TBP Balochi

چہ شال ءَ سر بیتگیں اھوالانی رد ءَ پاکستانی پوج ءِ دست ءَ آوار جنگ بیتگیں بلوچ زالبول نورخاتون گوں وتی کسان سالیں زھگاں یل بیتگ-

وائس فار بلوچ مسنگ پرسنز ءَ آئی ءِ یل بیگ ءِ ھال راست کتگ –

زانگ بہ بیت بیست ءُ ھشت اگست ءَ سیکورٹی پورس ءَ شال ءِ دمگ یونائیٹڈ ھوٹل ءَ بیڑ برتگ ءُ اود ءَ جاڑیگیں سبی بدراکے جھمنند بلوچ زالبول نورخاتون، زھگ عبدالغفار ءُ آئی ءِ جنک بانڑی دزگیر کتگ ءُ ناشناسیں جاھاں برتگ انت کہ آئی ءِ یل کنگ ءِ ھاتر ءَ مروچی تربت ءَ زھرشانی کنگ ھم بیتگ-

چہ شال ءَ پاکستانی پوج ءِ دست ءَ آوار جنگ ءُ بیگواہ کنگ بیتگیں بلوچ زالبول نورخاتون ءُ آئی ءِ کسان سالیں زھگانی زورانسری آوار جنی ءِ ھلاپ ءَ تربت ءَ سول سوسائٹی ءِ نیمگ ءَ زھرشانی کنگ بیتگ-

ریاست اگاں بلوچ نسل کُشی ءَ دزکش نہ بوت گڑا ما دگانی سر ءَ سرکپ ایں ءُ وتی ننگ ءُ ناموس ءِ بے پردگ کنگ ءِ ھساب گرگ بیت اِنت اے لیکھانی درشانی تربت پریس کلب ءِ دیم ءَ زھرشانی کنوکاں تران ءِ میان ءَ گوشتگ انت-

تربت سول سوسائٹی ءِ نیمگ ءَ بیسگ ءُ ھشت اگست ءَ شال ءِ دمگی ھوٹل ءَ نور خاتون ءُ آئی ءِ کسان سالیں زھگ عبدالغفار ءُ بانڑی ءِ ابید ارزی ءَ دزگیری ءُ زورانسری آوار جنی ءِ ھلاپ ءَ زھرشانی کنگ بیتگ-

زھرشانی ءَ تربت سول سوسائٹی ءِ سروک گلزار دوست ءُ انسانی ھکانی کمیشن ءِ باسک مھمد کریم گچکی ءَ تران کتگ-

زھرشانی کنوکاں تران کنان ءَ گوشتگ زرینہ مری، نور جان، ماھل، رشیدہ، شھناز، ثناء ،ھمیدہ ءَ ھوار آوار ءِ دگہ ھنداں ھم ریاستی پورس ءَ بلوچ جھلانکداریں سزایانی نشانگ کتگ انت- اے وڑیں کم پِٹیں وئیلانی ھلاپ ءَ بلوچ راج سیاسی گھگیری ءَ ترند کنگ ءِ زلورت اِنت اگاں ناں گڑا مئے زالبول ھمے داب ءَ چست کنگ ءُ کشگ بنت-

آیاں گوشتگ زرینہ مری ءَ بگر داں مروچی نور خاتون ءِ دزگیری ءِ زورانسری آوار جنی بلوچ دودمانانی لگتمالی ءِ بروبری اِنت – ریاست ءَ وتی پالیسی مٹ کنگ لوٹ اَنت – زالبول، زھگ ءُ نودربرانی یکشلیں ترسینگ ءَ بلوچستان ءَ بے چینی ءُ بد امنی گیش بوتگ –

آیاں گوشتگ ھمک روچ بلوچستان ءَ سیکورٹی ءِ نام ءَ مردمانی آوار جنگ ءُ بیگواہ کنگ ءَ اَنت کہ اے سنگینین گلتی یے-

بلوچستان ءِ دمگ کیچ ءَ ھال اِنت کہ گاڑی سواریں سلاہ بندیں مردماں دو ورناہ آوار جنگ ءَ پد بیگواہ کتگ اَنت-

دوئیں ورناہ کیچ ءِ دمگ چہ تجابان ءَ دو گاڑیاں سوار سلاہ بندیں مردماں دو ورناہ آوار جنگ ءَ پد بیگواہ کتگ اَنت- بیگواہ بیتگیں ورناھانی پجّار قاسم ء ڈاکٹر سمد ءُ میر خان ء شاہ بیک ناماں چہ بیتگ اَنت-

دمگی مردمانی رِد ءَ دوئیں گوستگیں روچ ءِ بیگاہ ءِ وھد ءَ گاڑی ءَ سواریں سلاہ بندیں مردماں آوار جتگ ءُ برتگ اَنت چریشی ءَ پد آیانی درگت ءَ ھچ وڑیں ھال نیست-

زانگ بہ بیت کہ بلوچستان ءَ بلوچ راجدوست ھمے بھتام جنگ ءُ آھگ ءَ اَنت کہ پاکستانی پوج ءَ سرجمیں بلوچستان ءَ سلاہ بندیں ٹولی جوڑ کتگ کہ بلوچانی آوار جنگ ءُ کُشگ ءَ ھوار اَنت ، وھدے کہ آیاں پوج ءِ سرجمی ءَ کُمک گون ایں –

بلوچ اسٹوڈنس ایکشن کمیٹی ءِ نیمگ ءَ ماں پنجگور ءَ نمیرانیں صباء ءِ یات ءَ صبا لٹریری فیسٹول ءِ برجم دارگ بوگ ءَ انت –

اے مراگش ھمے سال ءِ چار ستمبر ءَ دو شمبے ءِ روچ ءَ ماں پنجگور ءَ ڈیجیٹل لائبریری، مکران یونیورسٹی کلم چار راہ ءِ نزیک ءَ برجاہ دارگ بوگ ءَ انت –

اے درگت ءَ آیانی گوشگ ات کہ پنجگور ءَ وانگ ءُ زانگ چاگرد ھست ایں آ سک نزور انت دومی اے مراگش ءَ صباء ءِ زند ءُ ازم سر ءَ گپ بیت، ترانکار تران کن انت، پینل ڈسکیشن، ٹیبلو ھم کنگ بیت انت –

آیانی گوشگ ات کہ اے فیسٹیول ءَ کتاب اسٹال جنگ بیت ءُ آرٹ ایگزیبیشن بیت ـ

زانگ بہ بیت پنجگور ءَ بساک ءِ نیمگ ءَ اے دومی مراگش انت چدو پیسر سال دوھزار بیست ءَ یکے بوتگ ءُ اے دومی مراگش انت –

کاؤنٹر ٹیریرزم ڈیپارٹمنٹ ءَ واشک ءُ شال ءَ دو جتا جتائیں بیڑانی تہ ءَ ھشت مردمانی دیم پہ دیمی جنگ ءِ ٹاہ داتگ-

کاؤنٹر ٹیریرزم ڈیپارٹمنٹ ءَ وتی درشان ءَ ٹاہ دیان ءَ گوشتگ کہ بلوچستان ءَ دو انٹیلیجنس بیسڈ آپریشناں ھشت ناشرکار کشتگ اَنت-

جارکش ءِ رد ءَ سی ٹی ڈی بلوچستان ءِ رد ءَ اولی بیڑ واشک ءِ ھند بسیمہ ءَ ترندیں تیرگواری ءِ آسر ءَ پنچ مردم کشتگ انت کہ ایشانی توک ءَ سَے مردم تچوکیں ھمراہ گپتگ انت ءُ انگت ءَ پٹ ءُ پولی بیڑ برجاہ اِنت-

جارکش ءَ گوشتگ شال ءَ بیوکیں دومی بیڑ ءَ ترندیں تیرگواری ءَ پد ناشریں گل دائش ءِ سَے باسک کُشتگ انت ءُ ناشرکارانی بنجل ءَ چہ یک ماھے ءَ پیش شال ءَ آوار جنگ بیتگیں ابوبکر سلامتی ءَ پچ گپتگ-

جارکش ءَ ٹاہ دیان ءَ گوشتگ کپ کشگ بیتگیں مردمانی بنجلاں بازیں کچے ءَ سلاہ ءُ گولہ دز کپتگ اَنت ءُ ایشانی پٹ ءُ پول برجاہ اِنت-

واشک ءَ کُشگ بیتگیں چار مردمانی پجار مھمد یاسین، فھد علی، جمال دین ءُ عبید اللہ ءِ ناماں زانگ بیتگ اَنت ءُ یکے ءِ پجار نہ بوتگ-

دمگء مردمانی رد ءَ گمانی رنگ ءَ اے مردم پیسر ءَ دزگیر بیتگیں بیتگ اَنت کہ سی ٹی ڈی ءَ دروگیں جنگ ءِ نام ءَ کشتگ ءُ چگل داتگ انت بلے داں انگت ءَ اے درگت ءَ گیشتریں اھوال آیگ ءِ ودار اِنت-

سی ٹی ڈی ءُ دروگیں جنگ:

بلوچستان ءَ سی ٹی ڈی ءِ بیڑ شکی گوشگ بنت اِنت بازیں بیڑ میڈیا ءُ کھولاں دروگ گوشتگ انگ بلے سرکاری وزیر ءُ واکدار اے بیڑانی پلامرزی ءَ کنگ ءَ گندگ کاینت-

لھتے وھداں بلوچ راجدوست ءُ انسانی ھکانی گل سی ٹی ڈی ءُ اے بھتام ءَ جنگ ءَ اَنت گوست ءَ ھما کار بلوچستان ءَ پاکستانی چیریں ادارہ ءُ پوج ءَ کرتگ اَنت مروچی آ کار ءَ سی ٹی ڈی کنگ ءَ انت ءُ ایشی ءِ لیکہ بلوچستان ءِ نیشنل پاٹی رھشون ءُ اسمبلی ءِ باسک سردار اختر جان مینگل ءَ کتگ بیتگ –

دو روچ ءَ پیش ھزدار زھری ءِ جھمنند غلام فاروق ءِ لاش شال ءِ ھند کمبرانی دگ ءِ کش ءَ دزکپتگ ات کہ گوستگیں سال ءِ بیست ءُ ھپت اکتوبر ءَ چہ مستونگ ءَ پاکستانی پوج ءُ لس پوشاکی کارمنداں بنجاھی شھدگ ءَ دزگیر کتگ ءُ ناشناسیں جاھاں برتگ ات-

گوستگیں سال ءِ جولائی ءَ پاکستانی پوج ءَ زیارت ءِ نزیک ءَ یک دیم پہ دیمی میڑے ءَ بلوچ لبریشن آرمی ءَ بندوکیں نُھ مردمانی دیم پہ دیمی کُشگ ءِ ٹاہ داتگ ات بلے پد ءَ آیانی پجار پیش ءَ بندیگیں مردمانی ناماں بیتگ ات اَنت-

زیارت وئیل ءِ ھلاپ ءَ بیگواھیں بلوچانی کھولاں پنجاہ روچ ءَ داں گورنر ھاؤس ءِ دیم ءَ نندانک داتگ ات پد ءَ وفاقی وزیر رانا ثنا ء اللہ ءَ ستکی ءِ پژدر ءَ شال ءَ ریڈ زون ءَ زھرشانی ھلاس کتگ ات کہ اود ءَ زھرشانی کنوکاناں کمیٹی ءَ ستک کتگ کہ زورانسری آوار جنیانی دارگ ءِ ھاتر ءَ گامگیج زورگ بیت اِنت ءُ دزگیر کتگیں مردم دروگیں جنگ ءِ نام ءَ کُشگ نہ بنت اِنت-

اے دابیں وئیلانی پژدر ءَ بیگواھیں مردمانی زھر گیش بوتگ ءُ انسامی ھکانی گلاں ھوار سیاسی پاٹی سرکار ءِ سر ءَ ایراد گرگ ءَ اَنت-

بلوچستان ءِ پرگینگ شال ءِ ھنکین ہزار گنجی ءَ شالکوٹ تھانہ ءِ ھندءَ پولیس موبائل ءِ سر ءَ ناشناسیں مردماں دستی بمب ءَ گوں اُرش کُتگ۔

تراکے آسرءَ دو پولیس کارمند سک ٹپیگ بیتگ اَنت کہ آ ھسپتال ءَ برگ بیتگ اَنت۔

وئیل ءَ پد گیشتریں لشکریانی ٹولی سر بیتگ اَنت ءُ وئیل جاہ ءُ کَش کِری دمگاں دگ ءُ راہ بند کُتگ اَنت اِش ءُ ترندی کُتگ اِش۔

روکپتی بلوچستان ءَ تیل کشیں مھلوک ھمک روچ مرگ ءِ اجل بیگ ءُ پیداک اَنت آیاں پہ مرگ ھمک روچی ڈول جوڑ بوتگ –

سر بیتگیں ھالانی رد ءَ روکپتی بلوچستان ءِ دمگ سراوان ءُ سوران ءِ میان ءَ گوستگیں روچاں وئیل ءِ آماچ بوتگیں ورنا ءَ گوستگیں روچ ءَ ما نادراہ جاہ ءَ وتی ساہ داتگ–

وئیل ءِ آماچ بوتگیں ورنا ءِ پجار 18 سالی ئیں طلھہ اللہ دادزئی ء زاکر جھمنند پسکوہ کتوران سراوان ءِ نام ءَ زانگ بیتگ ات-

اے گوستگیں دو روچ ءَ پیسر ماں سراوان ءِ سوران ءِ دوری ءَ بیست ءُ پنچ کلو میٹر ءَ دور مرگ ءِ اجل کشیں وئیل ءِ آماچ بوتگ ات-

مرگ پہ تیل کشاں یک ناوشین کسھے جوڑ بوگ ءُ آیانی دیم ءَ گردگ ءَ اِنت ھمک روچ یک ناں یک گاڑی الم وئیل ءِ آماچ بیت اِنت ءُ آئی ءَ سواریں مردم زدگ ءُ بیرانی ءِ دیمپان بنت اِنت-

وئیل ءَ گوشگ بیتگ کہ طلھہ ماں راہ ءَ وتی پرپٹ ءَ سوار بیتگ ءُ روگ ءَ بیتگ کہ آئی ءَ را گاڑی ءَ ٹکرے جتگ ءُ چریشی ءَ چہ آ زدگ بیتگ ءُ آ سراوان ءِ نادراہ جاہ ءَ برگ بیتگ ءُ اود ءَ آئی ءَ وتی ساہ داتگ انت-

تیل کشی روکپتی بلوچستان ءَ ھما جان کُشین کار اِنت رودراتکی ءُ روکپتی بلوچستان ءِ ھمک دویں دیمانی مردم مرگ ءِ دیمپان اَنت ھمود ءَ مرگ پراھیاں پہ دگ ءِ وئیل ءِ آماچی ءَ کیت اِنت ھمود ءَ سیمسری ءِ نام ءَ پھازوکیں لشکر ءِ تیرانی آماچ بنت ءُ تیل کش مرگ ءِ دیمپان بنت-

اے لاپ ءِ والینگی ءَ آیاں الم مرگ ءِ گرانیں کنڈگ ءَ گوزگی اِنت ءُ چریشی ءَ پد آ مرگ ءِ اے گرانیں ساھت ءَ بُر ات کن اَنت-

وائس فار مسنگ پرسنز آف سندھ ءِ پریس سیکریڑی سسی لوہار ءَ نوکتریں زورانسری بیگواھیانی سرءَ وتی درشان شنگ کنان ءَ گُشتگ کہ 30 اگست ءَ زورانسری بیگواھیانی میان اُستمانی روچءَ سرجمیں سندھءَ زھرشانی کنگ ءَ ابید ھم پاکستانی لشکریاں ریاستی بیڑ برجاہ داشتگ اَنت۔

آئی ءَ گُشتگ کہ گوستگیں روچاں پاکستانی چیریں ادارگ ءُ پولیس ءَ سندھ شھدربرجاہ ءِ کانود ءِ تکءَ سیادی داروکیں نودربر ساجن ملوکھانی چہ حیدرآباد ءَ وتی میتگ ءَ روگ ءِ وھدءَ دزگیری ءَ پد زورانسری بیگواہ کُتگ اِش وھدیکہ چدوپیسر ھم ھمے یکیں کھولے دگہ دو مردم راول ملوکھانی ءُ نعیم ملوکھانی چہ قاضی احمد نوابشاہ ءُ ٹںڈو آدم ءَ چہ دزگیر کنگ ءَ پد زورانسری بیگواہ کُتگ اِت اَنت۔

درشانے تہءَ گُشگ بیتگ کہ پاکستانی لشکری سندھ ءِ تہءَ مردمی اگبالانی لگتمالیانی ءُ زورانسری بیگواھیانی تہءَ روچ پہ روچ گیشی کنگ ءَ اِنت۔ کہ اشی ءِ سرءَ ما ایمنسٹی انٹرنیشنل، اقوامِ متحدہ ءُ دراھیں جھانی ادارگانی دیما وتی کیس ءَ ایر کنان ءَ پیداک اِنت ءُ اے جیڑہ ءِ سرءَ یک برے پدءَ جھانی گلاں گوں دزبندی کنیں کہ آ سند ءُ بلوچستان ءَ پاکستانی لشکریانی گیر انسانی کرد ءُ انسانی اگبالانی لگتمالیانی سرءَ ترندیں نوٹس بہ زیر اَنت ءُ جھانی زور نہ دئینت۔

کیچ ءِ دمگ مند ءَ آدینگ ءِ بیگاہ ءَ راکٹ یک لوگے ءِ سر ءَ کپتگ اَنت، راکٹ لوگ ءِ سر ءَ کپگ ءَ دو زالبولاں ھوار سَے مردم زدگ بیتگ اَنت-

دمگی مردمانی رد ءَ پوج ءِ بنجل ءِ سر ءَ اُرش ءِ وھد ءَ گمانی رنگ ءَ ہوج ءِ پسھی کاروائی ءِ وھد ءَ یک گولھے لوگے ءَ کپتگ –

زانگ بہ بیت اے وئیل ءَ پیسر ھمے دمگ ءَ سلاہ بندیں مردمانی نیمگ ءَ پاکستانی پوج ءِ بنجاھی بنجل ءِ ترندیں اُرشے کتگ بیتگ-

چہ ھرنائی ءَ پنجاب جھمنندیں پنچ مردم سلاہ بندیں مردماں آوار جتگ اَنت-

ٹی بی پی نیوز پتر ءَ دزکپتگیں ھالانی رِد ءَ بلوچستان ءِ دمگ چہ ھرنائی ءَ سلاہ بندیں مردماں پنجاب جھمنندیں پنچ مردم آوار جتگ ءُ گوں وت برتگ اَنت-

چمدیستانی رِد ءَ سلاہ بندیں مردمانی مزنیں کچے ءَ ھرنائی ءَ زیارت کراس ھند سر ءَ بُنجاھی شھدگ بستگ-

آیاں گْوشتگ کہ سلاہ بندیں مردماں شھدگ سر ءَ گاڑیاں پٹ ءُ پول کنگ ءَ بیتگ اَنت وھدے ھمے میان پنچ مردم آوار جتگ ءُ گوں وت برتگ اَنت-

اے مردمانی درگت ءَ گْوشگ بوگ ءَ اِنت کہ آ پنجاب ءِ جھمنند اَنت بلے تنی سرجمیں ھال آھگ ءَ پش کپتگ اَنت-