TBP Balochi

بلوچستان ءِ بنجاھی شھر شال ءَ بی ایم سی ءَ بلوچستان ءِ نامداریں اکسکار کمانچر بلوچ ءِ اکسانی ایگزیبیشن مروچی دومی روچ ءَ ھم برجاہ اِنت –

اے ایگزیبیشن گوستگیں روچ ءَ بولان میڈیکل کالج ءَ ماں بلوچستان ءِ نمیران بیتگیں آشوب ءِ شائر مبارک کازی ءِ نام ءَ پنام دیگ بیتگ –

اے اکسانی ایگزیبیشن ءَ گوستگیں روچ ءَ ھپتاد ءُ پنچ اکسانی پریم بھا بیتگ اَنت ءُ بازیں کچے ءَ مردماں اکسانی گِندُگ کتگ بیتگ –

ھمے وڑ ءَ بلوچ نودربر رھشون ڈاکٹر مھرنگ بلوچ ءَ ھم ایگزیبیشن ءِ تر ءُ تاب کتگ ءُ اود ءَ کمانچر بلوچ ءِ اکس زرتگ ءُ وتی پیس بک وال ءَ پوسٹ کتگ ءُ گوشتگ’ کمانچر بلوچ ءِ لوٹک ءِ منت گپتگ ءُ گوشتگ کہ آئی ءِ اکسکاری ستاہکرزی اِنت ءُ شال ءِ دراھیں مردماں گوں لوٹ ھمیش اِنت آ بیا اَنت ءُ کمانچر ءِ کرد ءَ بہ ساڑا ءَ اَنت‘-

ھمے داب ءَ مروچی ھم دومی روچ ءَ بی ایم سی ءَ کمانچر بلوچ ءِ اکسکانی ایگزیبیشن برجاہ اِنت ءُ اود ءَ مردم آیگ ءُ اکسانی چارگ ءُ زورگ ءَ اَنت-

دومی نیمگ ءَ اکسانی ایگزیبیشن ءِ ھواری ءَ گندگ بیت اِنت اود ءَ بلوچ دودمان ءِ ساز ءُ سامان ھم ایر کنگ بیتگ اَنت-

زانگ بہ بیت کمانچر بلوچ بلوچستان ءِ ھما اکسکارانی تہ ءَ اِنت کہ آئی ءَ وتی نیزوریں کوپگاں مزنیں کردے پیلو کتگ –

کمانچر بلوچ ءَ گوستگیں روچاں دی بلوچستان پوسٹ ءِ ڈاٹا اسٹوری ءَ گپ جنان ءَ گوشتگ کہ من کساس ھپت ھزار ءَ گیش اکس کش اتگ انت کہ بلوچستان ءِ جتا جتائیں ھند ءُ دمگانی ئیگ اَنت-

بلوچی زبان ءِ ازمکار ظھور فضل ءِ تامر لولان ماں گوستگیں شپ ءَ بلوچستان ءِ بنجاھی شھر شال ءَ بی ایم سی ءِ ھال ءَ اسکرینگ پیشدارگ بیتگ کہ چریشی ءَ بازیں کچے ءَ نودربراں بھر زرتگ –

لولان تامر بلوچی زبان ءِ ازمکار ظھور فضل ءُ آئی ءِ ٹیم ءَ گچینی رنگے ءَ جوڑ کرتگ ءُ آ بلوچستان ءِ وانگجاھاں پیشدارگ بوگ ءَ اِنت-

چد ءُ پیش تامر اوتھل یونیورسٹی، بلیدہ ءِ سرجمیں وانگ جاہ، تربت جنکانی نرسنگ کالج، گرلز ماڈل، مند، کوھاڈ، نزر آباد، ھوشاپ، پنجگور، پروم، گنز، کلمت ءُ اورماڑہ پیشدارگ بیتگ-

ظھور فضل ءَ دی بلوچستان پوسٹ ءَ گوں گپ کنان ءَ گوشتگ کہ تامر دگہ جاھاں ھم پیشدارگ بیت اِنت –

آئی ءَ گوشتگ کہ گوادر، تربت یونیورسٹی، پسنی، ھاران، ھزدار،سرگودھا یونیورسٹی ءِ پیشدارگ ءِ جاراں نوکیں جن ایں اے کہ اے جاھاں پیشدارگ بیت اِنت-

آئی ءَ گوشتگ کہ تامر ءَ شال ءَ بازیں کچے ءَ مردماں بھر زرتگ ءُ مروچی دوبر تامر ماں بی ایم سی ءَ پیشدارگ بیت اِنت ءُ آئی ءَ چاروک ءُ شرپ بکشوکانی منت گپتگ-

ظھور فضل ءُ آئی ءِ تامر ءِ ھواریں ٹیم ءَ گوشتگ کہ اے تامر پہ نودربراں گچینی رنگے ءَ جوڑ کنگ بیتگ ءُ ھمک جاہ ءَ پیشدارگ بوگ ءَ ایں-

آئی ءَ گوشتگ کہ مئے جھد ھمیش اِنت ھمک جاہ ءَ ھستیں نودربراں اے تامر ءَ پیش بہ دار ایں ءُ دانکہ نودربراں ھواریں تامراں چیزے دربرت بہ کن اَنت-

زانگ بہ بیت بلوچستان ءَ تامرکاری ءَ پہ تامرکاراں بازیں چیزانی آسراتی نیستی ءَ ابید آ ھم وتی تامراں کنگ ءُ پیشدارگ ءَ آں-

لولان تامر بنداتی تامر اِنت کہ آ اے کساس ءَ بازیں جاھاں چارگ بوگ ءَ ایں کہ آئی ءِ سوجکار ظھور فضل اِنت ءُ آئی ءَ تامر بلوچستان ءِ دمگ کیچ ءَ ھواریں دمگاں اکسبندی کرتگ ءُ جوڑ کتگ-

اسرائیل ءِ لشکر ءَ فلسطین ءَ غزہ ءِ پٹی ءِ سر ءَ ڈرون اُرش کتگ-

ھال سر کنوکیں ادارہ اے ایف پی ءِ رد ءَ شمبے ءَ ھردوکیں نیمگانی مردماں گوشتگ اے اُرش ترندیں زھرشانی ءَ پد کنگ بیتگ ءُ اسرائیل ءِ تیرگواری ءَ فلسطین ءِ سَے مردم زدگ بیتگ اَنت-

بیگاہ ءِ وھد ءَ کنگ بیتگیں اُرش ءَ اسرائیل ءِ لشکر ءِ ٹاھانی رد ءَ حماس نشانگ کنگ بیتگ-

اے اُرش ھنچیں وھدے ءَ کنگ بیتگ کہ وھدیکہ اسرائیل ءِ نیمگ ءَ غزہ ءِ راہ ءِ سیمسر اریز کراسنگ بند کنگ ءَ پد اد ءَ ھمک روچ زھرشانی بوگ ءَ اَنت-

اسرائیل ءِ لشکر ءِ درشان ءِ رد ءَ ڈرون ءَ ناشرکاریں گل ھماس ءِ پوجی پوسٹ نشانگ کتگ کہ ھمے دمگ ءَ گوں بندوگ اِنت ءُ اد ءَ ترندیں زھرشانی بوگ ءَ اَنت-

درشان ءِ رد ءَ ڈرون اُرش ءَ پیسر سیمسری دمگ ءَ اسرائیل ءِ لشکر ءَ تیرگواری کتگ بیتگ بلے داں انگت ءَ اے گوشگ نہ بیتگ کسے مرتگ یا زدگ بیتگ –

فلسطین ءِ سیکورٹی ءِ کارمندے ءَ اے ایف پی ءَ گوشتگ کہ اسرائیل ءِ بالیگ ءَ غزہ ءِ شھر ءِ رودراتکی دمگ ءَ ھماس ءِ چیردستی ءِ ھند نشانگ کتگ بلے ایشی ءَ چہ کسے ءِ بیرانی ءُ زدگ بوگ ءِ اھوال دیم ءَ نیتکگ اَنت-

دمگ ءَ جاڑیگیں اے ایف پی ءِ یک اھوالکارے ءِ رد ءَ زھرشانی ءِ بنداتی روچ ءَ فلسطین ءِ زھرشانی کنوکاں سیمسر ءَ باڑ ءِ اوشتوکیں اسرائیل ءِ پوجیانی گون ءَ دیم پہ دیمی بیتگ –

زھرشانی کنوکاں ٹائر مانداشتگ ءُ اسرائیل ءِ لشکر سنگ جتگ – غزہ ءِ وزارت جانسلامتی ءِ رد ءَ اسرائیل ءِ لشکر ءِ تیرگواری فلسطین ءِ سَے مردم زدگ بیتگ-

سال دوھزار ءُ ھبدہ ءِ گچینکاری ءَ ھماس ءِ سوبمندی ءَ پد اسرائیل ءَ غزہ ءِ پٹی ءِ برزی ءُ جھلی ءُ زری راہ ءُ در بستگ اَنت-

ایریز کراسنگ ءِ بندش ءِ سبب ءَ غزہ ءُ ھزارانی فلسطین ءِ باسک اسرائیل ءِ پترگ ءَ دارگ بیتگ اَنت ءُ ایشی ءِ پژدر ءَ اسرائیل ءِ یک این جی او گیشا ءَ ایر جتگ ءُ اے انسانی سر ءَ ناانساپی گوشتگ-

غزہ ءَ فلسطین ءِ شھریاں اسرائیل ءِ کار کنگ ءَ پرمٹ دیگ ءَ مھمکہ ءَ کساس ھژدہ ھزار ءُ پنچ سد مردم کراسنگ ءَ شتگ اتکگ انت-

بلوچ لبریشن آرمی ءَ وتی شنگ کتگیں یک درشانے ءِ تہ ءَ گْوشتگ کہ کیچ دمگ تربت ءُ تمپ ءَ دو جتاجتائیں اُرشاں زورگریں پاکستانی پوج ءُ ھال اھوالی ٹاور نشانگ کنگ زمہ واری منّ اِتگ اَنت-

بی ایل اے ءِ سرمچاراں بیست ءَ دو ستمبر ءِ شپ ءَ تربت ءِ دمگ آپسر ، سلالہ بازار ءَ زورگریں پاکستانی پوج ءِ پوسٹ ھما وھد ءَ گوں دستی بمب اُرش ءَ نشانگ کتگ وھدے دُژمنیں پوج ءِ دو گاڑی ھمے ھند ءَ سر بیتگ اَنت- تراک ءِ آسر ءَ زورگریں پوج ءَ مزنیں کچے ءَ جانی تاوان چست کنگ کپتگ-

دگہ یک اُرشے ءَ بی ایل اے ءِ سرمچاراں گوستگیں شپ ءَ تمپ ءِ دمگ میرآباد ءَ یوپون شرکت ءِ یک ھال ایوالی ءِ ٹاور ءِ مشینری مانداشتگ ءُ ناکارہ کتگ اَنت-

بلوچ لبریشن آرمی اے دوئیں اُرشانی زمہ واری ءَ منّ اِیت-

 بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں 23 ستمبر ءَ کیچ ءِ ھند بالگتر گڈگی ءَ برجاھیں پاکستان ٹیلی کمیونیکیشن لمیٹڈ (پی ٹی سی ایل) ءِ موبائل پون، یوپون ءِ ٹاور ءِ سر ءَ اُرش کُرتگ ءُ مشین ءُ سامان مانداشتگ اَنت۔

 جارکش ءَ گوشتگ بلوچستان ءِ جتائیں دمگاں آجوئیں لوٹوکیں جھدکارانی ءُ دوزواھانی نشان کنگ ءُ زانگ ءَ موبائل پون ءِ ٹاور مِک کنگ بیگ ءَ اَنت۔

بلوچستان لبریشن فرنٹ اے اُرش ءِ زمہ واری ءَ منّ ایت ءُ داں بلوچستان ءِ آجوئی ءَ مئے اُرش برجاہ بنت۔

لورالائی ءَ دو گاڑیانی ٹکر ورگ ءِ سبب ءَ زالبول ءُ زھگاں ھوار چار مردم بیران بیتگ اَنت-

ایدھی ءِ واکدارانی رد ءَ لورالائی ءِ نزیک ءَ شیر جان کڈی ڈی جان شھدگ ءَ پروبکس ءُ پک آپ گاڑی ءِ میان ءَ بیمناکیں وئیلے پیش اتکگ کہ چریشی ءِ سبب ءَ چار مردم بیران بیتگ اَنت، پنچ مردم زدگ بیتگ اَنت-

وئیل ءَ بیران بیتگیں مردمانی تہ ءَ زھگ، زالبول ءُ دو مردین ھوار اَنت، بیران ءُ زدگ بیتگیں مردم سول ھسپتال لورالائی ءَ برگ بیتگ اَنت-

لورالائی ھسپتال ءِ رد ءَ وئیل ءَ زدگ بیتگیں مردمانی پجار صفیہ ء عبداللہ اُمر چاردہ سال، سی سالی ئیں فیض مھمد ء خان مھمد، نصیب اللہ ءِ لوگ بانک زرمینہ،کائنات ء عصمت اللہ، عائشہ ء عصمت اللہ ءِ ناماں زانگ بیتگ اَنت-

بیران بیتگینانی پجار حمید اللہ ء عبداللہ اُمر سِی سال، عبداللہ ءِ لوگ بانک، عزت اللہ، رفیق ء عبداللہ اُمر نُھ سال ھوار اِنت-

بلوچ نیشنل موومنٹ ( بی این ایم ) ءِ سرکماش ڈاکٹر نسیم ءَ راجانی سنت ءِ مردمی اگبالانی پتر ءِ 54 می مدامی ئیں نیاد ءَ تْران کنان ماں بلوچستان ءَ پاکستانی لشکر ءِ مردمی اگبالانی بگیری ءِ کارپدانی نیمگ ءَ زیت دلگوش گْور کنگ ءِ لوٹ کرتگ۔

دیمروی ءِ اگبال ءِ پجیگ ءَ درسیں مردمی اگبال ، شھرمنندی ، سیاسی ، گزرانکی ، چاگردی ءُ ربیدگی اگبالانی گیش کنگ ءُ پھریزگ ءِ سر ءَ پچیں تْران ءِ میان ءَ ڈاکٹرنسیم ءَ ناگیگیں جاور ءِ سر ءَ گپ جتگ کہ بلوچ راج ئِے دیمپان اِنت۔آئی ءَ پاکستانی لشکر ءِ دست ءَ بلوچ ءِ چکچینی ءِ بارہ ءَ سھی کرتگ ، کہ ایشی ءِ تہ ءَ زوربیگواھی، کوش ، آزار دھی ، بیھار دیگ ءُ لوگانی تباہ کنگ ھوار اَنت ، بلوچ راج ھم روچ اے ویلانی آماچ اِنت۔

بی این ایم ءِ مردمی اگبالانی تک پانک ءِ بنشون ءَ ڈاکٹر نسیم ءَ بلوچستان ءِ ناگیگیں مردمی جاورانی سر ءَ دلگوش گْور کنائینگ ءَ کچ ءُ شمار گْوشتگ اَنت ، آئی ءَ درائینتگ ایوک ءَ اگست ءَ بلوچستان ءَ 64 زور بیگواھی ءُ سئے کوش ءِ ویل پیتبند کنگ بیتگ۔

ھمے وڑ ءَ ھمے سال ءِ 15 مئی ءَ استاد نجمہ ءَ چہ پاکستانی لشکر ءِ دست ءَ جنسی آزار دھی ءِ بیھار ءَ وتکشی کرتگ۔اپریل 2021 ءَ دگہ ویلے ءَ ھوشاپ ءَ مراد امیر نامیں 13 سالی نودربرے پاکستانی لشکر ءَ جنسی زوراکی ءِ نشانگ کرتگ، آواران ءِ جاھمنند نورجان 20 مئی 2021 ءَ پاکستانی لشکر ءَ زور داتگ کہ آ وتی جنک ءَ لشکری بنجل ءَ بہ یار ایت ، چہ ایشی ءَ آ پہ وتکشی کنگ ءَ لاچار بیتگ۔

ڈاکٹر نسیم ءَ ھمے سال ءَ 28 اگست ءَ بیتگیں ویلے ءِ نیمگ ءَ ھم دلگوش پرینتگ کہ اے روچ ءَ نورھاتون نامیں جنینے چہ بلوچستان ءِ بنجاھی شھر شال ءَ چہ آمیدگس ءِ پرمان ءَ ڈن دزگیر ، بیگواہ ءُ گوں دو چکاں آزار ءِ آماچ کنگ بیتگ۔

وتی گْوشتانک ءِ گڈ سر ءَ آئی ءَ بلوچستان ءَ مردمی اگبالانی یکشل ءُ مزنیں بگیریانی رد ءَ زیت دلگوش ءُ گامگیج زیرگ ءِ سر ءَ زور داتگ ءُ گْوشتگ کہ اے سکا ھژدری اِنت کہ زیت گامگیج زیرگ بہ بیت۔

تیابدپی شھر گوادر ءَ پاکستانی پوج ءَ یک مردمے دزگیر کنگ ءَ پد بیگواہ کتگ-

بیگواہ کنگ بیتگیں مردم گوادر ءِ ھند پسنی ءَ آوار جنگ بیتگ کہ آئی ءِ پجار شھزاد ء اصغر ءِ نام ءَ زانگ بیتگ-

دمگی مردمانی رد ءَ بیگواہ کنگ بیتگیں مردم پسنی ءَ وارڈ نمبر ھپت ءِ جھمنند اِنت کہ گوستگیں دو روچ پیش 21 ستمبر ءَ مستانی ریک بازار ءَ چہ وانگ جاہ ءَ سھب ءِ ساھت یازدہ ءَ پوج ءَ دزگیر کتگ ءُ ناشناسیں جاھاں برتگ-

بیگواہ کنگ بیتگیں مردم گوستگیں سَے سالاں چہ ریک بازار ءَ وانگ جاہ ءِ چپراسی بیتگ کہ گوستگیں دو روچ پیش پوج ءَ دزگیر کتگ ءُ برتگ-

شائر ءِ آشوب: مبارک کازی

ٹی بی پی شونگال

بلوچی زبان ءِ نامداریں ءُ بے دروریں شائر مبارک کازی بلوچستان ءِ دمگ تُربت ءَ 16 ستمبر ءَ بیران بیتگ۔ کازی ءِ کَل ءُ کسارت آئی ءِ بنکی ھلک ءَ کنگ بیتگ۔

مبارک کازی راجدوستیں شائر یے ئِے بستار ءَ جتائیں جاھے ئے واھند اَت۔ آ 24 دسمبر 1956ء ءَ مکران ءِ پسنی ھنکین ءَ کھدہ امان اللہ ءِ لوگ ءَ ودی بیتگ۔

مبارک کازی بلوچی زبان ءِ تھنائیں شائر اِنت کہ آئی ءَ وتی زند ءِ تہ ءَ لس مھلوک ءِ نیمگ ءَ چہ بے کساس مھر ءُ شرپ رس اتگ، یک نیمگے کہ آئی ءِ اِشکی شئراں بے کساس دوست دارگ بیتگ اَنت دومی نیمگ ءَ آئی ءِ گھگیریں شئر ھم چاریں نیمگ ءَ گوشدارگ بیتگ اَنت ھاسیں پئیماں آئی ءِ گھگیریں شئر ھمک سَپِر ءَ گُشگ بیتگ اَنت۔

مبارک کازی ءِ شئر بلوچستان ءِ اَکس اَنت۔ کازی ءِ شئرانی تہ ءَ بلوچستان ءِ ابرمی براھداری، مھر ءُ دوستی، کماشانی چیدگ، راجی سرگُشتن، پہ ایردستاں درد، بلوچ ڈیھ ءِ آجوئی ءِ پرچار ءُ گھگیری ءِ درس بے کساس رس ایت۔

کازی ءِ شائری بلوچ لبزانک ءُ بلوچ گھگیریں جد ءُ جھد ءِ سر ءَ جھلانکیں نکش یل کُتگ، آئی ءَ وتی شائری بودناکی بلوچ مھلوک ءِ گھگیریں ءُ مکسد ءِ ھاتر ءَ ندر کُتگ بیتگ۔ کازی ءِ شئر تھنا ازم ءِ درشانی ءِ دروشم نہ اِنت بلکیں چاگردی بدلی ءِ تاکتوریں سرچمگ اَنت۔ آئی ءِ شائری ءَ بلوچ راجی آجوئی ءِ ھاتر ءَ جنگ کنوکانی دلانی تہ ءَ آس روک کُتگ ءُ گھگیری ءِ درس داتگ۔

کازی ءَ گوں دلیری ءَ جنگ زدگیں چاگرد ءِ تہ ءَ برجاھیں اوشت ءِ پروشوکیں لچہ نبشتگ کہ اِیشانی مُل آئی ءَ زندان ءَ بندیگ بیتگ ءُ داتگ۔

مبارک کازی ءَ وتی زند ءِ تہ ءَ ورنائیں بچ کمبر ءِ نمیرانی ءِ گم سگگ کپتگ، کہ اے پہ آئی ءَ چہ کیامت ءَ کمتر نہ بیتگ بلے کازی وتی ارادگانی تہ ءَ لرزگ نئیتکگ ءُ گھگیری ءِ راہ کپگ ءَ نیشتگ۔

مبارک کازی ءِ شائری ءَ بلوچ چاگرد ءِ ھمک تَک سانمند کُتگ ءُ آئی ءِ شائری راجی واھگانی جارکشی کنان اِنت۔ آئی ءِ شائری ءَ بلوچ وتن ءِ آجوئی ءِ پولکارانی ھاتر ءَ آدرش ءِ کار کُتگ ءُ بلوچ راجی جُنز ءَ مھکمیں بندوکی ءُ وتی شئرانی وسیلہ ءَ گوں آجوئی ءِ پرچار ءَ آ گھگیری ءِ بیرکدار جوڑ کُتگ۔

مبارک کازی ءِ لبزانکی بودناکیاں ابید، آئی ءِ شئر پہ یک جنگولے ءَ گھگیری ءِ درس اَنت، اِیشانی تہ ءَ تمردی ءِ رژنائی سرپوش اَنت ءُ ایردستانی ھاتر ءَ تاکت ءِ وسیلہ اَنت۔ مبارک کازی ءِ وراست، آجوئی ءِ جد ءُ جھد ءِ درس اِنت ءُ بلوچ راجدپتر ءِ تاکانی تہ ءَ آئی شائری (مشعل راہ) بلوکیں کِشک اِنت، کہ اے آیوکیں پدریچاں سانمند کنان بیت ءُ آئی ءِ شئر آجوئی ءُ گھگیری ءِ بیرکدار بنت اِنت۔

روکپتی بلوچستان ءِ بنجاھی شھر زاھدان ءَ ایرانی پولیس ءَ تیرگواری کنان ءَ پِت ءُ چُک زدگ ءُ کشتگ اَنت-

گیشیں اھوالانی رد ءَ پولیس ءَ تیرگواری کتگ ءُ چُک کُشتگ ءُ پت زدگ کتگ –

بیران بیتگیں مردم ءِ پجار ھبدہ سالی ئیں مھمد دار ناروئی ء مھمد رضا دار ناروئی ءِ نام ءَ زانگ بیتگ ءُ زدگ بیتگین ءِ پجار مھمد رضا دار ناروئی ء عبداللہ ءِ نام ءَ زانگ بیتگ-

اھوالانی رد ءَ مھمد رضا ءِ سرین ءَ سَے تیر لگ اتگ ءُ چریشی ءَ پد آ خانم الا نبیا زاھدان ءِ نادراہ جاہ ءَ برگ بیتگ کہ آ آئی سی یو روم ءَ تھتیگ کنگ بیتگ –