TBP Balochi

بلوچ یکجھتی کمیٹی ءِ نیمگ ءَ بلوچستان ءِ بنجاھی شھر شال ءَ گوستگیں روچ ءَ بلوچ یونیورسٹی ءِ دیم ءَ زھرشانی بنجل جاہ ءَ بلوچ پدریچ کُشی ءِ چیدگ گوستگیں شپ ءَ پروشگ بیتگ-

چیدگ ءِ پروشگ ءِ کارپد یک نا امیت داریں بیڑے گوشان ءَ بی وائی سی ءَ سوشل میڈیا پلیٹ فارم ایکس ءَ یک پوسٹے ءَ گوشتگ بلوچستان یونیورسٹی ءِ دیم ءَ زھرشانی بنجل جاہ ءَ “ بلوچ پدریچ کُشی چیدگ ” ریاستی ادارھاں شپ ءِ نسپ ءَ تچک ءَ اتکگ ءُ پروشتگ-

درشان ءَ گوشگ بیتگ اے یاتگاری کہ پدریچ کُشی ءُ بلوچ راج ءِ ھستیں رنجاں ھزاراں بلوچ سرانی ستاشانی ءَ پیش کتگ، اے درناکیں راجدپتر ءِ گار کنگ ءِ جھد تباہ کتگ-

درشان ءَ گوشگ بیتگ کہ اے چیدگ ءِ تباھی ایوک ءَ یک یاتگاری ءِ سر ءَ اُرش نہ انت بلکیں بلوچ راج ءِ دیریگیں یات ءِ کمشرپی انت- مئے راجدپتر ءِ گار کنگ ءِ اے لگوریں جھد ءَ ابید ما انساپ ءِ رھبندانی سر ءَ اوشتیں – اے وڑیں گامگیجاں بلوچ راج ءِ جزبگ پروشگ نہ بیت اِنت ما دوبر جوڑے کن ایں ما یاتے کن ایں ما وتی مردمانی سر ءَ بوھوکیں زُلمانی پجارگ ءِ ھساب ءَ گریں –

زانگ بہ بیت گوستگیں روچ ءَ شال ءَ بلوچستان یونیورسٹی ءِ دیم ءَ زھرشانی بنجل ءِ وھد ءَ بلوچ پدریچ کُشی ءِ چیدگ جوڑینگ بیتگ ءُ آئی ءِ سرجمی ءَ بنپد ایر کنگ بیتگ – سَے پرگ داریں چیدگ ءِ نشانی پدریچ کشی ءِ آماچیں ءُ وتی ڈیھ ءِ تہ ءَ بلوچ راج ءِ رنجانی اوپار انت-

اے چیدگی نشانی نا ایوک ءَ بلوچ کمیونٹی ءِ سر ءَ ھستیں زلمانی یاداشت ءَ کن اَنت بلکیں چہ میان اُستمانی برادری ءَ بلوچستان ءَ انسانی ھکانی لگتمالی ءِ ھلاپ ءِ منگ ءُ ھلاسی ءِ واستا یک کلوھے ءِ دروشم ءَ دنت انت- اے یاتگاری چیدگ ءِ نشانی ھمے واستا یونیورسٹی ءِ دیم ءَ کنگ بیتگ کہ آیوکیں پدریچ ءَ وتی کلان ءُ کماشانی جد ءُ جھد ءُ دیمونیاں سرپد کنت اِنت ءُ گچین داری ءَ کنت اِنت-

مراگش ءِ شرپداراں وتی سرانی دیوکانانی یاداشت ءَ مھریں دابے ءَ سنچ دار ایت ءُ ھما جرمدارایں دروشم ءَ سانمندی ءَ انساپ گیرانی یکشل ءَ رھشونی ءِ المی ءَ کڈنی کنگ بیتگ – اے مُچی ءَ دراھیں تک ءُ پھناتاں سیاداروکیں مھلوک ءِ دلگوش وتی نیمگ ءَ کتگ، آیانی توک ءَ گیشتر باسک، نودربر ءُ ریاستی زوراکی ءِ آماچیں، درست وتی پجار ءَ مُز گیری ءِ لوٹ ءَ یکجاہ بیتگ اَنت-

اے یاتگار ءَ بلوچ ءِ درنگاز مھکم داری ءِ منانک ءَ دنت ءُ اے یاتاں پِرین ایت کہ بلوچ مھلوک ءِ واستا انساپ ءُ پرکاریں جد ءُ جھد برجاہ اِنت-

پاکستانی لشکر ءِ نیمگ ءَ چہ گریشہ ءَ بیگواہ کنگ بوتگیں مردمانی کھولاں گْوشتگ کہ 19 جولائی ءِ روچ ءَ 4 بج ءِ نزیک ءَ ریاستی پوج ءُ چیریں ادارہ ءُ سی ٹی ڈی ءَ شش گاڑی ءِ تہ ءَ کوچو گریشہ ءَ مئے میتگ ءِ سر ءَ اُرش کتگ ، مردمانی سر ءَ سر ءُ دیم تیرگواری کتگ- مئے ورنائیں زھگ درکانودی آوار جتگ ءُ بیگواہ کتگ اَنت، مئے لوگاں لُٹ ءُ پُل کتگ انت-

آیاں گوشت کہ شش ورنا آوار جتگ ءُ زورانسری بیگواہ کتگ اَنت ایشانی تہ ءَ شاہ جان ء سلیم جان، گوھر دین ء لال بخش، محمد جان ء لال بخش، معیار ء لعل بکش محمد، عارف ء عبدالرحمن ، منیر احمد ء صبرو ھوار اَنت وھدے کہ منیر بلوچ آزار کنگ ءَ پد راہ ءِ سر ءَ چگل دیگ بیتگ انت۔

آیاں گوشتگ کہ اے وئیل ءَ پد ما پولیس ءِ گور ءَ وتی ارزبندی زرتگ ءُ شتگیں مئے ایف آئی آر نکش کتگ، بلے پولیس ءَ اے بلاھیں میارباری ءِ بگیری ءَ مئے ایف آئی آر تچک ءَ تچک نکش نہ کتگ-

کھول ءِ مردماں گْوشتگ کہ مئے زھگانی رکّینگ ءِ ھاتر ءَ ما پیسر ءَ گریشہ بُنجاھی سی پیک دگ ءُ پد ءَ ٹوبڑو نال ھند سر ءَ نندانک ھمے۔میان ءَ اے ڈی سی ھُزدار ءُ اے سی نال گوم ءَ لوٹانی سر ءَ گپ دیوان ءَ پد زھرشانی ئیں نندانک ھلاس کتگ کہ مئے مردماں یل بہ کن اَنت اگاں ریاست ءِ ھیال ءَ ایشاں ھچ وڑیں جرمے کتگ گڑا مئے مردماں وتی جوڑ کتگیں آمیدگس ءَ پیش بہ کنت-

دیمتر ءَ گْوشتگ کہ مئے مردم کُجام ادارہ ءَ گوں سیادی دارنت گڑا ہمے ادارہ ءِ نام ءَ وتی مھلوک ءِ زند ءِ رکینگ ءِ زمہ واری مارا دئیگ بہ بیت۔

آئی ءَ گوشت کہ اے ڈی سی ھُزدار ءَ نبشتھی رنگ ءَ اے منوگری کتگ کہ اگاں پنچ روچ ءِ تہ ءَ اے لوٹانی سر ءَ گامگیج زورگ نہ بیت گڑا ایشی ءِ زمہ وار انتزامیہ گپ ءُ تران ءِ ٹولی ھاسکار اے ڈی سی سر ءَ بیت۔

کھول گْوشتگ بلے اے گند ءُ نند ءَ پد گورالدین خیر جان، میار ء لال بخش ءَ آمیدگس ءَ پیش کنگ بجتگ اَنت بلے دگہ مردمانی بابت ءَ ھچ وڑیں ھال ءُ اھوال نیست۔

آئی ءَ گوشت کہ نوں 5 روچ ءِ جاگہ ءَ 19روچ گوستگ بلے مئے مردم یل کنگ نہ بیتگ اَنت ما انتزامیہ ءَ کڈن کن ایں اگاں چل ھشت کلاکانی تہ ءَ مئے آ مردم یل کنگ نہ بیت اَنت گُرا ما جمھوری دروشم ءَ تُرندیں زھرشانی ءِ ھک دار ایں-

آئی ءَ گوشت کہ ما گوں وتی بلوچ برات ءُ گْوھاراں دزبندی کن ایں کہ اے ایوک ءَ مئے جیڑہ نہ اِنت۔ اے زُلم ءُ زوراکی گوں ھرکس ءَ بوت کنت۔ اگاں ما بے توار بہ بہ ایں گڑا مئے مات ءُ گُھار ھمروچ گریواینگ بنت، مئے ورنا چہ مارا پُلگ بنت ءُ تھاریں زندانانی تہ ءَ بیگواہ کنگ بنت۔ اگاں ما تپاک بہ بہ ایں ءُ گوں تپاکی ءَ وتی توار ءَ چست بہ کن ایں گڑا ما انساپ ءِ رسگ ءَ الّم سوب مند بہ ئے ایں۔

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں 8 اگست 2024 ءَ جاؤ واجہ باگ بازار.(مین بازار) ءَ تیر جتگ ءُ سرکاری پلہ مرز ھندی کشندہ ٹولی ءِ سروک ءُ راجدروھیں سرمچار اباس پنام لکو کشتگ۔

جارکش ءَ گوشتگ اباس پنام لکّو ء بودو جھمنند چکلی نوندڑہ جاؤ 2018 ءَ پاکستانی لشکر ءِ دیم ءَ سلاہ چگل داتگ۔ پاکستانی لشکر ءِ دیم ءَ سرجھل کنگ ءَ پد نہ بیتگ کہ بےتوار بہ بیت تچکی ءَ پاکستانی لشکر ءِ گون ءَ ھوار بیتگ ءُ بلوچ بچانی شھید کنگ ءُ زور بیگواہ کنگ ءَ ھوار چاگردی سلکاریاں تچکی ءَ ھوار بیتگ۔

گوھرام بلوچ ءَ گوشتگ راجی میاربار اباس پنام لکّو ءَ گل ءَ مدام کڈن کُرتگ کہ بلوچ آجوئی جھد ءِ بگیری ءَ کار مہ کن بلے انگت چہ وتی سلکاری یے یل نہ کُرتگ اَنت ءُ بلوچ جھد کارانی کھول ترسینتگ ءُ پاکستانی لشکر ءِ دست ءَ زوربیگواہ کنگ ءَ تچکی ءَ ھوار بیتگ۔7 نومبر 2018 ءَ گل ءِ کماندار شھید مھیم ،شھید اورنگزیب شھید گُلشیر ءُ شھید راشد جان ءِ شھید کنگ ءُ 8 نومبر 2023 ءَ آواران ءِ ھند پیراندر لوپ ءِ جھمنند ءُ بےمیاریں بلوچ پُسگ نور بکش ء ساھب داد ءِ شھید کنگ ءَ تچکی ءَ ھوار بیتگ۔

جارکش ءَ گوشتگ راجدوہ اباس پنام لکو نیشنل پارٹی ءِ ھیرجان ءِ کستریں برات ساکب بزنجو ءِ چیردستی ءَ جاؤ ءِ جتائیں جاھاں سورگر، نوندڑہ، جھل جاؤ ، دراجکور ءُ آواران پیراندر ءَ پہ ایم آئی ءَ کار کنگ ءَ بیتگ ءُ اے جاھاں ایم آئی ءَ تچکی ءَ اے ٹولی ءَ بلوچ جھد کارانی بگیری ءَ سلاہ بند کُرتگ ءُ آیانی تاوان دیگ ءَ ابید چاگردی سلکاریاں ھوار دُزی ءُ بے میاریں مردمان ءَ پہ زور باجگری گرگ ءِ موکل داتگ۔

گوھرام بلوچ ءَ گوشتگ بلوچستان لبریشن فرنٹ راجی میاربار ءِ کوش ءِ زمہ واری ءَ منّ ایت۔ میاربار ءِ میار چارگ ءُ سزا دیگ بیتگ۔ بلوچ چاگرد ءُ بلوچ راجی زْرمبشت ءِ بگیری ءَ پُرکاریں دُرسیں مردماں کڈن کن ایں کہ وتی میارباری چِست ءُ ایراں بند بہ کن اَنت اگاں نہ ھمے وڑ سزا دیگ بنت ءُ اے وڑ پہ آیانی آؤکیں پدریچ ءَ ھم شرمندی یے سْوب جوڑ بیت۔

بلوچ راجی آجوئی سنگر ( براس ) ءِ جارکش بلوچ ھان ءَ وتی شنگ کتگیں درشان ءِ تہ ءَ گوشتگ کہ براس بلوچ راج ءَ ھال دنت کہ چاردہ اگست ءَ پاکستان ءِ وتگڑیں آجوئی روچ ءِ شاتکامی مراگشاں نشانگ کن ایں۔ ما دلجمیں کہ بلوچ راج پیسرگیں وڑ ءَ زورگر ءِ شاتکامی مراگشاں نہ رو اَنت۔ بلوچ سرڈگار ءِ سر ءَ اے مراگش پاکستان ءِ زورگری ءِ چیدگ اَنت۔

جارکش ءَ گوشتگ کہ چین زورگپتیں بلوچستان ءِ مڈیانی لٹ ءُ پل ءَ زورگریں پاکستان ءِ ھمراھداری ءَ کنگ ءَ اِنت ۔ ما لٹ ءُ پلیں توانمنداں گوشگ لوٹ ایں کہ زورگپتیں بلوچستان ءِ یک انچے ڈگار کس ءَ دستیگ کنگ ءَ نیل ایں۔ اگاں چین زورگپتیں بلوچستان ءَ پاکستانی زورگپتی ءُ لٹ ءُ پلی ءِ شریداری ءَ یل نہ کنت گڑا بلوچ سرمچار زوگریں ریاست پاکستان ءُ آئی شریداراں ترسناکیں سبکے دے اَنت۔ بلوچ سرمچار گوادر ءِ سر ءَ زورگپتی ءَ پاکستان ءُ چین ءِ ارادہ ءُ شوربندیانی زر ءَ چگل دیگ ءِ شریں وڑے ءَ بودناکی ءَ دار اَنت۔

جارکش ءَ گوشتگ کہ چینی جھگیر بلوچ راج ءَ وتگڑیں چین پاکستان اکتسادی راھداری ( سی پیک ) ءِ ارزیشت ءَ سرپد کنگ ءِ گوشگ ءَ اَنت آھمے گپ ءَ وت یکشل ءَ مان آرگ ءَ نہ اَنت کہ گوادر ءَ ھوار سرجمیں بلوچستان یک زورگپتیں دمگے۔ گوادر ءَ برجاھیں شوربندی دیمروئی ءِ نہ اَنت بلکیں لٹ ءُ پلی شوربندی اَنت ایشانی سوبمندی زورگپتیں بلوچستان ءَ آبادی ءِ کساس ءَ مٹ کنگ ءُ بلوچ راج وتی سرڈگار ءَ گوں کمیناں بھر بہ بیت ءُ وتی راجی پجار، وتی سردگار ءُ مڈیانی سر ءَ واک ءَ ھلاس بہ کنت۔

آئی ءَ گوشتگ کہ چین بلوچ مڈیانی لٹ ءُپل ءَ پاکستان ءِ گون ءَ شریداری ءُ آئی کمک ءَ بند بہ کنت گڑا گوں آئی ءَ بلوچ راج ءَ ھچ وڑیں دژمنی نیست۔ چین اے گپ ءَ شریں وڑے ءَ سرپد بہ بیت کہ بلوچ وتی سرڈگار ءِ واک ءَ دگہ ھچ پیمیں راجے ءَ نہ دنت ءُ چونیں ھم اے وڑیں توانمندے ءِ بگیری ءَ تُرندی ءُ گھگیری کنت کہ آ زورگر ءِ کمک ءَ کنت یا تچکی ءَ لٹ ءُ پل ءِ بھر بیت۔

جارکش ءَ گوشتگ کہ چین ءَ ابید آدگہ ڈیھ ھم بلوچستان ءَ چہ باپاری ءَ پھریز بہ کن اَنت۔ بلوچستان ءَ باپاری داں ھما وھد ءَ بوت کنت دانکہ بلوچ راج وتی آجوئیں سرڈگار ءِ واھند بہ بیت ءُ ڈن ءِ باپاریانی ھواری ءَ بلوچ راجی سلامتی ءِ سوڑگ ءِ واکدار ءَ بہ دار ایت۔

آئی ءَ گوشتگ کہ بلوچ راج ءِ مزنی ءُ واکداری ءِ پلگ ءَ چونیں ھم شوربندی جوڑ کنگ بوتگ اے بلوچ ءِ نپانی بگیری ءَ اَنت۔ گوں ایشی ھواری ءَ میان استمانی راھبندانی بگیری اِنت۔ پہ مولمی مٹیاں اے دور ءَ اے شوربندیانی چاگرد ءِ سر ءَ ردیں سان ھست اَنت کہ آ بلوچستان ءَ تباھی ءِ سبب اِنت۔ ھمے ھاتر بنداتی روچاں براس اے شوربندیانی سر ءَ گوں ترندی ءَ گھگیری کنگ ءَ اِنت۔

جارکش ءَ گوشتگ کہ براس درسیں سرمچاراں پرمان دنت کہ زورگریں پاکستانی ریاست ءِ مراگشاں ھوار گوادر ءَ لٹ ءُ پلی شوربندی ءُ پہ زورگپتانی ارادہ ءِ بے سوب کنگ ءَ ایشانی سر ءَ شریں وڑے ءَ ارش بہ کن اِت۔ اے بلوچ راج ءِ سرڈگار اِنت ءُ ایشی آجوئی ءُ پھازداری سرمچارانی سر ءَ اِنت۔

بلوچ یکجھتی کمیٹی ءِ چیردستی ءَ بلوچ راجی مُچی ءِ کاروان تربت ےَ سر بوتگ – بلوچ یکجھتی کمیٹی ءَ مُچی ءَ گشتگ بلوچ وتی جد ءُ جھد ءُ زرمبشت ءَ ھچ رنگ ءَ پُشت ءَ نہ کنز ایت-

تربت ءَ بلوچ یکجھتی کمیٹی ءِ مُچی ءَ ھزارانی کچ ءَ مردین ءُ زالبولاں بھر زرتگ، کیچ ٹاور ءَ ھوار کش ءُ گوراں ماڑیانی سر ءَ باشیں کچے ءَ مھلوک جاڑیگ بیتگ اَنت – مُچی ءَ ڈاکٹر ماہ رنگ ، سمی دین، سبگت اللہ، ڈاکٹر صبیحہ ءَ ھوار دگہ رھشون جاڑیگ بیتگ اَنت-

بلوچ یکجھتی کمیٹی ءِ بنجاھی سروک ڈاکٹر ماہ رنگ بلوچ ءَ تربت مُچی ءَ ترانن کنان ءَ گوشتگ بلوچ ءِ جپا ءُ بھادری ءَ دراھیں پندل بے سوبی ءِ آماچ کتگ انت گوادر راجی مُچی ءَ بلوچ زرمبشت ےَ یک نوکیں تکے پچ کتگ – تلار ءَ بلوچ راج ءَ اوپار ءِ یک نوکیں دروشمے ودینتگ – کوہ سلیمان ءَ داں سیستان بلوچستان ءَ بلوچ راج ءَ بلوچ راجی مُچی ءِ توار ءَ لبیک گشتگ – تیرگواری ءُ آنسوگیس جنگ بیتگ انت بلے بلوچ راج ءَ سابت کدمی پیش داشتگ بلوچ سوبمندی ءُ رژنائیں باندات ءِ ودار ءَ اِنت اے جد ءُ جھد گلامی ءِ جد ءُ جھد ءِ زنجیرانی پروشگ ءَ سوبمند بیتگ – بلوچ یکجھتی کمیٹی بلوچ ءِ توار اِنت راجی یکجاھی ءِ یک جوانیں گامگیجے – بلوچ راج ءَ کلوہ دے آں بلوچ یکجھتی کمیٹی بلوچ راجی زرمبشتے – بلوچ ءَ را ساہ زیرگ ءِ ھک پُلگ بیتگ اے زرمبشت آیوکیں نسل ءِ رژنائیں باندات ءِ زرمبشت انت – بلوچ وتی جد ءُ جھد ءُ زرمبشت ءَ کجام ھم رنگ ءَ پشت ءَ نہ کنز ایت – کیچ ءِ سرڈگار مھر ءُ مھبت ءِ سرڈگار انت، شھیدانی سرڈگار انت –

سبگت اللہ شاہ جی ءَ گوشتگ بیست ءُ ھشت جولائی ءَ زُلم ءُ زوراکی ءِ سلسلگ ءِ درچے بندات بیتگ سَے ھمراہ شھید کنگ بیتگ انت – بازیں کساسے ءَ مردم زدگ کنگ بیتگ اَنت- بالاچ ابید آمیدگس ءِ پرمان ءَ کشگ ءَ پد بندات بیتگیں زرمبشت مروچی یل مھکمیں زرمبشتے ءِ دروشم ءَ گندگ ءَ آیگ ءَ اِنت-

سمی دین ءَ تران کنان ءَ گوشتگ ھشت ماہ ءَ پیش ھمے شھید فدا چوک ءَ یک لاشے ایر کنگ بیتگ – ھروھد ءَ مارا لاش دیگ بیتگ انت بلے ھمک لاش ءَ پد یک نوکیں آشوبے درومبشت کنگ انت مارا پھر انت مئے سیادی یک ھنچیں راجے ءَ اِنت دیمونیاں نہ ترس ایت ءُ دراھیں زوراک پرشتگ انت بلوچانی جد ءُ جھد توانمندی ءِ جد ءُ جھد دیم ءَ جنزگ ءَ اِنت – مئے جد ءُ جھد یک پر ایمنین جد ءُ جھدے بلے ریاست ھروھد ءَ مئے جد ءُ جھد ءِ دیم ءَ توپک تچک کنت اِنت- اسلام آباد ءَ ھمے کنگ بیتگ ءُ گوادر ءَ ھم ھمے داب ءَ تاکت کارمرد کنگ بیتگ اے بلوچ ھمسنتی ءُ ھمپتی جد ءُ جھد ءِ نیمگ ءَ جنزگ ءَ اِنت – گوادر ءَ نیٹ ءُ نیٹورک بند کنگ بیتگ انت آپ بند کنگ بیتگ مھلوک ءَ را جھلانکیں سزا دیگ بیتگ – یک ریاستی دلارے مئے جنگ ءَ گوادر ءَ دیم دیگ بیتگ بلے گوادر ءِ مُچی ءَ سابت کت بلوچ ءِ جد ءُ جھد ءِ دیم ءَ کس داشت نہ کنت انت- بلوچ ءِ راجی پجار ءُ دودانی ھلاس کنگ ءِ جتا جتائیں پندل بندگ بوگ ءَ اَنت بلے بلوچ ھچبر وتی راجی پجار ءُ دودمان ءَ چہ دزکش بیت نہ کنت اِنت- گوست ءَ مئے پت ھمے دگانی سر ءَ بیتگ اَنت مروچی ما انت بلے اے جد ءُ جھد اوشت ءِ آماچ نہ بیتگ-

بلوچستان ءِ دمگ آواران ءَ بلوچ سرمچارانی ءُ ھکومتی پلامرزی کنوکیں ٹولی ءِ میان ءَ میڑ ءِ ھال اِنت-

گیشیں ھالانی رِد ءَ آواران ءِ دمگ جھل جھاؤ ءَ سرکاری پلارمرزی کنوکیں ٹولی ءُ بلوچ سرمچارانی میان ءَ میڑ بیتگ-

اِھوالکار رِد ءَ اے اُرش ءَ دوئیں نیگماں جانی تاوان بیتگ-

بلے جانی تاوانانی پدری انگت کس ءَ نہ کتگ نانکہ انتزامیہ نیمگ ءَ درشان اَتکگ نانکہ دگہ گلے ءَ اے گپ راست ءُ رد کتگ-

جتا جتائیں وھداں دزگیر بیتگین زھرشانی کنوک یل کنگ بیتگ اَنت-

چہ شال ءَ پولیس، ایپ سی ءُ چیریں ادارھانی دست ءَ دزگیر ءُ بیگواھیں راجی مُچی ءِ مراگش ءِ بازیں باسک ءُ زھرشانی کنوک مروچی یل کنگ بیتگ اَنت-

یل کنگ بیتگیں مردمانی تہ ءَ بلوچ اسٹوڈنس ایکشن کمیٹی ءِ ڈپٹی جنرل سیکٹری مھمد بلوچ، بی ایس او کلی جیو یونٹ ءِ ڈپٹی سیکرٹرہ بیبرگ جتک، شعیب جتگ ءَ ھوار دزگیر بیتگیں بازیں مردم یل کنگ بیتگ اَنت ءُ وتی لوگاں سر بیتگ اَنت-

زانگ بہ بیت بلوچ یکجھتی کمیٹی ءِ گوادر ءَ راجی مُچی ءِ مُچی ءِ وھد ءَ پولیس ءُ پاکستانی پوج ءَ شال ءَ بازیں کچے ءَ کریک ڈاؤن کنان ءَ ھاسٹل، لوگ ءُ دکاناں بازیں بلوچ نودربر ءپ سیاسی باسک دزگیر کنگ بیتگ اَنت-

سرکار ءِ ھکم ءَ پولیس ءُ ایف سی ءَ شال ءَ گوادر ءَ روکیں دراھیں راہ بند کتگ اَنت ءُ ھمے ڈول تیرگواری ءُ لٹ ءُ کٹاں بازیں مھلوکے زدگ بیتگ اَنت-

بلوچ یکجھتی کمیٹی ءَ لٹ ءُ کُٹ ءُ دزگیریانی ھلاپ ءَ گوستگیں دو ھپتگاں گوادر ءَ ھوار بلوچستان ءِ جتا جتائیں جاھاں زھرشانی نندانک داتگ انت ءُ گپ ءُ تران ءُ دزگیریانی یل کنگ ءِ سدکی ءَ پد زھرشانی نندانک ھلاس کنگ بیتگ اَنت-

بلوچ یکجھتی کمیٹی ءِ رد ءَ راجی مُچی ءِ ھزار ءَ گیش مھلوک اے وھد ءَ دزگیر کنگ بیتگ اَنت چریشی ءَ چہ لھتے ھمراہ یل کنگ بیتگ اَنت بلے دان انگت ءَ بازیں مھلوک پولیس ءُ پاکستانی پوج ءِ دزگیری ءَ انت-

بلوچ یکجھتی کمیٹی ءَ وتی شنگ کتگیں درشان ءَ گوشتگ مروچی گوادر ءَ راجی مُچی سوگند ءَ پد تربت ءِ نیمگ ءَ کاروان جنز اتگ ءُ اود ءَ بیگاہ ءِ ساھت چار ءَ تربت ءَ شھید فدا چوک ءَ سر بیت انت ءُ اود ءَ مراگشے برجم دارگ بیت اِنت-

شنگ بیتگیں درشان ءَ گوشگ بیتگ راجی مُچی ءِ کاروان ءِ باندا سھب دَہ اگست ءَ سھب ءَ چہ تربت ءَ گریشہ ءِ نیمگ ءَ جنز ایت ءُ اود ءَ راجی مُچی ءِ شھیدانی یات ءَ دیوانے برجم دارگ بیت اِنت-

گیش گوشگ بیتگ دَہ اگست ءِ شپ ءَ گریشہ ءَ جنز اتگ ءُ کاروان سوراب ءَ سر بیت انت اود ءَ راجی مُچی ءِ شھیدانی یات ءَ دیوانے برجم دارگ بیت اِنت-

یازدہ اگست ءَ کاروان سوراب ءَ جنز ات ءُ نوشکی ءِ نیمگ ءَ جنزان کنت ءُ اود ءَ بلوچ راجی مُچی ءِ شھیدانی یات ءَ دیوان برجم دارگ بیت اِنت-

گیش گوشگ بیتگ کہ دوازدہ اگست ءَ نوشکی ءَ جنز ایت ءُ شال ءِ نیمگ ءَ رو ات انت اود ءَ شال ءَ راجی مُچی ءِ شھیدانی یات ءَ دیوانے برجم دارگ بیت اِنت-

زانگ بہ بیت گوستگیں روچ ءَ ماں گوادر ءَ راجی مُچی ءِ زھرشانی نندانک دوازدہ روچاں برجاہ بیتگ ءُ اود ءَ سرکار ءِ میان ءَ گپ ءُ تران ءَ پد راجی ماں گوادر ءَ ھلاس کنگ بیتگ-

راجْدروہ راجی زرمبشت

ٹی بی پی شونگال

پاکستانی پوج ءِ سرشونکار (آئی ایس پی آر) ءِ ڈائریکٹر جنرل میجر اھمد شریف چوھدری ءَ بھتام جنان ءَ گوشتگ“ بلوچ یکجھتی کمیٹی اُرشکارانی سوھو انت، آئی ءِ وتگڑیں رھشون کرمنل ماپیا ءِ سوھو (پراکسی) انت اے سوھو ءَ ایجنسیزانی بنام کنگ ءِ کار دیگ بیتگ، دری پوڑی کاری ءُ درشاندابانی یکجاہ کنگ ایشی ءِ کار انت-”

پاکستان ءَ ھَردیں کہ راجی ھک ءُ راجی جیڑھانی واستا راستیں راجی زرمبشت چست بنت انت گڑا ریاستی ادارہ آیاں درملکی پوڑی کار ءُ زھر ءِ تالان ءِ بھتام ءَ جن اَنت- بلوچ یکجھتی کمیٹی ءَ پیسر اے دابیں بھتام گوستگیں سالاں پشتون تھپز مومنٹ ءِ سر ءَ جنگ بیتگ، ایشی ءَ ابید “ راجْدروھی ” ءِ بھتام پاکستان ءَ ھمک اسٹبلشمنٹ ءِ بگیردارانی راجی زرمبت ءُ مھلوک ءِ سر ءَ جنگ بیگ ءَ انت بلے ریاستی ادارہ تاکت ءُ مڈیانی بوگ ءَ ابید زیردستیں راجانی زرمبشتانی سر ءَ جتگیں بھتامانی منانک ءَ بے سوب بیتگ-

پاکستان ءِ سیاسی پھنات بنگلہ دیش ءِ راجی زرمبشت ءِ لٹشاپکاری گھگیری داری ءِ پژدرکاری ءَ سرکار ءِ ھلاس کنگ ءِ پلامرزی ءَ کنگ ءَ اَنت بلے بلوچستان ءَ ریاست ءِ زوراکی ءِ سر ءَ بے تواری کتگ ءُ ریاستی درشان ءِ سر ءَ زانتکاری کنگ ءُ بلوچ یکجھتی کمیٹی ءَ جنگولانی سوھوکار گوشگ ءَ اَنت چریشی ءَ چہ زانگ بیت اِنت آ بلوچستان ءِ راستیں راستی ءَ سرپد نہ اَنت ءُ ریاستی درشانی ءَ تپاکداری کن اَنت-

بلوچ راجی مُچی ءِ دارگ ءِ واستا ریاست ءُ تاکت بے کساس کارمرد کتگ ءُ راجی مُچی ءِ کارواناں ھواریں مھلوک ٹپیگ ءُ کُشگ بوگ ءَ ابید گوادر، شال ءُ نوشکی ءُ زھرشانی نندانکاں ھزارانی کچ ءَ مھلوک ءِ بھرداری ءَ شنگ بیت انت بلوچ یکجھتی کمیٹی یک بھرانکدارے نہ انت یک راجی پلامرزی ءَ برجمیں ریاستی زوراکیانی ھلاپ ءَ مھکمیں زرمبشتے، آئی ءِ سروکاری بے آڑوکی ورنایاں ھوار انت –

گوادر ءَ انگیر کنگ ءُ بلوچ راجی مُچی ءِ راہ ءِ دارگ ءُ اُرشکار ءُ کرمنل ماپیا ءِ پروکسی ءِ گوشگ ءَ راجی جیڑھانی سر ءَ چست بیتگیں زرمبشتاں اڑوکی جوڑ نہ کن انت سیاستی گھگیری ءَ ریاست ءِ زوراکیانی دارگ ءِ دروشم ءَ بلوچ راج ءِ گور ءَ لٹ شاپی ءِ گھگیری ءَ ابید دگہ راہ پشت نہ کپ ایت-

لوٹانی منگ ءَ پد نندانک ھلاس کتگ زرمبشت مھکمی وڑے ءَ برجاہ بیتگ باندا سھب ءَ کاروان چہ گوادر ءَ کاروان دروشم ءَ تربت ءَ روت، بلوچ یکجھتی کمیٹی

بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ سرکاری واکدار ءِ ٹولی ءَ نندانک ءَ ایر کتگیں لوٹ منّ اِتگ اَنت- مروچیگ ءِ شپ ءَ لوٹانی سر ءَ گامیگج زیرگ ءَ پد نندانک ھلاس کتگ –

شنگ بیتگیں درشان ءَ گیش گوشگ بیتگ بلوچ راجی مچی ءِ آ سرجمیں مردم کہ دزگیر کنگ بیتگ اَنت یا کہ زورانسری بیگوہ کتگ اَنت آیاں یل بہ کن اِت-

لوٹانی زھرشانی ءَ ھواریں مردمانی بگیری ءَ ایف آئی آر ءِ ھلاس کنگ بہ بنت- راجی مچی ءَ شھید یا ٹپی بیتگیں مردماں ایف آئی آراں ریاستی ادارھانی بگیری ءَ نکش نہ بیگ سر ءَ، بی وائی سی کانودی گامگیج ءِ سرجمی ءَ ھک دار اِیت-

راجی مچی ءِ میان ءَ لَس مھلوک ءَ را ھمینچو مالی تاوان بیتگ اَنت آ پُر کنگ بہ بنت- محکمہ داخلہ بلوچستان ءِ نوٹیفکیشن ءَ شنگ بہ کنت کہ ھچ وڑیں پُرایمن مُچی ءِ سر ءَ تاکت کارمرز نہ بیت- ھکومت کجام ھما شھری بزانکہ بی وائی سی باسکاں نہ تُرسین اَنت نانکہ درکانودی ایف آئی آر نکش کنگ بیت- گوادر ءُ مکران ءِ سرجمیں شھدگ پچ کنگ بہ بنت ءُ نیٹ ورک پچ کنگ بہ بنت-

آئی ءَ گْوشتگ کہ اگاں ریاست بلوچ یکجھتی کمیٹی ءِ نبشتھے مھادہ کتگ سرجمیں لوٹانی گامگیجی ءِ ھاتر ءَ یک کمیٹی یے جوڑ کنگ ھم جار جتگ، بلے اگاں اے لوٹانی تہ ءَ ھم یک لوٹے ءِ سر ءَ گامگیج زیرگ مہ بیت گُڑا بی وائی سی اشی ءِ واستا جُھد ءَ برجاہ دار اِیت- بلوچ راجی مچی ءَ ریاست ءَ مئے سے ورنا شھید ءُ بازینے ٹپی کتگ اَنت- اگاں مئے شھید ءُ ٹپی ئیں ورنایانی ایف آئی آر ریاستی ادارھانی بگیری ءَ نکش کنگ نہ بیت اَنت گُڑا ما اشی ءِ بگیری ءَ وتی سیاسی جُھد گیش ترند ءُ مھکم کن ایں-

بلوچ راجی مچی یکروچے راجی مچی یے بیتگ، چریشی ءَ ریاست ءَ تاکت ءُ زوراکی کارمرز کتگ یک دراجکشیں نندانکے ءَ مٹ بیتگ ءُ مروچی سرجمیں بلوچستان زھرشانی ءَ اِنت- بلوچ راج ءِ یکجاھی ءُ ھمکوپگی جوانیں وڑے ءَ پیشداشتگ ءُ سیاسی تاکت ءُ توانمندی ءِ رد ءَ ریاست ءَ را راج دیم ءَ سر جھل کنگ ءَ لاچار کتگ- اے سوبمندی بلوچ راج ءِ زانت، یکجاہ ءُ دیمونی ءِ برورد اَنت- بلے ما سرپد بہ ایں کہ اے جُھد ءِ بنداتی پدانک اِنت- مارا بلوچ سرڈگار ءَ چہ بلوچ چُکچینی ءَ ھوار ھرچ وڑیں زُلم ءُ زوراکی ءِ سرجمی ءِ ھلاس کنگ ھاتر ءَ یک دْراجکشیں مھکمیں جُھد کنگی اِنت، چریشی ءِ ھاتر ءَ مارا وتی میان ءَ یکجاہ ءُ یکجاھی تلان کنگی اِنت- مارا کوہ سلیمان ءَ تاں سیستان بلوچ راج ءِ مھکم کنگ لوٹ اِیت، بلوچ راج ءِ بھر بانگ کنوکیں سرجمیں توانمنداں ھلاس کنگی اَنت ءُ یک مھکمیں جُھدے ءِ واستا وتی سسا ءُ پکری درگت ء ساڑی بیگی اِنت-

آئی ءَ گْوشتگ کہ مروچی شپ ءَ گپ دیوان ءَ لوٹانی سر ءَ گامگیج زیرگ ءَ پد نندانک ھلاس کتگ باند سھب ءَ گوادر ءَ راجی سوگند دیوان بیت، اشی ءَ پد اے کاروان تربت ءِ نیمگ ءَ جنز اِیت – تربت ءَ دیوان کنت اے کاروان وتی دیم کارانی جار ءَ جنت-