TBP Balochi

بلوچستان ءَ زورانسری آوار جنی ءِ نہ اوشتوکیں دْرچ یکشل ءَ برجاہ ءَ اِنت چہ شال ءُ تربت ءَ دگہ دو مردم بیگواہ کنگ بیتگ اَنت-

چہ کوھلو ءَ سیادی داروکیں ورنا ذوالفقار علی مری ژنگ شال ءَ جان محمد دگ ءَ برجاھیں آئی ءِ ھاسٹل ءَ چہ سلاہ بندیں مردماں زورانسری بیگواہ کتگ-

ھالانی رِد ءَ سادھیں پوشاکانی تہ ءِ پاکستانی چیریں ادارھانی کارمنداں نوزدہ ءُ بیست میانی شپ ءِ چار نیم ءَ زورانسری آوار جتگ ءُ بیگواہ کتگ-

ھمے وڑ چہ تربت ءَ ھال اِنت کہ ڈنُّک ءَ نومان کلینک ءَ چہ ڈاکٹر زرین نامیں مردمے دو گاڑیاں سوار سلاہ بندیں مردماں آوار جتگ ءُ وتی ھمراھی ءَ برتگ-

بلوچستان ءَ زورانسری آوار جنی ءِ ھلاپ ءَ پُرکاریں گل بلوچ یکجھتی کمیٹی ءُ وائس فار بلوچ مسنگ پرسنز ءَ زورانسری آوار جنی ءِ گیش بیتگیں کیساں دلپدردی درشان کنان ءَ میان اُستمانی ادارھاں چہ اے جرمانی دارگ لوٹ کتگ-

زبان ءِ ارزشت ءِ بابت ءَ دو دانک

نبشتہ کار :ھمل نور

دی بلوچستان پوسٹ

مروچی ماتی زبانانی روچ اِنت منی دل ءَ لوٹ اِت کہ من چیزے نبشتہ بہ کناں درستاں چہ پیش من شمارا کَمُّک زبان ءِ ارزشت ءِ بابت ءَ کمو سرپدی دیگ لوٹاں کہ زبان ءِ ارزشت چی اِنت-اے دگنیا ءِ تہ ءَ مئے بلوچی زبان ءَ کوھن تریں زباناں چہ یکیں بلوچی زبان ءِ تہ ءَ ترا سک باز لبز دست کپ اِیت بلوچی ءَ کم لبز چہ دری زبان ءَ زُرتگ بلوچی زبان لبز ءَ سر ریچ اِنت-

زبان ءِ مستریں چیز آئی ءِ لبز ءُ گرامر اِنت بلے مروچی بژنی گپ ایش اِنت مئے پدریچ وتی زبان ءِ گیشتریں لبزاں نہ زانت درستاں چہ پیش من وتی گپ ءَ کناں من دنیگا بلوچی ءِ گیشتریں لبزاں نزان آں باندا روچ مئے پیریں مردماں چہ پد زبان مئے امانت اِنت ما دنیگا آئی ءِ لبزاں نزان اِیں سکیں بژنی گپے پد ءَ مئے پسو ھمے بیت کہ مارا وانگجاہ ءَ وتی زبان وانینگ نہ بیت مئے بازیں مردم ھست آیاں وانگجاھاں بلوچی نہ ونتگ بلے آ انگت ءَ زان اَنت آیاں گوں وتی زبان ءَ مھر بیتگ آیاں وتی زبان دربرتگ-

ترا وت ءَ بلوچی کتاب وانگی اِنت انسان ھرچے بہ لوٹ اِیت آ ھما چیز ءَ دربرت کنت- بس دو چیز انسان ءِ تہ ءَ بیگ لوٹ اِیت”یکے جزبہ”دومی”مِھنت”بلوچی دربرگ بہ لوٹ ئے تو دربرت کن ئے ابید چہ وانگجاہ ءَ بس مھر لوٹ اِیت-اے دنیا تہ ءَ ھمینچُک اِلم سکرات ءَ بیتگ دو ھمینچُک اِلم ترا بہ بیت بلے تو وتی ماتی زبانءَ مہ زان ئے تو زانتکار نہ ئے ترا چہ یک شپانکے شرتر اِنت چی ءَ کہ آ وتی ماتی زبان ءَ زانت-

زبانانی تہ ءَ لبزانک مزنیں ارزشتے دار اِیت شائری بہ بیت یا کہ آزمانکاری بہ بیت شر یا کہ ناول بہ بیت مئے زبان ءِ تہ ءَ مردم شائری انگت گیشتر کن اَنت مئے بنیات چہ شائری ءَ بیتگ گوانزگ ءَ بہ گر داں کبر ءَ بلوچ ءِ شائری گون اِنت آئی ءَ وت ءَ گوں بندوک کُتگ انچوش یک چُکے پیداگ بیت مردم سپت جن اَنت وھدیکہ یکے مِر اِیت موتک جن اَنت شائری ءَ یک مزنیں ارزشتے ھست زبان ءِ تہ ءَ ما باید اِنت وتی زبان زانت ءُ لبزانکی مردمانی کدر ءَ الم بہ بکن اِیں چی ءَ کہ آ مئے زبان ءِ مڈّی اَنت گشندہ بہ بنت شر یا کہ شائر بہ بنت شر یا کہ تامُر ساچ بہ بنت شر ھرچ مردمے وتی زبان ءِ واست ءَ جُھد کنگ ءَ اَنت مارا آیانی کدر کنگ لوٹ اِیت- زبان ءِ اولی مستریں ارزشت ھمیش اِنت کہ تئی ھستی ءِ شاھد اِنت زبان ھستی یے تو ھست ئے تئی راج ھست مسال ھبر ءَ تو یک تامر ساچے ئے باندا روچ تئی ھمے تامُر روت سینما ءَ سر بیت آئی ءَ مسال ھبر ءَ یک جرمنی یے چار اِیت پد ءَ ھمے جرمنی ھمے جست ءِ پُشت ءَ تَچ اِیت کہ اے کجام زبان اِنت پد ءَ آئی ءَ پسو رس اِیت بلوچی زبان اِنت پد ءَ ھمے جرمنی زانت یک راجے دنیا ءِ تہ ءَ ھست اِنت آئیءِ نام بلوچ اِنت اے تئی زبان ءِ ارزشت اِنت تئی بنیادی چیز تئی زبان اِنت مسال ھبر ءَ تو تامرے جوڑ کن ئے تو آئی ءِ سجھیں چیزاں بلوچی کلچر ءُ ثقافت ءِ بابت ءَ بہ کن بلے تامر ءَ انگلش زبان ءَ بہ کن کس نہ گوش اِیت اے یک بلوچی تامرے درست گوش اَنت انگلش ڈِراما ءِ یک تامرے ھست آئی ءِ نام اِنت”دل دل”آئی ءِ درستیں اِزمکار بلوچ اَنت بلے تامُر اردو ءَ کس آئی ءَ نہ گوش اِیت کہ اے یک بلوچی ڈراما یے ھرچ تامر ءِ بنیات زبان اِنت- دنیا ءِ آ دگہ زبان زانت ءُ زانتکار ھست اَنت آ مئے زبان ءِ کدر ءَ زان اَنت من گوشاں بس لس بلوچ وتی زبان ءِ کدر ءَ بہ زانت-مئے دگہ مزنیں نادانی یے ھست گوں وتی زبان ءَ ما وتی زبان ءِ گوما انساپ نہ کن اِیں اگاں ما اے وڑ ءَ بہ کن اِیں اگاں ما رو اِیں در مُلک ءَ ما آیانی زبان ءَ آیانی گوما گپ کن ایں وھدیکہ دری مردمے مئے ملک ءَ کیت ما آئی ءِ زبان ءَ آئی ءِ گوما آئی ءِ وتی جند ءِ زبان ءَ گپ کن اِیں اے مئے مستریں نادانی اِنت باید اِنت آ مئے ملک ءَ اتکگ مارا وتی زبان ءَ آئی ءِ گوما گپ کنگ لوٹ اِیت -گُڈّسر ءَ وتی گپاں یک کسھے ءَ گوں آسر کن آں- یک ماتے چُک گار بیت سی سال ءَ پد آ مات ءِ ھند ءُ دمگی مردم آئی ءَ ملکے ءَ گند اِیت اے مرد چُک ءَ جست کنت چک گوش اِیت من پلانی –

پلانی چک آں من چوش چوش گار بیتگ آں اے ملک ءَ اتکگ آں گڑا مرد ھمے وڑ ءَ وتی ملک ءَ واتر بیت روت گڑا ھمے مات ءِ کر ءَ روت گوش اِیت بیا من تئی چک دیستگ پلاں ملک ءَ مات ءَ بزگ ءَ باز وشی بیت کہ اے مردءَمنی چک دیستگ گڑا وتی چک ءِ بابت ءَ باز جست کنت ئِے رند ءَ آئی ءَ زبان ءِ جست ءَ کنت کہ منی چک ءَ کجام زبان ءَ گپ کتگ تئی گوما مرد جواب دنت آئی ءَ ھما ملک ءِ زبان ءَ گپ کتگ گڑا مات گوش ایت گڑا مئے زبان ءَ پرچا گپ ئِے نہ کتگ مرد جواب دنت مئے زبان آئی ءَ بے ھال کتگ گڑا مات ھمے گوش اِیت کہ اے منی چک نہ اِنت چی ءَ کہ ایشی ءَ وتی ماتی زبان بے ھال کتگ یک ماتے ءَ وتی چک وتی چک نہ کت بہ چار زبان ءِ مھر ءَ من وتی نبشتانک ءَ ھمد ءَ چہ ھلاس کن آں سلامت بات اِت بلوچ راج دائم سلامت بات بلوچی-

بلوچستان ءِ تیاب دپی شھر گوادر شھر ءَ سربندن ءَ سرکاری پلامرزی سلاہ بندیں ٹولی ءِ کارمنداں نیاز عبداللہ نامیں مردمے ءِ سر ءَ تیرگواری ءَ چہ کسان سالی ئیں بچک نشانگ ءَ اَتکگ ءُ ٹپی بیتگ – بلے نیاز عبداللہ رکّ اِتگ-

دمگی اِھوالکار رِد ءَ نیاز لھتے روچ ءَ ساری پاکستانی پوج ءِ دست ءَ زورانسری آوار جنی ءَ پد یل کنگ بیتگ اَت-

زانگ بہ بیت اشی ءَ ساری گوادر ، تربت ءُ بلیدہ ءَ اے وڑیں مردم نشانگ کنگ بیتگ اَنت کہ پوج دست ءَ زورانسری آوار جنی ءَ پد یل کنگ بیتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بی ایل ایف ءِ اسنائپر ٹیکٹکل ٹولی ءَ بیست فروری ءِ روچ دوازدہ ءَ زورگریں پاکستانی پوج ءِ بُنجل ءَ ڈن اوشتوکیں کارمندانی سر ءَ اُرش کتگ یک پوجی کارمندے یے کشتگ ءُ پد ءَ نوکیں سلاھاں چہ پوجی بُنجل اُرش ءِ نشانگ کتگ چریشی ءِ آسر ءَ بازیِں کارمندی یے ٹپی بیتگ اَنت-

جارکش ءَ گْوشتگ دگہ یک اُرشے سرمچاراں مروچی ساھت یازدہ ءِ نزیک ءَ ھاران بازار ءِ بُنجاھی چوک سر ءَ ریاستی چیریں ادارھانی ھاسیں کارمند رسول بخش ببار ء عبداللہ تیرگواری کتگ کُشتگ-

جارکش ءَ گْوشتگ بی ایل ایف ءِ انٹیلیجنس ونگ ءِ سنگت گوستگیں بازیں ماھاں چہ اے کارمند ءِ سُر ءُ پُر دلگوشگور کتگ اَنت، کہ ھاران بازار ءَ دروشم مَٹ کتگ ءُ کُلّاہ بھا کنگ ءَ بیتگ-

جارکش ءَ گْوشتگ بی ایل ایف زورگریں پاکستانی پوجی کارمند ءُ ریاستی چیریں ادارھانی کارمندانی کوش زمہ واری ءَ منّ اِیت ءُ اے اِھد کنت کہ بلوچستان ءِ وتواجھی ءَ تاں زورگریں پوج ءَ نشانگ کنت-

بلوچستان ءِ بُنجاھی شھر چہ شال ءَ پاکستانی پوج ءَ بلال احمد ء امام بخش قمبرانی نامیں مردمے چہ کلی قمبرانی ءَ آوار جتگ ءُ ناشناسیں جاھے ءَ برتگ- کھول ءَ آئی ءِ پہ سلامتی یل کنائینگ لوٹ کتگ-

ایشی ءَ اَبید بلوچستان ءِ تیاب دپی شھر گودار ءَ چہ اِھوالکار رِد ءَ ھمے ماہ ھپدہ فروری ءَ یک پوجی چیک پوسٹ ءَ چہ پاکستانی پوج ءَ بختیار ء ناصر بلوچ ءُ آئی ءِ دو ھمراھانی پجّار عمیر نصیر ءُ ظھیر نصیر نام ءَ چہ بیتگ اَنت، سئیں آوار جتگ ءُ زورانسری بیگواہ کتگ اَنت-

بلوچستان ءَ زورانسری آوار جنی ءِ ھلاپ ءَ پُرکاریں گل بلوچ یکجھتی کمیٹی ءُ وائس فار بلوچ مسنگ پرسنز ءَ زورانسری آوار جنی ءِ گیش بیتگیں کیس دلپدردی درشان کنان ءَ میان استمانی ادارھاں چہ اے جُرمانی دارگ لوٹ کتگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ وتی ایکس ءَ پوسٹ ءَ ماتی زبانانی میان اُستمانی روچ ءِ درگت ءَ گوشتگ ‏مرچی ماتی زبانانی میان استمانی روچ انت، دنیا ءِ ھرچ راجے ءَ اے ھک ھست انت کہ وتی زباناں بہ پھاز اَنت، ءُ میان اُستمانی کانود ءِ رد ءَ اے ھک سرجمیں راجاں دیگ بوتگ کہ آ وتی زباناں ھبر بہ کن انت، بہ وان انت۔ پرے چیزاں آ آزات بہ بنت۔

آئی ءَ گوشتگ بلے بلوچ ءِ کلیں مردمی زندمان ءِ بنکی ھکاں ھوار زبانانی ھک ھم پچ گرگ بوتگ انت۔ بلے انچوش کہ بلوچ وتی زندمان ءِ کلیں ھکانی ھاتر ءَ جھد ءَ انت، آئی ءَ پہ وتی ماتی زبانانی دیمروئی ءِ ھاتر ءَ ھم جھد کنگ لوٹ ایت۔

آئی ءَ گوشتگ مرچی بلوچ راج چہ وتی زمین ءَ در بازیں ھند ءُ دمگانی بھر انت۔ جتائیں ملکاں شتگ ءُ نشتگ انت، بلے دنیا ءِ کجام اوں کنڈ ءَ کہ بلوچے نشتگ، منی گوں بلوچ کھولاں دزبندی انت کہ وتی لوگاں، وتی چکانی گوما، وتی چاگرد ءِ تہ ءَ وتی جند ءِ ماتی زباناں ھبر بہ کن ات، گوں وتی چکاں درآمدانی زباناں ھبر کنگ پہ وتی راجی پجار ءُ زبان ءَ مزنیں زلمے زانگ بیت انت۔

ھاسکار من گوں وتی بلوچ استاداں دزبندی کناں کہ شما پہ زبان ءِ دیمروئی ءَ مزنیں کردے پیلو کت کن ات، بلے اگاں شما وت دری زباناں بہ زور ات، نبشتہ بہ کن ات ءُ وتی چاگرد ءَ آھاں دیمروئی بہ د اِت گڑا لس مھلوک ءَ میارے پِر نہ بیت۔ شما ھرچی نبشتہ کن ات وتی ماتی زبان ءَ نبشتہ بہ کن ات، وتی نودربراں سکین بہ د اِت کہ بلوچی ءُ براھوئی ءَ ھوار وتی جند ءِ ھرچی کہ ماتی زبان انت ھمایاں بہ زور ات۔ بلوچ استاد یاکہ زبان دوست بلوچ ڈیھ ءُ دنیا ءِ ھرچ کنڈ ءَ کہ نشتگ اَنت اود ءَ بلوچءِ ماتی زباناں اکیڈمی جوڑ بہ کن اَت ءُ بلوچ ءَ وتی زبان ءَ بہ وانین ات۔ اگاں مرچی بلوچستان ءِ ھرچ دمگ ءُ میتگاں ھوار ھما شھراں کہ بلوچ نشتگ اَنت اود ءَ پہ وتی ماتی زباناں اکیڈمی جوڑ بہ کن انت، ءُ نودربر بلوچ ءِ ماتی زباناں وانینگ بہ بنت گڑا چہ آؤکیں دہ سالاں پد بلوچ راج ءِ ھمک مردم وتی جند ءِ ماتی زباناں وانگ ءُ نبشتہ کنگ ءَ ھیل گپت، گڑا پد ءَ مئے گور ءَ وت ماں وتی ھال ھوال ءِ زبان درآمدانی زبان نہ بنت، بگندئے مئے جند ءِ زبان بنت۔

گڈسر ءَ پدا گوں بلوچ سیاسی گل ءُ پارٹیاں دزبندی ھمیش انت کہ پہ بلوچ ءِ ماتی زبانانی دیمروئی ءِ ھاتر ءَ وتی وتی ریجناں وتی کرداں ادا بہ کن اِت۔ سیاسی گل وتی سرکلانی تہ ءَ اے گپ ءِ سر ءَ الّم باوست بہ کن اَنت کہ درآمدانی زبان ءِ کارمرز کنگ ءُ سیاسی کارانی ھاتر ءَ وتی جند ءِ ماتی زبانانی بدل ءَ درآمدانی زبان ءِ زورگ ءَ بلوچ پجار ءَ چینکس تاوان داتگ۔ چیاکہ ڈیھ، ربیدگ، دودمان، ءُ زبان راجدوستی ءِ چیدگ زانگ بنت۔ پمیشکا ایشانی زندگ دارگ المی انت۔

تَلکاریں ھونانی نشان ءُ ماتی زبانانی میان اُستمانی روچ

نبشتہ کار: الطاف منیر بلوچ

دی بلوچستان پوسٹ

(۲۱ فروری زبانانی میان استمانی روچ) زبان ءِ زندگ دارگ ءَ بازیں جھدے کنگ کپ ایت ءُ بازیں سکی ءُ سوری ھم سَگگ لوٹ ایت۔چیاکہ ایوک ءَ گپ کنگ ءَ زبان دیمروی نہ کنت ءُ اے درگت ءَ بازیں پِڑے ءَ بورتاچی کنگ کپ ایت چُشکہ وانگ ءُ زانگ ماں ماتی زبان ءَ بہ بیت، رسانک ءِ زبان ماتی زبان ءَ بہ بیت، لبزانک ماتی زبان ءَ بہ بیت،سرکاری ءُ نیم سرکاری کارگسانی زبان ءُ کُلیں کارپد ماتی زبان ءَ بہ بنت گڑا یک زبانے دیمروئی کت کنت۔چُشکہ مئے شھدیں بلوچی زُبان چہ اے کُلیں آسراتیاں زبھر اِنت بلئے انگت ءَ ھرکس وتی وس ءُ واک ءَ ایشی ءِ دیم ءَ برگ ءُ زندگ دارگ ءِ جھد ءُ کوشست ءَ اِنت۔چیاکہ زُبان زندگیں راجانی پجار اِنت ءُ زبان کہ زندگ اِنت گڑا راج ابدمان اِنت۔ سیدظھور شاہ ہاشمی گش ایت-

“راجے کہ بہ بیت گُنگ نہ مانیت نہ مانیت”
“مانیت پہ ادارکے بزان زندگ ءُُ مُردار”

دگنیا ءِ تہ ءَ ھر راج ءَ وتی ماتی زبان ءِ زندگ دارگ ءِ واستا قربانی دیگ ءَ چک ءُ پد نہ بوتگ ءُ آ کہ چک ءُ پد بوتگ اَنت مروچی بیست ءُ یکمی کرن ءَ آ چہ شھدیں زبان ءَ پھک ءَ زبھر انت ءُ ھر پڑ ءَ دری راجانی چم دار اَنت۔وھدیکہ ہر سال ءَ 21فروری ءِ روچ ماں سرجمیں دُگنیا ءَ میان اُستمانی ماتی زبانانی روچ ءِ نام ءَ برجم دارگ بیت گڑا مارا ھما شھید یات کاینت کہ آھاں وتی نُگرہیں سر پہ وتی ماتی زبان ءِ زندگ دارگ ءُ رکینگ ءَ ندر کُتگ انت۔

ھمئے روچ ءَ بزان 21فروری 1952 ءَ ڈھاکہ یونیورسٹی،جگن ناتھ یونیورسٹی ءُ ڈھاکہ میڈیکل کالج ءِ چار نودربراناں ڈھاکہ ہائی کورٹ ءِ دیم ءَ شھید کن انت چیاکہ آھانی لوٹ اَت کہ رودراتکی پاکستان ءَ اردو ءَ ھوار بنگالی ءَ را ھم سرکاری تک ءَ مننگ بہ بیت۔بلئے بدبھتی ءَ ھمئے نودربراناں آھانی ھمئے لوٹ ءِ پد ءَ شھید کن انت ءُ آھاں وتی ھیشی سر پہ وتی ماتی زبان ءِ پھازگ ءَ ندر کُت ءُ ماں سرجمیں دُگنیا ءَ یک نامے ایر کُت-

ھمے نودربرانی قربانی ءِ پد ءَ راجانی ھواریں گل (UNO) ءِ زیلی ادارگ UNESCO ءَ 17نومبر1999ءَ 21 فروری ءِ روچ پہ ماتی زباناں برجم دارگ ءِ جار پرینت ءُ ھمئے پیم ءَ ماں سرجمیں دُگنیا ءَ اے روچ شریں وڑے ءَ برجم دارگ بیت ۔ ھمے بنگالی نودربرانی یات کنگ ءِ واست ءَ ڈھاکہ ءِ تہ ءَ شہید مینار ءِ نام ءَ یک یادگاری مینارے ھم جوڑ کنگ بوتگ کہ ایشی ءِ سر ءَ ھما شھید بوتگیں نودربرانی اکس ھم جتگ اَنت۔

ھمے پیم ءَ 21فروری ءَ ماتی زبان ءِ برجم دارگ ءِ ھمراھی ءَ بائد انت ما بلوچ وتی بلوچی زبان ءِ دیمروی ءِ واست ءَ یک مشت بہ بہ ایں ءُ ھر کس وتی وس ءُ واک ءَ زبان ءِ دیمروئی ءَ گوں بلوچ راج ءِ کواس ءُ ندکاراں ھم کوپگ ءُ ھم گام بہ بیت ۔چیاکہ تپاکی زندگیں راجانی بُنکی چیدگ اِنت ۔تپاک بئے گڑا دیم ءَ جُنز اِت کن ئے ،دیم ءَ جنزگ ءِ واست ءَ ماتی زبان وتی ھمگام کنگ کپ ایت،ماتی زبان ءِ ھمگامی ءَ منزل ءَ کہ سر بئے گڑا پیریں مات ھم تئی منت ءَ پہ بچکندے گِیپت کہ منی بچ ءَ من ءَ ءُ منی زبان ءَ را چہ سھگریں وھد ءَ پھازیت ءُ رکینت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

مات سکینہ

نبشتہ کار : توکل بلوچ

دی بلوچستان پوسٹ

مرچی من “ میکسم گورکی ءِ ” نبشتگیں گِدار “ مات ءِ “ کسہ ءَ نہ کن آں بلکیں مات “ سکینہ ءِ ” کسہ ءَ کاراں کہ من وت ھمے کسھانی گواہ آں-

گُڈوپ پاھُو ، آواران ءِ آ دگہ ھلک ءُ میتگاں چہ باز دُور یک کوھی ئیں دمگے ءِ تہ ءَ اِنت کہ اود ءَ نہ وانگ جاہ ھست نہ ھسپتال ءُ نہ کہ دگہ آسراتی یے ، ھرچیزے کہ گندگ ءَ کیت تاں دُرست ابرم ءِ سوگات اَنت بس ،،، بلے ھمے بےآسراتی ئیں میتگ ءَ بَھادُر ءُ دِلیریں مات سکینہ ءِ لوگ ءَ دو تمردیں بَچ ھم ودی بیت کہ آھانی بے مَٹیں پلسپہ ( فلسفہ) بلوچ راجی گوستانک ءِ تہ ءَ پہ وتی پشکپتگیں ھمسپراں پہ یک مُھکمیں سکینے یے دروشُم ءَ مان اِیت ءُ ھما لیکھی ھمسپرانی راھشونی ءَ کنت-

مات سکینہ شھید صابر بلوچ اُرپ ءِ تاھیر ءُ شھید نیاز قادر اُرپ ءِ اُستاد گُمان ءِ دِلیریں مات اِنت ءُ گُڈوپ ، پاھُو آواران ءِ جاہ مِنند اِنت
2013 ءَ آواران ءَ زمین چنڈ کہ بیت گُڑا زوراکیں لشکر موہ کنت ءُ آواران ءِ گیشتریں کوچگ، ھَلک ءُ میتگاں دَور کنان کنت ءُ پہ لس مھلوک ءِ پھریزگ ءِ نیمون ءَ وتی بُنجلاں جوڑ کنان کنت ھمے رنگ ءَ گُڈوپ ، پاھُو ھم چہ ھمیشی ءِ ھوپ ءَ نہ رکیت ءُ پاکستانی لشکر گُڈوپ، پاھُو ءَ ھم وتی بُنجلے جوڑ کنت ءُ مات سکینہ ءَ گوں وتی میتگ ءِ مَردُماں چہ بُنکی میتگ گُڈوپ، پاھُو ءَ پہ لَڈّگ ءَ لاچار کنت گُڑا “مات سکینہ” پہ بے وسی وتی بُنکی میتگ ءَ چہ لَڈ ءُ بوج کنت ءُ دگہ یک میتگے ءَ آبا بیت بَلے اے زوراکی تھنا گوں لَڈّگ ءَ ھلاس نہ بیت ءُ دیمتر ءَ مات سکینہ ءِ “ جود ” واجہ کادِربکش چہ پاکستان ءِ پوج ءِ نیمگ ءَ پہ زورانسری بیگواہ کنگ بیت ھُدا بِزانت کہ اے دُژمنیں پوج ءِ دست ءَ چہ چونیں زُلم ءُ زوراکی ءَ گوں دُچار بوتگ اے گُمان کنگ نہ بیت پرچا کہ اے ناشریں پوج ءِ دست ءَ ھَمُک ورنا، پیر ءُ کماش ،زھگ ءُ زالبول کُل چہ ھمیشی ءِ ھَوپ ءَ نہ رَک اِت اِتگ اَنت برے یکے ءِ ٹَپ ءُ ٹوریں جون دَور دیگ بوتگ، برے کَسے بےوارسیں لاشے ءِ ھساب ءَ ماں گیابان ءَ بے کپن ءَ کَل کنگ بُوتگ ءُ لھتے تاں اَبد زندانی کُتگ پہ ھمے ھاتر ءَ من گُشت کن آں کہ واجہ کادر بکش دُژمن ءِ دست ءَ گوں چونیں زُلم ءُ زوراکیاں دُچار بوتگ تاں گوں من کِساس کنگ نہ بیت بَلے مات سکینہ ءَ گوں ھَوار واجہ کادربکش ءِ دِلیری ءُ بَھادُری گوں مُھکمی ءَ برجم بوتگ کہ اے دُرستیں زوراکیاں چہ اَبید نہ مات سکینہ پُشت ءَ کِنز اِتگ ءُ نہ کہ واجہ کادِر بَکش بَجّ اِتگ ءُ نہ آیانی دِلیری ءُ بَھادُری ءَ باجو بُوّگ ءِ نام زانتگ بلکیں مُدام تاھیر جان ءُ اُستاد گُمان ءِ مُھکمیں پِگر ءِ راھگیری کُتگ ءُ وتی تنگوئیں بَچ پہ ماتیں گُلزَمین ءِ ھاتر ءَ دائمی سالونک کُرتگ اَنت-

من ءَ یات اِنت کہ 2018 ءَ چاگردی رسانکدر ءَ چہ ھالے شِنگ اَت کہ چہ آواران ءَ چار زالبول پاکستان ءِ پوج ءَ بیگواہ کُتگ ءُ گوں وت بُرتگ ءُ پد ءَ لھتے روچ ءَ پد چہ اِستان ءِ نیمگ ءَ ھُزدار ءَ چِے زاھر کنگ بوت اَنت ءُ یک دروگیں ٹاپارے جنگ بوت کہ اے زالبول ( دھشتگرد ) ناشرکار اَنت-

مات سکینہ ! ھمے چاریں زالبولانی تہ ءَ یکے تو اِت ئے ءُ تو پمیشکا یک ناشرکارے اِت ئے کہ تئی تَمردیں بَچ تاھیر ءُ گُمان بد واھگیں دژُمن ءِ بَگیر ءَ سِلاہ بند اِت اَنت ءُ گوں مُھکمی ءَ جنگ دیان اِت اَنت ءُ پَھک ءَ گُلزمین ءِ شیدا اِت اَنت، بلوچستان ءِ آجوئی ءِ منزل ءِ کِشک ءِ مُساپرانی ھمسپر ءُ ھمکوپگ اِت اَنت ءُ پد ءَ تو وتی بچانی دُور ءُ گِستا بُوّگ ءِ درد ءَ ، پوج ءِ زوراکی ءَ میتگ ءِ لَڈ ءُ بَار ءِ رَنج ءَ گوں ھَوار دُرستیں رَنج ءُ گماں تھنا سگّگ ءَ اِت ئے ۔۔۔ ھردیں ھمے سکیانی ساھتاں کہ مَردُم ھیال بہ کنت ءُ بہ جیڑ اِیت گُڑا پد ءَ اے زانگ بیت کہ “ مات سکینہ “ تو چونیں نہ تُرس ءُ دِلیریں ماتے ئے ۔۔۔ ھمے وھد ءَ کہ اُستاد گُمان جان شھید کنگ بیت گُڑا یک ویڈیو کِلیپے ءَ “ مات سکینہ “ تئی توار گوشاں کَپت ءُ ترا تئی سالونکیں بَچ شھید اُستاد گُمان جان کُٹ ءَ اَت ءُ تو تران کنگ ءَ اِت ۓ کہ من ھچ گَمیگ ءُ پریشان نہ آں کہ منی سالونکیں بَچ مَروچی منی کُٹ ءَ واب اِنت ءُ نوں پہ دائمی وتی ماتیں گُلزَمین ءِ دامُن ءَ وش واب بیت ءُ گوں وتی ھمپِگریں سنگت ءُ دوزواھاں سلام ءُ دروت بیت ۔

وھدے کہ من اے دِلیریں بلوچ ماتاں گِند آں ( بلوچ ورناھاں ) مارا لوٹیت کہ ما “ مات سکینہ ءَ “ گوں شہید ڈاکٹر ھالد ءِ مات ءَ بہ وانیں، شھید رزا جھانگیر ءُ شھید اِمداد بَجیر ءِ مات ءَ بہ وانیں ءُ بِزانیں آ دگہ ھزاراں نمیران بوتگیں سنگتانی دِلیریں ماتانی کِسہ ءُ آیانی بَھادُری ءُ دِلیری ءَ بہ وانیں بَلے وت ءَ را یک ڈّنی ڈیھے یے لبزانک ءِ گِدارُکے ءَ لُک ءُ پابند باید اِنت مہ کنیں ۔۔ کہ ھمے دِلیریں ماتانی ھوسِلہ ، ھِمّت، بَھادُری — توکل — تَھمبُل ءُ برداشت پہ ما مُھکمیں سکینے کہ ھمے سکین راجی جُنز ءِ تہ ءَ پہ دائمی مئے راھشونی ءَ کن اَنت ۔

بلوچستان ءِ دمگ ھاران ءَ تیرگواری ءِ یک وئیلے ءَ دردمگی مردمے بیران بیتگ-

بیران بیتگیں مردم ءِ پجّار عبداللہ نام ءَ چہ بیتگ کہ سندھ جھممند گوشگ بیگ ءَ اِنت-

اِھوالکار رِد ءَ تیرگواری ءِ وئیل ءَ اے مرد ٹپی بیتگ کہ آ نادُراھجاہ ءَ برگ بیتگ اود ءَ آئی ءَ ٹپّانی درد نہ سگ اِتگ ءُ بیران بیتگ-

وئیل سوب انگت زانگ نہ بیتگ-

گوستگیں روچ ءَ کسان سالی ئیں کریم بخش ء منظور ءِ میت ءِ ھمراھی ءَ شھید فدا چوک ءَ نندانک برجاہ ءَ اِنت-

نندانک ءَ زالبول، چُک ءُ مردین ھوار اَنت وھدے کہ بلوچ یکجھتی کمیٹی ءَ اَبید دگہ سیاسی ءُ چاگردی باسک ھم ھوار اَنت-

زانگ بہ بیت کہ کریم بخش منظور پشمبے ءِ بیگاہ ءَ تمپ، کوھاڈ ءَ سلاہ بندیں مردماں تیرگواری کتگ ءُ کُشتگ اَت چریشی ءِ پُشدر ءَ کھول ءَ میت ءِ کل ءُ کسارت کنگ ءِ نندانک بندات ءَ جدگال ڈن ( ڈی بلوچ پوائنٹ ) ءَ برتگ ایم ایٹ شھدگ سر ءَ نندانک داتگ وھدے کہ شپ ءِ سے ءِ نزیک ءَ آ شھید فدا چوک ءَ اتکگ ءُ اد ءَ نندانک دیگ ءَ اَنت-

راجی پارٹیانی گوشگ اِنت کہ ورنا پاکستانی پوج ءِ پلامرزی ٹولی سلاہ بند ڈیتھ اسکواڈ ءِ کارمنداں تیرگواری کتگ ءُ کُشتگ چریشی ءِ ھلاپ ءَ کھول ءَ نندانک داتگ-