روکپتی بلوچستان ءِ بنجاھی شھر زاھدان ءَ ناشناسیں مردماں تیرگواری کتگ ءُ یک ورنایے کشتگ-
گیشیں اھوالانی رد ءَ زاھدان ءَ ناشناسیں مردماں تیرگواری کتگ ءُ کامبیز مھمدآنی ء عبدالعزیز جھمنند زاھدان کشتگ-
اھوالانی رد ءَ کامبیز سعدی میتگ ءَ تیرگواری کنگ ءُ کُشگ بیتگ-
تیرگواری ءُ کوش ءِ سبب زانگ نہ بیتگ ءُ نانکہ کوشوکانی بارو ءَ دگہ اھوال دیم ءَ اتکگ اَنت-
زانگ بہ بیت روکپتی بلوچستان ءَ وھد وھد ءِ سر ءَ مردم نشانگ کنگ ءُ کشگ بوگ ءَ اَنت بلے آیانی کوشکار تنی وھدی گرگ ءُ دیم ءَ آرگ نہ بیتگ اَنت-
آزمانک :سیاسی پناه
نبشتہ کار :هسابجار
دی بلوچستان پوسٹ
” چے هالیں ؟”هیریں پل ! شما هال کن ات -“مئے هال وش انت ، هال شمئے نیمگ ءَ انگت ، اِشکُنگ ءَ تو پہ سیاسی پنا گرگ ءَ انچو کہ بالی پٹ ءَ رستگ ئے وت ءَ گنوک کرتگ ، راستے ؟” ناں ناں اے گپ سیاهیں دروگے ، ترا کئے ءَ گُشتگ ؟” من ءَ کئے ءَ گُشتگ آ گپ ءَ بِلّ ! بلے وهدے تئی اجبیں سُر ءُ پُر اش دیستگ انت ترا تب زانتے ءَ بُرتگ اش ، داکتر ءَ تئی چار ٹپاس ءُ گوں تو گپ ءُ تران کنگ ءَ پد گشتگ کہ هو اے راستی ءَ گنوک انت – اشی ءِ جبین ءَ یک انچیں تُرسے ءَ جاگہ کرتگ کہ هر وردی والا ئےِ گند ایت اشی ءِ دل ءَ همیش انت نی منی کُشگ ءَ پیداک انت ءُ هردیں بالگردے ءِ توار بیت تہ وت ءَ چیر دیگ ءِ جهد ءَ کنت ءُ چہ داکتر ءِ گپاں پد ترا بے جُست ءُ پرس ءَ زُرتگ اش -” تئی گور ءَ شور انت -” من ” مهرجان ءَ اتگاں شما یورپ ءَ ئیش کنگ ءَ ات ، ما نودشنز ءَ دلے گوات ءَ دی انت -“هاں گنداں سک شُور انت -” شور ءَ بل گپ ءَ گار مکن واجہ !” کجام گپ ءَ ؟ تو هوں یارے ئے ; اے وڑا کہ بوتیں سک شر ات بلے اے درست دروگ انت من زاناں ترا اے همئے مُلّا ءِ چک مِنّورلهک ءَ گشتگ کہ اد ءَ نام ئےِ گزی انت ءُ مُلّا دلبود ءَ زگری انجمن ءِ کارڈے چہ زگری انجمن ءِ نیمگ ءَ داتگ – اود ءَ مال ءُ مت ئےِ زگریانی کُشگ بوتگ ءُ تالبانے ، اد ءَ واجہ ءَ وت ءَ چہ منورلهک ءَ گزی کرتگ ءُ مُلّا ءِ کمک ءَ وت ءَ زگری یے کرتگ ئےِ ءُ نشتگ گوں وتی کهول ءَ ئیش کنگ ءَ انت – من زاناں ترا همیشی ءِ جند ءَ گُشتگ – “اناں وسر ءَ مہ گش – واجہ مُلّا دلبود وت وتی پرکہ ءِ کشندهاں چون کُمک کنت ؟ ” ملا وت کوشارینت اش کنت ، زیارت ءِ سرا سی سی ٹی کیمره جنائینت کنت پہ سرمچارانی نشان کنگ ءُ آهانی گرائینگ ءَ دلّاری کرت کنت اے کار ءَ کرت نہ کنت ؟” آنگُر من نزاناں بلے من ءَ زگری یا نمازی یے ءَ نہ گشتگ – گُڑا پکا ترا همئے لاپگاراں چہ یکے ءَ گشتگ کہ ملک ءَ مال ءُ مت اش چرس ءُ بنگ ءُ تریاک کنگ بوتگ اد ءَ پہ وتی ئیش ءُ نوش ءِ هاتر ءَ وت ءَ انکلابی اش کرتگ ءُ چہ سیاسی پارٹیاں کاگد اش گپتگ ءُ گوں وتی جن ءُ چکاں نشتگ ءُ پد ءَ همے سیاسی پارٹیاں ڈوبار انت -” اناں ، اناں ، اناں — ” گڑا ترا کئے ءَ گُشتگ ؟ تو وت وَ پرشتہے نہ ئے ءُ ناں کہ واجہ هدا ئے ; اے شپ ءِ نپس ءَ منی مس تو سور کرتگ انت – وسر ءَ اتکگ ئے کہ تو وت ءَ گنوک کرتگ – من ءَ وت ءَ گنوک کنگ ءِ هاجت نیست پرچا کہ من ءَ هرکس زانت – ” هرکس ؟ ” هو هرکس — داں اے چیزے سیاسی لاپ گار هم کہ ملک ءَ بگر داں اد ءَ بلوچ راجی جنز اش وتی لاپ کرتگ ءُ اد ءَ همے راجی جنز ءِ برکت ءُ شهیدانی نام ءَ اتکگ ءُ گوں وتی تورُم ءَ نشتگ انت وهدے کہ روانک ءُ مُچی یے بیت تہ یکے هم در ءَ نہ بیت – چہ شهیدانی چوروانی هکاں مہ چُٹات انت – ” چے چے —! تو وَ جزباتی ئے سنگت ! ترا هیر انت ، تو چو کرت ؟ ” مرگ ئےِ گُشی چو کرت ، هرام — گڑا منی پُشت ءَ چیا دروگ بند ئے کُ— -” ها ها ها ها راست انت اول ءَ من ءَ باور نہ بوت بلے نوں من زاناں کہ اے گپ تُری هرکس ءَ کرتک راستے -” چتور راستے باریں ، تئی دل ءَ من گنوکے آں منی یاداشت شُتگ ؟” منی دل ءَ گنوک ءَ اے هم یات بیت کہ ( من ءَ مہ کُش ات ، من ءَ مہ کُش ات دو دُز ءِ دیم ءَ مرد ءِ موبائل ئےِ دور دات ءُ تک ) هما گپ ءَ بکن ترا براهیت – تو وت زاناں کجام زهم جتگ کہ نازاکیں مردماں وسر ءَ ڈوبارگ ءَ ئے – دگہ گنوکی کجام انت ؟ ” سکیں پوکے ئے تو -” پوک تئی جند انت ، بلاهیں ٹَرّ ءَ وت ءَ گنوک کرتگ کہ من ءَ پنا بہ دی انت ءُ من یورپ ءَ بہ ننداں آڈال -” اسل ءَ ترا زهر کئیت پمشکا تو چشیں دروگ بندگ ءَ ئے کہ اے شتگ انت من پشت کپتگاں ، ایوک ءَ تو نہ ئے بازینے ماں مزن هور ءَ همے آس ءَ سُچگ ءَ انت ترا میار نیست اے یک تبی جیڑهے جوڑ بوتگ هر کس وتی وڑ ءَ جُشگ ءُ سُچگ ءَ انت – سُچ گُڑاکو بے آس ءَ – ترا یک سوجے دیاں اگاں تئی گور ءَ دگہ نیمون نیست چو پلانی ءِ وڑا وت ءَ بگاهے بکن ءُ پد ءَ بگاهاں هچ تُوت ءُ کِچ پِرنیست دمان ءَ زور انت ئےِ – بلے گندئے بہ گُش انت بیا ترا ٹسٹ کنیں ها ها ها ها اے بلاهیں شتنگاں چہ یکے چو تاجُک ءِ کروس ءَ ترا پِرّ بہ سیٹ ایت بزاں مزتگ ئے -” من ءَ آیگ ءِ هاجت نیست منی کار اد ءَ وت شراانت من شمے وڑا نہ تراتگ شو نہ کرتگ ، وتی ملک ءَ هم شُت کناں ءُ اد ءَ مُلکی مردمے هم لوٹائینت کناں، شما اد ءَ جنز ءِ سر ءَ بارے بوتگ ات – بلے شریں کہ شُتگ ئے کم چہ کم شمئے همے ویزهانی زر بچ انت بلکیں پہ پارٹی ءَ دگہ گهتریں ڈکے گر انت – شمئے روگ وَ شر انت – بلے یار مردم وت ءَ گنوک کنت ها ها ها ها ؟ ” مرگ ء گُشیت گنوک کنت ، پدا تو گُش ئے کہ داکتر ءَ گشتگ هو اے گنوک انت – یکے وَ اِش کہ اے گوں تو هرکس ءَ گشتگ سیاهیں دروگے ءُ دومی اِش کہ گنوک ءَ چیز چتور یات بنت – اگاں من گنوکاں گڑا من ءَ چتور یات بیت کہ من وهدے بالی پٹ ءَ ایر اتکاں من لوٹ ات کہ رُمب بلّے روت من رند ءَ رواں وت ءَ دست ءَ دیاں – وهدے من پہ وتی پشت گیج ءَ پسیل پٹ ات ءُ یکے ءَ پُتر اتاں کہ آپ دستے کناں داں رُمب بروت پدا پهیکی ءَ وت ءَ دست ءَ دیائنیاں – من کہ پوی ءَ پترتاں تہ پوئی ءَ نل مان نیست پہ دیم شودگ ءَ من سک کند ات زان ئے چیا ؟ ملایانی سر ءَ کہ ملا چتور وت ءَ گوں ٹیشو پیپر ءَ ٹهینت کن انت –
پد ءَ من ءَ اے هم شری ءَ یات انت کہ اولی روچ ءَ منی رجانکار ءِ نیاهگ ءِ سوب ءَ من ءَ بالی پٹ ءِ مساپرانی ودارجاه ءَ راه دیگ بوت – وهدے من اود ءَ سر بوتاں داں دکان ءُ بار کل بند انت انگت روچ جهل بیگاه ات – من کہ جست کرت انت گُشت اش شپ انت بے وهد انت پمشکا بند انت – من هیراں بوتاں کہ اے چونیں ملکے کہ روچ انگت بُرز انت ءُ اے گشگ ءَ انت شپ انت ءُ من سک تونیگ اتاں – گڑا من ءَ گُشت اش کہ پسیل ءَ آپ بور –
من ءَ اے هم یات انت کہ وهدے اندگہ سُهب ءَ کہ رجانکار اتک منی لنککانی نشان گرگ بوت انت ءُ جُست ءُ پرس ءَ پد کہ من ءَ بندیں گاڑی ءَ کنگ بوت ءُ گاڑی همے بالی پٹ ءِ تہ ءَ کمیں تر ءُ پر تر کنگ ءَ پد سے ءُ چار آهنی دروازگاں پُتراں داں من ءَ جیل ءِ تہ ءَ برگ بوت – جیل کج ءَ بلے مردم بند ات وتی منشا ءَ ناں تر ات کرت ءُ ناں ورگ ئےِ وارت کرت جهل بیگاه کہ بوت گشت اش نو شپ انت همک نو ءُ نیم ءَ کہ روچ انگت سک بُرز ات ، کوٹی ءَ کنگ بوتاں ءُ کوٹی چہ ڈن ءَ کبل کنگ بوت داں اندگہ روچ ءَ هشت ءُ نیم ءَ کہ روچ سک بُرز ات – همے بے سریں وهد ءُ پاس کہ روچ ءِ همراه نہ ات انت من ءَ شر یات انت – پد ءَ بندی اے نہ بوت وهدے منی سینگ ءِ برانزبُت ( Xsry) ءَ اشاں ٹِکے دست کپت گُڑا بندی هما بوت – همد ءَ من ءَ وتی بیگواهیں همبل سک گیر اتک انت کہ آ کجام ازاب ءَ بتت تنک ءُ تهاریں کوٹیانی تہ ءَ انت ءُ ناں روچ گند انت ءُ ناں الکاپیں وَردے ، لٹ ءُ کُٹ ءُ درنجگ چونیں چونیں ازاب سگگ ءَ انت -هید ءَ جان شود انت ءُ بوٹ ماں جان ءَ چو موراں تچ انت ءُ پیشاپ ءُ هون هوار انت ، جان شُشت نہ کن انت – در باب ء آیاں منی اے تنک ءُ رُژناہیں کوٹی کہ اشی ءِ تہ ءَ یک دو تبکی آهنی تهتے ات ءُ گونڈیں کباٹے جانشود ءُ پوئی ءُ یک ٹی وی یے گوں دریں زبانانی چینلاں ءُ گونڈوکیں پریجے اوون ءُ بجلی ءِ جگے ، تهت ءُ ٹی وی ءِ میان ءَ بس یک گونڈیں کرسی یے ءِ جاگہ ات ءُ تنکیں دمکے پہ درایگ ءَ پُترگ ءَ – روچ ءَ روچ ءِ برانز تہ ءَ اتک انت ءُ شپ ءَ لیٹ هست ات . بلے منی دل ءَ انگت کیامت ات -یک گنوکے ءَ هینجک چیز ءُ پد ءَ هینچک وهد ءِ گوزگ ءَ پد چون یات بنت ؟ من دلوارگ هما وهد ءَ بوتگاں هر دیں کہ اے تنکیں بندی جاه ءَ کہ چہ سینگ ءِ برانزبُت ءَ ٹکے ءِ بوگ ءَ پد من ءَ ماں کوٹی ءَ شپ ءُ روچ کبل کنگ بوت ، چہ اے بندی جاه ءَ پَشت چہ کوٹی ءِ کانچ ءِ دریگ ءَ هما دیم ءُ زندان ءِ سیم جتگیں بُرزیں دیوال ءَ آ دست همے کہ سهب بوت تہ بے برمشیں زندے بنا بوتگ ات – ناں توارے ناں چڑکہ ءُ برمشے ، اے نزیکیں ندارگ چو میلانی دوری یے ءَ دیم ءَ در ءَ ات درجکانی سُرگ ءَ گوات ءِ گمان بوتگ ات ءُ مرگانی نندگ ءُ بال کنگ ءَ چُری چُری ءُ کپوتانی درچک ءِ شاهانی سر ءَ داں دیراں نندگ ءَ کوکوانی گمان – ماتے ءَ چک سیکل ءِ پینگو ءَ کتگ ات روگ ءَ ات مات ءِ یکوی سر ءَ پینگو ءِ گور ءَ برگ ءَ همے گمان کرتگ ات کہ چک گریوگ ءَ بیت مات ئےِ ساڑینگ ءِ جهد ءَ بیت ءُ مردمانی چہ گاڑیاں کچکانی ایرگیج ءُ درچکانی چیر ءَ برگ ءُ کمیں ترینگ ءُ روتاب ءَ گردینگ ءَ پد گاڑیاں کنگ ءُ روگ ءَ کچکانی گیت دارینگ ءِ گمان کرتگ ات – کانچ ءَ آدیم یک پُرتاهیریں زندے جنزان ات ءُ کانچ ءَ اے دیم ماں اے تنک ءُ رُژناهیں کوٹی ءَ بید ءِ لیٹ ءُ لهتیں همے ساماں یک ابیتکی ات کہ من ءَ چہ تہ ءَ ورگ ءَ ات ءُ من گوں دریگ ءِ کانچ ءِ امیت ءَ سهبانی ندارگانی باهوٹ ات انت – هزابی هما وهد ءَ گیش بوت کہ سگریٹ هلاس بوت انت ءَ منی موبائل هم پچگرگ بوتگ ات –
پد ءَ من ءَ گشگ بوتگ ات هردیں کسے چہ دروازگ ءِ ٹنگ ءَ کہ ترا ورگ دنت تہ ماسک ءَ الم بہ جن ءُ من دلترک اتاں کہ نو بس منی واتری انت – سیمی روچ ءَ بچک دابیں جنکے ءَ دروازگ ءِ دریگ بوتک ءُ من ءَ آئیسکریمے دات ئےِ ءُ گُشت ئےِ کہ اے آئیسکریم ءَ بور وتی کوٹی ءَ پلگار کن ءُ اُورداں بند – من پہ تُرس ءُ لرز جُست کرت کہ من ءَ کج ءَ برانت – اشیا پیش من ءَ کاگدے سر بوتگ ات کہ چیزے وهد برداشت کن گوما تاوان بکن ما جهد کنیں ترا زوت دگہ لوکیشنے ءَ بہ بریں ، اود ءَ هچ زاهر نہ ات کہ کج ءَ ءُ اے بچک دابیں جنک ءِ زبان ءِ سرپد نہ بوگ ءَ من مُرت ءُ زندگ نہ بوتاں – من جست کرت کہ کج ءَ برات من ءَ آئی ءَ گُشت اوتریپو ” من دلترک بوتاں ءُ منی دپ ءَ دراتک ایئرپورٹ ءَ -” گڑا —؟ گڑا چے ؟دیم ءَ چے بوت ؟ ” گوں یک گنوکے ءَ چے بہ بیت ؟ ” من وت نزاناں —! ” چتور تو نزان ئے ؟ آهاں ترا منی گنوک بوگ ءِ هال داتگ ات دیم ءِ گپ اش هم گشتگ انت گون -“
” اناں گومن کس ءَ هچ نہ گشتگ – چتور هچ نہ گشتگ ، گشگ ءَ الم گشتگ اش نی تو منی دپ ءَ پچ کنگ لوٹ ئے – ” پو انگت تئی دپ پچ نہ انت بزاں ؟ سُهبگین ئے رپٹگ ءَ ئے – ” شر گڑا نی نہ رپٹاں – ” اناں گپ کن ، گڑا تئی کار بوت انت ، پد ءَ ترا کج ءَ بُرت اش ؟ ” وش انت منی پون ءِ چارج هلاس انت من ءَ واب ءَ هم گپتگ ءُ سُهبی مهلا پادایگی انت -“
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان ءِ دمگ کیچ ءَ ناشناسیں مردماں تیرگواری کنان ءَ دو برات کشتگ اَنت-
تیرگواری ءِ وئیل تمپ ءِ دمگ نزر آباد ءَ پیش اتکگ – بیران بیتگیں مردمانی پجار نادل پنام ءِ گنگا ءُ وسیم جھمنند نزر آباد ءِ ناماں پیش اتکگ اَنت –
دمگی مردمانی رد ءَ اے مردمانی سیادی پیش ءَ بلوچ سلاہ بندیں گلاں گوں بیتگ اَنت پد ءَ پوج ءِ دیم ءَ سرینڈر بیتگ اَنت-
زانگ بہ بیت گوست ءَ ھم سرنڈر بیتگیں مردم آجوئی لوٹوکیں سلاہ بندیں گلاں نشانگ کتگ اَنت- آجوئی لوٹوکیں گلانی گوشگ اِنت کہ اے وڑیں مردم پوج ءِ نیمگ ءَ جوڑ کتگیں سلاہ بندیں گل ڈیتھ اسکواڈ ءِ بھر جوڑ بنت ءُ پد ءَ بلوچ آجوئی لوٹوکانی چاریگری ءُ دگہ چاگردی سلکاریاں ھوار بنت اِنت-
بلے داں انگت ءَ اے وئیل ءِ زمہ واری کس ءَ پہ وت ءَ نہ زرتگ-
بالی وڈ ءِ بیبو کرینہ کپوت تامر جانِ جاں ءَ نیٹ پلکس ءَ وتی ڈیبیو کنگ ءَ اِنت کہ ایشی ءِ توک ءَ وِجے ورما ءُ جے دیپ اھلاوت ءِ گون ءَ اسکرین ءِ شنگ کنگ ءَ گندگ بوتگ-
سَے شمبے ءِ روچ ءَ تامر ءِ ٹریلر ءِ لانچ بوگ ءِ درگت ءَ برجم دارگ بوتگیں نیاد ءَ کرینہ کپور ءَ گوشتگ ات کہ آئی ءِ لوگ واجہ سیف علی خان ءَ تامر ءِ سائن کنگ ءِ وھد ءَ گوشتگ کہ آئی ءَ جان جان ءَ وِجے ورما ءُ جے دیپ اھلاوت ءِ گون ءَ کار کنگ کپ ایت ءُ بلے اے آسان نہ اِنت-
کرینہ کپور ءَ وتی ھمراھیں ازمکارانی ستا کنان ءَ گوشتگ کہ سیف ءَ من ءَ گوشتگ اے وڑ نہ بیت اِنت تو وین ےَ میک آپ کن ئے ءُ ایر کپ ئے ءُ سیٹ ءَ نندے ڈائیلاک جن ئے –
کرینہ کپور ءَ گوشتگ آئی ءِ لوگ واجہ ءَ گوشتگ ترا وتی رویش شر کنگ لوٹ ایت ءُ تو جے دیپ ءُ وجے ءِ وڑیں ازمکارانی گون ءَ کار کن ئت گڑا ایشی ءِ واستا تیار بو ءُ آ ھردوک چیزاں مٹ کنگ ءَ آں جوانتر ھمیش اِنت تو شیوار بو پرچاکہ اے پکنک نہ اِنت-
بالی وڈ ءِ بیبو ءَ دیم ءَ گوشتگ کہ جے دیپ اھلاوت ھروھد ءَ وتی کردار ءَ تیار بیت اِنت کیت اِنت ءُ ھمے وڑ وجے ورما سیٹ ءَ مسکرائی کنگ ءَ گندگ بیت اِنت بلے آ کار کنت اِنت اے زانگ نہ بیت اِنت آیوکیں گپ چی بیت اِنت چون اش گوش اش-
سجوئے گھوش ءِ ازمکاری ءِ تامر جان جاں بیست ءُ یک ستمبر ءَ نیٹ فلکس ءَ شنگ بیت اِنت –
بلوچستان لبریشن فرنٹ ءِ جارکش میجر گوھرام بلوچ ءَ ٹیلی گرام یَ وتی شنگ کتگیں درشان ءِ تہ ءَ گوشتگ کہ سرمچاراں آواران ءِ ھند جاؤ ءِ ڈولیجی ءَ 05 ستمبر سَے شمبے ءِ بیگاہ ءِ ھپت ءُ نیم ءَ زورگریں پاکستانی لشکر ءِ سر ءَ اُرش کُرتگ ءُ یک کارمندے کُشتگ ءُ دو ٹپی کُرتگ انت۔
جارکش ءَ گوشتگ بلوچستان لبریشن فرنٹ ءِ سرمچاراں گوں گھتریں کارشونیاں اُرش کُرتگ ءُ دُژمنیں لشکر ءِ یک کارمندے کہ چہ پانگس ءَ ڈن اوشتوک بیتگ گوں اسنائپر توپک ءِ نشانگ کُرتگ ءُ کُشتگ، پد ءَ دُژمن ءِ پانگس ءِ سر ءَ گوں گرنیڈ لانچر ءُ راکٹاں اُرش کُرتگ۔ اے اُرش ءَ دُژمنیں لشکر ءِ یک کارمندے مُرتگ ءُ دو ٹپی بیتگ۔
آئی ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں زورگیپتیں بلوچستان ءِ آجوئی ءَ مئے اُرش زورگریں دُژمنیں لشکر ءُ آئی ءِ زورگری شوربندیانی سر ءَ برجاہ بنت۔
روکپتی بلوچستان ءَ نیکراھی وانگ جاہ ءِ نودربر سلاہ بندانی دست ءَ بیگواہ –
سر بیتگیں ھالانی رد ءَ روکپتی بلوچستان ءِ دمگ ھاش ءَ مخزن العلوم ءَ اوگانستان ءِ جھمنندیں نودربر سلاہ بندیں مردماں آوار جتگ ءُ گون وت برتگ-
نودربر ءِ پجار ھژدہ سالی ئیں محمود درہ خیل ء ھاجی بشیر ءِ نام ءَ زانگ بیتگ-
اھوالانی رد ءَ محمود ءِ کھول گوست ءَ چہ اوگانستان ءَ لڈ ءُ بار اش کتگ ءُ باھوٹی ءَ روکپتی بلوچستان ءَ اتکگ بیتگ اَنت-
اھوالانی رد ءَ آئی ءِ کھول ءَ دمگدار ءِ کارگس ءِ دیم ءَ زھرشانی کتگ ءُ آئی ءِ درگیجگ ءِ لوٹ کتگ بلے داں انگت ءَ آئی ءِ بارو ءَ اھوال دیم ءَ نیتکگ اَنت-
اھوالانی رد ءَ نودربر ءِ آوار جنگ ءَ پد آئی ءِ کھول ءَ ناشناسیں نمبرے ءَ رھوت اتکگ کہ یک کلوئے سُھر بہ دے ات نی شمئے زھگ یل کنگ بیت اِنت-
ترکی ءَ اکتوبر ءَ پیسر سروک طیب اردوغان بغداد ءِ تر ءُ تاب ءَ پیسر عراق ءِ تیل ءِ آیگ ءِ ھچ گمان نیست اِنت-
برتانیہ ءِ ھال سرکنوکیں ادارہ روئٹرز ءِ رد ءَ سروک رجب طیب اردوغان اگست ءَ منگ بوتگیں تر ءُ تاب رد کتگ ءُ گمانی رنگ ءَ آ اکتوبر ءَ بغداد ءِ تر ءُ تاب کنت اِنت-
سعودی عرب ءَ تیل ءِ نھاد ءَ دیم ءَ آرگ ءَ تیل ءِ پیداگ بوگ ءَ دَہ لک بیرل یک روچے ءَ کمکارانی کمی ءِ پالیسی دسمبر دوھزار ءُ بیست ءُ سَے ءَ داں ایر کنگ گوشتگ-
ترکی ءَ بیست ءُ پنچ مارچ ءَ میان اُستمانی چیمبر آف کامرس ءِ سیمگی پیسلہ ءَ پد عراق ءِ گوریچانی نیمگ ءِ تیل داشتگ بیتگ –
پیسلہ ءَ انقرہ ءَ 2014 ءُ2018 ءِ گیشی ءَ کردستان ءِ دمگی سرکار (کے آر جی) ءِ نیمگ ءَ گیر مجاز ءِ دزکپگ ءَ بغداد ءَ یک ٹک پنچ بلین ڈالر ءِ پیسر ءَ دیگ ءِ ھکم داتگ بیتگ-
اپریل ءَ عراق ءَ آئی سی سی ءِ سیمگی پیسلہ ءِ لگتمال کنگ ءَ امریکہ ءِ وفاقی آمیدگس ءَ دزبندی کتگ بیتگ – اھوالانی رد ءَ اردوغان ءِ اگست ءِ ماہ ءِ تر ءُ تاب ءِ یک سببے اے ھم بوت کنت کہ آئی ءَ کانون ءِ نیمگ ءَ یک نیمگی گامگیجانی سر ءَ ناوشی بیتگ-
یک کلانیں ترک ءِ واکدارے ءَ گوشتگ کہ اردوغان انگت ھم بغداد ءِ روگ ءِ ارادہ ءَ دار ایت ءُ لوٹ ایت یک مسامے ءِ سر ءَ دز نویس بہ کنت بلے داں انگت ءَ عراق ءِ نیمگ ءَ مھکمیں منانک ءِ گامگیج ءِ زورگ ءَ ابید ھچ گندگ ءَ نیتکگ-
عراق ءِ وزارت ھارجہ ءِ یک کارندھے ءَ گوشتگ داں انگت ءَ مارا انقرہ ءِ نیمگ ءَ ھچ گڈی لائن سر نہ بوتگ کہ ترک ءِ سروک کدی بغداد ءِ تر ءُ تاب کنت اِنت یا ھمے ماہ ءِ گڈسر ءَ یا اکتوبر ءِ گمان ھست اِنت-
عراق ءِ واکداراں پیسر ءَ گوشتگ ات کہ ترکی لوٹ ایت عراق دوھزار ءُ ھژدہ ءَ پد کمک ءِ وھد ءَ سیمی نیمگ ءَ دومی گپ ءَ ھلاس بہ کنت اِنت -ترکی ءِ وزارت ءِ توانائی ءَ سرجمی ءَ سرپدی ءِ پسو نہ داتگ بیتگ-
چہ کراچی ءِ دمگ ہاکس بے ءَ پاکستانی پوج ءُ سی ٹی ڈی ءُ چیریں ادارھانی کارمندانی دست ءَ زورانسری آوار جنگ بوتگیں ھزدار ءِ جھمنند داد شاہ ء صبر خان مرچی یل بوتگ ءُ وتی گِس ءَ سر بوتگ –
داد شاشانی ءِ یل بوگ ءِ ھبر آئی ءِ کھول ءَ راست کتگ –
زانگ بہ بیت داد شاشانی گوستگیں ماہ ءِ یانزدہ اگست ءَ چہ کراچی ءِ دمگ ہاکس بے ءَ پوج ءُ چیریں ادارھانی کارمنداں زورانسری آوار جتگ ءُ بیگواہ کتگ – آئی ءِ زورانسری آوار جنی ءِ بگیری ءَ آئی ءِ کھول ءَ زھرشانی ءُ نندانک ھم جتگ ـ
داد شاشانی ءِ گھار ءَ گوں اھوالکاراں تران کنان ءَ گوشتگ ات کہ آئی ءِ برات شپ ءِ ادار دو ءِ نزیک ءَ کراچی ہاکس بے ءَ مئے گس ءَ سی ٹی ڈی ءَ مزنیں کچے ءَ بیڑ برتگ ءُ منی ورنا ءُ نودربریں برات داد شاہ ء صبر خان درکانودی آوار جتگ ءُ بیگواہ کرتگ – داد شاہ ءِ ھواری ءَ پوج ءَ آئی موبائل، چارجر، سوٹ کیس ءِ تہ ءَ لھتیں گُد زرتگ ءُ گوں وت برتگ انت ءُ پوج ءَ منی پت ءِ دیم ءَ گوشتگ کہ ما سی ٹی ڈی ءِ کارمند ایں داد شاہ ءَ پہ جُست ءُ پُرس ءَ برگ ءَ ایں –
زانگ بہ بیت بلوچستان ءِ جتا جتائیں ھند ءُ دمگاں ھوار کراچی ءُ دگہ جاھاں ھم پاکستانی پوج ءَ مزنیں کچے ءَ بلوچ ورنا آوار جتگ ءُ بیگواہ کتگ انت ـ کہ آیانی تہ ءَ کمے کساس ءَ مردم یل کنگ بوتگ انت وھدیکہ دومی نیمگ ءَ.دوسری زورانسری آوارجنیانی درچ یکشل ءَ برجاہ انت
بلوچستان ءِ دمگ ھُزار ءَ پاکستانی پوج ءِ چیریں ادارھانی کارندھاں یک نیم اُمر مردمے زورانسری آوار جتگ ءُ گوں وت برتگ-
گیشیں ھالانی مروچی سُھب ءِ ساھت پنچ ءَ ھُزدار اڈہ ءِ نزیک ءَ پاکستانی پوج ءِ چیریں ادارھانی کارندھاں ساسولی ٹکی کماش ماما میر ھزار خان ساسولی زورانسری آوار جتگ ءُ ناشناسی جاھے ءَ برتگ-
زانگ بہ بیت بلوچستان ھمکروچ زورانسری آوار جنی ءِ وئیل دیم ءَ کاینت دومی نیمگ ءَ بیگواھیں بلوچانی توار وائس فار بلوچ مسنگ پرسنز ءِ ھم شُدکُشیں ھڑتال برجاہ ءَ اِنت-
ھمکروچ بیگواھیں مردمانی کھول برے ماں کراچی ءِ دگانی سر ءَ گندگ کاینت برے ماں شال ءُ برے اسلام آباد ءَ دانکہ توار ءَ کسے گوش بدار اِیت بلے سرکار نیمگ ءَ ھچ چُشیں گامگیج زورگ بوگ ءَ نہ اِنت-
خضدار دمگ ءِ وڈھ ھنکین ءَ چہ سربیتگیں اھوال ءِ ردءَ دراکھالہ ءِ جھمنند ءَ وتکُشی کُتگ۔
اھوالانی ردءَ اقبال ء کریم شیخ نامی ایں مردمے ءَ وتکُشی کُتگ البت داں انگت وتکُشی ءِ سوب زانگ نہ بیتگ اَنت۔
یات بہ بیت کہ سرجمیں بلوچستان ءَ وتکُشی ءِ وئیل ھمکروچگی ردءَ دیما پیداک اَنت۔
گوستگیں دوھپتگانی تہءَ اے وتکُشی ءِ چارمی وئیل اِنت چدوپیسر گوادر، آواران ءُ شال ءِ دمگانی تہءَ ھم سئے وتکُشیانی وئیل ءِ ھال دی بلوچستان پوسٹ ءَ سر بیتگ اَنت۔
