TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں آواران ءِ دمگ جھاؤ ءَ زورگریں پاکستانی پوج ءِ یک پانگسے اُرش ءِ نشانگ کتگ-

جارکش ءَ گْوشتگ کہ سرمچاراں گوستگیِں روچ ءِ بیگاہ ءِ وھد ءَ ڈولیجی ءِ ھند سر ءَ دُژمنیں پوج ءِ پانگس سر ءَ گرنیڈ لانچر ءَ گوں مزنیں گولھے آس داتگ ءُ وتکاریں سلاھاں چہ اُرش کتگ چریشی ءِ آسر ءَ دُژمنیں کارندھاں جانی ءُ مالی تاوان چست کنگ کپتگ-

گُڈی ءَ جارکش ءَ گْوشتگ کہ بلوچ لبریشن آرمی اے اُرش زمہ واری ءَ منّ ایں – زورگریں پوج ءِ بلوچستان ءِ دراھگ ءَ تاں مئے اُرش برجاہ بیت-

نودربرگل بلوچ اسٹوڈنس ایکشن کمیٹی ءِ بنجاھی جارکش ءُ بلوچ وائس فار جسٹس ءَ رسانکدراں وتی شنگ کرتگیں درشانے ءِ تہ ءَ گوشتگ کہ چہ بلوچستان شھدربرجاہ ءَ گوستگیں دو سال انت کہ دو نودربر سھیل ءُ فصیح زورانسری آوار جنگ ءُ بیگواہ کنگ بوتگ انت – آ دو نومبر سال دوھزار ءُ بیست ءُ یک ءَ چہ شال ءَ آوار جنگ بوتگ انت – سوبائی سرکار ءِ باور کنائینگ ءُ پارلمنٹ ءَ آیانی یل کنائینگ ءِ ھاتر ءَ بازیں اداراں گند ءُ نند پد ھم مروچی دو سال پرگوستگ انت بلے ھنگت یل کنگ نہ بوتگ انت کہ ھچ وڈیں زوراکی ءَ چہ کمتر نہ انت نودربراں چہ شھدربرجاھاں آوار جنگ ءُ تھاریں کوٹیاں بند کنگ کانود ءُ انساپ ءِ گوم ءَ مزاکے کہ اشی ءَ بند بوگی انت –

جارکش ءَ گوشتگ کہ سھیل ءُ فصیح دوسال ساری چہ شھدربرجاہ ءَ آوار جنگ بوتگ انت آیانی یل کنائینگ ءِ کھول ءَھوار نودربراں شھدربرجاہ ءِ تہ ءَ دو ماہ ءَ تاں زھرشانی نبشتہ کنائیں اِتگ ـ سرکار ءِ باور کنائینگ ءَ پد زھرشانی ھلاس کنگ بوتگ پی ھمے ھاتر ءَ کہ آیاں گوشتگ کہ پانزدہ روچ ءِ تہ ءَ سھیل ءُ فصیح یل کنگ بنت بزاں ا اے سرپد بوتگ انت کہ نودربر کجا انت ءُ کئی انت بلے بدبھتی ءَ بلوچستان ءَ درسیں پیسلہ توپک ءِ زور ءَ کنگ بنت – اے تاکت ھر کس ءَھر کجا بہ لوٹ انت نودربراں آوار جن انت ءُ بیگواہ کن انت – اشی ءَ چہ مستریِ زوراکی ایش انت کہ آمیدگساں بگر ایندگہ دراھیں ادارھ اشانی بگیری ءَ گامگیج زورگ ءَ نہ انت – وھدیکہ نودربر وتی ھکانی ھاتر ءَ توار چست کن انت گڈا ترسینگ ءُ بیھار دیگ بنت وھدیکہ نودربر ایمنی ءَ گوں وتی وانگ ءَ دلگوش بنت گڈا زورانسری آوار جنگ ءُ بیگواہ کنگ بنت – سھیل ءُ فصیح بلوچستان ءِ مستریں شھدربرجاہ ءِ تہ ءَزورانسری آوار جنگ ءُ بیگواہ کنگ بوتگ انت اشی ءَ ھمے پدر بیت کہ بلوچستان ءِ وانگی ترام ھلاس کنگی انت – سوبائی سرکار ءِ پانزدہ روچانی کول ءَ نوں دو سال پرگوستگ بلے ھنگت سھیل ءُ فصیح درگت ءَ کس سرپد نہ انت کہ کجا انت –

جارکش ءَ گوشتگ کہ زورانسری آوار جنی ءِ جیڑہ بلاھیں جیڑھے کہ ھزارانی کچ ءَ نودربر اشی ءِ آماچ بوتگ انت ءُ ھزارانی کچ ءَ ماژگی نادراھی ءِ آماچ انت – فیروز ءُ کمبر وڈیں نودربر پہ وتی وانگ ءِ ھاتر ءَ مزنیں شھراں کائنت بلے نوں آ تھاریں کوٹیاں وتی زند ءَ گوازینگ ءَ انت –

جارکش ءَ گوشتگ کہ ما درسیں ادارھاں گوں لوٹ کن ایں کہ سھیل ءُ فصیح ءِ یل کنائینگ ءَ وتی توار چست بہ کن انت ءُ وھدیکہ اے درگت ءَ شھدربرجاہ ءِ تہ ءَ سَے روچی زھرشانی بنجل ءِ اڈ دیگ بیت وھدیکہ بنجل ءِ گڈی روچ ءَ زھرشانی روانک ءِ کشگ بیت ما درسیں انسان دوست ءُنودربراں گوں لوٹ کن ایں کہ بھر بہ زور انت –

بلوچ وائس فار جسٹس ءَ سھیل بلوچ ءُ فصیح بلوچ ءِیل کنگ ءِ لوٹ کتگ ءُ گوشتگ کہ دو سال ساری پاکستانی پوج ءُ چیریں ادارھانی کارمنداں چہ بلوچستان شھدربرجاہ ءَ ھردو ورنا آوار جتگ ءُ بیگواہ کتگ انت – آیانی آوار جنی ءَ دو سال سرجم انت ھنگت یل کنگ نہ بوتگ انت – آیانی آوار جنی زمہ دار وی سی ءَ ھوار شھدربرجاہ ءِ واکدار انت –

درشان ءِ تہ ءَ گوشگ بوتگ کہ سھیل ءُ فصیح ءِ زورانسری آوار جنی ءَ دو سال سرجم بوگ ءَ بلوچ وائس فار جسٹس ماں چاگردی ترامجاھ ٹویٹر ءَ ھوار درسیں جاھاں یک مھم ءِ چلائین ایت ما درسیں نودربر ءُ سوشل میڈیا اکٹوسٹاں گوں لوٹ کن ایں کہ بھر بہ زور انت ءُ اے درگت ءَ وتی تامر جوڈ بہ کن انت ءُ سھیل ءُ فصیح یل کنگ ءِ لوٹ ءَ بہ کن انت –

زانگ بہ بیت گوستگیں روچ ءَ دھ سال ساری زورانسری آوار جنگ بوتگیں سفر علی بلوچ ءِ درگت ءَ وائس فار جسٹس ءِ نیمگ ءَ مھم ءِ چلائینگ بوتگ –

آواران ءِ جھمنند سفر علی دھ سال ساری بیست ءُ سَے اکتوبر سال دوھزار سیزدہ ءَ ما بلوچستان ءِ باپاری شھر ھب چوکی ءَ آوار جنگ بوتگ –

بلوچ وائس فار جسٹس ءَ وتی درشان ءِ تہ ءَ گوشتگ کہ سفر علی ءِ کھول ھم ایندگہ بیگواھیں مردمانی کھول ءِ ھمراھی ءَ ماں شال ءَ ریڈ زون ءَ پنجاہ روچاں زھرشانی نندانک ءَ نشتگ، ھما وھد ءِ وفاقی وزیراں گند ءُ نند ءِ کتگ ءُریڈ زون ءِ زھرشانی ھلاس کنائیں اِتگ کہ دو ماہ ءَ زورانسری آوار جنگ بوتگیں مردم یل کنگ بنت بلے وفاق ءَ وتی کول پورا نہ کتگ انت ءُ بیگواھیں مردمانی تہ ءَ یکے ھم یل کنگ نہ بوتگ –

روکپتی بلوچستان ءِ دمگ ھاش ءَ ایرانی لشکر ءَ تیرگواری کتگ ءُ یک مردمے زدگ کتگ ءُ زدگ بیتگیں مردم ءَ وتی ساہ داتگ ءُ بیران بیتگ-

گیشیں اھوالانی وئیل گوستگیں روچ ءَ ھاش ءِ ھند گورچان پشتکوہ ءَ پیش اتکگ کہ اود ءَ ایرانی لشکر ءَ یک گاڑی یے سر ءَ تیرگواری کتگ –

اھوالانی رد ءَ لشکر ءَ ابید ءِ دارگ ءَ گاڑی ءِ سر ءَ تیرگواری کتگ ءُ چریشی ءَ کامران شھنوازی ء صاحبداد ءِ نامیں مردمے زدگ بیتگ-زدگ بیتگین مردم نادراہ جاہ ءَ برگ بیتگ ءُ اود ءَ آئی ءَ مروچی وتی ساہ داتگ اَنت-

زانگ بہ بیت روکپتی بلوچستان گیشتر ھمے داب ءَ ایرانی لشکر شَک ءِ سر ءَ گاڑیانی سر ءَ تیرگواری کنت ءُ چریشی ءَ چہ مردم زدگ ءُ بیران بوگ ءَ اَنت-

کتاب ءِ ارزشت

نبشتہ کار :ناسر واھؔگ

دی بلوچستان پوسٹ

ما اگاں راج دپتر ءِ سر ءَ چمشانکے بدے ایں گڑا کتاب ءِ یک مزنیں ارزشتے دار ایت ۔ کتاب مارا یک نوکیں زندے ءِ وُھند کنت ءُ مارا رژن ءِ نیمگءَ بارت ۔ زنتکار گّوش انت کہ آ لوگ ءِ توکءَ اگاں کتاب نہ بوت گڑا آ لوگ چوں ھما جسم ءِ وڑ ءَ بیت کہ ارواہ ئے مان نیست ۔ کتاب ءِ وانگ ءِ متلب کہ تو وت ءَ وانگ ءَ ئے ۔ اگاں چاگرد ءِ توک ءَ کتابجاہ بہ بیت گڑا ما الم وتءَ چہ سِلیں کار آں رکین ایت ۔ گِندئے چہ کتاب ءِ وانگءَ ما وتی زبان ءَ پَجا کار ایں ءُ یک راج دوستے گّوشگ بَہ ایں ۔

مھر زندگی ءِ ھما کتاب اِنت بس یکبرے آئی ءَ بہ وان ایت مردم پد ءَ داں زندگ اِنت بے ھیال کنگ نہ بیت ، انیچو من ھم لوٹاں کہ تو منی دیم ءَ بہ نند ئے من ترا بہ وان ءَ زندگی پشت کپتگیں روچاں سرجم بہ کناں۔

مھر من کتاب ءِ تہ ءَ وانتگ اَت بلے مھروانی نہ زانت یک انگت ءَ گوں مھروانے ءَ دُچار کپتاں آئی ءِ دیدگاں من ءَ مھروانی ءِ سبک دات بلے منی کھریں مجگ ءَ کینگ چو وروک ءَ ورگ ءَ اَت دل ءَ زد کُتگ ات کہ اے دگنیا مھر ءِ پکار نہ اِنت آس لوٹ ایت وھدے من آئی ءَ گوں گسر کپتاں مھروانی ءِ شیرکِنیں یاتاں منی دل ءَ بینگ بست نو اگاں گوں کسے ءَ دُچار کپاں آ بے مھر نہ بیت بلے نو گوں من ءَ کس مھروان نہ بیت پرچاکہ اے درد ءِ مارگ گران انت اگاں مھر گوں گوست ءِ یاتے ءَ بندوک بہ بیت۔

اگاں ما مھر ءَ شوھازگ لوٹ ئِے گڑا کتابءَ بہ وان انگلشں دان گْوش اَنت کہ چہ وانگ ءَ مردم سرجم بیت یک تھاریں زندے ءِ چراگ کتاب اِنت ۔ یک کتابے ءِ وانگ ءِ مول ءُ مُراد ایش اِنت تو آئی ءَ وان ئِے پدءَ ھمے وانتگیناں وتی زند ءِ باھوٹ کن چہ کتاب ءِ وانگ ءَ ترا پگر ءِ کنگ ءِ موہ رس ایت۔

وھدے کہ تو چیزے ونتگ ءُ دربُرتگ گُڑا وانِندھے جوڑ بہ ئِے گُڑا تو وتی سرڈگار ءُ راجے بِستار ءَ مار ئِے بزاں ھمے کتاب اَنت کہ یک بے سمائیں راجے ءِ چمّاں پچ کنائین ایت دُگنیا ءِ یک مستریں گُوَشتینے ھست۔ دنیا ءِ بے سوتّیں (جاھلیں) مردُم ھما اِنت کہ وتی جِند راجی ءُ ماتی زُبان ءَ ونت ءُ نبشتہ کُت مہ کنت۔

وت ءَ زندگ دارگ لوٹ ئے گُڑا زُبان ءَ زندگ بہ دار۔ علم ءُ زانشت ھمائی ءَ را گُش اَنت کہ سِنچ ءُ سما ءِ نیمگ ءَ جنزان بہ بیت اِنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ اباس پنام مجید ء ابدُلکدیر جھمنند ایسائی پنجگور ءَ بلوچ راجی جُھدہآجوئی ءِ سرمچاریمے بیت کہ نادراھی ءِ سْوب ءَ شھید بیتگ۔ یک سالے پیش بلوچستان لبریشن فرنٹ ءَ ھوار بیتگ ءُ آئی ءَ پہ گلزمین ءِ آجوئی ءَ وتی دُرس ندر کُرتگ اَنت۔

آئی ءَ گوشتگ آ یک سوئیں سرمچارے بیتگ ءُ گل ءَ شھری ٹولی ءِ بھر بیتگ داں شھر ءِ تہ ءَ بہ نند ایت ءُ دُژمن ءِ سُر ءُ پراں دلگوش ءَ گْور بہ کنت ءُ دُژمن ءِ سیتانی بگیری ءَ گل ءِ کارشونیانی رِد ءَ کار بہ کنت۔داں یک سالے ءَ بے تُرس ءُ گوں جوانمردی ءَ آئی وتی کِرد پیلو کُرتگ۔

آئی ءَ گوشتگ گل ءِ کارانی سر ءَ پُرکار بیگ ءِ سْوب ءَ یک ماھے پیش پاشک بیتگ۔ گل ءَ زوت شور کُرتگ ءُ چہ شھری ٹولی ءَ گستاہ کُرتگ ءُ اوتاک ءَ آھگ ءِ پرمان داتگ۔ 2 اکتوبر ، 2023 ءَ چہ شھری ٹولی ءَ درکپتگ ءُ بی ایل ایف ءِ اوتاک ءَ اَتکگ۔ پہ دیم پہ دیمی جنگی ھیلکاری ءَ ھیلکاری اوتاک ءَ راہ دیگ بیتگ کہ ھیلکاری ءِ میان ءَ نادراہ بیتگ سرمچاریں ھمبلاں درمان کنگ ءِ جُھد کُرتگ بلے دْراہ نہ بیتگ ءُ پہ درمان کنگ ءَ گھتریں جاھے ءَ برگ ءِ شور کنگ بیتگ۔

بی ایل ایف ءِ جارکش ءَ گوشتگ دور ءُ گستاہ بیگ ءِ سْوب ءَ پیادگ ءَ برگ بیتگ کہ راہ آ گیش نادراہ بیتگ ءُ شمبے 21 اکتوبر 2023 ءِ روچ ءِ دہ ءُ نیم ءَ شھید بیتگ۔ سرمچاراں دْروت ندر کُرتگ ءُ گُلزمین ءِ میار کُرتگ۔

گوھرام بلوچ ءَ گوشتگ آ یک مُھکم ءُ دلجمیں ھمبلے بیتگ ، آئی ءَ کسانیں وھدے ءَ گل ءِ مھکم کنگ ءُ راجی زمہ واریانی پیلو کنگ ءَ شپ ءُ روچ جپاکشی کُرتگ۔آئی ءِ ناگتیں شھیدی پہ بلوچ راج ءُ گل ءَ بلاھیں تاوانے۔

آئی ءَ گوشتگ بی ایل ایف راجی سرمچار اباس پنام مجید ءَ آئی ءِ شھیدی ءَ ستک شانی ندر کنت کہ آئی پہ بلوچ راج ءِ آجوئی ءَ وتی ورنایے ندر کُرتگ ءُ یک مزنیں راھے گچین کُرتگ ءُ یک ناگیگیں جاورے ءَ شھیدی ءِ مراداں سر بیتگ۔ورنائیں سرمچار ءِ شھیدی ءَ آئی ءِ ھمک ھمبل دلپدرد اِنت ءُ کول کنت کہ اَباس ءُ آدگہ شھیدانی دیمونی بَلاش نہ بنت۔ما مدام وتی راجی شھیداں یات کن ایں۔ آیانی دیمونی ءُ جپاکشیانی مَٹ آجوئیں بلوچستان اِنت۔

میان اُستمان ءِ جنرل اسمبلی اسرائیل ءُ ھماس ءِ میان ءَ ود اتگیں جنگ ءِ پژدر ءَ پشمبے ءِ روچ ءَ لیکھانی ٹپاسگ ءَ دیوان برجم دارگ ءَ اِنت-

فرانسیسی ھال سرکنوکیں ادارہ اے ایف پی ءِ رد ءَ میان اُستمان ءِ سروک ءَ ات جار باسکی ڈیھ ءِ نام ءَ یک نمدی ءِ توک ءَ گوشتگ –

سلامتی کونسل داں انگت ءَ اے جنگ ءِ بارو ءَ کجام ھم کرارداد ءِ سر ءَ تپاک کنگ ءَ بے سوب بیتگ- بلے بازیں ڈیھاں کپ چریشانی توک ءَ عرب ڈیھانی گروپ ٹولی ءِ نیمگ ءَ اردن، روس،شام،بنگلہ دیش،ویتنام ءُ کمبوڈیا بوار اَنت کہ جنرل اسمبلی ءِ سروک ڈینس فرانسس ءَ مینٹگ شیڈول ءِ کنگ ءِ گچینی رنگ ءَ دزبندی کتگ-

گوستگیں ھپتگ ءَ میان اُستمان ءِ سلامتی کونسل، ءَ کہ اسرائیل ےُ فلسطین ءِ جیڑہ ءِ سر ءَ سرجم ءَ بے تواری کتگ ات ءُ روس ءِ یک کراردادگے ءِ بنگپ رد کتگ اَت ایشی ءِ توک ءَ انسانی بنکی ھکانی سر ءَ جنگ بندی ءِ دزبندی کنگ بیتگ ات-

پانزدہ باسکی ڈیھاں بس پنچ ءَ اے گپ ءِ پلامرزی کتگ ءُ ایشاں شھرانی سر ءَ درستیں اُرش ءُ ناشرکارانی درستیں اُرش ایر جتگ اَنت بلے ھماس ءِ نام گرگ نہ بیتگے

چریشی ءَ پد واشنگٹن برازیل ءِ نیمگ ءَ پیش کنگ بیتگیں دومی کراداد ویٹو کنگ بیتگ پرچالہ متن ءَ اسرائیل ءِ رکینگ ءِ گپ نہ جتگ بیتگ ٹ

کونسل ءِ پانزہ ءَ چہ دوازدہ باسکاں اے کارداد ءِ ھک ءَ ووٹ داتگ چریشاں حماس ءِ ناشری ارش ھم ایر جتگ اَنت بلے روس ءِ برتانیہ ءَ ایشی ءِ بھر نہ زرتگ-

سلامتی کونسل پشمبے ءِ روچ ءَ سھب ءِ ساھت دَہ ءَ جنرل اسمبلی ءِ نیاد ءَ پیسر داں سَے شمبے ءَ اے جیڑہ ءِ سر ءَ گپ کنگ ءَ گند ءُ نند کنت اِنت-

بلوچی زبان ءِ ورنائیں شائر محسن ناصر ءِ شئرانی اولی کتاب “تئی زھیرانی کپوت ءَ نال اِتگ” چاپ ءُ شنگ بوتگ –

ورنائیں شائر محسن ناصر ءِ اے اولی شیئرانی کتاب انت ءُ اے کتاب چہ علم ءُ ادب شنگ کار کراچی ءِ نیمگ ءَ چاپ ءُ شِنگ بوتگ –

کتاب ءِ پیشگال بلوچی زبان شائر قدیر ساگر ءَ نبشتہ کُتگ ءُ کتاب ءِ پیشگال ءَ نبشتہ انت کہ تئی زھیرانی کپوت ءَ نال اِتگ بلوچی لبزانک ءُ شائری ءِ پڑ گوں وتی نوکیں درشان ، زیبائیں چھر ءُ شبین آں چہ ایندگہ تھراں دیم ءَ تر، وانوکاں ملماں کنان جنزان انت، اے پڑ ءِ مساپر روچ پہ روچ وتی وس ءُ واک ءَ شائری ءِ موسم ءَ گیش دلبود ءُ جلواناک کنان انت – قدیر ساگر ءَ پیشگال ءِ تہ ءَ دوبند شئیر نبشتگ کہ:

“شعراں ھما مرد گشنت”
“وت موھری دعواگرانت”

محسن ناصر شھلچہ کار ملا پازل ءِ ھنکین مند ءِ جھمنند انت ، پازل ھنکین ءِ جھمنندی ءَ ھواری ءَ پازل ءِ شائری ازم ءِ بو ءَ چہ وتا مھسن ءَ بے بھر نہ کتگ – محسن ءَ ھر ھما مومنٹ شئری دروشم ءَ کبل کتگ کہ آئی ءَ دیستگ ، مارتگ یا پریکٹیکلی وت ھما مومنٹ ءَ چہ گوستگ ، شائر ءَ پہ شائری ءِ ھاسیں مھروانی ھمے بیت کہ آ ندارگاں داں ابد چھر ءُ شبین ءِ جھان ءَ زندگ کنت – لبزاں وتی مانا ءِ پند ءِ اسیلیں منزل ءَ سرکنت –

آئی ءَ نبشتگ کہ لھتے شائر وتی منّ ءَ شئر نبشتہ کنت بلے شئریت ءِ مھراج ءَ داں بہ مر ایت سر نہ بیت – بلے باز شائر شئری ازم ءَ زوت مار ایت ، وت ءَ شئر زوالی ءَ رکھین ایت ءُ کم شئر گش ایت بلئے پرمانا ءُ ابدمان گش ایت –

کدیر ساگر ءَ پیش گال ءِ تہ ءَ محسن ناصر ءِ دو شئیر نبشتگ کہ:

“ما وتی نوبتءِ دل انت گوں ما”
“شانتلانی ھیال مانا بنت”
یا
“زندگی گیش کپتگ ئے تو ھم”
“ما وتی ھاجتاں گوں در پہ دریں”

محسن ءِ چرے شئراں چہ زانگ بیت کہ محسن ماں بلوچی لبزانک ءَ آوکیں وھد ءَ پہ وتا شریں جاھے گپت کنت –

محسن ءَ انگت بلوچی لبزانک ءَ باز پند جنگی انت ، بازیں موسمے گندگی اِنت ءُ وتی شئری دگنیا گیشتر سمبھینگی انت –

آئی ءَ نبشتگ کہ محسن ءِ شئرانی اولی کتاب “تئی زھیرانی کپوت ءَ نال اتگ” مھسن ءِ کسانیں مدتے ءِ مارشتانی یک زیبائیں درینے ،شمئے مھر ءُ دوستدارگ محسن ءَ گیش نبشتہ کنگ ءِ سکین ءَ دنت – امیت انت محسن ءِ شائری شمارا ھیال ءِ زید ءُ ندارگانی کئیپاں گوں الم ملما کنت –

مردماں تب بدل کتگ دیر انت اشک ءِ راھبند ءَ پروشگ ءَ انت گش یے
ما وَ کوھنیں شرابی انت راستے درد ھم کئیپ نوشگ ءَ انت گش یے-

“بے ترہ ایں ترانگاں نمیرانیں دیدگانی شراب شنزیں سھت”
“مھکج ءِ دروشمانی توسیپ ءَ لبز پوشاک پوشگ ءَ انت گش یے”

ورنائیں شائر محسن ناصر ءَ وتی اولی کتاب ءِ درگت ءَ نوشتگ کہ من منتواراں وتی ھم تب ایں دوست ءُ سنگتانی ھماھانی دلبڈی ءُ سکین آں چہ جنزاں کتگ مرچی چندے شئیر نبشتہ کُت کناں –

آئی ءَ گوشتگ کہ من ءَ ھما کسانی ءَ بلوچی کتاب وانگ ءِ باز شوک بیتگ ءُ سوت ھم گوش داشتگ مارکیٹ ءَ انچو کہ کیسٹے اتکگ اولی مردم من بیتگ آں زرتگ ءُ گوش داشتگ پد ءَ ھمے ترزانی سر ءَ وتی نیمگ ءَ چہ شئیر جوڑینتگ-

محسن ءَ گوشتگ کہ آ وھد ءَ من گیشتر سوت ءُ نزم نبشتہ کتگ انچو انچو منی نزیکی قاسم لبزانکی مجلس ءِ سنگتاں گوں بیت اشکام ءِ نام ءِ سر ءَ تاکے ءِ چن ءُ لانچ ءَ اِت اَنت من ءَ راشد مجید ءَ ھال داتگ اَت شئیر ءَ بدے عنایت سلیم ءَ اسلھے کنت پد ءَ برے قدیر ساگر ءِ دکان ءَ بدے یے کتاب ءَ ھوارے کن اَنت منی نویستگیں آشوبی نزمے ھست اَت دومی روچ ءَ من برت قدیر ءِ دکان ءَ نہ اَت بچک ءِ دست ءَ دات سیمی روچ ءَ کہ من شُتاں قدیر ءَ من ءَ باز دلبڈی دات ءُ گوشت کہ تئی نام ساری ءَ من شائری ءِ پڑا نہ اِش کتگ بلئے تئی شئیر من چارتگ وزن ءُ روانی ءَ جوان اِنت گیشتر جھد بکن بوان پد ءَ دیوان بیت اَنت نزیکی گیش بیان بیت انچو انچو پد ءَ درانڈیھی بھت ءَ کپت زھیر مولم گم ءُ ابیتکی شائری ءِ زبان ءَ کمایان کُت اَنت چنچو سوبین بیتگاں چنچو بے سوب اے پیسلہ وانوکانی دست ءَ اِنت-

آئی ءَ گوشتگ کہ وتی برات گونگیں سنگت قدیر ساگر ءِ مھرانی وامداراں کہ ھر پِڑا ھر جاھ ءَ گوں من ھم کوپگ بیتگ شائری ءِ دنیا ءَ بگر داں کہ وانگجاہ ءَ منی استاد اِنت بلئے مئے سنگتی امینچو مھکم اِنت استاد ءِ لبز کارمرز کنگ ءِ لوٹ پیش نیتکگ –

اے اولی رند انت کہ اوگانستان ءَ میان استمانی گوازی ءَ پاکستان پروش داتگ، ءُ ابراہیم زردان ءَ مین اف دی میچ ءِ داد اوگانی باھوٹیانی نام ءَ کتگ –

بھارت چنئی ءَ بوتگیں آئی سی سی ورلڈ کپ ءِ بیست ءُ دومی گوازی اوگانستان ءُ پاکستان ءِ میان ءَ بوتگ ،کہ پاکستان ءَ ٹاس کٹ اِتگ ءُ اول سر ءَ بیٹنگ کنگ ءِ شور کتگ – پاکستان ءِ نیمگ ءَ پنجاہ اوورانی تہ ءَ ھپت وکٹانی تاوان ءَ دوسد ءُ ھشتاد ءُ دو رنانی ٹارگٹ داتگ کہ اے ٹارگٹ اوگانستان ءَ چِل ءُ نھمی اوور ءَ دو وکٹانی تاوان ءَ پروش اِتگ –

اوگانستان ءِ نیمگ ءَ اوپنر ءَ اتکگیں ابراہیم زردان ءُ رحمان اللہ گرباز ءَ جوانی ءَ گوازی کنان ءَ بیست ءُ یک اووراںیکسد ءُ سِی رن ھواری جوڈ کتگ – ھردوکاں نیم سنچری کتگ ءُ پاکستانی بالر الکاپی ءَ ششتگ انت –

پاور پلے ءَ پاکستان ءِ تیزتریں بالر شاہین شاہ آفریدی، حسن علی ءُ حارث رؤف ھم وکٹ ءِ گرگ ءَ بے سوب بوتگ انت –

شاہین ءُ حسن علی ءَ ھردوکاں وتی اولی اوور ءَ دو دو چوکا داتگ وھدیکہ ھشتمی اوور ءَ حارث رؤف پدا اتکگ گڈا گرباز ءَ آئی چار بال چوکا کتگ انت –

حارث رؤف ءَ وتی اولی چاریں اووراں سِی ءُ سَے رن داتگ ءُ پاکستان ءِ اسپنر اسامہ میر، شاداب خان ءُ افتخار احمد ھم بے سوب بوتگ انت –

گرباز ءَ پنجاہ ءُ سَے بالاں شست ءُ ہنچ رن جوڈ کتگ کہ آئی ءَ نُھ چوکا ءُ یک چکے ءِ ھم جتگ –

میان استمانی کرکٹ ورلڈ کپ ءِ تہ ءَ پاکستان ءِ بگیری ءَ گوستانکی باج بری ءَ پد اوگان ءِ کرکٹر ابراہیم زردان ءَ مین آف دی میچ ءِ داد چہ پاکستان ءَ اوگانستان ءَ رؤکیں باھوٹیانی نام ءَ کتگ –

پاکستان ءِ دیگ بوتگیں دوسد ءُ ھشتاد ءُ سَے رنانی ٹارگٹ پروشگ ءَ پہ اوگانی اوپنر ابراہیم زردان ءَ جوانی ءَ گوازی کنان ءَ ھشتاد ءُ نُھ رن جوڈ کتگ ءُ مین اف دی میچ ءِ داد گپتگ –

گوازی ءَ پد اھوالکاراں گوں تران کنان ءَ آئی ءَگوشتگ کہ من اے مین آف دی میچ ءِ داد ءَ ھما مردماں دیگ لوٹ آں کہ چہ پاکستان ءَ واتر اوگانستان ءَ دیم دیم بوگ ءَ انت –

بلوچستان ءِ جتاجتائیں دمگاں تیرگواری ءُ دگ ءِ وئیلانی آسر ءَ چُکے ءَ ھوار شش مردم بیران ءُ زالبول ءُ چُکاں ھوار شانژدہ مردم ٹپی بیتگ اَنت-

گیشیں ھالانی رِد ءَ بلوچستان ءِ باپاری شھر ھب چوکی ءِ تھسیل وندر ءِ دمگ لکھو بلوچ گوٹھ سیرندہ ھند ءِ سر ءَ بُنجاھی ایکو شھدگ N25 سر ءَ کراچی ءَ چہ بیلہ ءَ رؤکیں مساپر بس دیم ءَ آؤکیں ٹرالر ءَ ٍچہ ڈک ورگ ءِ آسر ءَ مساپر بس ءَ سوار یک کسانیں چُکے بیران ءُ سیزدہ مردم ٹپی بیتگ اَنت-

وندر ءَ ٹپی ئیں زالبول ءُ چُک ھوار اَنت کہ آ زوت نادُراھجاہ برتگ اَنت-

دگہ یک وئیلے بیلہ ءِ نزیک کراڑو ءِ ھند سر ءَ مساپر بس ءَ کسانیں گاڑی ءِ میان ءَ ڈک ورگ آسر ءَ یک مردمے کریم بخش بیران وھدے سعاد اللہ ءُ اصغر علی ٹپی بیتگ اَنت-

بیلہ ریسکیو ٹولی وئیلجاہ ءَ سر بیتگ اَنت ءُ ٹپی ءُ بیران بیتگیں مردم نادُراھجاہ برتگ اَنت-

ھمے وڑ ھُزدار ءِ دمگ وھیر نزیک ءَ زمباد گاڑی ءُ پرپٹ ءِ میان ءَ ڈک ورگ آسر ءَ پرپٹ ءَ سوار غلام محمد ءُ زمباد گاڑی ءَ سوار عبدالرشید ء غلام مصطفی جھمنند نال نامیں مردمے بیران بیتگ اَنت وھدے کہ رحمت اللہ نامیں مردمے ٹپی بیتگ-

ریسکیو واکداراں لاش ءُ ٹپی زوت نادُراھجاہ ءَ برتگ اَنت-

دومی نیمگ ءَ اوستہ محمد سٹی پولیس تھانہ ءِ ھاک ءَ جمالی ٹک ءِ دو ٹولیانی میان ءَ تیرگواری ءِ آسر ءَ دو مردم کُشگ بیتگ گیشیں پٹ پول ءَ سٹی پولیس تھانہ اوستہ محمد کنگ ءَ اِنت-

وائس فار بلوچ مسنگ پرسنز ءِ سرکماش نصراللہ بلوچ ءَ گوشتگ کہ نھال خان مری ءِ زورانسری آوار جنی ءِ سرجمیں ھال آئی ءِ کھول ءَ وائس فار بلوچ مسنگ پرسنز ءَ داتگ انت –

آیاں گوشتگ کہ نھال خان مری ء یار شاہ مائنگ کول کمپنی ءَ ڈرائیور ءِ بوتگ کہ پاکستانی پوج ایف سی ءَ آ ماں مچھ ءَ وتی جند ءِ گس ءَ زورانسری آوار جتگ ءُ بیگواہ کتگ ءُ نھال خان آوار جنی ءِ درگت ءَ آئی ءِ کھول ھچ سرپد کنگ بوگ ءَ نہ انت کہ کجام سوب ءَ آوار جنگ بوتگ –

آئی ءَ گوشتگ نھال ءِ یل نہ کنگ ءِ سوب ءَ آئی ءِ کھول سک باز ماژگی ازیت ءِ آماچ انت – وی بی ایم پی ءَ آ باور کنائیں اِتگ انت کہ گل نھال خان مری ءِ کیس ءَ سوبائی سرکار ءُ بیگواھیں مردمانی ھاتر ءَ جوڈ کنگ بوتگیں کمیشن ءَ سرکنت ءُ آئی ءِ یل کنائینگ ءَ ھر تکاں توار چست کنت –

نصراللہ بلوچ ءَ چہ سرکار ءَ لوٹ کتگ کہ نھال خان مری یل کنگ بہ بیت ءُ آئی ءِ کھول چہ اے ازابیں زند ءَ رکینگ بہ بیت –

دومی نیمگ ءَ بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ دوسد ءُ ھشت روچ سرجم بوتگ انت –

مروچی چہ مشکے ءَ سیاسی ءُ چاگردی باسک محمد اشرف، عبدالحکیم ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

گل ءِ کمک سرکماش ماما قدیر بلوچ ءَ ھمے میان ءَ تران کنان ءَ گوشتگ کہ اکتوبر ءِ بنداتی روچاں پاکستانی لشکر ءَ بلوچ سرڈگار گوں بلوچ پسگانی ھوناں رنگیں کرتگ – اسلام آباد بلوچ راج ءِ ھستمان ءَ پہ وتی ریاست ءِ باندات ءَ ترسے سرپد بیت –

آئی ءَ گوشتگ کہ آمیدگس ءِ زورانسری آوار جنگ بوتگیں مردمانی کیس ءِ بارو ءَ جُست ءُ پرس یک توازھے، پمیشکا کہ درکانودی زورانسری آوار جنی ءِ ویل گیش بوگ ءَ اَنت – آمیدگس ءَ زورانسری آوار جنگ بوتگیں مردمانی یل کنگ ءَ پرمان داتگ بلے چہ ایشی ءَ اَبید مردم زورانسری آوار جنگ ءُ بیگواہ کنگ بوگ ءَ اَنت –