TBP Balochi

تاھیر پروڈکشن نیمگ ءَ بلوچی زبان ءِ ورنائیں گشندہ مبارک داد ءُ پری ظفر ءِ نوکتریں سوت “مھر ” بیست ءُ پنچ اکتوبر ءَ ماں تاھیر پروڈکشن ءِ آفیشل یوٹیوب چینل ءَ شنگ بوتگ – اے سوت ھردو گشندھاں جوانی وڑے ءَ گوشتگ ءُ مردم پہ گوشدارگ ءَ لاچار کُتگ انت –

تاھیر پروڈکشن ءِ نیمگ ءَ پیش ءَ شنگ بوتگیں “وش نہ بیت، نازیناں” پد مھر ءِ شنگ بوگ ءَ ماں چاگردی ترامجاہ فیس بُک، انسٹاگرام ءُ ٹک ٹوک ءَ ٹرینڈ ءَ بوتگ – زیمر ءِ گوشداروک مھر سوت ءِ توار ءُ کمپوزیشن ءِ ستاہ کنگ ءَ دم نہ بر انت – یکیں روچ ءِ تہ ءَ ھزاراں مردماں اے سوت چار اِتگ –

اے سوت ءِ شائر پزیر جی ایم انت ،ڈی او پی محراب خالد ءُ عبید جی ایم بلوچ ءَ ایشی ءِ کمپوزیشن کتگ –

اے سوت دو گشندہ مبارک داد ءُ پری ظفر ءَ گوں وتی وشیں توار ءَ الھان کُتگ کہ آیانی تہ ءَ مبارک داد تربت ھوشاپ ءِ جھمنند انت ءُ پری ظفر ءِ سیادی چہ پنجگور ءَ انت – زالبولیں گشندہ پری ظفر ءِ اے اولی سوت اِنت ءُ مبارک داد ءَ بیست ءَ گیش سوت گوشتگ انت کہ اسٹوڈیو ءَ ریکارڈ کنگ بوتگ انت –

تاھیر پروڈکشن بلوچستان ءِ جتا جتائیں ھند ءُ دمگانی وش تواریں گشندھاں پلیٹ فارم ءِ دیگ ءَ انت تانکہ بلوچی زیمر ءِ دیمروئی بہ بیت ءُ ورنائیں گشندہ وتی ازم ءَ زندگ داشت بہ کن انت – تاھیر پروڈکشن ءَ پہ وت ءَ کسانیں وھدے ءِ تہ ءَ بلوچی زیمر ءِ تہ ءَ نامے جوڑ کتگ –

تاھیر پروڈکشن ءَ چاگردی ترامجاہ ءَ وتی شنگ کرتگیں دزبندی ءِ تہ ءَ گوشتگ کہ تاھیر پروڈکشن وتی گانا ءُ سوتانی جوڑ کنگ ءَ باز جھد ءُ جپا کنت ءُ مئے جُھد مدام ھمیش اِنت کہ ما بلوچی زیمر ءَ جھان ءِ نوکیں رنگاں گوں بہ رنگیں ایں – ءُ پہ اے کار ءَ ما چیزے سنگت اِیں وتی وس ءُ واک ءَ کار کنگ ءَ ایں ۔ ما چہ وتی گوشداروک ءُ چاروک آں ھم ھمے اُمیت داریں کہ آ مئے کارانی پَلّامرزی ءَ کن انت –

آئی ءَ دیمتر ءَ نبشتگ کہ بلے لھتیں سنگت ءُ مردم تاھیر ءِ کُتگ ایں کاراں وتی آئی ڈی ءُ چینلاں شنگ کنگ ءَ انت چُش کہ اے کار در کانودی، دُزی ءُ جُرمے، بائد اِنت بلوچ نُو اے ھبر ءَ سرپد بہ باں کہ ڈیجیٹل زمانگ ءَ ھرچیز ءِ کانود ءُ راھبند گیش اتگ اَنت – اگاں کسے ھم مئے کاراں وتی چینل ءُ آئی ڈی آں دنت گُڑا مارا اے ھک ھست انت کہ ما آیاں رپورٹ بکن ایں ءُ چوناھا ھم اے امل مئے کارانی گوم ءَ نا انساپی یے بائد کہ ایر جنگ بہ بیت –

آئی ءَ گوشتگ کہ ما یک برے پد ءَ گوں درستاں دزبندی کن ایں کہ مئے ویڈیوز ءُ سوتاں چہ وتی تاکاں، چینل ءُ آئی ڈی آں چہ ڈلیٹ بکن انت – اگاں کسے دیگ لوٹ اِیت گڑا آ مئے سوتانی کسانیں بھرے گوں مئے چینل ءِ لنک ءِ ھمراھی ءَ شنگ بہ کنت گوں –

سوت ءِ گوشدارگ ءَ لنک ءَ دست بہ جن اِت

آئی سی سی کرکٹ ورلڈ کپ ءِ بیست ءُ پنچمی گوازی ماں بھارت ءَ ایم چناسوامی کرکٹ گوازی پٹ ءَ انگلینڈ ءُ سری لنکا ءِ میان ءَ کنگ بوتگ کہ سری لنکا ءَ دو وکٹانی تاوان ءَ گوازی کٹ اِتگ –

انگلینڈ ءُ سری لنکا ءِ میان ءَ بوتگیں گوازی ءَ انگلینڈ ءَ ٹاس کٹ اِتگ ءُ اولسر ءَ بیٹنگ کنگ ءِ شور کتگ کہ آئی ءَ سری لنکا ءِ دیم ءَ سِی ءُ سَے اوورانی تہ ءَ یکسد ءُ پنجاہ ءُ شش رن جوڑ کتگ ءُ دراہ آؤٹ بوتگ انت کہ سری لنکا ءَ اے ٹارگٹ بیست ءُ پنچمی اوور ءِ چارمی بال ءَ دو وکٹانی تاوان ءَ پروش اِتگ –

سری لنکا ءِ نیمگ ءَ پاتھم نسانکا ءَ 83 بالاں 77 رن سدیرا وکراما 54 بالاں 65 رن وھدیکہ کوشل مینڈس 11 ءُ کوشل پریرا 4 رن جوڑ کتگ انت –

انگلینڈ ءِ نیمگ ءَ اوپنر ءَ اتکگیں بیئرسٹو ءُ ڈیوڈ ملان بیست ءُ ھشت ءُ سِی رن جوڈ کتگ ءُ واتر بوتگ انت وھدیکہ بین سٹوکس گھتر بوتگ کہ آئی ءَ چِل ءُ سَے رن جوڑ کتگ – ایندگہ لیبی سری لنکا ءِ بالرانی دیم ءَ اوشتات نہ بوتگ انت –

سفر خان مری چاردہ سال ءَ ساری بیست شش اکتوبر 2009 ءِ ریاستی ادارھاں چہ شال ءَ زورانسری آوار جنی ءِ نشانگ کتگ-

سفر خان مری کھول رِد ءَ بیست شش اکتوبر 2009 ءَ سفر خان مری عارف گلی سریاب دگ شال ءَ سُھب ءِ وھد ءَ یک جوڑ کنوکیں ٹھیکے ءِ سر ءَ کار کنگ ءَ بیتگ کہ یک اسپیت ایں گاڑی ءِ پاکستانی چیریں ادارھانی کارندھاں آیاں آوار جتگ ءُ بیگواہ کتگ-

کھول ءَ گوشتگ کہ آ روچ ءَ بگر تاں مروچی سفر خان مری ءِ درگت ءَ آیانی کھول ھچ وڑیں سرپدی نہ رس اِتگ-

آیاں گْوشتگ کہ سفر خان مری ءِ پیرزالیں مات مرچی ھم وتی چُک ءِ ودار ءَ اِنت- سفر خان ءِ کھول ءَ سیاسی پارٹی ءُ انسانی ھکانی باسکاں گوں دزبندی کتگ کہ آ چاردہ سالاں چہ گیر کانودی آزارجاھاں بندی ئیں سفر خان مری ءِ یل کنائینگ ءِ ھاتر ءَ توار چست بکن اَنت-

روکپتی بلوچستان ءِ شھر بیرجند ءِ زندان ءَ دو بندیگیں بلوچاں ھوار پنچ کس پاھو دیگ بیتگ اَنت-

گیشیں اھوالانی رد ءَ نشہ باپاری ءِ بھتام ءَ ایرانی آمیدگس ءَ مروچی ماں بیرجند ءِ بندیگ جاہ ءَ دو بلوچاں ھوار پنچ کس پاھو داتگ اَنت-

پاھو دیگ بیتگیں مردمانی پجار عبدلبصید مھمدانی ء عبداللہ جھمنند درگیان زاھدان ءُ مھمد نبی شاھوزئی ء کجیر جھمنند شیر آباد زاھدان ءِ ناماں زانگ بیتگ اَنت-

ایشانی توک ءَ مھمد نبی گوستگیں سال ءَ سی ستمبر ءَ ماں زاھدان ءَ ایرانی لشکر ءِ تیرگواری ءَ بیران بیتگیں ھدا نور لجی یے ناکو اِنت-

آدگرانی پجار مھمد میرشاہ ءُ رضا شھرکی جھمنند حسین آباد زابل ءُ سیمی ءِ پجاع امید جوینی تربت جام ءِ نام ءَ زانگ بیتگ –

ھر پنچیں کس نشہ باپاری ءِ بھتام ءَ ایرانی آمیدگس ءَ پاھو داتگ اَنت-

بلوچ لبریشن فرنٹ ءِ جارکش میجر گوھرم بلوچ ءَ وتی شنگ کتگیں درشان ءَ گوشتگ بلوچ راجی زْرمبشت ءِ نام ءِ سر ءَ کامریڈ گل ءِ نام ءَ ھندی کاروباری مردماں زر گروکاں گوں بلوچ راجی زْرمبشت ءُ سرمچاراں ھچ وڑیں نزیکی نیست۔

بی ایل ایف ءِ جارکش ءَ گوشتگ اے ٹولی ءَ یک سالے بیت کہ دمگ ءِ تہ ءَ سلکاری ءُ مردمانی زَر گرگ ءَ اِنت۔ بلوچستان لبریشن پرنٹ ءَ اے ٹولی ءِ کارزوالیانی بابت ءَ پٹ ءُ پول کُرتگ ءُ اے آسر ءَ سر بیتگ کہ اے ٹولی بلوچ راجی زْرمبشت ءِ بگیری ءَ کار کنگ ءَ اِنت۔ سرمچار ءُ راجی زْرمبشت ءِ نام ءَ گوادر ءُ کش ءِ گْوراں کاروباری مردماں زر گرگ ءَ اِنت۔

آئی ءَ گوشتگ وھدے کہ مردماں زر نہ داتگ گڑا مردمانی لوگانی سر ءَ راکٹ جنگ بیتگ ءُ یک مردمے گوں چیرکُرتگیں شورھاں نشانگ کُرتگ اَت آ سَکا ٹپی بیتگ اَت کہ انگت درمان کنگ بیگ ءَ اِنت۔ بی ایل ایپ چوشیں مردمانی سر ءِ گرگ ءُ نشون کنگ ءَ مردمانی پلہ مرزی ءِ واھگدار اِنت۔ بایدیں کاروباری مردم چوشیں مردمانی دست ءَ لیبوک بیگ ءِ جاہ ءَ یکجاہ بہ بنت ءِ ایشانی دیم پہ دیمی ءَ بہ کن اَنت چے ءَ کہ اے مردم بلوچ چاگرد ءَ سِست ءُ سید کنگ ءُ پہ زورگریں لشکر ءَ آسان کنگ لوٹ اَنت۔

گوھرام بلوچ ءَ گوشتگ بی ایل ایف گوادر ءَ اے ٹولی ءِ چِست ءُ ایراں سرپد اِنت ءُ چہ نزیک ءَ اے چیزاں چارگ ءَ ایں۔اے چار ءُ ٹپاس ءِ تہ ءَ بازیں چاگرد دُژمنیں مردمانی سر ءَ گُمان کنگ بیگ ءَ اِنت کہ پیش ءَ بلوچ راجی زْرمبشت ءِ بگیری ءَ پاکستانی لشکر ءِ کمکار بیتگ اَنت۔ دمگ ءِ تہ ءَ چہ بلوچ راجی زْرمبشت ءَ تتکگیں مردمانی سر ءَ ھم مئے چم سک اَنت کہ آیانی بابت ءَ ھم مارا سرپدی رس اِتگ کہ آ بلوچ راج ءُ راجی زْرمبشت ءِ بگیری ءَ پاکستانی لشکر ءُ پہ ریاست ءِ سیتاں پُرکار اَنت۔چوشیں مردم کڈن کنگ بنت کہ زوت چہ چوشیں چست ءِ ایراں گستا بہ بنت۔ بلوچ سرمچار آیاں اے میارباریں چست ءُ ایرانی سر ءَ دیگ ءِ ھگدار اَنت ءُ آ گل ءِ اوپار ءَ آئی ءِ نزوری سرپد مہ بنت۔

آئی ءَ گوشتگ بلوچ راجی زْرمبشت بلوچ راج ءِ زْرمبشت اِنت۔پمشکا ھچ جاہ چوشیں شونداتے نیست کہ ھندی کاروباری مردم تُرسینگ ءُ زر گرگ بہ بنت ءُ نہ ھچبر چوشیں چیزے پکار بیتگ۔ مردمانی پلہ مرزی ءَ برجاھیں زْرمبشت چہ مردماں سندگ ءُ برجاہ دارگ نہ بیت ءُ ما چہ وتی چاگرد ءَ جتا بوت نہ کن ایں۔

آئی ءَ گوشتگ کامریڈ گل ءِ نام ءَ ریاست ءِ یک مھمکیں ٹولی یے وت ءَ گوں بلوچ راجی زْرمبشت ءَ بندوک کنگ ءِ بےسوبیں جُھدے کنگ ءَ اِنت۔مارا چہ پٹ ءُ پول ءَ ھمے سرپدی سر بیتگ کہ اے ٹولی ءِ ریاست ءِ مردم اَنت۔گوادر ءَ ایم آئی ءِ میجراُمر نامیں سروگانے ءَ ھوار سروگانانی یک ٹولی یے ایشانی سروکی ءَ کنگ ءَ اِنت۔ اے ٹولی ءَ داں انوں مردم تُرسینتگ اَنت ءُ کروڈانی کَچ ءَ مردم زر گِپتگ اَنت۔ ایم آئی ءِ ھمراھداری ءِ سْوب ءَ مردمانی بابت ءَ سرپد بیت ءُ بے تُرس ءَ چاگردی رسانکدر ءَ کارمرد کنگ ءُ مردماں تُرسینگ ءَ اِنت۔

گوھرام بلوچ ءَ گوشتگ کاروباری مردم وت ءَ چہ ریاست ءِ پندل ءُ سلیں لشکریانی ھیلھانی پھزگ ءَ ھم پَت بہ بنت راجی زانت ءُ زانگ ءَ مھکم بہ کن اَنت۔ چوشکہ دمگ ءَ سلکاریں مردم کاروبار ءِ تہ ءَ آھگ ءَ اَنت اے چیز پہ راج ءَ وشیں گپے نہ اِنت۔پہ زر ءَ راجدروھیں مردمانی گِر ءُ دار کنگ ءِ زمہ واری چاگردی ادارھانی کار اِنت ءُ اے زمہ ھندی مردماں زورگی اِنت۔کاروباری مردم ایوک ءَ پہ زر ءُ مال ءِ مُچ کنگ ءَ زور مہ دے اَنت بلکیں پہ وتی چاگرد ءِ دیمروئی ءُ راج ءِ ھم پَت کنگ ءَ وتی کِرد ءَ پیلو بہ کن اَنت۔ بلوچ کاروباری مردم چنچو کہ بوت کنت چہ لشکر ءُ آئی ءِ کمکاراں وت ءَ گستا بہ کن اَنت۔وتگڑیں کامریڈ گل ءَ انچوک توان نیست کہ یک راجے ءِ دیم پہ دیمی ءَ کُرت بہ کنت۔

آئی ءَ گوشتگ بی ایل ایف سدکی دنت کہ دُرسیں چاگرد دژمنیں مردم ءُ زورگرانی بگیری ءَ یکیں وڑ ءَ اوشت ایت ءُ راج ءَ ایوک ءَ یل نہ کنت اِنت ۔

دیرو ءِ سیاست

نبشتہ کار : درویش بزدار

دی بلوچستان پوسٹ

دیروے سیاست چھے ءَ بے سوب ایں ! بے سوب سیاست چھ ایں؟ کِثا فیکٹرز سیاست بے سوب کھنا؟ تھا وھد تھو بے سوبین سیاست پھلوا وتی گام زیرے؟

” گول ءِ دائرہ “

ہما وھدا کہ تھو ہمے مارینے کہ تھو وتی گام دیمروئ پھلوا زیرگ آ اۓ بلے کھمے وھد آ رندا تھو ہمے مارینے کہ تھو ہما جاگہ شے بندات کھثے دوبرا تھو ہما جاگہ سر بیغے و وتی منزل آ نزیک بیغے نہ اے، نی بزانکہ تھئ ہما گام کہ تھو زڑتھا ہمائ نیامہ تھرا بدلی آرگ لوٹھیث، اگاں تھو نی انا سرا اوشتاتغے کہ نہ مئ گام شر انت ءُ من ہمے وڑا منزل آ سر بِبا، بزانکہ ہمے تھئ انا ءُ ضد تھرا بے سوبی پھلوا باڑتھ. بزانکہ کہ یک “گول ءِ دائرہ” ایں ہمے دائرہ یک جاگہ تھو اوشتاتغے ءُ ہمے دائرہ شے کھمے چھپ تھئ منزل اۓ کہ تھو سر بیغ لوٹھے. نی تھو وتی منزل پھلوا روان بیغ وسطہ یک گام زوڑتھا ءُ تھو ہمے دائرہ نیم پند جثہ ، نی تھو منزل ہم کھمو نزیک آتکغے، بلے ہمے راہ نیامہ ابید کہ تھو وتی نیامہ بدلی آرگ اے تھو وتار ہما اولیغے وڑا داشتگ نہ کہ تھو وتار وھد ءُ حالات نی مطابق بدل کنگ کوشست کُثا، نی بزانکہ اے ہما جاگہ کہ تھرا دوبرا ہمے گول دائرہ نیامہ یک چکر دات ءُ رندا تھرا ہما اولی جاگہ سر کنت کہ تھو بندات کُثا، تھو منزل نزیک بیغ شے ابید دیر بیتگ ءِ، نی تھرا ہمے دائرہ شے درکفغ سک گران کھفیت ءُ اگہ درکھفغ وتی تہا گران ءِ بدلی بیار ۔

میں اور وہ:

“من و تھو” ہما ٹائم کہ یک کارے شر بیت نی تھو ہمے شری کریڈت وت زیرگ وسطہ وڑے نہ وڑے کوشست کھنے کہ ہمے کار کہ شر بیثا ہمیشی شر بیغ مسترے سوب من وت آ، اگاں من مویث ایں، بیت کنت ہمے کار شر نواں بیت ایں، نی اگاں ہمے کار شر نویثہ یاکہ محلوق تھئ ہمے زُوڑتھگیں فیصلہ ریجکٹ کُتہ نی ہمے مڑدم کہ وتار کریڈت دیغ ثہ ، نی الزام دگرے سنگتے سرا دا کہ ہمے فیصلہ تھو زُوڑتھا کہ مرشی بے سوب بیثا، اے یک قسم ءِ نرگیسیت ءُ منافقت ایں بزانکہ ہمے تھئ سیاست بے سوبی پھلوا روان کنت۔

“فیصلہ ءُ فرسودہ سوچ”

فیصلہ زیرغ وھدا وتی جند چھارغ ، فیصلہ زیرغ وھدا آ گراونڈ اۓ حقیقت سر گوازینگ ، وتی سنگتاں ھچ ڈسکشن یا کہ راۓ دیغ وسطہ ھچ سلاہ مخنغ، وتی وڑا درست سنگتاں چھارگ کہ اگہ مئ اے فیصلہ مئ وسطہ جوان ایں دومی سنگتانی وسطہ ھم جوان بی، یک فرسودہ سوچ دارگ کہ مئ سنگتانی نیامہ چوشے ہچ ایبیلٹی جند نیستے کہ فیصلہ زوڑتھ کھنا، یاکہ اگہ مئ زوڑتھغے فیصلہ کھسے چھپ شتا بزانکہ ھما مڑدم سیاسی حوالہ منا شے جہل انت، یاکہ ھما چھپ روخے مڑدم آ وڑے نہ وڑے ڈی گریڈ کھنغ. وقتی فیصلہ نی زیرغ ھما فیصلہ نی زیرغ کہ تھرا یک کسانیں وھدے پائدگ دات بلے بیث کنت کہ تھرا یک کسانیں وھد اۓ رند نقصان دا۔ من فیصلہ زیرگ اۓ وھد آ جاورھال گو یک کسانیں نگاہ اۓ گو چارہ نہ کہ جاورھال گو دیرے چھماں یاکہ چھوش چھارہ نے کہ منا یک لونگ ٹائم نقصان دات کنت، رندا ھمے وڑے فیصلہ کہ بڑزا نبشتہ انت ایشانہ وتی سنگتانی سرا ڈائرکٹ امپوز کنغ ءُ وتی انا ءُ ضد گو وتی فیصلہ چھکا اوشتغ۔

“عوام، جیہان یا کہ لس محلوق”

یک سیاسی مڈدم وسطہ المی انت کہ وتی جیہان، محلوق گو نزیکی کنت کہ باندا ھما محلوق سرا سیاست کارمرز کنغی انت ، یک سیاسی جہدکار اگہ وتی گام یا فیصلہ زیرغ اۓ وھد آ لس محلوق اے لوٹھ، یاکہ نفسیات آ چھارگ آ نئیں بزانکہ ھمے فیصلہ جوانے وڑے کارمرز بیت نہ کنت ، یک سیاسی مڈدم نند ءُ نیاز ڈسکشن اگہ کہ وتی دومی سیاسی سنگت نزیخے مڑدم گو بی ءُ لس محلوق گو ھچ نزیکی نخنت بزانکہ آ یک لیمیٹڈ یاکہ کسانے جاگہ اۓ وتار بستغ اۓ بزانکہ ھمے وڑے فیکٹرز تھئ سیاست تاوان دینت، اگاں تھو لس محلوق گو گپ کنگ آ اۓ ءُ محلوق ھمے مارینی کہ تھو وتار بڑزا لیکگ ائے ءُ محلوق آ جہل جنگ اۓ بزانکہ تھئ ہمے گپ کنگ سک وہار انت ءُ ھچبر چھوشے گپ کنگ آ شے تھو محلوق ہمایت یا کہ محلوق باور آ گفت نخنے. نی اگہ ما گندے مھلوق نزیکی کنغ شے ابید میر ءُ ملا ءُ سوسائٹی سوے ریش ءُ مستر گو مارا مسئلہ ہست انت ہمے سبب انت کہ ما ھمے محلوق پہ زور وتی دشمن جوڑ کرتگ انت اگہ یک لیفٹ مڑدم است انت مئے کار انت ھمایے تربیت کنگ، آہیا بلوچ کاز پوہ کنگ ۔۔ ما بلکہ ہمے مڑدم وتی دشمن کناں ۔اے وڑا ما بگندے اگہ یک معاشرہ میان پنچ ہزار مڑدم است انت گڈا ھمے محلوق نیاما جوان مڑ صرف ہما بیست انت کہ سیاسی انت پوہ انت اے وڑ بیت نہ کنت، مئ تحریر باز ھند ءَ شا مارینتگ بی کہ من مکرانی لفظ کارمرز کتگ انت وجہ ایش انت مئ جند دراہ وھد ءَ ھمے تربیت کنگ بیسا کہ اگہ مکران دو چیار لفظ تھو گالوار کھنے گڈا بزانک تھو سیاسی ءُ آشوبی ءِ ھالانکہ مئ ڈیھ مڑدم مکرانی لہجہ پوہ نہ بنت گڈا من صرف وتی پیشدارگ وسطہ کہ من آشوبی ءَ وتار مھلوق شے انج شوندیگ کوشست کنا۔

” سیاسی مڑدم “

سیاست وسطہ المی انت کہ تھرا وتی مھلوق گو وڑے نہ وڑے آوار بیغی ایں اگہ من گِنداں مئے گُرا مڑدم آئسولیٹ کنگ بنت دوزی کہ سٹوڈنٹ انت دراہ وخت دومی تنظیم آ زا زاور کنت، وہار گشنت ۔۔ھما وھد ءَ سٹوڈنٹ لائف شے درکھفا نی وت مہ وت ہیران بنت کہ چھون کھنا، مئے گرا سیاسی ھما انت کہ میر احمد اشک کنت ءُ آدے ہما وھد ءَ کہ کھسے پجھیا نشتگ انت اڑے واجہ یا گپ کھن، ھبر کھن، یا شئر اَش کھن مطلب واجہ ہچبر گالوار کھنغ وسطہ شئر چَلینگ زروری نہ ایں۔اگہ تھو سگریٹ نخشے اگہ تھو وتی گالوار نیاما مکران دو چیاز لوظ دست پھاز بورین آوار نخنے اگر تھو ہما مڑدم کہ تھرا گون نینت تھرا لگی کہ اے غیر سیاسی انت ھالانکہ چوش نہ انت تھو ھما وتی دوزی دشمن جوڈ نخنے دوزی تھو سیاسی نیے۔ گڈا ھمے دوران تھو دُراہناں وتی دشمن جوڑینے۔ کھسے تھئ جند گو اختلاف داری دشمن ،کھسے تھئ پروگرام گو اختلاف داری دشمن ،کھسے تھرا گو ڈیبیٹ کنت ءُ تھرا وھار ثابت کنت تھئ دشمن گڈا منی واجہ تھئ سیاسی زیند چینکس بیسغ بی؟

” کتاب دوستی “

کتاب دوستی سک جوان انت، بلے اگاں تھو کتاب ہمے وسطہ واننگ اۓ کہ تھو یک ٹرینڈ اۓ بہر اۓ، کتاب تھرا ہر جاگہ گون انت آیا کہ تھئ واننگ جاہ بیت یا مویث، یاکہ لس محلوقی جاگہ بی، اے وڑا نی زاننگ بی کہ تھو کتاب واننگ اۓ یا تھئ مراد ہمیشے کہ من محلوق دیما وتار یک زانتکار شوندیغ لوٹھا، اے کتاب اے ہم مسترے توحین انت کہ من صرف کتاب زِیراں ءُ واننگ شے گیش کتاب شوندیاں، یاکہ تھو کتاب یک انچے رفتار گو وانے کہ کتاب بھڑیغا ھلاس بِبی بزانکہ تھئ مقصد کتاب ھلاس کنغ اۓ نہ کہ کتاب سرا عمل کھنغ یاکہ وتی جند تربیت یاکہ سیکگ اۓ، اگاں تھو یک کتاب واننگ اۓ ءُ کتاب تھرا وتی ہمراہی آ یک روانی نیامہ برگ اۓ ناکہ تھرا جھیڑغ مجبور کھنغ ءِ، نہ یک سوچ پھلوا برغ اۓ، تھرا گو وتار برغ آ اۓ بزانکہ تھو کتاب شے ہچ سیکگ آ نیے ھمے واننگ شے باز شوندیغ یا ٹرینڈ حساب واننگ تھرا ہِچ سوچ یا فکر داث کت نخنت ۔

” وش فہمی “

کُل ءَ شے مستریں وش وہمی ہمیش انت کہ تھرا ہر وھد ءَ کہ تھو کار کھنے ھمے محسوس بی کہ من قومی جہد ءِ بہر انت، من قومی کار ءِ کھنغا، ھمے کار کہ من کھنغا پُر اصر کار ءِ، مطلب ہمیش کہ تھو اگہ یک کھسانے ایونٹ کھثا نی تھو ہما ایونٹ سرا ہمیخر وش بے کہ بس نی دراہ کار بیسغا چوش نہ سوچے کہ چیزے پھزا پش کھفتا یا انگت بازے کار استا کہ کھنغ لوٹھا، وش فہمی ہمیراز ءِ فضول چیے کہ یکبرے مڑدم ہمیشی آماچ بی درکھفغ باز گران ءِ بلوچ قومی سیاست مسترے بے سوبی ہمیش انت کہ مڑدم سک جلد وش فہمی شکار بنت ءُ یک غلام وسطہ وش فہمی یک مزن لعنت ءِ ۔

سوال؟

کجام سوال المی انت ءُ کجام سوال شے پھاریزگی انت، اگاں تھو سوال کنغ اۓ سیکگ وسطہ سک جوان انت، اگاں تھو سوال کنغ اۓ یک سنگت جج کنغ آ یاکہ ھما سوال آ نی کنغ کہ ھمائ جواب تھو وت زانے بلکہ تھو محلوق شوندیغ لوٹھے کہ من چیکس زانتکار آ، بزانکہ اۓ سک غلط اۓ ایشی سوال کنغ نہ گوشنت کہ کہ تھو مڑدم جج کھن یا ہمے راز پھول کھن گوشے سنگت جاگہ بھرتی بیغ ءِ تھو ہمایے انٹرویو گرغ ءِ ۔

نرگسیت :

اے ھما فیکٹر اۓ کہ ہر مڑدم نیامہ استے، نرگسیت بازے قسم انت، بلے اگاں ہمے نرگسیت سک باز بڑزا بیسے بزانکہ اے تھرا تاوان داث، نی نرگسیت شکار اۓ مڑدم چون زاننگ بی، اگاں عمل سوبین بیت نی نرگسیت شکار مڑدم کوشش کنت کہ وڑے نہ وڑے آ کریڈٹ وت زِیراں، نی اگاں ہمے عمل بے سوبین بیت انت نی ھما مڑدم ایشی سبب وتار شے کَھشاں ءُ دومی سنگتانی سرا ایر کھنا، اگاں یک محفل آ تھئ راۓ لوجک گو غلط کنگ بیت ، نی تھو ھمے مڑدم آ نی محفل شے دیر کھِنزغ کوشست کھنے ءُ ہر جاگہ ھمے جار جنے کہ اے مڑدم مئے سنگتاں تاوان دینت ءُ اے سنگت ھچ نزانہ، اے گپ تھو ھمے وسطہ کھنے کہ تھو زانے کہ مڑدم تھئ جند تعریف نخن ءَ، نرگیسیت شکار مڑدم ہر جاگہ وتار بُڑزا شون دات، ہر جاگہ وتی جند چھاری، ہر محفل نیامہ ھمے باور کنائنگ کہ مئ جند گو اے کار شر انت، یاکہ شری سوب من وت آ اگہ من مویث ءَ بزانکہ ہچ کار شر نویسغ ءَ۔

درست فیکٹرز تھرا بے سوبی پھلوا روان کھنت، اگہ ہمے درستے فیکٹرز پھریزگ مبہ ، بزانکہ تھئ منزل بے سوب ایں، بڑزا نبشتہ کھسغ اے ھیال نبشتہ کار وسیغ انت، اختلاف دارگے حق درستے وانوخ است ءِ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ تیرگواریانی وئیل یکشل ءَ برجاہ اَنت کہ اود ءَ مردم تیرانی نشانگ ءُ کُشگ بوگ ءَ اَنت-

سر بیتگیں ھالانی رد ءَ روکپتی بلوچستان ءِ دمگ سرباز ءَ ناشناسیں مردماں تیرگواری کنان ءَ یک مردمے کُشتگ-

تیرگواری ءِ وئیل گوستگیں بیگاہ ءَ پیز اتکگ کہ اود ءَ سلاہ بندین مردماں تیرگواری کتگ ءُ دُرا ء نور محمد جھمنند مچکور سرباز کُشتگ-

داں گُڈی اھوالاں کوشکارانی بارو ءَ دگہ گپ زانگ نہ بیتگ اَنت ءُ نانکہ کوش ءِ سبب زانگ بیتگ-

روکپتی بلوچستان ءَ ھمک سال بازیں کچے ءَ مردم تیرانی آماچ بوگ ءَ اَنت کہ گوستگیں سال ءَ یک سد ءُ چاردہ مردم کُشگ ءُ زدگ کنگ بیتگ اَنت-

زانگ بہ بیت ھمود ءَ مردم تیرانی آماچ بوگ ءُ بیران بوگ ءَ اَنت ھمود ءَ مردم دگ ءِ وئیلاں ھم وتی زند ءَ زبھر بوگ ءَ اَنت گوستگیں دازدہ کلاکانی وھد ءَ روکپتی بلوچستان ءِ جتا جتائیں ھنداں ءُ جتا جتائیں وئیلاں سِی ءُ نُھ مردم بیران ءُ زدگ بیتگ اَنت-

آئی سی سی کرکٹ ورلڈ کپ ءِ بیست ءُ چارمی گوازی نیدر لینڈ ءُ آسٹریلیا ءِ میان ءَ ماں بھارت ءِ بنجاھی شھر نئی دہلی ءَ ارُن جیٹلی کرکٹ گوازی پٹ ءَ کنگ بوتگ کہ آسٹریلیا ءَ ٹوھیں اسکورے ءَ گوں نیدرلینڈ پروش داتگ –

آسٹریلیا ءُ نیدر لینڈ ءِ میان ءَ بوتگیں گوازی ءَ آسٹریلیا ءَ ٹاس کٹ اِتگ ءُ اولسر ءَ بیٹنگ کنگ ءِ شور کتگ ءُ آسٹریلیا ءِ لیبیاں جوانی ءَ گوازی کنان ءَ نیدر لینڈ ءِ دیم ءَ پنجاہ اوورانی تہ ءَ ھشت وکٹانی تاوان ءَ سَے سد ءُ نود ءُ نُھ رن جوڈ کتگ انت – چارسد رنانی ٹارگٹ ءِ پروشگ ءَ پہ ندرلینڈ ءِ لیبی بیست ءُ یکمی اوور ءَ دراہ آؤٹ بوتگ انت ءُ آیاں بس نود رن جوڈ کرت کتگ انت –

آسٹریلیا ءِ نیمگ ءَ درساں گیش ڈیوڈ وارنر یکسد ءُ چار ءُ گلین میکسویل یکسد ءُ شش رن جوڈ کرتگ انت – وھدیکہ اسٹیو اسمتھ ھپتاد ءُ یک لبوشین شست ءُ دو جوش انگلس ءَ چاردہ، مچل مارشن نُھ ءُ کیمرون گرین ھشت، پیٹ کمنز دوازدہ رن جوڈ کرتگ انت –

نیدر لینڈ ءِ نیمگ ءَ لوگن وین بیک ءَ دھ اوورانی تہ ءَ ھپتاد ءُ چار رن داتگ ءُ چار لیبی آؤٹ کتگ انت ءُ بیس ڈی لیڈا ءَ ھم دو لیبی آؤٹ کتگ انت –

نیدرلینڈز ءِ نیمگ ءَ درساں گیش وکرم جیت سنگھ بیست ءُ پنچ ءُ تیجاندا منورو چاردہ رن جوڈ کرتگ انت – وھدیکہ سایبرانڈ یازدہ ، کولن ایکرمین دھ رن جوڈ کرتگ انت ءُ لوگن وین بیک، وین ڈر میروی ءُ پاؤل وین میکرمین ءَ رن جند جوڈ نہ کرتگ –

آسٹریلیا ءِ نیمگ ءَ ایڈم زمپا ءَ سَے اووراں ھشت رن داتگ ءُ چار لیبی آؤٹ کتگ انت، مچل مارش ءَ دو وکٹ گپتگ – وھدیکہ یک یک وکٹ ءِ مچل اسٹارک،جوش ہیزل ووڈ ءُ پیٹ کمنز ھم گپتگ –

بلوچستان ءِ دمگ ھُزدار ءَ آروسیانی گاڑی وئیل آماچ بیتگ ءُ دو زھگ بیران ھژدہ ٹپی بیتگ اَنت-

شال کراچی شھدگ سر ءَ آروسیانی منی ویگن وئیل ءِ آماچ بیتگ ، دو زھگ بیران ، ھژدہ مردم سک ٹپی بیتگ اَنت، ٹپی بنداتی دوا درمان کنگ ءَ پد ڈی ایچ کیو سوراب ءَ برتگ اَنت-

گیشیں ھالانی رِد ءَ چارشمبے ءَ شال کراچی شھدگ تھاروکی ءِ ھند نغاڑ سوراب ءَ چہ ھُزدار ءَ رؤکیں آروسیانی منی ویگن ٹائر ترکّگ ءِ سبب ءَ گاڑی چپی بیتگ ءُ چریشی ءِ آسر ءَ دو زھگ بیران وھدے کہ ھژدہ آروسی ٹپی بیتگ اَنت-

ٹپیانی تہ ءَ مزنیں کچے ءَ زھگ ءُ زالبول ھوار اَنت- ٹپی دوا درمان کنگ ءِ ھاتر ءَ ڈی ایچ کیو سوراب ءَ برتگ اَنت- بیران بیتگیں دوئیں زھگانی سیادی چہ گدر ءَ اِنت-

چہ تربت ءَ پاکستانی پوج ءَ یک دگہ ورنایے زورانسری آوار جتگ ءُ بیگواہ کتگ –

آوار جنگ بوتگیں ورنایے پجار نواب بلوچ ءِ نام ءَ بوتگ –

دمگی اھوالکارانی رِد ءَ گوستگیں بیگاہ ءَ پاکستانی پوج ءَ چہ تربت ءِ دمگ آپسر ءَ نواب بلوچ ءَ ھوار دگہ بازیں ورنایے آوار جتگ ءُ بیگواہ کتگ انت –

کھول ءِ گوشگ انت نواب بلوچ وانندھیں ورنایے ءَ ھوار گِس ءِ یکیں کمائینوک بوتگ ءُ دیم ءِ ماہ ءَ آئی ءِ آروس بوگی بوتگ –

زانگ بہ بیت گوستگیں روچ ءَ بگر تاں ھنو چہ تربت ءَ بازیں ورنایے پاکستانی پوج ءَ آوار جتگ ءُ بیگواہ کتگ انت کہ آیانی تہ ءَ تنی وھدی بس سَے مردمانی پجار کنگ بوتگ کہ آیانی تہ ءَ سرفراز ء ایوب، بالاچ ء خالد ءُ نواب ھوار انت –

زانگ بہ بیت زورانسری آوار جنیانی تہ ءَ گیشی ھما وھد ءَ اتکگ وھدیگہ بلوچستان ءِ سرپانک سروزیر تربت ءِ تر ءُ تاب ءَ اتکگ بوتگ –