TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ َءَ گْوشتگ کہ مرچی شال ءَ زورگریں پاکستان ءِ وتگڑیں آجوئی ءِ شاتکامی درگت ءَ برجم داشتگیں مراگش ءِ سر ءَ اُرش کتگ۔

جارکش ءَ گْوشتگ کہ مئے سرمچاراں شال بروری دگ ءَ ایس بی کے شھدبرجاہ ءِ نزیک ءَ پاکستانی پوج ءِ چیردستی ءَ برجم داشتگیں مراگش سھب ءِ دہ نزیک ءَ دستی بمباں گوں اُرش کتگ-

جارکش ءَ گْوشتگ زوگریں پاکستانی پوج زانشت ءِ ادارھاں پہ وتی نوآبادیاتی مکسداں کارمرز کنگ ءَ انت۔ ما اے گپ ءَ پدر کن ایں کہ زورگریں پاکستانی پوج ءِ سروکی ءَ برجم داشتگیں وتگڑیں آجوئی ءِ شاتکامی ءِ روچ ءِ مراگش مئے نشانگ بنت۔ زورگریں پوج کروڑاں کلدار ھرچ کنت اے رنگیں مراگشانی برجم دارگ ءَ بلوچستان ءِ جنگی جاورھال ءِ بابت ءَ دگنیا ءِ چماں ھاک کنگ لوٹ ایت۔

جارکش ءَ گْوشتگ کہ اے اُرش ءِ ذمہ واری بلوچ لبریشن آرمی منّ اِیت – زورگریں پاکستانی پوج ءُ آئی ءِ شریکانی سر ءَ مئے اُرش برجاہ مان اَنت۔

بلوچ یکجھتی کمیٹی کراچی ءَ پشمبے ءِ بیگاہ ءَ ” بلوچ راجی مچی ” ءِ شھید سھرچکیں دروت ندر کتگ اَنت آیانی یات ءَ آیانی یات ءَ ڈیوا بلینتگ-

ھمے میان ءَ کراچی گیشتریں بلوچانی دمگ لیاری ھشت چوک ءَ چہ موبتی روانک بندات بیتگ ءُ بلوچ چوک چاکیواڑہ ءَ تاں آسر بیتگ چریشی ءَ زالبول ءُ زھگانی مزنیں کچے ءَ ھوار بیتگ اَنت-

زھرشانی کنوکانی دست ءَ ڈیوا بیتگ اَنت بیران بیتگیں باسک جوانیں وڑے ءَ سُھرچکیں دروت ءَ اَبید ” راجی سوگندی دیوان ” ھم برجاہ داشتگ- موبتی ءِ روانک ءِ سروکی بلوچ یکجھتی کمیٹی کراچی ءِ راھشون فوزیہ بلوچ ءُ بُنجاھی آرگنائزر لالا وھاب کنگ ءَ بیتگ-

ھمے درگت ءَ زھرشانی کنوکاں گوشتگ کہ نوشکی ءَ پاکستانی پوج ءَ پُرایمن زھرشانی کنوکانی سر ءَ تیرگواری کتگ حمدان بلوچ شھید کتگ وھدے کہ بلوچستان ءِ جتاجتائیں دمگاں ریاستی پوج ءَِ زوراکی کتگ راجی مُچی ءَ ھواریں باسک نشانگ کتگ اَنت یکسد ءَ گیش ٹپی ءُ چار مردم بیران بیتگ اَنت-

آئی ءَ گْوشتگ کہ بُنجاھی نندانک گوادر ءَ برجاہ اِنت وھدے کہ تربت، نوشکی، شال، دالبندین ءَ ھوار بلوچستان ءِ دگہ دمگاں برجاہ ءَ اِنت-

زھرشانی کنوکانی گْوشگ اِنت کہ راجی مُچی ءِ سرجمی ءَ یک پُرایمنیں ءُ جمھوری جُھد ءِ دْرچ اِنت بلے ریاست ءَ اڑان ودی کتگ بلوچ راج ءِ آئین ءُ کانودی ءِ تہ ءَ نشتگ ءُ ھم توار چست کنگ ءِ بے سوبیں جُھدے کتگ بلے گوادر ءُ بلوچ راج ءَ پدر کتگ ءُ پیشداشتگ بلوچ وتی سرڈگار ھاتر ءَ یکجاہ ءَ اِنت-

بلوچ یکجھتی کمیٹی ءِ نیمگ ءَ مرچی ھم گوادر ءَ ھوار جتا جتائیں شھراں نندانک ءُ زھرشانیانی دْرچ برجاہ بوتگ-

گیشیں ھالانی رد ءَ گوادر ءَ بلوچ یکجھتی کمیٹی ءِ برجم داشتگیں نندانک ءَ یازدھمی روچ ءَ برجاہ ءَ اِنت ءُ دومی نیمگ ءَ شال، نوشکی، پنجگور ءُ تربت ءَ ھم نندانک ءُ زھرشانی برجاہ اِنت۔

بلوچ یکجھئی کمیٹی ءِ بلوچ راجی مچی ءِ نندانک ءَ گْوستگیں یازدہ روچ اِنت کہ بلوچستان ءِ تیاب دپی شھر ءَ برجاہ اِنت کہ اود ءَ انگت ءَ سرکار ءِ پرمانانی رد ءَ دامگ ءُ موباھل آسراتی ءَ ھوار شھر ءِ آپ بند اَنت، وھدے کہ شھر ءِ روگ ءُ آیگی راہ ءُ در بند کنگ ءِ سبب ءَ ورگی توژگانی ڈوکال ودی بیتگ۔

بلوچ یکجھتی کمیٹی ءَ گوستگیں روچ ءَ وتی درشان ءِ تہ ءَ گْوشتگ کہ اے وھد ءَ گوادر ءَ بلوچ راجی مُچی ءِ زلم ءُ زوراکی ءِ بگیری ءَ بُنجاھی نندانک برجاہ ءَ اِنت گوادر ءِ نندانک یازدہ روچ سرجم بوتگ کہ گوستگیں روچ ءَ نندانک ءَ راجی دیوان برجم دارگ بیتگ کہ ایشی ءِ تہ ءَ بلوچ یکجھتی کمیٹی ءِ سروک ءُ راج ءِ میان ءَ انوگیں جاوراں ھوار جتا جتائیں سرھالانی سر ءَ گپ ءُ تران بوتگ بلوچ راجی مچی ءَ ھواریں سرجمیں ریاستی زُلم ءُ زوراکی ءَ اَبید مھکم اَنت-

جار ءِ رد ءَ گوادر ءَ ھوار سرجمیں مکران ءَ دہ روچ اِنت کہ کیامت کپگ، تاں انوگ ءَ گوادر ءَ ھوار مکران ءِ گیشتریں دمگاں دامگ ءُ موبائل نیٹورک بند اَنت، مکران ءِ گیشتر دمگانی شاھدگ انگت ءَ بند اَنت، چریشی ءِ سبب ءَ ورگ ءُ درمان ءِ سکیں کمی یے، ایشی ءَ ابید گوادر ءَ آپ ءِ رسگ ھم بند کنگ بیتگ-

گل ءِ رِد ءَ اے وھد ءَ گوادر ءَ بلوچ راجی مُچی ءِ سر ءَ زلم ءُ زوراکی ءِ بگیری ءَ گوادر ءَ ابید شال، نوشکی، پنجگور ءُ تربت ءَ ھم زھرشانی برجاہ اِنت۔

دومی نیمگ ءَ بلوچ یکجھتی کمیٹی پنجگور ءِ زھرشانی بُنجاھی دگ ءِ سر ءَ ڈپٹی کمشنر پنجگور ءِ کارگس ءِ دیم ءَ برجاہ اِنت داں بُنجاھی جار ءَ زھرشانی برجاہ مان ایت ۔ آیاں گوشتگ کہ تچکیں لوٹ منگ بہ بنت۔

ھمے وڑ تربت ءَ ھم زھرشانی ءِ نندانک برجاہ ءَ اِنت گوستگیں روچ ءَ تربت ءَ بلوچ راجی مُچی ءِ سر ءَ زوراکی ءُ انوگیں جاورھالانی سرھال ءِ سر ءَ یک سیمینارے برجم دارگ بوتگ کہ اود ءَ سیاسی، چاگردی ءُ لبزانک ءَ ھوار جتاجتائیں مردماں وتی ھیال ءُ لیکہ درشان کتگ اَنت ءُ آیاں انسانی ھکانی برجاھیں لگتمالی ءُ بلوچ راج ءِ گوم ءَ ناشریں رویشگ سر ءَ چمشانک داتگ –

دومی نیمگ ءَ بلوچ یکجھتی کمیٹی ءِ نیمگ ءَ شال ءَ ھم نندانک برجاہ ءَ اِنت کہ اود ءَ زھرشانی کنوکاں دزگیریں مردمانی زوت یلہ کنگ ءِ لوٹ کتگ ءُ ریاست ءَ را زور داتگ ءِ کہ آ وتی ھکیں لوٹاں سرجم بکنت ءُ بلوچ ءِ سر ءَ زُلم ءُ زوراکی زوت ھلاس بہ کنت۔ .

آیانی گْوشگ اِنت دانکہ انساپ رسگ ءُ بلوچ راج ءِ ھک منگ نہ بنت داں نندانک رجاہ مان ایت۔

ھمے وڑ بلوچ یکجھتی کمیٹی ءِ زھرشانی کنوکانی سر ءَ تیر گواری ءُ یک ورناھے ءِ کُشگ ءِ بگیری ءَ مرچی ھم نوشکی ءَ نندانک برجاہ اِنت کہ اود ءَ زھرشانی کنوکاں وتی لوٹ انتزامیہ ءِ دیم ءَ ایر کتگ اَنت۔

بلوچ یکجھتی کمیٹی ءِ جارکش ءَ گوشتگ گوستگیں روچ ءَ اوتھل زیروپوائنٹ ءَ گوادر ءَ روکیں دمگی مردماناں انتزامیہ ءِ نیمگ ءَ دارگ ءُ اجازت نامہ ءِ ھکم ءِ گرگ ءَ بلوچستان ءِ کالونیل ءِ بستار ءَ تچک کنت اِنت ءُ ریاست ءُ آئی ءِ ادارہ ھمک روچ ءَ یک گامگیجے ءَ دمگی مردماں تچک کنگ ءَ اَنت بلوچستان ءَ آیانی بستار سیمی جھلیں تبک ءَ گلامانی رنگ ءَ اِنت- اے ریاست ءِ آئین کجام تاک ءَ نبشتگ انت کہ دمگی مردماں وتی لوگانی روگ ءَ اجازت نامگ گرگ بہ کپ ایت؟ بلوچاں وتی سرڈگار ءِ سر ءَ پیسر ءَ چہ سیاسی مُچی ءِ کنگ ءِ اجازت نیست انت، گپ جنگ ءِ آجوئی نیست انت، پریس کلبان تالہ جنگ بیت اِنت میڈیا بلیک آؤٹ انت،کانونی تک ءُ ڈولاں جنگ کنگ ءِ اجازت نیست انت نی بلوچاں وتی لوگانی روگ ءَ شاھی انتزامیہ ءَ اجازت گرگ کپ ایت – اے دابیں رھبند بلوچستان ءَ برٹش ءِ کالونیل ءِ وھد ءَ ھم نہ بیتگ – نی ما سرپد بہ ایں ریاست ءَ اے پیلسہ کتگ کہ بلوچاں چہ وتی سرڈگار ءِ سر ءَ کش ایں ایشی ءَ ابید زوراکی ءُ زلمانی آپ سر ءَ سرگوستگ-

درشان ءَ گوشگ بیتگ کہ ریاست ءِ اے کالونیل نزام ءُ رھبند ءِ ھلاپ ءَ بلوچ راج ءِ گور ءَ یک مھکمیں گھگیری جد ءُ جھد ءَ ابید دگہ ھچ راہ پش نہ کپتگ- اگاں اے فاشسٹ نزام ءِ ھلاپبءَ ما گیش بے توار بوتیں یا ایوک ءَ جد ءُ جھد کت گڑا اے سرڈگار ءِ سر ءَ مئے نام ءُ نشان گار بیت اِنت ءُ مئے راجی پجار ءِ رکینگ ءِ راہ بس تھنا بس تپاک ءُ یکجھتی ءُ مھکمیں گھگیری ءِ جد ءُ جھد ءَ اِنت- ریاست ءَ اے وھد ءَ درستاں گیش درد بلوچ راج ءِ تپاکی ءُ ھمسنتی ءَ اِنت کہ ایشی ءِ مسال بلوچ راجی مُچی انت اے راجی مُچی ءَ ھما رنگ ءَ بلوچ راج ءَ ھمسنتی ءُ یکمشتی ءِ درشان داتگ کہ چریشی ءَ ریاست ءَ بلوچستان ءَ وتی زُلم ءُ زوراکیانی برجم کنگ ءِ سک ءَ ترس اِنت ھمے واستا ما سرپد بہ ایں یک راجی سیاسی مُچی ءِ دارگ ءَ ریاست ءَ ھما کساس ءَ تاکت ءُ زلم کتگ بیت کنت ریاست ءَ راجدپتر ءَ چوشیں تاکت ءُ زُلم نہ کتگ مئے بھادر ءُ زانتکاریں ورنایانی دیمھونیاں ھما درچ گچین کتگ مروچی راج ءِ توک ءَ سما ودی بیتگ ءُ بہ بستار ءِ راج مارا آیوکیں روچاں رس ایت مارا ھما شھیدانی یاتگیری یات کنگ لوٹ ایت ءُ وتی میان ءَ تپاک ءُ ھمسنتی ودی کنگی اِنت ءُ جد ءُ جھد ترند کنگی اِنت-

شال ءَ دزگیر کنگ ءَ پد بیگواھی ءِ نشانگ بیتگیں بلوچ نودربر گل ءِ سروک انگت یل نہ بیتگ-

بیست ءُ شش جولائی ءَ اسپنی دگ شال ءَ زورانسری آوار جنی ءِ نشانگ بیتگین بلوچ اسٹوڈنٹس آرگنائزیشن ءِ بنجاھی رھشوناں چہ یکے یل بیتگ بلے داں انگت ءَ گل ءِ چیرمین انگت ءَ بیگواہ انت-

پاکستانی پوج ءَ گوستگیں ماہ ءَ گوادر ءَ برجم دارگ بیتگیں بلوچ راجی مُچی ءِ چن ءُ لانچاں دزگٹیں بی ایس او ءِ چیئرمین جیئند بلوچ ءُ وائس چیئرمین شیرباز ءَ ھوار آیانی بازین ھمراہ دزگیر کتگ انت ءُ پد ءَ آ دگہ درست یل بیتگ اَنت ءُ جیئند بلوچ ءُ آئی ءِ دگہ سَے ھمراہ ناشناسیں جاھاں برگ بیتگ اَنت-

گوستگیں روچ ءَ جیئند بلوچ ءُ شیر باز ءِ کھولاں شال پریس کلب ءَ پریس کانفرنس کنان ءَ دزبندی کتگ اگاں آیانی مردم چار روچانی میان ءَ یل نہ بیت اَنت ءُ گڑا زھرشانی روانک ءِ جار ءَ جن ایں-

بلے.مروچی بی ایس او ءِ سینیئر وائس چیئرمین شیرباز یل بیتگ ءُ وتی لوگ ءَ سر بیتگ بلے جیئند انگت ءَ یل نہ بیتگ ءُ دگہ گپ دیم ءَ نیتکگ اَنت-

دومی نیمگ ءَ بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ بلوچ راجی مچی ءِ چن ءُ لانچ ءِ وھد ءَ چہ شال ءَ سدانی کساس ءَ مردم دزگیر کنگ بیتگ اَنت کہ ایشانی تہ ءَ بازینے رند ءَ پہ زور بیگواہ کنگ بیتگ اَنت ایشانی تہ ءَ جیئند بلوچ ءُ شیرباز بلوچ ھم ھوار اَنت۔ ایشانی کھول ءِ مردماں ھچ وڑیں ھال ءُ اھوال دیگ نہ بوگ ءَ اِنت۔ شال ءِ دراھیں تھانہ ءُ بندیگجاھاں چہ جست ءُ پرس ءَ پد انتزامیہ ءُ پولیس کھول ءَ وتی نزیکیں مردمانی بابت ءَ ھچ وڑیں سرپدی دیگ ءَ نہ انت ۔

آئی ءَ گْوشتگ کہ اے درگت ءَ جیئند ءُ شیرباز ءِ کھولاں 12 اگست ءَ شال ءَ یک روانکے برجم دارگ ءَ اَنت۔ بلوچ یکجھتی کمیٹی اے روانک ءِ سرجمی ءَ گوں پلامرزی ءَ کنت ءُ چہ بلوچ راج ءَ دزبندی کنت کہ آ اے روانک ءَ بھر بہ زور اَنت ءُ پہ زور بیگواہ آماچیں کنگ بیتگیں مردمانی کھولانی توار بہ بنت۔

بلوچستان ءِ بنجاھی شھر شال ءَ پاکستان ءِ آجوئی ءِ شاتکامی مراگش ناشناسیں مردماں نشانگ کتگ-

شال ءَ بروری دگ ءَ ایس بی کے یونیورسٹی ءِ نزیک ءَ برجاھیں مراگش ءِ سر ءَ ناشناسیں مردماں دزبمباں گوں نشانگ کتگ-

دمگی مردمانی رد ءَ کم چہ کم دو تراکانی توار اش کنگ بیتگ انت – واکداران تاوانانی بارو ءَ دگہ گپ دیم ءَ نیاؤرتگ انت-

گوستگیں سال ءِ ڈول ءَ اے سال ءَ ھم بلوچستان ءَ پاکستان ءِ آجوئی شاتکامی مراگش پُر ءِ بروبری ءَ انت-

دمگی مردمانی رد ءَ بنجاھی شھر شال ءَ یونیورسٹیانی توک ءَ لھتے یونیورسٹیاں پاکستانی پوج ءِ چیردستی ءَ مراگش ایر کنگ بیتگ انت بلے اود ءَ پھزداری ءِ بارو ءَ ناگیگی درشان کنگ ءَ اَنت-

گوست ءَ بلوچ آجوئی دوستانی نیمگ ءَ اے دابیں مراگش نشانگ کنگ بیتگ انت ءُ آیانی زمہ واری منگ بیتگ انت بلے اے ارش ءِ زمہ واری انگت کس ءَ پہ وت نہ زرتگ-

بلوچستان ءِ تیابدپی شھر گوادر ءَ پدی زر ءَ بیست ءُ ھشت جولائی ءَ راجی مُچی ءَ چہ راجی مُچی نندانک ءَ مٹ بوتگیں زھرشانی نندانک گوستگیں یازہ روچاں برجاہ بیتگ ءُ مروچی دوازدھمی روچ ءِ سھب ءَ داکل بیتگ –

گوستگیں روچ ءَ راجی مُچی گوادر ءَ یک سیمینارے برجم دارگ بیتگ ءُ آئی ءِ توک ءَ بی وائی سی ءِ سروکاں گشتانک داتگ-

گوستگیں بیگاہ ءِ سیمینار ءَ ڈاکٹر ماہ رنگ بلوچ، سبگت اللہ بلوچ سمی دین ءُ دگہ بھر زیروکاں گشتانک داتگ ءُ راجی مُچی ءَ بلوچ مھلوک ءِ سر ءَ بوھوکیں زُلمانی ھلاپ ءَ گپ جتگ –

آیاں گوشتگ بلوچ راج ءِ سر ءَ بوھوکیں زُلمانی گر ءُ دار ءُ ھلاس کنگ ءَ راج ءُ راجی زرمبشت ءَ چی زلوری انت ءُ چون یکجاہ بوگی انت-

ایشی ءَ ابید سیمینار ءَ جتا جتائیں رنگ ءُ ڈولانی درگت ءَ اکس دابی دروشم پیش کنگ بیتگ اَنت-

بلوچ یکجھتی کمیٹی ءِ سروک ڈاکٹر ماہ رنگ بلوچ چاگردی رسانکدر ایکس ءَ شنگ کتگیں درشان ءِ تہ ءَ گْوشتگ کہ مرچی گوادر ءِ نندانک ءَ یازدھمی روچ اِنت۔ ما گْوستگیں یازدہ روچاں گوادر ءَ نندانک ءَ نشتگ ایں پہ انساپ ءِ ھاتر ءَ بلے ریاست ءَ اے نندانک ءِ آئینی ءُ کانودی لوٹانی منگ ءِ بدل ءَ گوادر ءَ ھوار سرجمیں مکران ءَ کرفیو کتگ۔ گوستگیں 11 روچاں نیٹ ورک ءُ دامگ ءِ بند بیگ ءِ ھمراھی ءَ گوادر ءُ تربت چہ دگہ دمگاں ھم کَٹ بوتگ اَنت کہ ایشی ءِ سبب ءَ ورگ ءُ درمانانی کمی روچ پہ روچ گیش بوان اِنت ۔ اے کرفیو ءِ وڑیں جاوراں ماھیگ گر ءُ مزدور سک باز تاوان ءِ آماچ اَنت آیانی روزگار ءِ سرجمیں وسیلگ بند کنگ بیتگ اَنت۔ گوادر ءَ مھلوک ءِ زند ءِ جاور نگیگ انت بلے اے ریاست ھر ھال ءَ وتی ناشرکاری ءُ زوراکی ءِ ھلاس کنگ ءَ ھچ ساڑی نہ انت۔

ڈاکٹر ماہ رنگ بلوچ ءَ دیمتر ءَ آئی ءَ۔لوٹ کتگ گْوشتگ کہ من بلوچ راج ءَ ھوار میان استمانی جھان ءَ دزبندی کناں کہ مئے دزگیریں سنگتانی یل کنائینگ ءُ گوادر ءَ برجاھیں ریاستی زُلم ءُ زوراکیانی بگیری ءَ توار ءَ چِست بہ کن اِت. بلوچستان ءَ ریاستی زلم ءُ زوراکی ءِ بگیری ءَ ھر وڑ ءَ وتی توار ءَ چست کن اِت۔ اے وھد ءَ بے توار مئے مُچی ءِ مرگ ءُ یک مزنیں انسانی جاور ءِ سوب جوڑ بیت۔

چہ شال ءَ بیگواہ کنگ بیتگیں جیئند بلوچ ءُ شیر باز بلوچ ءِ کھول گوں بلوچ یکجھتی کمیٹی ءُ وی بی ایم پی ءِ سروکاں پریس کانفرنسے کتگ ءُ گْوشتگ کہ بیست ءُ شش جولائی ءِ شپ ءَ چہ اسپنی دگ شال ءَ بلوچ اسٹوڈنٹس آرگنائزیشن ءِ بُنجاھی چیئرمین جیئند بلوچ ءُ سینئر وائس چیئرمین شیر باز بلوچ گوں دگہ لھتے سنگتانی ھمراھی ءُ پولیس ءُ سادہ پوشاکانی تہ ءِ مردماں دزگیر کتگ ءُ تھانہ قائد آباد ءَ برتگ اَنت۔ دومی روچ ءَ لھتے دگہ ھمراہ یلہ کنگ بوتگ اَنت ءُ لھتے بندیگجاہ ءَ دیم دیگ بوتگ اَنت، جیئند بلوچ ءُ شیرباز بلوچ ناشناسیں جاھے ءَ دیم دیگ بوتگ اَنت کہ آیانی بابت ءَ انگت ءَ ھچ وڑیں ھال ءُ اھوال نیست۔

آئی ءَ گوشت کہ بلوچ چاگرد ءِ تہ ءَ بی ایس او بلوچ نودربر ءُ ورناھانی واستا یک سیاسی ءُ چاگردی زانت ءِ وانگجاھے کہ راجدپتری رنگ ءَ نودربر ءُ مردمانی سرجمیں جیڑھانی بگیری ءَ جمھوری ءُ دیمروئی ءِ راھبندانی سر ءَ بنیات ءِ نمائندگی کنوکیں گلے بوتگ . بلے بدبھتی ایش انت کہ گْوستگیں چندیں دھکاں چہ بلوچ چاگرد ءِ سر ءَ ایر کنگ بوتگیں زُلم ءُ پُلپانچ ءِ برجمیں ءَ پالیسیانی وسیلہ ءَ جھد ءِ ھر وڑیں سیاسی ءُ جمھوری دروشم بند کنگ بوتگ اَنت۔ مردم پہ گپ جنگ یا زھرشانی کنگ ءَ تیرگواری کنگ بنت ءُ ورناہ پہ زور بیگواہ کنگ ءُ دروگیں کیسانی آماچ کنگ ءَ زُلم ءِ بگیری ءَ ھر توار ءِ ایرموش ءِ جھد کنگ بوتگ۔ ما سرپد بہ ایں کہ جیئند بلوچ ءُ شیر باز بلوچ ءَ ھوار ہزاراں بیگواھیں ورنا پہ زلم ءِ بگیر ءَ توار بیگ ءِ سبب ءَ زورانسری آوار جنی ءِ نشانگ کنگ بیتگ اَنت-

آئی ءَ دیمتر ءَ گْوشتگ کہ گوستگیں بازیں سالاں چہ مئے کھول مدام زوراکی ءَ بیگواہ کنگ ءُ دروگیں کیسانی دیمپانی کنگ ءَ اِنت۔ 29 نومبر 2018 ءَ پوج ءَ مئے لوگ ءَ چہ جیئند بلوچ ، آئی ءِ پت ءُ کستریں برات حسنین بلوچ آوار جتگ ۔ جیئند بلوچ 8 ماہ ءَ بے سبب ءَ آزارجاھاں ءَ بند کنگ بیتگ، وھدے کہ کسانیں برات حسنین بلوچ دروگیں کیس نکش کتگ ءُ کراچی بندیگجاہ ءَ دیم دیگ بوتگ کہ آ انگت ءَ بندیگجاہ ءَ بند اِنت۔ اے وئیلاں چہ کھول ءَ مدام سسّا درد ءُ رنج آماچ کنگ بیتگ اَنت ۔ ما وتی کھول ءِ سر ءَ ایر کتگیں اے زُلم ءَ چہ رکگ ءُ انساپ ءِ لوٹ کن ایں۔

آئی ءَ گْوشتگ یات بہ بہ اِت کہ گوادر ءَ 28 جولائی ءَ راجی مُچی ءِ سر ءَ سرکاری زوراکی ءِ سوب ءَ سرجمیں شال ءُ بلوچستان ءَ سدانی کساس ءَ ورنا دزگیر کنگ ءُ بیگواہ کنگ بوتگ اَنت ایشانی تہ ءَ جیئند بلوچ ءُ شیر باز بلوچ ھم ھوار اَنت نا آمیدگس ءَ پیش کنگ بوتگ اَنت ءُ نا بندیگجاہ ءَ دیم دیگ بوتگ اَنت۔ . چہ پولیس تھانھان ورنایانی بیگواہ کنگ پہ کھول ءَ ترس اِنت ءُ راج ءِ پھازگ نام ءَ جوڑ بوتگیں ریاستی ادارھانی سر ءَ جستے نشانے ھم-

آئی ءَ گْوشتگ کہ کہ اے پریس کانفرنس ءِ وسیلگ ءَ ما ریاستی ادارھاں ھم اے کلوہ ءَ دیم دیگ لوٹ ایں کہ جیئند بلوچ ءُ شیر بلوچ زمہ وار ءُ پرامنیں سیاسی جھدکار اَنت کہ آ اگاں کجام رنگیں میارباری ءَ ھوار اَنت گُڑا شرپ مندیں وڑے ءَ یل بہ کن اَنت ریاستی آمیدگس ءَ پیش کنگ بہ بیت۔ اگاں نہ ما ھچ وڑیں جاوراں وتی کھول ءِ بے میاریں ورناھاں درکانودی ءِ آزارجاھاں بند کنگ ءَ نہ منّ ایں- اگاں تاں 11 اگست ءَ جیئند بلوچ ءُ شیرباز بلوچ یل کنگ نہ بیت اَنت گڑا 12 اگست دوشمبے ءِ روچ ءَ چہ ھُدا منو جان دگ ءَ چہ کھول ءِ نیمگ ءَ پرامنیں روانکے کشگ بیت۔ مئے گوں کُل دیمروئی کنوکیں سیاسی ءُ چاگردی پڑاں دزبندی اِنت کہ جیئند بلوچ ءُ شیرباز بلوچ ءِ پہ سلامتی یل کنائینگ واستا ھمکوپگی بہ کن اَنت ءُ روانک ءَ ھوار سوشل میڈیا ءِ ٹرینڈز ءَ جوانیں وڑے ءَ بھر بزور اَنت-

بلوچ راجی مچی سر ءَ زوراکی ءِ بگیری ءَ شال ءَ ھوار نوشکی، تربت ءُ پنجگور ءَ نندانک برجاہ-

کیچ ءِ بُنجاھی شھر تربت ءَ بلوچ راجی مچی سر ءَ ریاستی تاکت ءِ کارمرز ءِ بگیری ءَ بلوچستان ءِ دگہ شھرانی وڑ ءَ شھید فدا چوک زھرشانی نندانک برجاہ ءَ اِنت چریشی ءَ زالبولاں ھوار ھزرانی مردم ھوار بیتگ اَنت-

سے شمبے ءِ روچ ءَ تربت نندانکجاہ ءَ ” بلوچ راجی مچی ءِ سر ءَ زوراکی ءُ انگیں جاور ” سرھال ءَ چہ سیمینارے برجم دارگ بیتگ- سیاسی ، چاگردی، ادب ءَ گوں سیادی داروکیں جتاجتائیں مردماں وتی ھیال لیکہ درشان کتگ اَنت –

زھرشانی کنوکاں انسانی ھکانی برجاھیں لگتمالی ءُ بلوچ راج ءِ گوم ءَ تُرندیں رویشگ سر ءَ چمشانکے بدنت-

سیمینار ءِ آسر اے کولبند سر ءَ بیتگ کہ دانکہ انساپ دیگ ءُ بلوچ راج ءِ ھک منّگ نہ بنت نندانک برجاہ بیت-

پنجگور ءَ نندانک برجاہ ءَ اِنت وھدے کہ دمگ ءَ دامگ بند اِنت – ڈپٹی کمشنر پنجگور ءِ کارگس دیم ءَ بُنجاھی دگ سر ءَ فھد آصف ملار فرھاد ءُ دگرانی سروکی ءَ دگ سر ءَ نندانک برجاہ ءَ اِنت-

آیانی گوشگ اِنت کہ لوٹانی منّگ ءَ تاں نندانک برجاہ بیت-

پنجگور ءَ پی ٹی سی ایل ءِ ڈی ایس ایل دامگ ھم گوستگیں دو ھپتگاں بند اِنت وھدے کہ پنجگور ءَ موباھل پون ءِ ڈیٹا گوستگیں دو سال اِنت بند اَنت پنجگور ءَ دامگ آسراتی ءِ بند بیگ سبب ءَ نودربراں زانشتی ءِ درگت ءَ دلسیاھیانی دیمپان وھدے لَس کارمرز کنوک باپاری مردم اِھوالکار ءُ دگہ پڑ ءَ سیادی داروکیں ھزارانی مردم نیٹ نہ بیگ ءِ سبب ءَ دلسیاھیانی دیمپان-

ھمے وڑ شال ءُ نوشکی ءَ نندانک برجاہ ءَ اِنت چریشی ءَ زالبولاں ھوار ھزرانی مردم ھوار اَنت-

مروچی نوشکی ءُ شال ءَ راجی مچی ءِ کاروان ءُ نندانکاں پاکستانی پوج ءِ تیرگواری ءَ چہ بیران بیتگیں مردمانی یات ءُ ڈیوا بلینگ بیتگ- وھدے کہ زھرشانی کنوکانی گْوشگ اِنت کہ بلوچ راجی مچی ءِ نندانک ءَ ایر کتگیں لوٹانی منّگ ءَ تاں زھرشانی برجاہ بیت-