TBP Balochi

سربوتگیں ھالانی رِد ءَ بلوچستان ءِ دمگ مند ءَ ناشناسیں سلاہ بندیں مردماں پاکستانی پوج ءِ بنجاھی بنجل ءِ سر ءَ گوں راکٹ گولہ ءَ اُرش کتگ –

نزیکیں ھند ءُ دمگاں تیر ءُ تراکانی توار اشکنگ بوتگ- وھدیکہ پوج ءِ نیمگ ءَ ھم تیر گواری کنگ بوتگ ءُ پوج ءِ نیمگ ءَ چاریگی ڈرون ھم یل کنگ بوتگ –

بنداتی ھالانی رِد ءَ ھچ وڈیں جانی تاوان ھال سر نہ بوتگ وھدیکہ اُرش ءَ پد پوج ءَ نزیکیں ھند ءُ دمگ وتی انگر ءَ کتگ انت –

زانگ بہ بیت اے ھند ءُ دمگاں پاکستانی پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمہ واری ھچ گل ءَ نہ منّ اِتگ –

سربوتگیں ھالانی رِد ءَ پاکستانی پوج ءِ دست ءَ زورانسری آوار جنگ بوتگیں نودربر رھشون زاکر مجید ءِ گس ءَ ناشناسیں مردماں لُٹ پُل کتگ-

بلوچستان ءِ دمگ ھزدار ءَ زاکر مجید ءِ گس ءَ ناشناسیں مردماں دؤر کُتگ ءُ لٹ پُل کتگ ءُ گس ءِ سرجمیں ازباب گوں وت برتگ انت –

بیگواھیں زاکر مجید ءِ گھار ڈاکٹر شبانہ مجید ءَ لُٹ پُل ءِ سرجمیں ھال داتگ انت ءُ گوشتگ کہ گِس ءَ ھما وھد ءَ لٹ پُل کنگ بوتگ وھدیکہ گس ءَ کس نہ بوتگ، ناشناسیں مردماں گس ءِ کُبل پُروشتگ ءُ اودے سرجمیں سامان گوں وت برتگ انت کہ آیانی تہ ءَ سُھر ءُ دگہ گرانھادیں سامان بوتگ انت –

ڈاکٹر شبانہ مجید ءَ ڈنگی ءِ بگیری ءَ دمگی تانہ ءَ ارزی نبشتہ کنائیں اِتگ – ارزی ءِ تہ ءَ نبشتگ کنگ بوتگ کہ دزی ھما وھد ءَ کنگ بوتگ وھدیکہ شبانہ مجید وتی کار ءُ کھول ءِ ھمراھی ءَ شال ءَ نندوک بوتگ وھدیکہ گس ءَ کس نہ بوتگ ـ ارزی ءِ تہ ءَ نبشتگ کہ ناشناسیں مردماں گس ءَ دور کتگ ءُ اودے گرانھادیں سامان گون وت برتگ انت کہ آیانی تہ سُھر ھم مان بوتگ –

ڈاکٹر شبانہ ءَ گوشتگ ناشناسیں مردماں گِس ءِ تہ ءَ دزی کنگ ءَ پد گس ءِ ڈن مانداشتگ ءُ شتگ انت –

دمگی مردماں گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ گس ءِ نزیک ءَ سیاہ کانچیں گاڑی ءِ گندگ بوتگ بازیں مردمے ءِ گوشگ انت کہ دُزی ءَ پاکستانی پوج ءِ چیریں ادارھانی کارمند ھوار انت –

زاکر مجید ھشت جون سال دوھزار نُھ ءَ چہ مستونگ پڑنگ ءَ آوار جنگ ءُ بیگواہ کنگ بوتگ – آئی ءِ زورانسری آوار جنی ءِ بگیری ءَ آئی ءِ کھول یکشل ءَ زھرشانی کنگ ءَ انت – زاکر مجید ءِ گھار فرزانہ مجید ءَ وتی برات ءِ زور بیگواھی ءِ بگیری ءَ وی بی ایم پی ءِ ھمراھی ءَ شال تاں کراچی ءُ پدا اسلام آباد ءَ پیادگ پند بُراِتگ –

گوست ءَ زورانسری آوار جنگ بوتگیں بلوچ سیاسی رھشون ءُ باسکانی گساں پاکستانی پوج ءُ چیریں ادارھانی کارمند بیڑ برتگ آیانی کھول توپک ءِ زور ترسینتگ انت ـ وھدیکہ باز براں اے الزام ھم جنگ بوتگ کہ پوج ءُ چریں ادارھانی کشندہ ٹولیاں آیانی کھول ترسینتگ انت –

چہ بلوچستان ءِ دمگ کیچ ءَ ھال آیگ ءَ انت کہ یک مردمے پاکستانی پوج ءَ زورانسری آوار جتگ ءُ بیگواہ کتگ وھدیکہ دو سال ساری زورانسری آوار جنگ بوتگیں مردمے یل کنگ بوتگ –

گیشیں ھالانی رِد ءَ گوستگیں شپ ءَ پاکستانی پوج ءَ چہ تربت ءَ محمد خان ءِ خدا بخش نامی مردمے زورانسری آوار جتگ ءُ بیگواہ کتگ –

اھوالکار ءِ گوشگ انت کہ اے مرد بُنکی ءَ کیچ ءِ دمگ کولواہ شاپکول ءِ جھمنند انت کہ چہ اودا در اتکگ ءُ اے وھدی کیچ ءِ دمگ آسکانی بازار ءَ نندوک بوتگ وھدیکہ آ ٹیل ءِ باپاری ءَ گوں بندوک بوتگ کہ گوستگیں شپ ءَ پاکستانی پوج ءَ گوں وتی گاڑی ءِ ھمراھی ءَ آوار جتگ ءُ بیگواہ کتگ –

دومی نیمگ ءَ چہ شال ءَ ھال آیگ انت کہ پاکستانی پوج ءِ دست ءَ زورانسری آوار جنگ بوتگیں یک مردمے یل کنگ بوتگ –

یل کنگ بوتگیں مردمے نام محمد ایوب انت ـ محمد ایوب دسمبر ءِ ماہ ءَ سال دوھزار ءُ بیست ءُ یک ءَ پاکستانی پوج ءَ آوار جتگ بوتگ –

چہ شال ءَ دزکپتگیں ورنا ئے لاش مروچی کل کسارت کتگ-

گیشیں ھالانی رِد ءَ گوستگیں روچ ءَ شال ءِ دمگ کمبرانی دگ سر ءَ انگور ءِ باگ ءَ چہ دزکپتگیں بلوچستان ءِ دمگ ھُزدار ءِ جھمنندیں ورنا ئے لاش کھول ءِ دست ءَ داتگ، کھول ءَ لاش بُنکی ھنکین زھری ءَ کل کسارت کنگ بیتگ-

ورنائے لاش مروچی چہ شال ءَ گوستگیں سال ءَ 27 اکتوبر ءَ چہ مستونگ ءَ پاکستانی لشکر ءُ سادھیں پوشاکانی تہ ءِ کارندھاں بُنجاھی شھدگ ءَ چہ آوار جتگ ءُ ناشناسیں جاھے ءَ برتگ-

بیگواہ بوگ ءَ پد ورنا ئے درگت ءَ ھچ وڑیں ھال دز نہ کپتگ وھدے کہ گوستگیں روچ ءَ آئی ءِ لاش دزکپتگ-

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ پنجاہ ءُ شش روچ سرجم بوتگ انت –

ھمے وھد ءَ بی ایس او ءِ سرکماش جہانگیر منظور، بنجاھی رھشون بالاچ بلوچ، عبدالصمد بلوچ ءُ دگہ بنجاھی رھشوناں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

چہ زھرشانی بنجل ءَ گل ءِ کمک سرکماش ماما قدیر بلوچ ءَ وتی شنگ کرتگیں یک تامری کلوہ ءَ نور خاتون ءُ آئی ءِ زھگانی زورانسری آوار جنی ءُ زورانسری آوار جنگ بوتگیں گلام فاروق ءِ کوش ءِ بگیری ءَ زھرشانی ءِ جار جتگ –

آئی ءَ گوشتگ کہ نورخاتون ءُ آئی ءِ دو زھگانی زورانسری آوارجنی ءُ بیگواھیں غلام فاروق زھری ءِ درکانودی کوش ءِ بگیری ءَ وی بی ایم پی ءِ چیردستی ءَ سَے ستمبر ءَ یک شمبے ءِ روچ ءِ ادار سَے ءَ شال پریس کلب ءِ دیم ءَ زھرشانی کنگ بیت اِنت –

تامری کلوہ ءَ درسیں سیاسی پاٹی ءُ نودربر گلاں ھوار ھر تک ءُ پھناتاں سیادی داروکیں مردماں گوں لوٹ کنگ بوتگ کہ زھرشانی ءَ بھر بہ زور انت –

زانگ بہ بیت ھمے سال ءَ بیست ءُ ھشت اگست ءَ پاکستانی پوج ءَ شال ءَ یونائیٹڈ ھوٹل ءَ بیڑ برتگ ءُ چہ اودا نور خاتون ءُ آئی ءِ دو تپلیں زھگ بانڑی ءُ عبدالغفار زورانسری آوار جتگ ءُ بیگواہ کتگ انت –

وھدیکہ گوستگیں روچ ءَ شال ءِ شھر قمبرانی دگ ءَ یک جونے دست کپتگ کہ آئی ءِ کیسگ ءَ پجار کارڈ ءِ دست کپتگ کہ اودا آئی ءِ پجار گلام فاروق ء محمد وارس جھمنند تلاوان زھری میتگ ھزدار ءِ نام ءَ بوتگ کہ آ چہ مستونگ ءَ آوار جنگ بوتگ –

بلوچ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ گل ءِ آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ بلیدہ ءَ پاکستانی پوج ءِ سر ءَ اُرش ءُ میناز ءَ ڈمپر ءِ ماندارگ ءِ زمہ واری منّ اِتگ ءُ گوشتگ کہ پوج ءِ سر ءَ بوتگیں اُرش ءَ یک پوجی اپسرے ءَ ھوار چار کارمند مُرتگ انت –

جارکش میجر گوھرام ءِ رِد ءَ بلوچ سرمچاراں ءَ پنچ شمبے ءُ آدینگ ءِ میانی شپ ءِ یک ءُ چِل ءَ تُربت ءُ بلیدہ ءِ راہ ءَ سوراپ ءِ کنڈگ ءِ چیر ءَ سنگر گیپتگ ءُ پاکستانی پوج ءِ گاڑی ءُ پرپٹانی کاروانے ءِ سر ءَ اُرش کُرتگ کہ چہ ایشی ءَ دُژمنیں پوج ءِ یک اپسرے ءَ ھوار چار کارمند مُرتگ ءُ دو زدگ بوتگ انت –

جارکش ءِ رِد ءَ بلوچستان لبریشن فرنٹ ءِ سرمچاراں اے کار گل ءَ سر بیتگیں چیریں ھالے ءِ بنیاد ءَ آسر کُتگ – گل ءِ ھمے ادارہ ءَ اے دمگ ءَ پوج ءِ سُر ءُ پُرانی ھال داتگ انت کہ بی ایل ایف ءِ سرمچاراں دُژمن ءِ راہ بستگ ءُ گوں کاروان ءِ نزیک ءِ آھگ ءَ آئی ءِ سر ءَ اُرش کُتگ – اے اُرش ءَ ھما گاڑی نشانگ کنگ بیتگ کہ گاڑی ءَ پوج ءِ اپسر سوار بوتگ ءُ اے اُرش ءَ نوکین ءُ مزنیں سلاہ کارمرز کنگ بوتگ انت –

میجر ءِ رِد ءَ اے اپسر کاروان ءِ دْروشُم ءَ دمگ ءَ لشکرکشیانی تیاری ءِ چارگ ءَ روگ ءَ بوتگ کہ سرمچاراں نشانگ کتگ –

بی ایل ایف ءِ جارکش ءِ رِد ءَ مئے سرمچاراں سی ءُ یک اگست ءَ پنچ شمبے ءِ روچ ءَ میناز بلیدہ ءَ کودا واجداد ءِ پمپ ءِ نزیک ءَ ریاست ءِ شوربندیانی سر ءَ کار کنگ ءَ بوتگیں یک ڈمپرے ھم مانداشتگ – بلوچ سرمچاراں ریاست ءِ شوربندیانی سر ءَ کار ءَ بوتگیں مُزور ءُ ڈمپر ءِ ڈرائیور انسانی ھمدردی ءِ بنیاد ءَ کڈن کُتگ ءُ یل داتگ اَنت-

جارکش میجر گوھرام بلوچ ءِ رِد ءَ بی ایل ایف اے ھردو ارشانی زمہ واری ءَ منیت ءُ بلوچستان ءِ آجوئی ءَ بی ایل ایف ءِ اُرش برجاہ مان انت –

بلوچستان ءِ تیاب دپی دمگ گوادر ءَ چہ سر بیتگیں اھوالانی رد ءَ گوستگیں روچ ءَ یک مردمے ءَ وتکُشی کُتگ۔

وتکُشی کنوکیں مردمے پجار ملک ء عبدالغفور ءِ نامءَ چہ بیتگ۔

وئیل تیاب دپی شھر گْوادر ءِ جیونی ھنکین ءِ ھند ءَ دیم ءَ اَتکگ۔ کہ اود ءَ ورنایے ءَ وتی گُٹ ءَ لوپ بستگ ءُ وتی زند ھلاس کُتگ۔

البت وتکُشی ءِ سوب داں انگت زانگ نہ بیتگ ۔

یات بہ بیت کہ سرجمیں بلوچستان ءَ چہ وتکُشیانی وئیل ھمک روچی رد ءَ دیم ءَ پیداک اَنت۔

ھمے ھپتگ ءِ تہ ءَ اے وتکُشی ءِ سیمی وئیل اِنت چد ءُ پیسر آواران ءُ شال دمگ ءَ ھم دو وتکُشیانی اھوال دی بلوچستان پوسٹ ءَ سر بیتگ اَنت۔

ھندوستانی ازمکار ءُ کِنگ خان ءِ نام ءَ زانگ بیوکیں شاہ رخ خان نوک آیوکیں تامر جوان ءِ ٹریلر گوستگیں روچ ءَ شِنگ بیتگ۔

ٹریلر ھندی ءَ ھوار جتاھیں ھندوستانی دمگی زبانانی تہءَ شنگ بیتگ ءُ مزنیں کساس ءَ مردماں چارتگ ءُ دوست داشتگ۔

شاہ رخ جوان تامر ءِ ٹریلر ءِ تہءَ بازیں جتاھیں دروشمانی تہءَ گندگ بیت کہ یک نیمگءَ آ پوج ءُ پولیس ءِ پوشاکانی تہءَ اِنت ءُ دومی نیمگ ءَ یک ناشرکاری ءِ دروشم ءَ پیش دارگ بیتگ۔

تامر ءِ تہءَ شاہ رخ خان ءِ دیما ساوتھ ہندوستانی ازمکار وجے سیتوپتھی ولن ءِ کرد ءَ پیلو کنگ ءَ گندگ بیت۔ تامر ستمبر ءِ ماہ ءَ سینیماءَ جنگ بیت ءُ مردم گمان کنگ ءَ اَنت کہ تامر یک مزن شان ءُ باپار کنوکیں تامر ءِ بیت۔

زانگ بہ بیت بالی وڈ ءِ تامر مزنیں وھدے ءَ داں بے سوب بئیگ ءَ بیتگ اَنت اشانی تہءَ بازیں مزن نامیں ازمکارانی تامراں کمو ھم باپار نہ کُتگ ءُ مھلوک چہ اے تامراں دلپروش بیتگ اَت۔ بازیں مردمانی گُشگ ھمے بیتگ کہ مھلوک یکیں پئیمیں کسہ ءُ کارستاں چہ دلپروش اَنت پمیشکہ بالیووڈ تامر بے سوب بئیگ ءَ اَنت۔

بلے شاہ رخ ءَ گوں وتی تامر پٹھان ءَ یکبرے پدءَ بالی وڈ ءُ ھندی تامراں زند بکشاتگ پٹھان تامر ءِ سوبمندی ءَ پد مھلوک یکبرے پدءَ سینیما ءَ روگ ءَ اَنت۔ ءُ انی گدر ٹو ءَ ھوار او مائی گاڈ 2 ءُ راکی اینڈ رانی کی پریم کہانی ھم سوبمند بیتگ اَنت۔

سنی دیول ءِ نوکتریں تامر گدر ٹو ءَ داں مروچی بزاں سئمی ھپتگءِ تہءَ چارسدھشتاد دو کڑوڑ ءِ باپار کُتگ، ءُ گمان ھمیش اِنت کہ تامر پنچ سد کڑوڑ ءَ گیشتر باپار کنت۔

ھندوستانی تامر باپارءِ زانتکار ترن آدرش ءَ گُشتگ کہ سنی دیول ءِ تامر گدرٹو ءَ سئمی ھپتگ ءَ چارسد ھشتاد دو کڑوڑ ءِ باپار کُتگ ءُ پنچ سد کڑوڑ ءِ باپار ءِ نیمگ ءَ جُنزگ ءَ اِنت ءُ انگت ھم جوانیں دروشم پیش دارگ ءَ اِنت۔

ترن آدرش ءِ ردءَ گدر ٹو ءَ اولی ھپتگ ءَ 284.63 کڑوڑ دومی ھپتگءَ 134.47 ءُ سئمی ھپتگءَ داں انگت 63.35 کڑوڑ ءِ باپار کُتگ ءُ سرجمی ءَ 482.45 کٹ اتگ۔

زانگ بہ بیت گدر ٹو سنی دیول ءِ پیسرگیں تامر گدر ءِ دومی بھر اِنت، اولی تامر ھم وتی وھدے مزنیں تامرءِ بیتگ، ھاس کر سنی دیول ءِ ڈائیلاگ ءُ تامر ءِ سئوت ءُ کسہ ھم مھلوکاں دوست داشتگ اَنت۔ ھمے وڑ گدر ٹو ءَ ھم مھلوک دوست دارگ ءَ اَنت۔