TBP Balochi

مروچی چارشمبے ءِ روچ ءَ شال ءِ پریس کلب ءِ دیم ءَ برجاھیں بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ گل ءِ کمک سرکماش ماما قدیر بلوچ ءَ وکیل ءُ دگہ مردمانی ھمراھی ءَ اھوالکاراں گوں تران کتگ ءُ گوشتگ کہ سال دوھزار پانزدہ ءَ کہ من امریکہ ءِ روگ ءِ ھاتر ءَ کراچی بالی پٹ ءَ سر بوتگ آں گڈا من چہ ایمیگریشن در اتکگ ءُ لاؤنچ جاہ ءَ شتگ ءُ نشتگ آں گڈا اودا بالی پٹ ءِ واکدار ءُ دگہ سرکاری ادارھانی کارمنداں اتکگ ءُ مناں گوشتگ کہ تئی نام ای سی ایل لڑ ءَ ھوار انت ءُ آیاں مناں امریکہ ءِ رؤگ ءَ نہ اشتگ – ءُ پدا من سندھ ہائی کورٹ ءَ لوٹ کتگ کہ منی نام ای سی ایل ءَ در کنگ بہ بیت گڈا سندھ ہائی کورٹ ءَ چہ آیاں پسو لوٹ اِتگ کہ ماما قدیر نام پرچا ای سی ایل ءَ ھوار کنگ بوتگ گڈا آیانی گور ءَ ھچ پسو نہ بوتگ گڈا سندھ سرکار ءَ ھکم داتگ کہ منی نام ءَ ای سی ایل ءَ در کنگ بہ بیت گڈا آیاں منی نام ای سی ایل لڑ ءَ در کتگ –

آئی ءَ گوشتگ کہ دومی رند ءَ پدا سال دوھزار ھژدہ ءَ منی نام ای سی ایل ءَ مان کنگ بوتگ گڈا من بلوچستان ءِ ہائی کورٹ ءَ شتگ آں کہ اودا ھم سرکار آمیدگس ءِ دیم ءَ بے وس بوتگ ءُ آمیدگس ءَ منی ھک ءَ پیسلہ داتگ ءُ منی نام ای سی ایل ءَ در کنگ بوتگ –

ماما قدیر ءَ گوشتگ کہ سال دوھزار ءُ بیست ءَ سیمی رند ءَ منی نام ای سی ایل لڑ ھوار کنگ بوتگ گڈا من دوبر بلوچستان ہائی کورٹ ءَ شتگ انت گڈا آمیدگس ءَ چہ سرکار ءَ پسو لوٹ اِتگ کہ ماما قدیر نام پرچا مدامی ای سی ایل ءَ ھوار کنگ بوگ ءَ انت گڈا اودا سرکار ءَ منی بگیری ءَ بازیں بھتام جتگ، دوھزار بیست ءَ بگر تاں دوھزار ءُ بیست ءُ سَے ءَ منی کیس بلوچستان ہائی کورٹ چلگ ءَ بوتگ کہ سرکار ءَ منی سرا جتگیں بھتام راست کت نہ کتگ انت گڈا بلوچستان ہائی کورٹ ءَ دوھزار ءُ بیست ءُ سَے ءِ مئی ماہ ءَ منی ھک ءَ پیسلہ داتگ کہ ماما قدیر ءِ نام ای سی ایل ءَ در کنگ بہ بیت گڈا منی نام ای سی ایل ءَ چہ درکنگ بوتگ –

آئی ءِ گوشگ ات کہ بلے چارمی رند ءَ ھستیں وھدے سرکار ءَ منی نام دوبر ای سی ایل ءَ ھوار کتگ –

آئی ءَ گوشتگ کہ من یک انسانی ھکانی باسک آں ءُ وائس فار بلوچ مسنگ پرسنز ءِ پلیٹ فارم ءَ سال دوھزار ءُ نھ بگر تاں روچ مروچی پرایمن ءُ کانودانی رِد ءَ جھد کنگ ءَ انت – مئے جھد ءِ مول ھمیش انت کہ ملک ءِ تہ ءَ درکانودی انسانی ھکانی لگتمالی دارگ بہ بیت، ادا آئین ءِ بہ بیت ملک ءِ تاکتوریں ادارہ ھر گامے چست کن انت کانودانی رِد ءَ بہ بیت کس چہ کانوداں مستر وت ءَ مہ لیک ایت – ما ھمے لوٹ ایں اگاں کسی سر ءَ الزام ءِ ھست ءُ آ دزگیر کنگ بیت گڈا دزگیری ءِ بیست ءُ چار ادارانی میان ءَ آ مجسٹریٹ دیم ءَ آرگ بہ بیت – بیگواھیں مردم دیم ءَ آرگ بہ بنت اگاں آیانی سر ءَ الزام ءِ ھست گڈا آیاں آمیدگس سزا بہ دنے – ھر ھما کس کہ کتکار نہ انت یل کنگ بہ بنت – زورانسری آوار جنی ءُ بیگواھی درکانودی کارے کہ اشی ءِ گر ءُ دار کنگ بہ بیت – بیگواھیں مردمانی کھول سرپد کنگ بہ بنت ـ ھر ھما ادارہ کہ زورانسری آوار جنیاں ھوار انت آیانی بگیری ءَ گامگیج زورگ بہ بیت –

ماما قدیر ءَ گوشتگ کہ من وتی جھد ءِ مول شمے دیم ءَ گوشتگ انت کہ چریشی ءَ شما وت شری ءَ سرپد بہ ئے ءُ زان ئے کہ وائس فار بلوچ مسنگ پرسنز ءِ پلیٹ فارم ءَ ما جھد کنگ ءَ ایں ا ملک ءِ کانوداں چہ در نہ انت – ملک ءِ کانود رھبندانی رِد ءَ جھد کنگ ءَ ابید ھم منی نام ای سی ایل لڑ ءَ مان کنگ بوگ ءَ انت – ما ھمے پھم ایں کہ ریاست ءُ ریاستی ادارہ چہ مئے پُرایمنیں جھد ءَ ترسگ ءَ انت – آیاں ھمے ترس انت کہ ما وتی گل ءِ ریاستی ادارھانی درکانودی کاراں میان استمانی تک ءَ زاھر کنگ ءَ انت کہ چریشی ءَ آیانی بدنامی بیت – ھمے سوب ءَ آ مئے گل ءِ رھشوناں دلسیاہ کنگ ءَ انت ءُ منی نام ءَ مدامی ای سی ایل ءِ لڑ ءَ ھوار کنگ ءَ انت – چہ اے وڈیں کاراں ما ھچبر وتی جھد ءَ دزکش نہ بہ ایں بلکنہ ما مھکمی ءَ وتی آئینی ءُ کانودی جھد ءَ برجاہ دار ایں –

آئی ءَ گڈسر ءَ گوشتگ کہ ما چہ سپریم کورٹ، چیف جسٹس ءَ ھوار درسیں سیاسی پاٹی، نودربر گل، انسانی ھکانی گل ،اھوالکار ءُ وکیل ءُ ھرتک ءُ پھناتاں سیادی داروکیںمردماں گوں لٹ کن ایں ریاست ءُ ریاستی ادارھانی اے رویش ءِ سر ءَ توار چست بہ کن انت ءُ مارا ءُ بیگواھیں مردمانء درگت ءَ مئے پرایمنیں ءُ کانودی جھد ءِ پھریز ءَ بکن انت –

بلوچستان لبریشن فرنٹ ءَ مشکے ءَ پاکستانی پوج ءِ مزنیں بُنجل ءَ ھوار یکیں وھد ءَ چار جتاجتائیں جاھاں پاکستانی پوج ءِ سر ءَ اُرش کُرتگ ءُ دُژمنیں لشکر جانی ءُ مالی تاوان داتگ۔

اے اُرش دُژمن ءِ بگیری ءَ یک مھکمیں کارشونی یے ءِ رَد ءَ کنگ بیتگ اَنت کہ سَے شمبے ءِ روچ ءَ  نلی ءَ پاکستانی پوج ءِ مزنیں بُنجل، رندک نوکجو ءَ لشکر ءِ بنجل ، پگڑ ءُ میانی کلات ءَ دُژمنیں پوج ءِ پانگسانی سر ءَ سرمچارانی چار جتاجتائیں ٹولیاں اُرش کُرتگ۔اے اُرش ءَ ٹوھین ءُ نوکیں سلاھاں ابید بی ایل ایف ءِ اسنائپر ٹولی یے ءَ ھم بھر زُرتگ۔

اے اُرش بیگاہ ءِ ھپت ءَ بگر داں کہ شپ ءِ نوہ ءَ برجاہ بیتگ اَنت۔

سَے شمبے، 24 اکتوبر ءِ بیگاہ ءِ ھپت ءَ مشکے ءَ پاکستانی پوج ءِ جتاجتائیں بُنجاہ نشانگ کنگ ءُ اے مھمکیں اُرشانی دْرچ بندات کنگ بیتگ۔ نلی ءَ پاکستانی پوج ءِ مزنیں بنجل ءَ چہ جتاجتائیں نیمگاں گو راکٹ ءُ گرنیڈ لانچراں اُرش کُرتگ کہ بُنجل ءِ تہ ءَ کپتگ اَنت۔ چہ ایشی ءَ زورگریں پوج ءَ جانی ءُ مالی تاوان بیتگ۔پد ءَ داں دیر ءَ سرمچاراں ایل ایم جی ءِ سر ءَ اُرش کُرتگ۔

بی ایل ایف  ءَ ’رندک نوکجو ‘ ءَ ھم پاکستانی پوج ءِ بنجل نشانگ کُرتگ، اے اُرش ءَ ھم ٹوھین ءُ نوکیں سلاہ کارمرز کنگ بیتگ۔ پگڑ ءَ پاکستانی پوج ءِ پانگس ءِ سر ءَ اُرش کُرتگ۔ھمے میان ءَ بی ایل ایف ءِ اسنائپر ٹولی ءَ میانی کلات ءَ پاکستانی پوج ءِ سر ءَ اُرش کُرتگ۔

بلوچستان لبریشن فرنٹ ءِ اے اُرش اے گپ ءِ نشون اَنت کہ دُژمن ءِ بگیری ءَ بلوچ راجی توان مھکم اِنت ءُ یکیں وھد ءَ بازیں جاھاں گوں دُژمن ءَ جنگ کنگ ءِ توانے ھست۔ پاکستانی پوج گوں دُرسیں جنگی مڈیاں ابید بلوچستان ءَ یک نابودیں لشکرے ءَ ابید ھچے نہ اِنت۔بی ایل ایف گوں بلوچ راج ءِ پلہ مرزی ءَ پاکستانی پوج ءَ چہ بلوچ سرڈگار ءَ در کنت۔ آ روچ دیر نہ کنت کہ بلوچستان ءِ زمین پہ دُژمن ءَ تنک بیت ءُ پہ آئی ءَ سلاہ ءِ چگل دیگ ءُ تچگ ءَ ابید دگہ راہ پشت نہ کپ ایت۔

بی ایل ایف ءِ اے اُرش داں بلوچستان ءِ آجوئی ءَ برجاہ بنت۔

روکپتی بلوچستان ءَ سیادی داروکیں یک مردمے ماں کرمان ءِ زندان ءَ پاھو دیگ بیتگ-

سر بیتگیں ھالانی رد ءَ ایران ءِ اُستان کرمان ءَ یک بندیگیں مردمے پاھو دیگ بیتگ –

روکپتی بلوچستان ءِ اھوالانی شنگ کنوکیں تندجاہ ھال وش ءِ رد ءَ مروچی ایران ءِ اُستان کرمان ءَ زاھدان ءِ جھمنندیں مردمے نشہ باپاری ءِ بھتام ءَ پاھو دیگ بیتگ-

ھال وش ءِ رد ءَ پاھو دیگ بیتگیں مردم ءِ پجار ھیات اللہ عیدوزئی ء مھمد گل جھمنند زاھدان مروچی ماں کرمان ءِ زندان ءَ پاھو دیگ بیتگ-

اھوالانی رد ءَ ھیات اللہ ایرانی سال سیزدہ سد ءُ نود ءُ ھپت ءَ بزانکہ پنچ سال پیش ماں کرمان ءَ نشہ باپاری ءِ بھتام ءَ گرگ بیتگ ءُ آئی ءِ سر ءَ ایرانی آمیدگس ءَ پاھو ءِ ھکم داتگ بیتگ-

ھال وش ءِ رد ءَ اے مرد گوں دگہ سَے مردمانی ھمراھی ءَ جتائیں کوٹی ءَ برگ بیتگ ءُ مروچی اے مرد اش پاھو داتگ بیتگ-

بلوچستان ءِ دمگ چہ تربت ءَ پاکستانی پوج ءَ یک مردمے زورانسری آوار جتگ ءُ ناشناسیں جاھے ءَ برتگ-

بیگواہ کنگ بیتگیں ورنائے پجّار بالاچ ء محمد خالد نام ءَ چہ بیتگ-

اے ورناہ گوستگیں شپ ءِ ساھت یکّ ءَ لشکر ءَ تربت ءِ دمگ چہ سنگانی سر ءَ آوار جتگ ءُ بیگواہ کتگ-

ھمے وڑ بلوچ وائس فار چسٹس ءِ درشان ءَ گوشگ بیتگ کہ چہ تربت ءَ چار ورناہ زورانسری بیگواہ کنگ بیتگ اَنت کہ آیانی تہ ءَ دو ءِ پجّار سرفراز ء ایوب کہ چہ آبسر ءَ آئی ءِ دکان ءَ چہ چست کتگ وھدے کہ بالاچ ء خالد چہ سنگانی سر ءَ پوج ءَ، چست کتگ، بلوچ ورناھانی زورانسری جنی ءِ تہ ءَ یکرندے پد ءَ گیشی آرگ بیتگ ءُ بلوچستان ءِ جتاجتائیں دمگاں گوستگیں چیزے روچ ءَ بازیں ورناہ زورانسری بیگواہ کنگ بیتگ اَنت ءُ یک دل پہ دردناکیں کردے-

درشان ءِ تہ ءَ گوشتگ کہ بلوچ وائس فار بلوچ جسٹس چہ تربت ءَ زورانسری بیگواہ کنگ بیتگیں سرفراز ءُ بالاچ ءِ زوت یل کنگ ءِ لوٹ ءَ کن ایں ءُ انسانی ھکانی گل ءَ چہ دزبندی کن ایں کہ بلوچستان ءَ زورانسری جنی ءِ گامگیج ءَ بزور اَنت بیگواھیں مردمانی یل کنائینگ ءَ وتی کرد ءَ پیلو بکن اَنت-

کتاب ءِ نام : ماتم ایک عورت کا

نبشتہ کار : عمرروبیلا

چمشانک دیوک: شئیب گنی بلوچ

دی بلوچستان پوسٹ

اے گدار ءِ نبشتہ کار عمر روبیلا انت ءَ ارجنٹان ءَ ودی بیتگ ءُ بازیں وھدے ءَ نیویارک ءَ بیتگ۔ عمر روبیلا انسانی ھکانی پلامرزی کنوکے ءِ جَھت ءَ زانگ بیت اِنت ۔ عمر روبیلا ءِ اے گدار اولی بر ءَ لاطینی امریکہ چاپ ءُ شنگ کنگ بیتگ ۔ بلئے پد ءَ اے گدار انگریزی ءَ چاپ کنگ بیت۔ اے کتاب ءِ کسہ بازیں لبزانک ءِ ھیال ءَ وتی نیمگ ءَ بارت ءُ پد ءَ زوت بازیں زباناں رجانک کنگ بیتگ۔

اے کتاب ارجنٹینا ءِ جاورھالانی سر ءَ نبشتہ اِنت کہ ارجنٹینا ءِ بوتگیں زوراکیانی کسہ ءَ پدر کنت ۔اے ھما وھد ءِ کسہ انت ارجنٹینا ءِ سرکار بدل بیت انت ءُ ارجنٹینا ءِ نندوکیں مردم چنچو وار ءُ بزگی ءِ دیمپان بنت اِنت ۔

اے گدار 1986 چاپ کنگ بیتگ کتاب دو سد 200 تاکدیمانی تہ ءَ اِنت گر یک تاکدیمے ءَ ارجنٹینا ءِ سر ءَ بوتگیں زلم ءُ زوراکی چوں آدینک ءَ وانوک ءِ دیم ءَ پدر بیت ۔ گدار ءَ نبشتہ کار وانوک ءَ ھما وھد ءَ بارت ءُ سر کنت وھدیکہ لاطینی امریکہ ءَ ارجنٹینا ءِ سرکار ءِ بدل بوھگ ءَ پد زلم ءُ زوراکی بیت ، مردُمانی گار ءُ بیگواہ کنگ، لَٹ ءُ کُٹ کنگ، چہ مال ءُ دلوت ءَ زبھر بوھگ ءُ دگہ حکومت آیگ ءُ چہ اودئے نندوکیں مردُمانی چہ بنیادی ھکاں زبھر کنگ ءُ آیانی سرڈگار ءَ پَچگرگ ءُ آیاں زندان ءَ بند کنگ بنت اِنت-

گدار ءِ چوناھا کارست باز انت بلئے زنڈیں کارست (مین کردار )دو انت 1- پادری انتینو 2- سوزنا نامی جنک ءِ۔ وھدیکہ ملک ءِ جاور نگیگ بنت گُڑا مردم پاد کاینت گھگیری کن انت زلم ءِ ھلاپ ءَ یکمُشت بنت۔ آھانی توکا پادری انتینیو گو ھوار انت۔(پادری کرسچنانی عبادت دیوک ءَ گوش انت) یک روچ ءِ پادری چرچ ءِ توکا مردُمانی عبادت دئیگ ءَ بیت اچانکہ یک زالبولے چرچ ءِ دپا رس ایت پادری جنین ءَ گِند ایت ھیران بیت گڑا جلدی جلدی عبادت ءَ پارگ کنت سرجمیں مَردُم رَواں بلئے پادری ءِ چم انگت ھما زالبول ءَ سک انت ھمے جنین مَدان مَدان کیت پادری ءِ کرا گوش ایت منی نام ھوانیتا انت سوزنا ھا اے ڈب ءَ من ءَ داتگ ءُ گوشتگے پادری ءِ کرا رسین ئے ھمے دمان ءَ حوانیتا ءَ پادری توار جنت بلئے ھچ پیمین جواب نہ دنت ۔ چیا کہ حوانیتا کَرّے بیت۔پادری ھمے کریٹ ءَ زور ایت ءُ روت وتی کمراہ ءَ ایر ئے کنت ءُ واتر ایت۔ پادری ءِ سر ءَ مردم مُدام الزام جن انت کہ تو ھر وھد ءَ جنین آدمانی کرا روئے ھرابین کار کن ئے بلئے پادری ھچ پُشت کنز نہ بیت وتی سپر ءَ یل نہ کنت مردُمانی کتگیں گپاں مان نیار ایت۔

یک روچے پادری روت پد ءَ ھما کمرہ کہ ڈبہ ایر کُتگ ات گڑا ڈبہ پچ کنت کہ چہ ھمے ڈبہ ھرابین انسانی پیشاب یا کہ مُردگین ساھدار ءِ وڑ ءَ بوہ درایگ ءَ انت۔ پادری بوہ ءِ بوہ چنگ ءَ رند سک پریشان بیت ءُ ھمے جیڑ ایت کہ بوت کنت اے جنین ءَ منی کَلاگ بستگ) پاد کیت چہ کمرہ ءَ ھمے دمان پرچئی ءَ چمئے کپ ایت ءُ چار ایت کہ ڈبپ پُر انت چہ کسان کسانیں کاگزان ءُ آھانی سر ءَ رمس تاریخ نبشتہ کنوک انت گڑا یک پرچی زور ایت وانگ ءَ بندات کنت۔ پرچیانی توک ءَ سوزنا وتی جندئے ءُ وتی سنگتانی زندان ءِ کسّہ نبشتہ کُتگ انت۔ اوّلی پّرچی ءِ سر ءَ ھمے نبشتہ اے کنوک انت کہ سوزنا گون وتی پِت ءُ مات ءَ گو وتی کللوگ ءَ نندوک بیت ۔ سوزنا ءِ پت ڈاکٹرے ءُ مات ھم راجدوستیں زالے بیت۔ شپے نیما دروازگ توار کنت ءُ سوزنا پت چہ واب ءَ پاد کیت دروازگ ءِ کرا روت کہ ھمے مار ایت کہ باز مردُم ءَ ھمئے مار ایت بوت کنت دارو ءُ درمان ءِ واستا مردم شپے نیم ءَ اتکگ انت۔ گُڑا گیٹ ءَ پچ کنت کہ تُپنگی مرد زا ءُ بد کنگ ءَ بندات بنت ڈاکٹر گیت ءُ دست ءُ پادان ئِے بند ایت ءُ گوش ایت دھشتگرد دوا ءُ درمان کنگایے۔ گڑا ھمے وھد ءَ سوزنا گر اَنت ءُ زندانی کن اَنت۔ دیم ترا پرچی ءِ تہ ءَ سوزنا ھمے نبشتہ کنت من ءَ زور انت یک ءُ نیم شپ روگ پد سوزنا ءَ گر انت ءُ کوٹی ءِ تہ ءَ بند کن انت۔ زندان ءِ تہ ءَ سوزنا وڑ وڑیں سزا دیگ بیت ءُ آئی ءَ برھنگ کنگ بیت ، مردینانی دیم ءَ گوں آئی ءَ بد فیلی کنگ بیت ءُ آئی ءَ جُست کن اَنت کہ تو چہ کُجام گل ءِ مردمے زندان ءِ گیشتریں بندیگ زالبول بنت۔ اے جیل ءَ آھانی دیم ءَ بازیں جیڑہ ءُ جنجال کاینت یک جاھے جیل ءِ سنتری کاینتب ءُ جنینانی بد کار ی ءَ کن انت ، دگہ یک لاپُرّیں زالبولی ءِ گوم ءَ انچیں بد املی بیت آئی ءِ لاپ ءِ چُک ءَ اوں سِزا دے اَنت ٹارچر سیلانی تہ ءَ ھما کہ گنتریں سزا بہ بنت آھانی گوما کنگ بیت۔ یک روچے ھمے لاپ پُرین جنین حوانیتا گُش ایت تو وت ءَ گنوکے بکن گاٹ والاھاں گپ دارین من ءُ سوزنا ھمے جیڑہ کہ مئے گون ءَ بوگ ءَ اَنت ھمیشاں نبشتہ کن اِیں ، چریشی ءَ چہ مئے کھول ءِ مردم آژنا بنت کہ ما چنچو زُلم ءِ دیپان ایں۔ گڈسر ءَ دُرستان چہ پیش ھوانیتا در کَیت ءُ پرچی ءَ بارت پادری انتنو ءَ رسینیت۔ پادری بازین پرچیانی وانگ ءِ سوب ءَ سک نگیگ ءُ پریشان بیت۔ گڑا چاگرد ءِ مردم انتینیو ءِ سر ءَ وڑ وڑیں بُھتام جن انت۔

اے کتاب ”ماتم ایک عورت کا“ ءِ کسانیں گْوستانکی پشدرے اَت۔ نوں ما چاریں کہ ایشی ءِ تہ ءَ چے بوتگ ءُ اے بوتگیں کار ءُ کردار گوں مئے چاگرد ءِ گون ءَ چنچو سیادی دار انت آیان پہ وتی سر ڈگار ءِ واستا چنچو تکلیپی وارتگ ما چنچو ورگ ءَ ایں۔ کتاب ءِ وانگ چہ مرم ءَ انچو سما بیت کہ یک چاگردے کہ گلام بیت آ چاگرد ءِ تہ ءَ ھرچ وڑین زُلم ءُ زورکی بیت۔ اگاں ما وتی چاگرد ءَ ھورت بچاریں کہ ھما جاوراں ارجنٹینا ءِ بیت انت ھما جیڑہ ءُ جاور ھال مئے چاگرد ءِ تہ ءَ گندگ ءَ کاینت۔

ھلاس۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سراوان ءَ سلاہ بندین مردماں تیرگواری کنان ءَ یک مردمے کُشتگ-

گیشیں اھوالانی رد ءَ روکپتی بلوچستان ءِ دمگ سراوان ءَ ناشناسیں مردماں تیرگواری کتگ ءُ یک مردمے کُشتگ-

وئیل گوستگیں روچ ءِ دیگر ءِ وھد ءَ پیش اتکگ کہ اود ءَ سلاہ بندیں مردمانی تیرگواری ءَ شھزاد جوادی ء گمداد نامیں مردمے بیران بیتگ-

اھوالانی رد ءَ شھزاد جوادی سراوان ءِ ھند دزک ءِ جھمنند اِنت کہ آ گوستگیں مگرب ءَ پیش ماں ناشناسانی تیرانی آماچ بیتگ ءُ بیران بیتگ-

آئی سی سی کرکٹ ورلڈ کپ ءِ بیست ءُ سیمی گوازی ماں بھارت ءَ بنگلہ دیش ءُ ساؤتھ افریقہ ءِ میان ءَ کنگ بوتگ –

ساؤتھ افریقہ ءُ بنگلہ دیش ءِ میان ءَ بوتگیں گوازی ءَ ساؤتھ افریقہ ءَ ٹاس کٹ اِتگ ءُ اولسر ءَ بیٹنگ کنگ ءِ شور کتگ کہ آئی ءَ بنگلہ دیش ءِ دیم ءَ پنجاہ اوورانی تہ ءَ پنچ وکٹانی تاوان ءَ سَے سد ءُ ھشتاد ءُ دو رنانی ٹارگٹ ایر کتگ کہ بنگلہ دیش ءَ اے ٹارگٹ پروشت نہ کتگ ءُ چِل ءُ ششمی اوور ءَ دو سد ءُ سِی ءُ سَے رن جوڈ کتگ ءُ دراھیں لیبی آؤٹ بوتگ انت –

ساؤتھ افریقہ ءِ نیمگ ءَ درساں گیشتر کوئنٹن ڈی کوک ءَ یکسد ءُ ھپتاد ءُ چار ،ہینرک کلاسین نود ءُ کپتان ایڈن مارکرم ءَ شست رن جوڈ کتگ انت –

بنگلہ دیش ءِ نیمگ ءَ حسن محمود دو وھدیکہ مہدی حسن میراز، شوریفُل اسلام ءُ شکیب الحسن یک یک وکٹ گپتگ – بنگلہ دیش ءِ نیمگ ءَ درساں گیش محمود اللہ ءَ یکسد ءُ یازدہ بالاں 111رن جوڈ کتگ انت –

تربت ٹیچنگ نادُراھجاہ تربت ءِ مسیت ءَ یک نیم توامیں چُکے مردگیں جاور ءَ دزکپتگ کہ نادُراھجاہ ءَ چہ تعلیمی چوک ءِ مانشجاہ ءَ کل کسارت کنگ ءَ برتگ-

اِھوالکارانی گْوشگ اِنت کہ تنی وھدے اے سرپدی نہ رس اِتگ کہ اے چُک چلگی ءِ وارڈ ءَ ودی بیگ ءَ پد اد ءَ آورتگ ءُ دور داتگ یا کسے ءَ چہ ڈن ءَ آورتگ ءُ اد ءَ دور داتگ-

مردماں لوٹ کتگ کہ اگاں اے ٹیچنگ نادُراھجاہ تربت ءِ چلگی وارڈ ءَ یا کجام ھم ڈیپارنمنٹ ءِ نہ دلگوشی ءِ سبب ءَ بیتگ اشی ءِ پٹ ءُ پول کنگ بہ بیت-

دومی نیمگ ءَ جانسلامتی کیچ ءِ گوشگ اِنت کہ ٹیچنگ نادُراھجاہ تربت ءِ ایم ایس ءَ نیم توامیں چُک ءِ وئیل ءِ درگت ءَ پٹ پولی کمیٹی یے جوڑ کتگ-

جانسلامتی کیچ ءَ گوشتگ کہ پٹ پول ءَ سرجم کن ایں وئیل ءِ راستیں سوب ءَ دیم ءَ کار ایں-

آئی ءَ گوشتگ کہ پٹ پول ءِ سرجم بوگ ءَ ساری چیزے گوشگ ءَ چہ پٹ پول ءِ سر ءَ اسر کپ اِیت-

کیچ ءِ بنجاھی شھر تربت ءِ دمگ آپسر ءَ پاکستانی پوج ءُ چیریں ادارھانی کارمنداں یک ورنایے آوار جتگ –

گیشیں ھالانی رِد ءَ پاکستانی پوج ءُ چیریں ادارھانی کارمنداں تربت ءِ دمگ آپسر ءَ دکانے ءَ بیڑ برتگ ءَ سرفراز ء ایوب آوار جتگ ءُ بیگواہ کتگ -.

زانگ بہ بیت اے ورنا ھپت سال ساری ھم آوار جنگ ءُ بیگواہ کنگ بوتگ ات کہ پدا رند ءَ یل کنگ بوتگ ءُ ھنو دوبر آوار جنگ بوتگ –

بلوچستان ءَ پاکستانی پوج ءُ چیریں ادارھانی کارمند ھمک روچ مردماں زورانسری آوار جنگ ءُ بیگواہ کنگ ءَ انت چشیں روچ ءِ نگوز ایت کہ گس ءُ بازاراں بیڑ برگ نہ بیت ءُ مردم آوار جنگ نہ بنت –

زورانسری آوار جنگ بوتگیں مردم بازیں وھدے ءَ ازیت جاھاں بند بوگ ءِ سوب ءَ نیم مرگ کنگ ءُ یل کنگ بنت یاکہ آیانی ژانگولیں جون دست کپ انت –

بلوچستان ءَ زورانسری آوار جنگ بوتگیں مردمانی یل نہ کنگ ءِ بگیری ءَ بیگواھیں مردمانی پانکجنیں گل، آیانی کھول، سیاسی ءُ پاٹی ءُ گلانی نیمگ ءَ زھرشانی ءِ درچ برجاہ انت –

سربوتگیں ھالانی رِد ءَ بلوچستان ءِ بنجاھی شھر شال ءَ پولیس ءِ میڑ ءَ دو مردم بیران ءُ یکے زدگ بوتگ –

پولیس ءِ رِد شال ءِ رودرآتکی دمگ ءَ پولیس ءِ گوم ءَ میڑ ءَ دو مردم بیران ءُ یک ءِ زدگ بوتگ – ھالانی رِد ءَ رودرآتکی بائی پاس ءَ ناشناسیں مردماں ایگل اسکواڈ کارمندانی سر ءَ اُرش کُتگ بلے پدا ھم اے اُرش پولیس کارمند رک اِتگ انت ءُ پولیس ءِ پسوی تیرگواری ءَ دو ارشکار جنگ بوتگ ءُ یکے زدگیں جاوراں دزگیر کنگ بوتگ –

زانگ بہ بیت بلوچستان ءَ سی ٹی ڈی ءِ کار شکی نگاھاں گوں چارگ بنت وھدیکہ آیانی بازیں میڑ چہ چاگردی ترامجاہ ءُ کھولانی نیمگ ءَ دروگ گوشگ بوتگ انت بلے سرکاری وزیر ءُ واکدار اے کارانی پلامرزی ءَ کن انت –