TBP Balochi

بیگواھیں ڈاکٹر دین محمد ءِ جنک سمی دین بلوچ ءَ تامُربندیں کلوھے ءِ تہ ءَ گْوشتگ کہ مروچی ما کل زان ایں بلوچانی سرجمیں زندمان تنگ اِنت بلوچانی مرچیگ یا کہ باندات ءِ ایمنی سرجم تنگ کنگ بیتگ بلوچانی راجی پجّار ءُ پدریچ سرجم اسرمند اِنت-

سمی دین ءَ گْوشتگ کہ مروچی جھان گوں تُرندیں گام ءَ دیمروئی ءِ نیمگ ءَ جُنزان اِنت بلے بلوچ پدمنتگ اِنت بلوچاں ھرچ وڑیں جیڑھاں چہ اسرمند اِنت اود ءَ بلوچ سالانی سال ھمے سرڈگار ءِ زندمان ءَ گوازینگ ءَ اَنت مروچی ھمود ءَ بلوچ مُھر نہ اِنت-

آیاں گْوشتگ کہ مروچی بلوچاں وتی جند بُنکی ھنکیناں چہ زورانسری لڑ ءَ بار کنائینگ اَنت مروچی ھزارانی مردم پاکستانی پوج ءِ آزارجاھاں بندیگ اَنت ءُ آزار اوپار کنگ ءَ اَنت آیانی کھول چتو زندمان گوازینگ ءَ اَنت آ درست مئے دیم ءَ اَنت مروچی بلوچانی تیرسُپتگیں لاش ویرانگاں کپتگ اَنت نان ءُ لاپ جیڑہ بہ بیت یا کہ روزگار ءِ درست بلوچانی واستا جیڑہ جوڑ کنگ بیتگ اَنت-

آئی ءَ گْوشتگ کہ مروچی مئے سرجمیں زندمان جنگجاھے جوڑ کنگ بیتگ بلے من جنگ ناں بلکیں ایمنی لوٹ ایں مارا یک وشھالیں زندمانے ءِ ھاتر ءَ یکجاہ بیگ لوٹ اِیت-

آئی ءَ گْوشتگ کہ بلوچ یکجھتی کمیٹی بیست ھشت جون ءَ گوادر ءَ یک راجی مچی یے کنگ ءَ اِنت اے راجی مُچی ءِ سوبمند کنگ مئے کلانی زمہ واری اِنت ما کل یکجاہ بیگ ءُ سرجمیں جھان ءَ پیش بہ دار ایں ھمے تاکت ءَ بلوچاں چہ زندگ بوگ ءِ ھک پچ گپتگ مروچی بلوچ ھمشی ءِ بگیری ءَ اوشتاتگ ءُ بلوچاں اے پیسلہ کتگ نو زوراک ءَ نہ منّ ایں گُڈسر ءَ سمی دین ءَ گْوشتگ کہ من راج ءَ گوں دزبندی کن آں اے راجی مچی ءَ بھر بزور اَنت ءُ اشی ءَ سوبمند بہ کن اَنت-

بلوچ راھشون ڈاکٹر ماہ رنگ بلوچ ءَ راست کتگ گْوشتگ کہ چار کلاکاں بندیگ سائرہ بلوچ، سادیہ بلوچ ءُ دگہ بلوچ زالبول ھُزدار ءِ راج ءَ راجی گھگیری ءِ زور ءَ ریاستی پوج ءِ پنجگاں چہ آجو بیتگ اَنت-

آئی ءَ گْوشتگ کہ ھُزدار ءِ راج ءَ مزنیں کچے ءَ وتی گھارانی پھازگ ھاتر ءَ ریاستی پوج ءِ گاڑیانی دیم ءَ یکشل ءَ چار کلاکاں تاں گھگیری کتگ ءُ آخرکار راجی گھگیری سوبمند بیتگ-

آیاں گْوشتگ کہ ریاستی پوج ءِ اے زوراکیں رویشگ بگیری ءَ ھُزدار ءِ راج مزنیں کچے ءَ درتکگ ءُ شال کراچی شھدگ بند کتگ ءُ پوج اے رویشگ بگیری ءَ گامگیج ءِ زورگ ءِ لوٹ ءَ کنگ ءَ اَنت- ھُزدار ءَ راج ءَ گوں دزبندی کن ایں گیش ءَ چہ گیش اے زھرشانی ءَ ھوار بہ بنت ءُ راجی تاکت ءَ چہ اے نزام ءَ پروش دے اِیت-

عمان ءِ بنجاھی شھر مسکت ءِ نزیک ءَ امام بارگاہ ءِ سر ءَ اُرش ءِ ذمہ واری داھش ءَ من اِتگ ۔

عمان ءِ واکدارانی رد ءَ دو شمبے ءِ شپ ءَ بنجاھی شھر مسکت ءِ نزیک ءَ امام بارگاہ ءِ سر ءَ اُرش ءُ سیکورٹی آپریشن ءِ تہ ءَ کُل 9 مردم بیران بوتگ۔

وتی ٹیلی گرام چینل ءِ سر ءَ شنگ بوتگیں ھالے ءِ تہ ءَ شدت پسندیں گل بِے بُنے، اسلامی دولت ءَ امام بارگاہ ءِ سر ءَ اُرش ءِ ذمہ واری من اِتگ۔

اے گل ءِ نیمگ ءَ چہ جاڑی بوتگیں ھالے ءِ تہ ءَ گْوشگ بیتگ کہ اسلامی ریاست ءِ سئے وت کُش اُرش کنوکاں گوستگیں شپ ءَ عمان ءِ بنجاھی شھر مسکت ءِ وادی الكبیر ءِ دمگ ءَ شیہ مجلس ءِ سر ءَ اُرش کتگ وھدے کہ آ ھاشورا مجلس ءِ واست ءَ یکجاہ بوتگ اَنت۔

بلوچستان ءِ دمگ کیچ ءَ گوستگیں پنچ روچاں ڈی سی ءِ کارگس ءِ دیم ءَ بیگواھیں مردمانی کھولانی زھرشانی نندانک برجاہ اِنت کہ اود ءَ بیگواھیں مسلم ءِ پت عارف ءِ جان گرم ءِ سبب ءَ ناجوڑ بیتگ-

جتا جتائیں ھنداں سیادی داروکیں دَہ مردمانی کھول اے زھرشانی نندانک ءَ ھوار اَنت کہ وتی مردمانی یل کنگ ءِ لوٹ ءَ کنگ ءَ اَنت-

زانگ بہ بیت کیچ ءِ ھند ءُ دمگاں اے وھد ءَ ترندیں گرم وتی زوران اِنت کہ چِد ءُ پیش ھم کھولاں نندانک داتگ بیتگ –

اے سیمی رند اِنت دمگدار ءِ کارگس ءِ دیم ءَ بیگواھیں مردمانی کھول وتی زھرشانی نندانک ءَ کنگ ءَ اَنت ءُ اے رندی بازیں زھگ ءُ زالبول گرم ءِ سبب ءَ نادراہ جاھاں برگ بیتگ اَنت-

پاکستانی استان سندھ ءِ دمگ جامشورہ ءَ پولیس تھانہ ءِ تہ ءَ تراک ءَ پولیس کارمنداں ھوار شش مردم ٹپی بیتگ اَنت- تراک ءِ زمہ واری سندھودیش روولیوشنری آرمی ( ایس آر اے ) ءَ منّ اِتگ-

رسانکدر ءَ شنگ کتگیں درشان ءِ تہ ءَ جارکش ایس آر اے ءِ رِد ءَ اُرش ءَ اپیسراں ھوار بازیں پولیس کارمندے ءِ ٹپی بیتگ اَنت- تھانہ ءِ تہ ءَ اوشتوکیں بازیں گاڑی یے ءُ ماڑی ءَ تاوان رس اِتگ-

جامشورو ءِ سینئر سپرنٹنڈنٹ پولیس ( ایس ایس پی ) طارق نواز رِد ءَ ٹپیاں چہ دو ءِ جاور نگیگ اَنت ھیدرآباد سول نادُراھجاہ ءَ برتگ-

آئی ءَ گْوشتگ کہ تراک ءَ چہ پولیس اسٹیشن ءَ سک تاوان رس اِتگ وھدے کہ رکشہ ءُ پرپٹ ءَ تباہ بیتگ اَنت-

ٹپیانیانی پجّار ھیڈکانسٹیبل محمد بخش، اے ایس آئی رسول بخش ءُ غلام معی الدین ،پولیس کانسٹیبل ارشاد ءُ علی عبدالطیف ءُ یک شکی ئیں مردم ءِ پجّار جمشید نام ءَ چہ بیتگ کہ تراک ءِ وھد ءَ بندیگجاہ ءَ بیتگ-

تراک ءِ آسر ءَ تھانہ ءِ تہ ءَ اوشتوکیں گاڑی کہ آیانی تہ ءَ اسکوٹر، پرپٹ ءُ رکشہ ھوار اَنت تباہ بیتگ اَنت-

پاکستانی پوج ءَ چہ مشکے ءَ چار مردم زورانسری بیگواہ کتگ اَنت-

بلوچستان ءِ دمگ آواران ءِ ھند مشکے ءَ پاکستانی پوج ءُ چیریں ادارھانی کارمنداں چار مردم آوار جتگ ءُ ناشناسیں جاھے ءَ برتگ اَنت چریشی ءَ پد آیانی درگت ءَ ھچ وڑیں ھال دز نہ کپتگ-

دمگی اِھوالکار رِد ءَ گوستگیں شپ ءِ ساھت چار نزیک ءَ پاکستانی پوج ءَ مشکے ءِ دمگ نوکجو ءَ مزنیں کچے ءَ راہ ءُ در بستگ اَنت دمگ انگر ءَ کتگ ءُ ھمے میان ءَ لوگانی سر ءَ بیڑبرتگ-

زورانسری بیگواہ کنگ بیتگیں مردمانی پجّار شھداد ء اللہ بخش، عتیق ء ماسٹر الھی بخش ، منیر ء نبی بخش ءُ جبل ء مجید ناماں چہ بیتگ اَنت-

واکدار ءَ اے درگت ءَ ھچ وڑیں درشان شنگ نہ کتگ-

زانگ بہ بیت مشکے ءَ زورانسری آوار جنی ءَ چہ گیش اسرمندیں دمگاں ھوار بیت وھدے کہ اد ءَ مزنیں کچے ءَ مردم تیرگواری ءِ نشانگ ھم کتگ اَنت- اے تیرگواری کنوک پاکستانی پوج ءِ چیردستی ءَ کارکنوکیں ڈیتھ اسکواڈ ءِ کارمندانی سر ءَ بھتام جنگ بیت-

گوستگیں روچاں ھمے گپ دیم ءَ اَتکگ کہ مشکے ءَ مردماں زور کاربندگ ءَ ھوار آیاں زورانسری وتی ھمراہ کن اَنت دانکہ آجوئی لوٹوکانی اُرشاں چہ بہ رک اَنت وھدے کہ دمگی مردماں پوج ءِ بُنجل ءَ لوٹائینگ ءُ پیش بیگ ءِ پابند ھم کتگ اَنت-

شنگ بیتگیں یک تامُرے ءَ گندگ کئیت کہ ڈیتھ اسکواڈ ءِ کارمنداں لَٹ کٹ کنگ اَنت – دمگی مردمانی رِد ءَ اے مردم زور کار گرگ پاکستان پوج ءِ راہ ءَ آؤکیں دارگ ءُ ڈنگرانی ساپ کنگ ءِ کار ءَ گرگ ءَ اَنت-

شوھاز ءُ نگد ءُ چکاس ءِ مانا

نبشتہ کار : شاھد اھمد

پنچُمی بھر

دی بلوچستان پوسٹ

کار راھبند آرٹ ریسرچ ءِ زانتکار ءِ گشگ ءِ رد ءَ جوانیں ءُ کوالٹی ءِ ریسرچ ھما انت کہ آئی ءِ کار ءِ وڑ ءُ پیم ءِ سر ءَ چہ ھچ وڑیں پڑ ءَ موکل بوگ ءَ مہ دئے۔” آئی ءِ وتی نزریہ ءِ سر ءَ ، گڑا آئی ءِ دراھیں پٹ ءُ پولی جُھد گار ءُ بیگواہ بنت۔ پرچا کہ آئی ءِ نیت شککیگ بوتگ ءُ آ یک راستیں پٹ ءُ پولکارے ءِ مجگ ءِ پلگاری ءُ شوھاز ءِ راستیں جاوراں پیلو کنگ ءَ نہ اِنت۔ پٹ ءُ پولی کار یک زگر ءُ پَھکیں اَملے۔ ایشی ءِ تہ ءَ دز مان جَنی ءِ ھچ وڑیں منّگ نہ بیت۔

پٹ ءُ پولی اَمل ءِ تہ ءَ پٹ ءُ پولکار ءِ رھبند یک سائنسی اَملے کہ ایشی ءِ تہ ءَ پٹ ءُ پولکار (مفروضات) آزمائش ءُ چار ءُ تپاس ءَ پد رستگیں آسراں نبشتہ کنت۔ اے اَمل ءِ تہ ءَ آئی ءِ نامداری سرجم ءَ دگہ رنگے ءَ گندگ بیت۔ پٹ ءُ پولکار چہ لائکی وسیلگاں راستی ءُ جارواں زرت کنت ءُ آیانی (معروضی) تجزیہ ءَ کنت ءُ گڈی ءَ چہ رند رندگیری ءَ یکجاہ کنان ءَ یک چمشانکے ءِ جوڑ کنت۔ چوش کہ آئی ءِ پٹ ءُ پول (منطقی ءُ معروضی )رھبندانی سر ءَ بندوک اِنت۔ اے بنیاد ءَ پٹ ءُ پولکاراں سائنسی رھبند ءِ زورگ ءِ سوج داتگ پرچا کہ “اے رھبند ءِ زورگ ءَ کار نہ ایوک ءَ یکجاہ بیت بلکیں آسر ھم پٹ ءُ پولکار ءِ زاتی (رجحان یا روایتی) رسانکی ءَ چہ آزات بیت۔ اے گوں دُرستیں آسر ءِ گرگ ءِ جزم ءَ بندات بیت۔ پمیشکا ھما جاہ ءَ کہ پٹ ءُ پول بیت اود ءَ سائنس بیت ءُ ھما جاہ ءَ کہ تبّی پدیدگ بنت اود ءَ پٹ ءُ پول بیت۔ آسر ھمیش اِنت کہ (اسلوب) ءِ ھوالہ ءَ پٹ ءُ پول ءِ پجّار ھمیش اِنت کہ آ شرتر، مستند ءُ پدر بہ بیت ءُ ذاتی نپ ءُ سیادی ءُ مراگشانی تہ ءَ پجّار مہ کنت۔

پٹ ءُ پول ءِ تہ ءَ کَچّو چینی ءُ ھیال ءِ اَمل بُرز ءِ لیکہ ءِ تہ ءَ گْوشگ بوتگ کہ پٹ ءُ پولی کار ءِ تہ ءَ یک (معروضی) دروشمے ءِ زیرگ ءِ بنیاد ءَ راستی ءُ جاور یکجا کنگ بنت بلے برے برے اے جیڑہ ءِ گوں ھمگرنچیں راستی ءُ جاور دست نہ کپ اَنت پمیشکا چوشیں جاور ءَ پٹ ءُ پولکار اندازگ ءِ گوم ءَ کار کنگ ءَ مجبور بیت۔

۱: راجدپتر ءِ لبزانک ءِ یک انچیں پڑے ءَ کہ مواد دست نہ کپ اِیت پمیشکا مواد ءِ نہ بوگ ءِ وھد ءَ کچّو چینی ءِ کارمرز کنگ بیت، پرچا کہ ایشی ءِ ھست نہ بوگ ءَ لبزانکی راجدپتر مُجتی برجاہ نہ بیت۔

۲: لبزانکی راجدپتر ءِ تہ ءَ گمان ھم وتی دل تب ءِ رد ءَ نہ بیت بلکیں گمان ھم دلیلانی رژنائی ءَ جوڑ کنگ بیت ءُ چہ ھمے دلیلاں درکپتگیں آسر( منطقی) رنگ ءَ ثابت بوت کن اَنت۔ (مفروضہ) گمان ءِ پٹ ءُ پول ءَ اے گپ المی انت کہ پٹ ءُ پولکار (منطقی) دلیلاں بہ دنت، آئی ءِ (مفروضہ) گمان ءِ بنیاد ءَ ھیالی ھساب ءَ گیشتر جوڑ کنگ بہ بیت، آ گیشتر منّگ بیت۔

روان انت۔۔۔

بلوچ راج بیست ھشت جولائی ءِ روچ ءَ گوادر ءَ سر بہ بنت جھان ءَ کلوہ بدے اَنت کہ ما یک زندگیں آزاتیں راجے ایں- ڈاکٹر ماہ رنگ بلوچ

بلوچ راھشون ڈاکٹر ماہ رنگ بلوچ ءَ گْوشتگ کہ سرجمیں بلوچ راج بیست ھشت جولائی ءِ روچ ءَ وتی لوگاں چہ، وتی دمگاں چہ در بیا اَنت گوادر ءَ سر بہ بنت سرجمیں جھان ءَ اے کلوہ ءَ بدے اَنت کہ ما یکجا ءُ زندگیں راجے ایں، شرپدار ءُ آزاتیں راجے ایں-

آئی ءَ گْوشتگ ناں بلوچ بے وارس اِنت ناں بلوچ ءِ سرڈگار -وتی راج ءُ وتی سرڈگار ءِ رکینگ ءِ ھاتر ءَ گھگیری زندگ اِنت، گھگیری زندگ اِنت ءُ گھگیری زندگ بیت-

بلوچ یکجھتی کمیٹی شال ءِ نیمگ ءَ چہ سریاب، ھدہ ءُ بی وائی سی نوشکی ءِ نیمگ ءَ چہ کلی قادر آباد ءَ یک نیادے برجم دارگ بیتگ، چریشی ءَ بیست ھشت جولائی ءَ گوادر ءَ بیوکیں ” بلوچ راجی مچی ” ءِ درگت ءَ سرپدی دیگ بیتگ-

ھمے وڑ بی وائی سی ءِ راھشون صبغت اللہ شاہ جی ءَ گْوشتگ کہ بلوچ راجی مچی ھرچ وڑیں گلی، تحریکی انجمن ءُ پارٹی ءَ یکر بہ بنت سرجمیں بلوچ توری زند ءِ ھرچ پڑ ءَ گوں سیادی بہ دار اِیت اولی رند ءَ تھنا بلوچ بہ بیت یکجاھی ءَ درشان بہ کنت ما کل بلوچ ایں ءُ وھدے یکجاھی ءِ ھاتر ءَ راج ءَ لوٹائین ایں ما یک راجے جوڑ بہ بہ ایں جھان ءَ وتی یکجاھی ءَ پیش بدار ایں-

روکپتی بلوچستان ءِ دمگ راسک ءَ مَچانی باگ ءَ اس کپتگ ءُ بازین مَچے ستکگ –

اھوالانی رد ءَ آس راسک ءِ ھند پیروز آباد ءَ باگے ءَ کپتگ کہ اود ءَ بازیں مَچے آس ءَ وتی لپیٹ ءَ زرتگ اَنت-

شنگ بیتگیں تامر بنداں مھلوک گوشگ اِنت کہ آس ءِ زور باز اِنت ءُ دمگ ءَ دگہ مَچانی گرگ ءَ ھم گمان ھست اِنت-

زانگ بہ بیت پیروز آبا چہ راسک ءِ شھر ءَ پنچ کیلو میٹر ءِ دوری ءَ اَنت اگاں آس کُشیں گاڑیاں توار بہ کن انت گڑا اے جاہ ءَ وت ءَ سر کت کنت بلے مردمانی گوشگ انت آس کُش ءَ مھلوک ءَ گشتگ بازیں وھدانی گوزگ ءَ پد ھم آیاں وت ءَ سر نہ کتگ-

یک سالے ءَ ساری پاکستانی پوج دست ءَ زورانسری بیگواھیں ورنا عبدالوھاب قلندرانی ءِ مات وپات بیتگ-

زورانسری بیگواھیں ورنا عبدالوھاب ء عثمان قلندرانی ھُزدار ءِ دمگ توتک ءِ جھمنند اِنت کہ پاکستانی پوج ءَ گوستگیں سال بیست جون ءَ چہ بولان کالونی ءَ آوار جتگ ءُ بیگواہ کتگ کہ انگت بیگواہ ءَ اِنت-

عبدالوھاب ءِ مات کہ وتی چک ءِ زورانسری بیگواھی ءَ پد بے کساس گم ءُ رنجانی تہ ءَ دوچار بیتگ گوستگیں سھب ءَ دل ءَ گپتگ ءُ بیران بیتگ-

زانگ بہ بیت کہ بلوچستان ءَ زورانسری بیگواھیں مردمانی مات ءُ دگہ بازیں کھول دوستناکانی ودار ءَ اے جھان ءَ چہ شتگ اَنت-