تَلکاریں ھونانی نشان ءُ ماتی زبانانی میان اُستمانی روچ
نبشتہ کار: الطاف منیر بلوچ
دی بلوچستان پوسٹ
(۲۱ فروری زبانانی میان استمانی روچ) زبان ءِ زندگ دارگ ءَ بازیں جھدے کنگ کپ ایت ءُ بازیں سکی ءُ سوری ھم سَگگ لوٹ ایت۔چیاکہ ایوک ءَ گپ کنگ ءَ زبان دیمروی نہ کنت ءُ اے درگت ءَ بازیں پِڑے ءَ بورتاچی کنگ کپ ایت چُشکہ وانگ ءُ زانگ ماں ماتی زبان ءَ بہ بیت، رسانک ءِ زبان ماتی زبان ءَ بہ بیت، لبزانک ماتی زبان ءَ بہ بیت،سرکاری ءُ نیم سرکاری کارگسانی زبان ءُ کُلیں کارپد ماتی زبان ءَ بہ بنت گڑا یک زبانے دیمروئی کت کنت۔چُشکہ مئے شھدیں بلوچی زُبان چہ اے کُلیں آسراتیاں زبھر اِنت بلئے انگت ءَ ھرکس وتی وس ءُ واک ءَ ایشی ءِ دیم ءَ برگ ءُ زندگ دارگ ءِ جھد ءُ کوشست ءَ اِنت۔چیاکہ زُبان زندگیں راجانی پجار اِنت ءُ زبان کہ زندگ اِنت گڑا راج ابدمان اِنت۔ سیدظھور شاہ ہاشمی گش ایت-
“راجے کہ بہ بیت گُنگ نہ مانیت نہ مانیت”
“مانیت پہ ادارکے بزان زندگ ءُُ مُردار”
دگنیا ءِ تہ ءَ ھر راج ءَ وتی ماتی زبان ءِ زندگ دارگ ءِ واستا قربانی دیگ ءَ چک ءُ پد نہ بوتگ ءُ آ کہ چک ءُ پد بوتگ اَنت مروچی بیست ءُ یکمی کرن ءَ آ چہ شھدیں زبان ءَ پھک ءَ زبھر انت ءُ ھر پڑ ءَ دری راجانی چم دار اَنت۔وھدیکہ ہر سال ءَ 21فروری ءِ روچ ماں سرجمیں دُگنیا ءَ میان اُستمانی ماتی زبانانی روچ ءِ نام ءَ برجم دارگ بیت گڑا مارا ھما شھید یات کاینت کہ آھاں وتی نُگرہیں سر پہ وتی ماتی زبان ءِ زندگ دارگ ءُ رکینگ ءَ ندر کُتگ انت۔
ھمئے روچ ءَ بزان 21فروری 1952 ءَ ڈھاکہ یونیورسٹی،جگن ناتھ یونیورسٹی ءُ ڈھاکہ میڈیکل کالج ءِ چار نودربراناں ڈھاکہ ہائی کورٹ ءِ دیم ءَ شھید کن انت چیاکہ آھانی لوٹ اَت کہ رودراتکی پاکستان ءَ اردو ءَ ھوار بنگالی ءَ را ھم سرکاری تک ءَ مننگ بہ بیت۔بلئے بدبھتی ءَ ھمئے نودربراناں آھانی ھمئے لوٹ ءِ پد ءَ شھید کن انت ءُ آھاں وتی ھیشی سر پہ وتی ماتی زبان ءِ پھازگ ءَ ندر کُت ءُ ماں سرجمیں دُگنیا ءَ یک نامے ایر کُت-
ھمے نودربرانی قربانی ءِ پد ءَ راجانی ھواریں گل (UNO) ءِ زیلی ادارگ UNESCO ءَ 17نومبر1999ءَ 21 فروری ءِ روچ پہ ماتی زباناں برجم دارگ ءِ جار پرینت ءُ ھمئے پیم ءَ ماں سرجمیں دُگنیا ءَ اے روچ شریں وڑے ءَ برجم دارگ بیت ۔ ھمے بنگالی نودربرانی یات کنگ ءِ واست ءَ ڈھاکہ ءِ تہ ءَ شہید مینار ءِ نام ءَ یک یادگاری مینارے ھم جوڑ کنگ بوتگ کہ ایشی ءِ سر ءَ ھما شھید بوتگیں نودربرانی اکس ھم جتگ اَنت۔
ھمے پیم ءَ 21فروری ءَ ماتی زبان ءِ برجم دارگ ءِ ھمراھی ءَ بائد انت ما بلوچ وتی بلوچی زبان ءِ دیمروی ءِ واست ءَ یک مشت بہ بہ ایں ءُ ھر کس وتی وس ءُ واک ءَ زبان ءِ دیمروئی ءَ گوں بلوچ راج ءِ کواس ءُ ندکاراں ھم کوپگ ءُ ھم گام بہ بیت ۔چیاکہ تپاکی زندگیں راجانی بُنکی چیدگ اِنت ۔تپاک بئے گڑا دیم ءَ جُنز اِت کن ئے ،دیم ءَ جنزگ ءِ واست ءَ ماتی زبان وتی ھمگام کنگ کپ ایت،ماتی زبان ءِ ھمگامی ءَ منزل ءَ کہ سر بئے گڑا پیریں مات ھم تئی منت ءَ پہ بچکندے گِیپت کہ منی بچ ءَ من ءَ ءُ منی زبان ءَ را چہ سھگریں وھد ءَ پھازیت ءُ رکینت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-