شال: بیگواھیں مردمانی کھولاں شدکشیں ھرتالی بنجل ءَ پریس کانفرنس

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

پاکستانی پوج ءِ دست ءَ زورانسری آوار جنگ بیگواہ بوتگیں ودود ساتکزئی، آصف بلوچ ءِ گھار ءُ رشید بلوچ ءِ وارس ءَ وتی دوستگیں مردمانی آوار جنی ءِ بگیری ءَ شال ءَ وائس فار بلوچ مسنگ پرسنز ءِ بنجل ءَ پریس کانفرنس کتگ –

سِی ءُ یک اگست سال دوھزار ءُ ھژدہ ءَ سیل ءُ سوادی جاہ زنگی ناوڑ ءَ پاکستانی پوج ءِ دست ءَ زورانسری اوار جنگ ءُ بیگواہ بوتگیں آصف بلوچ ءِ گوھار ءُ رشید بلوچ ءِ وارس سائرہ بلوچ ءَ شال ءَ بیگواھیں مردمانی پانکجنیں گل وی بی ایم پی ءِ بنجل ءَ اھوالکاراں گوں تران کنان ءَ گوشتگ کہ مروچی من چہ شال ءَ دور ھزدار ءَ پہ ھک ءِ شوھاز ءِ امیت ءَ اتکگاں اود ءَ چہ درآیگ ءُ راہ ءِ اڈ ءُ جنجالاں پد یک امیتے زرتگ ءُ اد ءَ سر بوتگ اَنت کہ بوت کنت شما منی توار ءَ کلم ءِ زور ءَ ھماھاں سر کن اِت کہ تنی وھدی منی توار ءِ اشکنگ ءَ ساڑی نہ انت –

آئی ءِ گوشگ ات کہ بیگواھیں آصف بلوچ منی برات ءُ بیگواھیں رشید بلوچ منی وارس انت منی برات ءُ وارس سِی ءُ یک اگست سال دوھزار ءُ ھژدہ ءَ ایف سی ءُ آئی ایس آئی ءِ کارمنداں نوشکی زنگی ناوڑ ءَ دگہ نھ سنگتانی ھمراھی ءَ زورانسری آوار جتگ ءُ بیگواہ کتگ انت بلے چیزے وھد ءَ آھانی لٹ ءُ کٹ کتگیں اکس رسانکدراں شنگ کرتگ انت اکسانی تہ ءَ زاھر انت کہ آھانی دست بستگ انت ءُ چم ھم گوں سیاھیں پُچاں بستگ انت ءُ ایف سی ءَ ھم منّ اِتگ ات کہ منی برات ءُ رشید گوں وتی سنگتاں ھماھانی گور ءَ انت –

آئی ءِ گوشگ ات کہ آئی ءَ پد سَے سال گوستگ بلے منی برات ءِ ھچ ھال ءُ اھوال نیست کہ کجا انت کجام جاورھالانی تہ ءَ انت – منی برات یک سرکاری کاردار ءُ مئے گِس ءِ یکیں کمائینوک انت –

آئی ءِ گوشگ ات کہ بیگواھیں رشید ءِ مات کماش ءُ ناجوڑ انت کہ وتی پادانی سر ءَ تریت نہ کنت اگاں منی براتانی بگیری ءَ ریاست ءِ گور ءَ سبوت ھست گڑا آھاں آمیدگس ءَ بیاریت اگاں نیست گڑا منی براتاں یل بہ دنت – منی براتانی ھمراھی ءَ دگہ نھ مردم برگ بوتگ ات کہ آھانی تہ ءَ شش یل کنگ بوتگ بلے منی براتانی ھچ ھال ءُ اھوال ءِ نیست –

ھمے وڑ بلوچستان ءِ دمگ مچھ ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں ودود ساتکزئی ءِ گوھار ءِ گوشگ ات کہ دوازدہ اگست سال دوھزار ءُ بیست ءُ یک منی برات گِس ءَ مگرب ءِ نماز ءِ تیاری ءَ بوتگ کہ آئی ءِ سنگت نثار ء اسمائیل شاہ ءَ آ لوٹارینتگ ءُ وتی ھمراھی ءَ بُرتگ – ھمود ءَ ساڑی ئیں مردمانی گوشگ انت کہ اھانی گِس ءَ چہ کمے دور ایف سی ءِ دو گاڑی اوشتوک بوتگ ءُ یک دگہ ٹوڈی گاڑی ءِ کہ آئی نمبر پلیٹ پرنبوتگ ءُ کانچ سیاہ بوتگ انت ھماھانی ھمراہ بوتگ – نثار اسمائیل ءَ گپ کنان ءَ منی برات برتگ ءُ ھمانی گور ءَ سر کتگ وھدیکہ آ نزیک ءَ سر بوتگ انت لس مردمی پوشاکیں کارمنداں منی برات ءِ دیم ءَ پچ ءِ بستگ ءُ گاڑی ءِ تہ ءَ دور داتگ –

ودود ساتکزئی ءِ گوھار ءِ گوشگ ات کہ چوشکہ بلوچستان یک ٹکی دمگے ھچ کس شاھدی دیگ ءَ دیم ءَ نیت ءُ اے مردم گُشاں مئے نام گرگ مہ بیت پرچاکہ باندا چیریں ادارھانی کارمند مار ءَ تنگ مہ کن انت – من ءُ منی برات ھم سرپد نبوتگیں کہ آئی ءِ سنگت نثار احمد ء اسمائیل شاہ دلاری ءِ کار ءَ کنگ ءَ انت –

آئی ءِ گوشگ ات کہ منی برات نودربرے ءُ چٹیاں وتی برات ءِ ھمراھی ءَ اشکرانی کاریز ءَ کار کنت گوں ءُ مگرب ءِ وھد ءَ گِس ءَ کیت آئی ءَ گوں ھچ وڑیں گلاں سیادی نیست –

گوھار ءِ گوشگ ات کہ ما کانود ءُ ھک ءِ سر ءَ اوست داریں ھمے ھاتر ءَ وتی نیمگ ءَ چہ گڈی پیسلہ ءَ نہ کنیں ءُ گُشیں اگاں ودود ءَ ھر وڑیں ردی ءِ کتگ گڑا ملک ءِ کانودانی رِد ءَ آمیدگس ءَ آرگ بہ بیت آئی ءِ نام ءِ ارزی نبشتہ کنگ بہ بیت پیشی جنگ بہ بیت اگان ھر وڑیں الزام ءِ آئی ءِ سر ءَ مار ءَ ھچ اتراز نیست بلے اے وڑ یک مردمے ءَ آوار جنگ ءُ بیگواہ کنگ انسانی ھکانی بگیری دارگ انت بزاں ملکی کانودانی ھم لگتمالی یے –

ودود ساتکزئی ءِ گوھار ءِ گوشگ ات کہ اگاں آئی ءِ برات ءِ سر ءَ الزام ءِ ھست بس ھما سزا دیگ بہ بیت اے ور مردم ءَ آوار جنگ ءُ بیگواہ کنگ سرجمیں کھول ءَ پرچا سزا دیگ بوگ انت –

بیگواھیں ودود ساتکزئی ، آصف بلوچ ءَ رشید بلوچ ءِ کھول ءَ گوں اھوالکاراں گوشت کہ مئے توار ءَ ھر تک ءَ سر کن ات داں مار ءَ ھک نرسیت اے ناکہ شمئے کار ءِ لوٹ انت بلکیں اھوالکاری سنچی ھم پرز انت مروچی ما شمے کمک ءَ اقوام متحدہ ایمنسٹی انٹرنیشنل، ہیومن رائٹس واچ، ایشن ہیومن رائٹس کمیشن ءَ ھوار انسانی ھکانی درسیں ادارھاں لوٹ کناں کہ آصف بلوچ ءُ عبدالرشید بلوچ ءُ ودود ساتکزئی ءِ زورانسری آوار جنی ءِ بگیری ءَ گامگیج بہ زور انت ءُ آھانی یل کنائینگ ءَ وتی کرد ءَ پیلو بہ کن انت –

نوکتریں

گورنر ءِ نیمگ ءَ چہ کریمنل لاء آرڈیننس ءِ مول ءُ مراد آجوئی ءِ گپانی گٹگیری اِنت- این ڈی پی

نیشنل ڈیموکریٹک پارٹی ءِ نیمگ ءَ چہ کرینمل لاء آرڈیننس سیاھیں کانون گوشتگ کہ گورنر بلوچستان اُستانی پتر سیشن بوگ ءَ...

تربت: سلاہ بندیں مردماں پوجی چوکی ءِ سر ءَ اُرش کرتگ

بلوچستان ءِ دمگ کیچ ءَ سلاہ بندیں مردماں پاکستانی پوج ءِ چوکی ءِ سر ءَ اُرش کرتگ -

مکران ٹرانسپوٹراں پولیس رویش ءِ بگیری ءَ شال کراچی شاھدگ ءِ سر ءَ زھرشانی کتگ

مکران ءَ چہ کراچی ءَ رؤکیں کوچانی ڈرائیور ءُ ھُدابنداں ھب پولیس ءِ رویش ءِ بگیری ءَ لک بدو ھب ءِ...

اسد عرف ءِ باست- چنگیز بلوچ

نبشتانک: اسد عرف ءِ میجر باست نبشتہ کار چنگیز بلوچ دی بلوچستان...