TBP Balochi

گوریچانی امریکہ ءِ ڈیھ کینیڈا ءَ ناشناسیں مردماں چہ بھارت ءَ وارنٹ ایں سکھے کُشتگ ات –

گیشیں ھالانی رِد ءَ کینیڈا ءِ شھر ونیپیگ ءَ ناشناسیں مردمانی تیرگواری چہ بھارت ءَ پنجاپ ءِ جتائی ءِ لوٹوک ءُ بھارت ءِ سرکار ءِ وارنٹ ایں سکھ رھشون سکھ دیول سنگھ (سکھا دونیکے) کُشگ بوتگ –

در ملکی رسانکدرانی رِد ءَ سکھدول سنگھ ءِ نام بھارت ءَ وارنٹیں مردمانی لڑ ھوار بوتگ، بھارت ءِ ایجنسی این آئی اے ءَ ھم ایشی ءِ بگیری ءَ وارنٹ شنگ کتگ –

دومی نیمگ ءَ بھارتی رسانکدر ءَ دول سنگھ ءِ درگت ءَ گوشتگ کہ بھارت ءِ وارنٹیں گینگ وار ءِ باسک مرچی کینیڈا ءِ شھر ونیپنگ ءَ کشگ بوتگ –

درملکی رسانکدرانی رِد ءَ سکھدول سنگھ ءِ سیادی چہ بھارت ءِ دمگ پنجاپ ءَ بوتگ، کہ خالصتان تحریک ءِ منوگرے بوتگ، سکھدول سنگھ چہ سال دوھزار ھبدہ ءَ کینیڈہ اتکگ ءُ نشتگ –

اے وئیل انو ھنچیں وھدے ءَ دیم ءَ اتکگ وھدیکہ ماں کینیڈہ ءَ کشگ بوتگیں ھردیپ سنگھ نجر کوش ءِ درگت ءَ بھارت ءَ کینیڈا ءِ میان ءَ سپارتی گر ءُ چیل برجاہ انت –

چد ءُ پیسر کینیڈین سروزیر جسٹن ٹروڈو ءِ نیمگ ءَ درشان دیگ بوتگ اتگ کہ ماں کینیڈا ءَ کشگ بوتگیں سکھ رھشون ھردیپ سنگھ نجر ءِ کوش ءَ بھارت ءِ چیریں ادارہ (را )ءِ دست مان انت –

اے درشان ءَ پد کینیڈا ءِ بھارتی ایجنسی (را )ءِ سروک چہ ملک ءَ در کنگ بوتگ وھدیکہ بھارت ءَ کینیڈا ءِ بھتام رد کتگ انت ءُ پسوئی ءَ سنیٹر کینیڈین سفارت کار ملک ءَ در آیگ ءِ ھکم داتگ –

کینیڈا ءَ سکھ رھشون ھردیپ سنگھ نجر ءِ کوش ءَ پد بھارت ءُ کینیڈا ءِ میان ءَ پیداک بوتگیں گر ءُ چیلاں پد بھارت ءَ وتی دمگی مردمانی ھاتر ءَ ایڈوائزی شنگ کتگ کہ کینیڈا ءَ آ رد کتگ –

دومی نیمگ ءَ گوستگیں روچ ءَ کینیڈا ءَ سکھ ءُ مسلم رھشوناں چہ سرکار ءَ لوٹ کتگ ءُ گوشتگ کہ آ مئے مردمانی سر ءَ اے وڑیں وئیلانی گر ءُ دار ءَ گامگیج بہ زوریت –

زانگ بہ بیت ھردیپ سنگھ ھژدہ جون سال دوھزار ءُ بیست ءُ سَے ءَ ماں کینیڈا ءَ گوردوارے ءَ ڈن کشگ بوتگ –

ڈیرہ بگٹی ءَ لشکر کشی گوستگیں سیزدہ روچاں یکشلہ برجاہ ءَ اِنت، وھدے کہ نوکیں ھالانی رِد ءَ پاکستانی پوج ءَ اوچ ءِ نزیک ءَ دمگاں مرچی لشکر کشی ءِ میان ءَ دو براتاں ھوار سے مردم آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار علی محمد ء دل مراد بگٹی، نور محمد ء دل مراد بگٹی ءُ یار خان ء شاہ علی بگٹی ءِ نام ءَ چہ بیتگ اَنت-

دومی نیمگ ءَ اوچ ءِ دمگ چہ لاغر داوان ءَ دمگی مردمانی سے ٹریکٹر ھم پوج ءَ برتگ اَنت-

اِھوالکارانی گْوشگ اِنت کہ ٹریکٹر واھننداں اے ھم گْوشتگ کہ پوج ءَ توژگ پُجارینگ ءِ ھاتر ءَ تیل ءُ ھرچ ھم وت بکن اِت-

دومی نیمگ ءَ سوئی ءِ نزیک ءَ سوناری مٹ ءِ دمگ ءَ یک وانگجاھے بُنجلے ءَ مَٹ کنگ ءِ ھال اِنت-

دمگی اِھوالکارانی رِد ءَ بالگرد ھم یکشلہ درینجن ، گنڈوئی ءُ آسرئی ءِ دمگاں گشت کنگ ءَ اَنت-

بلوچستان ءِ دمگ چہ مستونگ ءُ لھڑی ءَ پاکستانی پوج ءَ دو ورناہ آوار جنگ ءَ پد بیگواہ کتگ اَنت-

گیشیں ھالانی رِد ءَ گوستگیں بیگاہ ءِ ساھت پنچ ءَ پوج ءَ ابدالطیف ء حاجی بابو بنگلزئی آوار جتگ ءُ ناشناسیں جاھے ءَ برتگ- اے ورناہ رکشہ ڈرائیور گوشگ بوگ ءَ اِنت-

ھمے وڑ سبی ءِ دمگ چہ لھڑی ءَ ھال اِنت کہ شوکت ء ساتھی سی ٹی ڈی ءَ دزگیر کتگ ءُ ناشناسیں جاھے ءَ برتگ-

کھول رِد ءَ بیگواہ کنگ بیتگیں دوستناکانی درگت ءَ ھچ وڑیں سرپدی نیست – آیاں تُرس اِنت کہ آ دگہ بیگواھیں مردمانی وڑ ءَ دروگیں میرے آیانی دوستناکاں کُش اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ رشید ء آدم ءُ اشرف ء گاجیان ءِ کوش زمہ واری منّ اِتگ ءُ گوشتگ کہ اے ھردو مردم ریاستی چاریگ بوتگ انت –

جارکش میجر گوھرام بلوچ ءِ رِد ءَ بلوچستان لبریشن پرنٹ ءِ سرمچاراں ھژدہ ستمبر ءَ آپسر تربت ءَ یک انٹلی جنس بیسڈ کارروائی یے ءَ زورگریں پوج ءِ یک چاریگ ءُ منشیات ءِ باپاری سیٹ عبدالرشید ء آدم جھمنند بلور کولواه تیرگْواری کُرتگ ءُ کُشتگ، گْوستگیں باز سال اِنت کہ پاکستانی پوج ءِ گْوشگ ءِ پَد ءَ تربت ءُ کولواه ءِ بازیں لشکرکشیاں پاکستانی پوج ءِ کمکارے ءِ کِرد ءَ پیلو کنگ ءَ بوتگ-

جارکش ءِ رِد ءَ ریاست ءِ چاریگ ءُ منشیات ءِ باپاری سیٹ عبدالرشید دوازدہ مئی ءَ گل ءِ ھمبل (میجر آسمی وپا ءُ ھمبلانی)سر ءَ ڈرون اُرش ءُ شھید کنائینگ ءِ مستریں کارست بوتگ- آئی جت کولواه ءِ جھمنند سیٹ شاکر ءِ کمک ءَ گل ءِ مڈیانی تہ ءَ ٹریکنگ ڈیوائس ئِے مان کُرتگ ءُ پاکستانی پوج ءَ آیانی نشون کنگ ءَ کمک کُرتگ – اے دُرسیں منّانک گل ءِ کِر ءَ پھریز اَنت ءُ وھدے کہ المی بہ بیت دُرسیں گْواچن راج ءِ دیم ءَ ایر کنگ بنت ءُ آیاں سرپد کن ایں –

میجر ءِ رِد ءَ ریاست ءِ چاریگ سیٹ عبدالرشید پہ وتی منشیات ءِ باپاری ءَ پاکستانی پوج ءِ کمک کنگ ءِ اوست ءَ بلوچ راجی سیتانی بگیری ءَ دُژمن ءِ کمکار جوڑ بوتگ ءُ بلوچ راجی زْرمبشت ءِ چاریگی ءَ کنگ ءَ بوتگ –

بی ایل ایف ءِ جارکش میجر گوھرام ءَ وتی درشان ءِ تہ ءَ دیمتر ءَ گوشتگ کہ سینزدہ ستمبر یک دگہ انٹلی جنس بیسڈ کارروائی ءَ بی ایل ایپ ءِ سرمچاراں پاکستانی پوج ءِ دگہ یک چاریگے اشرف ء گاجیان جھمنند ٹوبہ سکھن دزگیر کُرتگ ،دزگیری ءِ میان ءَ پٹ ءُ پول ءِ وھد ءَ راجی میاربار اشرف ء گاجیان منّ اِتگ کہ آئی گچک، سولیر ءُ راگے ءَ پاکستانی پوج ءِ لشکرکشیاں تچکی ءَ ھوار بوتگ ءُ ھمے جاھاں باز رند ءَ آئی ءَ گل ءِ ھمبلانی راھانی نشون داتگ ءُ راھانی بندگ ءَ ھم گون بوتگ- راجی میار بار ءِ وتی میارانی منّگ ءَ پد گل ءِ آمیدگس ءَ مرگ ءِ سزا داتگ ءُ کُشتگ –

جارکش ءِ رِد ءَ بلوچستان لبریشن فرنٹ چہ بلوچ راج ءَ دزبندی کنت کہ آ چہ ریاست ءِ چوشیں کمکارانی پندلانی بھر جوڑ بیگ ءَ وت ءَ پھریز بہ کن اَنت کہ مردمگری ءِ نام ءِ سر ءَ پہ کمو زرانی پُژدر ءَ ریاست ءِ لوٹ ءُ واھگانی سرجم کنگ ءَ کودکیں مردماں کارمرد کن اَنت –

ما ریاست ءِ ھما دُرسیں چاریگ ءُ کُشندہ ٹولی ءِ کارمنداں کڈن کن ایں کہ آ پہ ریاست ءِ گْوشگ ءِ پد ءَ بلوچ راجی زْرمبشت ءِ بگیری ءَ کہ ھما پندلانی بھر اَنت گل ءِ کِر ءَ آیانی دُرسیں کارپد ءُ کارستانیانی سرپدی ھست اَنت – بلوچستان لبریشن فرنٹ وھد وھد ءِ سر ءَ چوشیں مردمانی چیست ءُ ایرانی سر ءَ سَر بیتگیں ھالانی رِد ءَ آیانی بگیری ءَ گل ءِ راھبند ءِ رد ءَ نامینگ بنت ءُ پد ءَ آیانی بگیری ءَ ھر پیم کاروائی کنگ ءِ جُھد کنگ بیت –

میجر ءِ رِد ءَ بلوچستان لبریشن فرنٹ اے دوئیں راجی میاربارانی کوش ءِ زمہ واری ءَ منّ ایت ءُ بلوچ راج، چاگرد ءُ آجوئی زْرمبشت ءِ بگیری ءَ ریاست ءِ کار کنوکیں دُرسیں چاریگ ءُ چاریگاں کڈن کن ایں کہ سلکاری مہ کن اَنت – بی ایل ایپ بلوچ راجی سیتانی پھریزگ ءَ چوشیں مردمانی گِر ءُ دار کنگ ءَ برجاہ دار ایت ءُ آیاں پہ آیانی میارباریانی سر ءَ تُرندیں سزا دنت –

سربوتگیں ھالانی رِد ءَ بلوچستان ءِ بنجاھی شھر شال ءَ سلاہ بندیں مردماں رکشہ ڈرائیور آوار جنی ءَ پد کُشتگ، رکشہ گون وت برتگ، دومی نیمگءَ بلوچستان ءِ تیاب دپی دمگ گوادر ءَ ورنایے ءَوتکشی کتگ –

گیشیں ھالانی رِد ءَ رکشہ ڈرائیور شیر زمان گرگناڑی ءِ جون دشت ءَ دست کپتگ- کھول ءِ رِد ءَ سلاہ بندیں مردماں شیر زمان آوار جتگ ءُ کشتگ، آئی ءِ رکشہ گوں وت برتگ –

مروچی آئی ءِ کھول ءَشیر زمان ءِ جون چہ دشت ءَ دست کپتگ – کھول ءِ مردماں سرکار ءِ نادلگوشی ءُ واکدارانی بگیری ءَ سریاب کسٹم ءَ زھرشانی کنان ءَ دگ بند کرتگ –

دومی نیمگ ءَ بلوچستان ءِ تیاب دپی دمگ گوادر ءَ چہ ھمے ھال آیگ ءَ انت کہ یک ورنایے ءَ وت ءَ پاھو داتگ ءُ کُشتگ –

ھالانی رد ءَ بیران بوتگیں ورنایے پجار زاھد اِنت کہ آئی ءِ اُمر ھبدہ سال اِنت ءُ آ گوادر ءِ ھند کلانچ ءِ نندوک انت –

بیران بوتگیں ورنایے ءِ جون پہ ھژدری چار ءُ ٹپاس کنگ ءَ نادراھجاہ ءَ برگ ءَ بوتگ ءُ پدا رند ءَ کھول ءِ دست ءَ دیگ بوتگ- ورنایے وتکُشی ءِ سوب انگت زانگ نہ بوتگ کہ کجام سوب ءَ آئی ءَ وتکشی کتگ –

زانگ بہ بیت بلوچستان ءَ روچ پہ روچ وتکُشی کنوکانی درچ گیش بوان انت – کہ آیانی تہ ءَ گیشتریں کچ بلوچ ورنایانی انت –

بلوچ رھشون واحد کمبر ءَ وتی درشانے ءَ گْوشتگ کہ چوش بلوچستان ءِ آدگہ دمگاں ڈیرہ بگٹی ءَ ھم پاکستانی لشکر ءِ لشکرکشی برجاہ اِنت۔مردم پہ زور بیگواہ کنگ ءُ کُشگ بیگ ءَ اَنت۔

آئی ءَ گْوشتگ کہ چونائی ءَ چہ ھپتاد سالاں گیش اِنت کہ بلوچ سرڈگار پاکستان ءَ دستیگ کرتگ،بلوچ ءِ سر ءَ رستری زوراکی برجاہ اَنت۔ھزارانی کچ ءَ بلوچ بیگواہ ءُ شھید کنگ بیتگ۔

آئی ءَ گْوشتگ کہ زورگریں پاکستانی ریاست ءَ انیگیں وھد ءَ بلوچستان ءِ ھمک دمگاں وتی زوراکی گیش کرتگ اَنت۔ تچکی ءَ بلوچ ءِ چکچینی ءَ کنگ ءَ اِنت ءُ گیشتِر راجکار، نودربر ءُ بلوچ جنیناں ھوار راجی جھدکارانی کھول زوراکیانی آماچ کنگ بیگ ءَ اَنت۔اے میان ءَ بلوچ راجی سروکاں ھم گوں ھم سنتی ءَ پاکستانی ریاست ءِ زوراکیانی دیم پہ دیمی کنگ ءَ وتی کِرد پیلو کنگی اِنت۔ اگاں نہ گڑا گْوستانک مارا پھل نہ کنت۔

آئی ءَ گْوشتگ کہ جھان ءَ وتی چم نز کرتگ اَنت ءُ بلوچ ءِ چکچینی ءَ نیم چمی ءَ چارگ ءَ اِنت۔ باید اِنت کہ بلوچ راج ءَ ھوار راجی سروک گوں یک دومی ءَ ھمکوپگ بہ بہ اَنت۔ راجی آجوئی ءُ زوراکانی دیم ءِ دارگ ءَ ھم سنتی ءَ ابید دگہ راہ نیست۔

بلوچ رھشون ءَ وتی درشان ءِ گُڈی ءَ گوں جھان ءُ اقوامتحدہ لوٹ کرتگ کہ پاکستانی لشکر ءِ زوراکیانی گِر ءُ دار ءَ ترندیں گامگیجے بہ زور اَنت ءُ ڈیرہ بگٹی ءَ ھوار سرجمیں بلوچستان ءَ پہ پاکستانی زورگریں لشکر ءِ گِر ءُ دار ءَ وتی کِرد ءَ پیلو بہ کن اَنت ءُ بلوچ راج ءَ چہ زورگریں پاکستانی ریاست ءِ زوراکیاں بہ پھریز اَنت.

بلوچستان لبریشن پرنٹ ءِ جارکش میجر گھرام ءَ وتی شنگ کُتگیں درشانے تہءَ تربُت ءَ پاکستانی زِرلشکر ءِ سرءَ بیتگیں اُرش ءِ زمہ واری زُرتگ ءُ گُشتگ کہ مئے سرمچاراں زی 19 ستمبر ءَ شپ ءِ ھشت ءُ دہ ءَ کیچ ءِ بنجاھی شھر تربت ءَ زورگریں پاکستانی زِرلشکر ءِ پھازداری پانگس ءِ سر ءَ اُرش کُرتگ۔

جارکش ءَ گُشتگ کہ سرمچاراں ءَ چہ نزیک ءَ زِرلشکر ءِ بنجل ءِ گوریچانی نیمگ ءِ پانگس گوں ٹوھیں ءُ وتکاریں سلاھاں نشانگ کُرتگ، دہ دمان ءِ برجاھیں میڑ ءَ زِرلشکر ءِ یک کارمندے مُرتگ ءُ یکے ٹپی بیتگ ءُ پانگس ءَ تاوان بیتگ۔ آئی ءَ گُشتگ کہ اُرش ءَ پد داں دیر ءَ پروش وارتگیں لشکر ءَ لس آبادی ءِ سر ءَ تیرگْواری کُرتگ۔

میجر گھرام ءَ گُشتگ کہ دژمنیں پاکستانی زِرلشکر ءَ بلوچانی زمین دستیگ کُرتگ اَنت ءُ بلاھیں بُنجلے جوڑ کُرتگ ءُ ھمک روچ گیشتِر زمیناں دستیگ کنگ ءُ گوں تیزی ءَ بنجل ءَ مستر کنگ ءَ اِنت، زمینانی دستیگ کنگ ءَ لھتیں وتگڑیں راجدوست ءُ ھندی باڑھی تچکی ءَ پاکستانی لشکر ءِ ھمراھداری ءَ کنگ ءَ اَنت۔

چہ زِرلشکر ءِ ھمے بُنجل ءَ مکران ءَ ایوک ءَ کیچ ءُ گوادر ءَ لشکرکشی چہ ھمد ءَ کمانڈ کنگ بنت، جنگی بالیگ ءُ ڈرون ٹیکنالوجی ھم چہ ھمے بنجل ءَ آپریٹ کنگ بنت،ایشی ءَ ابید ھمے بنجل ءَ ھپتاد ءَ گیش کوٹیانی آزارجاھے زمین ءِ چیر ءَ ھست۔

بلوچستان لبریشن پرنٹ ءِ جارکش میجر گھرام ءَ گُڈسرءَ گُشتگ کہ بی ایل ایپ اے اُرش ءِ زمہ واری ءَ منّ ایت ءُ داں بلوچستان ءِ آجوئی ءَ زورگریں پاکستانی ریاست ءِ دُرسیں سیتانی سر ءَ بی ایل ایپ ءِ اُرش گوں تْرندے ءَ برجاہ بنت۔

شال ءَ دو ٹولیانی جنگ ءُ چوپ ءِ آسر ءَ کارچ جن کائی ءَ دو مردم کُشگ بیتگ اَنت-

گیشیں اھوالانی رد ءَ شال ءِ دمگ جوائنٹ دگ ءَ دو ٹولیانی میان ءَ جنگ ءُ چوپ بیتگ، کارچ جن کائی ءَ دو مردم کُشگ بیتگ اَنت-

پولیس ءِ رد ءَ وئیل ءِ ھال ءِ سر بوگ ءَ پولیس ءُ ریسکیو ءِ ٹیم وئیل جاہ ءَ سر بیتگ اَنت ءُ کمکی کارانی ھواری ءَ لاشانی پجار ءِ ھاتر ءَ لاش ھسپتال ءَ برگ بیتگ اَنت-

پولیس ءِ رد ءَ جرمکار وئیل ءِ کنگ ءَ پد وئیل جاہ ءَ تتکگ اَنت، ءُ آیانی شوھاز برجاہ اِنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ گوستگیں شپ ءَ یک تراکے ءَ کساس یک مردمے بیران بیتگ-

گیشیں اھوالانی رد ءَ زاھدان ءَ گوستگیں شپ ءَ نودربرانی بنجل فاطمہ الزھرا زاھدان ءِ نیمگ ءَ ترندیں تراکے ءَ توار کتگ بیتگ-

تراک ءَ دو کلومیٹر ءَ ماڑیانی شیشگ جنزیتگ اَنت ـ تراک ءَ پد پھزداراں زاھدان ءِ راہ ءُ در بند کتگ ءُ پٹ ءُ پول کتگ-

دومی نیمگ ءَ سرکاری رسانکدر ءِ رد ءَ تراک گیس ءِ لیکج ءِ سبب ءَ پیش اتکگ کہ چریشی ءَ چہ یک مردمے بیران بیتگ-

سرکاری رسانکدر ءَ گپ کنان ءَ آس کشیں سروک ابراھیم شھریاری ءَ گوشتگ تراک گیس ءِ لیکج ءِ سبب ءَ پیش اتکگ بیتگ بیتگ-

آئی ءَ گوشتگ اے وئیل زمینانی گر ءُ دار کنوکیں ادارہ ءِ یک گسے ءَ امام سجاد ءِ ھند ءَ پیش اتکگ بیتگ-