شال ءَ عوامی نیشنل پارٹی ءِ نیمگ ءَ برجم داشتگیں آل پارٹی کانپرنس ءَ یازدہ سیاسی گلاں بھر زرتگ ات کہ ایشی ءِ تہ ءَ بلوچستان ءَ امن ءُ ایمنی ءِ جاور ھال ءِ ھراب بوگ، گیش بوھوکیں ناامنی ءُ پیسریگیں اوگان سیکورٹی لشکر ءِ کارندھانی ناجائزیں ھست بوگ ءِ سر ءَ سنگینیں جیڑھانی درشانی کنگ بوتگ۔ کانپرنس ءِ جار ءَ 19 نومبر ءَ سرجمیں بلوچستان ءَ شٹر ڈاؤن ھڑتال ءُ دراھیں بنجاہی پریس کلبانی دیم ءَ زھرشانی ءِ جار جنگ بوتگ وھدے کہ 26 نومبر ءَ دگہ آل پارٹی کانپرنس ءِ داوت دیگ ءِ پیسلہ کنگ بوتگ کہ اے جیڑھانی سر ءَ گیشتر گپ ءُ تران کنگ بہ بیت۔
کانپرنس ءَ پد اے این پی بلوچستان ءِ سوبائی سدر اصغر ھان اچکزئی ءَ اھوالکاراں گوں تران کنان ءَ گشتگ کہ بلوچستان ءَ سرکار ءِ رٹ ھلاس بوتگ، لس مردمانی جیڑھاں گیش ءُ گیوار کنگ ءِ کس نیست ءُ لس مھلوک ءِ ایمنی ءِ ذمہ واریں ادارہ ءُ کارندہ وت 2018 ءَ سیکوگ انت۔
بلوچستان ءَ سلاہ بندیں گلانی دست ءَ داتگ انت ءُ سوبائی بنجاھی شھر شال ءِ رڈ زون ھم گندگ ءَ کیت کہ آ سرکار ءِ رٹ ءَ چہ زبھر انت ۔ آئی ءَ گْوشت کہ بادشاھی ءِ سر ءَ جُست کنوکیں مردماں گدار گْوشگ بیت، وھدیکہ راج ءِ بنیاتی جیڑہ ءُ امن ءُ ایمنی ءِ جاور ھال ءِ سر ءَ گپ جنوکیں مردمانی توار ءِ سرکوب کنگ ءِ کوشست کنگ بیت۔
دومی نیمگ ءَ کیلہ عبداللہ بار ایسوسی ایشن ءِ سدر ھمید اللہ کاکر ایڈووکیٹ ءَ گوں ھمراھیں وکیلاں شال پریس کلب ءَ پریس کانپرنس کنان ءَ درائیں دمگاں چہ سلاہ بندیں مردم آرگ ءُ جتا جتائیں جاھاں آباد کنگ ءِ اَمل ءَ را بے دروریں جیڑہ لیک اتگ۔
آئی ءَ داوا کتگ کہ لھتیں روچ پیسر سلاہ بندیں مردماں یک میتگے ءِ سر ءَ اُرش کتگ ءُ ایشی ءِ آسر ءَ گران بھائیں انسانی جان ءِ تاوان بوتگ۔ آئی ءِ گشگ ءِ رد ءَ کیلہ عبداللہ ءَ اوگان سیکورٹی لشکر ءِ لھتیں پیسریگیں کارندہ شناکتی کارڈ ءِ چیک کنگ ءَ پد دمگی شھری آوار جنگ، زُور ءُ کوش ءِ وڑیں مزنیں جرماں ھوار اَنت کہ اے دمگ ءَ ترس ءُ بیم ءِ شنگ کنگ ءَ اِنت۔
زانگ بہ بیت کہ دی بلوچستان پوسٹ نیوز ءَ شنگ بوتگیں رپورٹے ءِ تہ ءَ دمگی مردماں اے ھم داوا کتگ کہ ھما دمگاں کہ پیسریگیں اوگان سیکورٹی کارندہ آباد بوتگ اَنت آھانی تہ ءَ دُزی، لٹ ءُ کُٹ ءُ منشیات ءِ کارمرد کنگ ءِ وئیل گیش بوتگ اَنت کہ ایشی ءِ سبب ءَ دمگی مردمانی تہ ءَ سکیں بے تاھیری یے ھست۔
ھالانی رد ءَ پشتون آبادی ءِ دمگاں سیاسی گلانی سر ءَ ھم زور دیگ ءِ کوشست کنگ بوگ ءَ اِنت کہ آ اے کارندھاناں سیاسی کمک بہ کن اَنت بلے تاں انوگ ءَ ھچ سیاسی گل ءِ نیمگ ءَ اے کار ءِ ھمایت ءِ سرکاری منّگ نہ بوتگ۔
وسیلگ ءِ رد ءَ شال ءِ ھزار گنجی، کوچلک ءُ سرانان ءِ دمگاں اوگانستان ءِ پیسریگیں سیکورٹی کارندھانی مبینہ کیمپ انگت ءَ ھست اَنت۔ ھمے رنگ ءَ زھری، زیدی، سلتان شھر ءُ ھاران ءِ دمگ برشونکی ءَ جنگی کارروائیانی وھد ءَ اوگانستان ءِ پیسریگیں سیکورٹی کارندہ پاکستانی لشکر ءِ ھمراھی ءَ گندگ بوگ ءِ ھال ھم دیم ءَ اتکگ۔
اے سال ءَ ھزدار ءَ بلوچ لبریشن آرمی ءِ نیمگ ءَ چہ سرکار ءِ کمک ءَ یک سلاہ بندیں گلے ءِ سروک شپیک مینگل ءِ پناہ گاہ ءِ سر ءَ اُرش ءِ وھد ءَ اوگانستان ءِ پیسریگیں سیکورٹی کارندھانی کُشگ ءِ ھال ھم شنگ بوتگ۔
سیاسی ءُ چاگردی دمگ بلوچستان ءِ امن ءُ ایمنی ءِ جاور ھال ، شھریانی رکینگ ءُ مبینہ ناجائزیں سلاہ بندیں مردم ءِ ھست بوگ ءِ بابت ءَ ساپ ءُ پلگاریں پٹ ءُ پول ءُ تچکیں گامگیج لوٹگ ءَ اَنت۔
آل پارٹی کانپرنس ءِ پیسلہ ءِ رد ءَ 19 نومبر ءَ سرجمیں سوبہ ءَ شٹر ڈاؤن ھڑتال ءُ زھرشانی ءِ باھَند کنگ بیت ءُ 26 نومبر ءَ دگہ آل پارٹی کانپرنس برجم دارگ بیت کہ ایشی ءِ تہ ءَ آیوکیں کارروائی ءِ رھبند ءِ زانگ بیت۔