گوادر ءِ لشکر ءِ انگر ءَ سداں دمگی مردم وتی لوگاں واتر بوگ ءِ ودار ءَ اَنت

بلوچستان ءِ تیاب دپی شھر گوادر مرچی یازدھمی روچ اِنت کہ بلوچ یکجھتی کمیٹی ءِ بلوچ راجی مُچی ءِ سر ءَ زوراکی دگانی بند کنگ ءِ سوب ءَ گوادر ءِ ھزاراں شھری چہ گوادر ءَ درکپگ ءُ گوادر ءَ روگ ءَ بے سوب اِنت-

گوادر ءِ یک نندوکے جاوید 26 جولائی ءَ پہ جنک ءِ الاج ءَ کراچی ءَ شتگ اَت بلے نو آ گوادر ءَ آتک نہ کنت ءُ وتی چکانی گوم ءَ ھب چوکی ءَ یک سیادے ءِ لوگ ءَ نشتگ جاوید ءَ دی بلوچستان پوسٹ ءَ گوں تران کنان ءَ گْوشتگ کہ 28 جولائی ءَ پد ما دو رند ءَ لوگ ءَ روگ ءِ جھد کتگ بلے پوج ءَ مارا پد ءَ دیم دات۔ ما وتی لوگ ءَ شُت نہ کن ایں۔ مئے باپار بندیں اد ءَ مئے کلدار کُٹ اِتگ اَنت-

آئی ءَ چہ بُرزتریں واکداراں دزبندی کتگ کہ گوادر ءِ ھزاراں شھری کہ آ دگہ ھند ءُ دمگاں گٹ اَنت آیاں راہ بہ دے اَنت۔

دی بلوچستان پوسٹ ءَ دزکپتگیں ھالانی رد ءَ ھلیجیں ڈیھ اومان، امارات، بھرین ءُ دگہ ڈیھاں کار کنوکیں بازیں شھری ھم گوادر ءَ بند اَنت، آیانی موکل ھلاس بوتگ اَنت بلے پوج ایشاں چہ گوادر ءَ درکپگ ءَ نہ دیگ ءَ اِنت۔ ءُ آیانی کار ءُ روزگار ءِ سر ءَ ھترہ اِنت۔

گوادر ءَ چہ رستگیں ھالانی رد ءَ شھر ءَ وردن ءُ وراک ءِ کمی بوتگ۔ کراچی ءُ ایران ءَ چہ آیوکیں ورگی ٹرک دہ روچ اِنت کہ پسنی زیرو پوائنٹ تلار ءُ کنڈ ملیر ءَ پاکستانی پوج ءَ اوشتارینتگ اَنت۔

شھریاں لوٹ کتگ کہ گوادر ءِ انگر زوت ھلاس کنگ بہ بیت ءُ چو مدامی وڑ ءَ مردماں زندگی گوازینگ ءَ بل اَنت

شہریاں گْوشتگ کہ بلوچ راجی مچی ءَ بھر زورگ ءُ ھمراھداری ءِ پُشدر ءَ گوادر غزہ سیمسر ءَ مَٹ کتگ-

اوتھل ءَ ھال رسگ ءَ اِنت کہ چہ کراچی ءَ گوادر ءَ روگ ءَ اِنت النوید بس ءَ را گوستگیں شپ ءَ چہ پاکستانی پوج ءَ زیرو پوائنٹ ءَ اوشتارینتگ ءُ بس ءَ زالبول ءُ زھگ سوار اَنت کہ آ سکیں گرم ءِ سبب ءَ دلسیاھیانی دیمپان اَنت-

گوادر ءِ اسمبلی ءِ باسک ھدایت الرحمان ءَ گْوشتگ کہ سرکار گوادر ءِ راہ ءِ پچ کنگ ءِ کول ءَ پیلو کنگ ءَ نہ انت ءُ پوج مُدام دروگ بندگ ءَ اِنت۔ آئی ءَ گْوشتگ کہ گوادر ءِ انگر ھلاس کنگ بہ کنے ءُ راہ ءُ دگاں پچ بہ کنت-