TBP Balochi

مستونگ ءِ کوچکی دمگ درینگڑھ ملکو ءِ ھند ءَ ناشناسیں لاشے دزکپتگ-

بنداتی اھوالانی رد ءَ لاش سَے ءُ چار روچ کوھنینے کہ آئی ءِ گُٹ ءَ ساد مان کنگ ءُ کشگ بیتگ – لاش کوھن بوگ ءِ سبب ءَ ھراب بوتگ-

دزکپتگین لاش دمگی ھسپتال ءَ سر کنگ بیتگ-

شھید گلہ من وزیر ءِ کوش ٹوھیں تاوانے ، آ وتی راجدوستیں لچہ کاری ءِ پد ءَ مدام یات کنگ بیت۔ استاد واھد کمبر

بلوچ راھشون واھد کمبر بلوچ ءَ وتی شنگ کتگیں درشان ءَ گوشتگ پشتون ڈیھ دوستیں لچہ کار گلہ من وزیر ءِ شھیدی ءِ سر ءَ وتی درشان ءَ گْوشتگ نوک آبادی واک ءَ پہ وتی بدیں لوٹ ءُ واھگاں ورنائیں آشوبی لچہ کار گلہ من وزیر ءِ سر ءَ پہ آئی ءِ کشگ ءَ ارش کنائینگ ءَ پد آ پہ دارگ ءُ درمان ءَ چہ ڈیھ ءَ ڈن روگ ءَ داشتگ ، پہ وھد درمان نہ بیگ ءِ پد ءَ ورنائیں لچہ کار بیران بیتگ۔ آئی ءِ کوش ٹوھیں تاوانے ، چہ اے ھال ءِ اش کنگ ءَ ما دلپدرد ایں۔

آئی ءَ گْوشتگ گلہ من وزیر ءِ جانی تاوان ءِ سر ءَ من گوں سجھیں پشتون ءُ اوگان راجاں دلپدردی درشان کن آں۔ آ وتی ڈیھ ءُ راجدوستیں لچہ کاری ءُ لیکھی سیاست ءِ پد ءَ مدام یات کنگ بیت۔ پشتون ءُ چیردستیں راجانی ورنایاں آئی ءِ رندپداں روگ ءُ چیردستی ءِ بگیری ءَ وتی زْرمبشت دیم ءَ برگی اِنت۔

بلوچستان ءِ تیابدپی شھر گوادر ءَ ماں بیست ءُ ھشت جولائی ءَ بلوچ یکجھتی کمیٹی ءِ نیمگ ءَ بوھوکیں ’ بلوچ راجی مُچی‘ ءَ بھر زیرگ ءِ نیادانی درچ یکشل ءَ برجاہ اَنت-

بلوچستان ءِ جتا جتائیں جاھاں بلوچ یکجھتی کمیٹی ءِ باسکانی نیمگ ءَ تر ءُ تابانی ھواری ءَ اود ءَ مھلوک ءِ گون ءَ گند ءُ نندانی درچ برجاہ اَنت-

ھمے ڈول ءَ بلوچ یکجھتی کمیٹی ءِ نیمگ ءَ شنگ بیتگیں یک درشانے ءَ گوشگ بیتگ کہ بلوچ یکجھتی کمیٹی جھالاوان ریجن ءِ جتا جتائیں ھندان بی وائی سی ءِ باسکاں مردماں گون گند ءُ نند کتگ –

آئی ءَ گوشتگ ھزدار، نال ءُ سوراب ءَ بلوچ راجی مُچی ءِ درگت ءَ کارنر میٹنگز، وال چاکینگ ءُ موبلائزیشن بزانکہ سرپدی ءِ ھاتر ءَ نیاد بیتگ اَنت-

آئی ءَ گوشتگ گوستگیں روچ ءَ گڈانی ءَ ھم بلوچ یکجھتی کمیٹی ءِ باسکاں مھلوک ءَ گون گند ءُ نند کتگ ءُ بیست جولائی ءَ ماں گوادر ءَ راجی مُچی ءَ بھر زیرگ ءِ سرپدی دیگ بیتگ اَنت-

آئی ءَ گوشتگ گڈانی بازار ءَ یک پُر ایمنیں مارچے کنگ بیتگ ءُ پد ءَ گڈانی جتا جتائیں جاھاں دیوالانی سر ءَ بلوچ راجی مُچی نبشتگ کنگ بیتگ –

زامران ءَ ناشناسیں مردماں پاکستانی لشکر ءِ آپ ءِ سرکنوک نشانگ کتگ ءُ تباہ کتگ-

گیشیں اھوالانی رد ءَ بلیدہ ءِ ھند آرچن کور ءَ پوج ءِ نیمگ ءَ واٹر سپلائی مشینری ناشناسیں مردماں تباہ کتگ اَنت-

دمگی مردمانی رد ءَ اے واٹر سپلائی پوج ءِ بنجل ءِ نزیک ءَ بیتگ کہ ایشی ءِ زور ءَ پوج ءِ بنجل ءَ آپ سرکنگ ءَ بیتگ-

اُرشکاراں واٹر سپلائی ءِ مشینری ءُ سولت سسٹم تیرگواری کتگ ءُ تباہ کتگ انت-

واکداراں اے درگت ءَ دگہ اھوال دیم ءَ نیاؤرتگ اَنت- پوج ءِ راشن بروک ءُ دگہ مڈیانی بروک بلوچ سلاہ بندیں آجوئی لوٹوکیں گلانی اُرشانی نشانگ ءَ انت ءُ داں انگت ءَ اے اُرش ءِ زمہ واری کس ءَ پہ وت نہ زرتگ-

یک پیر مردے ءِ نمدی یے پہ وتی کَسان سالیں بچ ءَ

نبشتہ کار: تاھیر بلوچ

دی بلوچستان پوسٹ

منی چُک شھداد جان ترا چنکیاس ماہ ءُ سال گوستگ تو چہ من دُور شُتگ ئے، پہ وانگ ءُ زانگ ءِ ھاتِر ءَ، ترا مالوم اِنت من چِنکس ترا مارگ ءَ آں! وھدے کہ من تئی ھما کَسانی ءِ لیبواں گِنداں کہ ھَر وھد ءَ چہ مَسیت ءَ دیگر ءِ وھد ءَ موکل کُتگ اَت ئے لوگ ءَ ءُ گڑا تو وتی ھَمے لیبو زرت اَنت ءُ گوں میتگ ءِ بچَکاں شُت ئے درست پہ گوازی ءَ پَد ءَ بیگاہ ءِ وھد ءَ لوگ ءَ آتکگ اَت ئے ءُ وتی مات ءَ را گُشت کہ لُمّہ مَرچی مَن چَٹ بے وڑ ژند ءُ پنداں گڑا تئی مات ءَ تئی دست ءُ پاد چَہ سَری ٹیل ءَ چَرپ کُرت اَنت، پد ءَ دومی بیگاہ ءَ تو دُوبر اے درد ءُ دُور بیھال کُت اَنت،، ءُ دوبَر دیم پہ سَیل ءُ سواد ءَ پہ گوازی ءَ سر گِپت ئے تئی مات ءَ بزّگ ءَ ترا باز رند ءَ گُشتگ اَت منی بَچ شَھدادجان اگاں لیب ءَ رو ئے گڑا وتی ھیالداری ءَ بہ کن بلے تو آئی ءَ را ھچ بِھ نہ کُت پد ءَ دُوبر کہ بیگاہ ءِ وھد بوت تئی ھَما سَیل بِندات بُوت اَنت تئی مات ءَ اگاں کہ گوں تو جَاک ءُ سلوات بِندات بہ کُتیں،، گڑا مَن آئی ءِ دیم ءَ مِک بُوتان ءُ گُشتگ اَت کہ منی لاڑُک منی ءُ تئی اُمر نوں گوازی ءِ نہ اِنت گڑا تو زھگ ءَ پرچا نئیل ئے۔

منی گْونڈل تَرا یات بیت یک وھدے من ءُ تو یک بَرے چہ میتگ ءِ بازار ءَ روگ ءَ اَت ایں گڑا دیست چیزّے دَری مردم مئے میتگ ءِ کریم بکَش ءَ سک لٹ ءُ شاپ کَنگ ءَ اَت انت گڑا من چہ کَش ءُ کِرّ ءِ مردماں جُست گِپت کہ اے ویل ءِ سَوَب چے اِنت ؟ مردُماں پسّو دات کہ کریم بکش اناگت ءَ ایشانی اولاک ءِ دیم ءَ اتکگ گڑا ھَمے سبب ءَ ایشاں بیچارگ ءَ را لٹ ءُ شاپ ءِ آماچ کُتگ کہ تو چے ءَ مئے اولاک ءِ دیم ءَ اَتکگ ئے۔ تو کہ وھدے ایشانی زالمی دیست من ءَ ھَمے گُشت اگاں مَن مزن بُوت آں،، ھَمے دَری مردماں چہ ھلک ءَ کشان ءُ ایشاں داں ھَما وھد ءَ نئیلاں تانکہ چہ ایشاں وتی میتگ ءُ بازار ءِ مردُمانی زمین ءِ مال ءُ مڈّی پَچ نہ گِپتگ اِت اَنت۔

شھدادجان تو کسانی ءَ سکیں مردم دوستیں پُسگے اَت ئے من ترا ھَر وھد ءَ گُشت تئی ھَمے ھِلت تَرا یک روچے چہ مَن پُل اِیت ءُ دُور ءُ گِستا کَنت بلے تو منی ھَمے گُشتِن ھِچ بھ نہ کُت۔

منی بچ تو من ءَ اے بہ گُش ھِنکس وھد بیت تو مزنیں شھر ءَ شُتگ ئے پہ وانگ ءَ تو ھِچ من ءَ ءُ وتی مات ءَ را یات نہ کُرتگ،،!! ھَر وھد ءَ کہ چہ شھر ءَ تئی ھَم تبکے مِیتگ ءَ کہ اَتکگ، تئی مات ءَ ترا الم گیر آؤرتگ بلے ھِچ کَسے چہ تئی ھال ءَ سھیگ نہ اِنت ھَمے نِبشتانک ءِ میان ءَ پہ کَماش ءِ گُوانکو ءَ زَنگے کَیت ءُ ھَمے گُش اِیت ناکو مولا داد تو ھَبر ءَ ئے؟

ناکو گُش اِیت جی ھو واجہ مَن آں ؟ گُش اِیت مَن چہ مزنیں شھر ءَ گپ ءَ آں تئی زھگ شھداد منی ھَم تبک انت، بلے چیزُکے روچ بیت کہ شھداد ھَما انت کہ دیم پہ وتی وانگجاہ ءَ شُتگ دوبر واتَر نہ بُوتگ۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-

بلوچستان ءَ ھوار کراچی ءَ بلوچ یکجھتی کمیٹی ءِ نیمگ ءَ ماں بیست ءُ ھشت جولائی ءَ گوادر ءَ ’ بلوچ راجی مُچی ‘ ءِ نام ءَ بوھوکیں مُچی ءِ ھاتر ءَ نیادانی درچ برجاہ اِنت-

گوستگیں روچ ءَ شال، گوادر، کیچ ءُ کراچی ءَ ماں راجی مُچی ءِ ھاتر ءَ مھلوک سرپدی ءُ بھر زیرگ ءِ دزبندی کنگ بیتگ اَنت-

چِد ءُ پیش ماں شال ءَ ھم زَھیر بلوچ ءِ یل کنگ ءِ زھرشانی ءِ مُچی ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءَ مھلوک ءَ راجی مچی ءَ بھر زیرگ ءِ دزبندی کتگ-

زانگ بہ بیت بلوچ یکجھتی کمیٹی ءَ ماں گوادر ءَ بیست ءُ ھشت جولائی ءَ پاکستانی زُلم ءُ بلوچ چکچینی ءِ ھلاپ ءَ یک مزنیں مُچے ءِ کنگ ءِ جار پرینتگ بیتگ –

روکپتی بلوچستان ءَ ایرانی لشکر ءَ یک گاڑی یے سر ءَ تیرگواری کتگ ءُ چریشی ءَ گاڑی ءَ دومی مساپر بریں گاڑی ءَ گوں ٹکر وارتگ پنچ مردم بیران بیتگ اَنت-

گیشیں اھوالانی رد ءَ روکپتی بلوچستان ءِ دمگ رودبار ءَ ایرانی لشکر ءَ راہ ءَ روکیں تیل کشیں گاڑی یے سر ءَ تیرگواری کتگ ءُ چریشی ءَ چہ دو زھگان ھوار پنچ مردم بیران بیتگ اَنت-

اھوالانی رد ءَ وئیل رودبار ءَ بھادر آباد ءَ کھنوج ءِ میان ءَ بیتگ کہ اود ءَ گاڑیاں آس کپتگ ءُ چریشی ءَ پنچیں کس ستکگ ءُ بیران بیتگ اَنت-

شوھاز ءُ نگد ءُ چکاس ءِ مانا

نبشتہ کار: شاھد اھمد

چارمی بَھر

دی بلوچستان پوسٹ

پٹ ءُ پول ءِ لیکہ ھاسیت ءِ بابت ھما کَدر ءَ انت کہ آئی ءِ بنیاد ءَ ھر وڑیں پٹ ءُ پول ءَ را شر گشگ بیت۔ پٹ ءُ پول ءِ ھنر ھما لیکہ اَنت کہ زانتکاراں پہ جوانیں پٹ ءُ پولے ءَ بیان کتگ اَنت، آ چہ رند ءِ نکاتانی دروشم ءَ گوں تھلیں رنگے ءَ بیان کنگ بنت:

۱: جیڑہ(سرھال) پٹ ءُ پول ءِ اولی گام یک جیڑھے ءِ گچین کنگ اِنت۔ ایشی ءِ بید ءَ پٹ ءُ پول ءِ گپ نہ بیت۔ پٹ ءُ پول ءِ کارمرز بوگ ءِ ھساب ءَ گچین کتگیں جیڑھ ءِ سر ءَ بندوک اِنت۔ ھرچی کہ جیڑہ گْونڈ ءُ نامدار بہ بیت پٹ ءُ پول گیشتر پائدگ مند بیت۔

پہ اے مول ءُ مراد ءِ سرجم کنگ ءَ پٹ ءُ پولکار ءَ جیڑہ ءِ شریں وڑے ءَ پٹ ءُ پول کنگی اِنت کہ ایشی ءِ سر ءَ کار کنگ ءِ زلورت اِنت یا انّا۔ پمیشکا پٹ ءُ پولکار ءَ اے جیڑھانی سرجمی ءَ پدر کنگی اِنت کہ رند ءَ پیداکیں اڑ ءُ جنجال ءِ جیڑہ بندات ءَ چہ (کنٹرول) کنگ بہ بنت۔

۱: آ جیڑہ ءِ بارو ءَ چے ءُ چنکیاس زانت؟ ۲: کار ءِ دروشم ءُ کساس چے اِنت کہ چہ ایشی ءَ گیش کہ واکی ھمے بُنگپ جیڑہ ءِ سر ءَ اِنت؟ ۳: دگہ مردماں اے جیڑہ ءِ بابت ءَ چے جیڑ اِتگ ءُ چے وڑیں رد اَمل پیش داشتگ؟

۴: زاناں دگہ مردماں اے جیڑہ ءِ سر ءَ پٹ ءُ پول کتگ ءُ راہ ءُ درے رستگ؟ اگاں ھست گڑا آسر چے بوتگ اَنت؟ ۵: اے آسرانی رژنائی ءَ یا اے مردمانی سوجاں دیم ءَ دارگ ءَ ھمے جیڑہ ءِ سر ءَ گیشتر پٹ ءُ پول کنگ ءِ گنجائش ھست؟

۶: پٹ ءُ پولکار ءَ اے گپ ھم پدر کنگی اِنت کہ اے بابت ءَ گوں سیادی داروکیں مواد چہ آئی ءِ مستندیں وسیلگاں زورگ بوتگ یا بس چہ راجدپتری روانی ءَ ابید پیش کنگ بوتگ۔ اگاں سبب ءِ راستی ءِ ذمہ وار مہ بنت ءُ مواد بے دستاویزی روانی ءَ دیم ءَ آرگ بہ بیت گڑا آئی ءِ راستی شکی بیت۔

اے جیڑہ ءِ گچین کنگ ءِ ھاتر ءَ پٹ ءُ پولکاراں رند ءِ وسیلگ ءِ سوج داتگ: ۱۔ پٹ ءُ پولکار ءَ پیسر ءَ نبشتہ کتگیں شنگ بوتگیں پٹ ءُ پولی کاگدانی وانگ ءُ زانگ لوٹ اِیت۔

۲: جتا جتائیں سرھالانی وانگ ءِ وھد ءَ ھمگرنچیں جیڑھاں نوٹانی دروشم ءَ رکّینگی اَنت۔ ۳: آرٹ ریسرچ ءِ تہ ءَ ھواریں مردماں گوں اے جیڑہ ءِ سر ءَ گپ ءُ تران کنگ۔ ۴: ھوالہ کتابانی وانگ۔ ۵: چہ گچین کُتگیں سرھال ءِ واست ءَ وتگندی مراگش و نبشتانک ءُ گُشتانکانی ءِ سر ءَ نگدی چمشانک ءَ چار ءُ تپاس کنگ۔ ۶: گوں سیادی داروکیں ادارھانی سروک ءُ دگہ باسکاں گپ ءُ تران کنگ۔ ۷: پٹ ءُ پولی کار ءَ پیسر ءَ ھواریں استاد ءُ نودربراں گوں گند ءُ نند ءُ اے جیڑھ ءِ سر ءَ گپ ءُ تران کنگ۔

روان اِنت۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

لٹ ءُ کُٹانی دیمپانیں بلوچستان

ٹی بی پی شونگال

دردناکی ءَ گوں گوزوکیں بلوچستان، اود ءَ ھمک روچ ریاستی ادارھانی نیمگ ءَ اے دابیں وئیل ودگ ءَ اَنت، کہ چریشی ءَ سرجمیں بلوچ چاگرد سانمند بوان اِنت – یازدہ جون ءَ زَھیر بلوچ ءِ یل کنگ ءِ واستا سریاب دگ شال ءَ دراتکگیں روانک ءِ سر ءَ پولیس ءَ تیرگواری ءُ شیلنک کتگ ءُ بازیں مردم زدگ کتگ ات اَنت ءُ زھرشانی کنوک ترندیں رنگے ءَ لٹ ءُ کٹ کنگ بیتگ ءُ زالبولاں ھوار سدانی کچ ءَ زھرشانی کنوک دزگیر کنگ بیتگ ات اَنت-

بلوچستان ءَ پاکستان پیپلز پاٹی ءِ واکداری اِنت ، پاٹی ءِ سروکاں بلوچستان ءَ یکشل ءَ تر ءُ تاب کتگ ءُ ساپ ءُ تچکیں سیاست کنگ ءِ درشان ءَ کنگ ءَ اَنت- ءُ پی پی پی ءِ سروک ءُ مھتر ءِ پاکستان آصف علی زرداری بلوچانی جیڑہ ءَ پُر ایمنی ءُ گپ ءُ ترانی ڈول ءَ گیشنگ ءِ وکالت ءَ کنگ ءِ گپ ءَ کنت اِنت بلے زورانسری آوار جنی ءِ واستا زھرشانی کنوکیں بلوچ زالبولانی سر ءَ لٹ ءُ کٹ ءُ دزگیری ءَ چہ زانگ بیت اِنت سرکاری گپ ھُشکیں ٹاپار اَنت –

ریاست ءِ پالیسی سازیں ادارہ سرپد بوگ ءِ نیمگ ءَ بے تھمبل اَنت جھلانکداریں سزایانی دیگ ءَ آ بلوچ گھگیری ءَ زیر دست کت نہ کن اَنت – بلوچستان ءَ دو دھکاں گیش زوراکی ءِ زور ءَ بلوچ گھگیری ءِ ھلاس کنگ ءِ پالیسی بندگ بیتگ بلے بلوچ راجی ادارہ ترندیں مشکلاں ابید ھم آجوئی ءِ زرمبشت ءَ دیم ءَ جنزینگ ءَ سوبمند بیتگ اَنت-

بلوچستان ءِ اڑوکی سرکار ءِ گیر سنجیدگی ءِ گامگیج ءُ پُرایمنیں زرمبشت ءَ زوراکی ءُ لٹ ءُ کٹانی زور ءَ ھلاس کنگ ءِ پالیسی، بلوچستان ءِ جاورانی ناگیگی ءِ سبب جوڑ بیت اِنت ءُ بلوچ زالبولانی سر ءَ لٹ ءُ کٹ ءَ بلوچستان ءِ ایمنی ءِ واب ءِ گندوک بس ھم چمبندی ءِ گمان انت – ریاست ءِ اے وڑیں پالیسی کہ جھلانکدار ءَ بگر سزا ءُ زوراکی ءِ ھلاپ ءَ زرمبشت گیش چِست ءُ برانز گپت اِنت –