بلوچستان ءِ جتاجتائیں دمگاں پوج سر ءَ بمب تراک ءُ پولیس کارمند ٹپی

شال ءَ دستی بمب تراک ءَ دو پولیس کارمند ٹپی بیتگ اَنت-

گیشیں ھالانی رِد ءَ شال ءِ دمگ گوالمنڈی چوک نزیک ءَ دستی بمب اُرش ءَ دو پولیس ٹپی بیتگ اَنت-

واکدار رِد ءَ ناشناسیں مردماں دستی بم بے چگل داتگ ءُ تچگ ءَ سوبمند بیتگ اَنت، تراک ءَ دو پولیس کارمند ٹپی بیتگ اَنت، ٹپی زوت نادُراھجاہ ءَ برگ بیتگ اَنت، پوج ءَ دمگ انگر ءَ کتگ اُرشکارانی پٹ پول بندات کتگ-

ھمے وڑ کیچ ءِ بُنجاھی شھر تربت ءَ سلاہ بندیں مردماں پوج چوکی ءُ سرویلنس کیمراہ اُرشانی نشانگ کتگ اَنت-

اِھوالکار رِد ءَ شپ ءَ نُھ ءَ تربت ءَ تعلیمی چوک سر ءَ برجاھیں پوج چوکی سلاہ بندیں مردماں راکٹاں چہ اُرش کتگ-

دگہ یک اُرشے ائیرپورٹ دگ سر ءَ جتگیں سرویلنس کیمرھانی سر ءَ اُرش کتگ ءُ تباہ کتگ-

سیمی اُرش مکران اسکاؤٹ نشانگ کنگ بیتگ اَنت-

اِھوالکار رِد ءَ ھشت نیم ءَ آپسر ءَ مکران اسکاؤٹ ءِ پانگس سر ءَ سلاہ بندیں مردماں اے ون گولھاں چہ اُرش کتگ-

ھمے وڑ ھُزدار ءِ دمگ بازگیر ءَ پیادگ ءَ گشت کنوکیں ایف سی کارمندانی سر ءَ دستی بمب اُرشے کتگ-

تراک ءَ پد پوج کارمنداں تُرندیں تیرگواری کتگ بلے پوجی واکدار نیمگ ءَ ھچ وڑیں درشان دیم ءَ نیتکگ نانکہ دگہ سلاہ بندیں گلاں زمہ واری زرتگ اَت-