گوادر ءَ بلوچ یکجھتی کمیٹی ءِ ’بلوچ راجی مُچی‘ ءِ زھرشانی نندانک یازدھمی روچ ءَ برجاہ انت

بلوچستان ءِ تیابدپی شھر گوادر ءَ مروچی یازدھمی روچ ءَ بلوچ راجی مُچی ءِ زھرشانی نندانک برجاہ انت –

بلوچ یکجھتی کمیٹی ءَ وتی شنگ کتگیں درشان ءَ گوشتگ گوستگیں روچ ءَ مھلوک ءِ میان ءَ دیوان برجم دارگ بیتگ اَنت کہ اود ءَ بلوچ یکجھتی کمیٹی ءِ رھشون ءُ مھلوک ءِ میان ءَ جتا جتائیں سرھالانی سر ءَ گپ ءُ تران بیتگ اَنت-

آئی ءَ گوشتگ راجی مچی ءِ نندوکیں مردمانی میان ءَ اے تپاکی بیتگ کہ بلوچ نسل کُشی ءِ ھلاپ ءَ اے جد ءُ جھد ءَ تیز کنگ المی انت ءُ بلوچستان ءِ لوگ لوگ ءَ اے گپ ءَ سر بہ کن ات-

آئی ءَ گوشتگ بلوچ راجی مُچی ءِ نندوکیں مردم ریاستی زوراکیاں ابید اے راجی مُچی ءِ بھر اَنت ءُ کوھیں اوپار ءَ نیشتگ اَنت-

آئی ءَ گوشتگ ریاست ءَ گوستگیں دَہ روچاں گوادر ءَ ھوار سرجمیں مکران کیامت آورتگ داں انگت ءَ گوادر ءَ ھوار مکران ءِ بازیں جاھاں انٹرنیٹ نیست انت ءُ دگ بند اَنت ءُ چریشی ءِ سبب ءَ وردنی ءُ درمانی نابروبری ءَ رس اتگ انت ءُ ایشی ءَ ابید گوادر ءَ آپ بند اش کتگ-

گوادر ءَ بلوش راجی مُچی ءِ سر ءَ ریاستی زوراکی ءُ زُلمانی ھلاپ ءَ اے وھد ءَ گوادر ءَ ھوار شال ، نوشکی، پنجگور ءُ تربت ءَ زھرشانی نندانک برجاہ اَنت-