آجوئی جُھد ءِ رھشون کَے اَنت؟
نبشتہ کار: مھرین بلوچ
دی بلوچستان پوسٹ
بلوچ راج ءَ گُلامی نہ منّ اِت ءُ اِے بابت ءَ لس بلوچ راج ءَ ھم زانگ لوٹ ایت وھدیکہ 27 مارچ 1948 ءَ پاکستان ءَ بلوچ راج ءِ سر ءَ اُرش کُت ءُ آزات ءُ وتواجھیں بلوچستان ایردست کُت گُڑا شھزادگ ابدلکریم ءَ بگر داں روچ مرچیگ ءَ مئے راجی آجوئی ءِ جُنز ءَ چُنت دیمروی کُت پرچاکہ اِے جنگ بلوچ راج ءِ آزاتی ءُ وتواجھی ءِ جُنز اِنت۔ اِے جنگ پہ سرجمیں راج ءِ وشھالیں باندات ءِ جنگ اِنت پمیشکا مارا ھرکَس ءَ ماں اِے جنگ ءَ بھر زورگی اِنت ءُ مارا راجی بامرد بابا ھیر بکش مری ءِ کلوہ ءُ راجی آشوب ءِ زرمبش بلوچ لوگ ماں لوگ ءَ سرکنگی اِنت۔ بلوچ راج ءِ بْرات ءُ گْوھار، ورناہ ءُ کماش، دِھکان ءُ پوریاگِراں وتی بلوچ راج ءُ راجی آجوئی ءِ نزوری دُور کنگی اَنت۔ مارا دُژمن ءِ نزوری چارگ ءُ چہ آیاں پائدگ ھم زورگی اِنت۔ اگاں گِند ئے اِے دُژمن ءِ زُلم ءُ زورکیاں وت بلوچ راج ءَ آجوئی ءِ راہ پیشداشتگ چے ءَ کہ ما بلوچ راج وَ دمگی ٹَکاں(قبائیل) بھر ءُ بانگ ایں ءُ مئے ھر ٹَک پنجابی ءِ دلار ءُ وتگڑیں نواب، میر ءُ سردارانی گُلامی ءِ آماچ اِنت ءُ ھمے بے گیرتیں میر، سردار ءُ نوابانی گلامی ءِ آسر انت کہ 1958 ءَ بابو نوروز ھان زھری ءُ 1973-78 ءَ بابا ھیر بکش مری ءِ سرکماشی ءَ نزیکیں رِند، جمالی، مگسی، کھوسہ، رئیسانی، لیگاری، بُزدار، مزاری، جھکرانی، مینگل، بُگٹی، ڈمکی، بلیدی ءُ دِگہ بلوچ راج ءَ راجی آجوئی ءِ جنگ ءَ بھر نہ زورت ءُ انگت بازینے چمّ بوُٹیں کاسگ چٹّ اَنت۔
گِند ئے بلوچ راج چہ 1948 ءَ یکشل ءَ پاکستانی پوج ءِ زُلم، زورکی ءُ کُشتءُکوش ءِ آماچ اِنت۔ مئے راجی زُبان، رواج ءُ دود لگتمال اَنت۔ راج ءِ ورنائیں بچانی آوارجنگ ءُ بیگواھی، ماں آزارجاھاں درد ءُ لٹ شاپی، ماں ویرانیں جنگلاں ورنائیں بلوچانی لاشانی دَور دیگ ، بلوچ میتگانی ماندارگ، بلوچ راج ءِ زِر، تنگو، سُھر، ٹیل ءُ گیس ءِ وڑیں گرانبھائیں ھُدائی گْواچنانی لُٹ ءُ پُل ءِ وڑیں زُلم ءُ جبراں بلوچ راج پہ راجی آجوئی ءَ آگاہ ءُ یکجاہ کُت اَنت۔ مرچاں گوں دُژمن ءَ اے زھر ءُ نپرت ءِ آسر ءَ بلوچ راجدوستی ءَ سک دیمروی کُت ءُ مرچی بلوچ راجی لشکر بی ایل اِے ءُ آئی ءِ زِراب، جان ندری گل مجید برگیڈ، بی ایل ایپ ءُ بْراس ءِ وڑیں سِلاھبندیں گلانی سرکماش ءُ سروک لس بلوچ وانِندگ اَنت ناں کہ سردار ءُ نواب اَنت۔ اِے مئے راج ءِ وش بھتی اِنت کہ مرچاں راجی جنگ چہ سردار ءُ نوابانی دست ءَ درکپت ءُ لس بلوچ وانِندھیں بْرات ءُ گْوھارانی دست ءَ شُت۔ اے پنجابی ءِ زورانسری ءِ آسر اِنت کہ بلوچ جُھد ءِ تہ ءَ شھید ریھان بلوچ ءُ سرمچار بانُک شاری بلوچ ، سمیا بلوچ ءُ ماھل بلوچ ءِ وڑیں ھستی ودی بوتگ اَنت ءُ پہ بلوچستان ءِ آجوئی ءُ دُژمن ءِ پْروش دیگ ءَ مرچاں ایشانی ھزاریں رندگیر ھست۔ گِند ئے اِے گپ ءَ ما نہ گْوشگ ءَ ایں بلکیں گوں پاکستانی پوج ءَ نزیکی ءُ سْیادی داروکیں سرسوجی گل (تنک ٹینک) انسٹیٹوٹ آپ پِیس اینڈ کنپلکٹ اسٹڈی(IPCS) ءِ سروک پنجابی آمر رانا گْوشگ ءَ اِنت۔ آمر رانا گْوش ایت چہ 2023 ءِ اُرشاں سال 2024 ءَ ارش %70 گیش بوتگ اَنت۔ بلوچ آجوئی لوٹوکیں گل بی ایل اے ءُ بی ایل ایل ءَ سک دیمروی کُتگ۔ بی ایل اِے ءَ یک راجی لشکر ءِ وڑ ءَ شپیشل جنگی یونٹز، مجید برگیڈ ءِ وڑیں ایلیٹ کلاس ءِ جانّدْری گل ءُ انٹیلیجنسی گل زِراب ھم اڈ داتگ اَنت کہ چہ ایشانی گوریلہ جنگ ءَ پاکستان بے واک ءُ پْروش ورگ ءَ اِنت۔ چہ ایشی ءَ ھوار بلوچ راج ءِ تہ ءَ پاکستان ءِ ھلاپ ءَ یکشل ءَ نپرت پیداگ بوگ ءَ اِنت۔ پاکستانی سرسوجی گلIPCS ءِ رِد ءَ چہ اکبر بگٹی ءُ بالاچ مری ءِ شھادات ءَ پد بلوچستان ءِ آجوئی جنگ چہ سردار ءُ نواباں درکپتگ ءُ بلوچ ورناھیں رھشونانی دست ءَ شُت آیانی تہ ءَ زالبول ھم بازیں کَچے ءَ ھوار اَنت پمیشکا پاکستان ءِ واست ءَ دِگہ راہ ءُ سوج ھم نیست کہ گوں کَے ءَ گپ ءُ تْران بہ بیت؟
دومی نیمگ ءَ مرچاں پاکستان بے رھشون اِنت پمیشکا وتی مُلکاری اڑاند، گوں اوگانستان ءَ سیمسری جنگ، ٹی ٹی پی ءِ جھاد ءُ پشتون آشوب ءِ وڑیں جیڑھاں ھلاس کُت نہ کنت۔ چوناھا بلوچستان ءِ جیڑہ وَ دگرے، بلوچستان یک جُتائیں راجے ءِ سرڈگار اِنت۔ بلوچستان یک آئیڈیایے، آزات ءُ راجمستری(جمھوری) بلوچستان بلوچ راج ءِ واھشت ءُ وابے پمیشکا بلوچ ءِ جُھد پہ راجی آجوئی ءُ بلوچستان ءِ آزاتی اِنت بلے لس پنجابی اے چیز ءَ انگت بے سما اَنت ءُ اے بے سمائی پاکستان ءَ زیت 1971 ءِ وڑ ءَ پْروش ایت۔ انشا اللہ دژمن زیتیں روچاں پْروش وارت، پد ءَ پاکستان ءِ لشکر چہ بلوچستان ءَ درکپ ایت ءُ بلوچ راج ڈیرہ گازی ھان ءَ بِگر داں سند ءِ ایردستیں بلوچ دمگ ءُ کراچی ءَ ھوار وتی سرجمیں بلوچستان ءَ دستیگ ءُ واجھی کنت۔ دومی نیمگ ءَ باید اِنت بی ایل اے کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔ چہ آجوئی ءَ پد ءَ ھمے بلوچ راج ءَ ماں وانگجاھاں براھوئی ءُ بلوچی زبان ءَ دژمن ءِ زُلم ءُ جبر کِسہ ءُ راجدوستی وانینگ بیت کہ پاکستان ءِ دْروگیں مھر ءُ دوستی شُودگ ءُ ھلاس بہ بنت۔
بلوچ راج شالا تپاک ءُ یکمُشت، وتی ڈیھ ءِ وتواجہ ءُ بلوچستان شالا آجو بات، آزات، آزات ھیال ءُ راجمستری بلوچستان شالا دیمروئی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-