مستونگ ءُ کش ءُ گوری دمگاں یکشلیں ھورانی درچ برجاہ، چریشی ءَ موسم سک وش اِنت بلے جھلگ آپ ءِ توک ءَ اِنت ءُ بنجاھی شھدگ سر شترناک اِنت ھمے سبب ءَ بازیں ھادسھے پیش اتکگ انت-
ریسکیو بنشون ءِ رد ءَ ھادسھانی تہ ءَ 19 مردم ٹپی بیتگ انت کہ کمکی کاراں ریسکیو ءِ 1122 ءِ ٹیم وئیلجاھاں سر بیتگ انت ءُ سکیں ٹپی ئیں مردم شھید نواب غوث بخش رئیسانی میموریل اسپتال ءَ برگ بیتگ اَنت۔
مھکمہ موسمیات ءِ ھساب ءَ ھورانی درچ گیش ھست بیگ ءِ گمان انت وھدیکہ ھمے بارو ءَ سرکار ءَ نشتگیں مردماناں گوشتگ سپر ءِ وھد ءَ اھتیات بہ کن اِت ۔
دومی نیمگا کوہلو شھر ءُ دمگاں دمان پہ دمان ءَ ھور ءِ درچ برجاہ انت آئی ءِ سبب ءَ سارتی گیش بیتگ – نشتگیں مردم ھمود ءَ سارتیں موسم ءِ وشنودی ءَ کنگ ءَ انت ھمود ءَ پھریزگی لوٹ ھم کنگ ءَ اَنت۔
دومی نیمگا ڈیرہ بگٹی شھر ءُ آئی ءِ کش ءُ گوری دمگاں ھم ھورانی درچ برجاہ انت چریشی ءَ چہ موسم سک وش اِنت ءُ سرد اِنت دمگی مردماں گرمیں پوشاک ءُ دگہ پھریزگی سامان ءِ دست ءَ کنگ شرو کتگ انت-
مھکمہ موسمیات ءِ ھساب ءَ ھورانی درچ آیوکیں لھتے روچ ءَ امکان انگت ھست اِنت ۔ ھمے وڑ پیشین شھر ءُ کش ءُ گوری دمگاں ھم ھورانی سبب ءَ سردی گیش بیتگ بلے جھمنندیں مردماں سوئی گیس ءِ سستی ءِ وجہ ءَ مشکلانی دیمپانی اِنت ھاس جنین آدم ورگ ءِ اڈ کنگ ءَ تکلیپ اَنت۔
دمگی مردماں ھمے بارو ءَ گوں سرکار ءَ گوشتگ گیس ءَ تیز بہ کنت دانکہ مردمانی واستا آسانی بہ بیت انت۔