TBP Balochi

بلوچستان ءِ دمگ آواران ءِ ھند مشکے ءَ پاکستانی لشکر ءِ لشکر کشی برجاہ، لشکر کشی ءَ گن شپ ھیلی کاپٹر ھم بھر زیرگ ءَ اَنت-

سر بیتگیں اھوالانی رد ءَ مشکے ءِ دمگ بزی، مرماسی، خلخلونک، پچڑ، کاھلو، لھڑو ءُ کش ءُ گوری دمگاں لشکر ءِ لشکر کشی برجاہ اِنت-

دمگی مردمانی رد ءَ لشکر بالگرد ھم آیگ ءُ نندگ ءَ اَنت – جتا جتائیں جاھاں ترندیں تیرگواریانہ درچ ھم برجاہ اَنت ءُ ھمے ڈول ءَ پاکستانی پوج ءُ سلاہ بندیں مردمانی میان ءَ جنگ ءُ چوپ ھم برجاہ اَنت-

دمگ ءَ پوجی لشکر کشی ءِ سبب ءَ تاوانانی اھوال سر نہ بیتگ اَنت- ءُ نانکہ واکداراں اے درگت ءَ دگہ گپ دیم ءَ آورتگ اَنت-

گوستگیں روچ ءَ بلیدہ ءَ ھم جنگ ءُ چوپانی اھوال بیتگ اَنت ءُ کہ اود ءَ پاکستانی پوج ءِ پلامرزی ءَ ھستیں گل ڈیتھ اسکواڈ ءُ بلوچ آجوئی لوٹوکیں سلاہ بندانی میان ءَ ترندیں جنگ ءُ چوپ بیتگ اَنت –

جنگ ءُ چوپ ءَ دگہ تاوانانی اھوال سر نہ بیتگ اَنت-

روکپتی بلوچستان ءَ یک جنکے کور ءَ کپتگ ءُ بڈ اتگ ءُ بیران بیتگ-

اھوالانی رد ءَ روکپتی بلوچستان ءِ ایرانشھر ءَ یک جنکے کور ءَ کپتگ ءُ پد ءَ بڈ اتگ ءُ بیران بیتگ-

وئیل ایرانشھر ءَ ڈمن ءِ کور ءَ پیش اتکگ کہ اود ءَ نوزدہ سالی ئیں پائزہ کاسمزئی ءِ نام ءَ زانگ بیتگ جہ آ رسول آباد ءِ جھمنند گوشگ بوگ ءَ اِنت-

ھالانی رد ءَ پائزہ گوں وتی دگہ دو دزگوھارانی گون ءَ ڈمن ءِ کور ءَ شتگ بیتگ کہ اود ءَ جھلانکیں آپ ءِ سبب ءَ اوژناگ ءَ نابلدی ءِ سبب ءَ بُک اتگ ءُ بیران بیتگ-

اھوالانی رد ءَ آ آئی ءِ لاش چہ آپ ءَ کشگ بیتگ ءُ کھول ءَ دست گپتگ –

بلوچستان لبریشن فرنٹ ءِ شنگ کتگیں درشان ءِ تہ ءَ گْوشتگ کہ مئے سرمچاراں کیچ ءِ ھند بلیدہ، گلی ءَ پاکستانی پوج ءِ کاروان گوں آئی ای ڈی ءَ نشانگ کُرتگ، اُرش ءِ زد ءَ اتکگیں یک گاڑی یے سرجم ءَ آدرہ بیتگ ءُ گاڑی ءَ سوار بیتگیں دُرسیں کارمند مُرتگ اَنت۔

جارکش ءَ گْوشتگ کہ مرچی سُھب ءِ ھشت ءُ نیم ءَ زامران ءَ لشکرکشی ءَ روگ ءَ بیتگیں پاکستانی پوج ءِ چِل گاڑیانی کاروان ءِ سر ءَ سرمچاراں گِلی بلیدہ سرمچاراں نشانگ کُرتگ، اُرش ءَ یک گاڑی یے سرجم ءَ آدرہ بیتگ، چہ ایشی ءَ یک کسانیں سروگانے ءَ ھوار ھشت سپاھی جنید، سپاھی آصف رشید، سپاھی وحید، سپاھی عثمان غنی،سپاھی عاصم، سپاھی نادر ءُ سپاھی رحیم مُرتگ۔

بلوچستان لبریشن فرنٹ ءَ سرمچار جنگی ءُ انٹلیجنس بنیاد ءَ پاکستانی لشکر ءَ بلوچستان ءِ ھرچ دمگ ءَ جانی ءُ مالی تاوانانی دیمپان کُرتگ، پمشکا بلوچستان ءَ پاکستانی پوج ءَ پروش وارتگ۔پمشکا چہ سرمچارانی تُرس ءَ لس آبادیانی سر ءَ بیڑ برگ، زوربیگواھی ءُ دگہ میارباری کنگ ءَ اِنت ءُ وت ءَ دلبڈی دیگ ءِ بےسوبیں جُھدے کنگ ءَ اِنت۔

بی ایل ایف تچکی ءَ گْوش ایت کہ بلوچستان ءَ برجاھیں جنگ بلوچ راج ءِ جنگ اِنت ءُ اے جنگ ءَ بی ایل ایپ بلوچ راج ءِ کمک ءَ دیم ءَ روان اِنت ءُ آؤکیں باندات ءَ پاکستانی پوج ءُ آئی ءِ کمکارانی سر ءَ اُرش گوں ترندی ءَ برجاہ بنت۔

میجر ءَ گْوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ کول کنت کہ داں یک آجو ءُ وژھالیں بلوچستان ءِ آجوئی ءَ پاکستان ءِ سیت بلوچستان ءَ نشانگ کنگ بنت۔

ھمے سال ءِ بیست ءُ ھشت جولائی ءَ بلوچستان ءِ تیاب دپی شھر گوادر ءَ بیوکیں بلوچ راجی مچی ءِ چن ءُ لانچ ءِ درگت ءَ بلوچ یکجھتی کمیٹی ءِ نیمگ ءَ چہ سرپدی مھم ءُ دگہ پرکاری برجاہ ءَ اَنت-

وھدے کہ بلوچی، براھوی ءُ اردو زبان ءِ یک کتابے شنگ بیتگ چریشی ءَ بلوچ راج ءِ دیمپان جیڑہ ءُ آیانی گیشینگ ءِ ھاتر ءَ درشان شنگ کتگ انت-

ھمے وڑ بلوچ یکجھتی کمیٹی ءِ زمہ داران ھک دو تھریک بلوچستان ءِ بُنجاھی چیئرمین ءَ گوں نیاد ءُ بلوچ راجی مُچی ءَ چہ ھمگرنچ پلامرزی ءُ کمک کنگ ءِ سر ءَ گپ کنگ بیتگ – ھک دو تھریک ءِ نیمگ ءَ چہ ھرچ وڑیں پلامرزی ءُ کمک ءِ دلجمی دیگ بیتگ انت-

بلوچ یکجھتی کمیٹی ءِ زمہ واراں یک ٹولی یے ءَ صبغت اللہ شاہ جی ءِ سروکی ءَ ھک دو تھریک بلوچستان ءِ بُنجاھی چیئرمین حسین واڈیلہ ءُ دگہ زمہ واراں چہ نیادے کتگ – نیاد ءَ بیست ءُ ھشت جولائی ءَ بیوکیں بلوچ راجی مُچی ءَ چہ ھمگرنچ پلامرزی ءُ کمک ءَ چہ گپ ءُ رپ بیتگ ءُ اے مراگش ءَ سوبمند کنگ ءِ ھاتر ءَ جُھد ءِ سر ءَ ھم تپاک بیتگ انت-

واڈیلہ ءَ گْوشتگ کہ بلوچستان ایردستیں راج ءِ ھکاں چہ ھمگرنچ ھرچ وڑیں جُھد ءِ ھک دق تھریک ءِ کدر ءَ کن ایں ءُ بے شرت ءَ پلامرزی کن ایں-

تربت ءَ زورانسری بیگواھیں مردمانی کھول ءِ زھرشانی ئیں گدان ءَ ھپت روچ سرجم، کھول ءَ شُدکُشیں ھڑتال بندات کتگ، زالبولے ءِ تبیت نگیگ-

کیچ ءِ جتاجتائیں دمگاں چہ سیادی داروکیں بیگواھیں مردمانی کھول ءِ گدان ءَ ھپت روچ سرجم بیتگ، کھول ءِ گدان ءَ دمگی انتزامیہ کیچ ءِ کارگس دیم ءَ برجاہ ءَ اِنت چریشی ءَ دمگی انتزامیہ ءِ کارگس ءِ ھمراھی ءَ کمشنر مکران، مھکمہ خزانہ ءُ دمگی چئیرمین کیچ ءِ کارگس ھم گوستگیں یک ھپتگے ءَ بند اِنت-

کھول ءَ گدان ءِ یک ھپتگے ءِ سرجم بیگ ءَ پد شُدکُشیں ھڑتال بندات کتگ، کھول گوشگ اِنت کہ مئے دوستناک یل کنگ بیت اَنت گُڑا ما لاچار بہ ایِں زھرشانی سرجمیں راہ ءَ راھبنداں پیلو کن ایں-

بیگواھیں مردمانی کھول ءِ گدان ءَ چہ بلیدہ ءَ بیگواھیں جان محمد ء مات بی بی شراتون ءِ تبیت نگیگ بیتگ ءُ آ بے ھوش بیتگ اود ءَ آ الاج کنگ بیتگ-

گدان ءَ زالبول ءُ زھگانی مزنیں کچے ءَ ھوار اَنت کہ کیچ ءِ جتاجتائیں دمگاں چہ سیادی دار اَنت-

گدان ءَ بی ایس او پجّار، ھک دے تھریک ءُ دگہ سیاسی ءُ چاگردی گلانی راھشوناں بھر زرتگ ءُ یکجاھی درشان کتگ-

ڈاکٹر ماہ رنگ بلوچ ءَ چاگردی رسانکدر ءَ ایکس ءَ شنگ کتگیں درشان ءِ تہ ءَ گْوشتگ کہ من گریشگ ءَ بیتگیں ریاستی پوج ءِ زُلم زوراکی ایر جتگ گْوشتگ کہ مروچی سھب ءَ گریشگ ءِ دمگ کوچو ءَ سی ٹی ڈی ءَ لوگانی سر ءَ بیڑبرتگ بازیں مردمے آوار جتگ ءُ بیگواہ کتگ اَنت زالبولاں ھوار بازیں مردمے ٹپی بیتگ اَنت-

آئی ءَ گْوشتگ کہ شاہ جان ء سلیم، گوھر دین ء ھیر جان، مھم جان ء لال بخش، میار ء لال بخش، محمد عارف ء عبدالرحمن ءُ منیر ء شبزو ھوار اَنت- ٹپی ءُ زورانسری بیگواہ بیتگیں منیر ء پت ءُ مات ءَ ھوار بازیں مردمے ھوار اِنت-

آئی ءَ گْوشتگ کہ پوج ءَ لوگاں ساڑی ئیں دو پرپٹ، دو لکّ کلدار، ھشت موبائل ءُ دگہ گرانبھائیں ساز ءُ سامان ھم وتی ھمراھی ءَ برتگ اَنت ءُ تیرگواری کتگ لوگاں سولر سسٹم تباہ کتگ اَنت-

آئی ءَ گْوشتگ کہ ریاستی پوج ءِ اے زُلم ءُ زوراکی ءِ بگیری ءِ دمگ مردماں بلوچ یکجھتی کمیٹی ءِ ھمراھی ءَ نندانک داتگ – ڈاکٹر ماہ رنگ ءَ انسانی ھکانی ءِ گلاں چہ دزبندی کتگ کہ اے وئیل ءِ درگت ءَ گامگیج بزور اَنت ءُ بلوچ راج ءِ اے وئیل بگیری ءَ شریں وڑے ءَ توار چست بہ کن اَنت-

اوگانستان ءُ پاکستان ءِ بازیں جاھاں گوستگیں زمین چنڈ سما کنگ بیتگ-

پاکستان ءِ اُستان ھیبرپکتونکوا ءِ بنجاھی شھر پشاور ءُ آئی ءِ کش ءُ گوراں زمین چنڈ سما کنگ بیتگ – زمین چنڈ ءِ زور ریکٹر اسکیل ءَ پنچ ریکارڈ کنگ بیتگ-

باجوڑ، دیر بالا، ھیبر ءُ سوات ءَ زمین چنڈ سما کنگ بیتگ-

ھمے وڑ اوگانستان ءِ میڈیا ءِ گوشگ انت اوگانستان ءِ بنجاھی شھر کابل ءَ زمین چنڈ سما کنگ بیتگ-

اوگان میڈیا ءِ رد ءَ زمین چنڈ اوگانستان ءِ بازیں شھراں سما کنگ بیتگ بلے دگہ تاوانانی بارو ءَ سرپدی بیتگ –

زمین چنڈ پیما ءِ بنجل ءِ رد ءَ زمین چنڈ ءِ بنجل کوہ ھندوکش ریجن ءَ بیتگ کہ آئی ءِ جھلانکی 211 کیلو میٹر ریکارڈ کنگ بیتگ-

ھیبر پکتونکوا ءِ دمگ بنوں ءَ امن مارچ جنزینگ بوگ ءَ اِنت کہ چریشی ءِ سبب ءَ مارکیٹ ءُ واپاری بنجلانی بند کنگ ءِ جار پرینگ بیتگ-

اے امن مارچ ءِ درچ ءَ آدینگ ءِ روچ ءَ دراھیں دکان ءُ مارکیٹ بند انت ءُ دگ بندی ھرتال گندگ بیت اِنت-

میڈیا ءِ نمائندگانی رد ءَ اے وھد ءَ زھرشانی ءَ آیوکیں مردماں گیشتر امن ءِ نام ءَ کلوہ سر کنگ ءَ اسپیتیں گد گورا کتگ ءُ ایشانی دستاں اسپیتیں بیرک ھم ھست اَنت-

تاجر برادری ءَ جار جتگ کہ سرجمیں بنوں ءِ شھر ءِ دراھیں واپاری بنجل بند انت ءُ دراھیں واپاری برکاری مھتل کتگ اَنت-

اے امن زھرشانی پریٹی گیٹ چوک ءَ بندات بیتگ ءُ شھر ءَ ھواریں دمگاں چہ مردم کاروان ءِ دروشم ءَ ھوار بوگ ءَ اَنت-

امن زھرشانی ءَ لکی مروت، کرک،گوریچانی وزیرستان ءِ مھلوک گمانی رنگ ءَ کاروان ءِ دروشم ءَ بنوں ءَ سربنت اِنت-

امن مارچ ءِ بنگپانی رد ءَ زھرشانی پریٹی گیٹ چوک ءَ داں نورنگ چوک ءَ نیمروچ ءِ دو ءَ زھرشانی پند جنت اِنت-

زانگ بہ بیت بدامنی ءُ ناشرکاری ءِ اے دور ءِ سبب ءَ دمگی سروکانی نیمگ ءَ نوزدہ جولائی ءَ امن مارچ ءِ کال دیگ بیتگ کہ چریشی ءَ بازیں سیاسی رھشون، چاگردی مھلوک ءُ تاجر برادری ءَ بھر زیرگ ءِ مِنت کنگ بیتگ اَنت-

گوستگیں روچ ءَ دمگی آلم ءُ دمگی سیاسی سروکانی نیمگ ءَ اے جار پرینگ بیتگ ھمینکس سلاہ بندیں مردم بنوں ءُ آئی ءِ کش ءُ گوراں ھست اَنے آ دمگ ءَ یل بہ کن اَنت ءُ بہ رو اَنت-

لھتے ھنچیں ھال ھست کہ جار ءَ پد بنوں ءَ لھتے مردماں دراتک ءُ شتگ اَنت بلے لس مھلوک ءِ نیمگ ءَ اے گپ ءِ راستی نہ بیتگ-

مسیتانی پیش امان، تاجر ءُ چاگردی باسکاں ھواریں زھرشانی ءَ چاگردی ترامجاھاں پوسٹس شنگ کتگ ءُ گوشتگ کہ پوج ءُ سرکار ءَ تالبان ءَ را بنوں ءَ سِی ءُ ھپت بنجل ءِ جوڑ کنگ ءِ اجازت داتگ –

بلوچستان ءِ دمگ ھزدار ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ جاڑیگیں مردیناں ھوار زالبول ءُ زھگ گوں توپکانی کندانکاں جتگ ءُ زدگ کتگ انت- وئیل ءِ ھلاپ ءَ دمگی مردماں زھرشانی کنان ءَ مزن شھدگ بند کتگ-

ھالانی سر بوگ ءَ مروچی سھب ءَ ھزدار گریشہ ءِ ھند کوچہ یونین کونسل گونی ءَ پاکستانی پوج سی ٹی ڈی ءَ یک لوگے ءِ سر ءَ بیڑ برتگ ءُ شاہ جان ء سلیم جان، گوھر دین ء خیر جان، مھمد جان ء لال بکش ، میار ء لال بکش، مھمد عارف ء عبدالرھمان، منیر اھمد ء سبرو ساجدی ءَ ھوار زالبول ءُ زھگ ٹپیگ کنگ بیتگ اَنت-

دمگی مردمانی رد ءَ پوج ءِ تیرگواری ءَ لال بکش ء ابراھیم ءُ سبرو ء ھمل ءِ لوگاں جاڑیگیں سَے زالبول ٹپی بیتگ اَنت-

دمگی مردمانی رد ءَ ھمے وھد ءَ پورسز ءِ کارمنداں لوگاں جاڑیگیں دو پرپٹ، دو لَک کلدار ءُ ھشت موبائل گون وت برتگ انت ءُ لوگ پرشت ءُ پروش کتگ ءُ سولر سسٹم اش تیرگواری کتگ ءُ ناکارہ اش کتگ انت-

وئیل ءِ ھلاپ ءَ کھول بلوچ یکجھتی کمیٹی ءِ ھواری ءَ ھوار بیتگ ءُ گریشہ گری ءَ داں بڑو نال ءَ شھدگ بند کنگ بیتگ ءُ چریشی ءَ روانی مھتل اَنت-

راجیْ مُچّیْ

تَاھِرْ میؔرْ

دی بلوچستان پوسٹ

زانت ءُ پجار راجی مُچی اِنت
کرد ءُ کردار راجی مُچی اِنت
گوں مزاریں ھمبل ءُ دوستاں
زیب ءُ زیبدار راجی مُچی اِنت

راج ءِ سروک مھرنگ ایں مادر
چو چراگ ءَ شھمیت گوادر
شوھاز ءَ پِت ءُ براتانی
دست ءَ اَنت مشعل گھارانی
شنک من بہ باتاں سد رند ءَ
ھمراہ بہ باتاں ھر پند ءَ
جھد ءَ سلام اِنت کرد ءَ سلام
پہ ڈیھ ءَ چست بیتیں ھمک گام
وت واجہ اِنت ڈن ڈگارانی
ہمراہ بئیں برات گھارانی
مئے راج ءِ رژنائیں باندات ءِ
سر ءُ سوجکار راجی مُچی اِنت

تہ جند ءَ بہ زانئے ھور بہُ بو
داں وس تی روتیں گون بہُ بو
پہ باندات ءِ وتی پدریچ ءَ
شومیں بداں دور دئے آچ ءَ
راھے درکپ ءُ کردے بہ ساچ
نام یے درار تو چو بالاچ
مکران ءَ گِر تا بولان ءَ
بُرّاناں زلم ءِ پندان ءَ
پاد تراول اَنت ءُ سر ھون
مستاگ رژن ءِ مارا گوں
برمش آواز شھم چراگانی
شھر ءُ بازار راجی مُچی اِنت

ما چمّاں سمّی ءُ سیما ءِ
گنداں واب ءَ کریمہ ءِ
گندیں وتی ما باری ءَ
بئے چو سمّل ءُ شاری ءَ
لالا، شیر، غلام مھمد ءِ
ما پگر ءَ داریں زاھد ءِ
ما کمبر چاکر الیاس آں
سوچیں ترا گوز ءُ آساں
شوھاؔز، مبارؔک، گُلؔ مئیگاں
آشوب ءِ ھر لبز، پُل مئیگاں
میؔر ءِ ھر لبز ندر پہ ڈیھ ءَ
گال ءُ گالوار راجی مُچی اِنت