TBP Balochi

مستونگ ءِ اندوھناکیں وئیل

ٹی بی پی شونگال

بیست ءُ نُھ ستمبر ءَ مستونگ ءَ یک اندوھناکیں (المناک) وئیلے ات، ائید میلاد النبی ءِ مُچی ءِ سر ءَ الفلاح مسیت ءِ نزیک ءَ یک وتکُشیں تراکے کنگ بیت کہ اِیشی ءِ تہ ءَ پنجاہ ءَ گیشتر مردم بیران بیتگ انت ءُ چِل مردم ءَ گیش ٹپیگ اَنت، بیرانیانی تہ ءَ گیشی ءِ تُرس ھست اِنت پرچاکہ اُرش ءَ ٹپی بیتگیں بازیں مردمانی جاور ھال باز نگیگ اَنت۔ بلوچ کواسانی گْوشگ اِنت کہ بلوچ آجوئی ءِ جُنز ءَ ھلاس کنگ ءِ ھاتر ءَ پاکستانی پوج ءَ بلوچستان ءِ تہ ءَ نیکراھی ناشرکاری ءِ توم کِشتگ ءُ ایشاں مھکم کنگ ءُ تالان کنگ ءِ کوشست کنگ ءَ اِنت۔

بلوچ کواس ءُ ناشرکاری ءِ بگیریں پریس کار یکشل ءَ گوں ھمے تُرس ءِ درشان ءَ کنگ ءَ اَنت کہ نیکراھی ناشرکارانی رودینگ ءَ چہ بلوچ جنگ ءِ راہ دارگ بیت نہ کنت بلے چہ اے پالیسیاں سرجمیں دمگ سانمند بیت اِنت۔

پاکستان گمانی دروشم ءَ نیکراھی ناشرکارانی ھما توم ءَ کہ بلوچستان ءُ پشتون سرڈگار ءِ سر ءَ کِشگ ءَ اِنت آئی ءِ سان پاکستان ءِ سر ءَ ھم کپ اَنت۔ پاکستانی ریاست ءِ نیمگ ءَ نیکراہ ءَ ایردستیں راجانی بگیر ءَ سلاہ ءِ پئیم ءَ کارمرز کنگ ءِ شوربندیاں انچیں جاور ودی کُتگ اَنت کہ چریشی ءَ بلوچستان ءِ تہ ءَ ترندیں نیکراھی ناشرکاری ودگ ءَ اَنت۔

مستونگ مزنیں وھدے ءَ چہ نیکراھی ناشرکارانی بنجاہ جوڑ بیان اِنت۔ چہ اے وئیل ءَ پیش دوھزار ءُ ھژدہ ءَ یک وتکُشیں تراکے ءِ تہ ءَ دو سد ءَ گیش مردم بیران بیتگ اِت اَنت۔ ھزارہ برادری ءِ سر ءَ یکشلی ءَ گوں اے دمگانی تہ ءَ اُرش کنگ بیتگ اَنت۔ ریاست اے ارشاں گوں دگہ ڈیھاں بندگ ءَ گوں چُشیں اندوھناکیں وئیلانی سان ءَ ھلاس کنگ ءِ کوشست کنت ءُ پد ءَ لھتیں وھد ءَ رند دروگیں پولیس میڑانی تہ ءَ زورانسری بیگواھیں کُش ایت ءُ اُرشانی بھتام ءَ آیانی سر ءَ لڈ اِیت۔

بلوچ جنگ ءِ ھلاس کنگ ءِ ھاتر ءَ ریاست ءِ برجاھیں شوربندیاں بلوچستان ءِ تہ ءَ سیاسی ادارگ نزور کُتگ اَنت، چریشی ءِ سوب ءَ نیکراھی ناشرکاری ءِ دارگ ءِ ھاتر ءَ مھکمیں سیاسی تاکتے نیست اِنت، اے جاورانی تہ ءَ راجدوست ءُ آجوئی لوٹوکیں ادارگانی زمہ واری گیشتر ود انت کہ آ سیاسی سنگر ءَ گھتریں دروشم ءَ کارمرز کنان ءَ شوربندی اڈ بہ دے اَنت کہ چرایاں بلوچ چاگرد ءِ تہ ءَ ترندیں دوستی ءِ دارگ ءَ پہ سیاسی جُنز مھکم کنگ بہ بیت اِنت۔

روکپتی بلوچستان ءِ بنجاھی شھر زاھدان ءَ گوستگیں دو روچاں جاور ھالانی گر ءُ دار کنگ ءِ ھاتر ءَ ایران ءِ دگہ اُستاناں چہ پوجی کارمند سر بیتگ ءُ اود ءَ دگ ءُ دمکاں سیکورٹی ءِ گیشیں نپر اوشتگ ءَ گندگ آیگ ءَ اَنت-

زاھدان جمعہ خونین ءِ یات ءَ گوستگیں شپ ءَ ھم دگانی سر ءَ ٹائر ماندارگ ءَ گندگ بیتگ اَنت-

گوستگیں شپ ءَ زاھدان ءِ دمگ کریم آباد ءَ لس مردماں دگ ءِ سر ءَ ٹائر مانداشتگ ءُ ایرانی سرکار خامنہ ای ءِ ھلاپ ءَ اوگام جتگ-

جتاجتائیں ھلکاں شنگ بیتگیں تامراں گندگ بیت اِنت مھلوک وتی زھر ء درشان ءَ کنگ ءَ اِنت-

گوستگیں روچ ءَ چھبار ءُ ایرانشھر ءَ ھوار گیجوکیں دگ ءِ سر ءَ مِکیں خامنہ ای ءِ مزنیں اکسے ناشناسیں مردماں مانداشتگ ات کہ اود ءَ گندگ بیت اِنت اکس بُن اِنت-

زاھدان ءَ ھوار گوستگیں روچ ءَ بازیں شھراں جمعہ خونین ءِ یات ءَ ھرتال کنگ بیتگ ءُ ایشی ءَ ھوار دری ملکاں روکپتی بلوچستان ءِ جھمنندین بلوچاں ھم زھرشانی کتگ ءُ اود ءَ جمعہ ء خونین ءَ کُشگ بیتگیں مردمانی انساپ ءِ ھاتر ءَ لوٹ کتگ-

بلوچستان ءِ شھر مستونگ ءَ الفلاح دگ ءَ عید میلادالنبی ءِ جلوس ءَ بیوکیں وتکش تراک ءَ پولیس ءِ ڈی ایس پی ءَ ھوار پنجاہ ءُ پنچ مردم بیران ءُ شست ءَ گیش زدگ بیتگ اَنت ءُ تراک ءَ دَہ سیر داں پانزدہ سیر ءِ کچ ءَ مواد ءُ بال بیرنگ کارمرد کنگ بیتگ اَنت-

وتکش تراک مستونگ بازار ءَ الفلاح دگ ءَ بیتگ کہ اود ءَ عاشقان رسول مدینہ مسیت ءِ ڈن ءَ عید میلادالنبی ءِ جلوس ءِ واستا مُچ بیتگ اَنت –

ھمے وھد ءَ جلوس رھادگ بیتگ کہ جلوس ءِ میان ءَ یک تراکے بیتگ ءُ چریشی ءَ بازیں کچے ءَ تاوان بیتگ اَنت-

اسسٹنٹ کمشنر مستونگ ءِ رد ءَ مدینہ مسیت ءِ نزیک ءَ میلاد ءِ واستا مردم مُچ بیتگ اَنت پد ءَ مھلوک روانک ءِ دروشم ءَ مُچی ءَ بھر زورگ ءَ بیتگ اَنت-

آئی جی پولیس عبدالخالق شیخ ءَ وتکش اُرش ءِ ھال راست کتگ ءُ گوشتگ کہ ڈی ایس پی سٹی نواز گشکوری ءَ وتکش اُرشکار ءِ دارگ ءِ جھد کتگ بلے ھمے وھد ءَ تراک بیتگ ءُ آ وت ھم بیران بیتگ ءُ تراک ءَ سَے پولیس کارمند زدگ بیتگ اَنت –

ڈسٹرکٹ ھیلتھ آپیسر عبدالرشید ءَ گوشتگ کہ تراک ءَ پد زدگ ءُ بیران بیتگیں مردمانی لاش نواب غوث بکش رئیسانی ھسپتال ءُ ڈی ایچ کیو مستونگ ءَ برگ بیتگ اَنت-

تراک ءَ بیران بیتگیں مردمانی تہ ءَ شانزدہ لاش ءُ بیست زدگ بیتگیں مردم ڈی ایچ کیو مستونگ ءَ ءُ ھمے وڑ سِی ءُ دو لاش بازیں کچے ءَ زدگ بیتگیں مردم نواب غوث بکش رئیسانی ھسپتال ءَ برگ بیتگ اَنت ءُ ھردوکیں ھسپتالاں بنداتی درمان ءَ پد زدگ بیتگیں شال ءَ برگ بیتگ انت کہ اود ءَ پنچ زدگ بیتگیں مردماں راہ ءَ ساہ داتگ اَنت –

راہ ءَ ساہ دیوکیں مردمانی لاش سول ھسپتاک شال ءَ برگ بیتگ اَنت ءُ گمانی رنگ ءَ بیران بیتگیں مردمانی کساس پنجاہ ءُ سَے اِنت ءُ شست ءَ گیش زدگ اِنت-

سول ھسپتال ءِ بنشون ءِ رد ءَ مستونگ تراک ءَ دگہ دو زدگیناں وتی ساہ داتگ اَنت چریشی ءَ پد بیران بیتگیں مردمانی کچ پنجاہ ءُ پنچ ءَ سر بیتگ اَنت –

اے دوئینانی تہ ءَ یکے ءَ ساہ ٹراما سینٹت سول ھسپتال ءُ دومی ءَ بی ایم سی ءَ درمانی ءِ وھد ءَ ساہ داتگ اَنت- سول ھسپتال ٹراما سینٹر ءَ ھشت زدگیں مردمانی جاور ناگیگ اَنت-

روکپتی بلوچستان ءَ ’جمعہ خونین‘ ءِ یاتگیری ءَ مروچی جتا جتائیں شھراں ھرتال کنگ ءُ دکان بند کنگ بیتگ اَنت-

ھرتال روکپتی بلوچستان ءِ بنجاھی شھر زاھدان، مھرستان،سراوان،چھبار،نوبندیان ءُ ایرانشھر ءَ جمعہ خونین ءِ یاتگیری ءَ ھرتال کنگ بیتگ-

اھوالانی رد ءَ گوستگیں شپ ءَ ھم زھرشانی کنگ بیتگ ءُ بازیں جاھاں زھرشانی کنوکاں ٹائر مانداشتگ اَنت-

ھمے وڑ گوستگیں روچ ءَ آدینگ ءِ نماز ءَ پد مکی مسیت ءَ ایرانی پولیس ءَ آنسو گیس جتگ ءُ بازیں مردم زدگ ءُ دمتوس بیتگ اَنت-

ھمے وڑ ءَ گوستگیں روچ ءَ ایرانی لشکر ءَ زاھدان ءَ ھوار دگہ دگہ جاھاں زھرشانی کنوکیں سِی مردم ءَ گیش آوار جتگ ءُ گون وت برتگ اَنت-

زاھدان ءِ شھر ءَ سیکورٹی ترند کنگ بیتگ ءُ اود ءَ دگانی سر ءَ پولیس ءُ پھزدارانی گیشیں گاڑی اوشتگ ءَ گندگ بیگ ءَ اَنت-

زانگ بہ بیت گوستگیں سال ءِ سِی ستمبر ءِ روچ ءَ زاھدان ءَ ماھو بلوچ ءِ انساپ ءِ ھاتر ءَ بیوکیں زھرشانی ءِ سر ءَ پولیس ءَ تیرگواری کتگ ات کہ چریشی ءَ سَد ءِ کچ ءَ مردم بیران ءُ سَے سد ءِ کچ ءَ زدگ بیتگ ات اَنت-

گوستگیں سال ءِ شانزدہ ستمبر ءَ ایران ءَ کرد جنک مھسا امینی ءِ بیرانی ءَ پد اود ءَ یک زھرشانی ءِ ود اتگ ات کہ چریشی ءَ بازیں کچے ءَ مردم کُشگ ءُ گرگ بیتگ ات اَنت-

انسانی ھکانی گل ایمنسٹی انٹرنیشنل ایران ءِ رد ءَ ایران ءَ درستاں گیشتر مردم سیستان ءُ بلوچستان ءَ جنگ بیتگ انت کہ آیانی توک ءَ کُشگ بیتگیں گیشتریں مردمانی کساس بیست سال ءَ داں شانزدہ ءِ سال ءِ اُمر ءِ مردم اَنت-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں بیست ءُ نُھ ستمبر ءَ آدینگ ءِ بیگاہ ءِ ھپت ءَ جاؤ آواران ءَ زورگریں پاکستانی لشکر ءِ پانگس ءِ سرءَ گوں ٹوھیں سلاھاں اُرش کُرتگ ءُ یک کارمندے کُشتگ ءُ دو ٹپی کُرتگ۔

آئی ءَ گوشتگ آواران ءِ ھند جاؤ ءِ کوھڑو ءَ ملاھاجی زیارت ءَ برجاھیں پاکستانی لشکر ءِ پانگس ءِ سر ءَ اُرش کنگ بیتگ۔پانگس ءِ سر ءَ دو راکٹ آس داتگ ءُ پد ءَ گوں وتکار ءُ ٹوھیں سلاھاں اُرش کُرتگ۔گوں دوئیں راکٹاں پانگس ءِ سنگر نشانگ کُرتگ کہ اے دمان ءَ سَے لشکری کارمند سنگر ءَ ساڑی بیتگ انت کہ ایشانی تہ ءَ یکے جاھی مُرتگ ءُ دو سَک ٹپی بیتگ انت۔

میجر گوھرام بلوچ ءَ گوشتگ بی ایل ایف اے اُرش ءِ زمہ واری ءَ منّ ایت ءُ مئے اُرش داں بلوچستان ءِ آجوئی ءَ زورگریں پاکستانی لشکر ءِ سر ءَ برجاہ بنت اِنت۔

بلوچستان ءِ نامداریں ندکار ءُ گوستانک نبیس ڈاکٹر فاروق بلوچ ءِ نوکتریں کتاب “بلوچ آریائی تعلقات” چاپ ءُ شنگ بوتگ – کتاب ءِ دیمدرائی ءَ مراگش ءِ برجم دارگ بوگ ءَ انت –

نامداریں گوستانک نبیس ڈاکٹر فاروق بلوچ نوکتریں کتاب “” بلوچ آریائی تعلقات ” چہ علم و ادب پبلشر کراچی ءِ نیمگ ءَ چاپ ءُ شنگ کنگ بوتگ ءُ اے کتاب ڈاکٹر ءِ گوستانک ءِ درگت ءَ ھشتمی کتاب انت –

زانگ بہ بیت گوستانک ءِ درگت ءَ ڈاکٹر ءِ چدوپیسر ھپت کتاب چاپ ءُ شنگ بوتگ انت کہ آیانی تہ ءَ مکران، بلوچ اور انکا وطن، بلوچ تاریخ کے قدیم شخصیات ،قدیم بلوچ قبائل اور بلوچستان کی قدیم تاریخ ،بلوچ سماج ، بلوچ و بلوچستان، بلوچوں کی رومانوی داستانیں ھوار انت ءُ اے ھشت ایں کتاب ماں اردو زبان تہ ءَ انت –

دومی نیمگ ءَ ڈاکٹر فاروق بلوچ ءِ نوکتریں کتاب بلوچ آریائی تعلقات ءِ دیمدرائی ءَ مراگش ءِ برجم دارگ بوگ ءَ انت ءُ دیمدرائی مراگش ءِ گچینی مھمان پروفیسر ڈاکٹر فاروق بلوچ انت –

کتاب دیمدرائی مراگش عصمت اللہ خان جمالدینی لائبریری کمیٹی ءِ چیردستی ءَ ماں عصمت اللہ خان لائبریری گورنمنٹ بوائز ہائی سکول جمالدینی نوشکی برجم دارگ بوگ ءَ انت –

بلوچستان ءُ کراچی ءَ دو ورناہ زورانسری آوار جنی ءِ نشانگ کنگ بیتگ اَنت-

دی بلوچستان پوسٹ ھال پترءَ سر بیتگیں ھالانی رِد ءَ کیچ ءِ بُنجاھی شھر چہ تربت ءَ پاکستانی پوج ءَ یک ورنایے زورانسری آوار جنی ءِ نشانگ کتگ-

اِھوالکارانی رِدءَ ورناہ پاکستانی پوج تربت ءِ دمگ اسٹار پلس ءَ چہ ھما وھد ءَ آوار جتگ ءُ بیگواہ کتگ وھدے آ وتی دکان ءَ نندوک بیتگ-

آوار جنگ بیتگیں ورنائے پجّار ھپدہ سالی ئیں یاسر نجم ء نجم نام ءَ چہ بیتگ، کھول ءَ یاسر ءَ یل کنائینگ ءِ ھاتر ءَ دزبندی کتگ ءُ کہ انسانی ھکانی ادارہ یاسر ءِ پہ سلامتی یل کنائینگ ءَ وتی کرد ءَ پیلو بکن اَنت-

ھمے وڑ چہ کراچی ءَ بلوچستان ءِ جھمنندے پاکستانی پوج ءَ زورانسری آوار جنی ءِ نشانگ کتگ-

کھول ءِ رِدءَ حمل یعقوب جھمنند بلنگور دشت پاکستانی پوج ءُ چیریں ادارھانی کارندھاں چہ کراچی فقیرکالونی ءَ سُھب ءَ سیادانی لوگ ءَ چہ آوار جتگ ءُ بیگواہ کتگ-

کھول ءَ حمل ءِ پہ سلامتی یل کنائینگ ءِ لوٹ کتگ-

بلوچستان ءِ بنجاھی شھر شال ءَ ڈاکٹر تاج رئیسانی ءِ میان اُستمانی آزمانکانی براھوئی رجانک ءِ کتاب “وئیروئی بینٹ” دیمدرائی دیوان برجم دارگ بوت۔

براھوئی زُبان ءِ نامداریں لبزانت ڈاکٹر تاج رئیسانی ءِ نوکیں کتاب “وئیروئی بینٹ” کہ میان اُستمانی لبزانک ءِ آزمانکانی براھوئی رجانک اِنت، آئی ءِ دیمدرائی ءِ دیوان ماں بلوچستان یونیورسٹی ءِ براھوئی ڈیپارٹمنٹ ءِ تہ ءَ بوتگ۔

کتاب ءِ دیمدرائی ءَ براہھوئی ڈیپارٹمنٹ ءِ چئیرمین ڈاکٹر منظور بلوچ ءَ وتی ھیالاں درشان کنان ءَ گْوشت کہ براھوئی زُبان ءِ تہ ءَ ڈاکٹر تاج رئیسانی ءِ میان اُستمانی آزمانکانی رجانک علمی سرپدی ءِ تھر ءَ باز مزنیں کارے گْوشگ بیت اِنت۔ بلے ایشی ءِ ھواری ءَ بازیں جست ودی بیت اِنت کہ لبزانی رِد ءَ ڈاکٹر ءَ چُشیں کارے کُتگ۔ بلے جیڑہ ایش اِنت کہ آئی ءَ وتی اے علمی سرپدی ءِ کار ءِ تہ ءَ فکشن ءِ میدان ءَ رجانک گْچین کُتگ، گوشگ ءَ ما ایشرا ما یک آزمودھے گْوشت کن ایں، بلے آئی ءَ فکشن چُشیں تجربگے ءِ بھر ءَ زُرت کَنت-

آئی ءَ دیم ءَ گْوشت کہ ڈاکٹر رئیسانی فکشن ءِ مردُمے، آئی ءَ اے لبزانی واستا فکشن گْچین کُتگ، آئی ءِ زُبان اَبیدے لبزبلد ءَ وانگ نہ بیت ءُ فکشن یاں کہ لبزانک ءِ جیڑہ ایش اِنت کہ داں کہ وانوک آئی ءَ سرپد مہ بیت، آ ھما مزّہ ءَ گِپت نہ کنت اِنت۔

بلے ڈاکٹر ءِ کار ءِ علمی لوٹ ءَ چہ کسّے نا کُت نہ کنت، دومی نیمگ ءَ ڈاکٹر ءَ براھوئی زُبان ءِ تہ ءَ پَٹّ ءُ پول کنوکانی واستا یک مزنیں چیلنجے دیم ءَ آؤرتگ ، اے چیلنج، اے مزنیں جُست چہ آئی ءِ نیمگ ءَ شئوری ھم بوت کنت، ءُ لاشئوری ھم، آیوکیں وھد ءَ اے لبزانی سرا بوتگیں پٹّ ءُ پول، ایشی ءِ علمی اَرزشت ءُ علمی راستی ءَ نہ تھنا پدّر کن اَنت، بلکیں اے چیز ءِ کوشست ھم آھوکیں وھد ءِ علمی ءُ لبزانکانی کاراں گوں بندوک اِنت۔

ھمے وڑ ءَ اے دیمدرائی دیوان ءَ کتاب ءِ نبشتکار واجہ ڈاکٹر تاج رئیسانی ءُ کتاب ءِ شنگ کار قلات پبلشر ءِ واجہ نزر ھسین ءَ ھم وتی ھیال درشان کُتگ اَنت۔

اے دیوان ءِ تہ بلوچی تامُر “لولان” ءِ ٹیم ظھور فضل ءِ سر کماشی ءَ ھم ساڑی بوتگ ،ظھور فضل ءَ وتی ھیال درشان کنان ءَ گْوشت مرچی مارا سکّ وشّی بوت کہ مارا بلوچ راج ءِ دومی مستریں زُبان براھوئی ءِ اُستاد ءُ لبزانتانی گون ءَ نِندگ ءُ آھاں گوشدارگ ءِ موہ رَس اِت۔ ما اے گْوشگ لوٹ ایں کہ مئے واھگ اِنت کہ بلوچی ءِ تامُر براھوئی ءِ تہ ءَ رجانک ءُ ڈبنگ بہ بنت ھمے وڑا اگاں براہوئی تامُر ھست گُڑا ما آھاں بلوچی ءِ تہ ءَ بدل کنگ ءِ زمہ داری ءَ زورایں۔

دیوان ءَ نِشتگیں مردُماں ظھور فضل ءِ اے واھگ ءُ واھشت باز ساڑا اِت اَنت ءُ کمک کنگ ءِ ھم سدکی کنائینت۔

روکپتی بلوچستان ءِ بنجاھی شھر زاھدان ءَ ایرانی پولیس ءَ مکی مسیت ءَ مُچیں مردمانی سر ءَ آنسو گیس آس داتگ ءُ تیرگواری کتگ –

گیشیں اھوالانی رد ءَ زاھدان ءَ مکی مسیت ءَ مھلوک مُچ بیتگ ءُ گوستگیں سال ءَ خونین جمعہ ءِ یات ءَ زھرشانی روانک ءَ دلمانگ بیتگ اَنت کہ ھمے وھد ءَ پولیس ءَ آنسو گیس آس داتگ بیتگ-

اھوالانی رد ءَ زاھدان ءِ مکی میست ءِ کش ءُ گور پولیس ءَ انگیر کتگ اَنت ءُ اود ءَ آنسو گیس ءُ تیرگواری کتگ بیتگ کہ چریشی ءَ چہ بازین مردمانی زدگ بوگ ءِ ھال اِنت-

اھوالانی رد ءَ اود ءَ مسیت ءِ توک ءَ پولیس ءَ آنسو گیس آس داتگ ءُ چریشی ءَ لس مردم دم توس بیتگ اَنت-

زاھدان ءَ ھوار راسک ءَ ھم لس مھلوک ءَ جمعہ خونین ءِ یات ءَ زھرشانی ءُ بینر چست کتگ بیتگ-

زانگ بہ بیت گوستگیں سال ءِ سِی ستمبر ءَ مکی میست ءِ کش ءُ گوراں تیرگواری کتگ ات کہ چریشی ءَ سَد ءَ گیش مردم بیران ءُ سَے سد مردم زدگ بیتگ ات کہ اے وئیل ءَ پد مھلوک ھمک آدینگ زھرشانی کن اَنت ءُ وتی مردماں یات کن اَنت-

اھوالانی رد ءَ زاھدان ءَ گوستگین روچ ءَ چہ پولیس ءُ دگہ ادارھانی کارمند بازیں کچے ءَ سر بیتگ انت کہ اود ءَ شنگ بیتگیں تامراں گندگ بیت اِنت کارمند گوں گاڑیاں سر بوگ ءَ آں-

مستونگ ءَ عید میلاد النبی ءِ جلوس ءِ نزیک ءَ گمانی رنگ ءَ وتکش تراکے ءَ ڈی ایس پی مستونگ سٹی ءَ ھوار ھپت مردم بیران، چِل ءَ گیش زدگ بیتگ اَنت – بیرانیانی تہ ءَ گیشی ءِ گمان بوگ ءِ گمان بوگ ءَ اِنت-

تراک ءَ پد پولیس ءُ دگہ لشکر وئیل جاہ ءَ سر بیتگ ءُ راہ ءُ درش بند کتگ اَنت ءُ کمکی کار اش بندات کتگ اَنت-

ڈی ایچ او مستونگ ءِ گوشگ اِنت ھپت مردم بیران بیتگ اَنت ءُ چل ءَ گیش زدگ بیتگ اَنت، بیران بیتگینانی تہ ءَ پولیس آفیسر ھوار اِنت- زدگ بیتگیں مردم ڈی ایچ کیو ھسپتال ءَ برگ بوگ ءَ اَنت-

ایس ایچ او سٹی جاوید لھڑی ءِ گوشگ اِنت تراک الفلاح دگ ءَ بازار ءَ بیتگ – ھسپتال ایمرجنسی کنگ بیتگ – اسسٹنٹ کمشنر مستونگ ءِ گوشگ اِنت تراک مدینہ مسیت ءِ نزیک ءَ بیتگ کہ چریشی ءِ سبب ءَ بازیں مردم زدگ بیتگ اَنت-

تراک ءَ بیران بیتگیں مردماں ڈیوٹی ءَ جاڑیگیں ڈی ایس پی پولیس مستونگ نواز گشگوری ھم ھوار اِنت ءُ ترند زدگ بیتگیں مردم شال ءَ برگ بوگ ءَ اَنت-

مستونگ ءَ وتکش تراک ءَ پد شھر ءِ دراھیں ھسپتال ءَ جاڑیگ کنگ بیتگ اَنت ءُ سیکورٹی ادارہ پٹ ءُ پول کنگ ءَ اَنت-