TBP Balochi

بلوچستان ءِ بنجاھی شھر شال ءَ چمن پھاٹک ءِ نزیک ءَ پاکستانی پوج ءِ چوکی ءِ سر ءَ ترندیں تراکے بیتگ کہ چریشی ءَ دو مردم زدگ بیتگ اَنت-

تراک ءِ ھال ءِ سر بوگ ءَ پاکستانی پوج ءُ ریسکیو ءِ باسک وئیل جاہ ءَ سر بیتگ انت ءُ دمگ اش انگیر کتگ-

واکدارانی گوشگ اِنت وئیل ءَ دو مردم زدگ بیتگ اَنت کہ آ درمان کنگ ءَ نزیکیں ھسپتال ءَ رسینگ بیتگ اَنت ءُ پورسز تراک جاہ ءَ چار ءُ ٹپاسگ ءَ انت-

جنگ ءِ بْراہ

نبشتہ کار: شکّل بلوچ

دی بلوچستان پوسٹ

بے ربیتی جنگ unconventional warfare ءِ سر ءَ چہ “ربیتی جنگ ءَ ابید دگہ پوجی ءُ نیم پوجی بُروبرین ءِ رد ءَ بیان کنگ بیت ءُ ایشی ءَ چہ چیریں تاگت یا اَملانی چوشکہ بربادی، ڈائیورژن، سبوتاژ، جاسوسی، بائیو وارفیئر، پابندیاں، پروپیگنڈا یا گوریلا جنگ ءِ کارمرز کنگ بیت۔ اے کار لس ھساب ءَ کنگ بیت۔ ربیتی جنگ ءِ تہ ءَ ھوار بوگ ءَ چہ بچگ ءِ ھاتر ءَ ءُ ھمے رنگ ءَ میان استمانی کنونشنز ءِ تہ ءَ ھوار بوگ ءَ چہ بچگ ءِ ھاتر ءَ۔

ربیتی جنگ conventional warfar ءِ یک دروشمے کہ دو یا گیش ریاستانی نیام ءَ روایتی سلاہ ءُ جنگی میدان ءِ رھبندانی کارمرز کنگ ءَ چہ پدریں مکابلہ ءَ کنگ بیت۔ ھر نیمگ ءِ لشکر شریں وڑے ءَ ٹھینگ بنت ءُ سلاھانی کارمرز کنگ ءَ جنگ کن انت کہ آ بُنکی رنگ ءَ نہ منّگ ءِ پوج ءَ نشانگ جوڑ کن انت۔ اے لس ھساب ءَ ربیتی سلاھانی کارمرز کنگ ءَ جنگ بیت، نہ کہ کیمیائی، بائیولوجیکل، ریڈیولوجیکل، یا ایٹمی سلاھانی کارمرز کنگ ءَ۔

ربیتی جنگ ءِ لسی مکسد نہ منّگ ءِ پوج ءَ نزور یا تباہ کنگ اِنت کہ ربیتی جنگ ءَ گوں بندوک بوگ ءِ توانائی ءَ نہ منّ کنت۔ بلے سر کشّی ءِ زور دیگ ءَ یک یا دوئیں نیمگ ءَ گُڈسر ءَ بے ربیتی جنگی رھبندانی سر ءَ زور دات کنت۔

چیریں بُرّوبرین covert opetation یا چیریں بْرین undercover operation یک پوجی یا پولیس بْرین انت کہ ایشی ءِ تہ ءَ چیریں باسک یا لشکر ھوار انت کہ آ یک گمان ءِ پوشاک ءِ چیر ءَ کار کن انت دانکہ ذمہ وار ءِ پَجّار ءِ شموشگ بہ بیت –

یاگی (چہ لاطینی ءَ subvertere ‘آورتھرو’) یک انچیں اَملے ءَ گشگ بیت کہ ایشی ءِ وسیلہ ءَ جاہ ءِ تہ ءَ یک نزامے ءِ کدر ءُ رھبند ءِ سر ءَ جنگ یا پْروش کنگ ءِ جھد ءَ چہ جوڑ بوتگیں چاگردی رھبند ءُ آئی ءِ مزن تاگت، اتھارٹی، ربیت، درجہ بندی ءِ جوڑشت ءِ سر ءَ رزاکاری کنگ ءِ جھد کنگ بیت۔ چاگردی رھبندانی سر ءَ نبشتہ کنت۔ رزاکاری ءَ را راج ءِ اُمیت ءِ سر ءَ اُرش ءِ دروشم ءَ بیان کنگ بیت ءُ، ” اڑاند ءِ دیم ءَ اوشتگ ءِ ارادہ یکجاھیں سیاسی ءُ چاگردی یا مچانکی ، وپاداری ءِ پیداوار انت کہ آ لس ھساب ءَ راجی نشاناں گوں بندوک انت۔ دزگٹی ءِ پد ءَ، ءُ سیاسی ءُ ریاست ءِ چاگردی ادارھاں، اے سرپدی چہ یکے دومی ءَ جتا کنگ ءُ زوراک ءِ سیاسی یا لیکھانی سبب ءَ دیم دیگ بوت کن اَنت.

رزاکار سیاسی مول ءُ مراد ءِ رسگ ءِ وسیلہ ءِ رد ءَ کارمرز کنگ بیت پرچا کہ اے لس ھساب ءَ پچیں جنگولی ءِ ھلاپ ءَ کمیں نہ تُرسی، ھرچ ءُ درچ ءُ مشکل ءِ سر ءَ کار کنت۔ دیمتر ءَ اے جنگ ءِ یک ھساب ءَ ارزانیں دروشمے کہ ایشی ءِ واست ءَ مزنیں کساسے ءَ سر ءُ سوج ءِ زلورت نہ اِنت۔ کسے کہ کارکنوکانی لھتیں تَھر ءِ ھُنر ءَ وتی سر ءَ زرتگ۔ اے درگت ءَ “رزاکار” ءَ برے برے ھکومت ءِ سرکار ءِ ھوالہ ءَ (ءُ گیشتر آئی ءِ نیمگ ءَ) “راجدرو” گشگ بیت۔ بربادی ھم باز براں وشکند کار، ازمکار ءُ ھما کارانی تہ ءَ مردمانی مول ءُ مراد اِنت۔

اے جاور ءَ کارکنوک بوگ ءِ بزانت جست ءُ پرس کنگ، مسکرا کنگ ءُ لس ھساب ءَ جوڑ بوتگیں رھبند ءِ ھراب کنگ بوت کنت. ناشرکاریں گل لس ھساب ءَ وتی مول ءُ مراد ءِ سرجم کنگ ءِ وسیلہ ءِ رد ءَ بربادی ءَ کارمرز نہ کن اَنت۔کارکنوک یک مردمی توان ءِ سر ءَ کار کنوکیں رھبندے ءُ بازیں گلاں رزاکار ءِ کارانی کنگ ءِ ھاتر ءَ مردمی توان ءُ سیاسی ءُ چاگردی سیادی ءِ کمی اِنت۔

انچوش کہ ناشرکارانی کتگیں کارانی سبب ءَ چاگرد ءِ سر ءَ ھرابکاری ءِ سان کپت کنت۔ ھرابکاری ءِ بزانت ایش بوت کنت کہ اے وڑیں بدلی آرگ ءِ ھاتر ءَ شِر، بے ایمان، مالی یا زوراکی ءِ رھبندانی کارمرز کنگ بہ بیت۔ اے گپ زھرشان، سیاسی نزام ءِ تہ ءَ ربیتی وسیلہ ءِ وسیلہ ءَ بدلی آرگ ءِ ھاتر ءَ کار کنگ ءِ بگیر ءَ اِنت۔ دیمتر ءَ، درائیں بربادی ھما جاہ اِنت کہ، “تجاوز کنوکیں ریاست ءِ جھد اِنت کہ آ بومی سیاسی ءُ پوجی کارستاں بھرتی ءُ کمک بہ کنت کہ آ وتی سرکار ءَ کودت ءِ وسیلہ ءَ چہ ھلاس بہ کن اَنت”۔

اگاں ھرابکاری کودت ءِ آرگ ءِ وتی مول ءُ مراد ءَ ناکام بہ بیت گڑا اے ممکن اِنت کہ ھرابکاری ءِ گل ءِ اداکار ءُ کارروائی شورش، شورش ءُ / یا گوریلا جنگ ءِ نیمگ ءَ رھادگ بوت کن اَنت۔

اے گال لاتینی بُن ھشت ءِ دراھیں زباناں ھوار اِنت ءُ بُن ھشت ءَ شھر ءِ پوجی پْروش ءِ وڑیں جاورانی سر ءَ کارمرد بیت۔ ۱۵ کرن ءِ بندات ءَ ، اے گپ انگریزی زبان ءَ گوں کانودانی ھوالہ ءَ کارمرز کنگ بوتگ ات ، ءُ ۱۵ کرن ءَ دائرہ ءِ ھوالہ ءَ کارمرز کنگ بوتگ ات ۔ اے مانا ءَ چہ ‘پلینڈی’ ءَ ناجائزیں سرچست ءِ نام ءِ بستار ءَ وتی جاہ گپتگ، اگاں کہ اے دوئیں گالانی بزانت ءِ بدل ءَ جتا اَنت پلینڈی ادارھانی سر ءَ پدریں اُرشانی سوج دیگ، یاگی باز گیشتر رازداریں چیزے، چوش کہ جاور ءِ سر ءَ باور ءِ بنیاد ءَ گار کنگ یا مردماں یکے دومی ءِ ھلاپ ءَ ایر کنگ۔

یاکی وتی سرکار ءِ ھلاپ ءَ زوراکیں یاگی اِنت۔ سرکش ھما مردم اِنت کہ سرکشی ءَ گوں بندوک اِنت۔ باگی گل یک سمائی ھمگرنچیں گلے کہ یک سرجمیں ریاست یا ریاست ءِ یک بھرے ءِ سر ءَ سیاسی دزمھار ءِ ہاتر پ جھد کنت۔

شورش یک زوراکیں ءُ سلاہ بندیں شورشے کہ کسانیں ءُ سستیں سلاہ بندیں ٹولیانی نیمگ ءَ کنگ بیت کہ آ مزنیں مزنیں ھکومت ءِ ھلاپ ءَ گوریلا جنگ ءِ کار ءَ کن اَنت۔ شورش ءِ (کلیدی توصیفی) لیکہ آئی ءِ بے متناسبیں دروشم اِنت: چہ کسانیں بے رھبندیں تاگتاں مزنیں، جوانیں سامان ءُ بلکل پوجی تاگت ءِ ریاستی دژمن ءِ دیمپان اِنت-

اے ناھمگامی ءِ سوب ءَ ناشرکار مزنیں کچے ءَ دیم پہ دیمیں جنگاں چہ رکّ اَنت ءُ ایشی ءِ بدل ءَ شھری آبادی ءَ گوں ھوار بوگ ءِ راہ ءَ گچین کن اَنت (گیشتر میتگ ءِ دمگاں) کہ آ کم کم ءَ دمگی دزمھار ءُ پوجی تاگتاں گیش کن اَنت۔ شورش کدی ھلکی آبادی ءِ دزمھار ءُ کمک ءِ سر ءَ بندوک اِنت۔

گوریلا جنگ بے ربیتی جنگ ءِ یک دروشمے کہ ایشی ءِ تہ ءَ بے رھبندیں پوجی ءِ کسانیں گل، چوشکہ سرمچار، پارٹی، نیم پوجی دوزواہ یا بھرتی بوتگیں زھگاں ھوار سلاہ بندیں شھری، کمین، رزاکاری، ارش، کسانیں جنگ یا ھٹ اینڈ رن ءِ پندلاں کارمرز کن اَنت۔ یک سرکشی یے، یک زوراکیں جنگے ءِ تہ ءَ، جنگ ءِ تہ ءَ یا سول وار ءِ تہ ءَ پہ بلکل پوجی، پولیس یا رکیبیں شورشی لشکر ءِ ھلاپ ءَ جنگ کنگ ءِ ھاتر ءَ اِنت۔

اگر “گوریلا جنگ” ءِ لیکہ 19 نودھمی کرن ءَ جزیرہ نما جنگ ءَ جوڑ کنگ بوتگ ۔ بلے گوریلا جنگ ءِ تکنیکی رھبند بازیں وھدے ءَ چہ کارمرز بوگ ءَ انت۔ ششمی کرن ءَ سَن زو ءَ ’’دی آرٹ آپ وار» ءِ تہ ءَ گوریلا ترز ءِ رِپک ءِ کارمرز کنگ ءِ سوج داتگ۔ 3 سیمی کرن رومن جنرل کوئنٹس پیبیوس میکسیمس ویروکوسس ءَ ھم گوریلا جنگ ءِ بازیں رپکانی جوڑشت ءِ کریڈٹ دیگ بیت کہ مرچی پیبیئن ءِ شوربندی گشگ بیت۔

گوریلا جنگ راجدپتر ءِ تہ ءَ جتا جتائیں ٹولیانی نیمگ ءَ کارمرز کنگ بوتگ ءُ اے جنگ ھاس آشوبی جُنز اُرشانی یا کبزہ گیر لشکر ءِ ھلاپ ءَ راجی گھگیری ءَ گوں بندوک اِنت۔

گوریلا ءِ رھبند دژمن ءِ لشکراں گوں سر ءُ چیریں دیم پہ دیم بوگ ءَ چہ بچگ ءِ سر ءَ دلگوش دنت ، گیشتر کمتریں سلاہ یا لشکر ءِ سبب ءَ ، ءُ ایشی ءِ بدل ءَ دژمناں تچ ءُ تاگ کنگ ءُ آیاں چہ وتی دیم ءَ کشگ ءِ ھاتر ءَ مجبور کنگ ءِ مول ءُ مراد ءَ گوں لُکّیں اُرش ھوار بیت ( کش ءُ گور ءِ جنگ ءَ ھم بچار اِت)۔ یکمُشتی گوریلا لشکر ءِ سر ءَ باز براں یا کہ دمگی آبادی یا درملکی یمک کنوکیں مردمانی کمک ءِ سر ءَ وازمندگ اَنت کہ آ گوریلا گروپ ءِ جھد ءَ گوں ھمدردی کن انت۔

گوریلا جنگ ءِ مستریں شوربندی ءُ تکنیک ءِ تہ ءَ یک مزنیں ءُ بے وسیں تاگت ءِ ھلاپ ءَ کسانیں اُرشاں گوں بندوک اِنت، موٹل ءِ کارمرز کنگ ءِ جھد کنگ بیت۔ گوریلہ ءِ تاگت گیشتر یا سرجم ءَ کسانیں یونٹانی تہ ءَ یکجاہ کنگ بیت کہ آ دمگی آبادی ءِ کمک ءِ سر ءَ بندوک انت۔ تکنیکی ھساب ءَ گوریلا لشکر وتی کشوکاں کم چہ کم دارگ ءُ دژمن ءِ سر ءَ یک مدامیں نزور کنوکیں زور ءِ ایر کنگ ءِ مول ءُ مراد ءَ چہ دژمن ءِ چکمک ءِ بُنجاہ ءَ دور بار بار ءِ اُرشاں کنت۔ اے دژمن ءَ را یک بے رھمے، بے ھسان تباہ کنوکیں رد اَمل ءِ تہ ءَ زھرشانی کنت کہ آ وتی کمک کنوکاں نارزا کنت ءُ گوریلا ءِ کمک ءَ گیش کنت، گڈسر ءَ دژمن ءَ را چہ وتی دیم ءَ کشگ ءَ مجبور کنت۔ اے گپ ءِ نامداریں دروراں چہ یکے آئرش ءِ آجوئی ءِ جنگ ءِ وھد ءَ بوتگ۔ آئرش ریپبلکن آرمی ءِ سروک مائیکل کولنز ءَ اے پندل ءَ برتانیہ ءِ اسکواڈ در کنگ ءِ ھاتر ءَ باز براں کارمرز کتگ ات۔

ریاستی پدگرد

ٹی بی پی شونگال

بلوچستان ءَ وھدیکہ آجوئی ءِ واستا پرکاریں سلاہ بندیں گل پاکستان ءِ لشکری یا واپاریاں نشانگ کن اَنت، پاکستان ءِ کانون داروکیں ادارہ پدگرد ءَ زورانسری بیگواھیں مردماں دروگیں دیم پہ دیمی جنگ ءَ ابید ءِ آمیدگسی پرمان ءَ کُش اَنت ءُ آیاں جنگول گوش اَنت- بلوچستان ءَ بازیں وئیل بیتگ اَنت کہ وھدیکہ ریاستی ادارھانی دست ءَ پیسر ءَ دزگیریں مردم، کہ آ آمیدگساں پیش کنگ بیتگ اَنت ءُ آ پرزی پولیس ءُ پوج ءِ گون ءَ دیم پہ دیمی جنگ ءَ کُشگ بنت اِنت-

بیست ءُ شش اگست ءِ شپ ءَ بلوچ لبریشن آرمی ءِ آپریشن ھیروپ ءِ پدگرد ءَ ریاستی ادارہ ھمک وھدی دودمان ءِ پیسر ءَ چہ زورانسری بیگواھیں بلوچاں جنگول گوشتگ ءُ ابید آمیدگسی پرمان ءَ کُشگ ءُ آیانی لاشاں ویرانگاں چگل دیگ – نَھ زورانسری آوار جنگ بیتگیں مردم کُشگ بیتگ اَنت کہ ایشانی توک ءَ چار مردم فیاض جتک،نعیم اھمد ، سعید میرا جی ءُ نسار اھمد ءِ ناماں پجار بیتگ اَنت کہ ایشانی کیسز وائس آف بلوچ مسنگ پرسنز ءِ گور ءَ جاڑیگ اَنت ءُ پولیس ءَ را ھم ایشانی بیگواھی ءِ بارو ءَ اھوال دیگ بیتگ اَنت-

پاکستان ءِ سروزیر شھباز شریف ءُ وزیر داکلہ مھسن نکوی ءِ گوشگ اِنت “ بلوچستان ءِ جیڑہ یک ایس ایچ اوے ءِ جنگ اِنت” ایشی ءَ تچک بیت اِنت ریاستی زورا دستیں تاکتانی جھگیری کنوکیں سیاستکار بلوچستان ءِ راستیں بنریشگ ءَ نابلد اَنت ءُ پاکستان ءِ زورادستیں تاکت آپریشن ھیروپ ءَ پد ھم بلوچ جیڑہ ءَ سنجیدگی ءَ زورگ ءَ ابید ھما پالیسیاں کنگ ءَ اَنت چریشی ءِ سبب ءَ بلوچستان مروچی ھم ریاستی ادارھانی واستا یک پُر وابی یے جوڑ بیتگ-

زورانسری بیگواھیں مردماں کشگ ءَ چہ بلوچ انسرجنسی ءِ ھلاسی ناسرجم انت بلے اے پالیسیاں چہ بلوچ راج ءُ ریاستِ پاکستان ءِ میان ءَ دوری ودی بنت انت – وھدیکہ پرایمنیں سیاست ءِ پاد برگ بنت اِنت، سیاسی رھشون گدار گوشگ بنت اِنت ءُ زورانسری آوار جنگ بیتگیں مردم ابید آمیدگسی پرمان ءَ کش ءُ کوش برجاہ بیت اِنت گڑا بلوچ ورنایانی گور ءَ بس سلاہ بندیں گھگیری ءَ ابید دگہ راہ پشت نہ کپ ایت –

پاکستان ءِ سیاستکار ٹاہ دے اَنت کہ آ بلوچ جیڑہ ءَ گپ ءُ تران ءِ رنگ ءَ گیشنگ ءِ منوک اَنت بلے گیش ءُ گیواری ءِ ھچ سان نیست انت ءُ بلوچستان ءَ ریاست ءِ پالیسیاں ردوکیں جاورھال تچک اَنت بلوچ ورنا سلاہ بندیں جنگ ءِ دروشم ءَ اَچ پاکستان ءَ آجوئی ءِ شاہ برز بوان اِنت چریشی ءَ چہ آیوکیں وھداں جَنگ ءِ آجوئی ءَ بلوچ ورنایانی روگ گیش بیت اِنت ءُ جنگ ءِ توک ءَ ترندی کیت اِنت-

روکپتی بلوچستان ءِ دمگ ایرانشھر ءَ ایرانی لشکر ءَ یک مردمے آوار جنگ ءَ پد بیگواہ کتگ-

گیشیں اھوالانی رد ءَ پشمبے ءِ روچ ءَ ایرانی لشکر ءَ ایرانشھر ءَ یک مردمے آوار جنگ ءَ پد بیگواہ کتگ-

آوار جنگ بیتگیں مردم ءِ پجار عارف شاہ بخش ء اکبر جھمنند بید تپتان ءِ نام ءَ زانگ بیتگ –

اھولانی رد ءَ عارف پشمبے ءِ روچ ءَ ایرانشھر ءَ ایران ءِ چیرین ادارھاں ابید ءِ جرم ءَ دزگیر کتگ ءُ برتگ-

دگہ یک اھوالے ءِ رد ءَ آوار جنگ بیتگیں عارف ایرانی لشکر ءَ پد ءَ روکپتی بلوچستان ءِ بنجاھی شھر زاھدان ءَ دیم ءَ آورتگ ءُ بندیگ کتگ-

روکپتی بلوچستان ءِ دمگ کھنوج ءَ ایرانی پولیس ءَ نشہ واپاری ءِ بھتام ءَ یک گاڑی یے سر ءَ تیرگواری کتگ ءُ چریشی ءَ چہ یک مردمے بیران بیتگ –

وئیل ناصر کھنوج ءَ پیش اتکگ کہ اود ءَ پولیس ءِ تیرگواری ءَ نوید فولادی نامین مردمے بیران بیتگ –

اھوالانی رد ءَ کھنوج ءَ ایرانی پولیس ءَ نشہ واپاری ءِ بھتام ءَ گاڑی ءِ سر ءَ تیرگواری کتگ ءُ اود ءَ گاڑی ءِ ھلائینوک نوید بیران ءُ آئی ءِ دگہ ھمراھے پہ سلامتی ءَ تچگ ءَ سوبین بیتگ-

وئیل ءِ درگت ءَ لس اھوالانی رد ءَ دگہ نشہ واپاری ءِ بھتام راست نہ بیتگ اَنت-

بلوچستان ءِ جتاجتائیں دمگاں تیرگواری ، وتکشی ءُ دگہ وئیلانی آسر ءَ چار مردم بیران بیتگ اَنت-

گیشیں ھالانی رِد ءَ بلوچستان ءِ دمگ ھرنائی شھر ءُ وت ماں وتی جیڑھے ءِ سر ءَ تیرگواری ءَ چہ یک مردمے بیران وھدے کہ میاربار تچگ ءَ سوبمند بیتگ-

پولیس رِد ءَ وئیل ءَ ناکوزتک ءَ تیرگواری کتگ وتی ناکوزتک کشتگ، کُشگ بیتگین ءَ چیزے سال ءَ ساری وتی ناکوزتک تیرگواری کتگ کشتگ-

تیرگواری ءَ پد میاربار تتکگ پولیس ءَ دمگی ھیڈکواٹر ھسپتال ءَ برتگ-

دومی نیمگ ءَ دکی ءِ ھند انمبار کور ءَ گاڑی ءَ ھوار بکتگیں عبدالقادر ناصر نامیں مردمے ءِ لاش کور ءَ چہ در کتگ، ریسکیو واکدار ءَ لاش دستیگ کتگ نادُراھجاہ ءَ برتگ اود ءَ پہ چار ءُ ٹپاس ءَ پد لاش لورالائی ءَ دیم داتگ-

لیویز رد ءَ مھمکہ بی اینڈ آر ءِ گوستگیں سپرنٹنڈنٹ ابدالقادر ناصر گاڑی ءَ ھوار ءَ کور آپ ءَ برتگ کہ اود ءَ آئی ءِ لاش دزکپتگ-

ھمے وڑ شاھرگ اشکر کھن ءَ ٹرالی ءِ ساد سدگ ءَ چہ ھزرت علی ء حاجی سمت اللہ ٹک کاکڑ جھمنند توبہ اچکزئی بیران بیتگ، پہ گیشیں چار ءُ ٹپاس ءُ پد لاش کھول ءِ دست ءَ داتگ-

ھمے وڑ بلوچستان ءِ دمگ لورالائی ءَ شانزدہ سالی ئیں ورنایے ءَ گُٹ ءَ ساد مان کتگ وتکشی کتگ-

گیشیں ھالانی رِد ءَ لورالائی ءِ دمگ ڈیرہ دگ کلی مرتت ءَ شانزدہ سالی ئیں ورنایے ارباز خان ء محمد ھاشم ءَ گُٹ ءَ ساد مان کتگ وتکشی کتگ-

وتکشی کنوکیں ورنا ءِ لاش ءَ زوت نادُراھجاہ ءَ برگ بیتگ کہ اود ءَ پہ گیشیں چار ءُ ٹپاس ءَ پد لاش کھول ءِ دست ءَ داتگ-

بلے وتکشی ءِ سبب انگت زانگ نہ بیتگ اَنت گیشیں پٹ پول ءَ پولیس کنگ ءَ اِنت-

چہ نوشکی ءَ زورانسری آوار جنی ءِ نشانگ بیتگیں آصف ءُ رشید ءِ یل نہ نہ بیگ ءِ ھلاپ ءَ شال ءَ زھرشانی کنگ بیتگ-

شش سال ءَ ساری چہ نوشکی پاکستانی پوج ءِ دست ءَ آوار جنگ ءَ پد زورانسری آوار جنی ءِ نشانگ کنگ بیتگیں بلوچستان ءِ دمگ چہ ھُزدار ءَ سیادی داروکیں وت ماں وت آصف بلوچ ءُ رشید بلوچ ءِ یل نہ کنگ ءِ ھلاپ ءَ شال ءَ زھرشانی کنگ بیتگ ءُ روانک کشگ بیتگ-

زورانسری بیگواہ آصف ءُ رشید ءِ کھول نیمگ ءَ برجم دارگ بیتگیں اے زھرشانی ئیں روانک ءَ سیاسی، چاگردی گلانی راھشوناں ھوار مزنیں کچے ءَ مردماں بھر زرتگ-

روانک ءَ ھواریں مردماں اے درگت ءَ شال پریس کلب ءَ چہ روانک کش اِتگ جتاجتائیں شھدگاں چہ روان واتری ءَ شال پریس کلب ءَ سر بیتگ کہ اود ءَ روانک ءَ ھواریں مردمانی گوم ءَ تران کتگ-

ھمے درگت ءَ آصف ءُ رشید بلوچ ءِ گھار سائرہ بلوچ ءَ گْوشتگ کہ مروچی پد ءَ سی یک اگست ءِ روچ اَتکگ ءُ منی براتانی زورانسری بیگواھی ءَ دگہ یک سالے گیش بیتگ شش سالاں چہ ھر جاہ ءَ وتی براتانی بے میاری ءِ منّانک داتگ آمیدگساں، کمیشنانی روگ آیگ بلے مارا انساپ نہ رس اِتگ یک کھولے ریاست شش سالاں چہ مچی گم ءُ رنج دیگ ءَ اِنت-

آئی ءَ گْوشتگ کہ من اے ریاست ءُ جُست کنگ لوٹ آں منی براتاں چُشیں کجام میارباری یے کتگ کہ شش شال ءِ گوزگاں پد ھم آیانی میار پدر کنگ نہ بیتگ منی براتانی دزگیری ھم پیشداشتگ بلے شش سال ءِ گوزگ ءَ پد ھم مارا گوشگ بیگ ءَ نہ اِنت کہ آ کجام آزارجاھاں بندیگ اَنت-

سائرہ بلوچ ءَ اے درگت ءَ تران کنان ءَ گوشتگ کہ گوستگیں شش سالاں چہ ریاست نیمگ ءَ چہ جوڑ کنگ بیتگیں کمیٹی ءُ آمیدگس ءَ روگ ءُ آیگ ءَ آں انساپ دیگ جاگہ آمیدگس ءُ کمیشن ءَ نشتگیں ریاستی کارمند مارا گیش دلسیاہ کنگ ءَ اَنت-

آئی ءَ لوٹ کتگ کہ اگاں منی برات ءُ تروزتک سر ءَ ریاست کجام وڑیں بھتامے ھست گُڑا آئی ءَ آمیدگس ءَ پیش بہ کن اَنت “فری ٹرائل ” موہ بدے اَنت اگاں کجام وڑیں میاری باری یے پدر بیت گُڑا سزا بدے اَنت اگاں گُڑا آیاں یل بہ کن اَنت-

ھمے درگت ءَ وائس فار بلوچ مسنگ پرسنز ءِ چیئرمین نصراللہ بلوچ ءَ گْوشتگ کہ ھمکروچ زورانسری آوار جنی ءِ تہ ءَ گیشی آیگ ءَ اِنت بلے ریاست ءِ زمہ وار جُست کن اَنت بلوچستان ءِ جیڑہ چی اِنت اگاں اینچو سالاں آیاں بلوچستان ءِ جیڑہ ءَ سرپد بیگ ءَ نہ اَنت گُڑا آ چتو اے جیڑہ ءِ گیشنگ ءَ سنجیدگ اَنت-

پشتون تحفظ مومنٹ بلوچستان ءِ راھشون زبیر شاہ ءَ گوشتگ بلوچستان یک کوشجاھے جوڑ بیتگ اد ءَ ھمکروچ لاش دزکپ اَنت ءُ بیگواھیں مردمانی کھول اے درد ءُ رنجانی تہ ءَ دوچار بنت کہ چو مہ بیت اے لاش آئی ءِ بیگواھیں مردم ئیگ اِنت گُڑا اناں ءُ نو اے ھمکروچ ھساب ءَ جوڑ بیتگ چریشی ءِ ھلاپ ءَ پشتون تحفظ مومنٹ بلوچ برات ءُ گھارانی ھمکوپگی ءَ اوشتگ-

شال روانک ءَ چہ بلوچستان ءَ بیگواھیں دگہ مردمانی کھول ھم ھوار بیتگ اَنت آیاں وتی دوستناکانی یل کنائینگ لوٹ کتگ-

دیمتر ءَ آصف ءُ رشید بلوچ ءِ کھول نیمگ چہ آیانی یل نہ کنگ ءِ ھلاپ ءَ رسانکدر ءَ کیمپئن ھم برجم دارگ بیتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بیست نُھ ءِ بیگاہ ھپت ءَ سرمچاراں مستونگ ءِ دمگ تلخ کاوی ءَ برجاھیں بُنجل سر ءَ راکٹ لانچر ءُ دگہ نوکیں سلاھاں ءُ مزنیں سلاھاں چہ اُرش کتگ، راکٹ گولہ بُنجل ءِ تہ ءَ کپتگ چریشی ءَ پوج ءَ جانی مالی تاوان چست کنگ کپتگ-

جارکش ءَ گْوشتگ اُرش ءَ پد پوج ءَ مارٹر گولہ آس داتگ ءُ سر ءُ دیم تیرگواری کتگ بلے سرمچاراں پہ سلامتی وتی اوتاکاں سر بیتگ اَنت-

جارکش ءَ گْوشتگ وھدے کہ اے اُرش مروچی نیم روچ ءِ ساھت دو ءَ سرمچاراں ھاران بازار ءَ چیف چوک نزیک ءَ زورگریں پاکستانی پوج ءِ گاڑی دستی بمب اُرش ءُ نشانگ کتگ چریشی ءَ چہ دُژمنیں یک کارمندے مرتگ ءُ دو ٹپی کتگ اَنت-

جارکش ءَ گْوشتگ چہ وتی ابرماں لاچاری سسّائی پروش ءِ دیمپانی پوج ءِ کارمند سر ءُ دیم تیرگواری کتگ چریشی ءِ آسر ءَ نشانگ ءَ اَتکگیں دو راھگوز ٹپی بیتگ اَنت ءُ گاڑیاں ھم تاوان رس اِتگ-

جارکش ءَ گْوشتگ کہ بی ایل ایف بلوچستان ءِ ھرچ دمگاں وتی جوانیں جنگی رپکاں چہ پوج ءَ نشانگ کنگ ءَ اِنت چریشی ءِ سبب ءَ چہ پوج سک سسّائی نادُراھی ءُ تُرس آماچ اِنت چریشی ءِ سبب ءَ لَس مردمانی سر ءَ تیرگواری کنت وتی کینگ درشان کنت-

جارکش ءَ گوشتگ کہ بی ایل ایف اے دوئیں اُرشانی زمہ واری ءَ منّ اِیت ءُ پوج ءِ دراھگ ءَ تاں وتی اُرشاں برجاہ دار اِیت-

ھُون آماچیں دیار ءِ ماھل

نبشتہ کار: مھروان کمبر

دی بلوچستان پوسٹ

جنگ آماچیں دیاراں ھزاراں ھُون چکاریں کسہ ودی بنت، اے کسھانی ھزاراں کارست بنت ءُ داں کرناں اے کارستانی رِتکگیں ھُونانی سان چاگردے ءِ سر ءَ مان انت۔ پدائی ھمل مومن جاھے ءَ گُش اِیت “جِندندری ءِ کسّھانی دگہ کارستے دگہ رنگ ءُ دروشمے اناگہ ءَ سھرا بِیت ءُ پد ءَ مُجّتی نمیری ءِ ھنکین ءَ مئے زرد ءُ جبین ءِ پاھاراں زُبانے بکش اِیت” اِشک دگہ ھچّے نہ اِنت بس سرگنوکی یے۔

چونیں زیبائیں مردم اَنت کہ واب ساچ اَنت ءُ پد ءَ آگاھی ءِ نیام ءَ نند اَنت۔ وتی واباناں زمین ءِ باھوٹ کن انت، جِند ءِ ندر کنگ ارزانیں گپّے نہ اِنت، بلے اشک کہ اندر ءَ بہ سبز اِیت ءُ پگر ءُ لیکھی ءِ دامن ءَ سھرا بہ بیت اے اِشک باز جیڑگ پرمائیت ۔

اے جاوراں ھرّ چمّ ترا جیڑ اِیت ءُ ھر دل اے اِشک ءَ جاگہ ناں جاگھے ءَ دُچار کپ اِیت۔۔ اے اِشک ءِ سپر روچے ناں روچے وتی مانا ءَ پول اِیت۔ سَپر یکّ اِنت بس کارست مٹّ آن کن انت ، شاری ءِ اھد ءَ رُدوم زرتگیں زمین نو ھر زِرد کہ بے مارِشت نہ اِنت ترا جیڑ اِیت۔ تئی جند ندری ءِ ساھت ءُ گلامی ءِ نیام ءَ تپاوت ءِ لکیر ءَ جیڑ اِیت ءُ پد ءَ تئی راہ ءِ مساپر بِیت ۔” کوکارانی نیام ءَ رُستگیں کارست ءَ زانت کہ اے جاوراں من ءَ چے کنگی اِنت ؟

چوناھا ھر مردم ءَ وت ءَ یک تبے ھَست آ ھمے تب ءِ سند ءُ بندیں موسمانی تہ ءَ زند گوازینگ ءَ اِنت، کے ءَ کُجا روگی اِنت؟ کے ءَ چے کنگی اِنت؟ کے ءَ کُجا ءُ چون مِرگی اِنت؟ کس زانت نہ کنت، لَھتیں ھَست کہ آ وتی وابانی ھمراھی ءَ زندگ بوگ لوٹ انت، لَھتیں ھَست کہ آ وتی ھَستی ءَ آجو کنگ لوٹ انت، آ بِھ نہ مِر اَنت بلکیں مدام زندگ بنت اَنچو کہ جوز مارتی گُش ایت” مِرگ ءَ ھر کس مِر ایت بلے ھما کس ءَ کہ ھما جاہ ءَ مِرگی اِنت ءُ ھما جاہ ءَ بہ مِر اِیت آ کدی ھم نہ مِر اِیت بلکیں داں اَبد زندگ مان ایت”

‏‎راجی مکسدانی ھاتر ءَ جُھد کنوکیں مردم اے گپ ءَ شر تر زان انت کہ زُلم ءِ دیم ءَ توار چِست کنگ مَرگ ءِ داوت دیگ اِنت ءُ آسر مرگ انت بلے یک جُھدکارے اے گپ ءَ مان نیار ایت مرگ ءَ پہ وشیں دل امباز کنت۔

زار ءِ روس ءِ بِگیر ءَ یک جُھدکارے ءِ پاھو دیگ ءَ ساری ءَ ھمے گشگ بیت کہ لَھتیں ساھتاں پد تئی ساہ گرگ بیت اگاں تو زار ءِ بِگیر ءَ جُھد کنوکیں مردمانی سنگتی ءَ یل ءَ بہ کن ئے گُڑا تو پھل کنگ بہ ئے، بلے اے جُھدکارے ءِ پسّو ھمے بیت کہ ” منی مرگ منی سنگتاں گیشتر جزبگ دنت”

بلوچ راج مرچی ءَ شری ءَ سرپد انت کہ مارا کجام کشک گچین کنگی انت، چی ءَ کہ بلوچ گلزمین ءِ سر ءَ زورگیریں استان مروچی وتی زوراکی ءِ دراھیں سیمسران سر گْوز کنگ ءَ اِنت، گُڑا بلوچ پرچا وتی دستاں بدار اِیت ءُ بس ندارہ بچار ایت، بلوچ ءَ ھم اے ھک ھست کہ وتی گلزمین ءِ رکینگ ءَ گُڈّی سیمسراں سرگْوز بہ کنت۔

بلوچ راجی رھشون واجہ شھید گلام محمد جاھے گُش ایت ”مئے سنگتی گوں مرگ ءَ اِنت ” ھمے مرگ ءَ گوں سنگتی کنوکیں کامریڈاں چہ یکے ماھل اُرپ ء زلان کرد اَت۔

شھید گودی ماھل بلوچ پہ مڑاہ ءُ شان تُنّاپیں ڈگار ءِ موکگ ءَ وتی بچکند چکاریں زند ءَ سر گوز ایت ءُ کبزہ گیریں پاکستان ءُ آئی ءِ واجہ ءَ اے پیگام ءَ دنت کہ ما انگت ھَست ایں ما ترا وتی سرڈگار ءِ مال ءُ مڈّیانی دزگ ءُ برگ ءَ ھلو ھالو نیل ایں تو ستر زُوراکی بہ کن ئے بلے ما تئی دیم ءَ چو تمرد ءَ اوشتاتگ ایں ءُ انگت اُوشت ایں اے گُلزمین سنٹ نہ اِنت، ھزاراں مئے وڑیں بچ ءُ جنک تئی زُلمانی ھساب ءِ لوٹگ ءَ آیاں وتی سراں کپن بستگ تئی زُلمانی تھاریں شپ دائم نہ مان اَنت، آجوئی ءِ بام الم ءَ آسیت، داں جان ءِ ھونانی گُڈی ترمپ ءَ گوں تو جنگ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت