی نیمگ ءَ ودی بوگ ءِ گیش کنوکاں داد دیگ بیت اِنت ءُ زھگ ءِ پیداگ بوگ ءَ جتا جتائیں مراگش برجم دارگ بنت اِنت-

چین ءِ کانون ءِ رد ءَ آروس ءَ مردیانی اُمر بیست ءُ دو سال اِنت ءُ زالبولانی بیست سال اِنت – بلے چینی ورنایانی آروس ءِ مھر روچ پہ روچ کم بیان اِنت چریشی ءِ سبب ءَ زھگ ءِ پیداگ بوگ ھم بوگ ءَ اِنت-

چین ءِ سرکار ءِ نیمگ ءَ شنگ کنگ بیتگین کچ ءُ کساسانی رد ءَ سال دوھزار ءُ بیست ءُ دو ءَ شست ءُ ھشت لک آروس بیتگ انت کہ چوشکہ سال نوزدہ سد ءُ ھشتاد ءُ شش ءِ آروساں درستاں کمتری آروسی سال اِنت-

چین ءَ ودی بوگ ءِ درچ کمتریں ڈیھاں ھوات بیت اِنت سرکاری رسانکدر ءِ رد ءَ سال دوھزار ءُ بیست ءَ ودی بوگ ءِ تک یک ٹک نُھ بیتگ کہ کمتریں تک اِنت-

کویت ءِ واکداراں لوگی جیڑھانی پھریزگ ءَ نوکیں کانونے دیم ءَ آورتگ کہ ایشی ءِ توک ءَ گیر دودمانی سزا بندگ بیتگ انت-

روتاک بیست ءُ چار ءِ رد ءَ نوکیں گامگیج کہ ایشانی توک ءَ ھما گیر دودمانی سزا دارگ بیتگ انت کہ آیانی توک ءَ میتانی گُسل دیگ، پارک ءُ مھلوک جاھاں ساپ کنگ ھوار اَنت-

گامگیج ءَ گوشگ بیتگ کہ لوگی جیڑہ کنوکیں مردماں شش تکاں چاگردی کاراں ابید ءِ زراں کار گرگ بنت اِنت-

لوگی جیڑہ کنوکیں مردماں دستکاری ءَ ھوار وانگ ءُ ھیلکاری ءِ کار ھم گرگ بنت اِنت –

ایشی ءَ پد وزارت ءِ روزگار ءِ نیمگ ءَ فیلڈ ءَ جتا جتائیں کار گرگ بنت اِنت-

کویت ءِ آمیدگسی بنشون ءِ گوشگ اِنت دیم ءَ آورتگیں لوگی جیڑہ کنوکاں چہ سَے ماہ ءَ جتا جتائیں کار گرگ بنت اِنت-

ھپتگ ءَ پنچ روچ ءَ ڈیوٹی گرگ بنت اِنگ ایشاناں گیش ءَ گیش چار گنٹھ کار گرگ بنت اِنت-

روکپتی بلوچستان ءَ تیل کشانی سر ءَ ایرانی لشکر ءِ تیرگواریانی درچ یکشل ءَ برجاہ اَنت کہ چریشی ءَ اود ءَ تیل ءِ باپار ءَ بندوکیں مردم نشانگ کنگ بوگ ءَ اَنت-

سر بیتگیں ھالانی رد ءَ روکپتی بلوچستان ءِ دمگ سراوان ءِ سیمسری ھند ءَ ایرانی لشکر ءَ تیرگواری کنان ءَ یک مردمے کُشتگ-

کُشگ بیتگیں مردم ءِ پجار بیست ءُ پنچ سالی ئیں وھید دھانی ء جان مھمد جھمنند جاہ کودھی سب و سوران ءِ نام ءَ زانگ بیتگ –

اھوالانی رد ءَ وھید ءِ سر ءَ ھما وھد ءَ سکیورٹی پورس ءَ تیرگواری کتگ کہ آ سیمسر ءَ واتر گوں پرپٹ ءَ ھالیگیں گیلناں آیگ ءَ بیتگ کہ ابید ءِ دارگ ءَ تیرگواری کنگ ءُ کُشگ بیتگ-

زانگ بہ بیت روکپتی ءُ رودراتکی بلوچستان ءِ سیمسراں تیل کش پاکستان ءُ ایران ءِ لشکر ءِ نشانگ بوگ ءَ اَنت –

اود ءَ مردمانی لاپ ءِ والینگ تھنا گوں سیمسر ءَ تیل کشی ءَ اِنت کہ چریشی ءَ مردم وتی لاپ ءِ والینگ ءِ گزارن ءَ کنگ ءَ اَنت –

لس تیل کشانی گوشگ اِنت ھاسیں کار ءُ روزگار ءِ نہ بوگ ءَ آ اے جان کُشیں کار ءَ گوں وتی گزارن ءَ کنگ ءَ اَنت بلے اے گزران ھم آیانی جان ءُ ساھانی اجل بوگ ءَ اِنت –

چہ شال ءَ پاکستانی پوج ءَ زالبول ءُ گوں دو چُکانی ھمراھی ءَ آوار کتگ ءُ ناشناسیں جاھے ءَ برتگ-

بلوچ نیشنل موومنٹ ءِ انسانی ھکانی ادارہ پانک ءِ رِد ءَ دو روچ ءَ ساری 28 اگست پاکستانی پوج ءَ شال ءِ یونائیٹیڈ ھوٹل ءِ سر ءَ بیڑبرتگ ءُ اود ءَ ساڑی ئیں سبی بدراکے جھمنند بلوچ زالبول نور خاتون ، چُک عبدالغفار ءُ جنکو بانڑی آوار جتگ ءُ ناشناسیں جاھے ءَ برتگ-

گل ءَ انسانی ھکانی ادارہ ءُ ھکومت ءَ گوں لوٹ کتگ کہ بلوچ زالبول ءُ آئی ءِ دوئیں چُک ءَ زوت یل بکن اَنت-

زانگ بہ بیت بلوچستان ءَ برجاھیں زورانسری آوار جنی ءِ دْرچ گیشتر وھداں بلوچ زالبول ھم زورانسری آوار جنی ءِ نشانگ کنگ بوگ ءَ اَنت اشی ءَ ساری ھمے سال ءَ چہ شال ءَ ماھل بلوچ ھم گوں آئی ءِ چُکانی ھمراھی ءَ بیگواہ کتگ اَنت بلے پد ءَ دیم ءَ آرگ ءَ پد چیزے ماہ پد زمانت سر ءَ یل کنگ بوتگ-

ماھل بلوچ ءَ چہ ساری کراچی ءُ آواران ءُ کیچ ھم بلوچ زالبولانی زورانسری آوار جنی ءِ ھال سر بیتگ اَنت وھدے کہ سرکاری واکدار ءُ پوج ءِ نیمگ ءَ چہ اے زالبولانی سر ءَ سلاہ بندیں گلاں گوں سیادی ءِ بھتام جتگ اِت-

بلوچستان ءَ زورانسری آوار جنی ءِ گر ءُ دار ءِ ھاتر ءَ کارکنوکیں گل ءِ گْوشگ اِنت کہ پاکستانی پوج یک دھکے ءَ چہ گیش بلوچ ورناھاں بیگواہ کنگ ءُ مھلوک ءِ تہ ءَ تُرس برجم دارگ لوٹ اِیت چریشی ءَ پد نی زالبولاں نشانگ کنگ ءَ اِنت وھدے کہ اے سرجمیں زورانسری آوار جنی ءَ پاکستانی پوج ، چیریں ادارہ ھوار اَنت-

بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُرتگیں درشان ءِ تہ ءَ گُشتگ کہ بلوچ لبریشن آرمی ءِ سرمچاراں مستونگ ءِ ھِند اسپلنجی ءَ زورگیریں لشکر ءَ را اُرشے ءَ نِشانگ کُرتگ ، آئی سَوَب ءَ دُژمِن ءِ سے کارندہ ھما جاہ ءَ مُرتگ ۔

آئی ءَ گُشتگ کہ بی ایل اے ءِ سرمچاراں اے اُرش 24 اگست 2023 ءِ بیگاہ ءَ ماں اسپلنجی ءَ لونڈ بوز ءِ دمگ ءَ کُرتگ ، سرمچاراں دُژمِن ءِ کارندھاناں گرنیڈ لانچر ءُ ایدگہ مزنیں سِلاہاں گوں نِشانگ کُرتگ ۔چہ اُرش ءَ دُژمِن ءِ سے کارندہ مُرتگ ءُ کم چہ کم سے زدگ بُوتگ ۔

جارکشّ جیئند بلوچ ءَ گُشتگ کہ بلوچ لبریشن آرمی اے اُرش ءِ زمہ واری ءَ منّیت ءُ اے سوگِند ءِ پیلو ءَ کنت کہ کبزہ گیریں پاکستانی لشکر ءِ سرجمی ءَ دراھگ ءَ تاں مئے اُرش برجاہ بنت اِنت ۔

بلوچ آجوئی لوٹوکیں سلاہ بندیں گل بلوچ ریپبلکن گارڈ ءِ جارکش دوستیں بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ مئے سرمچاراں مروچی سبی ءَ زورگیریں پاکستانی پولیس پوج بمب اُرشے ءِ نشانگ کتگ –

جارکش ءَ گوشتگ کہ سرمچاراں سبی ءِ دمگ کڑک ءَ پولیس ءِ سر ءَ دزبمب اُرش ءِ کتگ تراک ءَ زورگیریں پولیس ءَ جانی ءُ مالی تاوان رستگ –

آئی ءَ گوشتگ کہ اے اُرش ءِ زمہ واری ءَ مئے گل منیت ءُ زورگیریں پاکستانی پوج ءِ بلوچستان ءِ تہ ءَ سرجمی ءَ در آیگ ءَ مئے اُرش برجاہ مان انت –