TBP Balochi

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ نود ءُ یک روچ سرجم بوتگ – چہ ھب چوکی ءَ سیاسی ءُ چاگردی باسک محمد یحیٰ بلوچ، نصیب اللہ بلوچ، عبدالعزیز بلوچ ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ تہ ءَ برجاھیں لشکر کشی ءَ تیزی آرگ ءِ پیسلہ کنگ بوتگ اشی ءَ پد بلوچستان ءِ جتاجتائیں دمگاں مزنیں کساسے ءَ لشکر کشیانی تہ ءَ گیشی آرگ بوتگ ءُ مھلوک ءِ کُشت ءُ کوش یکشل ءَ برجاہ انت – مکران ءَ بگر تاں ڈیرہ بگٹی، کوہلو ءُ کوھستان ءِ دمگاں مزنیں کچے ءَ برجاھیں لشکر کشی ءِ تہ ءَ گیشی آرگ بوگ ءَ اِنت – ھمے ماہ ءَ بولان، پنجگور، تمپ ءُ بلوچستان ءِ گیشتریں دمگاں ریاستی پوج ءِ گرینڈ آپریشن ھمے رِد ءِ کڑی ئے کہ وتی ھاکمانی وش کنگ ءِ ھاتر ءَ کنگ بوتگ –

ماما قدیر ءِ گوشگ ات کہ ریاست وتی بے سوبی ءِ چیر دیگ ءِ ھاتر ءَ زوراکی ءُ درندگی کنان ءَ دست ءُ گوشیں آوار جتگیں بلوچاں شھید کنت ءُ آھانی زانگولیں جوناں چگل دنت – بلوچستان ءِ تہ ءَ ریاست ءِ زوراکی ءِ راج یکشل ءَ برجاہ انت ءُ پوجی لشکر کشی برجاہ انت – پوج ھر ھما وھد ءَ بہ لوٹ ایت بلوچ ءِ بگیری ءَ لشکر کشی ءِ نام ءِ سر ءَ لس مھلوک ءَ نشانگ کنت ءُ بلوچ راج ءِ کشت ءُ کوش ءَ کنگ ءَ انت –

آئی ءِ گوشگ ات کہ ریاست بلوچستان ءِ تہ ءَ برجاھیں پرایمنیں جھد ءَ درملکی ایجنسیانی دزمانجنی گوش ایت ءُ وتی نوک آبادی ءِ زور ءِ برجاہ دارگ لوٹ ایت – من ھمے پھم آں کہ پاکستان ءِ رسانکدر، آمیدگس ءِ زور ءِ یکجاھی ءَ ترا چہ بگیری دارگ انت راستی ےَ پُرایمنیں جھدے تہ ءَ سوبمندی پدر بنت –

سربوتگیں ھالانی رِد ءَ گوستگیں روچ ءَ بلوچستان ءِ بنجاھی شھر شال ءَ ناشناسیں مردماں پاکستانی پوج تراک ناکیں شوروانی نشانگ جوڑ کرتگ – تراک ءِ زمّہ واری بلوچ لبریشن آرمی ءَ منّ اِتگ –

دمگی اھوالکارانی رِد ءَ اُرش شال ءِ دمگ ھزار گنجی “سبزی منڈی” ءَ پاکستانی پوج ءِ گاڑی ءِ تراک ناکیں شوروانی نشانگ جوڑ کنگ بوتگ، چریشی ءَ پاکستانی پوج ءَ جانی ءُ مالی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ سَے دوشمبے ءَ شال ءِ دمگ ھزار گنجی ءَ زورگیریں پاکستانی پوج ءِ کارمند بمب تراک ءِ نشانگ جوڑ کرتگ انت –

جارکش ءَ گوشتگ کہ شال ءِ دمگ ھزار گنجی ءَ سبزی منڈی ءَ زورگیریں پوج ءِ گاڑی ءِ تراک ناکیں شوروانی زد ءَ اتکگ ءُ چریشی ءَ گاڑی تاوان بار بوتگ وھدیکہ سَے کارمند ٹپی بوتگ انت –

آئی ءَ گوشتگ کہ دژمنیں پوج ءَ مدامی ئیں وڑ ءَ اُرش ءَ پد ھما جاہ سرجمی ءَ بند کرتگ ءُ وتی جانی ءُ مالی تاوان ءِ رسانکدراں چہ چیردیگ ءِ جھد کرتگ –

جارکش ءَ گڈسر ءَ وتی درشان ءِ تہ ءَ گوشتگ کہ اے اُرش زمّہ واری ءَ مئے گل بی ایل اے منّ اِیت ءُ سرڈگار ءِ آجوئی ءَ تاں دژمن ءِ سر ءَ مئے اُرش چد ءُ گیشتر ترندی ءَ گوں برجاہ مان انت-

سر بیتگیں ھالانی رد ءَ اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 187 نیکراھی ناشرکار تالبانی جنگول کُشگ ءُ 112 سکی ءَ ٹپی بیتگ اَنت۔ اِے سوباں ھوار 2 تالبانی ناشرکاریں جنگول دزگِیر ھم کنگ بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی جنگی اُرشاں 187 تالبان جنگول کُشتگ اَنت ءُ 113 سک ٹپی ءَ ھوار 2 جنگول دزگِیر ھم کُتگ اَنت۔

آئی ءَ وتی ٹیوٹر پیگام ءَ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت کُنر، لوگر، گزنی، ھوست، کندھار، اُروزگان، پریاب، بلک،جوزجان، سمنگان، بلگان، ءُ کپیسہ ءِ دمگاں کُتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 89 تالبان جنگول کُشگ بیتگ اَنت ءُ 82 سکی ءَ زدگ ءُ ٹپی کُتگ اِت اَنت ئِے ءُ ھمے جنگی اُرش کُنر، کندھار، ھِرات، پَراہ، پریاب، سمنگان، ھِلمند، نِمروز، ٹکھر ءُ کپیسہ ءَ دمگاں بوتگ اِت اَنت۔

ھمے وڑ ءَ اوگان راجی لشکر ءِ گْوشتانکار جنرل اجمل شینواری ءَ گْوشتگ کہ اوگان راجی لشکر تالبان ءِ سر ءَ تْرُندیں جنگی اُرشاں کنان ءَ چہ تالبان ءِ دست ءَ زیردستیں دمگاں آجو کنگ ءَ انت ءُ گْوستگیں یک ھپتگے ءِ توک ءَ 1500 تالبان جنگول کُشگ، 800 سکی ءَ زدگ ءُ بازینے دزگِیر ھم بوتگ اَنت۔

اے جنگی اُرشانی آسر ءَ اوگان راجی لشکر ءَ روایرشُت ءُ زِرباری ھیرات ولایت ءِ دمگ کاروک ءُ گوریچی ولایت بلگ ءِ کلدار دمگ چہ تالبان ءِ زیردست ءَ آجو کنائینتگ اَنت۔

نبشتانک: ماہ شان، منی ءُ مرگ ءِ نْیام ءَ تھنائی پَش کپتگ

نبشتہ کار: مھروان کمبر

دی بلوچستان پوسٹ

ماھو! مرچی تو بے کِساس گیر پیداک ئے، اے ساھت ءَ من وتی ابیتک ءُ بے تواریں کُوٹی ءَ نشتگاں دگہ کس نیست بس من ءُ رولہ ، روزرد ءُ تھنائی چمانی دریچک ءَ نشتگیں تئی یاتانی کیپاں نوشگ ءَ اِیں ھردیں بیگاہ ءِ مُلوریں ساھتاں کہ ساھگ دْراجتر بَہ اَنت گُڑا چمّانی دریگ ءَ اُوشتاتگیں ارس چو رگاماں شل اَنت تئی ءُ گلزمین ءِ دُوری ءِ کِسّھاں کار اَنت۔ پد ءَ ھر چیزّ ءَ تھنائی ءِ چادر مانپوش اِیت ءُ تھنا باں من، اے ابیتکیں بیگاہ ، رولہ ءُ روزرد ، اے مُرگانی توار، اے کوش ءِ زیمر، اے جنگل ءِ درچک ءُ دار پد ءَ ھر شپ تھنائی یاتانی ژانگاں بند اِیت ابیتک ءُ بے تواریں کوٹی ءَ ناچ ءَ لگّ اِیت یاتانی تہ ءَ ھر ھما نِدارگ ھوار بَہ اَنت کہ وتی گُلزمین ءَ تئی ھمراھی ءَ دیستگ اَنت یا کہ مار اِتگ اَنت نہ زان آں چُنت سال اِنت کہ نہ ترا دیستگ، نہ وتی مھلبیں زمین دیستگ، بس درانڈیھ ءُ درامدیں مردُم اَنت، کبر گونگیں کُوٹی ءُ تئی بے کراریں مھروان کمبر اسل ءَ اے تئی ءُ گُلزمین ءِ یاتانی کرار اِنت کہ من بے کراراں۔

ماھو! یک اِنسانے وتی زندگی ءِ تہ ءَ بازیں وھد ءَ بازیں جاہ ءَ وڑ وڑیں جاوراں گوں دُچار کپ اَیت آئی ءِ زندگی ءِ تہ ءَ ھزاراں روچ انچیں کَیت کہ آئی ءِ یاداشت ءِ تاکانی تہ ءَ گار ءُ بیگواہ بَہ اَنت، بلے لھتیں روچ ءُ لھتیں دمان انچیں بَہ اَنت کہ سرجمیں زندگی ءَ آئی ءِ دل ءُ ارواہ ءِ سر ءَ نکش بَہ اَنت آ ھم یک انچیں روچے اَت کہ من گم ءُ رنجانی دُنیا ءَ وتی پُرشتگیں وابانی شِنگ ءُ شانگیں ٹُکّرانی نزّ آرگ ءَ سیاہ گْواتانی میار بیت آں۔ ھو!  آ یک سُرمگیں بیگاھے اَت، ھر نیمگ ءَ یک بے کیپیں ابیتکی ءُ بے تواری یے ءَ مانپوشتگ اَت روچ دیم پہ رولہ ءَ جُنزان اَت سارتیں گْواتے کشگ ءَ اَت تاکریچ ءِ موسم اَت جُتائی ءِ موسم اَت دُوری ءِ موسم اَت تاک چہ درچکاں جُتا بوھان اِت اَنت، کونج چہ رماں ،رولہ چہ رنگاں ءُ من چہ گلزمین ءَ۔

ماھو! ھردیں درانڈیھ ءَ تاکریچیں موسماں درچکانی زردیں تاک کپ اَنت ءُ رھسراں شِنگ اَنت ، اُمیتانی چراگ مِران بَہ اَنت سارتیں بیگاہ برپانی چادر ءَ مانپوش اِیت ءُ رولہ ءَ درست وتی گِساں واتر بَہ اَنت ، گُڑا من وتی شوھاز ءَ باتن ءِ بے تواریں دمکاں درکپان ءُ جیڑگانی در ءَ ٹُکّاں جیڑاں کہ منی ھم لھتیں واب اِت اَنت ، واھشت ءُ ارمان اِت اَنت، پد ءَ بِہ گِند ئے جاور مٹّ اِت اَنت یاکہ موسم، نہ زان آں! بلے اِنچو زان آں کہ ھر چیز چہ من پچگرگ بوت۔ نہ آگھیں چمّانی واب پشت کپت اَنت نیکہ واھشت، نہ ارمان نہ کرار، بس ھما زمانگ ءِ لھتیں یات۔ زھیر چکاریں گْوست ءِ ابدمانیں ترانگ ءُ بے کراری پہ من ءَ پشت کپتگ اَنت، پرچا کہ بے کراریں نِگاہ ءُ موتک آؤرتگیں چمانی ارساں چہ ابید زیبائیں نِدارگ، بچکندانی وشبو، ٹھکانی زیمر، نودانی شنزگ، تیاب ءِ چول، مُرگانی الھان، دِرین ءِ رنگ، پیاپیں استین، سُھب ءِ سمین، کلکشان، ماھِکان ءُ شپ جڑکوکیں اِستال ، ھر چیز من ھمود ءَ شمُشت ءُ اتک آں۔

ماھو! نُوں رولہ ءُ روزرد سیاہ ءُ تھاریں شپے ءَ بدل بیتگ اَنت ءُ اے ساھت ءَ لُنج ءُ تاموریں شپ ءِ گُڈّی پاس جُنزان اِنت ءُ کندیل ءِ مِر مِرانکیں رُژن ھم وتی ساھکندن ءَ سر بیتگ بلے منی واب انگت چمانی دیار ءَ چہ بیگواہ اِنت، برے برے ھمے گُمان بیت منی وابانی ھمراھی ءَ مئے جِند ھم یک انچیں جنگے ءَ بیگواہ کُتگ کہ اُود ءَ ھلک ءُ دیار نیست، نیکہ مردم ھست بس چاریں نیمگ ءَ بے تواری ءَ مانشانتگ ءُ ھمے بے تواری ءِ دریا منی دل ءِ ویرانیں کبرستان ءِ ھما ویرانیں کبر ءِ سر ءَ موتکاں آرگ لوٹ اِیت کہ کرنے ءَ پیسر من وتی جند گوں پُرشتگیں واباں، ناسرجمیں واھشت ءُ ارماناں کل کُتگ اَت۔

ماھو! اے درانڈیھ ءِ نہ وشیں ساھتاں منی گْور ءَ ھچ نیست،  بس منی ءُ مرگ ءِ نْیام ءَ تئی ءُ گُلزمین ءِ گِندگ ءِ بھشتیں واب ءُ تھنائی ءَ ابید دگہ ھِچّ پَش نہ کپتگ، ھِچّ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ اوگان ءِ لشکر ءَ گوریچی ولایت بلگ ءِ دمگ کلدار تالبان ءِ چَنگُل ءَ آجو کُتگ، دومی نمیگ ءَ کِرّ ءُ کش ءِ گزنی، پریاب ءُ ٹکھر ءِ ولایتاں پہ دزگِیر کُتگیں دمگانی آجو کنگ ءَ تْرُندیں جنگ برجاہ اَنت۔

زانگ بہ بیت کہ ھمے کلدار ءِ دمگ ءَ کار ءُ باری پٹ ھیرتان ءِ میتگ ھم ھست چہ اود ءَ اوگانستان ءُ اُزبکستان ءِ میان ءَ سیمسری کار ءُ بار بیت۔

گْوستگیں ماہ ءَ ھمے کلدار دمگ تالبان ءِ دست ءَ دزگِیر بیتگ اَت بلے نی اوگان راجی لشکر ءَ گوں لس مھلوک ءِ آشوب ءِ کُمک ءَ بلگ ءِ دمگ کلدار چہ تالبان ناشرکارانی چنگُلاں آجو کنائینتگ۔ کلدار ءِ دمگ نامداریں آمو کور ءِ نزیک ءَ انت کہ اود ءَ تاجکستان ءُ اُزبکستان ءِ سیمر ڈیک ور اَنت-

اِے درگت ءَ بلگ ءِ گورنر واجہ آدل شاہ آدل ءَ گْوشتگ کہ ماں اِے جنگ ءَ مئے راجی لشکر ءَ لس مھلوک چہ بیرانی ءَ رکینان ءَ باز جْوانیں سوبے زُرتگ ءُ اِے گامگیج دیم ءَ ھم برجاہ بنت۔ دومی نیمگ ءَ اوگان راجی لشکر ءِ گُشتانکار جنرن اجمل اُمر شِنواری ءَ گْوشتگ کہ اِے وھد ءَ اوگانستان ءِ 25 ولایتاں تْرُندیں جنگ برجاہ اِنت ءُ اِے یکیں ھپتگ ءَ اوگان راجی لشکر ءَ 1500 تالبان جنگول کُشگ ءُ 800 سک زدگ کُتگ اَنت۔ دیم ءَ اِے ھم گْوشتگ ئِے کہ نی اوگان راجی لشکر اُرشی تب ءَ اِنت۔

یات بہ بیت کہ سے روچ ءَ پیسر اوگان راجی لشکر ءَ روایرشُت ءُ زِرباری نیمگ ءِ ھیرات ولایت ءِ دمگ کاروک ھم چہ تالبان ءِ دست ءَ آجو کُتگ اَنت۔

بی ایس او پجار ءِ بنجاھی جارکش ءَ وتی شنگ کرتگیں درشان ءِ تہ ءَ گُشتگ کہ وندر ھنکین ءِ آرگنائزر وسیم تابش ءِ بیگواھی ءَ یک ماھے ءَ گیش گوزگ ءَ پد وتی شنگ کرتگیں درشانی ءَ گُشتگ کہ گوستگیں ماہ ءِ نُھ جون ءَ وسیم تابش بلوچ ھزدار ءَ دزگیر کنگ ءَ پد بیگواہ کنگ بیتگ کہ انگت ءَ بیگواہ اِنت –

آئی ءَ گُشتگ کہ یک ماھے ءِ گوزگ ءَ پد آئی ءِ بارو ءَ ھچ ھال ءُ اھوال نیست اِنت ءُ آئی ءِ کھول جتا جتائیں جیڑگانی آماچ اَنت ءُ آئی ءِ کھول ءِ اے گرانیں گم ھلاس کنگ بہ بنت ءُ وسیم تابش یلو کنگ بہ بیت اِنت –

جارکش ءَ گُشتگ کہ بلوچستان ءَ ھزارانی کچ ءَ مھلوک بیگواہ اَنت اگاں اے بیگواھیں مردماں کجام ھم جرم کرتگ گڑا آمیدگساں پیش کنگ بہ بنت ءُ دانکہ آ کانود ءِ رد ءَ سزا دیگ بہ بنت اے وڑ ءَ بیگواہ کنگ آیانی کھول گیش گمانی آماچ بنت –

جارکش ءَ وتی درشانی ءِ گُڈسر ءَ گُشتگ کہ بلوچستان ءَ ھزارانی کچ ءَ مردمانی بیگواھی انسانی ھلاسی ءِ ردوم ءَ زورگ ءَ اِنت ءُ سرکار تھنا وتی کانودانی چیر ءَ ساہ مہ کش ایت بلکیں زورانسری آوار جنیاں بہ داریت –

وائس فار بلوچ مسنگ پرسنز ءِ رھشوں ماما قدیر بلوچ ءَ شال پریس کلب ءِ دیم ءَ برجاھیں بیگواھیں مردمانی زھرشانی بنجل ءَ چہ وتی تامری درشان ءِ شنگ کرتگ ءُ گوشتگ کہ ریاستی مشینری مئے زھرشانی بنجل ءَ پروشگ ءُ مئے پرایمنیں جھد ءَ درگان درگان ءِ کنگ ءِ جھد ءَ انت –

ماما قدیر ءِ گوشگ ات کہ اے اولی رند نہ انت اشی ءَ پیش ھم شال ءُ کراچی پریس کلب ءِ دیم ءَ مئے بنجل سوچگ بوتگ انت ءُ بیگواھیں مردمانی اکس چست کنگ ءُ برگ بوتگ انت –

آئی ءِ رِد ءَ ریاستی مشینری مئے زھرشانی ءَ درگان درگان کنگ ءِ جھد ءَ انت اے وڑیں کاراں چہ ما نہ تُرسیں ءُ وتی پُرایمنیں جھد ءَ برجاہ داریں –

ماما قدیر ءِ گوشگ ات کہ بلوچستان ءَ ریاستی زوراکی لشکر کشی ءُ مردمانی زورانسری آوار جنی ھوار زالبولانی کم شرپی ءُ گِسانی دوداں لگتمالی رِد یکرندے پد ءَ گیش کنگ بوتگ اَنت بانک کیگد ءِ کوش بلوچ چکچینی ءِ درچ اِنت –

آئی ءِ گوشگ ات کہ ھاکمانی نیمگ ءَ مزاکرات ٹاہ ھُشکیں بے بنیں گپ انت اگاں ھاکماں واک ھست گڑا اول ءَ بیگواھیں مردماں دیم ءَ بیار انت –

بلوچستان ءِ دمگ کیچ ءَ ھواریں دمگ تمپ ءِ مھلوک ءَ بجلی ءِ نیزوری ءُ نہ بوگ ءِ سبب ءَ زھرشانی کرتگ، زھرشانی کنوکاں شش اداراں گریڈ اسٹیشن ءِ دیم ءَ نندانک جتگ ءُ زھرشانی کرتگ –

تمپ، گومازی ءُ بالیچاہ ءِ مھلوک ءِ گوشگ اِنت کہ گیشیں لوڈشیڈنگ ءُ وولٹیج ءَ مھکمہ کیسکو کنگ ءَ اِنت کہ اے مھلوک ءِ سر ءَ زُلم اِنت باید آ چُش مہ کنت اے گرم ءَ مھلوک وتی لوگانی تہ ءَ تاھیر گرگ ءَ نہ اِنت بلے آئی ءَ ھچ رھم نیست اِنت –

زھرشانی ءَ آل پارٹیز کیچ ءِ کنوینر نصیر احمد گچکی، حاجی عتیق ءُ ادیب بلوچ ءَ تران کرتگ ءُ گوشتگ کہ مھکمہ ءِ کیسکو ناجائزیں لوڈشیڈنگ کنگ ءَ اِنت کہ چریشی ءَ مھلوک تکانسر اِنت –

آیاں گُشتگ کہ ایس ای کیسکو مکراب سرکل ریاض پَٹان ءُ گریڈ اسٹیشن ءِ محراب خالق ءَ مکران ءَ ھوار تمپ ءِ مھلوک ءِ زندگی بے تاھیری کرتگ اَنت –

آیاں گُشتگ کہ یک نیمگے ءَ کرونا نادراھی ءُ دومی نیمگ ءَ کیسکو اِنت آیاں گُشتگ کہ تمپ ءِ بازیں جاھاں اے نادراھی ءَ وتی پنجگ ایر داتگ اَنت ءُ دومی نیمگ ءَ کیسکو ءَ مھلوک ءِ گُٹ ءَ پنجگ سک کرتگ اَنت –

آیاں گُشتگ کہ کیسکو بے لگام اِنت کہ آئی ءَ جُست ءُ پُرس کنوک نیست اِنت – آیاں گُشتگ کہ مارا بجلی دیگ بہ بیت –

آیاں گُشتگ کہ سرکار ءَ تمپ ءِ مھلوک بے وارسی ءَ یلو کرتگ ءُ مئے جیڑھانی سر ءَ سرکار چم پوشی کنگ ءَ اِنت –

آیاں گُشتگ کہ مارا بجلی دیگ بہ بیت ما ھر روچی ئیں پر ایمنیں زھرشانی ءَ دمبرتگ ءُ ما ایس ای ءُ آئی ٹیم ءَ اے کلوہ ءَ دیگ لوٹ ایں کہ تمپ ءَ شریں رنگے ءَ بجلی بہ دنت پرچاکہ اد ءَ نندوکیں مردم ھم انسان اَنت –

آیاں گُشتگ کہ پنجاہ ڈگری سنٹی گریڈ ءَ مئے لوگانی جاورھال ناگیگ اَنت چریشی ءَ پد اسسٹنٹ کمشنر تمپ صادق کبدانی ءُ ونگ کمانڈر میجر فیصل نعمت اللہ ءَ زھرشانی کنوکانی میان ءَ گپ ءُ تران ءَ سوبمند بیتگ ءُ زھرشانی کنوکاں وتی زھرشانی ھلاس کرتگ –

ٹی بی پی رسانکدر اھوالکار ءِ رد ءَ دسمبر 2010 ءِ اَرب آشوب ءِ بُنگیجی اِستان تیونس زرکاری ءُ مُلکاری ءِ جاورھالانی نگیگی ءِ آسر ءَ یک رندے پد ءَ زھرشانی ءُ پساتانی آماچ بیتگ۔ یکشمبے ءِ روچ ءَ کارمستر کیس سعید ءَ راجی سروزیر ھشام المشیشی چہ سرکاری واک ءَ کش اِت ءُ پد ءَ پارلمنٹ ئِے ھم پْروشینتگ، ایشی ءَ ابید تیوگیں پارلیمانی باسک ئِے رَد کنان ءَ جواز داتگ کہ اِے ھُکم سرکاری کانود ءُ رھبندانی رِد ءَ اَنت۔

سعید ءَ وتی گُشتانک ءَ ھمے باوری ھم داتگ کہ وتی سرکاری واک ءِ رِد ءَ نوکیں سروزیرے ءَ سَوگند دنت چہ کیس سعید ءِ گُشتانک ءَ پد بازیں لس مھلوکے چہ وتی گِساں درکپان ءَ دگ ءُ راھانی سر ءَ پسات ءُ زھرشانی کنان اِنت ءُ چَپیں پاٹیاں ھم کارمستر سعید ءِ سوڑگ ءَ پِٹ دیان گْوشتگ کہ اِے راجمستری ءِ ھلاپ ءَ بدیں زورانسری بلے دومی نیمگ ءَ سعید ءِ پلہّ مُرزی ءَ بازیں لس مھلوک شھر ءِ دمک ءُ دگانی سر ءَ شاتکامی کنگ ءَ اَنت۔

پارلیمنٹ ءِ گُشتانکار ءُ سرکاری پاٹی انادھا ءِ باسک راشد گنوشی ءَ وتی یک بیانے ءَ سعید ءَ تُھمت جنان ءَ گْوشتگ سعید ءِ اِے گامگیج آشوب ءُ راجمستری ئیں سرکار ءِ ھلاپ زورانسری یے-

بازیں شاھدانی رِد ءَ ماں بلاھیں زھرشانی، روانک ءِ مُچّیاں بھر زِیروکیں لس مھلوک ءَ موناسٹر، سپاکس، اِلکیپ، سوس ءُ توزیر ءِ شھراں انادھا پاٹی ءِ کارگس ءُ بُنجاہ ماندار اتگ اَنت۔

زانگ بہ بیت کہ چہ دسمبر 2020 ءِ بُنگیج بیتگیں ارب آشوب ءِ آسر ءَ ءُ پد ءَ چہ گْوستگیں بازیں سالے ءَ تینوس وت ماں وتیں اُلسی جنگ ءُ نیکراھی ناشرکاریں گل دائیش ءِ بیرانیں اُرشانی دیمپان بیتگ چیریشی ءَ سیل ءُ سواد ءِ کار ءُ بار ءَ بے کساس زیانی بیتگ ءُ لکانی کچ ءَ مھلوک بے پوریاگِر بیتگ اَنت۔

بلوچستان ءِ دمگ وڈھ ءَ سر بیتگیں ھالانی رد ءَ مزن شھدگ ءَ کوچ ءُ سواری گاڑی ءِ میان ءَ ٹکع وری بیتگ چریشی ءَ نُھ سالی زھگے ءَ ھوار پنچ مردم بیران۔

گیشیں ھالانی رد ءَ گوستگیں شپ ءَ وڈھ ءِ بازار ءِ نزیک ءَچہ شال ءَ دیم پہ کراچی ءَ روگ ءَ بیتگ کہ گاڑی ءِ کراسنگ ءِ وھد ءَ ناوشیں وئیلے ءَ پنچ سالی زھگے ءَ ھوار پنچ مردم بیران بیتگ اَنت –

وئیل ءَ گاڑی سرجم ءَ تباہ بیتگ ءُ بازیں مُشکلاں پد لاش کشگ بیتگ اَنت ءُ بس ءِ ڈرائیور تتکگ –

بیران بیتگیں مردمانی تہ ءَ نذیر احمد ء محمد عالم، محمد یاسین ء رسول بکش، واھد بکش ء الاھی بکش، نُھ سالی ئیں ھزدار ءِ جھمنندیں زھگ، ابرار حسین ء محمد انور جھمنند قادر آباد ھاران ھوار اَنت-

بیران بیتگیں مردم بلوچستان ءِ گوستگیں گورنر ءُ گوستگیں پوجی اُرد ءِ سروک جنرل عبدالقادر بلوچ ءِ سیاد اَنت –

ایس ایچ او وڈھ طفیل احمد مینگل ءِ گوشگ اِنت بیران بیتگیں مردمانی لاش ریسکیو 1122 ٹیم ءِ کمک ءَ ڈی ایچ کیو ھپستال ھزدار ءَ سر کرتگ اَنت اود ءَ اژدری چار ءُ ٹپاس ءَ پد لاش کھولانی ھوالگ ءَ کنگ بیتگ اَنت –

ھالانی تہ ءَ گُشگ بیتگ کہ وڈھ ءَ دو روچانی تہ ءَ دگ ءِ وئیلاں ھشت مردم مرگ ءِ ارجان بیتگ اَنت –

ھمے وڑ ءَ ڈیڑہ بگٹی ءَ روجھان جمالی ءَ سیادی داروکیں مردمانی گاڑی وئیل ءِ آماچ بیتگ ءُ چریشی ءَ سَے مردم بیران بیتگ اَنت –

دگہ وئیلے پنچیائی کلی سیدال ءَ پیش اتکگ کہ اود ءَ پرپٹ سوارانی ٹکر ورگ ءَ دو کس بیران ءُ دو زدگ بیتگ اَنت –

زانگ بہ بیت بلوچستان ءَ گوستگیں دو روچانی ءَ ھبدہ مردم مرگ ءِ ارجان بیتگ اَنت ءُ بازیں کچے ءَ زدگ بیتگ اَنت –

بلوچستان ءَ دگ ءِ وئیلانی گیشتریں سبب دگانی پُرشت ءُ پروشی ءِ سبب گوشگ بیگ ءَ اِنت ءُ سرکار ءِ سر ءَ نادلگوشیانی سر ءَ ایراد ھم گرگ بیگ ءَ اَنت –