بلوچستان ءِ بنجاھی شھر شال ءِ دمگ پنجپائی ءِ کش ءُ گوری دمگاں فوجی آپریشن ءَ گوستگیں لھتے روچاں کلی محمد خیل ءِ مشوانی ٹک ءِ 300 ءِ نزیک ءَ ھاندان چہ وتی پت ءُ پیروکانی لوگاں درکپگ ءَ لاچار بیتگ انت۔
وھدے کہ پاکستانی لشکر ءِ نیمگ ءَ توپ ءُ سلاہ ءِ تیرگواری ءُ مزنیں سلاھانی تیر گواری ءِ سبب ءَ بازیں لوگاں تاوان رس اتگ۔ دمگی ھالانی رد ءَ سانمندیں ھاندانانی تہ ءَ جنین، زھگ ءُ پیریں مردم ھوار اَنت کہ آ ھور، سرد ءُ بے وسی ءِ سبب ءَ سکیں جیڑھانی آماچ اَنت۔ چہ لوگاں درکپتگیں ھاندان جھمنندی ، ورگ، ساپیں آپ ءُ دگہ بنیاتی لوٹانی بابت ءَ جیڑھانی آماچ اَنت۔
سانمندیں ھانداناں گْوشتگ کہ آ نہ زان اَنت کہ آ وتی چُک ءُ ھاندان ءَ کجا بہ رو اَنت ءُ کدی وتی لوگاں واتر کت کن ایں۔
پنجپائی بلوچستان ءِ شال ءِ تھسیلے ءُ شھر ءِ کوچگی دمگ ءَ انت کہ شال ءِ شھر ءِ زرباری روکپتی نیمگ ءَ انت۔ اے شال ءِ بنجاھی شھر ءَ ڈن ءَ کوچگی ءُ ٹکی دمگ انت۔ سرکار ءِ آسار قدیمہ ءِ محکمہ ءِ ریکارڈ ءَ ھم پنجپائی شال ءِ بھر ءُ شال ءِ زرباری روکپت ءَ جاہ انت۔ سر بیتگیں اھوالانی رد ءَ 4 نومبر 2026 ءَ پنجپائی ءِ کلی محمد خیل ءَ پاکستانی لشکر ءُ سلاہ بندیں مردمانی نیام ءَ جنگ بوتگ کہ ایشی ءِ تہ ءَ فرنٹیئر کور ءِ کارندہ ءِ بیرانی ءِ ھال ھم بیتگ انت۔ اے درگت ءَ دمگی مردمانی رد ءَ پنجپائی ءِ کلی محمد خیل ءَ اوگان پناہ گزین کیمپ ءِ کش ءُ گور ءَ سیکورٹی ءُِ انگیر ءُ دمگ ءِ نندوکیں مردماں دمگ ءَ لڈ ءُ بار کنگ ءِ اھوال دیم ءَ اتکگ انت۔
پشتونخوا نیشنل عوامی پارٹی ءَ 300 ھاندان ءِ لڈ ءُ بار کنگ ءِ سر ءَ دلپدردی درشان کتگ ءُ سانمندیں بوتگیں مردمانی جان سلامتی ءَ واتر کنگ، پناہ گاہ ءِ پجارینگ، وردن ءُ درمان ءِ پجارینگ ءِ لوٹ کرتگ۔ 
پشتونخوا ملی عوامی پارٹی ءِ صوبائی سیکرٹریٹ ءِ نیمگ ءَ چہ شنگ بوتگیں بیان ءَ سداں ھاندان ءُ ھزاراں مردم چہ وتی بنکی دمگاں زوراکی ءَ لڈینگ ءِ سر ءَ دلپدردی ءُ اپسوز ءِ درشانی کنگ بوتگ۔
بیان ءِ تہ ءَ گْوشگ بیتگ کہ سیکورٹی کارروائیانی وھد ءَ دمگی آبادی ترس ءُ بیم ءِ آماچ اِنت ءُ لوگانی پٹ ءُ پول ءُ لوگانی دودمان ءِ پادمالی ءِ ھلاپ ورزی ءِ سبب ءَ شھریانی تہ ءَ بدامنی گیش بوھگ ءَ اِنت۔
پارٹی ءَ اے لیکہ زرتگ کہ امن ءُ ایمنی ءِ برجائی حکومت ءِ اولی زمہ واری انت ءُ ناشرکاری ءِ ھلاپ ءَ کارروائی کنگ ءِ وھد ءَ لس شھری، آھانی لوگ، زمین ءُ مال ءِ رکھینگ ءَ را دل یکیمی کنگ بہ بیت۔