آجوئی ءِ واست ءَ سلاہ بندیں گھگیری (مزاحمت) الّمی اِنت
نبشتہ کار: کوهی بلوچ
دی بلوچستان پوسٹ
وھدے کہ یک راجے ءِ سر ءَ درملکے کبز ءَ کنت گڑا آجوئی ءِ راہ باز براں نہ سگّیں ءُ بے ریائیں سکّیاں چہ پُر بیت۔ گوستانک ءَ باز رند ءَ اے گپ پدر کتگ کہ آجوئی مپت ءَ دیگ نہ بیت آجوئی گوں جھد ءُ کربانیاں چہ گرگ بیت۔ بلوچ راج ءَ پاکستان ءِ نیمگ ءَ برجاھیں کبز ءَ نہ ایوک ءَ سیاسی دروشم ءَ ایردست کنگ ءَ اِنت بلکیں چریشی ءَ بلوچ راج ءِ پجّار، دود ءُ ربیدگ، آیوکیں باندات ءُ ھستانک ھم ھترہ ءَ اِنت۔ گڑا اے وڑیں وھداں گھگیری ایوک ءَ گچینے ناں بلکیں یک لوٹے جوڑ بیت ءُ پہ راجے ءَ ھژدری بیت۔ وتی زمین ءَ چہ زوراک ءَ آجو کنگ ءِ شرتریں راہ، چو کہ راجدپتر ءَ پیش داشتگ آ سلاہ بندیں گھگیری اِنت، ناں کہ ھما دزبندی یا گپ ءُ باوست ءِ وسیلہ کہ کَرّیں گوشاں کپ اِیت۔
شھری اُگبال ءُ انسانی اُگبالانی زرمبشتاں بازیں تکاں مزنیں دیمروی یے کتگ بلے ایردستی ءُ زورگپتی ءِ جاوراں باز براں اے وڑیں زرمبشت کار نہ دنت۔ وھدے کہ یک ڈنّی زوراکے یک زمینے ءُ آئی ءِ مردمانی سر ءَ کبز ءَ کنت گڑا ما گند اِیں کہ اود ءَ چشیں ھچ راہ نیست کہ زورگپت پہ وتی وشّی ءُ رزا ءَ وتی کبز ءَ ھلاس بہ کنت ءُ بہ رؤت۔ کبز ءَ گیریں توانمند دائم وتی زور ءِ برجاہ دارگ ءِ هاتر ءَ زمین ءُ آئی ءِ سر ءَ جھمنندیں مردمانی لُٹ ءُ پُل ءَ کن اَنت ءُ وتی سیتانی ھاتر ءَ کارمرز کن اَنت۔ اے وڑیں جاوراں ایمنیں زھرشانی ءُ سفارتی گپ ءُ تران ءِ پارست ءَ دائمی بدلی ءِ ھچ وڑیں امکان نیست۔ کبز ءَ گیریں توانمند ایراد ءُ بگیری ءِ سارت کنگ ءِ ھاتر ءَ گونڈیں کچّے ءَ آسراتی دات کنت، بلے پہ وت واکی ءُ آجوئی ءِ ھاتر ءَ ادارکی سوبمندی ءَ چہ گیش دائمی سوبمندی لوٹ اِیت- گڑا ایشی ءِ ھاتر ءَ کبز ءَ ءِ جند ھلاس کنگ لوٹ اِیت۔
راجدپتر چہ اے دابیں دروراں پُر اِنت کہ ایردستیں راجاں وتی آجوئی ءِ ھاتر ءَ وتی راجی زور کارمرز کُتگ- امریکہ ءِ آشوب، الجزائر ءِ آجوئی ءِ جنگ ءُ ویتنام ءِ آجوئی ءِ جھد یک ٹوھیں درونتے ءِ نیمگ ءَ اشارہ کن اَنت کہ زورگیر (اخلاقی ترغیب) یا ایمنیں زھرشانی ءِ پارست ءَ کنٹرول ءَ یلہ نہ کن اَنت۔ اے راجاں وتی آجوئی چہ (جفاکشی) ءُ ھوناں چہ میچلیں پندے ءَ چہ رند رس اِتگ کہ اود ءَ سلاہ بندیں گھگیری ءَ بُنکی کرد پیلو کتگ۔ گپ تچک اِنت آجوئی کدی ھم گوں پنڈگ ءُ نزوریں ٹولی یے ءَ گوں گپ ءُ باوست ءَ چہ نہ رس اِیت بلکیں آجوئی ءِ جھد گوں وتی ھک ءُ وت واکی ءِ جنگ، جزبگ ءُ زور ءِ درشان کنگ ءَ گوں سوبمند بنت۔
پہ بلوچستان ءِ مھلوک ءَ پاکستان ءِ زورگیری گواچنانی لُٹ ءُ پُل ءِ ھواری ءَ چہ کرناں زُلم ءُ زوراکی ءُ بنکی ھکاں چہ زبھری ءِ یک تورناکیں داستانے۔ بلوچستان ءِ زِری گواچناں چہ بلوچستان ءِ مردماں ھچ وڑیں سیت نہ رس اتگ ءُ ھرچ وڑیں گھگیری یے کہ کنگ بوتگ گڑا آ گوں کُشت ءُ کوش ءَ آسر بوتگ۔ بلوچ راج ءِ ننگ، پجار، دود ءُ ربیدگ ءُ زندمان ءِ آسراتی ءُ زند گوازینگ ءِ رھبند مُدام زوراک ءِ پندل ءُ لگتمالی ءِ آماچ اَنت۔ گڑا اے وڑیں جاوراں سلاہ بندیں گھگیری ءِ لوٹ نہ ایوک ءَ یک “اسٹریٹجک” گچینے جوڑ بیت بلکیں پہ زندگ بوگ ءَ ھژدری جوڑ بیت۔ پاکستانی ریاست ءَ انگت ءَ پُرسیتیں گپ ءُ تران کنگ یا بلوچ راج ءِ ٹپّانی واد کنگ ءُ جیڑھانی گیش ءُ گیوار کنگ ءَ ھچ وڑیں واھشت پیش نہ داشتگ۔ بلکیں آئی ءَ اشانی پسّہ گوں لشکری زور، سنسرشپ ءُ انسانی ھکانی گیشیں لگتمالی ءَ چہ داتگ۔ اے وڑیں جاوراں ایمنیں جُھد ءُ کوشستانی جوانیں سانے ءِ دیم ءَ آیگ ءِ گمان نیست۔ پمیشکا پہ آجوئی ءِ گرگ ءَ یک مھکم ءُ توانمندیں گھگیری ءِ زرمبشتے جوڑ کنگی اِنت کہ آ زورگیریں تاگتانی دیم ءَ داشت کت بہ کنت۔
پاکستانی کبز ءَ ءِ جوانیں رنگے ءَ چیلنج کنگ ءُ دیم دارگ ءِ ھاتر ءَ بلوچستان ءِ مھلوک ءَ وتی سلاہ بندیں گھگیری ءِ مھکم کنگ ءِ نیمگ ءَ دلگوش کنگی اِنت۔ ایشی ءِ تہ ءَ نہ ایوک ءَ جنگی تیاری ءُ گَل سازی ھوار بہ بیت بلکیں بلوچ راج ءِ یکمشتی ھم ھوار بہ بیت۔ یک ھواریں سنگرے پہ ھرچ آجوئی ءِ زرمبشت ءَ المی اِنت۔ بلوچ ءَ تَھی بھر ءُ بانگاں چہ در آیگی اِنت ءُ یکمُشت ءُ ھواریں گھگیری یے پیش دارگی اِنت کہ آ یک دراجیں جنزے ءَ برجاہ داشت کت بہ کنت۔ بلوچ گھگیری ءَ جنگی بودناکیانی ھواری ءَ میاں استمانی پلہ مرزی ءُ پجار ءِ ھاتر ءَ ھم کار کنگی اِنت۔ میاں استمانی توانانی پلہ مرزی ءُ کمک ءَ چہ کبز ءَ گیریں تاکت ءِ سر ءَ ٹوھیں اگلاکی ءُ مالی جنجال ءِ ھمراھی ءَ آئی ءَ پریشر ھم رس اِیت۔ بلے دگہ گپے ھم ھست کہ میاں استمانی پلہ مرزی باز براں ھما وھد ءَ کَیت کہ یک زرمبشتے زمین ءِ سر ءَ وتی جزبگ ءُ زور ءَ جوانیں دابے ءَ درشان کت بہ کنت۔ سلاہ بندیں جھد چہ بیمناک ءُ تاوانباریاں ابید اڈانڈاں چہ پُر اِنت بلے اے باز براں یک ایردستیں راجے ءِ ھاتر ءَ ھما یکیں زندگ داروکیں راہ اِنت کہ آئی ءِ مُز ءُ آجوئی ءِ لوٹگ ءِ دگہ دراھیں راہ ءُ در ھلاس کنک بیتگ اَنت۔ سلاہ چست کنگ ءِ سوڑگ پہ ارزانی ءَ زیرگ نہ بیت بلے وھدے کہ یک زوراکیں تاگتے دیم ءَ کپ اِیت کہ آ بُنکی ھکّانی منگ ءَ چہ انکار بہ کنت گڑا سلاہ ءِ چست کنگ ھژدری جوڑ بیت۔ سلاہ بندیں گھگیری ھمے جار اِنت کہ بلوچ راج وتی ایردستی ءَ نہ منّ اِیت ءُ وتی آجوئی ءِ واستا جنگ ءَ ساڑی اِنت ءُ داں وتی سرڈگار ءَ آجو نہ کنت آ ایمنی ءَ نہ نند اِیت۔
انسانی ھکانی گل مردمانی ھکانی رکینگ ءِ ھاتر ءَ جوڑ بیتگ انت بلے آ دائم ءَ زوراکیں ملکانی دست ءَ کارمرز بنت، اشانی ھرچ دابیں سوڑگ کہ انسانی ھک ءِ نام دیگ بنت اے درستیں سوڑگ هما توانمندیں ملکانی سیتانی ھاتر ءَ کنگ بنت۔ اے گل دائم زوراکیں ملکانی زوراکی ءِ آماچ بنت کہ آ جیو پولیٹیکل شونداتانی دِرچ ءَ وتی سوڑگاں ٹھیناں ءُ انسانی ھکانی سر ءَ مھکمی ءَ اوشتگ ءِ ٹاپار جن اَنت۔ بلوچستان ءِ ناگیگیں جاور، چہ انسانی ھکانی بازیں لگتمالی ءَ پد ھم مزنیں کچّے ءَ جھانی تاگتانی نیمگ ءَ چہ ڈالچار کنگ بیتگ۔ اے یک راستیں ءُ تچکیں گپے کہ انسانی ھک باز براں کاگدانی تہ ءَ برجاہ دارگ بنت بلے کردی دروشم ءَ پاک ءُ پلگار نہ اَنت۔ بلوچ ءِ وڑیں راجاں وتی جنگ وت کنگی اِنت، وتی وت واکی ءُ آجوئی ءِ ھاتر ءَ سلاہ بندیں گھگیری مھکم ءُ کمک کنگی اِنت۔ ھما وھد ءَ کہ بلوچ راج ءِ جزبگ ءُ توان انچو بہ بیت کہ کس آئی ءَ رد کت مہ کنت گڑا جھان ءِ بیانیہ ءِ تہ ءَ وت یک بلاھیں بدلی یے کَیت، گڑا انسانی ھکانی گل ءُ میان اُستمانی تاگت مجبور بنت کہ بلوچ ءِ ھمراھی ءَ بہ اوشت اَنت۔ گڈسر ءَ اے گپ پدر بیت کہ سیاسی سیتانی ھاتر ءَ بس انسانی ھکانی پلہ مرزی کنگ بیت۔ راستی ءَ انسانی ھک کاگد ءِ سر ءَ بس لبز بنت ءُ کارروائی ھما وھد ءَ بیت کہ آ سیاسی مول ءُ مراد ءُ سیتاں گوں ھمگرنچ بہ بنت۔ سلاہ بندیں گھگیری ھما یکّیں زبان اِنت کہ دگنیا ءَ بلوچستان ءِ وت واکی ءِ ھک ءَ منّگ ءَ لاچار کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-