نودربر گل بلوچ اسٹوڈنس کونسل اسلام آباد ءِ دومی ھمک سالی لبزانکی ءُ وانگی مراگش مبارک کازی ءِ یات ءَ ماں اسلام آباد ءَ برجاہ دارگ بوتگ –
اے مراگش ءَ مزنیں کچے ءَ نودربر ءُ دگہ تکاں سیادی داروکیں مردماں بھر زرتگ – مراگش ءَ ڈاکومنٹری، گُشتانک، کسمانک، ٹیبلو، شائری ، پینل ڈسکشن ، بلوچی چاپ، بُک اسٹال، کلچرل اسٹال ، آرٹ ایگزیبیشن ءُ پولکاری ءِ بھر ھوار بوتگ انت – مراگش ءَ جتا جتائیں بنگپانی سر ءَ سر ءَ زانتکار ، لبزانکار ، بندپتر نویس ، شائر، زبانزانت ءُ زانوگراں وتی ھیال درشان کُتگ انت –
مبارک کازی ءِ پینل ءَ ترانکاراں تران کتگ ءُ گوشتگ کہ مُبارک کازی راجی ءُ اے اھد ءِ شائر اِنت ءُ کازی کدی چہ گیدی شائری ءَ نہ سستگ آئی ءَ مُدام وتی ساچشتانی تہ ءَ راجی درد ءُ مارشت ءِ درانگازی کُتگ – کازی ءِ ساچشتانی وانگ ءَ پد وانوک ءَ را سما بیت کہ آ بلوچ زمین ءِ سر ءِ جھمنندیں ساچشتکارے ءُ وتی زمین نندوکیں مھلوک ءِ درد ءُ اندوھاں مارگ ءَ اِنت ءُ چرے جاوراں وت ءَ گِستا دارگ ءَ نہ اِنت – ترانکارانی گوشگ ات اَت کہ کازی بلوچ ءِ ھمک اھد ءِ جھگیری ءَ کنت –
مراگش ءَ نامداریں بندپتر نویس ءُ زانتکار ڈاکٹر فاروق ءِ گُوشگ اَت کہ بلوچ چہ کرناں ءُ بُن ءُ بیھ ءَ ھمے زمین ءِ نندوک اِنت ءُ دری نِبشتہ کاراں مُدام ھمے کوشست کُتگ کہ وتی نبشتانک ءُ نکانانی تہ ءَ بلوچ ءَ اے زمین ءِ وارس مہ لیک اَنت ءُ آئی ءَ درامد پیش بدار اَنت –
آئی ءَ گوشتگ کہ بلوچ ھمد ءِ نندوک اِنت ءُ اے برتانیہ ءُ دگہ دری نبشتہ کارانی ڈسکورس بُوتگ کہ چوں یک زمینے ءِ سر ءِ نندوکیں مردمے ءَ درآمد پیش بہ داریں – فاروق بلوچ ڈنی سرجمیں ڈسکورساں نہ منّیت ءُ ھمے گُشیت کہ بائدیں بلوچ وت ءَ وتی چمّاں بہ چاریت ءُ زمین ءِ ارزشت ءَ سرپد بہ بیت –
آئی ءَ نودربر سوج ءُ سکین داتگ انت کہ آ بوان اَنت ءُ وتی گیشیں وھد ءَ گوں وانگ ءَ بہ گوازیننت ۔
گل ءِ بنجاھی جارکش ءَ وتی درشان ءِ تہ ءَ گوشتگ کہ مراگش ءِ ٹیبلو ءِ بنگپ تُرس ءُ مروچی ئیں دؤر ءِ بلوچ نودربرانی وتی زمین ءُ جاوراں چہ سندگ ءِ سر بوتگ ءُ گیش نپری زندگی ( انفرادی زندگی ) ءِ کہ بلوچ نودربراں پہ المّی اِنت کہ گوں وتی راجی جیڑہ ءُ راجی درد ءَ بندوک بہ بنت – مروچی باند ءَ ھما آزاد ھیالی ءِ چاگرد کہ وتی سرا چِست کنان اِنت ءُ تیزی ءَ گوں بلوچ نودربراں وتی آماچ کنگ ءَ اِنت ۔ اے جاور کہ مروچی جوڑ بُوتگ اَنت کہ بازیں نودربرے ھمے ماریت مارا اے جیڑہ ءُ جنجالاں گوں کار نیست ءُ جیڑہ مئے نہ اَنت ۔ اے بیانیہ ءِ جِند زوراک ءِ بیانیہ اِنت کہ بلوچ نودربر چہ وتی راجی جیڑہ ءُ جنجالاں چہ بے سما ءُ گیر سیاسی بہ بنت دانکہ آوانی بودناکی ھلاس بہ بیت ءُ آ ھچ ھساب ءَ جیڑ اِت مہ کن اَنت –
جارکش ءَ گوشتگ کہ کسمانک ھم اَنچیں تبکہ ئے ءِ سرا اَت کہ گندگ ءُ زاھر ءَ وت ءَ بلوچ ءِ دوزواہ پیش دار اَنت بلئے گواچن ءَ اے بلوچ ءِ مستریں دژمن اَنت ۔
جارکش ءَ گوشتگ کہ دیمتری دوئیں پینل کہ یکّے پَٹ ءُ پول ءِ ارزشت ءُ بلوچ لبزانک ءِ سر ءَ بوتگ ایشی ءِ تہ ءَ پولکار ءُ زانوگرانی ھمے ھیال اَت کہ زورگیر ءِ جوڑ کُتگیں اِلم کہ مئے ھمک روچی ئیں زند ءُ گیش المی پِڑاں سانمند کنگ ءَ اَنت ۔
اے سرھال ءِ بنگپ ھمیش اَت کہ پولکاری ءِ مزنیں ارزشتے ءُ اوپار ءُ سگّے لوٹیت ۔ اے اَنچیں کارے کہ سالانی سال پولکار ءَ درکار بیت کہ آ نکان جم بہ کنت ءُ گوں دلجمی ءَکار بہ کنت –
سیمی پینل نوک آباتی ذھنیت ءُ بلوچ چاگرد ءِ سر ءَ ایشی ءِ اسرانی سر ءَ بوتگ- نوک آبات ءَ بلوچ چاگرد ءِ مچّانکی تب سرجم ءَ مَٹ کُتگ ءُ اَنچیں جاور پیداک کُتگ کہ ھمک مردم ھمے ماریت کہ اے جیڑہ منی نہ اِنت ءُ نپری تب گیش ودّتگ ۔ نوک آبات ءِ مُدام کوشست ھمیش اِنت کہ جھمنند ءِ مجگ ءَ وتی چنگلانی تہ ءَ بہ کنت ءُ آئی ءَ وتی ھساب ءَ جیڑگ ءَ لاچار بہ کنت –
بلوچ اسٹودنس کونسل ءِ مراگش ءَ ڈاکٹر ماہ رنگ بلوچ ءَ ھم بھر زرتگ ءُ آئی ءَ تران کنان ءَ گوشتگ کہ پہ بلوچ نودربراں اے وھد ءَ اژدری اِنت کہ گیش تِپاک ءُ یکجاہ بہ بنت ءُ وتی راجی کار ءِ بھر بہ بنت – مروچی ھمے نودربر کہ وانگ ءَ اَنت باندا وانگ ءِ سرجم کنگ ءَ پد پہ آواں اژدری اِنت وتی چاگرد ءَ بُرو انت ءُ ھمودا وتی کاراں برجم بِدار اَنت –
آئی ءَ گوشتگ کہ بلوچ مروچی اَنچیں جاوراں گوں دُوچار اِنت کہ ایشی ءِ تہ ءَ مستریں زمہ واری بلوچ نودربر ءُ ورناھانی اِنت کہ راجی بار ءَ وتی کوپگاں بُزور اَنت ءُ وت ءَ چاگرد ءِ زمہ واریں بھرے بہ لیک انت –
مراگش ءِ گڈی بھر مبارک کازی ءِ درگت ءَ ڈاکومنٹری بوتگ کہ دیوان ءِ تہ ءِ نندوکیں مردماناں پیش دارگ بُوتگ – مراگش آسر کنگ بوتگ –
