بلوچستان ءِ دمگ مستونگ ءَ سیندک منسوبگ ءِ مڈی باریں گاڑی ءُ آہانی سیکورٹی سلاہ بندیں اُرش ءَ نشانگ جوڑ کنگ بوتگ انت۔
مرچی سھب ءِ 9بج ءِ نزیک ءَ مستونگ ءِ دمگ کھڈکوچہ ءَ گرو ءِ ھند ءَ مزنیں کساسے ءَ سلاہ بندیں مردماں سیندک منسوبگ ءِ معدنیات ءِ برگ ءِ کنٹینر گاڑیانی کاروان ءُ پہ پھزداری ءِ ھاتر ءَ دیگ بوتگیں پاکستانی لشکر ءِ گاڑیانی سر ءَ اُرش کتگ۔
دمگی مردمانی رد ءَ دمگ ءَ مزنیں تیر گواری ءُ تراکانی توار بوتگ ءُ بکتر بندیں گاڑی ءَ ھوار بازیں کنٹینر گاڑی ءِ سر ءَ اُرش کنگ بوتگ۔
واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔
انگت ءَ اے اُرش ءِ زمہ واری کس ءَ نہ گپتگ بلے بلوچ لبریشن آرمی ءَ ‘ زرکاری ناکہ بندی’ ءِ جار جتگ کہ ایشی ءِ چیر دستی ءَ بلوچستان ءِ مستریں شاھدگانی سر ءَ کنٹرول ءُ معدنیات ءَ ھوار دگہ کاروباری گاڑیانی سر ءَ اُرش گیش بوتگ اَنت۔