بلوچ اسٹوڈنٹس ایکشن کمیٹی ءِ چیر دستی ءَ پروفیسر صباء دشتیاری ءِ یات ءَ ماں کلچرل سنٹر پنجگور ءَ صباء لیٹریری فیسٹیول برجم دارگ بوتگ، کہ اودا جنک ءُ بچکیں نودربراں ھوار مزنیں کچے ءَ مردماں بھر زرتگ –
ترانکاراں صباء دشتیاری ءِ زند ءِ درگت ءَ وتی ھیال درشان اِتگ انت ءُ آئی ءَ پہ بلوچی زبان، لبزانک ءُ دود ءُ ربیدگ ءَ داتگیں دیمھونی ءَ دروت ندر کتگ ءُ آئی ءِ زند ءِ لھتے ساھت یک ڈاکومنٹری تامری دروشم ءَ پیش داشتگ انت ئے –
فیسٹیول ءَ کتابانی اسٹال ھم جنگ بوتگ انت، بلوچ آرٹسٹاں ھم وتی پینٹنگ پیش داشتگ انت ءُ کتابانی اسٹال گیشتر دلگوش کنگ بوتگ، فیسٹول ءَ بازیں دود ءُ ربیدگی شو ھم پیش دارگ بوتگ انت –
فیسٹیول ءَ بھر زوروکانی تہ ءَ ڈاکٹر ماھرنگ بلوچ، پروفیسر اکبر غمشاد، فوزیہ بلوچ، الطاف بلوچ، طاہر حکیم، بالاچ بالی ءُ دگہ مردماں تران کنان ءَ گوشتگ کہ صباء دشتیاری بلوچی زبان، لبزانک ءُ پہ دود ءُ ربیدگ ءِ یک چیدگے بوتگ کہ آئی ءِ سرجمیں زند پہ بلوچ زبان ءِ دیمروئی ءِ ھاتر ءَ.ندر کتگ بوتگ –
آئی ءَ گوشتگ کہ مروچی اگاں آ مئے میان ءَ ساڑی نہ انت بلے ھما پگر ءُ پلسپہ کہ آئی ءَ مارا داتگ تاں کیامت مردمانی دلانی تہ ءَ زندگ انت ـ مروچیگیں اے فیسٹیول اے گپ ءِ گواھی ءَ دنت کہ صباء پگری دروشم ءَ زندگ ءُ مئے میان ءَ انت – صبا ءِ نام ءَ فیسٹول ایرکنوک ستا کرز انت کہ وتی ھیرو اش بے ھیال نہ کتگ انت –
آیانی گوشگ ات کہ ھر راجے ءِ زندگ بوگ ءَ آئی ءِ زبان، لبزانک ءُ دودانی بوگ المی انت اے المی دور ءَ مارا وانگ ءُ زانگ ءِ نیمگ ءَ ھم دلگوش دیگی انت وھدیکہ مئے تہ ءَ زانت بیت گڑا وتی باندات ءِ پیسلہ ءَ کت کن ایں بید ءِ زانت ءُ زانگ ءَ ناکہ راجاں دیمروئی کتگ ءُ ناکہ کن انت –
آیانی گوشگ ات کہ ھر یک مردمے ءِ زمہ واری انت کہ وتی وس ءُ واک ءَ زانت ءُ زانشت ءُ آگھی ءِ چراگ ءَ بہ زور ایت ءُ دیم ءَ بہ رؤت – غلام حسین، صباء دشتیاری زانتکار ءُ سوھویں مردم بوتگ انت آ ھچبر بے ھیال کنگ نہ بنت –
آیانی گوشگ ات کہ صباء دشتیاری ءَ بلوچی زبان شری ءَ زانتگ پہ بلوچی لبزانک ءِ زندگ دارگ ءَ آئی ءِ کرد ھچبر شموشگ نہ بیت اِنت ـ بلوچ بس یک راجے ءِ نام نہ انت بلکیں اے وتی یک گوستانکے داریت ـ ھچ وڑیں راج وتی زبان ءُ دود ءُ ربیدگاں دزکش نہ بیت بلوچ ھم وتی زبان ءُ دودانی سر ءَ پھر بندیت – پہ زبان ءُ لبزانک ءِ ھاتر ءَ غلام حسین ءَ ھم وتی جوانیں کردے پیلو کتگ کہ چریشی ءَ مئے پدریچ ءَ بلوچی زبان ءُ لبزانک ءِ درگت ءَ سرپدی رس ایت ـ آ یک ھنچیں انسان دوستیں مردمے بوتگ کہ مدامی آئی ءَ پہ انساناں جھد کتگ ـ شھید صبا دشتیاری ءَ ملیر ءَ کتاب جاھے ءِ بنھشت ایر کتگ کہ اودا بلوچی زبان ءُ لبزانک پھریز اِتگ –
آیانی گوشگ ات کہ ما ھما وھد ءَ ھست بہ ایں وھدیکہ ما وتی زبان ءَ دود ءُ ربیدگاں پھریز ایں ـ پہ وتی منارینگ ءَ زانت بلاھیں سلاھے، زانت یکجاھیں پگرے ءِ رندگیری کنگی انت ـ ھنچوش کہ صبا دشتیاری ءَ اے ھزانہ دومیاں داتگ ءُ وت چہ ما جُدا بوتگ ھمے وڑ مارا ھم پہ وتی زبان ، لبزانک ءُ دود ربیدگ ءِ ھاتر ءَ وتی کرد پیلو کنگی انت – مروچی اگاں بلوچی ءِ دروشم ھست انت اے صبا داتگیں کرد انت ـ آ وتی تہ ءَ وت یک ادارھے بوتگ کہ ھچبر شموشگ نہ بیت ـ سداں سال پد اے وڑیں ھستی پیداک بنت آیانی نمیرانی ءَ بلاھیں تاوانے بوتگ –
ترانکارانی گوشگ ات کہ راجکاری پہ مول بہ بیت گڑا آ بدلی آرت کنت، راجکاری ءِ تہ ءَ نودربرانی سر ءَ بندش ءِ مول زانت ءُ پگر ءِ گٹ گرگ ـ یک نودربرے وتی راج ءَ دیمروئی ءِ نیمگ ءَ بارت بلے مارشت ءَ زبھریں راج ھچبر یک وشھالیں زندے گوازینت نہ کناں ھمے واستا مار ءَ یک ءُ تھنائی نیمگ ءَدور دیگ بوتگ کہ ھر یکے وتی وڑ ءَ مار ایت وھدیکہ ما راجکاری ءَ راج ءِ یکجاھی دیمروئی وتی مول جوڑ کن گڑا بزاں ما یک بامکسدیں راجکاری ءِ کنگ انت – بلوچ چاگرد ءِ تہ ءَ پہ شرپ ءُ گیرت ءِ نام ءَ چاردیوالی تہ ءَ بند کنگ بوتگ انت پہ دیمروئی ءَ زالبولانی کرد المی انت ایشی ءِ سر ءَ مارا شمارا کلاں کار کنگ لوٹ ایت ـ فیسٹول ءَ مزنیں کچے ءَ بھر زورگ پہ ما شرپ ئے –
آیانی گوشگ ات کہ کلچر ایمپرمیزل مئے سر ءَ توک کنگ بوتگ لٹریچر لبزانکے یک اکسے کہ زبان ءُ دوداں پیش دار ایت ـ بلوچ زورگیر نہ انت وتی زمین ءِ سر ءَ اباد انت مردیناں ھوار زالبولاں ھم لبزانک، زبان ءُ دودانی تہ ءَ وتی دست سُرینگی انت –
فیسٹیول ءَ پنجگور ءِ نامداریں آرٹسٹ پروفیسر عبدالحفیظ گوھر جی، نور فاطمہ، رابعہ، مائین، سعید، مھیم،ھدایت ءُ ملیحہ کلچر سینٹر ءِ دیوال گوں وتی پینٹنگ ءُ فن ءَ زایبدار کتگ انت –
