TBP Balochi

تگران زامری کور ءَ برجاھیں پوجی پانگس سر ءَ مزنیں سلاھاں گوں اُرش کتگ جانی مالی تاوان داتگ – جئیند بلوچ

سربوتگیں ھالانی رِد ءَ ناشناسیں سلاہ بندیں مردماں کیچ زامران ءِ دمگ تگران ءَ پاکستانی پوج ءِ سر ءَ اُرش کتگ –

اُرش تگران ءِ دمگ زامری کور ءَ برجاھیں پوجی پانگس ءِ سر ءَ کنگ بوتگ، اُرش ءَ پاکستانی پوج ءَ جانی ءُ مالی تاوان ھال انت – اُرش ءِ زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ –

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں زامران ءِ دمگ تگران ءَ زامری کور ءَ برجاھیں زورگیریں پاکستانی پوج ءِ پانگس ءِ سر ءَ اُرش کتگ –

آئی گوشتگ کہ اے پانگس بلوچستان ءَ جتا کنوکیں گولڈ سمڈ لائن ءِ سر ءَ زورگیریں پاکستانی پوج ءِ نیمگ ءَ ٹٹ جنوکیں کارمندانی پھازگے ھاتر ءَ جوڈ کنگ بوتگ، اے اُرش ءَ مئے سرمچاراں مزنیں سلاہ کارمرز کرتگ ءُ دژمن کارمند جانی ءُ مالی تاوان داتگ انت –

جارکش جئیند بلوچ ءَ گوشتگ کہ اے اُرش ءِ زمّہ واری مئے گل بلوچ لبریشن آرمی منیت ءُ وتی مکسد ءِ سوبین ءَ تاں مئے اُرش چدوگیشتر ترندی ءَ گوں برجاہ مان انت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بُنجل ءَ چار ھزار ءُ چار سد ءُ ھشتاد روچ سرجم بوتگ – نیشنل پارٹی گوستگیں دمگی سروک حاجی نیاز محمد ، ملک نصیر شاھوانی ءُ دگہ مردماں بُنجل ءَ اَتکگ ءُ کھولانی گون ءَ دلپدرد درشان کتگ –

وی بی ایم پی ءِ راھشون ماماقدیر بلوچ ءَ اتکگیں مردمانی دیم ءَ تران کنان ءَ گوشتگ کہ بلوچستان ءَ ھم اے وڑیں گدارانی جاگہ اِنت کہ آ ڈیھ ءِ بھا کنگ زوراور ءِ ھمکوپگ ءُ بلوچ پر ایمنی جُھد کنوکاں زورانسری آوار جنی ، تیرسُپتگیں لاش ءُ سیاسی باسکاں سی ٹی ڈی ءِ نشانگ کنگ ءَ ھوار اَنت کہ آیانی دپ ءَ گدارانی بوہ کیت-

ماما قدیر بلوچ ءَ دیمتر ءَ گْوشتگ پاکستان ءِ زورگری ءِ روچ ءَ بگر تاں مروچی بلوچ راج ءِ سر ءَ وتی تاکت ءَ کارمرز کنگ ءَ اِنت ننگیں زوراکی ءَ ایر کپتگ- بنداتی روچاں سرکار ءَ آوار جنگ ءُ تیرسپتگیں لاشانی دارگ ءِ ٹاہ جنگ ءِ ھمراھی ءَ لاشانی دور دیگ ءِ سلسلگ ءَ دارگ ءِ ٹاھانی ھواری ءَ لاشانی دور دیگ ءِ کرد پیلو کرتگ اَنت ءُ آپریشنانی ترندی ءُ سرکار ءِ پالیسیانی چیرکاری ایوک ءَ بس زورگری ءَ گیش مھکم کن اَنت –

آئی ءَ گشتگ کہ دراھیں زُلماں ابید مروچی بیگواھیں مردمانی یل کنگ ءَ وتی مھکم تریں دور ءَ گوزگ اِنت ءُ بلوچ راج لس پلامرزی ءِ پڑ ءَ اتکگ –

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گشتگ کہ بی ایل اے ءِ سرمچاراں ھرنائی ءِ دمگ شاھرگ ءِ ھند ھمبو ءَ زورگریں پاکستانی پوج ءِ کارندہ یک بمبے ءِ نشانگ کرتگ اَنت ءُ جانی تاوانانی دیمپان کرتگ اَنت-

آئی ءَ گشتگ کہ سرمچاراں دشمنیں پوج ءِ کارواناں پھزداری کنگ ءِ واستا یک چیک پوسٹے ءَ شورو ھما وھد ءَ کل کرتگ اَنت، وھدیکہ دشمن ءِ کارندہ اود ءَ جاڑیگ نہ بیتگ اَنت وھدیکہ دشمنیں پوج ءِ کارندہ پوسٹ ءَ ڈیوٹی ءِ دیگ ءِ واستا سر بیتگ اَنت گڑا آ بمب ءِ نشانگ کرتگ اَنت، چریشی ءِ آسر ءَ دو کارندہ ھما جاہ ءَ مرتگ اَنت ءُ یکے زدگ بیتگ، ھمے وڑ تراک ءَ سنگر سرجم ءَ تباہ بیتگ –

جیئند بلوچ ءَ گشتگ کہ اے اُرش ءِ زمہ واری ءَ مئے گل بلوچ لبریشن آرمی منّ ایت- بی ایل اے اشی ءَ ستک کنائینت کہ آجوئی ءَ داں بلوچستان ءَ زورگریں پوج ءِ سر ءَ مئے اُرش برجاہ بنت –

نبشتانک: آجوئی ءِ نھال

نبشتہ کار: برزکوھی
رجانک: مھروز بلوچ

دی بلوچستان پوسٹ

ھژدھمی کرن ءِ رژناہ ھیالیں راجدپتر نویساں اوست داشتگ کہ راجدپتر آجوئی ءِ نیمگ ءَ گامگیج زورگ ءِ کِسہ اِنت – آ ایمانوئل کانٹ ءِ اے گالانی منوگر بوتگ انت ” آجوئی ءِ توم مدامی زندگ مان ایت، ھر بدلی بزاں آشوب ءِ ھمرائی ءَ گیشتر دیمروئی کنت ءُ پد ءَ رند ءَ برزی لڑاں جوانیں راھے جوڑ کنت ” –

وھدیکہ زوراکی ءِ دور بہ بیت گڑا مار ءَ کَے سرپد کرت کنت کہ آجوئی چیزانی راستیں راہ بوت کنت؟ وھدیکہ یکشل ءَ جنگ بہ بیت، گڑا مار ءَ کَے ستک دارین اِت کہ ایمنی ءُ آجوئی گرگ بیت اِنت؟ –

آشوب ءُ آجوئی ءِ پند جاورھال ءُ وئیلاں چہ گپتگیں موھانی مھتاج نہ نہ بیت، دیمروئی ءُ آجوئی نیمگ ءَ پند، راجدپتر ءَ راستی ءِ راہ انت – سوبمندی ءِ ھاتر ءَ اے الّمی انت راجدپتر ءِ اے راستی ءِ سر ءَ شری ءَ اوست دارگ بہ بیت ءُ جاورھال تئی ھک ءَ بنت یا نہ بنت بلے مھکمیں اوست ءِ آس وتی تہ ءَ زندگ دارگ بہ بیت-

آجوئی ءِ اے برانز نیلسن منڈیلا ءِ تہ ءَ الّم بوتگ انت کہ آ زندانی بوت ءُ آجوئی وت ءَ چہ گیشتر جیل ءِ تاکتوریں نگھپان ءَ چہ گپت ءُ اے اوست فلپائن ءِ کورازون ایکینو تہ ءَ الّم بوتگ، ھما زالبول ءَ کہ وتی لوگی گپ اشکت ءُ یک ناممکنیں آجوئی ءِ شور ءِ ٹھینت ءُ آ زردیں رنگ ءِ پوشاک ءِ دروشم سرجم کت –

دنیا ءِ دومی مستریں جنگ ءِ تباھی ءَ چہ رکیت ءُ ھٹلر ءِ جرمنی پروش دات، ھما ھٹلر کہ پروش ورگ ءِ گمان ءِ نیست ات آئی ءَ پروش وارت – ھمود ءَ ولی برینڈٹ ءُ کونراڈ ایڈناؤر دیم ءَ اتکگ ءُ یک آزاتیں چاگردے ءِ بُن ھشت ایر کت – ہولوکاسٹ ءَ چہ اسرائیل ءِ آزاد ءُ جمھوری سرکار اتک تری جھلانک پرچا مہ بیت

راجدپتر ءِ تہ ءَ چوشیں بازیں وئیل ءِ ھست کہ اود ءَ نِزوریں جاورھالانی بگیری ءَ ابید وتی ھمت ءُ ارادھانی سبب ءَ وت ءَ چہ مستریں تاکت پروش داتگ انت ءُ وتی آزاتی پھازتگ – دنیا ءِ نامی ئین جنگ کراھے بہ بیت یا اگنیکورت ءِ جنگ، ویکتوف ھل جنگ بہ بیت یا شانزدھمی کرن ءِ سلطنت عثمانی تاکت ءِ دیمپانی کنوک، مالٹا ءِ سوبمندی ءِ پھازگ مالٹائی ءِ بید ء ھیلکاری کتگیں کسانیں ٹولی بہ بیت کہ آئی ءَ درگت ءَ والٹیئر ءَ گوشتگ ات کہ ” دنیا ءِ تہ ءَ ھچ وڑیں جنگ مالٹا ءِ پھازگ ءِ جنگ ءَ چہ گیشتر یات دارگ نہ بیت ” اے وئیل یاتاں پرین اَنت کہ آجوئی ءِ نھال مدامی زندگ بیت اِنت –

وھدیکہ ھستیں بلوچ راجی زرمبشت ءِ بندات بوت گڑا سیاسی سرکل ءُ راج ءِ دیم ءَ ھر وھد ءَ کہ اے گپ شما دیم ءَ آؤرتگ کہ ھستیں جنگ مار ءَ وتی جنگ پھمگی انت اشی ءِ تہ ءَ ھوار بوگی انت یا اے راجی جنگ ءِ سیاسی ءُ اکلاکی پلامرزی کنگی انت گڑا گیشتر بازیں جست ءِ گمان، پھریزی ءِ سوال زھن ءِ تہ ءَ بنت ءُ بار بار درشان کنگ بنت کہ مردم جنگ کن انت، کربانی دینت جنگ باں، جن انت بلے جنگ بس یک ٹولی ءِ دست ءَ انت ھر وھد ءَ آ لوٹ انت بٹن ءَ جن انت ءُ جنگ ءَ ھلاس کن انت، گڑا اے میان ءَ ھر کربانی ءِ دیگ بوتگ، ھما مردم اسرمند بوتگ انت، ھماھانی کہ تاوان بوتگ، درست بے پائدگ بنت – اے جست ءُ تُرس ءِ پژدر ءَ مروچی اندازگ بیت ھما کچ ءَ مردماں جنگ ءَ بھر زورگی بیتگ آ نہ بوتگ –

آ وھد ءَ ھم مروچیگیں وڑ ءَ اے جُستانی پسو ھمے بیتگ اے جنگ نوں یک مردمے ءِ یا ٹولی ءِ دست ءَ نہ انت کہ ھما وھد ءَ ھما بہ لوٹ ایت ءُ بٹن ءَ بہ جنت ءُ جنگ ءَ ھلاس بہ کنت – نوں اے جنگ گلانی دست ءَ انت ءُ ادارھانی دروشم ءَ اتکگ ءُ دیمتر ءَ ھم رؤت بلکیں راجی آجوئی ءَ تاں برجاہ مان ایت –

کجام ھد ءَ تاں مردماں اشی ءِ سر ءَ اوست داشتگ یا ناں آ جتائیں باوست ئِے بلے مروچی اے دلیل ءُ راستی پدر بوتگ کہ جنگ ءَ نوں گل کنگ انت نوں اے اوشت ءِ آماچ نہ بیت آجوئی ءَ تاں برجاہ مان ایت – ھمے زوتاں مردمانی زھن ءِ تہ ءَ ھمے ترس بوتگ – اگاں سرجمی ءَ ھلاس نہ بوتگ بلے انوں سک باز نزوریں دروشمے ءَ یک ھد ءَ تاں ھست اِنت – کہ اشی ءِ پدریں گواہ بلوچ ورنایانی ھمراھی ءَ ھر تک ءُ پھناتاں سیادی داروکیں مردمانی آجوئی جنگ ءَ ھوار بوگ ءُ دومی نیمگ ءَ ورنایانی کربانی دیگ جنگ ءِ تہ ءَ ھترہ زورگ ءِ پیسلہ اِنت- اے کربانی ھما امیت ءُ واھشتاں گوں بندوک انت کہ نوں اے جنگ آجوئی ءَ تاں برجاہ مان ایت ءُ کربانی مپت نہ بنت –

نوں گپ دومی جست ءِ سر ءَ کیت گڑا ھر ھما وھد ءَ دمگی جاورھال مٹ بنت، ھاسکر اوگانستان ءِ تہ ءَ ھما وڑیں بدلی دیم ءَ اتک گڑا ھمساھگیں ملک ءِ سبب ءَ مئے جنگ اسر مند الم بیت انت – اوگانستان ءِ جاورھالانی سبب ءَ گوست ءَ ھما وڑ کہ جنگ سرد مھری آماچ بوتگ ھمائی ءَ چہ مردمانی زھن ءِ تہ ءَ انگت تاں تُرس وسواس ءِ جست ھست انت –

گوست ھچ وڑ ڈالچار کنگی نہ انت بلکیں گوست ءَ چہ مدامی چیزے دربرگی انت بلے گوست ءَ ھستیں وھد ءَ گوں ھمگرنچ کنگ ءُ ھستیں وھد ءَ باندات ءَ گوں بندوک کنگ ءُ ھما وڑیں کورکائی ءُ نیگیٹو رزلٹ ءِ امیت دارگ بنکی ءُ سائنسی ءِ چکّاسنگ ءِ سر ءَ سرجمی ءَ ایر نہ اِنت-

مروچی اوگانستان ءِ دروشم ءَ یک مزنیں بدلی اتکگ ءُ دیمتر ءَ ھم چشیں بدلی ءُ چیلنج مئے راہ ءِ دیم ءَ کائنت بلے ما بلوچ بھیسیت ءِ جھد کار یا جھد ءَ بندوکیں مردم چی پگر کنیں، چی چاریں، چی پھمیں ءُ چونیں ھیال داریں؟ منی رایہ ھمیش انت وھدیکہ دمگ ءِ تہ ءَ امریکہ ءَ ھوار نیٹو ساڑی ات گڑا آ وھد ءَ ھمے وش پھمی ءِ تہ ات اِنت وشی ءَ چہ بگل گوات داتگ اِت اَنت کہ امریکہ بابا کیت آجوئی کاریت سد درسد رد ات مروچی ھما مردم امریکہ ءِ واتری ءَ بلوچ زرمبشت انجام گوش انت آ ھم رَد انت –

جست اے ودی بیت انت کہ ھستیں وھد ءِ جنگ کہ بندات بوت گڑا امریکہ آ وھد ءَ اوگانستان ءُ اے دمگاں ساڑی نہ بوتگ، گڑا چوں یک مزنیں زرمبشتے بندات نائن الیون ءَ پیش گوستگیں کرن ءِ گڈی ءَ بندات بوت ؟ یا زاناں امریکہ ءَ ھما وھد ءَ پیگام داتگ ات کہ بلوچیں براتاں شما جنگ ءَ بندات کن ات، ورلڈ ٹریڈ ءِ سر ءَ اُرش بیت پد ءَ ما اوگانستان ءَ کائیں شمئے کمک ءَ کنیں ءُ پد ءَ امریکہ وھدیکہ اوگانستان ءِ تہ ءَ آئی ءَ بلوچ راجی آزاتی ءِ جنگے چی ھاک کمک کت ؟ –

ھما وھد ءَ کہ جنگ بندات بیت گڑا چشیں رھشون یا جھد کار ءَ اے وڑیں داوا کت کہ بیائے آجوئی ءِ جھد ءَ ھوار بہ بیت دژمن بگیری ءَ جنگ بہ کن ات اگاں امریکہ اوگانستان ءَ چہ درکیت یا مئے کمک ءَ نہ کنت گڑا ما جنگ ءِ دُکان ءَ کُبل ءِ جنیں واتر بئیں؟ منی ھیالاں اناں! اگاں آ وھد ءَ بلوچانی گور ءَ کسے ءَ چوش بہ گوشتیں ھر وڑیں بلوچ ءَ جنگ ءَ ھوار بوتگ ءُ وتی کھول، لوگ جاہ، کار ءُ بار زانت ءُ زانشت جان کربان نہ کرتگ ات – مروچی درساں کربانی داتگ ءُ دیگ ءَ انت بس راجی آجوئی امیت ءُ ارماناں گوں کربان بوگ انت گڑا پرچا دنیا ءُ امریکہ ءُ اوگانستان جاورھانی رحم ءُ کرم ءَ وتی آجوئی ءِ جنگ ءَ داگ سر ءَ بہ جنیں؟-

ھر وڑیں پُرسمائیں انسان ءِ اے گپ ءَ رد نہ کنت اے دمگاں پیداک بوتگیں شریں یا ھرابیں بدلیاں چہ بلوچستان، بلوچ راج ءُ بلوچ زرمبشت اسر مند بیت، الم اسر مند بیت بلے اشی ءِ مول ءُ مراد اے نہ انت کہ جنگ ءَ چہ تچگ یا جنگ ءِ ھلاس کنگ – الّم جنگ ءِ تہ ءَ دو گام دیم ءَ یک گامے پُشت رؤگ ءِ کارشونی بنت بلے اے پیسلہ گل ءِ کارشون ءِ رِد ءَ بنت، اے وڑیں پیسلہ ھوٹل، پارک، ل دگانی کش ءَ نندگ ءُ شیرچاھ ءِ ورگ ءُ سگریٹ ءِ سُٹ جنگ ءَ نہ بنت –

اے پیسلھاں ھما کن انت کہ جنگ ءُ جُھد ءَ ھوار انت، آھاں وتی جنگ ءَ بگر سرجمیں دمگاں ھرچی بوگ ءَ انت ءُ ھرچی بوگی انت آ درسانی سرپدی ءَ دار انت – جنگ ءَ چہ دور، امل ءَ چہ دور ھُدا بہ کنت افلاتون بہ بیت شما ھمے بہ پھم ات آ جنگ ءِ درگت ءَ بس ھیالی لڈو جوڑ کرت کنت دگہ ھچ بس آئی ءَ درسیں تجزیہ، چمشانک ءُ پیش بینی تھاری ءَ تیر جنگ ءَ ابید دگہ ھچ –

گوست ءَ وھدیکہ پرنس آغا عبدالکریم یا نواب مری واتر بوت انت آ وھدے ءُ مروچیگیں جاورھالاں زمین آزمان پرک انت ایندگہ درساں یل کن ات بلوچ راجی زانت ءُ پگر آ وھد ءَ چی بوتگ ءُ مروچی چی انت؟ نواب ساب ءَ دپ ءِ وت اے گپ گوشتگ ات کہ آئی ءَ ھمے امیت بوتگ کہ آئی سر ءَ سنگ جنگ بیت انت بلے وش اتک کنوکاں پُل چنڈ ات – مروچی من گوشت کناں مردمانی تہ ءِ زانت ءُ پگر ھمے گش ایت اگاں کسے سلاھاں دوردات ءُ واتر بیت گڑا پُل ناں سنگاں گوں وش اتک کنگ بیت اِنت –

جاور ھال بدل بوتگ انت ورنایانی ھمت، زانت سنچ، جزبگ اے ھد ءَ تاں بُلند انت کہ آ پدائی سربلند ءِ وڑ ءَ وتی جان ءَ وت وتی وشی ءَ کربان کنگ ءَ انت ءُ اے جاورھالاں ابید سنگر ءَ نشتگ ءُ جنگ ءَ انت اے ورناہ نوں کسے ءَ پھل نہ کن انت کہ آ اوگانستان ءِ جاورھاں وتی جواز بھانہ جوڑ بہ کن انت بزدلی آماچ بہ بنت دژمن دیم ءَ سر ءَ جھل بہ کن انت –

یک نیمگے ورنایانی زانت ءُ دومی نیمگ ءَ بیست سالی ئین جنگ ءَ سرجمیں بلوچستان ءَ چشیں لوگے نیست کہ اسرمند نہ بوتگ، اے دیمونی، درد ءُ گم، اے پریشانیں کھول ھچ کس ءَ پھل نہ کن انت –

چوش کہ اڑ ءُ جنجال مشکل پیسر ءَ ھم بوتگ انت مروچی گیشتر بوت کن انت، بلے جنگ برجاہ انت ءُ برجاہ بیت – بس مکلسیں جھدکاراں چہ ھمے امیت ءُ اوست اِنت آ اے نازرکیں جاورھالانی تہ ءَ شپ روچ مھنت کن انت ءُ کربانی دینت وتی راج ءَ دنیا ءَ اے باور کنائیناں کہ دمگاں بدل بؤکیں جاورھالاں اے جنگ اوشت ءِ آماچ نہ بیت بلکیں آئی ءِ تہ ءَ گیشی کیت – اگاں راج ءَ باور بوت گڑا مدامی سرجمیں راج جنگ ءِ ھمراھداری ءَ کنت، آ ھمے اوست ءَ دار انت کہ نوں اے جنگ ھچ وڑ ءَ اوشت ءِ آماچ نہ بیت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکشن کمیٹی ءِ چیئرپرسن صبیحہ بلوچ ءِ برات ءُ آئی ءِ ناکوزتک ءِ بیگواھی ءِ بلوچ نودربرانی نیمگ ءَ شال ءَ یک زھرشانی روانک ءِ کشگ ءِ جار پرینگ بیتگ اَنت-

بلوچ نودربرانی نیمگ ءَ شنگ بیتگیں جارانک ءِ رد ءَ گوشگ بیتگ کہ سی ءُ یک اکتوبر دوھزار ءُ بیست ءُ یک ءَ ماں شال ءِ پریس کلب ءَ یک روانکے چیئرپرسن صبیحہ بلوچ ءِ برات ءُ ناکوزتک ءِ بیگواھی ءِ ھلاپ ءَ کشگ بیتگ اِنت –

نودربراں دراھیں نودربر ءُ ھمک تکاں بندوکیں مردماں اے روانک ءَ بھر زیرگ ءِ دزبندی کرتگ ءُ گشتگ کہ اے روانک ءَ بھر بہ زور اِت ءُ چیئرپرسن ڈاکٹر صبیحہ بلوچ ءِ برات ءُ ناکوزتک ءِ بیگواھی ءِ ھلاپ ءَ وتی توار ءَ گوں مئے توار ءِ ھمراھی ءَ ھمگرنچ بہ کن اِت –

زانگ بہ بیت ڈاکٹر صبیحہ بلوچ ءِ برات شاہ میر نوزدہ جون دوھزار ءُ بیست ءُ یک ءَ ماں ھزدار ءَ پاکستانی پوج ءَ آوار جتگ ءُ برتگ اَت –

ھمے وڑ آئی ءِ ناکوزتک بیست ءُ پنچ جون دوھزار ءُ بیست ءُ یک ءَ آوار جتگ ءُ برتگ اَت کہ ھردوکیں ورنا تنی وھدی بیگواہ اَنت –

اشانی ھمراھی ءَ دگہ چار کس گرگ بیتگ اِت اَنت آ ھرچاریں مردم یل کنگ بیتگ اَنت بلے تنی وھدی اے دویں بیگواہ اَنت –

ڈاکٹر صبیحہ بلوچ ءِ برات ءُ ناکو زتک ءِ بیگواھی ءِ ھلاپ ءَ گوستگیں روچاں بلوچستان ءَ ھوار کراچی ءَ ھم بلوچ اسٹوڈنٹس ایکشن کمیٹی ءِ نیمگ ءَ زھرشانی کنگ بیتگ اَنت –

بلوچستان ءَ بندوکیں سیاسی پاٹیانی گوشگ اِنت کہ بلوچستان ءَ نودربرانی بیگواھیانی کچ روچ پہ روچ گیش بیان اِنت ءُ چرے تکاں بازیں نودربراں ھوار بازیں مردمے گرگ ءُ گار کنگ بیتگ اَنت کہ اشانی بھتاماں پاکستانی پوج ءُ چیریں ادارھانی سر ءَ لڈگ ءَ اَنت –

آدینگ ءِ روچ ءَ دبئی انٹرنیشنل کرکٹ پٹ ءَ بوتگیں ٹی ٹوئنٹی ورلڈ کپ کرکٹ گوازی ءَ افغانستان ءَ پاکستان ءِ دیم ءَ پنچ وکٹاں پروش وارتگ، مروچی دومی گوازی ویسٹ انڈیز ءَ سَے رناں چہ باج برتگ –

دبئی انٹرنیشنل کرکٹ پٹ ءَ افغانستان ءُ پاکستان ءِ میان ءَ بوتگیں ٹی ٹوئنٹی گوازی ءَ افغانستان ءِ کپٹن محمد نبی ءَ ٹاس کٹ اتگ ءُ اولسر ءَ بیٹنگ کنگ ءِ پیسلہ کتگ – افغانستان ءِ لیبیاں گڈی اووراں جوانیں لیب پیش داشت ءُ بیست اوورانی تہ ءَ شش وکٹانی تاوان ءَ یک سد ءُ چِل ءُ ھپت رن جوڑکرت – کپٹن محمد نبی ءُ گلبدین ءَ سِی ءُ پنچ سِی پنچ رن ھردوکاں جوڑکرت – افغانستان ءَ آکری پنچیں آوورانی جوانیں لیب پیش داشت ءُ بید وکٹانی تاوان ءَ پنجاہ ءُ چار رن جوڑ کرت – پاکستان ءِ نیمگ ءَ عماد وسیم ءَ دو شاھین، حسن، شاداب، حارث ءَ یک یک وکٹے گپتگ –

پاکستان ءِ لیبیاں نوزدھمی اوور ءَ پنچ وکٹاں افغانستان ءِ یک سد ءُ چِل ءُ ھپت ءِ ٹارگٹ پروشت ءُ گوازی وتی نام ءَ کرت –

مروچیگیں روچ ءَ ویسٹ انڈیز ءُ بنگلہ دیش ءِ میان ءَ بوتگیں ٹی ٹوئنٹی ورلڈ کپ گوازی ءَ ویسٹ انڈیز ءَ سَے رناں باج بُرتگ –

بنگلہ دیش ءَ ٹاس کٹ اتگ ءُ اولسر ءَ بالنگ کنگ ءِ پیسلہ کتگ – ویسٹ انڈیز ءَ بیست اوورانی تہ ءَ یک سد ءُ چِل ءُ دو رنانی ٹارگٹ داتگ –

بنگلہ دیش ءَ بیٹنگ کنان ءَ بیست اوورانی تہ ءَ یک سد ءُ سِی ءُ نُھ رن جوڑ کرت بلے ویست انڈیز ءِ نیمگ ءَ چہ داتگیں ٹارگٹ پروشت نہ کت بے سوب بوت –

بلوچستان ءِ جتاجتائیں دمگاں پاکستانی پوج ءِ لشکر کشی برجاہ شش مردماں گیش آوار جنگ ءَ پد بیگواہ کنگ بوتگ اَنت-

سربوتگیں ھالانی رِد ءَ ضلع کیچ ءِ دمگ کولواہ ءِ زرباری دمگ چوٹین ، شاپکول ، پارگ ، جت ءُ بدولک ءَ پاکستانی پوج ءَ لشکر کشی ءَ بندات کتگ-

دمگی مردمانی رِد ءَ پوج مزنیں کچے ءَ اے دمگاں میتگ ءُ جاگہ جاگہ ءَ ساڑی اَنت ءُ کوھی دمگاں لشکر کشی برجاہ ءَ اِنت-

اشی ءَ چہ ابید ضلع پنجگور ءَ ھم ھال اِنت کہ مزنیں کچے ءَ پوجیانی آیگ ءُ روگ برجاہ ءَ اِنت ءُ دو سے روچاں بالگردانی بُرزی بالی گندگ بیتگ اَنت-

گمان کنگ بوگ ءَ اِنت پاکستانی پوج سرجمیں مکران ءَ لشکر کشی ءِ تیاری کنگ ءَ اِنت-

ھمے وڑ مروچی دشت ءِ دمگ کاشاپ ءَ پاکستانی پوج ءَ شش مردم آوار جتگ ءُ گوں وت برتگ اَنت-

آوار جنگ بوتگیں مردمانی پجّار پرویز ء امام بکش جھمنند کاشاپ ، طاہر ء محمد سلیم جھمنند کاشاپ ، خالد ء مجید جھمنند کاشاپ ، نسیم ء ھاجی کریم بخش جھمنند جمک ، اسماعیل ء غلام حسین جھمنند جمک ، دگہ دو مھمان بوتگ اَنت چہ کاشاپ ءَ آوار جتگ اَنت ئِے-

اِھوالکارانی رِد ءَ پرویز ءُ خالد بل ءِ نیمگ ءَ روگ ءَ بوتگ اَنت کہ پوج ءَ نیم راہ ءَ گپتگ اَنت ءُ دگہ لھتے کاشاپ بازار ءَ ءُ نسیم گوں وتی ھمراھاں پِش بُرگ ءَ بوتگ اَنت گپتگ اَنت ئِے آ دگہ مردمانی پجّار انگت نہ بوتگ اَنت اے دُرست پاکستانی پوج ءِ گشتی ٹولی ءَ گپتگ اَنت ءُ پوج ءِ گاڑیانی تہ ءَ گندگ بوتگ اَنت ءُ آیانی چمّ ھم بستگ اَنت ئِے-

نبشتانک: من بلوچے آں

نبشتہ کار : زھیر نور

دی بلوچستان پوسٹ

من بلوچے آں، من جنگ آماچیں بلوچستان ءَ ودّی بیتگ آں منی ڈیھ ءِ نام بلوچستان اِنت،بلوچستان ءِ چاریں پھناتاں، کوچگ، میتگ، شھر ، بازار دِمک ءُ دراہ منی لوگ انت-

بلوچستان ھما جاگہ انت کہ من اولی رند ءَ وتی چَمّ پچ کُتگ انت ءُ زند گوازینگ ءِ راھبند ھیل گپتگ، منی دل ءَ لوٹ اِیت ھمد ءَ وتی ڈیھ ءَ بہ مِراں ءُ وتی ماتیں زمین ءِ سینگ ءَ کل کنگ بہ باں ۔

چنکس سال اِنت منی ڈیھ ءَ جنگے بِنا بوتگ زورگیر مُدام مارا جَنگ ءُ بیگواہ کنگ اِنت ءُ ما ننگ ءِ جنگ ءَ ایں وتواجھی ءُ گلامی ءِ جنگ ایں، ھکل ءُ نا ھک ءِ جنگ ایں، ھمے جنگ ءِ تہ ءَ چِنکس سالونکیں سر ندر بیتگ، چِنکس بانوریں سمی جنوزام بیتگ، چِنکس کمبریں چُک چورہ بیتگ ءُ چنکس کماش”ماما کدیر پہ وتی بچّانی شوھازگ ءَ چہ کُنڈاں کپتگ انت ۔

بلے: آیاں وتی جھد یل نہ کتگ،چنکس مات چہ وتی بچّانی مراداں بے مراد بیتگ،گوں من ایشانی ھچ ھساب نہ بیت اے لڑ باز مزن اِنت بلوچ ءِ ھمک گس ھمے گرانیں درد شمار اَنت، من نزاناں اے جنگ ءِ آسر چی بیت بلے! انچو گوش اَنت یکروچے گلامی ءِ اے سیاہ ءُ تھاریں شپ ءِ آسر بیت ءُ آجوئی ءِ سھرچکیں بام ءِ رُژن تالان بیت ءُ مئے سرڈگار ءِ شھیدانی گُڈی ارمان پیلو بنت ۔

بلوچستان منی ڈیھ ءُ پمّن ءَ مھروان انت مات ءِ دروشم ءَ انت، ھما مات کہ ھر کجا زھگ ءَ وتی امبازاں زور اِیت ءُ سکی ءُ سوری پہ وت ءَ شات گل پہ چُک ءَ را بکشائیت، چہ اے ڈیھ ءِ سیمسراں ڈّن من وت ءَ را درآمدے زاناں ءُ درست پمن ءَ درآمد اَنت، بلے! وتی ڈیھ ءَ ھرچ درآمد ءِ گور ءَ من وت ءَ را وتیگے سرپد باں، من ءَ وتی ڈیھ ءِ درائیں مردم ، درچک ءُ دار، کور ءُ شیپ، مُرگ ءُ گُنگدام ، گیابان ءُ گریشگ درست چو ساہ ءَ دوست بنت، منی واھگ ھمیش انت منی ڈیھ ءَ کس درآمد ءِ مارشتانی آماچ مہ بیت۔

منی دل ءِ واھگ انت کہ منی ڈیھ سبز ءُ آباد بہ بیت، وتواجھیں ڈیھے بہ بیت مدام وشیانی نود ساچان بہ بنت ءُ ھور بہ گوار انت۔ درائیں مردم وت ماں وت تپاک بہ بنت درست یکے دومی ءِ درداں بہ مار انت، کس مونجاں مہ بیت، دراہ پہ وتی ڈیھ ءِ آبادی ءَ ھمکوپگ بہ بنت،کس مارا جست کُت مہ کنت-

“کہاں سے آ رہے ہو؟ کہاں جا رہے ہو “

ما ھما روچاں شاداں بہ ایں،کہ منی ڈیھ ءِ ھمک مردم گل بیت، کسے پہ چُنڈے نان ءَ پریشان مہ بیت ۔ کسی مردمے بیگواہ کنگ مہ بیت۔ کس دگانی سر ءَ پہ انساپ ءَ کوکار مہ کنت کسی لوگ شپ ءَ انگیر کنگ مہ بنت ءُ ترس ءَ بے واب مہ بیت، منی راج ءِ ورنا ءُ کماش ھوار تیوگیں سرڈگار ءِ وارس کجا دل اِش لوٹ اِیت پہ سیل ءُ سود ءَ تر ءُ تاب کُت بہ کن اَنت آجوئی زندگ بات ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

انسٹی ٹیوٹ آف بلوچی لینگویج اینڈ کلچر یونیورسٹی آف تربت ءِ چیردستی ءَ “رجانکاری ءِ بارو ءُ بلوچی زبان ءَ رجانکاری ءِ ارزشت ” ءِ سر ءَ دوشمبے ءَ یک روچی مراگشے برجم دارگ بیتگ – اے مراگش دو بھرانی تہ ءَ بیتگ –

انسٹی ٹیوٹ آف بلوچی لینگویج اینڈ کلچر بلوچی زبان، لبزانک، راجدپتر ءُ دودمان ءِ دیمروئی ءَ وانگ ءُ زانگ ءِ کرد ءَ پیلو کنگ اِنت-

بنداتی بھر ءِ بندات ءَ پاک تاک ءِ وانگ ءَ گوں بندات بیتگ ءُ انسٹی ٹیوٹ آف بلوچی لینگویج اینڈ کلچر یونیورسٹہ آف تربت ءِ سروک پروفیسر عبدالصبور بلوچ ءَ تلو ءِ سر ءَ تران کرتگ ءُ گشتگ کہ جامعہ تربت ءِ انسٹی ٹیوٹ آف بلوچی لینگویج اینڈ کلچر سرجم ءَ بنکی دروشم ءَ کار کنگ ءَ اِنت-

نیاد ءِ گچینی ءِ مھمان جامعہ تربت ءِ وائس چانسلر پروفیسر ڈاکٹر جان مھمد ءُ ادارہ فروغ زبان اسلام آباد ءَ ھواریں محبوب بگٹی بیتگ اَنت –

جامعپ تربت ءِ وائس چانسلر پروفیسر ڈاکٹر جان مھمد ءَ وتی تران ءِ تہ ءَ گشتگ کہ “رجانکاری یک پَنے کہ اشی ءِ تہ ءَ راجانی راجی میراس ءِ زانگ ءَ گیشی کنت،زندگیں راج وتی زانشی میراس ءَ نا ایوک ءَ پھریز ءَ کن اَنت بلکیں اشی ءِ گیش کنگ ءِ واستا ھروھد ءَ جھد کن اَنت- ”

محبوب بگٹی ءَ گشتگ “جامعہ تربت ءَ یک جوانیں سرھالے ءِ سر ءَ دیوانے برجم داشتگ، رجانکاری ءَ یکے دومی لبزانک ءُ دودمان ءِ تہ ءَ سرپدی بیت اِنت –

آئی ءَ گشتگ کہ رجانکاری ءَ چہ دنیا ءَ سرجمی ءَ پکری ءُ زانشتی پیش گامی ءُ لبزانکی تکاں سرپدی رس اِت اِنت، رجانکاری ءَ باز جھلانکی دیر گندی ءُ دوچاری یے کہ دور ءُ دراجیں دودمان، دود ءُ ربیدگ، راجدپتر ءُ شھری بودیشتی ھوار بنت اے بنگپ ءَ جامعہ تربت ءِ دیوان ءِ جوانی ءُ یک جوانیں گامے –

دومی بھر ءَ بلوچ اسکالز ءَ وتی وتی ھیال پیش کتگ اَنت بلوچی زبان ءِ نامی ئیں لبزانکار شرف شاد، بلوچی زبان ءُ زبانزانت ءُ رجانکار پروفیسر طارق رھیم ءَ ھم وتی ھیال پیش کتگ اَنت –

بلوچی زبان ءُ لبزانک ءِ نامی ئیں لبزانکار اے ار داد، پروفیسر طاھر حکیم ءَ ھوار چِل ءِ نزیک ءَ بلوچ لبزانکاراں وتی وتی ساچست پیش کتگ اَنت کہ اشانی تہ ءَ رجانکاری ءِ سر ءَ چمشانک دیگ بیتگ اَنت –

یونیورسٹی آف تربت ءِ ھال ءَ برجم کرتگیں اے مراگش ءَ جتا جتائیں پکراں بندوکیں مردم نودربر، استاد، لبزانکار، شائر ءُ اھوالکاراں بازیں کچے ءَ بھر زرتگ –

نبشتانک: جنگولیں سنگتے اَت

نبشتہ کار: شیردل بلوچ

دی بلوچستان پوسٹ

ھما روچ انگت گیر کاینت ، زمینچنڈ ءِ تاوان بھر بوتگیں مردمانی کمک ءِ واست ءَ بی این ایم ءِ گوشگ ءِ پد ءَ چہ وتی راج ءَ پہ کُمک ءِ واست دست شھاراتگ اَت، ھمے درگت ءَ جاہ آھو ” جھاؤ “ءِ آجوئی لوٹوکیں گلانی آشوبی ئیں” سنگت وتی دَمگ ءِ بازیں ھنداں شت اَنت پہ زمینچنڈ ءِ آماچ بوتگیں مردماں کُمک ءَ دست شھاراتگ اَت چوناھا بلوچ روایت ءِ تہ ءَ ھست گرانیں نوبتاں یکے دومی یے کُمک کنگ، اگاں کسے نادراہ بوتگ روچ ءَ ھرکس وتی لاپ ءِ آس ءِ توسگ ءَ کاراں دسگٹ بوتگ گڑا شپ ءَ نادراہ ءِ ھال پُرسی شتگ ءُ تیوگیں شپ ءَ نشتگ ءُ دیوان اِش کرتگ ،” مَرگ ءَ پُرس ءُ سور ءَ بِجاری اش داتگ-

ما وتی کماشانی ءُ پیریں ماتانی دیوان ءَ نشتگ ایں، انچیں ھبر دیواناں کرتگ اِش ءُ ھمے گوشتگ اِش وھد ءَ انچو بُگش اِت انچو تنگدستی بوتگ-

بلے ما یکے دومی ءِ درد ءُ مرگ ءِ کار ءَ اتکگ ایں” بزان ما مھروان بوتگ ایں چُشیں بے مھری ما نوں گندگ ءَ ایں مئے زمانگ ءَ ھچبر نہ بوتگ، ھو ھمے بے مِھری ءِ روتگ دَرگیتگ اَنت،راجی آجوئی ءِ جُنز ءِ رھشوناں ” آ راجی ایردستی اِنت چیرمین “گلام مھمد ،پروپیسر ” سبا دشتیاری ایندگہ رھشوناں وتی گُشتانکانی تہ ءَ مدام ھمے ھبر کرتگ ءُ گوشتگ اِش مئے پدمنتگی مئے راجی ایردستی اِنت، تاں ھما وھد ءَ راج ءِ گلامی ءِ سانکل نہ سِستگ اَنت، ما دیمروئی نہ کن ایں ۔

وھدے ما زمین چنڈ ءِ کُمک ءِ لوٹگ ءَ جاہ آھو “جھاؤ” کورک ءِ شھر ءَ ھوٹلے ءَ نشت ایں ” دُکاندار ءُ ایدگہ مردماں دراہ لوٹائنت اَنت، دروت ءُ دراھبات ءَ پد “بنگپّ “زمین چنڈ ءِ سر ءَ گپّ اَت ھرکس ءَ دلپدردی درشان کُت ءُ کُمک ءِ کنگ ءِ زبان دات،دیوان آسر بوت ورنایے ھمے دَماں ءَ اتک ءُ سلام الیک ءُ وش آتک ءَ دست ءُ دروت بوت ، ایشی دست ءُ دروت چہ ھَمک مردم ءَ جُتا اَت، سرمچارے ءِ دروشم ءَ اَت، پسٹلے گوں سیرین ءَ بستگ اَت ئِے ایدگہ سنگتاں پجارت منی گندگ ءِ اولی رند اَت کہ دیستوں ءُ ھمد ءَ پجاروکی بوتاں، سال دو ھزار سیزدہ اَت رمس یات آیگ ءَ نہ اِنت ۔

اے سنگت راج پھازیں ” اللہ بکش پنام بشام بلوچ اَت واجہ ءِ پِت ءِ نام مھمدیاکوب اِنت جاہ آھو ” جھاؤ” زیرکانی ءِ جاھمنند اَت، وانگ ءُ زانگ ءِ بابت ءَ ئِے گیشیں سرپدی منی گور ءَ نیست اِلم ءَ انچو زاناں کہ کمو وانتگ ئِے بلوچی زبان ءَ نبیسگ ءُ وانگ ئِے زانت ءُ شائری ءِ شوک ئِے ھستگ اَت یک دو وتی شَیر منی کر ءَ وانت اَنت۔

ھما روچ ءَ پد باز وھد یکجاہ گوازینت” آ ھاموش تب ءُ مھروان ءُ سادگ ءُ جنگولیں سنگتے اَت، ھما سنگت گوں آئی جنگ ءِ پڑ ءَ گوں بوتگ انت بھادری ئِے گپّان اش کن اَنت،وھدیکہ دژمن ءِ جَنگ ءَ شتگ دور سنگر ئِے نہ گپتگ نزدیک ءَ نشتگ پد ءَ لشکر سر ءِ چست کنگ ءَ نہ اشتگ ئِے ۔

بیست ءُ ھشت سارتان دو ھزار ھبدہ ءَ لھتیں سنگتانی ھمراھی سپرے ءَ رھادگ بوت اَنت، دُز ءُ لگوریں لشکر ءَ ماں گزی ءِ کور ءَ بُرز ءَ تھارماہ ءِ تہ ءَ پند ءَ اتکگ ءُ راہ بستگ اَت اِش، سنگت کاینت ءُ دُچار کپ اَنت ءُ انگیر ءَ بنت ٹوھیں میڑھے بندات بیت ءُ ھمے میڑہ ءِ تہ ءَ کمانڈر “اللہ بکش پنام بشام بلوچ ءُ شھید رازک جان پنام کھورجان پہ وتن نمیران بنت ءُ وتی ایندگہ سنگتانی رَکینگ ءَ سوبین بنت ءُ وت شھید بنت ساری ءَ منی یک نبشتانکے شھید کھورجان ءِ بابت ءَ شنگ بوتگ اَت آئی ءِ سرنام ” لاگر بدن مھکمیں سنگتے اَت ” پمیشکا اے نبشتانکے تہ ءَ آئی درگت ءَ کم نبیس اتگ ، اے نبشتہ “شھید اللہ بکش ئِے درگت ءَ اِنت ۔

مرچیگیں روچ مارا ھما روچ ءِ یات ءَ دنت ھمے سیاھیں روچ ءَ بلوچ راج ءِ کنگرھیں پُسگ شھید” بشام بلوچ ءُ کھورجان ءِ شھید بوگ ءِ چارمی سال روچ اِنت، آ ماں جاہ آھو “جھاؤ ” ءِ تھسل تھانہ ءِ پُشت ءِ گرریچان ءِ نیمگ ءَ ماں بے گمنامیں کبرستان ءَ لگوریں مردمانی دست ءَ کل ءُ کسارت کنگ بنت ءُ ھمے گڈی وابجاہ شھید اونگزیب،پنام شادین ،شھید گلشیر جان پنام ھان جان ، شھید گلاب جان ، شھید ھان جان پنام ھمل جان شھید سولو جان پنام کمانڈو ءُ دگہ لھتیں شھید ھمے سیڑھی کور ءِ شانکے ءِ دپ ءَ وتی گڈی وابجاھاں سیرواب اَنت من شھید “اللہ بکش جان ، شھید رازک جان ءَ ھوار سارتان ءِ ءُ سرڈگار دراھیں شھیداناں سھریں دروت ندر کناں آجوئی ءِ جُنز زندگ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔