ریاستی شونداتانی بگیری ءَ یکشلیں جُھد ءِ ارزشت
نبشتہ کار: لکمیر بلوچ
رجانک: مھروز ھمل
دی بلوچستان پوسٹ
جھان ءِ تہ ءَ ھر کجا کہ راجکاری زرمبشتاں جاہ جتگ آیانی سوبمندی ءُ بے سوبیانی سوب گوستانک ءِ تہ ءَ ھست اَنت ءُ مارا چہ مھکمیں گلاں سرپدی رس ایت – ھما گلاں وتی مھکمی منّارینتگ، ءُ راجی ءُ راجکاری ءِ سِنچ ودّینان ءَ وتی مول ءُ مرادانی گرگ ءِ ھاتر ءَ سرین بند بوتگ انت – مروچی اے دیمروئی کتگیں جھان ءِ تہ ءَ achiving power سوبمندی ءِ بنکی زور گَلاں، جھان ءِ تہ ءَ اے وڑیں درور باز کم اِنت کہ بید ء مھکمیں گلاں بس پوجی زور ءَ یک تاکتے ءَ جنگ کٹ اِتگ ـ زوراک ءِ زوراکیاں ایردستیں راج ءِ بس مھکمیں گل وتی ھک ءَ کارمرز کُت کن اَنت ” فین گوش ایت “لگتمالی ءِ درستیں کاروائی بید ء اشی ءَ کہ راجی سنچ ءِ دیمروئی ءَ بہ دار ایت آ ایشی ءَ گیش کُت کن انت” فین دیمتر ءَ گوش ایت “زانت ءُ سنچ ءِ سرپدی دیگ ءِ میان ءَ نو آبادیات ءِ کُشت ءُ کوش ھما سنچ ءَ گیشتر کن انت ” ھمے وڑ زورگرانی ھما درستیں پندل کہ ایردست کُتگیں راج ءِ لگتمالی ءَ پہ جوڑ کنگ بوتگ اَنت یک مھکمیں گلے آ درستیں پندلاں زوراک ءِ بگیری ءَ کارمرز کت کنت ھمے وڑ زورگر ءِ تاکت وت آئی ءِ بے سوبی ءِ سوب جوڑ بیت –
زوگر ءِ زوراکی نابزانتی ءَ یک ھنچیں پُھتویں کُتگ کارے جوڑ کنگ ءَ بیت کہ آئی ءَ نگیگیں جاورانی درستیں سنچ بیت انت – ھر وھد ءَ ھر کجا کہ باسمائی ءِ کار دیم ءَ روان کن انت اود ءَ سوبمندی ھم سنچی جھدے بیت ءُ بے سوبی زوراکے –
وھدیکہ زوراک ایردست کتگیں دمگاں وتی زور ءَ جنت ءُ راجی جھد ءِ ایرموش کنگ ءَ بے سوب بیت گڈا جُھد ءِ اے تکاں زرمبشت ءِ رھشونی کنوکیں ادارھانی دیم ءَ لھتے جست کیت کہ وتی زور چون شریں وڑے ءَ کارمرز کنگ بہ بیت؟ مردم چوں مھکم کنگ بہ بنت – راج ءِ تہ ءَ چوں گَل کاری برجاہ دارگی اِنت؟ پرچاکہ راستی ءَ زرمبشت نوآبادیات ءِ ھندی مردماں بندوک بیت ءُ ھمایانی زرمبشت ءِ تہ ءَ ھوار بوگ ءَ چہ راجی آجوئی ءِ زرمبشت وتی منزل ءَ گپت کن انت ءُ زوراک ءِ دپ ءَ گوں ھاک ءَ سک کُت کن انت – اے درستیں گپانی روبرو ءَ راجی زرمبشتانی رھشونی کنوکیں گل ءُ پاٹیانی زمہ واری بیت اِنت کہ آ وتی راجی تاکت ءَ یکجاہ کنگ ءِ ھاتر ءَ آیانی تہ ءَ یکجاھی ءُ یکمشتی جاوراں بیار انت ءُ آیاں پروشت ءُ پروشی ءَ بہ رکّین اَنت – ءُ وتی ایردست کتگیں ھما ھند ءُ دمگاں کہ زوراکانی نیمگ ءَ کُشت ءُ کوش ءُ چکچینی یکشل ءَ بندات کنگ بوتگ آئی ءِ دیمپانی کنگ ءِ ھاتر ءَ جوانیں شور بندی بہ ٹھین اَنت ءُ یکجاہ بہ بنت ءُ دژمن ءِ بگیری ءَ جھد بہ کن اَنت چوش مہ بیت کہ وت ماں وتی گر ءُ چیلاں وتی تاکت ءَ ھلاس بہ کن اَنت پرچا کہ اے وڑیں جاوراں زوراک ءَ موہ رس اِیت کہ آ زرمبشت ءَ ایرموش بہ کنت ءُ آئی ءِ تاگت ءَ ارزانی ءَ ھلاس بہ کنت –
مروچی بلوچ راجکاری ءِ تہ ءَ وت ماں وتی گِر ءُ چیلانی چارگ ءَ پد ھر وڑیں زانتکاریں راجکاریں باسکے اے چیز ءَ ارزانی ءَ مار اِیت کہ اے کارکنوکیں گل ءُ پاٹیانی باسکانی تہ ءَ ھیلکاری ءِ کمی اِنت- ھیلکاری ءِ نہ بوگ ھر وڑیں زرمبشتانی باندات ءَ پہ شر نہ اِنت بلکیں آیاں گیشتر ھرابی ءِ نیمگ ءَ بارت پرچا کہ ھیل داتگیں ءُ پرکاریں باسک ھر وڑیں پاٹی ءِ تہ ءَ وتی کرد ءَ پیلو کن اَنت ءُ زرمبشت ءِ ھاتر ءَ راج ءَ مدامی پرکار کت کن اَنت – گلانی تہ ءَ ھیلکاری ءِ نہ بوگ ءَ باسکانی تہ ءَ کُنٹ مارشتی کیت ءُ گل ءِ چہ لیکہ ءَ بےسمائی آیاں وتی مولاں پُشت ءَ بارت – ھیلکاری ءِ نہ بوگ ءِ سوب ءَ ھما گل یا ٹولی کہ ھاس یک مولے ءَ پہ جوڑ بوتگ اَنت آ ھنچوش ھلاس بنت گراؤنڈ ءَ چہ گار بنت گمان کت نہ کن ئے – پرچاکہ بید ء مولانی گرگ ءَ بس وتگڑیں راجی ھمراھی ءِ ٹاہ ءَ جن ئے ءُ چہ راج ءَ دور تچ ئے گڑا بید ء دژمن ءِ زلم ءُ زوراکیاں ما وت وتی راج ءِ دژمن لیکگ بہ ایں –
وھدیکہ پاٹی ءُ گلانی تہ ءَ نزوریں باسکانی ھیلکاری ءِ سر ءَ دلگوش دیگ نہ بیت گڑا نگیگیں جاورانی آ وڑ وڑیں ھنر کن اَنت ءُ تچگ ءِ جھد ءَ کن اَنت – گلانی مھکم کنگ ءِ بدل ءَ آ لالچی جوڑ بنت چریشی ءَ آ وتی سِیتّانی رکّینگ ءَ پہ گل ءُ راجی سیتاں دلگوش نہ دینت – گڑا آ الّم گل ءِ راج مستری ءُ بُنِکّی راجکاری رھبنداں دَر بنت –
مھلوک ءَ راجکاری ءِ جھد ءِ بھر جوڑ کنگ ءِ ھاتر ءَ المی اِنت کہ رھشون ءُ رھشونی کنگ ءِ بنکی رھبندانی سر ءَ بوگی اِنت ءُ اے جھد ءِ تہ ءَ وتی سرجمیں زور جنگی اِنت پرچا کہ اے میان ءَ رھشون چہ رھشونی رھبنداں سرپد مہ بیت ءُ بس وتی پیش دارگ ءُ شُو شان ءِ ھاتر ءَ اے جھد ءِ بھر جوڑ بہ بیت گڑا آئی ءِ گوں جھد ءَ بندوکی بس ادارکی ءِ نہ بیت بلکیں رھشونانی نادلگوشی ءِ سنگین نہ بوگ ءِ سوب ءَ جھد ءِ یکشلیں درچ ھلاس بیت – چوش کہ سیاسی جھد ءَ گل ءُ آیانی رھشوناں لوٹ ایت کہ آ دور چاری ءَ گوں مراگش اڈ بدینت وتی مراگشاں گیش بہ کن انت تا کہ آ شریں وڑے ءَ وتی کاراں آشوبی بہ کن اَنت پیش دارگ ءُ لفازی بوگ ءِ بدل ءَ املی دروشم ءَ وتی گل ءِ باسکاں کار بہ بند اَنت پرچاکہ گلی ءُ نگدی سنچ ءَ سر ریچیں باسک وت ماں وتی گر ءُ چیلانی تہ ءَ نہ کپ اَنت ءُ مدامی یکشلیں جھد ءَ چہ ایردستی ءَ رکّگ ءِ ھاتر ءَ گلانی تہ ءَ وتی جوانیں کرد ءَ پیلو کن اَنت – اے وڑیں باسک جاوراں شریں وڑے ءَ ٹپاس اَنت ءُ دروگ ءُ وتگڑیں ھیال دیم ءَ نیار انت بلکیں دیم ءَ اتکگیں نگیگیں اڈانداں سرگوز کن انت ءُ نگیگیں جاورانی تہ ءَ ھم وتی راج ءِ شریں وڑے ءَ رھشونی ءَ کت کن اَنت –
بلے بدبھتی ءَ بلوچ سیاست ءِ تہ ءَ دگہ وڑیں جاورے اتکگ، سیاسی بگیرداری ءِ نام ءَ ما وت وتی تاکت ءِ بگیری پُرکار ءُ وت ءَ نزور کنگ ءَ اِیں – راجکاریں زرمبشت مدامی چہ تہ ءَ مھکم بنت ءُ وتی تاکت ءَ جھان ءِ دیم ءَ باور کنائین انت – بلے اشی ءِ چپ ءَ بلوچ راجکاری ءِ تہ ءَ وتی ماں وتی بگیری، گل ءِ جیڑواں چاگردی ترامجاہ ءَ آرگ ، جھان ءِ دیم ءَ اے کسانیں بگیریاں ءُ گل ءِ تھی جیڑواں راجی ءُ لیکھی جیڑہ پیش دارگ ءُ بلوچ راجی زرمبشت ءَ پہ زانت ایرادی اڈاندانی نیمگ ءَ برگ ءِ جھد ءَ کنگ ءَ آں – چوش کہ جھد ءِ تہ ءَ یا یکے ءَ گیش گلانی بوگ ءَ بگیرداری بوت کنت – بلے اے بگیرداری ھنچیناں کہ گیش گیوار بوت کن اَنت ـ چوش ھم نہ اِنت کہ یک نیمگے ریاست بلوچ سرڈگار ءِ سر ءَ در ملکی کمپنی چین ءِ وڑیں سامراجی ڈیھ ءِ گوم ءَ کرباں ڈالر ءِ مساماں دز نشان جتگ ءُ اد ءَ زرکاری ھاتر ءَ ءُ بلوچ آجوئی زرمبشت ءِ کاؤنٹر کنگ ءِ ھاتر ءَ چن ءُ لانچ ءَ اَنت – ما وتی زاتی انا ءِ ھاتر ءَ کسانیں جیڑواں زورگ جھندم یکجاہ بوگ ءُ ریاست شوربندیانی بے سوب کنگ ءَ یکے دومی ءَ دُور تر بُوان اِنت گڑا الم اے پہ راجی زرمبشت ءَ نیکیں پالے نہ اِنت – بلکیں چریشی ءَ ریاست مھکم تر بیت ءُ زرمبشت ءِ بگیری ءَ آئی ءَ کار کنگ ارزان بیت –
بلوچ راجکاری ءِ تہ ءَ سال دوھزار ءَ پد بلوچ راجکاریں تاکتانی چہ پارلمانی سیاست ءَ انکار ءُ راجی آجوئی گپ ءِ دیم ءَ آیگ ءَ ریاست ءُ آئی ءِ داشتگیں چانیگ واراں پہ نگیگ گوستگ – ھما روچ ءَ بگر تاں روچ ء مروچی ریاست وتی داشتگیں کاسگ چٹانی ھمراھی ءَ دراڈ پیداک کنگ ءِ جھد ءَ کنگ ءَ اِنت – سال دوھزار دہ ءَ زرمبشت ءِ بگیری ءَ سرجمی ءَ میڈیا وار بندات کنگ بوتگ کہ آئی ءِ زمہ واری نیشنل پاٹی، بی این پی، جماعت علما اسلام ءَ ھوار بازیں دگہ وتگڑیں سرداراں دیگ بوتگ تا کہ آ زرمبشت ءِ تہ ءَ دوری پیداک بہ کن انت ءُ بلوچ راجی آجوئی ءِ زرمبشت نزور بہ بیت ءُ آئی ءِ ھلاس کنگ ارزان بہ بیت – میڈیا وار ءَ ھوار راجکاریں باسکانی ھاتر ءَ ریاست ءَ کشندہ ٹولی جوڑ کت تا کہ پہ آیاں گراؤنڈ تنک بہ بیت ءُ راجکاریں باسک گرگ ءُ کُشگ بہ بنت – بلے ریاست ءِ اے شوندات ھم سوبمند نہ بوت گڑا آئی ءَ ایشی ءِ بدل ءَ گوستگیں درست یک کِرّ کت اَنت ءُ زرمبشت ءِ بگیری ءَ دگہ بازیں مھاز اِش پچ کُت پروپگنڈہ کنگ بندات کت پرچا کہ پروپگنڈہ جنگانی کٹگ ءُ مھلوک ءِ تب زانتی ءِ سر ءَ ھاکمی کنگ ءِ شرتریں ءُ نوکیں دور ءِ ارزانتریں کار اِنت – ریاست ءَ دروگیں پروپگنڈہ سلاھے ءِ دروشم ءَ کارمرز کُت ءُ الکٹرانک ترامجاھاں ھوار چاگردی ترامجاہ وتیگی کُت ءُ راجی آجوئی زرمبشت بگیری ءَ کار کُت بلے بدبھتی ءَ بچار اے میان ءَ ریاست ءِ پندلاں سرپد بوگ ءَ ابید ھم لھتے آجوئی لوٹوکیں سنگت ھم ایشانی بھر جوڑ بوت – ایشی ءِ آسر اے بوت کہ ھما کارے کہ ریاست بازیں وھدے ءَ ودار ءَ اَت آجوئی لوٹوکیں سنگتانی ھوار بوگ ءَ آئی ءَ موہ رس ایت – ھما مردم کہ شرگداری نام ءَ ریاست ءِ اے پندلانی بھر اِت اَنت مروچی آ وت اے مَنّگ ءَ لاچار اِنت کہ سیمی فریق ھم میان ءَ ساڑی اِنت کہ آس ءَ پٹرول پِر ریچگ ءَ اِنت – چوشکہ چاگردی ترامجاھاں اے باوستانی بندات بوگ ءِ میان ءَ بازیں سنگینیں تکاں اے کار رد گوشتگ ءُ ھما مردماں ھوار سرجمیں راج سرپد کتگ کہ اے تاوان بار اَنت – ھمے پروپگنڈیانی سوب ءَ بازیں نزوریں باسک ءُ مزنیں کچے ءَ راج ءِ تہ ءَ مایوسی اتکگ اَت –
ھر جھدے تہ ءَ ھواریں باسک اگاں جھد ءِ نزوریاں مارا ءُ آیانی کم کنگ ءِ جھد ءَ کن اَنت گڑا جھد ءِ درچ یکشل ءَ مان اِیت بلے ھر کجا چہ اِش کُتگیں گپانی سر ءَ کارشونی بیت یا ھمے گپاں زورگ ءُ گل یا پاٹی ءِ نگد ءِ نشانگ کنگ بہ بیت گڑا اود ءَیک باسکے دلجم بیت ءُ وت ءَ دھوکہ تہ ءَ نہ کنت – پرچا کہ اشکُتگیں گپاں زورگ ءُ یکے ءِ سر ءَ نگد کنگ درسیاسی کارے بیت – یک راجکاریں باسکے یے اَیب اِنت کہ آ اشکُتگیں گپانی سر ءَ وتی گپاں بہ جنت ءُ وتی ھستی ءَ سانمند بہ کنت اے وڑ ءَ یک راجکاریں باسکے یے دیمروئی کنگ ءِ درستیں راہ بند بنت پرچا کہ آ وت وتی دیمروئی کنگ ءِ بنکی رھبنداں چہ برگشتگ –
ما مروچی وتی راجکاری دیوانانی تہ ءَ ادارھانی نہ بوگ ءِ درستیں ڈبّہ ءَ گوست ءِ سر ءَ لڈّ اِیں گوستگیں روچاں ایر جن اِیں – ما وتی دلجم کنگ ءِ ھاتر ءَ 46 , 60, 70 دھک ءَ جھدے بے سوبیاں ادارھانی نہ بوگ سوب جوڑ کن اِیں ـ بلے مارا اے گپ انکار کنگی نہ اِنت کہ آ وھد ءَ ادارہ نہ بوتگ بلے ھو ما چوش گشت کن اِیں کہ آ زمانگ ءَ گلانی لیکہ نہ گِیش اِتگ اَنت – جھد ءِ تہ ءَ جھدکارانی ھیلکاری ءِ نہ بوگ ءِ سوب ءَ بس نامی ئیں مردمانی دست ءِ چیر ءَ بوتگ اَنت کہ اود ءَ تب پریسی پگر چیر ترّان بوتگ بس جزباتی بوگ ءِ سوب ءَ جھدکاراں نگیگیں جاورانی دیمپانی کت نہ کتگ ءُ زرمبشت ءِ پُرشگ ءِ سوب جوڑ بوتگ اَنت – آ زمانگ ءَ بودشتیں ورنایانی کمی نہ بوتگ بلے یک ھنچیں ادارھے یے کمی بوتگ کہ آ اے وڑیں ورنایانی رھشونی ءَ کت بہ کنت –
مروچی اگاں ما بلوچ زرمبشت ءَ سر سری چمشانکے بہ دے ایں گڑا ھزاراں شرّیانی ھمراھی ءَ لھتے ھرابی ھم گندگ ءَ کاینت کہ گلانی (ردوم زورگ) دیمروئی ءَ پہ مستریں اڈانداں چہ یکے اَنت – اے وڈیں جاورھالاں رھشون ءَ لوٹ اِیت کہ آ وتی بودشتاں کار بہ بند اِیت ءُ زرمبشتی باسکاں چہ اے وڑیں گپچلاں در بہ کنت ءُ وتی راج ءِ رھشونی ءَ بہ کنت ءُ آیاں دلپروشی ءُ درگان درگانی ءَ بہ رکّین ایت –
اے نبشتانک سگار تاک ءَ زیرگ ءُ رجانک کنگ بیتگ-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
