من بِلے یکے اں بلے کروڑانی ھساب ءَ آں
نبشتہ کار: حکیم واڈیلہ
دی بلوچستان پوسٹ
“شراب باریں وارت نہ وارت پد ءَ اُوں تتّران کنت”
آ مدام اسپیتیں پوشاکانی تہ ءَ گندگ بیتگ اَت، برے اسٹیج ءِ سر ءَ شئر وانگ ءَ اَت، برے ناچ کنگ ءَ اَت، برے موٹرسائکل ءِ پُشت ءَ نِشتگ اَت ءُ بئیر ءِ کِسگ ءَ اَت ئے، برے آ گُشندھانی دیوان ءَ نشتگ اَت، برے پریس کلبانی دیم ءَ زھرشانیاں گون اَت، مدام کندگ ءَ اَت، کوکار کنگ ءَ اَت۔ اگاں آ نامدار مہ بوت ایں بیت کنت مردماں گُشتگ اَت کہ، نشاھی یے سر ءَ بروبر نہ اِنت گنوک اِنت۔
بلے ھرچی ءَ آ کہ زانتگ، پجا آورتگ ات، ھمراہ بوتگ اَنت، وھد اِش گوازینتگ گون ءَ ، نزیک بوتگ اَنت، یکجاہ بوتگ اَنت، آئی ءِ زانت، سسا ءُ سنچ ءِ بابت ءَ سرپدی اِش داشتگ، آیاں زانتگ کہ اے پیر مرد اسپیت ریش گنوک نہ اِنت بلکیں دیوانگ اِنت، آشک اِنت، مرید اِنت، شیدائی اِنت۔ دیوانگ پہ بلوچ ڈیھ ءَ، آشک پہ زبان ءُ ادب ءَ، مرید پہ آجوئی ءَ، شیدائی پہ وتی ڈیھ ءِ نرمزاریں جنگول ءُ ھمک ھما جھدکار ءَ کہ پہ ھک ءُ آجوئی ءَ گھگیری کنگ ءَ اَت۔
شانزدہ ستمبر ءَ اے ھال سرجمیں بلوچستان ءُ جھان ءِ ھمک کُنڈ ءَ کہ بلوچ جھمنند اَنت شنگ بوت کہ بلوچی زبان ءِ نامداریں شائر مبارک کازی تُربت ءَ بیران بیتگ۔ اے ھال ھچ پئیم ءَ باوری ھالے نہ اَت، بلے انچش کہ گْوش انت “مرگ زند ءِ راستی یے، ھچ کس چہ مرگ ءَ باج بُرت نہ کنت”۔
مبارک کازی شانزدہ ستمبر ءَ بیران بیت ءُ آئی ءِ بیرانی ءَ بلوچستان ءَ ھوار جھان ءَ ھمک جاہ ءَ کہ بلوچ ءِ ھست پہ آئی ءَ موتک آرگ ءَ اَنت مبارک کازی ءَ گیر آرگ ءَ اَنت۔ آئی ءِ گپ، تران، شئر، تامر بند ءُ گوں آئی ءَ وتی گوستگیں یاتگاریں وھد اکس ءُ تامراں شنگ کنگ ءَ اَنت ءُ مبارک کازی کہ واجہ ابا ءِ نام ءَ راج ءَ پجا آورتگ ءُ آئی ءَ پہ دروت ءُ ستاشانی ندر کنگ ءَ اَنت۔
ھمے شئرانی تہ ءَ تامربندانی تہ ءَ مبارک کازی ءِ یک گونڈیں تواربندے بگندے آئی ءَ وتی واٹسیپ گروپ ءَ اے گپ کُتگ اَنت شِنگ اِنت چوناھا بوت کنت اے پیش ءَ ھم شِنگ بیتگ بہ بیت بلے مردم ءَ آ وڑ ءَ دلگوش نہ کُتگ۔ اے توار بند ءَ مبارک کازی گوادر ءِ درگت ءَ گپ کنان ءَ گْوش ایت؛ “ شما انچو تُرس ءَ گار اِت کہ گوادر رؤگ ءَ اِنت، زاناں گوادر کئی پِت ءِ میراس اِنت؟ بئیت اِنت نہ یک رنڈ* زادگیں، من دانکہ زندگاں برے تو بری ناں۔ چیلنج اِنت پنجاب ءَ را بی، چائینہ را بی، ایران ءَ را بی، بگش بیا بری مبارک کازی زندگ اِنت۔ تئی دست ءَ بارتے، جی ھئو منی دست ءَ چون بارت ئے؟ آ پجا کار ایت کئے کئے اِنت۔ من بِلے یکے آں بلے کروڑانی ھساب ءَ آں، شما بِلے باز اِت شما ٹکہ ئِے نہ اِت۔”
چُشیں بے کساسیں آڈیو، ویڈیو، واٹسیپ وائس نوٹس ءُ دگہ مواد دزکپ ایت کہ مبارک کازی وتی ھیالاں درشان کنگ ءَ اِنت، مھلوک ءَ وتی گپ ءَ سرکنگ ءَ اِنت۔ بلے اِد ءَ یک سک باز مانا داریں ءُ اسرمندیں گپے کہ نمیرانیں مبارک کازی کنت آ ایش اِنت کہ “من بِلے یکے آں، بلے کروڑانی ھساب ءَ آں”۔ آئی ءِ اے گپ ءِ مول ءُ مراد چی اِنت ؟ پرچہ آ نہ تھنا پاکستان (پنجاب) ءَ بیھار دنت، بلکیں آ چین ءُ ایران ءَ ھم گُشگ ءَ اِنت منی تاکت چی اِنت۔
منی ھیال ءُ گمان ءَ مبارک کازی اِد ءَ من ءَ راج ءِ بستار ءَ کارمز کنان ءَ گْوش ایت کہ “بلے یکے آں بلے کروڑانی ھساب ءَ آں” پرچہ کہ مبارک کازی ءَ زانتگ، دیستگ، مار اتگ، ونتگ، سما کُتگ ءُ پوہ بیتگ کہ آئی ءِ راج، راجی جھدکار، راجی سرمچار، راج ءِ نودربر، ورناہ پیر ءُ کماش درست پہ وتی راجی آجوئی ءُ ڈیھ ءِ رکینگ ءَ کجام نہ کجام پئیم ءَ گوں جھد ءَ بندوک اَنت ءُ وتی کِرد ءَ پیلو کنان اَنت۔ مبارک کازی ءَ اے ھم سما بیتگ کہ آئی ءِ گپ، آئی ءِ توار بند ورناھاں، جھدکاراں، سرمچاراں، نودربراں گیشتر جزبگ ءُ بھادری ءَ گوں دیمروئی ءِ سکین دے اَنت۔
مبارک کازی منی ھیال ءَ بلوچ چاگرد ءِ تہ ءَ ھما بے دروریں کارست بیتگ کہ آئی ءَ رس اتگیں مھر، شرپ، ھبناکی، نزیکی، بندوکی دگہ پہ ھچ کس ءَ تُری آ شائر ءِ بہ بیت، جھدکارے بہ بیت، کواسے بہ بیت، سیاسی ءُ جنگی رھشونے بہ بیت پہ آیاں ھاس آیانی زند ءِ تہ ءَ گندگ نہ بیتگ۔ مبارک کازی ءِ زند ءِ تہ ءَ پہ آئی ءَ بے کساسیں مھر، نزیکی ءُ شرپ وت اے راستی ءِ درشانی ءَ کَنت مبارک کازی بلوچ راج ءِ لاڈک بوتگ۔
مبارک کازی ءِ ھمک گپ ءُ تران پہ مردماں سر ءُ چم بیتگ اَنت۔ آئی ءِ شئر بلوچ ءِ رھشونی ءَ کن اَنت ءُ آئی ءِ مَست ءُ ملنگیں کِرد یک جنگ زدگیں، مانگیشتگیں، ایردستیں، زورگپتگیں چاگردے ءِ تہ ءَ گوں دلیری ءَ زندگی کنگ ءُ زوراک ءَ نہ منگ ءُ آئی ءِ ھلاپ ءَ گھگیری کنگ ءِ درس ءَ دنت۔
انچُش کہ مبارک قاضی گُشیت؛-
“اے راہ داں روان کنت”
“اے ساہ ھم روان کنت”
اے آجوئی ءِ کاروان وتی مراد ءِ منزل ءَ ھمے وڑا روان کنت
تنیگا باز پند برگی انت مارا ھمسفر
تنیگہ بازیں چپ ءُ چوٹ مئے راہ ءِ “دیم ءَ ھانٹ بنت”
“تنیگا من نہ مرتگاں”
“تنیگا دم نہ برتگاں”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
