TBP Balochi

تربت ءَ زورانسری بیگواھیں مردمانی کھول ءِ زھرشانی ئیں گدان دمگی انتزامیہ کارگس دیم ءَ چارمی روچ ءَ ھم برجاہ-

نندانک ءَ ھک دے تھریک، بی ایس او ءِ گوستگیں راھشوناں ھوار سیاسی چاگردی جُھدکاراں یکجاھی درشان اِتگ-

بلیدہ ءَ ھوار کیچ ءِ جتاجتائیں دمگاں چہ بیگواھیں مردمانی کھول گوستگیں چار روچاں چہ وتی دوستناکانی یل کنائینگ ھاتر ءَ دمگی انتزامیہ کیچ ءِ کارگس دیم ءَ زھرشانی ئیں نندانک داتگ ءُ نشتگ اَنت، نندانک ءَ چہ بلیدہ ءَ سیادی داروکیں مسلم عارف، فتح میار، محمد بلوچ ءِ کھول ءَ اَبید چہ آپسر تربت ءَ سیادی داروکیں جھانزیب فضل، چہ پیدارک ءَ سیادی داروکیں میران حسین، سمیر نعمت اللہ بلوچ، شے کھن ءِ جھمنند ڈاکٹر رفیق بلوچ، ھمے وڑ نثار کریم، حیات سبزل ءُ ولی محمد ءِ کھول ھم زھرشانی ئیں نندانک ءَ ھوار اَنت-

نندانک ءِ چارمی روچ ءَ بی ایس او ءِ گوستگیں چئیرمین کامریڈ ظریف رند، ھک دے تھریک ءِ دمگی چیئرمین حاجی ناصر پلیزئی، مولانا نصیر احمد. سعید جمعہ ، صادو فتح، داد جان رند ءُ دگر کھول گدان ءِ تر ءُ گرد ءَ اَتکگ اَنت آیاں یکجاھی درشان ءِ کتگ، وھدے کہ نندانک ءَ بی ایس او پجّار ءِ دمگی سروک یاسر بیبگر ءُ ورنا ایں چاگردی باسک حمید بلوچ ھم ساڑی بیتگ-

زھرشانی گدان ءَ نشتگیں کھولانی لوٹ اِنت کہ آیانی دوستناک اگاں میاربار اَنت گُڑا آیاں ڈیھی کانود رد ءَ آمیدگس ءَ پیش بہ کن اَنت، زورانسری بیگواہ کنگ ڈیھی کانود ءُ راھبندانی بگیری اِنت اے مارا کبول نہ اِنت ما اشی ءِ بگیری ءَ جُھد کن ایں-

بلوچستان ءِ جتاجتائیں دمگ کیچ ءُ ھاران ءَ پاکستانی چیریں ادارہ ءُ ڈیتھ اسکواڈ کارمندانی دست ءَ چار مردم آوار جنگ ءَ پد بیگواہ کنگ بیتگ اَنت ءُ پد ءَ دو یل کنگ بیتگ-

اِھوالکار رِد ءَ یکشمبے چاردہ جولائی دوھزار چار ءَ کیچ ءِ بُنجاھی شھر چہ تربت ءَ پاکستانی پوج ءِ چیریں ادارھانی چیردستی ءَ کارکنوکیں ڈیتھ اسکواڈ ءِ کارمنداں یک ورنایے زورانسری آوار جتگ آئی ءِ دست ءُ پاد بستگ اَنت گاڑی ءَ مان کتگ ناشناسیں جاھے ءَ برتگ-

آوار جنگ بیتگیں ورنا ءِ پجّار سراج ء شفی محمد جھمنند نودز کیچ نام ءَ چہ بیتگ-

اِھوالکار رِد ءَ اے ورنا ھما وھد ءَ ڈیتھ اسکواڈ کارمنداں آوار جتگ وھدے آ ھوٹل ءَ ورگ ورگ ءَ بیتگ-

ھمے وڑ گوستگیں روچ ءَ بلوچستان ءِ دمگ ھاران ءَ پاکستانی پوج ءُ ادارھانی کارمنداں بیڑبرتگ ءُ لشکر کشی کنان ءَ سے مردم زورانسری آوار جتگ ءُ گوں وت برتگ اَنت کہ آیانی پجّار حفیظ اللہ ء فضل محمد چنال، منظور احمد ء عباس یلانزئی، ضیاء اللہ ء فضل ء محمد چنال نام ءَ چہ بیتگ اَنت, اشی ءَ پد منظور احمد ءُ ضیاء اللہ یل کتگ اَنت-

ھالانی رِد ءَ سئیں مردمانی سیادی ھاران ءِ دمگ چہ زرد گواش ءَ اِنت وھدے کہ اے وھد ءَ اش ھاران ءِ شھر ءَ کبدانی میتگ ءِ نزیک ٹینکی دمگ ءَ اِنت-

زانگ بہ بیت بلوچستان ءَ زورانسری آوار جنی ءِ دْرچ یکشلہ برجاہ ءَ اِنت یک نیمگے زورانسری آوار جنی ءِ گر ءُ دار ءُ بیگواھیں مردمانی یل کنائینگ ءَ بلوچستان ءِ تیاب دپی شھر ماں گوادر ءَ بیست ھشت جولائی ءَ یک راجی مُچی یے برجم دارگ بیگ ءَ اِنت ءُ دومی نیمگ ءَ آوار جنی ءِ نہ کٹوکیں دْرچ برجاہ ءَ اِنت-

درنازیں دُری 

نبشتہ کار: سیپ بلوچ

دی بلوچستان پوسٹ 

مئے چاگرد انگت بازیں جاگہ ءَ گوستانک ءُ گیدی ءِ رنگ جلواناکی ءِ زیبائیاں چہ سرچکار اِنت مئے چاگرد ءَ دری یک کارستے کسهے راستی یے کہ چاگرد ءِ پدمنتگی ءُ بزگی ءَ گیدی ءِ جلواهناکیں رنگاں گوں جنزگ ءَ انت (درناز)ئیں دری ، ءِ کسہ ءُ چاگرد ! من مدتے ءَ رند وتی بنکی هنکین ءَ اتکگ ات آن ءُ بازیں ندارگ، مردم، هلک، کوهن بوتگ ات کہ منی چمانی دروشم ءَ هرچیز ءِ رنگ ءُ چهر جتا گندگ ءَ اتک ، من وتی کوٹی ءَ وپتگ اِت آں سارتیں سارتان ءِ موسم ات ، کہ چہ شهر ءَ سنگتے ءَ پون کُت کہ منی مات! پہ روتاپ ءَ سچکیں تگردے لوٹگ ءَ انت وڑے بکن تئی هلک دمگ کوهی دمگے الم دست کپ ایت ،داں من گشت بس بزاں وڑ بوتگ داں من پون هلاس کُت کہ من ءَ زیکیں ندارگ ءَ یک رندے پد ءَ گوں وت بُرت- 

سهب ءِ روچ ٹک ءَ من کوٹی ءَ وپتگاں ات آں کہ چِیڑینگ ءِ توار ات لیڈوے دِریپگ ءَ ات داں من کوٹی ءِ در پچ کُت هشترے پُل ءُ راڑ انت بارے پیش ئِے لڈ اتگ جنینے ءَ مهار اَت اوشتاتگ ات دیم ءِ جهلا ات گوں منی ماس ءَ گپ ءَ ات وهدے ماس گوں هشتری ءَ دیم پہ بُرز ءِ گسانی نیمگ ءَ روگ ءَ لگ ات من دیست کہ باز زیبناکیں جلواھناکیں نیم امریں جنینے بلوچی چادرے ءَ پیڑاتگ هشترے مهار ءَ اِنت گس ءِ پُشت ءَ هشتر ءِ بار ئِے بوتک ءُ هشتر ئِے مهار ءَ کُت جنزان بوت- 

من ماس جست کت اما اے زال کے انت؟ کہ اے جاورانی تہ ءَ اے وهدے تهنا انگت بلوچی ءِ هما کوهنیں رنگاں گوں سرچکار اِنت ، ماس ءَ پسہ دات تو پجا نیاؤرت ؟

من گشت کمو هان بلے تو بگش بوت کنت کہ من رد بہ باں گڑا ماس ءَ درائینت اے درنازیں دُری اِنت ، مرچان لڈ اتگ دگ ءِ لمب ءَ گس اَنت ئِے  بلے انگت وتی اسل ربیت ءَ شموشکار نہ اِنت دائم پمن دار پیش تگرد کار ایت منی کسانی ءِ دزگوهار بوتگ انگت مهر ئِے هما رنگ ءَ انت ، ماس ءَ بچکندے ءَ پد گوشت ترا دُری یات انت؟

من، هو،شر یات اِنت آ وهد ءَ کہ من دری دیستگ ات دری سلاه بند ات دری اولی زال بوتگ کہ پرپٹ ءِ تاچگ ئِے زانتگ دری اولی زال بوتگ کہ دری ءَ میار جلے بوتگ، دری ءِ سلاه ءِ چست کنگ چہ مهر ءِ کسهے ءَ بوت ، درناز کوه ءِ مالداریں کماش میار ءِ چک ات کہ جنکے ءُ بچکے ءَ گوں مهر کنت ءُ ایشانی کهول رازی نہ بنت وت ماں وت ، دومی جنک ءِ کهول سلاه بندیں مردم ات انت نسلی جنگے ءَ گوں دچار اِت انت کہ جنک گوں بچک ءَ مهر کنت ، همے بچک جنک ءِ کماش ءِ سپاهیگے بیت-

گوں جنک ءَ مهر کنت داں جنک ءَ گوں شور ءُ سلاه کنت مردم رازی نہ بنت گپ جت گوں کهول ءَ کُت نہ کن انت داں کوه ءَ رو انت دری ءِ کماش میار ئیگ ءَ پہ میار جلی وهدے جنک ءِ کهول سهیگ بیت کہ اے شتگ انت کوه ءَ کماش میار ءِ گس ءَ پہ میار جلی گڑا اے سلاهاں بند انت گاڑی ءُ پرپٹ مردم زور انت رو انت کہ جنک ءُ بچکاں کُش اِیں، کہ مئے هاندان ءِ چم اش جهل کتگ انت ، چوناها اے جنک ءِ پت زگریں بلوچے بوتگ بلے جنگ ءُ جیڑهاں مان کپتگ-

وهدے اے رو انت کماش میار دری ءِ پت ءِ لوگ ءَ دری گند ایت مزنیں گاڑی ءُ پرپٹ پیداک بنت گڑا دری سلاهاں بند ایت ءُ جنک ءُ بچک ءَ تگردو ءَ کنت دیم ءَ نند ایت میار ڈن ءَ پات گوپگ ءَ بیت وهدے مردم کاینت بلوچی روایت ءَ دار انت، پامال نہ کن انت میار پاد کیت تگردے پچ کنت مردماں نندارین ایت ۔

گڑا جنک ءِ پت گوں میار ءَ گپاں کنت کہ منی جنک جستگ تئی گور ءَ انت گڑا ناکو میار گوش ایت هو جنک ءُ بچک منی گور ءَ انت بلے منی لاڑیں جنک درناز ءَ پہ میار داشتگ انت من بلوچے آن بلوچی روایت ءَ بلوچ ءِ میار ، بلوچ ءِ سر ءِ بُرگ ءَ پد برگ بیت ، شما نند ات من پہ شما پسے کُشاں شمارا سبارگ دیاں اگاں رو اِت راه پچ انت شت کن اِت جنک منی میار انت ، درجان گوں سلاهاں تگردوے دپ ءَ نشتگ-

همد ءَ جنک ءِ مردمے جاهلی کنت گپ نہ زور ایت کہ من رواں جنک کشّان کناں دَر کناں داں دُری توار پر جنت کسے ءَ تگرد پار کت وتی ساه ءَ چہ روت گڑا دُری کلاش ءَ چمبر کنت مرد  ترس ایت دیم ءَ نہ روت اے مرد ءَ توار کن انت سرپد کن اَنت کہ بلوچی  روایت پامال کنگی نہ انت میار ءِ میار ءَ کار مدار ات ، رند ءَ چار اَنت چے بیت پیسلهے کن ایں داں مردم رو انت-

ناکو میار ءَ بچکیں زهگ نہ بیت میار ءِ جن دری ءِ مات کسانی ءَ مِر ایت دُری ءَ میار رودین ایت ، میار ءِ جنک درناز بچکے ءِ کَنڈ ءَ دار ایت میار ءِ سرجمیں مال ءُ دلوتاں دلگوش کنت چداں چہ سلاه بند بیت ءُ بچک ءُ جنک همد ءَ نکاه کن انت ءُ هلک کن انت میار ءِ مالاں گوں دلگوش بنت بلے سلاه بندی ءَ وتی نہ پروش انت- 

جنک ءِ پت کهول کنت کہ من ءَ بزاں جنکے نہ بوت ءُ آ کسہ ءَ پروش دنت مدتے ءَ میار کوه ءَ بیت ءُ وهدے سرکار ءُ پوج کیت کوه آپریشن بیت میار لڈینگ بیت کیت کوچگ ءَ هنکین کنت دری کوچگی مردے ءَ گوں سانگ کنت بلے کوه دری ءِ دل ءَ چہ در نہ روت دری همک وهد کوه ءَ دار پیش کار ایت ، گوں پس ءُ دلوتاں کوه ءَ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہدی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-

بلوچ یکجھتی کمیٹی ءَ بیست ءُ ھشت جولائی ءَ ماں گوادر ءَ ’بلوچ راجی مُچی ‘ ءِ نام ءَ پنتاکی دروشمہ جارانک شنگ کتگ ءُ گوشتگ با سمائیں بلوچ راج! 28 جلکشان یک سادگیں روچے نہ اِنت بلکیں بلوچ راجی برزائی ءِ روچ اِنت، بلوچ راج ءِ تہ ءَ درد ءُ رنجانی بھر ءُ بانگ ءِ روچ اِنت. اے روچ مرگ ءُ زند ءِ جُھد ءَ سالانی سال پاکستان ءِ زنداناں بندیں نزیکیں مردمانی زندگ کنگ ءِ ھاتر ءَ ترند ءُ رھبندیں جھد ءِ بندات ءِ روچ اِنت۔ بلوچ سرڈگار ءِ سر ءَ بلوچ چُک چینی ءِ ھلاس کنگ ءِ راجی جُنز ءِ بندات ءِ روچ اِنت۔ بلوچ راج ءِ یکجاہ کنگ ءُ آیانی میان ءَ تپاکی ءُ یکمشتی پیداک کنگ ءِ روچ اِنت، راجی مزنی، شرپ ءُ دلیری ءِ منّارینگ ءِ روچ اِنت۔ مئے مات ءُ گْوھار ءُ چُکانی ارسانی کپگ ءَ بند کنگ ءِ روچ اِنت، چادر ءُ چار دیوال ءِ بزاں کسمَپُرسی ئیں زند ءَ پاد کنگ ءِ سالانی ھلاس کنگ ءِ جزم ءِ روچ اِنت، بلوچ ءِ ننگ، بلوچ ءِ ابرو، بلوچ ءِ ناموس ءُ بلوچ ءِ گیرت ءِ رکینگ ءِ روچ اِنت۔ اے روچ زُلم ءُ ھون ریچی ءِ دراجیں راجدپتر ءَ مٹ کنگ ءِ روچ اِنت۔ بلوچ راج ءِ پَجّار ءُ وت واجھیں راج ءِ پاد آیگ ءُ بیدار کنگ ءِ روچ اِنت۔ بلوچ راج ءِ نزور کنگ، گلام کنگ، بَھر ءُ بانگ، نادان، لالچی ءُ جَھلیں لیکھانی رد کنگ ءِ روچ اِنت۔ بلوچ ءِ راجی زور ءِ مَنّارینگ ءِ روچ اِنت۔

آئی ءَ گوشتگ بھادریں بلوچ راج ءِ پُسگ :یک رندے شری ءَ بہ جیڑ اِت۔ ما بلوچ ءِ بستار ءَ بس یک روچے چہ وتی گساں درکپ اِیں ءُ یک جاگھے ءَ یکجاہ بہ بہ اِیں ءُ سرجمیں دگنیا ءَ بہ گْوشیں کہ بس اِنت ،بس اِنت ننگ ءُ شرپ ءِ لگتمالی ءُ وتی زِر ءُ مڈّیانی لُٹ ءُ پُل ءِ سودا ءَ نہ کن اِیں؟ . سمائی ءُ شانداریں بلوچ، مرچی شمئے یات کنگ ءِ وھد اِنت، شموشگی نہ اِنت، پادا اِت ءُ پاد آیگ ءِ وھد اِنت. اگاں انوں نہ اِنت گڑا ھچبر نہ اِنت۔ پد ءَ آ روچ دیر نہ اِنت کہ مئے نا دلگوشی ءُ دیم ترّگ ءِ سوب ءَ نزیکیں باندات ءَ شھر ءُ کوچگ ءُ کوچگ ءُ بازار ءُ دشت ءُ کوھاں روچ پہ روچ سداں بلوچانی لاش دست کپ اَنت ءُ ھر روچ سداں بلوچ گار ءُ بیگواہ بہ بنت۔ ءُ سداں بلوچ ھمک روچ گار ءُ بیگواہ بنت مئے مات ءُ گوھار سرکاری رنگ ءَ وتی گریوگ ءِ جاور ءَ زوراکی کنگ بنت۔

شنگ بیتگیں جارانک ءَ گوشگ بیتگ مرچی سرجمی ءَ ریاست پاکستان ءُ ریاست چین ءَ یکجاہ کتگ کہ بلوچ ءِ ساھل ءُ مڈیانی لُٹ ءُ پُل کنگ ءِ واستا اولی رند ءَ بلوچ راج ھلاس کنگ بہ بیت، بلوچ راج ءِ تہ ءَ رستر ءُ تُرس ودی کنگ بہ بیت دانکہ آیانی راج ، وتی سرزمین ءُ وتی زندگ بوھگ ءِ دیم ءَ اوشتگ ءِ ھاترا بلوچ راج ءِ تہ ءَ ھچ وڑیں عزت ءُ عزت ، ھچ دلیری ، ھچ وڑیں عزت ءُ شان ءُ شان پشت مہ بیت۔

آئی ءَ گوشتگ پمیشکا بیا اِت کلیں بلوچ راج چہ وتی ھند ءُ دمگاں درکپیت ءُ 28 جولائی ءَ گوادر ءَ سر بیت ءُ سرجمیں دگنیا ءَ اے کلوہ ءَ دیم دنت کہ ما یک شاندار ءُ زندگیں راجے، یک شرپداریں ءُ آجوئیں راجے ایں. نہ بلوچ یلگ اِنت ءُ نہ بلوچ گلزمین۔ پہ وتی راج ءُ وتی سرڈگار ءِ پھازگ ءَ مزاحمت زندگ اَت، مزاحمت زندگ اِنت ءُ مزاحمت زندگ بیت۔

عمان ءِ بنجاھی شھر مسقط ءَ پولیس ءِ رد ءَ سَے شمبے ءَ یک مسیتے ءِ نزیک ءَ تیرگواری ءَ چار مردم بیران بیتگ انت ءُ بازینے زدگ بیتگ انت-

ھال سر کنوکیں ادارہ اے ایف پی ءِ رد ءَ رائل عمان پولیس ءَ یک درشانے ءَ گوشتگ آیاں ’الوادی الکبیر ءَ یک مسیتے ءِ نزیک ءَ تیرگواری ءِ وئیلے ءَ پسھی بیڑ برتگ‘-

پولیس ءَ بنداتی دراتکی مسقط ءَ یک مسیتے ءِ نزیک ءَ چار مردمانی بیرانی ءُ بازینے زدگ بوگ ءِ ھال داتگ-

چاگردی ترامجاہ ایکس ءَ پولیس ءَ یک درشانے ءَ گوشتگ ’ جاورھالانی گر ءُ دار ءَ دراھیں پھزداری گامگیج ءُ ڈول سرجم کنگ بیتگ اَنت ءُ واکدار سبب ءِ زانگ ءِ پٹ ءُ پول ءَ اَنت –

روکپتی بلوچستان ءِ بنجاھی شھر زاھدان ءَ گوستگیں شپ ءَ تیل ءِ یک ڈپوے ءَ آس کپتگ-

گیشیں اھوالانی رد ءَ زاھدان ءَ گوستگیں شپ ءِ ساھت کساس یازدہ ءِ نیم ءِ نزیک ءَ ناگتی تیل ءِ یک ڈپوے ءَ آس چِست بیتگ ءُ چریشی ءَ پد مھلوک ءَ آس کُش توار جتگ ءُ آس ءُ آس کش ءَ وت ءَ سر کتگ ءُ آس توسینتگ-

وئیل ءِ درگت ءَ دگہ گیشیں سرپدی نیست اَنت چون ءُ چتور آس کپتگ –

یک اھوالے ءِ رد ءَ روکپتی بلوچستان ءَ آس کپگ ءِ گیشتریں سبب ءَ کم ویلٹجانی سبب ءَ بیت اِنت کہ اود ءَ بجیلی ویلٹیج کم بنت گڑا شارٹ سرکٹ ءِ سبب ءَ اود ءَ آس کپ ایت-

چِد ءُ پیش روکپتی بلوچستان ءِ دمگ ایرانشھر ءَ میڈیکل سائنس ءِ شھدربرجاہ ءَ آس کپتگ بیتگ ات کہ اود ءَ شھدربرجاہ ءِ یک کپے آس ءَ وتی لپیٹ ءَ زرتگ اَت-

پاکستانی پوج ءِ دستاں زورانسری بیگواھیں کمال بلوچ سی ٹی ڈی ءَ دروگیں میڑ ءَ کشتگ، کھول ءَ کمال بلوچ ءِ کوش پدر کتگ-

کھول ءِ گوشگ اِنت کہ کمال بلوچ ء محمد نصیب گچک جوری ءِ جھمنند کہ پاکستانی پوج ءَ پانزدہ اگست دوھزار بیست دو ءَ آئی ءِ لوگ ءَ دگہ باز مردمانی ھمراھی ءَ آوار کتگ اَت – آ دگہ جتاجتائیں وھداں یل کتگ اَنت بلے کمال بلوچ سے دگہ بیگواھیں مردم عبدالقیوم زھری، ناصر فاروق ءُ غلام جان ءِ ھمراھی ءَ سی ٹی ڈی ءَ دروگیں میڑے ءَ کُشتگ اَنت آیانی لاش شال ءِ نادُراھجاہ ءَ سر کتگ اَنت آیانی پجّار نہ بیگ سبب ءَ آ مستونگ ءَ ناشناسیں مردمانی مانشجاہ ءَ کل کسارت کتگ اَنت-

اشی ءَ پد سی ٹی ڈی ءَ ھُزدار ءُ آواران ءَ دمگی انتزامیہ ءَ آیانی شھیدی ءِ درگت ءَ نمدی یے نبشتہ کتگ اَنت کہ ناصر فاروق جھمنند زھری صادق آباد، غلام جان جھمنند بائی پاس شال، عبدالقیوم ء زری خان جھمنند زھری ھُزدار، کمال خان ء باھوٹ جھمنند جلی آواران جنگ بیتگ اَنت- سی ٹی ڈی ءَ وتی نمدی یے ءِ تہ ءَ کُشگ بوتگیں مردم ناشرکار گْوشتگ اَنت-

آیاں اے منّ اِتگ کہ اے مردم ناشناسیں سرپد بیگ ءَ بے وارسی ءَ کل کسارت کتگ اَنت-

بیست سے جون دوھزار بیست سے ءَ بیگواھیں عبدالقیوم ءُ ناصر فاروق ءِ پجّار آئی ءِ کھول ءَ کتگ بلے کمال خان ءِ پجّار بہ بیتگ اَت-

کھول نیمگ ءَ چہ دہ جولائی دوھزار بیست چار ءَ یک درشانے شنگ کتگ گْوشتگ کہ آئی ءِ یل کنائینگ لوٹ کتگ- آئی ءِ درشان ءَ پد جیڑہ پٹ پول کنگ بیتگ ءُ بیگواھیں کمال ءِ کوش وئیل دیم ءَ اَتکگ- وھدے سی ٹی ڈی ءَ نمدی ءُ کمال ءِ پجّار کارڈ پیش داشتگ گُڑا کمال کوش ءِ پدر بیتگ ءُ آئی ءِ کھول ءَ کمال کوش راست کتگ-

کھول ءَ بلوچستان ھکومت چہ لوٹ کتگ کہ سی ٹی ڈی ءَ آ بے میار ءَ کُشتگ ءُ مارا آئی ءِ گُڈی وابجاہ ءَ پیش بہ دار اَنت دانکہ مارا سرپدی بہ رس اِیت کہ مئے چک مانش اِنت دانکہ ما آئی ءِ مانش سر ءَ بہ رو ایں دوایے ونت بہ کن ایں-

آئی ءَ انسانی ھکانی گلاں ءُ بلوچ راج ءَ چہ دزبندی کتگ کہ آ کمال ءِ میارباری ءِ پٹ لوٹ ءَ بہ کنت ءُ آئی ءِ گُڈی وابجاہ ءَ پیشدارگ ءَ مئے کمک ءَ بہ کن اَنت-

کمال خان ءِ کھول گچک جوری ءَ جھمنند بیتگ ءُ یک کوھی دمگے اود ءَ مال دلوت داشتگ اِت ءُ اود ءَ بُنکی آسراتی نیست اَنت

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں زامران ءَ زورگریں پاکستانی پوج ءِ آپ سرکنوکیں واٹر سپلائی نشانگ کتگ ءُ تباہ کتگ-

جارکش ءَ گْوشتگ زامران ءِ دمگ آرچن کور ءَ زورگریں پاکستانی پوج ءَ وتی پوسٹ ءَ را آپ سرکنگ ءِ ھاتر ءَ مشینری پٹ کتگ اَنت، چریشی ءَ بی ایل اے ءِ سرمچاراں نشانگ کتگ، سرمچاراں مشینری ءَ ھوار ءَ اِھوتی ساز ءُ سامان ھم اُرش نشانگ کتگ ءُ تباہ کتگ اَنت-

جارکش ءَ گْوشتگ بلوچ لبریشن آرمی اے اُرش زمہ واری ءَ منّ اِیت ءُ مئے اُرش زورگریں پوج ءِ بگیری ءَ برجاہ بنت-

آواران ءِ نندوکیں زورانسری بیگواہ بوتگیں ڈاکٹر عبدالھئی بلوچ ءِ گوھار بکتاور بلوچ ءَ گُشتگ کہ منی برات ڈاکٹر عبدالھئی بلوچ 44 روچ ءِ گْوزگ ءَ پد ھم یک جُلکان 2024 ءَ ریاستی رکینوکیں لشکر ءِ دست ءَ دزگیر کنگ ءُ پہ زور بیگواہ کنگ بوتگ۔ چہ ھما روچ ءَ پد آئی ءِ ھچ ھال نیست۔ ما آئی ءِ بابت ءَ نہ زانیں کہ آ کجا اِنت، آئی ءِ جاور چون اَنت ءُ پہ کجام جرم ءَ پہ زور بیگواہ کنگ بوتگ۔

آئی ءَ گوشت کہ اگاں آئی ءِ سر ءَ بھتام ھست انت گڑا آمیدگس ءَ پیش کنگ بہ بیت۔

آئی ءَ گْوشتگ کہ منی برات سرکاری کارمند اِنت آواران (ضلعی) اسپتال ءَ او ٹی آپریشن اسسٹنٹ ءِ بستار ءَ کار ءَ اِنت ءُ آ پہ زور چہ کلینک ءَ بیگواہ کنگ بیتگ ءُ آ انگت ءَ بیگواہ اِنت۔

آئی ءَ گْوشت کہ مئے لوٹ ھمیش انت کہ اگاں منی برات ءَ ھر وڑیں ردی یے کتگ گڑا آ آمیدگس ءَ پیش کنگ بہ بیت اگاں بے میار انت گڑا زوت یل کنگ بہ بیت انت۔

بلوچی زبان ءَ کار کنوکیں سرگوات لبزانکی کاروان ءَ ’تاکبند سرگوات‘ ءِ نام ءَ لبزانکی تاکے شنگ کتگ –

شنگ بیتگیں درشان ءَ گوشگ بیتگ کہ اے تاکبند ءِ سرشونکار گل بلوچ، کمکار شونکار بابا جی آر بلوچ، کمکار زبیر میراج ءَ اَنت-

شنگ بیتگیں اھوال ءِ رد ءَ اے تاکبند تربت ءِ شھر ءَ پہ وانوکاں دز کپ ایت کہ آئی ءِ نھاد سَے سد ءُ پنجاہ کلدار ایر کنگ بیتگ-

تاکبند ءِ سرکار زبیر بلوچ ءَ کتگ ءُ آئی گالسنج بیبگر الاھی ءَ کتگ بیتگ-

زانگ بہ بیت بلوچستان ءَ بازیں کچے ءَ لبزانکی گل ھست انت کہ آ بلوچی زبان ءِ دیمروئی ءِ ھاتر ءَ وتی دستاں ھوارینگ ءَ انت ءُ ھمے لبزانکی گلاں چہ یکے سرگوات لبزانکی کاروان انت کہ آئی ءَ اے اولی تاک بند اِنت کہ کش اتگ-

سرگوات تاکبند سید ھاشمی سیاھگ راست نبیسگ ءَ نبشتگ کنگ بیتگ کہ آئی ءَ پہ وانوکاں جوانیں نپ رس ات کن اَنت-