بلوچستان : جتاجتائیں وئیلاں پنچ مردم بیران، چار ٹپی بیتگ اَنت

بلوچستان ءِ جتاجتائیں دمگاں تیرگواری ءُ دگہ وئیلاں سے مردم بیران بیتگ اَنت-

گیشیں ھالانی رِد ءَ اوستہ محمد پولیس حبیب کوٹ نزیک ءَ ناشناسیں مردمے ءِ لاش دزکپتگ، پجّارگ کابل نہ بیگ ءِ سبب ءَ لاش اوستہ محمد ءَ کل ءُ کسارت کنگ بیتگ-

ھمے وڑ پنجگور ءِ دمگ تسپ ءَ تیرگواری ءَ چہ گرمکان ءِ جھممند محمد رفیق بیران بیتگ، بلے کوش سوب زانگ نہ بیتگ-

ھمے وڑ کیچ ءِ بُنجاھی شھر تربت ءَ اسٹار پلس مارکیٹ ءَ ناشناسیں پرپٹ سواریں سلاہ بندیں مردماں یک دکانے ءِ سر ءَ تیرگواری کتگ ءُ دو مردم کُشتگ اَنت ءُ تیر ھردوکانی سراں جنگ بیتگ اَنت-

تربت ءَ کیچ کور ءَ پھازوکی بند سر ءَ ناشناسیں مردماں صدیق ء نور بخش جھمنند علی آباد کونشقلات سر ءَ تیرگواری کتگ ءُ آ ٹپی کتگ ءُ تتکگ اَنت-

وھدے کہ کیچ ءِ دمگ بلیدہ سلو ءَ ناشناسیں سلاہ بندیں مردماں یک لوگے انگیر ءَ کتگ تیرگواری کتگ چریشی ءِ آسر ءَ دو مردم ٹپی بیتگ اَنت-

ٹپیانی تہ ءَ یک مردمے ءِ پجّار طلحہ نام ءَ چہ بیتگ- بلے وئیل سوب زانگ نہ بیتگ-

ھمے وڑ قلعہ سیف اللہ بندات پسین زئی ءَ ناشناسیں مردمانی تیرگواری ءَ چہ ھرنائی ءِ جھمنند سید نواز شاہ بیران بیتگ- کوش سوب وت ماں وتی جیڑھے گوشگ بیگ ءَ اِنت-

بلوچستان ءِ بُنجاھی شھر شال ڈیفنس ھاوسنگ اتھارٹی ءَ برجم فوڈ فیسٹیول ءِ میان ءَ سلینڈر تراک ءَ چہ زالبول ءَ ھوار چار مردم ٹپی بیتگ اَنت-

چمّگدانی رِد ءَ فیسٹیول ءِ میان ءَ سلینڈر تراک ءَ چہ مردمانی تچگ ءُ تاگ بیتگ اَنت-