TBP Balochi

روکپتی بلوچستان ءِ بنجاھی شھر زاھدان (دزاپ) ءَ آدینگ ءِ نماز ءَ پد زھرشانی کنگ بیتگ-

زھرشانی کنوکاں روانک ءِ دروشم ءَ مھلوک مُچ بیتگ اَنت ءُ اود ءَ زھرشانی کنوکانی دست ءَ پلے کارڈ دست ءَ بیتگ اَنت –

زھرشانی کنوکاں مولانا نقشبندی ءِ ھک ءَ اوگام جتگ ءُ ایشی ءِ ھواری ءَ اود ءَ زھرشانی کنوکاں ایرانی لشکر ءِ دست ءَ کُشگ بیتگیں مردمانی انساپ ءِ ھاتر ءَ اوگام جنگ بیتگ اَنت-

زھرشانی شھر ءِ دگانی سر ءَ تران بیتگ ءُ خامنہ ای سرکار ءِ ھلاپ ءَ زھرشانی کنگ بیتگ اَنت ءُ اود ءَ آیاں گوشتگ ’شما مئے برات کُشتگ انت ما شمارا کُش ایں‘ –

آیاں گوشتگ کہ مئے برات ءُ سیاد ءُ وارس شما مُپت ءِ بے گناہ ءَ کُشتگ انت ایشانی ھساب دیگی اِنت ءُ سرکار مارا انساپ بہ دنت ءُ کشوکاں بہ گر ات ءُ سزا بہ دنت-

آدینگ ءِ نماز ءَ پد انٹرنیٹ ھم بند کنگ بیتگ اَنت ءُ پد ءَ نیم ادار ءَ پد پچ کنگ بیتگ اَنت ءُ راہ ءُ دگانی سر ءَ سیکورٹی ترند کنگ بیتگ اَنت-

زانگ بہ بیت گوستگیں سال ءِ سِی ستمبر ءَ ایرانی لشکر ءَ زاھدان ءِ مکی مسیت ءِ کَش ءُ گوراں زھرشانی کنوکانی سر ءَ تیرگواری کتگ ات کہ اود ءَ بازیں ھسابے ءَ مردم بیران ءُ زدگ بیتگ ات اَنت-

آ روچ ءَ پد ھمک آدینگ ءِ روچ ءَ سِی ستمبر ءَ جمعہ خونین ءِ نام ءَ یات کنگ ءَ اَنت-

بلوچستان ءِ دمگ چہ مستونگ ءَ پاکستانی پوج ءَ یک مردمے آوار جنگ ءَ پد بیگواہ کنگ بیتگ-

بیگواہ بیتگیں ورنا ئے پجّار نودربر ملک جنید ء بابو عرب جھمنند روینی پڑنگ آباد ءِ نام ءَ چہ بیتگ-

اے ورناہ پاکستانی پوج ءَ گوستگیں روچ ءَ بیگاہ ءِ وھد ءَ پڑنگ آباد بائی پاس نزیک ءَ رئیسانی پمپ ءَ چہ آوار جتگ ءُ چریشی ءَ پد آ دیم ءَ آرگ نہ بیتگ-

بلوچستان ءِ بنجاھی شھر شال ءَ ناشناسیں مردماں پولیس ءِ گاڑی نشانگ کتگ-

پولیس ءِ گوشگ اِنت شال ءِ کوچگی دمگ کچلاک ءَ گشت جنوکیں پولیس ءِ گاڑی ناشناسیں مردماں تیرگواری ءُ پد ءَ دزبمباں گوں اُرش کتگ-

پولیس ءِ رد ءَ اُرشانی تیرگواری ءَ پولیس ءِ یک کارندھے زدگ بیتگ کہ سول ھسپتال ءَ برگ بیتگ-

وئیل ءَ پد پولیس ءُ کمکی باسک وئیل جاہ ءَ سر بیتگ اَنت – پولیس ءِ نیمگ ءَ وئیل ءِ پٹ ءُ پول بوگ ءَ اِنت-

دومی نیمگ ءَ تحریک تالبان ءِ جارکش مھمد خراسانی ءَ اے اُرش ءِ زمہ واری من اتگ ءُ گوشتگ کہ گوستگیں شپ ءَ تحریک تالبان پاکستان ءِ مجاھدیناں پولیس ءِ گاڑی ءِ سر ءَ دزبمبے چگل داتگ ءُ پد ءَ پستول ءِ گون ءَ تیرگواری کتگ ءُ یک کارندھے کُشتگ ءُ دو زدگ کتگ انت-

روکپتی بلوچستان ءِ دمگ جاشک ءَ ناشناسیں مردماں ماھان کمپنی ءِ مشینری ساز ءُ سامان سوتکگ اَنت-

گیشیں اھوالانی رد ءَ جاشک ءَ دگ جوڑ کنوکیں ماھان کمپنی ءِ بلڈوزر ءُ گاڑی ءُ دگہ ساز ءُ سامان سوتکگ اَنت-

گاڑی جاشک ءِ ھند جگین ءَ ناشناسیں مردماں سپاہ ءَ بندوکیں کمپنی ماھان ءِ ساز ءُ سامان مانداشتگ انت-

اھوالانی رد ءَ ھمے کمپنی ءَ لس مردمانی بازیں زمینانی سر ءَ زورگری کتگ ءُ اود ءَ مھلوک ءَ ھم زھرشانی کتگ بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں روچ ءَ پنجگور ءَ دگ ءِ جوڑ کنوکیں یک شرکتے ءِ مشینری مانداشتگ انت-

جارکش ءَ گْوشتگ کہ بی ایل اے ءِ سرمچاراں میونسپل کمیٹی وشبود ءِ دمگ زنڈیں داز ءَ دگ جوڑ کنوکیں شرکت ءِ دو لوڈرز ءَ ھوار دگہ مشینری مانداشتگ ءُ ناکارہ کتگ اَنت-

جارکش ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت- بلوچستان ءِ وتواجھی ءَ تاں زورگریں پاکستانی پوج ءُ آئی ءِ ھمکارانی سر ءَ مئے اُرش برجاہ بنت-

چہ ڈیرہ بگٹی ءَ دگہ دو مردم پاکستانی پوج ءَ آوار جتگ ءُ بیگواہ کتگ اَنت وھدے کہ چہ تربت ءَ ھال اِنت گاڑی ءَ سوار سلاہ بندیں مردماں ورنایے آوار جتگ ءُ وتی ھمراھی ءَ برتگ گوں ءُ مند ءَ دو بیگواہ بیتگیں برات یل کنگ بیتگ اَنت-

چہ ڈیرہ بگٹی ءَ بیگواہ کنگ بیتگیں پت چُک ھوار اَنت، آیانی پجّار امام بخش ء پیر بخش بگٹی ءُ آئی ءِ چُک امام دین بگٹی نام ءَ چہ بیتگ اَنت-

اِھوالکارانی رِد ءَ اے مردم تھسیل سوئی ءَ چہ طوطا کالونی ءَ پوج دست ءَ بیگواہ کنگ بیتگ اَنت-

زانگ بہ بیت کہ ڈیرہ بگٹی ءَ لشکر کشی گوستگیں سیزدہ روچاں چہ یکشلہ برجاہ ءَ اِنت، لشکر کشی ءِ میان ءَ تنی وھدے پوج ءَ بیست ءُ شش ءَ گیش مردم زورانسری آوار جنی ءِ نشانگ کنگ بیتگ اَنت-

کیچ ءِ بُنجاھی شھر چہ تربت ءَ پشمبے ءِ روچ ءَ چہ آسکانی بازار آبسر ءَ میٹرک نودربر رازق بلوچ ء خالد بلوچ سرف گاڑی ءَ سوار سلاہ بندیں ناشناسیں مردماں وتی ھمراھی ءَ برتگ گوں-

ھمے وڑ گوستگیں روچ ءَ مند ھائی وانگجاہ چہ سورو ءَ بیگواھیں دوئیں برات آجو بیتگ اَنت- اے درگت ءَ کھول مردماں راست کُتگ ءُ گوشتگ کہ گوستگیں روچ ءَ چہ مند سورو ھائی وانگجاہ ءَ اے ٹی ایف پولیس ءِ دست ءَ بیگواھیں بیتگیں دوئیں برات عبدالحلیم ء محمد ءُ نور بخش ء محمد آجو بیتگ ءُ وتی لوگ ءَ سر بیتگ اَنت-

زورانسری آوار جنگ بوتگیں وانگجاہ ءِ ماسٹر ءُ بلوچی زبان ءِ شائر ءُ ازمکار رفیق اومان ءِ زھگ ءُ وارساں آئی ءِ آوار جنی ءَ نُھ سال سرجم بوگ ءَ تربت پریس کلب ءَ اھوالکاراں گوں تران کنان ءَ یکرندے پدا گوں سرکار، پوجی سروک، پاکستان ءِ چیف جسٹس ءُ چہ سیاسی پاٹیاں رفیق اومان ءِ یل کنگ ءں ھاتر ءَ کمک ءِ لوٹ کتگ –

اھوالکاراں گوں تران کنان ءَ رفیق اومان ءِ زھگ ءُ آئی ءِ وارساں گوشتگ کہ بیست ءُ یک ستمبر سال دوھزار چاردہ ءَ آ سرکاری کارے ءِ ھاتر ءَ محکمہ ایجوکیشن ءِ کارگس ءَ شُتگ ءُ کار سرجم کتگ ءُ واتر آیگ ءَ بوتگ کہ نیم راہ ءَ ناشناسیں مردماں ماں ڈنک ءِ نزیک ءَ آوار جتگ ءُ بیگواہ کتگ کہ پدا ھما انت مئے جھد کوشستاں ابید ھم یل کنگ نہ بوتگ –

آیانی گوشگ ات کہ رفیق اومان بل نگور ءَ سرکاری وانگجاھے ہیڈ ماسٹر بوتگ وھدیکہ اشی ءَ ھوار ا یک گشندھے بوتگ اے دوئیں کاراں ابید ناکہ آ ھچبر گس ءَ در اتکگ ءُ ناکہ دگہ گیرکانودی کاراں گوں آئی ءَ کار بوتگ، اگاں آوار جنوکانی نزیک اے دوئیں کاراں ابید دگہ درکانودی کاراں آئی دست مان بوتگ گڈا مارا سرپد کنگ بہ بیت تانکہ ما ھم بہ زانیں کہ ھئو آ کتکارے بلے اگاں آوار جنوکانی گور ءَ ھچ سبوت نیست گڈا پہ رب ءَ بہ چارے مئے اے نھیں سالانی ازیتاں بہ ترس ات آئی ءَ یل بہ کن ات تانکہ آئی یل کنگ ءِ وشی ءَ ما اے نھیں سالانی درداں بیھال بہ کنیں –

آیانی گوشگ ات رفیق اومان یل کنائینگ ءِ ھاتر ءَ وتی وس واس ءَ ھر ھما در ٹک اِتگ انت کہ مارا آئی ءِ یلا بوگ ءِ امیت بوتگ، ما گوں واکدارانی اپسراں دچار کپتگیں، وزیر ءُ گزیراں گند نند کتگ ھتاکہ انساپ رسگ ءِ گڈی دروازگ آمیدگس ءَ ھم وتی ارز سرکت بلے بدکسمتی ءَ اے ملک ءِ آمدگسی ترام ھم پہ بھا انت کہ اودا ھک رسگ ءِ امیت بس امیتے بلے ھئو ما لاچار ءُ بے وس انت چہ ھمے آمدگس ءَ انساپ ءِ لوٹ لاچار انت پرچاکہ ملکانی تہ ءَ آمدگس ھک دیگ ءِ چیدگ انت –

آیاں چہ پاکستان ءِ مزن وزیر، بلوچستان ءِ سروزیر ، پاکستان ءِ چیف جسٹس، پوجی سروک ءُ ملک ءِ درسیں سیاسی پاٹیاں چہ لوٹ کتگ کہ رفیق اومان ءِ یل کنائینگ ءَ مئے کمک ءَ بہ کن انت –

چہ شارجہ ءَ پاکستان ءِ چیریں ادارھانی کارمندانی دست ءَ زورانسری آوار جنگ بوتگیں راشد حسین بلوچ ءِ گھار فریدہ بلوچ ءَ وتی درشانے ءِ تہ ءَ گوشتگ کہ بلوچستان یک “برمودا ٹرائنگل ” ءِ جوڈ بوتگ کہ اودے جھمنند ھمک روچ بیگواہ بوگ ءَ انت ءُ جھان اشی ءَ چہ رب ءِ نیمگ ءَ آورتگینے پھمگ ءُ دلگوش دیگ ءَ نہ انت، جھان ءِ تہ ءَ ایمنی ءُ مردمگری منوگر ھم ھچ گوشگ ءَ نہ انت بلے ما وتی دوستیگیں مردماں بیھال کُت نہ کنیں، کہ آ کجام جاور ءُ ازیتانی تہ ءَ بنت –

آئی ءَ دیمتر ءَ گوشتگ کہ راشد حسین ءِ زورانسری آوار جنی ءَ پنچ سال سرجم بوگ ءَ انت اے پنچیں سال ما چوں ءُ گوں کجام درداں گوازینتگ انت کزا یکے بہ پہمیت بلے ھئو وتی دوستیگیں مردمانی یل کنائینگے ھاتر ءَ گڈی ساہ ءَ تاں وتی جھد ءَ برجاہ داریں ءُ ما امیت ءَ یل نہ دئیں اے جنگ ءِ تہ ءَ بلوچ ءِ ھمراہ بس بلوچ انت دگہ کس –

آئی ءَ گوشتگ کہ راشد حسین ءِ وش ءُ سلامتی یل کنائینگ ءِ ھاتر ءَ ما بیست ءُ چار ستمبر ءَ ایکس ءِ تہ ءَ کمپئن ءِ کنگ ءَ انت ءُ ما چہ درسیں انسان دوست ءُ انسانی ھکانی گلاں گوں لوٹ کنیں کہ منی برات یل کنائینگ ءَ وتی کرد ءَ پیلو بہ کن انت –

سندھ ءِ مزن شھر کراچی ءِ مزن شھدربرجاہ ءَ بلوچی زبان ءِ شائر مبارک کازی ءِ یات ءَ چراگ روک کنگ بوتگ –

بلوچ نودربرانی نیمگ ءَ گوستگیں روچاں نمیران بوتگیں بلوچی زبان ءِ نامداریں شائر “شائر ء آشوب” مبارک کازی ءِ یات ءَ ماں کراچی مزن شھدربرجاہ ءَ جنکانی ھاسٹل ءَ آئی ءِ اکس ایر کنگ بوتگ انت ءُ چراگ روک کنگ بوتگ ءُ آ دروت ندر کنگ بوتگ –

کراچی مزن شھدربرجاہ ءِ جنکانی ھاسٹل ءَ اے اولی رند انت کہ اے دابیں یاتگیری مراگش ءِ برجم دارگ بوتگ ءُ نودربراں بلوچی زبان ءِ نامداریں شائر دروت ندر کتگ –

زانگ بہ بیت بلوچی زبان ءِ نامداریں آشوبی ءُ مھری شائر نمیرانیں مبارک کازی شانزدہ ستمبر ءَ دوھزار بیست ءُ سَے ءَ اے جھان یل داتگ ءُ نمیران بوتگ – مبارک کازی ءِ یات ءَ بلوچستان ءَ ھوار دری ڈیھاں مراگشانی ایر کنگ ءِ درچ برجاہ انت ءُ پہ آئی ءَ بلوچ نودربر گل آزات ءَ شائر ء آشوب ءِ لقب پر کتگ –

بلوچستان ءِ دمگ پنجگور ءَ گوستگیں شپ ءَ ناشناسیں مردماں دگ جوڑ کنوکیں کمپنی ءِ مشینری مانداشتگ انت –

گیشیں ھالانی رِد ءَ وشبود ءِ ھند زنڈیں داز ءَ گوستگیں شپ ءَ ناشناسیں مردماں دگ جوڑ کنوکیں مشینری ءُ ایندگہ ازباب مانداشتگ ءُ در شتگ انت –

پولیس ءِ رِد ءَ ناشناسیں مردماں کہ آ کساس پنچ مردم بوتگ انت آیاں دوشی شپ اتکگ ءُ وشبود ءِ ھند زنڈیں داز ءَ دگ جوڑ کنوکیں کمپنی ءِ مشینری مانداشتگ انت –

ھال سربوگ ءَ پولیس ءَ وت ءَ ھما جاہ ءَ سر کتگ ءُ آس توسینتگ ءُ ناشناسیں مردمانی شوھاز بندات کتگ بلے تنی وھدی ناشناسیں مردم دزگیر کنگ نہ بوتگ انت ءُ ناکہ آیانی درگت ءَ گیشیں سرپدی رس اتگ –