ھکومت ءِ کانونی زمہ واری اِنت کہ آ زورانسری بیگواہ کنگ ءَ ھلاس بہ کنت۔ نسر اللہ بلوچ

وائس پار بلوچ مسنگ پرسنز ءِ نیمگ ءَ کوئٹہ پریس کلب ءِ دیم ءَ زوراکیں بیگواہ کنگ ءِ ھلاپ ءَ برجم داشتگیں زھرشانی کیمپ تاں 6411 روچ برجاہ اِنت۔

اے وھد ءَ جتا جتائیں مکتب پکر ءَ سیادی داروکیں مردماں زھرشانی ءِ کیمپ ءِ تر ءُ تاب کتگ ءُ بیگواھیں مردمانی کھول ءِ گوما یکوی زھرشانی کتگ۔

اے موہ ءِ سر ءَ وی بی ایم پی ءِ چیئرمین نسر اللہ بلوچ ءَ گوشتگ کہ زوراکیں بیگواہ کنگ ءِ راھبند ءِ کانون ھکومتانی بنکی رھبندانی ھلاپ اِنت ۔ ھکومت ءِ راھبندی ءُ کانونی ذمہ واری اِنت کہ آ شھریانی زند، مال ءُ مڈی ءُ بنیادی ھکانی رکینگ ءَ را دل یکیمی بہ کنت ءُ زوراکیں بیگواہ کنگ ءِ ھلاسی ءِ ھاتر ءَ املی گامگیج بہ زور اِیت۔

آئی ءَ لوٹ کرتگ کہ دراھیں بیگواھیں مردم زوت سر کنگ بہ بنت۔
اگاں کجام ھم مردم ءِ سر ءَ ھرچ وڑیں بھتام ھست آ کانود ءِ رد ءَ آمید گس ءَ پیش کنگ بہ بیت ءُ پکائیں کانودی کارروائی کنگ بہ بیت ۔
ھچ شھری ءَ کانونی لوٹانی پیلو کنگ ءَ ابید بندیگ کنگ یا آئی ءِ لوگ ءِ مردماں چہ آئی ءِ جاور ءُ جاہ ءَ بے ھال کنگ نہ منّگ بیت۔

نسر اللہ بلوچ ءَ گوشتگ کہ ھکومت بیگواھیں مردمانی جیڑہ ءَ را سنجیدگی ءَ گوں گیش ءُ گیوار کنگ ءِ واستا سان مندیں گامگیج چست بہ کنت، آماچیں کھولان ءَ انساپ ءُ سرپدی بہ دنت، ءُ زوراکیں بیگواہ کنگ ءِ ویلانی پٹ ءُ پول ءَ بہ کنت ءُ زمہ واریاں زاھر بہ کنت۔

آئی ءَ گیش گوشتگ کہ زوراکیں بیگواھی دائمی ھلاس کنگ بہ بیت، بیگواھیں مردم پچ گرگ ءُ آماچیں ھانداناں انساپ بہ رس اِیت ریاست ءُ سرکار ءِ مستریں ذمہ واری ھمش اَنت۔