جیونی: جیونی ءِ شھیدانی سالروچ ءِ درگت ءَ یک مراگشے برجم دارگ بیتگ

چہ بلوچ نودربرانی گل ءِ نیمگ ءَ جیونی ءِ شھیدانی سالروچ ءِ درگت ءَ جیونی ءَ مراگشے برجم دارگ بیتگ-

مراگش ءَ بازیں کچے ءَ مردماں بھر زُرتگ ءُ جیونی ءِ شھیدانی سالروچ ءِ درگت ءَ آیاناں گچینی رنگے ءَ دروت ندر کتگ-

مراگش ءِ بندات چہ بلوچ راجی سوت ءَ بیتگ ۔مراگش ءَ چیئرمین بی ایس او بالاچ قادر،جونئیر وائس چیئرمین عامر نزیر،گوستگیں چیئرمین بی ایس او ایڈوکیٹ سعیدفیض،بی این پی گوادر ءِ سرکماش ماجد سھرابی ءُ کریم شمبے ءَ تران کُتگ، وھدیکہ ھمے وھد ءِ تلو ءِ سروکی ءِ زمہ واری بی ایس او ءِ سینٹرل کمیٹی ءِ باسک کرم بلوچ ءُ جیونی بندن ءِ سرکماش ولید بلوچ ءَ پیلو کتگ انت-

ترانکاراں وتی گپانی توک ءَ شھید یاسمین ،شھیدازگل ءُ شھید گلام نبی ءِ کربانیانی شریں وڑے ءَ اھترام ایر کتگ ءُ گْوشتگ 21 فروری ءِ روچ ءَ بلوچستان ءِ واستا آ سْیاھیں روچ اِنت کہ آ ریاست ءِ توک ءَ وتی زور ءَ ءُ جناوری ءَ چہ آپ ءِ لوٹ ءِ سر ءَ جیونی ءِ مردم گوں تِیراں ٹُنگ ٹُنگ کتگ۔دنیا ءِ توک ءَ اے وڑیں واکیات ھچ جاگہ پیسر ءَ نہ گْوستگ۔ اودا بُنکی آسراتی زندگی ءِ لوٹ ءِ پسو گنتریں زُلم ءَ چہ دیگ بہ بنت ۔مرچی 37 سال گْوستگ بلے جیونی ءُ اے دگہ بلوچستان ءِ مردم انگت ھم آپ ءِ وڑیں بُنکی آسراتی ءَ چہ زبھر اَنت ۔ وئیل ءِ جیونی اسل چہ بلوچستان ءُ اسلام آباد ءِ میان ءِ ھاکم ءُ زیردست ءِ سیادی ءَ پدر کنت ۔

ترانکاراں گْوشتگ کہ ریاست بلوچستان ءَ راجی ھکاں زبھر کنگ ءَ تاکت ءُ توپک ءِ زور ءَ جمھوری آوازانانی لپاشگ ءِ سیاست ءَ کارمرز کنگ انت اے یکشل ءَ برجاہ کتگ ءُ بلوچستان ءِ توک ءَ کتابانی دکانانی سر ءَ ھم بندش جنگ بیتگ ءُ ھمے وڑ لھتیں روچاں پیسر بلوچ استاداں ءُ نودربرابرانی نشان مندیں کُشگ ءِ تہ ءَ ھم ترندیں گیشی یے آرگ بیتگ ۔آئی ءَ گْوشتگ بلوچستان ءِ کُنڈ کُنڈ ءَ مردم ھمک روچ کمشرپ کنگ بوگ ءَ انت-

ترانکاراں کڈن کنان ءَ گوشتگ کہ بلوچ ورناہ درستیں مشکلاں ابید زانشت ءِ پرکاریاں برجم بہ دار انت۔بلوچ کوم ءِ زندگ دارگ ءِ واستا یک امرے لازمی اِنت کہ بلوچ ورنایاں الم ءِ ساھگ ءَ پرکار بیگ ءُ وتی ھکانی ھاتر ءَ جد ءُ جھد کنگی انت-