بلوچ یکجھتی کمیٹی ءِ سروک ڈاکٹر ماہ رنگ بلوچ ءَ وتی ایکس ءَ پوسٹ ءَ ماتی زبانانی میان اُستمانی روچ ءِ درگت ءَ گوشتگ مرچی ماتی زبانانی میان استمانی روچ انت، دنیا ءِ ھرچ راجے ءَ اے ھک ھست انت کہ وتی زباناں بہ پھاز اَنت، ءُ میان اُستمانی کانود ءِ رد ءَ اے ھک سرجمیں راجاں دیگ بوتگ کہ آ وتی زباناں ھبر بہ کن انت، بہ وان انت۔ پرے چیزاں آ آزات بہ بنت۔
آئی ءَ گوشتگ بلے بلوچ ءِ کلیں مردمی زندمان ءِ بنکی ھکاں ھوار زبانانی ھک ھم پچ گرگ بوتگ انت۔ بلے انچوش کہ بلوچ وتی زندمان ءِ کلیں ھکانی ھاتر ءَ جھد ءَ انت، آئی ءَ پہ وتی ماتی زبانانی دیمروئی ءِ ھاتر ءَ ھم جھد کنگ لوٹ ایت۔
آئی ءَ گوشتگ مرچی بلوچ راج چہ وتی زمین ءَ در بازیں ھند ءُ دمگانی بھر انت۔ جتائیں ملکاں شتگ ءُ نشتگ انت، بلے دنیا ءِ کجام اوں کنڈ ءَ کہ بلوچے نشتگ، منی گوں بلوچ کھولاں دزبندی انت کہ وتی لوگاں، وتی چکانی گوما، وتی چاگرد ءِ تہ ءَ وتی جند ءِ ماتی زباناں ھبر بہ کن ات، گوں وتی چکاں درآمدانی زباناں ھبر کنگ پہ وتی راجی پجار ءُ زبان ءَ مزنیں زلمے زانگ بیت انت۔
ھاسکار من گوں وتی بلوچ استاداں دزبندی کناں کہ شما پہ زبان ءِ دیمروئی ءَ مزنیں کردے پیلو کت کن ات، بلے اگاں شما وت دری زباناں بہ زور ات، نبشتہ بہ کن ات ءُ وتی چاگرد ءَ آھاں دیمروئی بہ د اِت گڑا لس مھلوک ءَ میارے پِر نہ بیت۔ شما ھرچی نبشتہ کن ات وتی ماتی زبان ءَ نبشتہ بہ کن ات، وتی نودربراں سکین بہ د اِت کہ بلوچی ءُ براھوئی ءَ ھوار وتی جند ءِ ھرچی کہ ماتی زبان انت ھمایاں بہ زور ات۔ بلوچ استاد یاکہ زبان دوست بلوچ ڈیھ ءُ دنیا ءِ ھرچ کنڈ ءَ کہ نشتگ اَنت اود ءَ بلوچءِ ماتی زباناں اکیڈمی جوڑ بہ کن اَت ءُ بلوچ ءَ وتی زبان ءَ بہ وانین ات۔ اگاں مرچی بلوچستان ءِ ھرچ دمگ ءُ میتگاں ھوار ھما شھراں کہ بلوچ نشتگ اَنت اود ءَ پہ وتی ماتی زباناں اکیڈمی جوڑ بہ کن انت، ءُ نودربر بلوچ ءِ ماتی زباناں وانینگ بہ بنت گڑا چہ آؤکیں دہ سالاں پد بلوچ راج ءِ ھمک مردم وتی جند ءِ ماتی زباناں وانگ ءُ نبشتہ کنگ ءَ ھیل گپت، گڑا پد ءَ مئے گور ءَ وت ماں وتی ھال ھوال ءِ زبان درآمدانی زبان نہ بنت، بگندئے مئے جند ءِ زبان بنت۔
گڈسر ءَ پدا گوں بلوچ سیاسی گل ءُ پارٹیاں دزبندی ھمیش انت کہ پہ بلوچ ءِ ماتی زبانانی دیمروئی ءِ ھاتر ءَ وتی وتی ریجناں وتی کرداں ادا بہ کن اِت۔ سیاسی گل وتی سرکلانی تہ ءَ اے گپ ءِ سر ءَ الّم باوست بہ کن اَنت کہ درآمدانی زبان ءِ کارمرز کنگ ءُ سیاسی کارانی ھاتر ءَ وتی جند ءِ ماتی زبانانی بدل ءَ درآمدانی زبان ءِ زورگ ءَ بلوچ پجار ءَ چینکس تاوان داتگ۔ چیاکہ ڈیھ، ربیدگ، دودمان، ءُ زبان راجدوستی ءِ چیدگ زانگ بنت۔ پمیشکا ایشانی زندگ دارگ المی انت۔