TBP Balochi

شائر: سلیم ناز

دی بلوچستان پوسٹ

اختر ندیم اختر ندیم

داتگ بداں تو ترس ءُ بیم

الله تئی پُشت پناه

کوهانی سنگر تئی مکیم

پہ آجوئی جنگ ءَ شُت ئے

کُت دژمناں گوں سین ءُ جیم

پہ بزگیں راج ءَ وتی

کرت اِت وت ءَ مال ءَ یکیم

ساڑی مدام جنگ ءِ پڑءَ

اُوشتگ گران تئی پہ دیم پہ دیم

پہ گلزمین ءِ هاتر ءَ

هچبر نہ منّت سند ءُ سیم

واجہ پہ تئی دیدار ءَ

تپل ءِ وڑ ءَ گریت اِنت سلیم

گل سنگت ءَ شھید کنوکیں دو ریاستی دلارانی پجار بوتگ اَنت – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کتگیں درشان ءِ تہ ءَ گوشتگ کہ کامریڈ یونس داؤد پنام ء کامریڈ میراس ء ملا داؤد جھمنند دشت زرّیں بگ گوستگیں روچاں روکپتی بلوچستان ءِ تیاب دپی شھر چھبار ءَ پاکستان ءِ دودلاراں شھید کتگ ۔

آئی ءَ گوشتگ کہ کامریڈ یونس داؤد سال دوھزار دوازدہ ءَ راجی آجوئی ءِ سلاہ بندیں جنگ ءَ گل ءَ گوں بندوک بوتگ۔ کامریڈ میراس بلوچی زبان ءِ جوانیں شائر ءُ ندکارے بوتگ۔ آئی ءَ گَل ءِ رسانکدر ءِ یک کاری ئیں باسکے بوتگ۔ گل پہ آئی ءِ جاڑی تبی ءُ بے مَٹّیں کِرداں پہ آئی ءَ ستک شانی ءُ سھریں دروت ندر کنت ءُ کول کنت کہ پہ سرڈگار ءِ آجوئی ءَ شھیدانی رتکگیں ھونانی سیراپی ءِ ھاترا بلوچ گلزمین ءَ پہ زورگیریں پاکستان ءَ دوزہ جوڑ کنت۔

جارکش ءَ گوشتگ کہ کامریڈ یونس ءِ شھید کنگ ءَ تیاب دپی شھر گوادر ءَ بلوچ دوزواہ ءِ دروشم ءَ اتکگیں دو پاکستانی چریک فھد ء واجد ءُ حفیظ ء واجد ءَ پہ پندل ءِ سر ءَ شھید کتگ ءُ گوں پوج ءِ کُمکّاری ءَ تتکگ اَنت ءُ گوادر ءَ شتگ اَنت۔ مئے گوں گوادر ءِ زانتی ءُ سمائی ئیں مھلوک ءَ دزبندی اِنت کہ ھمے چریکاں چہ دور بہ بنت۔ کہ آھاں پہ چندے زَر ءِ ھَوَس ءَ بلوچ سرڈگار ءِ یک گرانکدریں پُسّگے شھید کتگ۔ ءُ مئے گل زوتاں ھمے چاریگاں آسرے ءَ سر کنت۔

بلوچ یکجھتی کمیٹی کراچی ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ سھیل بلوچ ءِ کوش ءَ ما بلوچ راج ءِ توار ءِ ھاموش کنگ ءُ بلوچ راج ءِ یک تمردیں انسانے ءِ کُشگ ءَ بلوچ راج ءِ توار ءِ ایرموش کنگ پھم ایں –

جارکش ءَ گوشتگ کہ سھیل بلوچ بزگریں انسانے بوتگ آئی ءَ مزدوری کتگ ءُ وتی لوگ لاپ داتگ – سھیل بلوچ ھما انسان بوتگ کہ آئی ءَ ھچبر زوراکانی دیم ءَ سر جھل نہ کتگ بلکیں ھر وڑیں زوراکیانی بگیری ءَ توار چست کتگ ھمے سوب ءَ ریاستی ادارھاں آئی ءِ اے کار دوست نہ بوتگ ءُ کشندہ ٹولیانی نیمگ ءَ چہ کوشارینتگ –

جارکش ءَ گوشتگ کہ سھیل بلوچ چار سال ءَ زندانی بوتگ پد ءَ یل بوگ ءَ پد ھم سھیل ھاموش نہ بوتگ ھر وھد ءَ ھر زوراکیاں آئی ءَ وتی توار چست کتگ ءُ بانک کریمہ بلوچ ءِ کوش ءِ بگیری ءَ ھم وتی توار چست کتگ چریشی ءِ سوب ءَ اے ریاستی ادارھاں آ ترسینتگ ءُ بیھار داتگ بلے اے ترس ءُ بیھاراں سھیل ھاموش کرت نہ کت گڈسر ءَ ریاست ءِ گور ءَ بس ھمے یکیں راہ ھمیش ات کہ آ سھیل بلوچ ءَ ھاموش بہ کن انت ءُ ھمے وڑ کنگ بوت کہ چار روچ ساری سھیل بلوچ کُشندہ ٹولیاں کُشت –

جارکش ءِ گوشگ ات کہ اے کوش بلوچ راج ءِ یک انسانے ءِ کوش نہ انت بلکیں پگر ءِ کوش انت بلے اے کوش یک نزرئیہ کوش نہ انت پرچاکہ یک انسانے ءِ کوش ءَ آئی ءِ نزریہ نہ مریت – مروچی یک سھیلے جنگ بوتگ باند ءَ ھمے نزریہ ءِ سَد سھیل ودی بوت اِنت –

جارکش ءِ گوشگ ات کہ تاں ھما وھد ءَ بلوچ راج یکجاہ ءُ یکمشت نہ بیت اِنت آ ھمے وڑ کُشت کوش، آورا جنی ءُ زوراکیانی آماچ کنگ بیت اِنت ءُ ما ھمے وڑ بس ایرجنیں –

جارکش ءَ گوشگ ات کہ ما درسیں بلوچ راج ءَ چہ لوٹ کنیں کہ یکجاہ بہ بنت وت ءَ یک بلوچ ءِ سرپد بہ بنت وتی ھکانی ھاتر ےَ جُھد بہ کن انت بھر بانگ مہ بنت – آئی ءِ گوشگ ات کہ ما درساں پیش بلوچیں آئی پد ھرچی ایں آ رندیگے مار ءَ اے گپ شری ءَ سرپد بوگ ءُ زانگی انت بلوچ ءَ مدامی وتی ھکانی ھاتر ءَ جھد کتگ بلے مروچی بلوچ وتی ھکانی نہ رسگ ءِ بگیری ءَ انچو ھاموش انت سک باز پدردی یے –

قلعہ سیف اللہ ءِ پولیس تھانہ ءَ سی ٹی ڈی ءَ سَے مردم پولیس ءِ دست ءَ داتگ اَنت کہ آیانی پجار بیگواھیں مردمانی ناماں بیتگ اَنت-

قلعہ سیف اللہ ءَ پولیس ءِ تھانہ ءَ پولیس ءِ دست ءَ دیگ بیتگیں مردمانی پجار باسد بلوچ جھمنند مستونگ، سفیان بلوچ جھمنند شال ءُ سَیمی مردم ءِ پجار بیست ءُ ھپت مئی دوھزار ءُ بیست ءُ یک ءَ پنجگور وشبود ءَ بیگواھیں سھیل بلوچ ءِ نام ءَ زانگ بیتگ –

سئیں مردم مروچی سی ٹی ڈی ءَ قلعہ سیف اللہ ءِ نیمگ ءَ پولیس ءِ دست ءَ دیگ بیتگ اَنت –

بلے داں انگت ءَ سی ٹی ڈی ءَ اے پدر نہ کرتگ مردم کجا ءُ کدی گرگ بیتگ اَنت –

دومی نیمگ ءَ بلوچ سوشل میڈیا کارمرد کنوکانی رد ءَ اے سئیں مردم پیسر ءَ دزگیر کنگ بیتگیں مردم بیتگ اَنت کہ جتا جتائیں وھداں پاکستانی پوج ءُ چیریں ادارھاں آوار جنگ ءَ پد بیگواہ کرتگ اَنت مروچی آ پولیس ءِ دست ءَ دیگ بیتگ اَنت ءُ اے مردمانی کھول دیم ءَ نیتکگ اَنت –

دومی نیمگ ءَ گوستگیں روچ ءَ سی ٹی ڈی ءَ بارکھان ءَ سَے مردم ھم پولیس ءِ دست ءَ داتگ اَنت –

آ مردم گوستگیں روچ ءَ سی ٹی ڈی ءَ پولیس ءِ دست ءَ داتگ اَنت کہ آیانی پجار سوالی ء شاہ بیگ جھمنند تربت، نثار اھمد ء مھمد اسلم جھمنند بلیدہ ءُ رھیم جان ء عبدالواحد جھمنند بلیدہ ءِ ناماں زانگ بیتگ اَنت –

بلوچستان ءَ پاکستانی پوج ءَ یک مردمے دزگیر کنگ ءَ پد بیگواہ کرتگ ءُ ھمے وڑ پوج ءِ دست ءَ بیگواہ بیتگیں یک مردمے یلو کنگ بیتگ –

دزگیر کنگ ءَ پد بیگواہ کنگ بیتگیں مردم چریشی ءَ پیسر دو براں آوار جنگ ءُ بیگواہ کنگ بیتگ اے آئی ءِ بیگواھی ءِ سیمی بر اِنت کہ گرگ ءُ گار کنگ بیتگ –

بیگواہ کنگ بیتگیں مردم ءِ پجار علی جان ء نور مھمد جھمنند ھاران ءِ نام ءَ زانگ بیتگ کہ یک سبزی بھا کنوکیں مردمے –

دمگی مردمانی رد ءَ علی جان ء نور مھند یک سبزی بھا کنوکے ءِ ھواری ءَ یک فٹبالرے ھم کہ اے سیمی بر اِنت پاکستانی پوج ءَ آوار جتگ ءُ بیگواہ کرتگ –

اولی رند ءَ آ سال دوھزار ءُ ھژدہ ءَ نوشکی ےِ دمگ اھمد وال ءَ ایف سی ءِ چیک پوسٹ ءَ بیگواہ کنگ بیتگ چریشی ءَ آ دو ماہ ءَ بندیگ بیتگ، دومی بر ءَ آ دَہ مئی دوھزار ءُ بیست ءَ ھاران ےَ ایف سی ءُ ایم آئی ءِ کارمنداں آوار جتگ ءُ کہ پنچ ماہ ءَ پد انٹیلیجنس ءِ ادارھاں نوشکی ءِ پولیس ءِ دست ءَ داتگ نی اے سیمی بر اِنت کہ بیست ءُ شش اکتوبر سال دوھزار ءُ بیست ءُ یک ءَ سی ٹی ڈی ءَ ھاران ءِ بازار ءَ بس ءِ ھڈہ ءَ زورانسری آوار جتگ ءُ برتگ –

ھمے وڑ پنچ سال ءَ پیسر مستونگ ءَ آوار جنگ بیتگیں جواد بلوچ یل بیتگ ءُ وتی لوگ ءَ سر بیتگ –

دومی نیمگ ءَ ہیومین رائٹس کونسل آف بلوچستان ءِ انفارمیشن سیکرٹری عبداللہ عباس ءَ گوستگیں روچ ءَ بارکھان ءَ پولیس ءِ دست ءَ دیگ بیتگیں بازیں مردمانی بارو ءَ راستی پدر کرتگ ءُ گوشتگ کہ اے پیسر ءَ بندیگ جاھاں بندیگ بیتگ اَنت –

عبداللہ عباس ءِ رد ءَ اے مردمانی سر ءَ پِر چرینوکیں بھتام جنگ بیتگ اَنت آئی ءَ گشتگ کہ اشانی تہ ءَ سوالی ء شاہ بیگ پوج ءَ یک سالے ءَ پیسر دزگیر کرتگ ءُ برتگ ءُ ناسر ء مھمد اسلم ءُ رحیم ء عبدالواحد پوج ءَ بیست ءُ نُھ ستمبر دوھزار ءُ بیست ءَ آئی ءِ لوگ ءِ سر ءَ بیڑی ءِ وھد ءَ آوار جتگ ءُ برتگ –

آئی ءَ گشتگ کہ ناسر ءِ برات مسلم ھم پوج ءَ آئی ءِ ھمراھی ءَ گپتگ ءُ برتگ کہ گار اِنت –

نبشتانک: من نُوں واتر نہ کن آں

( شھید آپتاب جان )

نبشتہ کار ھُماء بلوچ

دی بلوچستان پوسٹ

من کہ وھدے رپتاں دیم پہ وتی ماتیں زمین ءِ پھریزگ ءَ گُڑا دوبر من پہ شُما نیا آں پرچا کہ من سر وتی چِست کُتگ گُڑا ما چہ ھمے بزگی ءُ واریاں گِر ءُ چیل اِت اِیں ، چی ءَ کہ ما گُلام اِت اِیں ءُ اے گُلامی ءِ مارشت چہ دَر کسانی ءَ من ءَ گون بیتگ ءُ ھمے وڑ ءَ مرچی منی واھگانی تہ ءَ یک واھگے ءَ رُدوم زُرتگ، آ زمین ءِ پھزگ ءِ واھِشت اِنت ءُ پہ زمین ءَ ندر بُوَگ اِنت۔

منی لاڑُوکیں گْوھار، من کہ اے راہ پہ وت در چِتگ ءُ رھادگ آں ، اے راہ ءَ کسے روت پد ءَ واتری ءِ نام ءَ چہ وتی دل ءُ مجگ ءَ کشّ اِیت ، پرچا کہ اے راہ ءَ ھزاراں زمین زادگ ھست کہ وتی سرجمیں واھشت اِش مان داشتگ اَنت ءُ ھزاراں زمین زادگاں وتی تنگوئیں سر پہ زمین کُربان کُرتگ ، گُڑا من چتو واتر بِہ آں منی لاڑُک تئی کلوہ پہ من اَتک ءُ سر بوت، تو گْوشتگ اَت کہ بیا واتر بہ کن کہ بے ترا تئی نام ءَ گوں بندوکیں تئی وشرنگیں دِشتار ناسرجم اِنت، بیا کہ آئی ءَ سرجم بِہ کن۔

من پَسّہ دات ءُ گْوشت کہ بے من ءَ منی گُلزمین ھم ناسرجم اِنت ءُ من زمین ءَ دُروہ اِت نہ کن آں ءُ کدی واتر نہ بہ آں ، بُرو بُگش کہ من زمین ءِ گَم ءُ درد وتی سینگ ءَ بستگاں ءُ دَر کپتگاں برو بُگش پہ راج ءِ وشھالیں ءُ رُژنائیں بانداتے ءِ پُولگ ءَ من درکپتگاں اے زمین، کوہ تیاب، مچکدگ بلوچ راج ءُ بلوچ ءِ ھمک واھشت ءُ ارمان اھَد ءِ یزیدیں رستراں وتی زُلم ءُ زوُراکیانی چیر ءَ پادمال کُتگ اَنت، من وتئی سرجمیں واھشت کَل کُتگاں ءُ دَر کپتگاں ، تو منی ودار ءَ ھچبر مہ نند ءُ وتی زند ءَ پمّن ءَ آس ءُ انگراں مَہ کن، منی واھشتانی بانُور گُلزمین اِنت من ھما وھد ءَ سالونک باں وھدے گُلزمین ءِ مسک ءُ مھلبیں ھاک من ءَ وتی امبازاں بِزیریت ، برو بِہ گْوش منی نام گپتیں بانُک ءَ کہ تو چہ من ءَ آزات ئے کہ من وتی زند ءِ راہ دَر چِتگ ءُ راھی آں۔ بُرو بِہ گْوش منی پُل دُروشمیں شاری ءَ کہ تو ھم نو وتی سپر ءَ بندات بِہ کن ءُ دیم ءَ بِہ جُنز ءُ پہ وت ءَ نوکیں زندے بِہ شوھاز ءُ وتی راہ ءَ دَر بچن ءُ منی ودار ءَ مہ نند ، پرچا کہ من کہ یکرَندے رپتاں گُڑا پد ءَ واتر نہ کناں ءُ نیا آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ستمبر ءُ اکتوبر ءِ کُلیں شہیدیں ھمبلانی نام ءَ

شائر: برانز بلوچ

دی بلوچستان پوسٹ

نو سپر کوپگ ءَ ھمبلانی
گلزمین امباز منا
من زَراں مہر ءِ نیاداں اَبد
من دَمبرتگاں
گلزمین مادریں امباز منا
من ابیتکی ءِ سیم سراں
گوستگاں
من دَمبرتگاں
من آک ءِ وشبواں زَراں
مات ءِ مہراں تلوساں
من دَمرتگاں
گلزمین مادریں امباز منا
من پندانی نہ جَل ایں تراولاں
کُنٹگیں کشکاں سپر کُت ءَ
تہار ءُ تُنیگیں شپاں جُنزتگاں
نو ادارُکے ءَ من جَکگ لوٹاں
نو زہیر ورگاں آں
نوتک ءُ ہما ھمبلانی کہ حوار اتاں
درد ءُ ابیتکیں کشکاں
تہار ءُ لُنجیں شپاں
گرم ءُ سردیں ساعتاں
بہار ءُ ڈُکالی نوبتاں
گلزمین مادریں امباز منا
من دَمبرتگاں
من زانا !
تئی سانکل انگا نہ سستگاں غلامی ءِ
تئی سپر انگا سرجم نہ اے مہرانی
تئی ٹَپ انگا دَرا نہ بوتگاں
نو سپر کوپگ ءَ ھمبلانی
گلزمین مادریں امباز منا
من دَمبرتگاں
گلزمین امباز منا

چار شمبے ءِ روچ ءَ آئی سی سی مینز ٹی ٹوئینٹی ورلڈ کپ کرکٹ گوازی ءَ انگلینڈ ءَ بنگلہ دیش ھشت وکٹاں پروش داتگ ءُ دومی گوازی ءَ نیمبیا ءَ چار وکٹاں باج برتگ –

ابوظبی کرکٹ پٹ ءَ بنگلہ دیش ءُ انگلینڈ ءِ میان ءَ بوتگیں ٹی ٹوئنٹی گوازی ءَ بنگلہ دیش ءَ ٹاس کٹتگ ءُ اولسر ءَ بیٹنگ کنگے پیسلہ کتگ – بنگلہ دیشی ءِ لیبیاں گوازی کنان ءَ بیست اوورانی تہ ءَ نُھ وکٹانی تاوان ءَ یک سد ءُ بیست ءُ چار رن جوڑ کتگ –

بنگال ءِ نیمگ ءَ مشفیق الرحیم ءَ بیست ءُ نھ، نسیم احمد ءُ محموداللہ نوزدہ نوزدہ رن جوڑ کتگ – انگلینڈ ءِ نیمگ ءَ ٹائمل ملز ءَ سَے وکٹ گپتگ وھدیکہ معین علی ءُ لیوگسٹن ءَ دو دو لیبی آؤٹ کتگ –

پسوئی ءَ انگلینڈ ءَ یک سد ءُ بیست ءُ پنچ ءِ ٹارگٹ پانزدھمی اوور ءَ دو وکٹانی تاوان ءَ ارزانی ءَ پُروشت – انگلینڈ ءِ نیمگ ءَ چہ جیسن رائے ءَ درسان گیش شست ءُ یک رن جوڑ کرت، جوز بٹلر ھژدہ رن جوڑ کرت ءُ آؤٹ بوت وھدیکہ ڈیوڈ ملان بیست ءُ ھشت ءُ جونی ھشت رن ءِ ھمراھی ءَ ناٹ آؤٹ بوت اَنت-
بنگلہ دیش ءِ نیمگ ءَ شریف الاسلام ءُ نوسم اھمد ءَ یک یک وکٹ گپتگ –

ھمے وڑ شیخ زید کرکٹ پٹ ءَ بوتگیں دومی گوازی نیمبیا ءُ اسکاٹ لینڈ ءِ میان ءَ بوتگ – نیمبیا ءَ چار وکٹاں اسکاٹ لینڈ پروش داتگ –

نیمبیا ءِ ٹیم ءَ ٹاس کٹیتگ ءُ اولسر ءَ بالنگ کنگ ءِ پیسلہ کُتگ – اسکاٹ لینڈ ءِ لیبیاں بیست اوورانی تہ ءَ یکسد ءُ نُھ رنانی ٹارگٹ داتگ وھدیکہ نیمبیا ءِ ٹیم ءَ جوانی ءَ گوازی کنان ءَ نوزدہ اوورانی تہ ءَ ٹارگٹ پروشت ءُ گوازی وتی نام ءَ کُت –

سی ٹی ڈی ءَ مروچی بارکھان ءَ سَے مردم پولیس ءِ دست ءَ داتگ اَنت –

سی ٹی ڈی ءَ ھما مردم کہ پولیس ءِ دست ءَ داتگ انت آھانی پجار صوالی ء شاہ بیگ جاھمنند تربت، نثار احمد ء محمد اسلم جاھمنند بلیدہ ءُ رحیم جان ء عبدالواحد جاھمنند بلیدہ ءِ ناماں چہ زانگ بوتگ انت –

بلے تنی وھدی سی ٹی ڈی ءَ اے گپ زاھر نہ کتگ کہ اے مردم کجا، چون ءُ کدی دزگیر کرتگ انت –

دومی نیمگ ءَ سوشل میڈیا کارمرز کنوکیں مردمانی گوشگ انت کہ اے ھرسئیں مردم پیسر ءَ چہ پاکستانی پوج ءُ چیریں ادارھانی کارمنداں زورانسری آوار جتگ ءُ بیگواہ کتگ انت ءُ.مروچی پولیس ءِ دست ءَ داتگ، وھدیکہ تنی وھدی اے مردمانی کھول دیم ءَ نہ اتکگ انت –

سی ٹی ڈی ءَ مروچی بارکھان ءَ سَے مردم پولیس ءِ دست ءَ داتگ –

سی ٹی ڈی ءَ ھما مردم کہ پولیس ءِ دست ءَ داتگ انت آھانی پجار صوالی ء شاہ بیگ جاھمنند تربت، نثار احمد ء محمد اسلم جاھمنند بلیدہ ءُ رحیم جان ء عبدالواحد جاھمنند بلیدہ ءِ ناماں چہ زانگ بوتگ انت –

بلے تنی وھدی سی ٹی ڈی ءَ اے گپ زاھر نہ کتگ کہ اے مردم کجا، چون ءُ کدی دزگیر کرتگ انت –

دومی نیمگ ءَ سوشل میڈیا کارمرز کنوکیں مردمانی گوشگ انت کہ اے ھرسئیں مردم پیسر ءَ چہ پاکستانی پوج ءُ چیریں ادارھانی کارمنداں زورانسری آوار جتگ ءُ بیگواہ کتگ انت ءُ.مروچی پولیس ءِ دست ءَ داتگ، وھدیکہ تنی وھدی اے مردمانی کھول دیم ءَ نہ اتکگ انت –