TBP Balochi

اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 89 تالبان ءِ ناشرکاریں جنگول کُشگ ءُ 82 سکی ءَ ٹپی بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی جنگی اُرشاں 89 تالبان جنگول کُشتگ ءُ 82 سک ٹپی کُتگ اَنت۔

وتی ٹیوٹر پیگام ءَ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت کُنر، کندھار، ھِرات، پَراہ، پریاب، سمنگان، ھِلمند، نِمروز، ٹھکر ءُ کپیسہ ءَ دمگاں کُتگ اَنت ءُ اِے جنگی اُرشاں دژمن ءِ راہ ءُ دگانی سر ءَ 13 چیریں بمب ءُ شور ھم کَشگ ءُ ناکار کنگ بیتگ اَنت۔

یات بہ بیت کہ چہ ایشی ءَ پیشی روچ ءَ اوگان راجی لشکر ءِ تْرُندیں جنگی اُرشانی سوب ءَ 175 تالبان کُشگ ءُ 84 سکی ءَ زدگ ءُ ٹپی بیتگ اِت اَنت ءُ ھمے جنگی اُرش ولایت نگرھار، پکتیکا، لوگر، گزنی، کندھار، ھرات، بلگ، جوزجان، سمنگان، سارئےپول، ھِلمند، بدکشان، کندوز ءُ بلگان ءَ کُتگ اَنت۔
دومی نیمگ ءَ ماں کابل شھر ءَ یک جارکشی دیوانے ءَ ماں اوگانستان ءِ امریکی بُنجاھی سروک جنرل پرینک کنیت مکینزی ءَ گْوشتگ کہ پہ اوگان راجی لشکر ءِ جنگی کُمک ءَ امریکہ ءَ وتی بالیگرابانی بمب گْواری ءُ جنگی اُرش تْرُند کُتگ اَنت ءُ ھمے اُرشانی تْرّندی ءَ یکشل ءَ برجاہ بنت۔ دیم گْوشتگ ئِے کہ ناشرکاریں تالبان ھمے جُھد ءَ اَنت کہ اوگانستان ءَ انچیں جاورھال ودی بہ بنت کہ چریشی ءَ آیانی باج ءِ مارشت ودی بہ بنت بلے اِے درگت ءَ تالبان رَد اَنت ءُ آیاں ھچ وڑ ءَ باج نہ رس ایت۔

چہ اِے جارکشی دیوان ءَ امریکی جنگی سروک ءَ ھمے باوری ھم داتگ کہ 31 اگست ءَ چہ اوگانستان ءَ امریکی لشکر ءِ سرجمی ءَ درکپگ ءَ پد ھم پہ اوگان راجی لشکر ءِ کُمک ءَ امریکہ ءِ جنگی کُمک یکشل برجاہ بنت ءُ ھمے تیوگیں جنگی کُمک چہ آزمان ءَ بالیگرابانی بمب گْواری ءُ میزائیلانی اُرش ءِ دْروشم ءَ بنت۔

ایشی ءَ پیسر اوگانستان ءِ امریکی جنگی سروک ءَ ماں راجی ماڑی ءَ گوں اوگان راجی کارمستر واجہ اشرپ گنی ءِ سروگانی گوں دِگہ وزیراں نِند ءُ نیادے کُت۔ ماں اِے دیم پہ دیمی نِند ءُ نیاد ءَ دزگِیر کُتگیں دمگانی آجوئی ءَ ھورت ءُ دلگوشی ءَ گپ ءُ تْران بوتگ۔ ایشی ءَ پیسر اوگان تھی کارانی وزیر ءَ گْوشتگ کہ دو ماہ ءَ پیسر تالبان ءِ دست ءَ دزگِیر بوتگیں دمگانی آجو کنگ ءِ ھاتر ءَ شَور ءُ مراسا اڈ دیگ بوتگ اَنت نی بس کار بُنگیج کنگ لوٹ ایت۔ چہ ایشی ءَ پیسر راجی کارمستر واجہ اشرپ گنی ءَ ھم گْوشتگ اَت کہ تالبان ءِ ھلاپ ءَ شش ماہ ءِ جنگی مَراسا تیار اَنت ءُ شش ماہ ءَ پد ءَ اوگانستان ءِ ھالت یکدم بدل بنت۔

ما بے ھال مہ بہ ایں کہ سے روچ ءَ پیسر زِرباری کندھار ءُ ھِلمند ولایت ءِ بازیں دمگاں امریکی جنگی بالیگراباں ناشرکاریں تالبان جنگولانی جنگی کاروان، بُنجاہ ءُ سنگرانی سر ءَ اُرش کُتگ اَنت چریشی ءَ تالبان ءِ پنچ جنگی کماندار ءَ ھوار بازیں کچے ءَ جنگول مُرتگ ءُ بے کساس جنگی آسراتیانی تاوانے رستگ اَت۔

دومی نیمگ ءَ اوگان راجی پھزگ ءِ کارگس ءَ وتی جار ءَ گْوشتگ کہ پہ دزگِیر کُتگیں دمگانی آجوئی ءَ جنگی تیاری ءُ جُھد بوگ ءَ اِنت، گْوستگیں بیست ءُ چار ادارانی تہ ءَ دُژمن ءِ 170 جنگول کُشگ بوتگ ءُ دژمن ءِ بگِری ءَ مئے راجی لشکر ءِ بُرزی ءُ جھلی جنگی اُرش یکشل ءَ برجاہ اَنت۔

راجی پھزگ ءِ جارکش واجہ پواد امن ءَ گْوشتگ “مئے راجی لشکر ماں جنگ ءَ باج زُوران اِنت چریشی ءَ دژمن پدکِنِزگ ءَ بے وس اِنت ھمروچ راجی لشکر چہ دژمن ءَ کوچگ ءُ دمگاں آجو کنان اِنت-

ڈپٹی کمشنر کیچ حسین جان بلوچ ءَ کیچ ءَ جھانی وبا کرونا نادراھی ءِ گر ءُ دار کنگ ءِ سر ءَ پانزدہ روچ ءَ کیچ ءَ لاؤک ڈاؤن کنگ ءِ جار جتگ –

ڈپٹی کمشنر کیچ ءَ گُشتگ کہ لاک ڈاؤن ءَ نیزگاریں مردم آسرمند بیت کن اَنت بلے دگہ راہ نیست ابید ءِ لاک ڈاؤن ءَ –

ڈپٹی کمشنر کیچ حسین جان ءَ گُشتگ کہ اے اتکگیں آپت ءِ گت ءُ دار کنگ ءِ واستا مھلوک، تاجر برادری،سول سوسائٹی، علما کرام، وکیل، اھوالکاراں ھوار دراھیں تکاں بندوکیں مردم نادراھی ءِ ھلاس کنگ ءَ کمک بہ کن اَنت –

اے گپانی درشانی یکشمبے ءِ روچ ءَ وتی کارگس ءَ سیاسی پاٹی، کیچ سول سوسائٹی ءُ انجمن تاجران تربت ءِ رھشونانی گون ءَ تران کنان ءَ گُشتگ اَنت –

نیاد ءَ کیچ سول سوسائٹی ءِ کنوینر التاز سخی، بی این پی عوامی ءِ بنجاھی پتر ءِ باسج خلیل تگرانی، پیپلز پاٹی ءِ کیچ ءِ سروک قدیر اھمد بلوچ، جمعیت اھک ھدیس ءِ بنجاھی رھشعن یلان زامرانی، انجمن تاجران کیچ ءِ رھشون نثار آدم جوسکی، اعجاز علی مھمد جوسکی، غلام اعظم دشتی، اسحاق روشن دشتی، جمال مری، حاجی غلام یاسین، یوسف جان ءَ بازیں مردم ھوار بیتگ اَنت –

ھمے وھد ءَ اسٹنٹ کمشنر تربت عقیل کریم ڈی ایس پی لیگل لعل جان بلوچ، ڈپٹی ڈی ایچ او ڈاکٹر لعل جان نصیر،ٹیچنگ ھسپتال تربت ایم ایس ڈاکٹر میر یوسف خان، ڈبلیو ایچ او ءِ ڈاکٹر فاروق رند، ڈاکٹر منصور بلوچ، پی لی ایچ آئی ءِ مھمد رھیم ءُ دگہ سروک جاڑیگ بیتگ اَنت –

ڈپٹی کمشنر کیچ ءَ تاجر برادری ءَ ھوار آ دگہ مردمانی کمک کنگ ءِ منت گپتگ اَنت ءُ گوشتگ کہ اے ناوشیں جاورھالاں ائید ءَ پیسر لاک ڈاؤن کنگی بیتگ اِنت بلے تاجر برادری ءُ مھلوک ءِ زلوریات چار اِتگ ءُ لاک ڈاؤن دیم ءَ کرتگ –

آئی ءَ گُشتگ کہ اے درگت ءَ این سی او سی ءِ گائیڈلاٰئنز ءِ رد ءَ لاک ڈاؤن جنگ بیت اِنت تانکہ دکاندار ءُ مھلوک درد ءُ گم کمتر بہ بنت –

آئی ءَ گُشتگ کہ لاک ڈاؤن ءَ راشن، سبزی ءُ مرگ پروش، میڈیکل اسٹور، پٹرول پمپ پچ بنت بلے اشانی واستا اژدری اِنت وت ءَ کرونا ویکسین بہ جن اَنت –

آئی ءَ گُشتگ ابید ویکسن نہ جنوکیں دکاندارانی دکان بند کنگ بنت ءُ مزنیں کَچے ءَ ملام گرگ بنت بس ءُ ٹرانسپورٹانی واستا اے ھم اژدری بیت کہ ھما مساپر ءَ سوار بہ کن اَنت کہ آئی ءَ ویکسن جتگ بینک ءُ دگہ جاھاں ھم ویکسن ءُ پھریزی کنگ بنت –

ھمے وڑ ءَ تمپ ءِ کش ءُ گوراں کرونا نادراھی ءَ بیران بیتگیں مردمانی کچ پانزدہ ءَ سر بیتگ اَنت –

ھالانی تہ ءَ گُشگ بیتگ کہ کیچ ءِ دمگ تمپ ءِ بازیں جاھاں کرونا نادراھی گیش بیتگ ءُ ھمک لوگ ءَ یک نا یک نادراہ ءِ ھست اِنت ءُ دمگ ءَ دگہ چوشین آسراتی نیست اِنت –

آیاں گُشتگ کہ دمگ ءَ کرونا نادراھی وتی جاہ ءَ ھسپتالاں پیناڈولے ھم نیست کہ مردم وتی درد ءِ دوا بہ کنت ءُ آیاں دمگ ءِ مزنیں واکداراں گوں لوٹ کرتگ ءُ گُشتگ کہ آ تمپ ءِ کش ءُ گوراں نادراھی ءِ گر ءُ دار کنگ ءِ واستا گامگیج بہ زور اَنت –

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں کلات ءَ موبائیل ٹاور ءِ سر ءَ اُرش کُتگ اُرش ءِ زمہ واری بلوچ سلاہ بندیں گل یو بی اے ءَ منّ اِتگ –

دمگی اھوالکارانی رِد ءَ کلات ءِ دمگ جوہان گزگ ءِ موبائیل ٹاور گوستگیں شپ ءَ ناشناسیں مردماں مانداشتگ ءُ شُتگ انت چریشی ءَ موبائیل ٹاور ءِ سرجمیں مشینری ستکگ ءُ تباہ بوتگ بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مرید بلوچ ءَ اشی تباہ کنگے زمّہ واری منّ اِتگ گوشتگ کہ مئے سرمچاراں گوستگیں شپ ءَ کلات ءِ دمگ جوھان گزگ ءَ موبائیل ٹاور تباہ کتگ ءُ آئی ءِ مشینری سوتکگ انت –

جارکش ءَ دیمتر ءَ گوشتگ کہ اے دابیں اُرش بلوچستان ءِ آجوئی ءَ تاں برجاہ مان انت –

نبشتانک: رودپتر ءِ سیمی بھر

گڈّی بھر

نبشتہ کار: شاری لؔال

دی بلوچستان پوسٹ

من بورچی ءَ چِے نان زُرت اَنت لوگ ءِ پیشگاہ ءَ شُت نِِشت ءُ وارت اَنت۔ انشپی مات ءَ منی دل ءِ تب ءِ ورگ تیار کتگ اَت من ھم ورگ گرادگ زان آں بلے من ءَ وتی دست ءِ ورگ اینچو دوست نہ بنت کہ اینچو مات ءِ دست ءِ دوست بنت مات کہ ورگاں گراد اِیت آھانی تام اَجب اِنت۔ مات ءَ من ءَ چو ایدگہ دودانی ھساب ءَ باز کڈّن کتگ کہ شرّیں ورگ ءِ شَرّ کنگ ھیل بہ گِر کہ پہ جنک ءَ لوگ ءِ کارانی زانگ ھژدری اِنت من اوں مات ءِ گپ ءَ را ”شرّ اِنت“ دپ ءَ داتگ ءُ مات ءَ را ھاموش کتگ بلے من پد ءَ جیڑ اِتگ اگاں آ جنک شرّیں ورگ تیار کت مہ کنت گڑا بلوچ راجمان ءِ تہ ءَ آئی ءَ چو ایدگہ لس جنک ءِ وڑ ءَ جنکے پرچہ لیکگ نہ بیت زاناں جنک تھنا پہ بورچی ءِ کنوَر ءِ ھاتر ءَ جوڑ بوتگ آئی ءَ دگہ ھچ کار ءِ کنگ ءِ ھک نیست اِنت۔

من ورگ ءَ پد دْراھیں ایران شُشت اَنت “دگہ پشت کپتگیں ایران نیست“ من مات ءَ را جُست کت، ”انّاں دگہ نیست“ مات ءَ چہ دُور ءَ پسّہ دات ”چو مہ بیت بیگاہ ءِ وڑ ءَ ایرانے پشت بہ کپ اِیت ءُ پد ءَ آئی ءَ پشّی بہ چَٹّ اِیت“ من وتی دست چہ سریگ ءِ لمب ءَ پھک کنان ءَ مات ءَ گُشت ءُ ءَ آں، پد ءَ وتی وابجاہ ءَ منی لوگ ءِ پُترگ ءَ گوں بجلی شُت اَنت من زانت بلے مدامی ئیں رنگ ءَ یک ساھتے پد کاینت بلے من پہ بجلی ءِ آیگ ءَ ودار کت نہ کت بتّی روک کت بتی وتی دیم ءَ ایر کنگ ءَ پد رودپتر ءِ دپ پچ کت من ھیران بوت آں کہ پیش ءِ مردماں چونی ءَ اے بتی ءِ دیم ءَ ونت کتگ من پہ زُور چمّانی پِر دارگ ءَ پد لبز دْرس کت اَنت بلے پد ءَ جیڑ اِت بوت کنت منی چم نزور اَنت کہ لبز شر میم نہ بنت من بتّی ءِ وٹ بُرز کت بتی دوت دیگ ءَ لگ اِت بلے من پد ءَ کمو وٹّ جھل تِر کت بتی ءِ کش ءَ رودپتر ایر کت کہ کم کم ءَ لبز گندگ ءَ آتک اَنت۔

رودپتر ءِ بیست ءُ ھپتمی تاک ءَ نویس اِتگ اَت:- ”مولوی ءَ شاکارگ ءَ پد وتی دستانی لنکک چو شکّ ءَ کت اَنت ءُ وتی ریشانی تہ ءَ بُرت اَنت ءُ گپّ ءَ بنا بوت ”منی مھترمیں ازیزاں سرکار ءَ مارا رنگ رنگ ءِ شرّیں آسراتی داتگ اِے بجلی کہ ھمک وھد ءَ ھست اِنت چہ ایشی ءَ ما ءُ شما سردیں آپ ءُ گرمین نان وریں۔ ءُ مارا ایشانی کدر زانگی اِنت مئے ھمساھگیں ملک ءَ بہ چار اِت آھانی دمگ ءَ پیسر ءَ کاردام ھست اَت بلے نوں آھانی ٹاور ءَ ناشراں جت بچار اِت اِش چنچو بدھال اَنت پہ یکے ءِ ھال ءِ گرگ ءَ تلوس اَنت ھمے وڑ ءَ چیزے مدت انت مئے ھلک ءَ لھتے ناشراں ھنچیں کارے دست ءَ پتاتگ کہ آھاں مارا اوں بدھال کتگ اللہ پاک ھدایت اِش بہ دنت اراں زالماں شمارا چہ رس اِیت چہ اے کار ءَ شمارا اگاں ھرچ کارے یا منشات ءِ کارے کنگی اِنت ھنچو بکن اِت ئِے بلے کارداماں چیا جن اِت من گوں وتی دوست ءُ ازیزاں ”درخواست“ کن آں ھرکس کہ اے ناشراں زانت یاکہ چوشیں کارے ءِ کنگ ءَ گند اِیت اِش آ بئیت مئے گْور ءَ مارا ھال بہ دنت ھچ مہ تُرس اِیت ما آ ھال دیوک ءِ نام ءَ پاشک نہ کنیں ءُ مارا ءُ شمارا ایشانی پھازگ لوٹ اِیت اگاں نہ اے ناشر گندتریں کار کن اَنت“۔

مولوی سک زھر ءَ گپ جنان اَت۔ من نیّت واز گوشدارگ ءِ کتگ اَت بلے اِد ءَ دگہ چیزے اشکنگ بوگ ءَ اَت من نشتگ مولوی گپّاں گوشدارگ ءَ اِت آں کہ من نہ زانت کدی منی سنگت آتکگ اَت منی کش ءَ نشتگ اَت راست گشتگ اِش دُزّ ءَ دل مان نیست وھدے مولوی گپّ ءَ اَت۔ من ءَ گمان بوگ ءَ اَت گُشے مولوی مارا زانگ ءَ اِنت ءُ منی گمان ءَ مولوی ءَ وتی چمّ مارا سک داتگ اَنت ءُ گپ ءَ اِنت ھمے گپ ءَ منی سنگت ءَ کت کہ مولوی مارا چارگ ءَ اِنت ءُ گپ ءَ اِنت گشے مارا زانگ ءَ اِنت بلے مئے اِے بدگمانی یے اَت۔

مولوی کوکار کنان ءُ گْوشان اَت:-
”ھنو دو ھپتگ پورھ بوگی اِنت کہ کاردام گار اَنت ءُ کاردام شَر کنوک ءَ جواب داتگ گشتگ ئِے من نوں دوبر کاردام ءَ بِھ شر نہ کناں ما کایاں آئی ءَ شَر کناں پد ءَ بُرّگ بیت ءُ آئی ءَ سوگند وارتگ آ دوبر نئیت شرّ اِش نہ کنت مئے گوں اللہ پاک ءَ دوا اِنت اے ناشراں ھدایت بہ دنت اگاں نہ آھانی بدیں کارانی سزا ءَ بہ دنت“۔

من دل ءَ جیڑ اِت اگاں اللہ سزا دیوکے گڑا پیسر ءَ میتگ ءِ میر ءُ متبراں بہ دنت کہ میتگ ءِ دیمروئی ءِ دیم ءِ میلانک اَنت ءُ اللہ پرے کار ءِ ھاتر ءَ مارا سزا دنت مئے جان ساڑی اِنت پہ میتگ ءَ اے روچ ءَ مولوی ءَ ھچ واز نہ کت نئیکہ دگہ پاگپ ئِے بیان کت ئِے، چونائی ءَ مولوی ءَ ساری ءِ یک آدینگے ءَ ھمے گپ بیان کت کہ ”مسیت ءِ ممبر ءِ تہ ءَ بید چہ پاگپ ءُ کرآن ءَ دگہ ھر گپ ھرام اِنت“ بلے مروچی مولوی وت ھرام کاری کنگ ءَ اَت۔

مولوی ءَ وتی زھرشانی ھلاس نہ کتگ اَت کہ نماز ءِ وھد آتک ءُ رس اِت۔ پد ءَ مولوی ناچار بوت وتی گپ ئِے ھلاس کت اَنت نماز بندات بوت نماز ءَ پد من لوگ ءَ روان روان ءَ وتی دل ءَ من ناز اِت آں کہ مروچی منی کارپدانی سوب ءَ تیوگیں میتگ ءِ مستریں مسیت ءَ منی بارو ءَ گپ اَت بلے آدگہ ھبرے کہ گپ منی بیگیری ءَ اِت اَنت۔

دہ روچ گْوست بلے دامگ پچ نہ بوت اَنت نئیکہ کاردام آتک اَنت۔ ھاں یک چیزے مئے میتگ ءَ آتک نوکین ءُ بے پجّاریں لشکرے کہ چہ شھر ءَ آتک اے لشکر ءِ کساس پانزدہ یا بیست گاڑی بوت اَنت دراھیں بند گاڑی اِت اَنت سیہ چکیں گاڑی ءُ گاڑیانی پُشت ءَ دو دو مردم گوں تپنگ ءَ نندوک اِت اَنت دراھیں میتگ ءَ مانریتکگ اِت اَنت من کہ لشکر دیست من ءَ باز ھیرانی نہ بوت چے ءَ کہ من پیسر ءَ وتی بُندری میتگ ءَ ھمک روچ لشکر دیستگ آ لشکر وھدے کہ مئے میتگ ءَ آتکگ اَنت گڑا الّم ءَ یک ماتے ءِ دل اِش تْراکینتگ یاکہ لھتے لوگ آس دیگ بوتگ بلے اِے میتگ ءَ تنی وھدی ھدا ءِ شکر اِنت چشیں جیڑھ نہ بوتگ مروچی کہ لشکر میتگ ءَ مانریتکگ اَت من بازار ءَ لھتے راشن گپتگ اَت واتر پہ لوگ ءَ روان اِت آں ھمک جاہ ءَ سیہ چکیں گاڑی گندگ بوگ ءَ اَت دکانانی کِرّ ءَ لوگانی کش ءَ اے گاڑی اوشتوک ات اَنت من روان اِت آں منی لوگ گندگ بوگ ءَ اَت مئے اوں لوگ ءِ کش ءَ اوں دو گاڑی اوشتوک اَت من گاڑیاناں دلگوش نہ کت چے ءَ کہ من ءَ گاڑیانی کر ءَ روگ ترس اِت۔ من آھاناں اے جست کت نہ کت شما پرچا اد ءَ اوشتوک اِت من نا، میتگ ءِ ھچ کس ءَ اے توان نیست اَت کہ آھاں اے جست ءَ بہ کنت من راشن لوگ ءَ رسینت اَنت پد ءَ ھما دمان ءَ چہ لوگ ءَ در آتک آں سیکل سوار بوگ ءَ پد وتی سنگتے ءِ لوگ ءِ نیمگ ءَ راھادگ بوت آں من بے گمانی روان اِت آں اے سرپد نہ اِت آں منی پُشت ءَ چے بوگ ءَ اَت من کساس ۲ کلومیٹر ءِ دُوری ءِ روگ ءَ پد گاڑی ءِ توارے اِشکت من دیم ءَ چار اِت ھچ نہ دیست من راستیں نیمگ ءَ چار اِت داں یک چہ ھما سیاھیں گاڑی ءَ گوں تیزی ءَ منی کر ءَ پیداک اَت من سیکل کمو سلو کت تنا وھدی چہ منی پُشتی نیمگ ءَ یک گاڈی یے آتک سیکل ءِ دیم ءَ جت ئِے من اوں یک دم اوشتات آں من اجکّہ بوت آں اے چونے مسیبت ئِے بوت کہ منی سر ءَ کپت۔ من ترس ءُ لرز چہ سیکل ءَ ایر کپگ لوٹ اِت تنا وھدی پیسر ءَ چہ گاڑی ءِ پُشت ءَ یک لس دریس ءِ تہ ءِ مردمے ءَ دَور کُت گوں دور کنگ ءَ آئی ءَ تپنگ منی سر ءِ سر ءَ داشت چہ دومی گاڑی ءَ دو مردم گوں اشتاپی ءَ در آتک اَنت منی کرّ ءَ آتک اَنت آ دوئیں مردماں چہ یک پٹکّیں مردمے اَت ءُ آئی ءَ تپنگ گون نیست اَت من پھم اِت اے اپسرے بوت کنت پرچیکہ اپسراں گیشتر تپنگ گون نیست ھمے پٹکّیں مرد منی کر ءَ آتک آئی ءَ ھما مردم ءِ تپنگ جھل کنگ ءِ اشارت کت کہ منی سر ءَ داشتگ اِت ئِے داں اینچو وھد ءَ منی دپ ءَ یک گپے در نہ یتک من وانگ وانگ ءَ اوشتاتگ چارگ ءَ اِت آں پٹکّیں مرد ءَ منی دست گپت یک کِرّے ءَ بران ءَ گوں پارسی ءَ گوشت ئِے ”بیا گاڑی ءَ سوار بو من ءَ کمو گپ ھست ”چے گپّے“من آئی ءَ جست کت بلے آئی ءَ منی جست ءِ پسہ نہ دات ءُ گاڑی ءِ دروازگے پچ کت ئِے من ءَ اشارھے کت ئِے بیا گاڑی ءَ سوار بو من گاڑی ءَ سوار بوت آں پد ءَ ھما مردک ھم سوار بوت آپسر ءَ ڈرائیور ءَ گشت بریں گاڑی روان بوت گاڑی روان اَت منی ھیدانی ھار ملّان بوت منی جان ءِ ھمک بند لرزگ ءَ اَت من وانگ اِت آں ھچ نہ زانت چے بوگ ءَ اِنت منی دپ ءَ در آتک ”شما چے لوٹ اِت“بلے ایشاں ھچ کس ءَ پسّہ نہ دات من پُشت ءَ چک جت پُشتی سیٹ ءِ سر ءَ یک مردمے نشتگ اَت ءُ آئی ءَ یک ٹوھیں تپنگے گون اَت ھمے گاڑی پد ءَ شُت مئے لوگ ءِ کش ءَ اوشتات اے کئی لوگ اِنت تو اِد ءَ اتکگ ئے؟ من ءَ جست کنگ بوت من پسہ دات کہ منی لوگ اِنت گاڑی کمو پنچ ملٹ ءِ کساس ءَ ھمدا اوشتات من ءَ دگہ ھچ جست اِش نہ کت من چہ ترس ءَ گار اِت آں جیڑ اِت باریں مئے راز پاشک بوت یا مئے سیہ گوکیں سنگت ءَ ھال داتگ اَنت من ھمے گمان ءُ وسوانی تہ ءَ گار ات آں کہ گاڑی پد ءَ راہ گپت شُت منی سنگت ءِ لوگ ءِ نیمگ ءَ گاڑی کہ اود ءَ روگ ءَ اَت منی ترس ودّ اِت۔ من دلجم بوت آں نوں منی سنگت ءِ باریگ اِنت کہ آئی ءَ اوں چِست بکن اَنت گاڑی شُت آئی ءِ لوگ ءِ کش ءَ اوشتات من ءَ جست کت اش اے لوگ کئی انت من وتی سنگت ءِ پت ءِ نام گپتگ جست اِش کت چے کار کنت من آھاناں پسہ دیان کت گاڑی پد ءَ دیم ءَ روان بوت منی ترس کمے جھل کپت کہ منی سنگت ءِ جست اِش نہ کت بوت کنت آھاں من ءَ پہ دگہ ھبرے ءَ چِست کتگ من جیڑان ءُ گاڑی روان اَت لھتے سھت ءَ پد گاڑی چہ میتگ ءِ دیم ءَ شُت اوشتات من ءَ چہ گاڑی ءَ ایر کپگ ءِ گشت اِش من ایر کپت آں۔ آھاں منی گوانکو لوٹ اِت من وتی گوانکو چہ کیسگ ءَ کشّ ات ءُ دات پٹکّیں مرد ءَ گوانکو وتی دست ءَ کت ءُ چارگ ءَ بنا بوت آئی ءَ منی گوانکو چارگ ءَ پد دات ءُ گشت ئِے تو شُت کن ئے۔ من وتی ھید پھک کت اَنت ھدا ءِ شُگر گپت شُت ءَ آں پہ سیکل ءِ نیمگ ءَ۔

من وھدے سی ءُ پنچمی تاک ھلاس کت تاک ءِ لیٹینگ ءِ وھد ءَ دوت ءِ بوہ مار اِت من بتی ءَ چار اِت سک دوت ءَ اَت من وٹّ ءَ را بُرز ءُ جھل کت بلے دوت ھلاس نہ بوت گیشتر گپ گپ کنگ ءَ بنا بوت۔ بتی ءِ گپ گپ کنگ ءَ گوں دوت گیشتر ودّ اِت اَنت من لوگ ءَ نِشت نہ کت بتی کُشت چہ لوگ ءَ در آتک آں۔

چہ لوگ ءَ ڈنّ در آیگ ءَ پد من دیست دراھیں میتگ انسرتگ اَت۔ نئیکہ گونڈوی ءِ توار نئیکہ بُزے ءِ شنک ءِ پلینکگے ءِ توار اَت۔ نئیکہ چِرتے ءِ چری چری یے ھست کوش ءَ کشّگ بند کتگ اَت دُور دُور ءَ یک یک سیکلے ءِ لیٹ گندگ بوت شپ ماھکانی اَت ماہ وش گِندگ بوگ ءَ اَت ماہ ءِ تہ ءِ گُبار اوں شرّی ءِ سر ءَ گندگ بوگ ءَ اَت گُبار ءِ گِندگ ءَ گوں منی دل ءَ شِے ءِ شیر یات آتک کہ ”ھانی چہ ماہ ءَ شرتر اِنت“ من داں لوگ ءِ پیشگاہ ءَ نِشت ءُ بجلی ءِ آیگ ءِ ودار کت منی چہ بازیں ودار ءِ نندگ ءَ منی پاداں کسانیں دردے زُرت بے ارادھی من پاد آتک آں کمو گردگ لوٹ اِت۔ ودار ءَ اِت آں کہ کدی بجلی بئیت ءُ من دوبر بہ روان ءُ رودپتر ءَ بہ وان آں من سیاھیں پٹّ ءِ سر ءَ گردان اِت آں کہ دو کچکانی وکّگ ءِ توار ءَ منی دلگوش ءِ وتی گور ءَ بُرت اِش یات ءُ ھیال کدی کجام نیمگ لیٹ اَنت کس گمان کت نہ کنت ھیال شُت پہ کچکانی نیمگ ءَ، جیڑ اتوں لھتے گوش اِیت کُچک شیتان ءَ گِند اِیت پمیشکہ وکّ اِیت ءُ ھول اِیت اراں بگندئے ھنچیں دَورے ءَ اگاں سائنسدان کچکانی چمّاں مردماں پِٹ کت بہ کن اَنت، گڑا اراں مردم شیتان ءَ دیست کت کنت؟ من چہ بازیں ودار ءُ جیڑگ ءَ پد مار اِت کہ من بور بوگ ءَ آں، پمیشکہ من زوت گوانکو ءِ میوزک ءِ بٹن جت کہ نورھان بزنجو گوں وتی پردردیں توار ءَ الھان کنان بوت-

“نہ تْرانگے نہ گمے نہ ودار تھنایاں”
“بیا تو پمّن ءَ دستے شھار تھنایاں”

سوت ھلاس نہ اَت کہ منی ودار آسر بوت بجلی آتک اَنت من پد ءَ لوگ ءَ شُت آں رودپتر دیم ءَ کت وانگ ءَ بنا بوت آں۔

”مردماں من ءَ ویل کت من پد ءَ آتک وتی سیکل زرت وتی سنگت ءِ گْور ءَ روان بوت آں داں پانزدہ روچ ءَ گیش گْوزگ ءَ پد کاردام دوبر شَر کنگ بوت اَنت بلے دامگ شر نہ بوت اَنت گوں کاردامانی شَر بوگ ءَ منی سنگت سیہ گوک ءَ من ءَ کلوھے دیم دات ”اگاں تو دوبر ویر کار داشت اَنت من ءَ کسم اِنت من سرکار ءَ ھال دیاں“ منی ھم کینگ ءِ آس روک بوت من آئی ءَ گوشت من ءَ اوں سوگند اِنت دانکہ دامگ شر نہ بنت من وتی جنگ ءَ برجاہ دار آں“ پد ءَ من ھمے گپ وتی سنگت ءَ ھال دات اَنت آئی ءَ گْوشت اگاں سیہ گوک ءَ راز پاشک کت من تو آئی ءَ الکاپیں ردے لٹّ گران ئِے بلّے سنگت اِنت بلے مئے بدی ءِ پُشت ءَ اِنت من آئی ءِ گپّاں گوں تپاک کت۔

ما داں ھپتگے ودار کت کہ ھمک نیمگ ءَ ویرانی پھازگ ءَ پہ مردم نندوک اَت ءُ ھرکجا مردم نشتگ اَنت ما وتی کار کت نہ کت ما سوڑگ کت کہ روئیں چہ دیگا میتگے ءَ ویر ءَ سِندیں چہ کار ءِ کنگ ءَ پیسر من سیہ گوک ءَ ھال دات ما شپی ویر ءَ سِندیں اگاں ترا ھرچ کمالے ھست برو پیشدارے من ءُ سنگت ءَ شپ کت ءُ سیکل ءَ سوار بوتیں وتی پُشت ءِ میتگ ءَ شُتیں ما یک شرّیں جاھے گیگ ءُ گْور کت سیکل دور اوشتارینت من شُت آں تیربرگ ءِ سر ءَ کہ ویر ءَ گُڈّاں چہ دُور ءَ بازیں گاڈیانی روگ ءُ آیگ اَت گاڑیانی لیٹ ھروھد ءَ تیربرگ ءَ سک اَت اد ءَ ما وتی کار کت نہ کت ما واتر لوگ ءَ شُتیں پد ءَ دو روچ ودار کت باریں سیہ گوک ءَ کسے ءَ ھال داتگ یانا، بلے آئی ءَ اے بری کس ھال نہ داتگ اَت۔

دو روچ پد ما ھما میتگ ءِ روگ ءِ سوڑگ کت ءُ من ھما روچی ئیں ڈول ءَ سیہ ءَ گوک ھال ھم دات۔ اے بری آئی ءَ شُت من مستریں برات ءَ ھال دات کہ تئی برات روگ ءَ اِنت شپی کاردام ءِ جنگ ءَ۔ منی برات ءَ ھما دمان ءَ من پونے کت گشت ئِے ”ھاں باریں تو ھنچو مزن بوتگ ئے چشیں کار کن ئے زاناں تو دھشتگردے ئے؟“ من آئی ءَ گشت، من کجا ءُ چشیں کار کجا من چے ءَ چشیں کار کن آں؟“ آئی ءَ منی اے گپ باور بوت آئی ءَ پھم اِت سیہ گوک دروگ بند اِیت نوں من دلجم بوت آں سیہ گوک ءِ گپّاں برات باور نہ کنت من سوڑگ کت رویں وتی کار ءَ کنیں بلے اے روچی منی سنگت شھر ءَ شتگ اَت منی کار ماٹو بوت دو روچ ءَ پد سنگت آتک ما دوئیں شتیں دگہ میتگے ءَ وتی کار ءِ کنگ ءَ اود ءَ سربوگ ءَ پد اے رندی من تیربرگ ءِ سر ءَ شت آں وتی کار سرجم کت ءُ سرجم کنگ ءَ پد وتی بیھار ھما جاہ ءَ ایر کت واتر پہ وشّی لوگ ءَ آتکیں۔

روچ گْوزان بوت اَنت ھپتگ ءُ ماہ گْوست اَنت ما دوبر ھچ ویر ءِ نیمگ ءَ نہ نشتیں ءُ نئیکہ ویر بُرگ ءِ بارو ءَ جیڑ اِت بس دار کت دو ماہ ءُ بیست روچ ءَ پد مئے جھد ءَ رنگ آؤرت۔ دامگ پچ کنگ بوت اَنت ھما سنگت سیہ گوک کہ مارا دروہ اتگ اِت ئِے آ سک اپسوزی اَت بلے من چہ آئی ءَ ھچ گِلگ نہ کت دامگانی پچ بوگ ءَ رند من وش گل اِت آں مئے جھدانی برکت ءَ مئے میتگ ءِ ھر کنڈ ءَ دامگ کار ءَ اَت من کتابانی ھزانگے جم کتگ اَت کہ کتاب منی گْور ءَ ھنچو باز اِنت کہ داں دہ سال بہ نندان ءُ بہ وان آں ھلاس نہ بنت۔

دامگانی پچ بوگ ءَ پنچ ماہ ءُ چیزے روچ ءَ پد من وتی کارگس ءَ نندوک ات آں دامگ گوں کاردام ءَ گار بوت آں من جیڑ اِت بلکیں وت بند اِت اش کتگ اَنت بلے رند ءَ ھالے من اِشکت کہ کاردامانی ویر چہ مئے میتگ ءَ یکیں روچ ءَ سِہ جاگہ بُرّگ بوتگ۔ من نِشت ھیران اِت آں ویر ءِ بُرّوک پیسر ءَ ما بوتگیں بلے اے بری اے کار کے ءَ کتگ. من وتی سنگت ءَ جُست کت تو چُش نہ کتگ۔ آئی ءَ اوں گوشت من چیا چوش کن آں مئے وَ مول ءُ مراد دامگ ءِ پچ کنگ بوتگ آ وَ بوت۔

نی سالے بیت یک ماھے اگاں کاردام ھست اِنت پد ءَ ھما مئے وڑ ءَ ناشناسے کیت ویراں بُرّ اِیت ءُ روت کس نہ زانت کے انت، چونین اَنت چی ءَ چوش کن اَنت؟ پد ءَ داں ماھے ءَ کاردام نیست اِنت وھدے اگاں کاردام کاینت ھمے وڑ ءَ پد ءَ بُرّگ بنت ایشاں مئے سوبمندیں جھد ءَ را بے سوب کت“۔

رودپتر ءِ پنجاہ ءُ ششمی تاک کہ من ھلاس کت دیمی تاک ءِ سر ءَ ”چارمی بھر“ ءُ آئی ءِ سرنامہ ءَ ”دیم ءِ گامگیج“ نویس اِتگ اَت بس دگہ دراھیں تاک ساپ اِت اَنت۔

ھلاس

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وئیل لورالائی، گڈانی، نوشکی، شال ءُ مستونگ ءَ پیش اتکگ اَنت کہ اود ءَ زالبولے ءَ ھوار ھپت کس بیران بیتگ اَنت ءُ پنچ زدگ بیتگ اَنت –

بلوچستان ءِ دمگ لورالائی ءَ سر بیتگیں ھالانی رد ءَ لورالائی ءَ شال دگ ءَ واپڈا ءِ کارگس ءِ نزیک ءَ دو پرپٹاں ٹکر وارتگ چریشی ءَ پرپٹ ءَ سواریں عبدالوھاب ء عبدالشکور ھما جاہ ءَ بیران بیتگ ءُ دومی پرپٹ ءَ سواریں مھمد حنیف ء عبدالحق زدگیں جاوراں لورائی ءِ نادراہ جاہ ءَ برگ بیتگ ءُ چریشی ءَ پد شال ءَ گیشیں درمانی ءَ برگ بیتگ کہ اود ءَ آئی ءَ وتی ساہ داتگ اَنت –

ھمے وڑ لورالائی ءَ دگہ یک وئیلے ءَ گاڑی ءِ کلٹی بیتگ ءُ چریشی ءَ دو کس بیران ءُ یکے زدگ بیتگ –

وئیل شال ءِ دمگ کچھ دگ ءَ عمقزئی ءَ پیش اتکگ کہ اود ءَ گاڑی ءَ سواریں عمر خان ء حاجی آدم، سردار خان ء حاجی اشرف خروٹی جھمنند ژوب بیران بیتگ اَنت ءُ دریا خان ء ولی مھمد جھمنند ژوب زدگ بیتگ –

دمگء مردمانی رد ءَ اے مردم ژوب ءَ دیم پہ لورالائی ءَ آیگ ءَ بیتگ اَنت وئیل ءِ آماچ بیتگ اَنت، زدگ ءُ بیران بیتگیں مردم لیویز ءِ کارمنداں نادراہ جاہ ءَ سر کرتگ اَنت –

ھمے وڑ ءَ گڈانی ءَ تیاب ءَ شتگیں جان شودگ ءِ وھد ءَ دو ورنا بڈ اِتگ ءُ بیران بیتگ اَنت –

بیران بیتگیں مردمانی پجار بیست ءُ ھشت سالی ئیں ولید ءُ بیست ءُ چار سالی ئیں فھاد ءِ ناماں زانگ بیتگ اَنت ءُ ھردوکیں مردمانی لاش کشگ بیتگ اَنت –

دگہ یک وئیلے شال ءِ دمگ اختر آباد ءَ پیش اتکگ کہ اود ءَ آپی ٹنکر ءُ پَرپٹے ءِ میان ءَ ٹکری بیتگ کہ چریشی ءَ زالبولے بیران بیتگ ءُ یک مردمے زدگ بیتگ –

ریسکیو ءِ رد ءَ گوستگیں روچ ءَ روکپتی شھدگ ءَ اختر آباد ءَ آپی ٹنکر ءِ ٹکر ءَ پرپٹ ءَ سواریں زالبولے بیران بیتگ ءُ یک کس ءِ زدگ بیتگ –

زدگ ءُ بیران بیتگیں مردم نادراہ جاہ ءَ سر کنگ بیتگ اَنت ءُ اژدری چار ءُ ٹپاس ءَ پد لاش کھول ءِ ھوالگ ءَ کنگ بیتگ ءُ زدگ بیتگیں مردم ءِ درمانی برجاہ اِنت –

دگہ یک وئیلے مستونگ ءَ پیش اتکگ کہ اود ءَ گاڑی ءِ ٹکر ءَ یک مردمے زدگ بیتگ –

وئیل مستونگ ءِ دمگ غلام پڑینز ءَ پیش اتکگ کہ اود ءَ ترند روکیں ویگو گاڑی ءِ ٹکر جنگ ءَ یک ورنایے زدگ بیتگ – زدگ بیتگیں ورناہ غوس بکش نادراہ جاہ ءَ سر کنگ بیتگ ءُ اود ءَ ورناہ ءَ وتی ٹپ نہ سگ اِتگ ءُ بیران بیتگ –

دگہ تیرگواری وئیلے نوشکی ءَ پیش اتکگ کہ اود ءَ زمین ءِ جیڑھے ءِ سر ءَ تیرگواری بیتگ ءُ یک مردمے بیران ءُ دو زدگ بیتگ اَنت –

وئیل نوشکی گرلز کالج ءِ نزیک ءَ پیش اتکگ کہ اود ءَ مینگل ءأ سعادات ٹک ءِ مردمانی میان ءَ زمینی جیڑہ ءِ سر ءَ یاسر شاہ ء قادر شاہ ٹک سید جھمنند قادر آباد نوشکی بیران ءُ مراد شاہ ء نادر شاہ ٹک سید جھمنند قادر آباد ءُ مھمد سلمان ء منظور احمد مینگل زدگ بیتگ اَنت –

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ ھشتاد ءُ نُھ روچ سرجم بوتگ – سیاسی ءُ چاگردی باسک ریاض بلوچ، نزیر بلوچ ءُ دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ سال دوھزار ءَ چہ بندات بوتگیں لشکر کشی روچ ء مروچی یکشل ءَ برجاہ انت ءُ ھمک روچ آئی ءِ تہ ءَ گیشی آرگ بوگ ءَ انت ءُ بلوچستان ءَ راجکاری ءِ سر ءَ بندش جنگ بوتگ کہ اود ءَ سیاسی باسکاں پاکستانی پوج آوار جنت ءُ وتی زنداناں بندیگ کنت –

ماما قدیر بلوچ ءِ گوشگ ات کہ اے زوراکی ءَ ناکہ تھنا مردین نشانگ بوگ ءَ انت بلکیں اے زلم ءُ زوراکیاں چُک ءُ زالبول ھم نہ بچ اِتگ انت گوستگیں روچ ءَ پاکستانی پوج ءَ کیچ گومازی ءَ لشکر کشی ءِ میان ءَبانک کیگد شھید کرتگ اشی ءَ پیش ھم پنجگور، کیچ ءُ بلوچستان ءِ جتاجتائیں دمگاں ھمے وڑ زالبول ءُ چُک پوج ءِ زلم ءُ زوراکیانی دیمپان انت –

ماما قدیر بلوچ ءِ گوشگ ات کہ میان استمانی ادارھانی پرز انت کہ آ چہ پاکستان ءَ بلوچستان ءِ تہ ءَ بیوکیں زلم ءُ زوراکیانی پسّو ءَ بہ لوٹ ایت ءُ بلوچاں وتی سرڈگار ءِ سر ءَ نندگ ءِ آزاتی دیگ بہ بیت کہ ھر یک انسانے ءِ بُنکی ھک انت –

ماما قدیر بلوچ ءَ دگہ یک تامری درشانے ءَ گوشتگ کہ پی ٹی ایم ءِ رھشون علی وزیر پشتونانی ھکانی توار چست کنگ ءِ ھاتر ءَ آوار جنگ ءُ بندیگ کنگ بوتگ کہ آئی ءِ تب ناجوڑ انت ءُ جیل ءِ تہ ءَ آئی ءَ ھچ وڑیں چیز دیگ بوگ ءَ نہ انت آئی ءَ گوشتگ کہ من وی بی ایم پی ءِ رھشون ءِ بستار ءَ پشتون راج ءِ گون ءَ دلپدردی درشان کناں –

آئی ءَ گوشتگ کہ راجی سلامتی ءِ اجلاس ءَ آرمی چیف ءَ اے گپ ءِ پدّرائی کتگ کہ تاں ھما وھد ءَ علی وزیر پھلی نہ لوٹ ایت آ پھل کنگ نہ بیت اشی ءَ چہ پدّر انت کہ اد ءَ آمیدگس پہ نام انت ادے درسیں پیسلھاں آرمی کنت –

سر بیتگیں ھالانی رد ءَ بلوچستان ءِ دمگ کیچ ءَ تیل باپاری ءَ ھواریں مردم بلوچستان ءِ سیمسری دمگ ءَ بیگواہ –

دمگی مردماں ٹی بی پی ءَ گوں گپ کنان ءَ گوشتگ کہ تمپ پُل آباد ءِ جھمنندیں سمیر ء برکت سِی روچ ءَ پیست عبدوئی ءِ سیمسر ءَ پاکستانی پوج ءَ دزگیر کرتگ ءُ ناشناشیں جاھے ءَ برتگ کہ تنی وھدی آئی ءِ بارو ءَ ھچ ھال نیست اِنت –

سمیر برکت تیل ءِ باپاری ءَ گوں بندوک بیتگ ھمے سبب ءَ آ سیمسری دمگ ءَ بیتگ کہ ھمے وھد ءَ آوار جنگ بیتگ – واکداراں تنی وھدی اے درگت ءَ ھچ ھال شنگ نہ کرتگ –

ھمے وڑ ءَ واشک ءَ سلاہ بندیں مردماں پِت ءُ چک آوار جتگ ءُ برتگ اَنت –

گیشیں ھالانی رد ءَ چہ پنجگور ءَ دیم پہ واشک ءَ رؤکیں تیل برداف زامیاد گاڑی ءُ پک آپ گاڑی واشک ءِ دمگ سورنانی کور ءَ ناشناسیں مردماں تیرگواری کرتگ اَنت چریشی ءَ زامیاد گاڑی درایگ ءَ سوبمند بیتگ بلے آئی ءِ ھمراہ پک اپ گاڑی ءَ سواریں دو کس سلاہ بندیں مردماں لکانی کلدارانی ھواری ءَ آوار جتگ اَنت –

آوار جنگ بیتگیں مردمانی پجار سکندر علی ءُ عبدالرزاق ءِ ناماں زانگ بیتگ اَنت کہ ھردُک پت ءُ چُک اَنت –

بچ اِتگیں گاڑی لیویز تھانہ واشک ءَ سر بیتگ بلے واشک انتزامیہ ءَ اے درگت ءَ ھچ گپ دیم ءَ نیتکگ اَنت –

واشک ءِ چاگردی پھناتاں چہ واشک انتزامیہ ءَ پِت ءُ چُکاں ھوار آئی ءِ گاڑی ءُ لَکانی کلدار پچگرگ ءِ گامگیج ءِ لوٹ کرتگ –

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ تمپ ءَ پوجی پانگس ءِ سر ءَ اُرش کُتگ، اُرش ءِ زمّہ واری سلاہ بندیں گل بی ایل ایف ءَ منّ اِتگ –

دمگی اھوالکارانی رِد ءَ اے اُرش گوستگیں روچ ءَ تمپ ءِ دمگ اپسی کھن ءَ بانپیر کنڈگ ءِ سر ءَ برجاھیں پوجی پانگس ءِ سر ءَ کنگ بوتگ، اُرش ءَ پاکستانی پوج ءَ جانی تاوانانی دیمپانی بوتگ اُرشکار درآیگ ءُ رؤگ ءَ سوبمند بوتگ اَنت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ اے اُرش ءِ زمّہ واری منّ اِتگ گوشتگ کہ مئے سرمچاراں زی شمبے ءِ بیگاہ ءِ ادار ھپت ءَ تمپ ءِ دمگ اسپی کھن ءَ بانپیر کنڈگ ءِ سر ءَ برجاھیں پاکستانی پوج ءِ پانگس ءِ سر ءَ دور جنگیں توپک ءَ گوں اُرش کتگ اُرش ءِ آسر ءَ یک پوجی کارمندے مُرتگ –

جارکش گوشتگ کہ پاکستانی پوج ءُ آئی کمککارانی سر ءَ مئے اُرش بلوچستان ءِ آجوئی ءَ تاں برجاہ مان انت –

اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 175 تالبان کُشگ بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان بُرزی لشکر ءِ بالیگرابانی بمباری ءِ کُمک ءِ آسر ءَ جھلی لشکر ءَ وتی جنگی اُرشاں 175 تالبان جنگول کُشتگ ءُ 84 تْرُندی ءَ ٹپی کُتگ اَنت۔

وتی ٹیوٹر پیگام ءَ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت نگرھار، پکتیکا، لوگر، گزنی، کندھار، ھرات، بلگ، جوزجان، سمنگان، سارئےپول، ھِلمند، بدکشان، کندوز ءُ بلگان ءَ کُتگ اَنت۔

https://mobile.twitter.com/MoDAfghanistan/status/1418815094956380166

یات بہ بیت کہ چہ ایشی ءَ پیشی روچ ءَ اوگان راجی لشکر ءِ تْرُندیں جنگی اُرشانی سوب ءَ 262 تالبان کُشگ ءُ 172 تُرندی ءَ زدگ ءُ ٹپی بیتگ اَنت ءُ ھمے جنگی اُرش ولایت نگرھار، نوریستان، کُنر، گزنی، ھیرات، پکتیا، بلگ، جوزجان، ھِلمند، کندوز ءُ کپسہ ءِ ولایتاں کنگ بیتگ اَنت۔

دومی نیمگ ءَ امریکی راجی پھزگ ءِ کُمکّار لیوڈ آسٹن وتی جارے ءَ گْوشتگ کہ اوگان راجی لشکر ءَ جنگی بودی ھست کہ چہ تالبان ناشرکاریں جنگولاں وتی دزگیر کُتگیں دمگاں آجو بہ کنائین اَنت ءُ اے درگت ءَ ما یکشل ءَ اوگان راجی لشکر ءَ جنگی کُمک کنگ ءَ ایں بلے بَے ایش اِنت کہ پیسر اوگان راجی لشکر تالبان ءِ دیم ءَ جُنزگ ءَ میل اَنت۔

باید اِنت پیسر اوگان راجی لشکر گوں بالیگرابانی اُرش ءَ اوگان تالبان ءِ جنگی تب ءَ پْروش بہ دے اِنت پد ءَ اوگان راجی لشکر بالی ءُ جھلی جنگی اُرشاں کنان ءَ وتی دزگیر کُتگیں دمگاں چہ اوگان تالبان ءَ آجو بہ کن اَنت۔

بلوچ نیشنل مومنٹ ءِ جارکش ءَ گوشتگ کہ کیچ گومازی ءَ پاکستانی پوج ءَ بی این ایم ءِ گوستگیں وائس چیئرمین غلام نبی بلوچ، سیٹ پُلان، کریم داد، مولابکش، سیٹ علی ءُ غلام نبی ءِ سیادانی لوگانی سر ءَ بیڑ برتگ ءُ چُک ءُ زالبول لَٹ ءُ کُٹانی نشانگ کرتگ اَنت، پوجی لَٹ ءُ کُٹانی چیر ءَ پاٹی ءِ زالبول باسک بانک کیگد ء عبداللہ شھید بیتگ –

جارکش ءَ گُشتگ کہ پوج ءَ اے لشکر کشی ءَ عالم ء سلام جھمنند چیری بازار گومازی آوار جتگ ءُ بیگواہ کرتگ-

آئی ءَ گُشتگ کہ بانک کیگد بلوچ چریشی ءَ پیسر پاکستانی پوج ءِ زوراکیانی آماچ بیتگ ءُ آئی ءِ دو زھگ صغیر ءُ قدیر پوج ءَ چِست کرتگ ءُ زندانی کرتگ اَنت ءُ ترندیں لَٹ ءُ کُٹانی چیر ءَ پد نیم زندیں جاوراں گوں یلو کرتگ اَنت، اے دراھیں زُلم ءُ زوراکیاں ابید ھم بانک کیگد بلوچ چہ پاٹی ءَ نہ سِستگ ءُ بلوچ راجی آجوئی ءِ سرشاھی ءَ ھچ پرک نیتکگ گڑا چریشی ءِ سر ءَ مروچی پاکستانی پوج ءَ زورانسری لَٹ ءُ کُٹ کرتگ ءُ شھید کرتگ –

جارکش ءَ گُشتگ کہ پاکستانی پوج ءِ نیمگ ءَ بلوچ راج ءِ ھلاپ ءَ جھلانکیں سزایانی درچ یکشل ءَ برجاہ اَنت بلے پاکستانی ریاست گوستگیں بیست سالاں زوراکیاں ابید بلوچ راج ءَ اے منینتگ کہ زندگیں راج کُشت ءُ کوش ءُ ناشرکاری ءَ ھلاس نہ بنت بلکیں وتی دیمونیاں راجی پجار ءِ پھریزگ ءَ گیش اے دیمونی مھکم کن اَنت –

آئی ءَ گُشتگ بانک کیگد بلوچ ءں رتکگیں ھون ھاکانی تہ ءَ زوال نہ بنت ءُ پاٹی شھید ءِ دیمونی ءِ گڈی منزل ءَ ھچ رنگیں دیمونیانی دیگ ءَ چَک ءُ پد نہ بیت اِنت –