TBP Balochi

شبیر بلوچ ءِ زورانسری اوار جنی ءَ چار اکتوبر ءَ ھپت سال سرجم بیت اِنت اے درگت ءَ کراچی پریس کلب ءَ یک روانکے کشگ بیت اِنت-

اے درگت ءَ بیگواھیں شبیر بلوچ ءِ گوھار سیما بلوچ ءَ وتی درشان ءَ گوشتگ منی برات شبیر بلوچ چار اکتوبر دوھزار ءُ شانزدہ ءَ تربت ءِ دمگ گورکوپ ءَ وتی لوگ بانہ زرینہ ءِ دیم ءَ آوار جنگ بیتگ – اے درگت ءَ مارا داں روچ ء مروچی کس ءَ سرپدی نہ داتگ کہ آ کجا اِنت چتور اِنت آ ھست اِنت یا نیست اِنت-

بلوچ اسٹوڈنٹس آرگنائزیشن (آزاد) ءِ رھشون شبیر بلوچ ءِ گوھار سیما بلوچ ءَ گوشتگ مئے زند چار اکتوبر دوھزار ءُ شانزدہ ءَ پد تباہ اِنت – منی مات شپانی نسپ ءَ پاد کیت ءُ نند ایت گمان کنت اِنت منی زھگ اتکگ ءُ دروازگ ءَ ٹک ایت ءُ اے وڑ مہ بیت من واب کپتگ آں-

سیما بلوچ ءَ گوشتگ منی گوھار کندگ ءُ مسکرائی ءَ بے ھیال بیتگ انت- زرینہ کہ آئی ءِ چمانی دیم ءَ مرد اش برتگ آ داں انگت ءَ کسان اِنت ھمود ءَ زرینہ ءِ وشیانی مولما بیتگ اَنت بلے زرینہ ءَ اے نزانت منی مرد زندگ اِنت یا ناں-

آئی ءَ گوشتگ کہ ھما روچ ءَ شبیر بیگواہ کنگ بیتگ ھما روچ ءَ داں روچ ء مروچی من کراچی، شال، اسلام آباد ءَ ٹکر وران اَنت بلے داں انگت ءَ مارا اے درگت ءَ ھچ اھوال دیگ نہ بیتگ اَنت-

سیما بلوچ ءَ گوشتگ کہ شبیر بلوچ چار اکتوبر دوھزار ءُ شانزدہ ءَ تربت ءِ دمگ گورکوپ ءَ دگہ بیست مردمانی ھمراھی ءَ بیگواہ کنگ بیتگ دو ھپتگ ءَ پد درستیں مردم یل بیتگ اَنت بلے شبیر داں انگت ءَ بیگواہ اِنت-

آئی ءَ گوشتگ کہ بلوچستان ءَ بازیں بیگواھیں مردمانی ڈول ءَ شبیر بلوچ ءِ کیس ھم وفاقی سرکار ءِ نیمگ ءَ جوڑ کرتگیں زورانسری آوار جنیانی پٹ ءُ پولکاری کمیشن ءِ گور ءَ نبشتگ اِنت-

آئی ءَ گوشتگ ما بازیں رنداں کمیشن ءِ دیم ءَ پیش بیتگ ایں بلے ھچ آسری نہ بیتگ – سیما بلوچ ءَ گوشتگ کہ چار اکتوبر دوھزار ءُ بیست ءُ سَے ءَ آرٹس کونسل داں کراچی پریس کلب ءَ یک روانکے کشگ بیت اِنت ءُ ھمے روچ ءَ چاگردی ترامجاھاں کمپینے برجم دارگ بیت اِنت-

چہ بلوچی لبزانکی گل چھبار ءِ نیمگ ءَ بلوچی زبان ءِ نامدار ءُ راجی لچہ کار مبارک کازی ءِ یاتگیری ءَ مزن ءُ شاھیگانیں دیوانے برجم دارگ بیت دیوان ءِ تہ ءَ چہ رو دراتکی بلوچستان ءُ رو برکتی بلوچستان ءِ بازیں ھَند ءُ دمگ ءُ چھبار ءِ شورا شھر ءِ باسکاں ءُ دگہ لَس مردماں بھر زُرتگ اے پنچ شمبے روچ 2023/9/28 ءِ بیگاہ ءِ ادار 4/30 ءَ بنگیج کنگ بیت ءُ اے دیوان ماں سئے بھرانی تہ ءَ برجم دارگ بیت :دیوان ءِ بندات ءَ ام ۔ شکاری ءَ ھاوند ءِ پھکیں کتاب کُران ءِ پھگپ پہ دیوان ءَ شکسات انت دیوان ءِ اولی بھر ءِ جارچین واجہ الی بکش دشتیاری ات-

مبارک کازی ءِ یات ءَ رودراتکی بلوچستان ءَ ھوار دگہ جاھاں یکشلیں یاتگیری دیوان آئی ءِ بیرانی ءَ دو ھپتگانی گوزگ ءَ پد ھم ھلاس نہ بیتگ اَنت- مبارک کازی بلوچستان ءِ اولی مردم گوشگ بوگ ءَ اِنت کہ آئی ءِ بیرانی ءَ بلوچ مھلوک اے کساس دردیگ بوگ ءَ گندگ بوگ ءَ اَنت-

گوشتانکی بھر ءِ تہ ءَ مولابکش رئیسی ءَ گوشتانک دیان ءَ گْوشت : کازی ھما کارست انت کہ آئی ءَ وتی زند ءَ شرپ رس اتگ ءُ آئی ءِ زند ءِ آئی ءِ بُت ٹاھینگ بیتگ ۔ دگہ پھناتے مردمانی بُت رند مرگ ءَ ٹاھینگ بنت
ابدالوھاب ایران نژاد ءَ گوشتانک دیان ءَ گْوشت : کازی اھد سازایں لچہ کارے بیتگ ءُ نمیران انت-

دیوان ءَ کریم باشندہ ءَ گْوشتانک دیان ءَ گْوشت : کازی ءَ ارزانیں گالانی کارمرزی ءَ گران ءُ جُھلانکیں لچہ پر بستگ مھندس باسد بھرامی ءَ گْوشتانک دیان ءَ گْوشت: کازی بلوچ ءِ راجی لچہ کارے بیتگ ءُ مروچیگیں دیوان کازی ءِ مزنی ءَ پیش دارایت-

بانُک زاھدء رئیسی ءَ وتی توار بند ءِ تہ ءَ گوشتانک دیان ءَ گْوشت : کازی ءِ نمیرانی ءِ دہ روچ گْوزگ ءَ پد ھم کازی ءِ یات ءَ دیوان برجم دارگ بیگ ءَ انت ۔ بلوچ وتی بامردانی بستار ءَ زانت ءُ آیاں شرپ دات جُنید بلوچ ءَ گوشتانک دیان ءَ گْوشت : کازی ءِ نمیرانی ءِ سَوَب کازی ءِ راجی لچہ کار بیگ انت بلوچی زبان ءِ جُھد کار ءُ ادارہ ارشاد اسلامی ءِ کارکُن واجہ سھیم بلیدہ ءَ دیوان ءَ گْوشتانک دیان ءَ گْوشت: چھبار ءِ منتکہ آزاد بایدانت مئی ازمگراں کمک بہ کن اَنت-

بلوچی لبزانکی گل چھبار ءِ کارگشاد ءُ بلوچی زبان ءِ استاد ءُ وانینوک میرجان میر ءَ دیوان ءِ اتکگیں مھمان وشاتک کُت انت نبشتانکی بھر :اے بھر ءِ تہ ءَ زُھیب جام ءُ سئید ساھیل ءَ وتی نبشتانک دیوان ءَ ندر کُتگ انت-

ساز ءُ زیملی بھر : اے بھر ءِ تہ ءَ استاد وھید بلوچ نسب ءُ استاد کامران نبی ءُ استاد شوکت سپر ءَ کازی ءِ پربند پیش کُت انت ءُ چہ دیوان ءَ چاپانی داد گپت-

سیمی بھر ءَ لچہ کاری بھرات اے بھر ءِ جارچین مولابکش رئیسی ات ءُ مولابکش رئیسی ءَ جھل ءِ مردمانی کہ دیوان ءِ برجم دارگ ءَ دستگیر بیتگ انت مِنّت گپت انت امام آزاد ، اسلم مھتاج زھی ، اسلم رئیسی ، مھمد اساک بلوچ نسب ، مھمد امین مھمدی کارمستر ارشاد اسلامی چھبار ، ابداللہ بھار ، سھیم بلیدہ ، بابل ھمراز ، ھامد جوھر ، تارک ھُسین ھوت ، ملک شھداد زھی ، میرجان میر ، شورا اسلامی باسکانی۔

دیوان ءَ بازیں کچے ءَ لچہ کار ءُ لس مردماں بھر زرتگ ءُ کازی ءِ ازم ءُ آئی ءِ یاتگیری ءَ وتی وتی لچہ گوشتگ اَنت-

روکپتی بلوچستان ءِ دمگ زاھدان ءَ ایرانی چیریں ادارھاں یک مردمے آوار جنگ ءَ پد بیگواہ کتگ-

گیشیں اھوالانی رد ءَ گوستگیں روچ ءَ زاھدان چمران ءَ ایرانی لشکر ءَ دکاندارے لٹ ءُ کُٹ کنگ ءَ پد دزگیر کتگ ءُ گون وت برتگ-

آوار جنگ بیتگیں مردم ءِ پجار اسماعیل ریکی ء نظر ءِ نام ءَ زانگ بیتگ ءُ آ زاھدان ءِ جھمنند اِنت-

اھوالانی رد ءَ اسماعیل گُد ءِ دکاندارے ءُ آ گوستگیں روچ ءَ وتی مات ءِ ھمراھی ءَ بازار ءَ سامان زیرگ ءَ روگ ءَ بیتگ کہ ایرانی لشکر ءَ لٹ ءُ کُٹانی نشانگ کتگ ءُ گوں وت برتگ –

زانگ بہ بیت روکپتی بلوچستان ءِ بنجاھی شھر زاھدان ءَ جمعہ خونین ءَ یک سالے پِر گوزگ ءَ پد اود ءَ مردم کُشگ بیتگیں مردمانی یات ءَ روانک کشگ ءُ زھرشانی کنگ ءَ دلمانگ اَنت ءُ چریشی ءِ سبب ءَ اود ءَ گیشتر مردماں ترسینگ ءُ روانک ءُ زھرشانیاں بھر نہ زورگ گوشگ ءَ اَنت-

زانگ بہ بیت گوستگیں روچ ءَ زاھدان ءَ بازیں کچے ءَ پھزداری ءَ پھزدار سر بیتگ اَنت کہ آیانی توک ءَ جتا جتائیں دگانی سر ءَ نگاھداری کنگ ءَ اَنت-

نوابشاہ، سکرنڈ ءِ میتگ ماڑی جلبانی ءَ پاکستانی پوج ءُ پولیس ءَ کماشیں سندھی راجدوست راھشون رجب جلبانی ءِ لوگ سر ءَ بیڑبرتگ، اے میان ءَ تیرگواری ءِ آسر ءَ پنچ زالبول ءُ دو مردین بیران بیتگ اَنت-

یات بہ بہ اِت اشی ءَ ساری ھم بازیں رند ءَ پاکستانی لشکر ءَ راجدوستیں راھشون رجب جلبانی لوگ سر ءَ بیڑبرتگ ءُ آ یکبرے زورانسری بیگواہ ھم کتگ-

ھمے درگت ءَ وائس فار مسنگ پرسنز آف سندھ ءَ درشان شنگ کتگ گْوشتگ کہ مروچی پاکستانی پوج ءَ سکرنڈ ءَ پنچ زالبول ءَ ھوار دو مردین کُشگ بیتگ ، اے انسانی ھکانی سرزاھر پادمالی اِنت، میان اُوستمانی ادارہ ءُ انسانی ھکانی گل زوت گامگیج بزور اَنت ءُ سرجمیں سندھ زھرشانی ءِ دزبندی کن ایں-

وھدے کہ اے وئیل سر ءَ جیئے سندھ قومی محاذ ( آریسر ) چیئرمین اسلم خیرپوری ءَ ھوار دگہ راجدوستیں پارٹی ءُ سیاسی چاگردی گلانی نیمگ ءَ گم ءَ زھری درشانگ ءَ اَنت-

بلوچستان ءِ دمگ ھُزدار ءِ ھند وڈھ ءِ جاور یکشلہ نگیگ اَنت- مروچی میڑے ءَ یک مردمے رحمت رخشانی بیران بیتگ-

اے مرد ھُزدار ءِ دمگ نال ءِ جھمنندیں- دمگی اِھوالکارانی رِد ءَ اے مرد ءِ سیادی پاکستان پوج ءُ چیریں ادارھانی پلامرزی کنوکیں ٹولی ڈیتھ اسکواڈ ءَ اِنت-

رحمت رخشانی ءِ درگت ءَ دمگی مردمانی گْوشگ اِنت کہ آ ھُزدار ءِ کش گور ءِ دمگاں راجدوستیں سیاسی باسکانی آوار جنگ، زورانسری آوار جنگ ءُ آیاں تیرانی نشانگ کنگ ءَ اَبید مردماں برگ ءُ پد ءَ زر گرگ ءُ دُزی ءَ ھم ھمگرنچ بیتگ-

اِھوالکارانی رِد ءَ مروچی وڈھ ءَ بیتگیں میڑاں رحمت رخشانی ءَ ھوار ڈیتھ اسکواڈ ءِ بازیں کارندھے کُشگ بیتگ، بلے آ دگہ مردمانی پجّار انگت نہ بیتگ اَنت-

گرلز ڈگری کالج ھزدار ءِ نودربراں ھزدار ءِ دمگدار ءِ گون ءَ کالج ءِ جیڑھانی زوت ھلاس کنگ ءِ پژدر ءَ گپ ءُ تران بیتگ ءُ زھرشانی ھلاسینگ بیتگ –

نودربراں گوشتگ کہ اگاں اے گوشتگیں لوٹ ءُ کالج ءَ نودربراں انتزامیہ ءُ پرنسپل ءِ نیمگ ءَ ترسینگ ھلاس کنگ نہ بیت اَنت گڑا دوبر ترندیں رنگے ءَ زھرشانی کنگ ءَ لاچار بہ ایں-

زانگ بہ بتت مروچی بیست ءُ ھشت اگست ءَ گرلز ڈگری کالج ھزدار ءِ نودربراں ٹرانسپورٹ، بی ایس ءُ ایف ایس سی ءِ کلاسانی پشکپتگین، استادانی کمی ءُ دگہ جیڑھانی گیش ءُ گیوار ءِ پژدر ءَ کالج انتزامیہ ءُ زمہ وارانی نیمگ ءَ گامگیج نہ زورگ ءِ پژدر ءَ زھرشانی کتگ ات-

نودربرانی رد ءَ زھرشانی وھد ءِ بازیں نودربر کالج ءَ بند کنگ ءُ ترسینگ بیتگ اَنت ءُ گڈسر ءَ انتزامیہ ءِ گون ءَ گپ ءُ تران ءَ جیڑھانی گیش ءُ گیواری ءُ کالج انتزامیہ ءِ نیمگ ءَ نودربرانی نہ ترسینگ ءِ سدکی دیگ ءَ پد زھرشانی مھتل کتگ-

روکپتی بلوچستان ءِ دمگ رودان ءَ دو زھگ آپ ءَ کپتگ ءُ بیران بیتگ اَنت-

گیشیں اھوالانی رد ءَ وئیل گوستگیں روچ ءَ پیش اتکگ کہ زھگ گوں مات ءُ پتانی ھمراھی ءَ باگ ءَ شتگ بیتگ انت ءُ اود ءَ ھردوک آپ ءَ کپتگ ءُ بڈ اتگ اَنت-

اھوالانی رد ءَ ھردوکیں زھگ باگ ءَ تالاب ءِ گور ءَ لیب ءَ بیتگ اَنت کہ ناگتی شترتگ ءُ آپ ءَ کپتگ ءُ بڈ اتگ اَنت-

زھگانی توک ءَ یک جنکوے ءُ یک بچکوئے ھوار اَنت –

زھگانی پجار ھشت سالی ئیں فاطمہ زھرا کوھی ءُ ھپت سالی ئیں مھمد حسین رھیمی جھمنند جگین رودان ءِ نام ءَ زانگ بیتگ اَنت-

زانگ روکپتی بلوچستان ءَ چوشین وئیل پیش اتکگ انت کہ اود ءَ زھگ کپگ ءُ بیران بوگ ءَ اَنت کہ آیانی گیشتریں سبب تالابی سر ءَ اوشتوکیں پھزداری نیست اِنت-

ممتاز بلوچ ءِ محمد مراد کہ مشکے نوکجو ءِ جھمنند اِنت سئمی برءَ زورانسری بیگواھی ءِ آماچ کنگ بیتگ۔

ممتاز بلوچ ءِ کھول ءِ ردءَ آ اولی برءَ 2016 ءَ زورانسری بیگواہ کنگ بیتگ ءُ 6 ماہ ءَ پدیل کنگ بیتگ ءُ پدءَ نومبر 2017 ءَ دومی برءَ زورانسری بیگواھی ءِ آماچ کنگ بیتگ ءُ دو سالاں پد جنوری 2020 ءَ یل کنگ بیتگ ءُ نی ممتاز سئمی برءَ 6 ستمبر 2022 ءَ چہ خضدار ءَ زورانسری بیگواہ کنگ بیتگ کہ آ داں انگت بیگواہ اِنت۔

کھول ءَ آئی ءِ زندءِ بابت ءَ تُرس ءِ درشان کنان ءَ گُشتگ کہ ممتاز بلوچ ءِ زند ھتر ءِ تہءَ اِنت، مردمی اگبالانی گل ممتاز ء محمد مراد ءِ رکیتگیں دروشم ءَ یل کنائنگ ءَ پہ کرد پیلو بہ کن اَنت۔

بالی وڈ ءِ دبنگ ایکشن ھیرو سلمان خان ءِ نوکتریں تامر “ٹائیگر تِری” ءِ ٹیزر شنگ کنگ بوتگ –

ٹائیگر تھری ءِ ٹیزر یوٹیوب ءَ ھوار ایندگہ چاگردی ترامجاھاں شنگ کنگ بوتگ کہ آئی ءِ تہ ءَ سلمان خان گوں جوانیں ایکشن ازمکاری ءَ گندگ بیت اِنت –

اے تامر سال دوھزار ءُ دوازدہ ءَ شنگ بوتگیں سلمان خان ءِ تامر “اِک تھا ٹائیگر” ءُ پد ءَ “ٹائیگر زندہ ہے” نوں ٹائیگر سیریز ءِ اے سیمی تامر انت – اگاں ٹیزر ءِ گپ جنگ بہ بیت گڑا سلمان خان گوں مھلوک ءَ دیم پہ دیم ءَ گپ جنگ ءَ گندگ بیت اِنت –

ٹیزر ءِ تہ ءَ ھمے پیش دارگ بوتگ کہ ٹائیگر بزاں سلمان خان ءِ سر ءَ گداری ءُ ڈیھے گون ءَ دژمنی کنگ ءِ بھتام جنگ بیت کہ چریشی ءَ پد آ چہ انڈیا ءَ وتی وتن دوستی ءِ سرٹیفیکٹ ءِ لوٹ ءَ کنت اِنت –

ٹائیگر تھری یش راج فلم (وائی آر ایف) سپائی یونیورس تامرے کہ آئی ءِ تہ ءَ سلمان خان ءَ ابید کترینہ کیف ءُ عمران ھاشمی ھم ھوار انت کہ بنجاھی ازم ءِ رول ءَ کنگ ءَ انت –

اے تامر ءِ سوجکار منیش شرما انت وھدیکہ آئی ءِ پروڈیوسر وائی آر ایف ءِ واھند ادتیہ چوپڑا انت – اے تامر نومبر ءَ ربیدگی روچ دیوالی ءَ ھندوستان ءَ ھوار سرجمیں جھان ءَ پیش دارگ بیت اِنت –

ٹائیگر تھری ءِ ٹیزر ءِ تہ ءَ کترینہ کیف ءُ عمران ھاشمی پیش دارگ نہ بوتگ انت – بلے عمران اے تامر ءِ تہ ءَ وِلن ءِ رول ءَ کنگ ءَ انت وھدیکہ کترینہ سلمان خان ءِ ھمراھی ءِ “زویا” ءِ کرد ءَ پیش دارگ ءَ انت –

دگہ گپ ءِ ایش انت سال دوھزار ءُ نوزدہ ءَ پد اے اولی رند انت کہ کترینہ کیف ءُ سلمان خان مزنیں پردھے سر ءَ یکجاہ گندگ بنت اِنت – گڈی رند ءَ اے دویں مزنیں پردھے ءِ سر ءَ سال دوھزار ءُ نوزدہ ءَ تامر “بھارت ” ءِ تہ ءَ گندگ بوتگ انت –

اگاں یش راج فلمز “یونیورس ” ءِ گپ جنگ بہ بیت گڑا ایشی ءِ تہ ءَ ٹائیگر سیریز ءَ ابید شاہ رخ خان ءِ تامر پھٹان ءُ ریتک روشن ءِ تامر “وار” ھم ھوار انت –

انڈیا ءِ رسانکدرانی رِد ءَ ٹائیگر تھری ءِ تہ ءَ سلمان خان ھمراھی ءَ شاہ رخ خان ھم “پھٹان” کیمیو رول ءَ کنت اِنت –

زانگ بہ بیت پٹھان تامر ءِ تہ ءَ سلمان خان ءَ ٹائیگر ءِ دروشم کیمیو رول کتگ ات –

مصر ءَ یک ورنایے ءَ وتی پیسریگیں دیشتار دگ ءِ سر ءَ تیرگواری کتگ ءُ کشتگ-

العربیہ نیٹ ءِ رد ءَ قاھرہ ءِ رودراتکی ھند ءَ نصر شھر ءَ یک دگے ءِ سر ءَ ورنایے ءَ دگ ءَ گوزوکیں یک جنکے ءِ سر ءَ تیرگواری کتگ ءُ آ رھگوزیانی دیم ءَ بیران بیتگ-

چم دیستگیں مردمانی رد ءَ جنک ڈیوٹی ءَ واتر آیگ ءَ بیتگ کہ ورنا ءَ داشتگ ءُ آئی ءِ گون ءَ زھرناکیں درشانی کتگ ءُ چریشی ءَ پد ورنا ءَ تیرگواری کتگ-

پولیس ءِ پٹ ءُ پولانی رد ءَ ورنا ءِ اُمر بیست ءُ چار سال اِنت ءُ آئی ءَ بیست ءُ چار سالی ئیں شیما ءِ گون ءَ مھر کتگ – لھتے سالاں پیش دیشتار بندی بیتگ اَنت پد ءَ جنک ءَ سانگ بندی پروشتگ-

ورنا ءَ جنک ءِ وش کنگ ءِ جھد کتگ بلے جنک ءُ آئی ءِ کھول ءَ سلاہ رد کتگ ءُ چریشی ءَ پد آئی ءِ دیشتار ءَ کُشگ ءِ پیسلہ کتگ بیتگ-

پولیس ءِ رد ءَ ورنا وتی پیسریگین دیشتار ءِ رندگیری ءَ بیتگ ءُ آئی ءَ سرپدی بیتگ آ کدی ڈیوٹی ءَ روت ءُ چی وھد ءَ واتر بیت ءُ کجا کجا روت اِنت-

بس ءِ ایر کپگ ءَ ورنا ءَ جنک داشتگ ءُ دیشتاری بندی ءِ واتر گوشگ ءِ گوشتگ ءُ چریشی ءَ جنک ءَ ترندی ءَ رد کتگ ءُ اے وھد ءَ کمو برزی گپ بیتگ ءُ ورنا جزبات ءَ اتکگ ءُ تیرگواری یے کتگ-

پبلک پراسیکیوشن ءَ جرمکار ءِ سلامتی ءِ درگت ءَ رپورٹانی لوٹ کتگ انت دانکہ جست ءُ پرس ءُ آئی ءِ گپ ءَ ریکارڈ کت بہ کن ایں-

مصر ءَ دیشتار بندی ءُ مھر ءِ بے سوبی ءِ سبب ءَ کوشانی وئیل پیش اتکگ اَنت ایشانی توک ءَ درستاں گیش تورناک نیرہ اشرف ءِ کیس اِنت کہ آ المنصور یونیورسٹی ءِ گیٹ ءِ دیم ءَ فیکلٹی آف آرٹس ءَ کلاس فیلو مھمد عادل ءَ گون سانگ بندی ءِ رد کنگ ءَ گیٹ ءِ دیم ءَ تیرگواری کتگ ءُ کشتگٹ

الشرقیہ کمشنری ءَ یک جنکے سلمی مھمد بھجت نامینے میڈیکل فیکلٹی ءَ آئی ءِ ھمراھے ءَ کُشتگ-