TBP Balochi

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ کراچی چینی انجینئیرزانی سر ءَ بوتگیں اُرش ءِ زمّہ واری منّ اِتگ ءُ گوشتگ کہ مروچی سھب ءَ مئے سرمچاراں شیرشاہ ءَ چینی انجینیرزانی گاڑی ءِ سر ءَ اُرش کتگ – اُرش ءَ دویں چینی سک باز زدگ بوتگ انت –

جارکش ءَ گوشتگ کہ دیمروئی دیگ ءِ نام ءَ چین ناکہ تھنا بلوچ ءِ مال ءُ مڈیانی لٹ ءُ پُل ءَ پاکستان ءِ ھمراہ داری ءَ کنگ انت بلکیں بلوچ راج ءِ بگیری ءَ جنگی جُرماں ھوار بلوچ چکچینی ءَ ھم پاکستان ءِ گوما ھمراہ دار انت –

میجر گوھرام بلوچ ءَ دیمتر ءَ گوشتگ کہ چین ءَ ھوار ھچ وڑیں دری تاکتانی گوم ءَ مئے ھچ جنگ نیست اِنت بلے چین ءَ ھوار ھر کجام ریاست یا ٹولی بلوچستان ءِ تہ ءَ پاکستان ءِ زورانسری کبزہ، مال ءُ مڈیانی لٹ ءُ پُل ءُ جنگی جُرماں پاکستان ءِ ھمراہ داری ءَ کنت گڑا بلوچ سرمچارانی نشانگ ءِ تہ ءَ بیت اِنت –

آئی ءَ گوشتگ کہ چین ءَ ھوار دگہ درسیں راج ءُ ڈیھاں ما مکن کنیں کہ آ پاکستان ءِ ھمراہ داری پھریز بہ کن انت –

بلوچستان ءِ دو جتا جتائیں ھنداں تیرگواری ءُ دگ ءِ وئیلاں چار مردم بیران بیتگ اَنت –

اے وئیل پنجگور ءُ ھزدار ءَ پیش اتکگ اَنت کہ اود ءَ دگ ءِ وئیل ءُ تیرگواری ءِ وئیلاں چار مردم بیران بیتگ اَنت –

ھزدار ءِ دمگ انجیرہ ءَ دیم پہ ھزدار ءَ رؤکیں ویگن گاڑی جیواکراس ءَ پُھل ءِ چیر ءَ کپتگ ءُ چریشی ءَ سَے مردم بیران بیتگ اَنت بازینے زدگ بیتگ اَنت – وئیل ٹائر ءِ ترکگ ءِ سبب ءَ دیم ءَ اتکگ –

ریسکیو ءِ واستا روکیں ایم ای آر سی ءِ ایمبولینس مزن شھدگ ءَ کورک ءِ ھند ءَ ڈرائیور ءِ دست ءَ لگوشتگ ءُ کپتگ –

ھمے وڑ گوستگیں شپ ءَ پنجگور ءَ تیرگواری ءَ زدگ بیتگیں جعفر ء سلیم ءَ ٹپ نہ سگ اِتگ ءُ بیران بیتگ –

پنجگور ءَ گوستگیں چار ادارانی تہ ءَ تیرگواری ءِ اے دومی وئیل اِنت کہ دگہ یک مردمے ھم زدگ بیتگ ءُ دو لک کلدار ءُ یک گاڑی ءِ دُزی بیتگ –

پنجگور ءِ مھلوک ءِ گوشگ اِنت کہ انتزامیہ ءِ وابی ءَ ھمے زانگ بیت اِنت کہ انتزامیہ دُزاں تچک ءَ تچک کُمک کنگ ءَ اِنت –

ھمے وڑ ھزدار ءَ تیرگواری ءَ لیویز کارمند بیران بیتگ ءُ کھول ءَ زھرشانی کرتگ ءُ مزن شھدگ بند کرتگ –

تیرگواری ءِ وئیل ھزدار ءِ دمگ وڈھ ءَ پیش اتکگ کہ اود ءَ سلاہ بندیں مردماں تیرگواری کرتگ ءأ لیویز کارمند عبداللہ مینگل زدگ کرتگ کہ آ زدگیں جاوراں نادراہ جاہ ءَ برگ ءِ وھد ءَ آئی ءَ ساہ داتگ اَنت –

وئیل ءَ پد کھول ءَ لاش ءِ ھمراھی ءَ شال ءُ کراچی ءَ رؤکیں مزن دگ بند کرتگ ءُ ھرچ وڑیں رؤک ءُ آیوکیں مھتل کرتگ اَنت –

بلوچستان ءِ بنجاھی شھر شال ءِ پریس کلب ءَ مکران ءَ جھانی وبا کرونا وائرس ءِ تیزی ءَ گوں تالان بوگ ءُ پھازدارانی گیر زمہ داری رویش ءِ بگیری ءَ چہ بلوچ یکجھتی کمیٹی ءِ نیمگ ءَ پریس کانپرنس کنگ بوتگ، جیڑھانی سر ءَ گامگیج نہ زورگ ءِ بگیری ءَ لاچاری ءَ زھرشانی کنگ بیت –

بلوچ یکجھتی کمیٹی ءِ رھشون ڈاکٹر ماھرنگ بلوچ ءُ دگہ مردماں شال پریس کلب ءَ اھوالکاراں گوں تران کنان ءَ گوشتگ کہ مروچی بلوچستان ءِ تہ ءَ ھچ چشیں جاہ ءُ دمگ ءِ نیست کہ اود ءَ مھلوک ءَ ھک ءُ لوٹانی آزاتی ءُ بنکی لوٹ بہ رس انت لھتے جاہ ءَ ریاستی زوراکی لھتے جاہ ءَ گریبی ءُ بزگی ءَ مھلوک وتی ارجاں جتگ اَنت- بازیں دمگاں کینسر تباھی آرگ انت لھتے جاہ ءَ ایٹمی تراکانی سوب ءَ مھلوک متاسر بوگ ءَ انت لھتے جاہ ءَ وانگجاہ پہ نام ءَ نیست لھتے جاہ ءَ آبرو ءِ نام ءِ سر ءَ زالبول ءُ مھلوک ءِ کُشت ءُ کوش بوگ ءَ انت اے درسیں جیڑہ ءُ جنجالاں پد نوں بلوچستان ءَ ھاسکر مکران ءَ ریاستی زوراکیانی ھواری ءَ نوکیں کرونا وائرس ءَ وتی تباہ کاری کنگ بندات کتگ کہ تنی وھدی ھالانی رِد ءَ گوستگیں ھپتگ ءَ پانزدہ مردم ءَ گیش بیران بوتگ اَنت –

آئی ءَ گوشتگ کہ اے کساس بس رسانکدری انت وھدیکہ گراؤند ءَ کرونا وائرس سک باز تباھی کنگ انت ءُ بیران بوتگیں مردمانی کچ ھم چد ءُ گیشتر انت راج ءِ تہ ءَ کرونا ءِ درگت ءَ بے زانتی ءُ بازیں جاھاں وتی پھریز نہ کنگ ءِ سوب ءَ مھلوک وتی دوستگیں مردمانی کرونا وائرس سوب ءَ بیرانی ھچ نہ گوشگ انت بلے اے درسیں جاورھالاں پدردی گپ ایش انت کہ سرکار ءُ ادارھانی بے نپیں کارکردگی ءِ سوب ءَ مردم گیشتر ھلاس بوگ ءَ انت –

بلوچ یکجھتی کمیٹی ءِ رھشونانی گوشگ ات کہ مکران ءِ تہ ءَ یک نیمگ ءِ جھانی وبا کرونا وائرس تالان بوتگ کہ چریشی ءَ بازیں مردمے بیران بوتگ ءُ اشی ءِ رِد یکشل ءَ برجاہ انت بلے دومی نیمگ ءَ سرکار نیمگ ءَ اے جاورھالاں مھلوک ءِ گوما ھما رویش ءَ پیش دارگ انت کہ کرونا وائرس ءَ چہ ھم گیشتر بیمناکتر ءُ مردمانی جیڑہ گیش کنگ ءِ سوب جوڑ بوگ انت کرونا وائرس ءِ اماچ بوتگیں مردماں تربت شھر ءَ ھوار ھچ جاہ ءَ جانسلامتی ءِ بنکی لوٹ سرجم نہ انت کہ وتی الاج ءَ بکنائین انت یک نیمگے کرونا وائرس ءِ ترس ءَ مھلوک وتی لوگاں چہ ڈن دراتک نہ کنت وھدیکہ دومی نیمگ ءَ سرکار ءِ نیمگ ءَ بید جار ءَ لوڈ شیڈنگ ءِ سوب ءَ مردم گِسانی تہ ءَ سک باز ماژگی ازیتی آماچ جوڑ بوتگ انت – کرونا وائرس ءِ پژدر ءَ سرکار ءَ تربت ءَ ھوار مکران ءِ بازیں دمگاں لاک ڈاؤن کتگ بلے لین نہ بوگ ءِ سوب ءَ مھلوک ءِ گِسانی تہ ءَ نندگ سک باز جنجالانی دیمپان اَنت کہ چریشی ءَ گیشتر مرگ ءِ دیمپان انت –

آھاں دیمتر ءَ گوشتگ کہ مکران ءِ تہ ءَ بازیں وھد ءَ کہ زلم زوراکی برجاہ انت اے سک باز بیمناک بوتگ شمارا یات بیت کہ یک نیمگے مکران ءِ مردمانی روزگار بزاں ٹیل ءِ کار ءُ بار بند کنگ بوتگ دومی نیمگ ءَ ریاستی زوراکیانی ھواری ءَ سرکاری کتکار بزاں کشندہ ٹولیاں مھلوک ءِ زند چد ءُ گیشتر تباہ کتگ سیمی نیمگ ءَ مھلوک ءِ بنکی روزگار ءِ پچگرگ ءَ پد اھاں دگہ کار ھم دیگ بوگ ءَ نہ انت ءُ گوادر ءَ ھوار تربت ءُ پسنی ءُ دگہ دمگاں لین ءِ ھم لوڈ شیڈنگ انت نوں کرونا وائرس نوکتریں ڈیلٹا دروشم ءَ تالان بوتگ کہ مھلوک ءِ جیڑہ ءُ جنجالانی سوب جوڑ بوتگ کہ مکران ءِ مھلوک ھنچیں جاہ ءَ سر کنگ بوتگ انت کہ پہ آھاں زندگ بوگ ھم گران انت اے جاورھالاں ھاکم ءُ سرکاری ادارہ چد ءُ گیشتر کنگ انت کہ ناھکی ءُ گیر انسانی سوچ ءِ آپ سر گوز انت اگاں اے ھمے وڑ برجاہ بوت ایشی ءِ سنگین رزلٹ درکیت –

آھانی گوشگ ات کہ بلوچستان ءِ تہ ءَ رسانکدرانی بلیک آؤٹ ءِ سوب ءَ مھلوک ءِ جیڑہ ءُ جنجال پیش ءَ چہ پاکستان ءُ دنیا ءِ دیم ءَ چیر انت بلے مکران ءِ چہ ایندگہ دمگاں چد ءُ گیشتر انت یک نیمگے گوادر ءِ درگت ءَ ھکومت گوش ایت کہ گوادر دبی ءُ سینگاپور جوڑ بوگ ءَ انت وھدیکہ دومی نیمگ ءَ گوادر ءِ جھمنند ورگی آپ ءُ بجلی ءُ روزگار ءَ زبھر انت گوادر ءَ ھوار کوسٹل بیلٹ درسیں دمگ گنز، پشکان ءُ جیونی ءِ مردماں نون زر ءَ ھم پہ روزگار ءِ روگ ءَ نیلگ ءَ انت – یک نیمگے مردم تچکی ءَ ریاستی زوراکیانی آماچ انت ءُ دومی نیمگ ءَ اے ایردستیں مھلوکانی نام ءِ سر ءَ دنیا ءَ گمراہ کنگ سنگینیں جرمے کہ ایشی ءِ ما دراہ وڑ ءِ ناں وڑے ءَ زمہ وار انت – گوادر کرکٹ اسٹیڈیم ءَ رسانکدرانی نیمگ ءَ کوریج رس ایت بلے اود ءِ جھمنندانی جیڑہ ءُ جنجالاں مھلوک ءِ زھرشانیاں ھچبر رسانکدر کوریج نہ دنت کہ اھاں دگہ پاکستانیاں چہ جتا بوگ ءِ سما ءَ دیگ بیت – اے بیمناکیں وائرس تالان بوگ ءِ درگت ءَ ما راج ءَ وتی پھریزگ ءِ لوٹ ءَ کنیں بلے دومی نیمگ ءَ ھکومت ءَ ھم لوٹ ایت کہ آ اے جاور ھالاں بجلی لوڈ شیڈنگ بند بہ کنت ءُ مھلوک ءَ چد ءُ گیشتر ازیت مہ دنت اگاں سرکار ءَ وتی اے رویش برجاہ داشت انت گڑا اشی ءِ بگیری ءَ سرجمیں بلوچستان ءَ زھرشانی درچ ءِ بندات کنگ بیت –

بلوچ یکجھتی کمیٹی ءِ رھشونانی گوشگ ات کہ اے پریس کانپرنس ءِ نیمگ ءَ چہ ما برزی ادارھاں لوٹ کنیں کہ آ بلوچستان ھاسکر مکران ھستیں جاورھالاں کم کنگ ءَ وتی کرد ءَ پیلو بہ کنت، ریاستی زوراکی، ڈیت اسکواڈ ءِ زوراکی، بے روزگاری، جانسلامتی ءِ بنکی لوٹانی ساڑی نہ بوگ ءُ اے کرونا وائرس ءِ میان ءَ مدامی لوڈ شیڈنگ ءُ دگہ بازیں جیڑھانی بوگ ءَ اگاں سرکاری ادارہ ءُ ھکومت ءِ اے رویش ھمے وڑ گیر زمہ دار ءُ زالمی بیت گڑا اشی ءِ بگیری ءَ بلوچستان ءِ کنڈ کنڈ ءَ زھرشانی ءِ زرمبشت چلائینگ بیت ءُ گوادر ءَ ھوار مکران ءِ مھلوک اے گپ ءَ دلجم بہ بنت کہ مروچی بلوچستان ءِ مھلوک بے ایمان نہ انت راجدپتر اے گپ ءِ گواہ انت بلوچستان ءِ ھر کنڈ ءَ زوراکی بوتگ مکران ءِ مھلوک ءَ آ وتی لیکتگ ءُ آئی ءِ بگیری ءَ جد ءُ جھد کرتگ مروچی وھدیکہ مکران ھمے زوراکیانی دیمپان انت گڑا بلوچستان ءِ ایندگہ دمگانی مردم اے درد ءُ گمزدگیں جاورھالاں آھانی گوم ءَ انت او اے جاوھالاں آ تھنا یل کنگ نہ بنت –

سر بیتگیں ھالانی رد ءَ اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 189 البانی جنگول کُشگ بیتگ اَنت ءُ 138 سکی ءَ ٹپی بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 189 تالبان جنگول کُشتگ اَنت ءُ 138 سک ٹپی ھم کُتگ اَنت۔

آئی ءَ وتی ٹیوٹر پیگام ءَ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت کندھار، زابُل، ھیرات، جوزجان ءُ ھِلمند ءِ ھند ءُ دمگاں کُتگ اَنت-

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 187 تالبان جنگول کُشگ بیتگ اِت اَنت ءُ 112 سکی ءَ زدگ ءُ ٹپی ءَ ھوار 2 تالبان جنگول دزگیر ھم کنگ بوت اَنت ءُ اوگان راجی لشکر ءَ ھمے جنگی اُرش کُنر، لوگر، گزنی، ھوست، کندھار، اُروزگان، پریاب، بلک،جوزجان، سمنگان، بلگان ءُ کپیسہ ءِ دمگاں کُتگ اَنت۔ ھمے وڑ کہ گْوستگیں اُرش ءَ نیکراھی ناشرکاریں تالبان ءِ رھشون مولوی نبی اُمری ءِ مستریں زھگ ابدلھک اُمری ھم ھوست ءِ دمگ ءَ کُشگ بوتگ۔

دومی نمیک ءَ اوگانستان ءِ پھزگی وزیر بسم اللہ اوگانستان ءِ گوریچی ولایتاں آتکگ ءُ چہ تالبان ءِ دست ءَ دزگِیر کُتگیں دمگانی آجوئی ءِ ھاتر ءَ اوگان راجی لشکر ءِ تیاریاں چارگ ءَ انت۔

زانگ بہ بیت گوستگیں روچاں اوگانستان ءَ نذر خاشا ھم کُشگ بیتگ اَت –

اوگستان ءَ بلوچستان ءِ ھواریں سیمسری دمگ کندھار ءَ گوستگیں روچ ءَ کُشگ بیتگیں نذر مھمد پنام ءِ خاشا کوش ءِ ھلاپ ءَ چاگردی رسانکجاھاں ھم زھرشانی کنگ ءُ ائی ءِ کوش ءَ ایرجنگ ءَ اَنت –

خاشا گوستگیں روچاں اوگستان ءِ زرباری اُستان کندھار ءَ سلاہ بندیں مردماں آوار جتگ ءُ پد ءَ آ کُشتگ ءُ آئی ءِ لاش چگل داتگ –

سے شمبے ءِ سھب ءَ ناشناسیں سلاہ بندیں مردماں سند ءِ بنجاھی شھر کراچی ءَ در ملکی مردمانی سرءَ تیر گواری کُرتگ کہ اِشی سوب ءَ یک مردمے ٹپیگ بیتگ۔

ٹپی بیتگیں مردم چین ءِ جھمنند اِنت کہ انجینئرنگ ءِ پِڑ ءَ گوں سیادی داریت۔ وھدیکہ اے وئیل سائٹ ایریا ءَ گلبائی پُل ءِ چیر ءَ پیش اتکگ۔

ٹپی بیتگیں چینی شھری جانسلامتی کمک ءِ ھاترءَ سول ھسپتال کراچی ءَ برگ بیتگ، آودہ گُشگ بیتگ کہ ٹپیگیں مردم ءِ جاور باز ھراب نہ اِنت۔

ڈی آئی جی ساؤتھ زون کراچی جاوید اکبر ریاض ءِ ردءَ ٬دوھیں چینی شھری شیر شاہ ءِ فیکٹری ءَ کار کن اَنت۔ سھب ءَ ڈیفنس ھاوسنگ اتھارٹی ءَ زرتگیں وتی لوگ ءَ چہ گوں یک ھندی ڈرائیور ءِ پجیگ ءَ دیم پہ کار ءَ روگ ءَ بیتگ اَنت کہ نیم راہ ءَ ناشناسیں دیم گپتگیں مردماں تیر گواری کُتگ کہ اِشی سوب ءَ یک چینی جھمنندیں ٹپی بیتگ۔

یات بہ بیت کراچی ءَ ھوار پاکستان ءِ جتاھیں ھند ءُ دمگانی تہءَ چدو پیسر ھم چینی جھمنندانی سر ءَ اُرش کنگ بیتگ اَنت کہ اے اُرشانی زمہ واری سلاہ بندیں بلوچ و سندھی آجوئی لوٹوکیں گلاں من اِتگ اَنت۔ بلے اے اُرش ءِ زمہ واری انگت ھچ گلءَ نہ من اِتگ۔

ھمے ماہ ءَ خیبر پختونخواہ ءِ دمگ کوھستان ءَ داسو ھائیڈرو پاور پراجیکٹ ءِ سرءَ کار کنوکیں چینی کارمندانی بس ءَ تراک ءِ سوب ءَ نھ چینی شھریاں ھوار دوازدہ مردم مرتگ اِت اَنت۔

پاکستانی چیریں گلاں ٹاہ داتگ اَت لاھور ءَ چیریں گلانی واکداراں داسو بس تراک ءَ ھواریں دو مردم دزگیر کُتگ اَنت۔

دستونک: ندر پہ راجی سروک واجہ الله نزر ءِ نام ءَ

شائر: سلیم ناز

منی رهشون منی رهبر
پہ تو کربان مئے ساه ءُ سر

ترا الله مہ کنت هچّی
او راج ءِ پُلّیں شیریں نر

هزار سال ءَ تو هست بات ئے
بہ شَنز اَنت تئی سر ءَ جمبر

بلوچ ءِ نام تو زندگ کُت
تو ئے چاکر تو ئے کمبر

تئی دژمن پروش وارتگ نوں
نشانی اَنت هما سَنگر

تو جنگ ءَ نوکیں رنگے دات
بَداں پہ بوتگ ئے مَھشر

سلیم کول اِنت من ءَ زند ءَ
گلام اِنت راج نہ باں واتر

آزمانک: ھُشکیں دار ءُ ڈِیل پَشت کپت انت

آزمانکار: لتیپ سکی

دی بلوچستان پوسٹ

مھر ءُ امیت ھنچیں دام ءِ چینک انت آھانی پُشدر چے پیم ھراب بہ بیت بلے مردم آھاں ھچ پیم لَگت مال نہ کنت اے دھر ءِ مردم باز کم گندگ ءَ اتکگ انت امیت بستگیں چیزانی میان ءَ ساڑی بَہ نہ انت، بلے آھانی ارزشت نھاداں چے ڈول زندگ دارگ ءِ لوٹ کن انت، اے زند ءِ سرکیلانی تہ ءَ باز گران تبیں بے برداشتیں وھدانی چکاساں امبار گپتگ انت، ڈوبھانی نیام ءَ اوشت ءِ جنگ ءَ سَر پٹ بیتگ اَنت، بلے رند ءَ چک چرینتگ ءُ چار اِتگ ھر نیمگ ءَ وتی مَھری ءِ لگام چہ گُٹ ءَ پیچ گپتگ ءُ مرگ ءِ سیمسرانی ارجان کپتگ چی ءَ تنیگتا یک آدمے چکاس گوں آئی ءِ جند ءِ دستاں ایر گرگ نہ بوتگ مُدامی لٹ وارتگیں اھد ءِ دستاں وتی درونت دیستگ انت ءُ پد ءَ ھمے پروش ءِ ڈس زانگ بیتگ انت ۔

اے زند ءِ مکتبانی کش اِتگیں لکیر انت نبیس اِتگ انت دانکہ تو راہ ءُ دمکانی تہ ءَ وتی جند ءَ شوھاز بکن ئے جنجالیں زند ءِ سکیاں بہ مار ئے دانکہ تو وت یک جیڑگے ءِ منوگر نہ بوت ئے مدامی ءِ ڈول ءَ تو رھسریں کشکاں کَپ ءُ ڈوبگ پاد آھگانی کنڈاں گوانز کنان بہ ئے، ھمے دگنیا ءِ رھبندانی چیدگ انت کہ ھر یکے ءِ مولمانی تباں گوں جند ءِ پیم ءَ سر کشاں بہ بہ ئے ءُ روان بہ کن ئے دانکہ وتی زند ءِ بار ءَ گوں چم ء وت گندان بہ بہ ئے ءُ آئی ءِ ھر سیت ءُ نپاں سر پد بہ بہ ئے ۔

اے راھانی سپر بازیں دگ زند ءِ اولی روچاں نوک مردم وتی بستار ءَ سرپد بیت آئی ءِ توک ءَ جست کنگ ءِ ھُب ءُ واھگ ودی بیت گڑا اِلم ءِ دراجیں راھانی پشدراں سرپد بیت کنت چی ءَ کہ بنی آدم ءِ زند ھمے چیلِک ءِ پیچ ءُ تابانی ایرمانجنیں بساتاں ھوار انت کجام ھم جاہ ءُ ھنداں سر ماں چیر بیت بلے ابد بوگ ءِ واستا اے المی انت کہ ھمے لونجانی گوانزکنگ ءَ بزانت ءُ گیش اینگ ءُ لیکوک ءُ در آیگ زانگ المی انت چی ءَ کہ اگاں تو انوگیں وھد ءِ دستاں بلوٹ ئے کہ من پاد بیایاں گڑا تو جھلگانی بینٹانی گوانزکنگ ءَ ھم سر کنگ بہ ئے ۔

دھر ءِ زندمانیں ھیال مردم ءِ دل ءَ باز چیڈ کن انت کہ مردم چیزاں وتی دل ءِ توک ءَ بدار ایت ءُ پد ءَ ھمے جست مردم ءِ جبین ءَ ھم ایر بنت دل ھچ وڑ ءَ نہ لوٹ ایت ایشاں دانکانی درشم ءَ درشان بکنت بلے بازیں وھداں اے پیمیں ھیال جبین ءِ اندر ءِ مردم ءَ تیلانک دے اَنت ءُ در کاینت مردم آھاں دیم ءَ درشان کنت پرچی ءَ کہ ھمے ھیال ءُ لیکھانی نیام ءَ ترسناکیں کسہ ھوار انت آھانی زورگ ٹھینگ ءَ تو وت یک برے ھَجکہ بہ ئے ءُ پد ءَ ترا بے سمائی یے ءِ چاڑے زور اِیت تو وت نہ لوٹ ئے دل ء‍ تب زانت کہ من گُمیشانی ھمراھی ءَ وت ءَ نزور ءُ جھل داران بکن آں ءُ دیمی ئیں کشکے ءَ رھادگ بہ باں، ھمے کسھانی بازیں سر ھالے منی زند ءِ گڈی واھگاں ھوار انت ۔

من لوٹ ات وتی دانکاں یک آزمانکگ ءِ درشم ءَ دیم ءَ بیار آں بلے پد ءَ چار اِت لھتیں دانک ھست کہ آھانی درشان کنگ من ءَ یک تچکیں درشمے ءَ گندگ نئیت، مردم سرپد ھم بوت نہ کن اَنت چے بیت اے وابیں دروشمے ءِ کسھے یا راستی یے بلے من گشگ لوٹ آں وتی وانوکاں اے یک راستیں کسھے ایشی ءِ توک ءَ من باز چک پروشیں زند ءِ ھیال گواز کتگ انت ھمے کسہ ءِ نیام ءَ من ازابی ءِ رھاں دُچار بیتگ آں ،آ کسہ منی زند ءِ دوستگیں ھاجتانی گڈی امیت اَت کہ مدام ھیال ءِ دروشم ءَ گندگ بوت من ھمائی ءِ راستیں کشک ءِ کڈ ءُ بینٹانی چارگ ءُ رَمت کنگ ءَ چم شھار دات انت ۔اے ھما لوٹانی ابدمانیں چیدگ ات مدام من ءَ ھمے سما بوت کہ من دمبرگ نہ زانت آئی توک ءَ دائمی آئی ءِ کَڈ ءُ کنجانی تہ ءَ من یلہ اتاں وتی جند ءِ ھیالانی مانگیشینگ ءَ اے ھما کسہ ءِ روانکیں پندے ات اجب گران ات مردم ءَ وتی زند، مَرگ، سکی، ازیت، لَٹ ءُ کُٹ چم ء وت دیست انت بلے دائمی اے چیزاں لگت کنان ءُ گوزان ات آں، من اے سرپد نہ اِت آں دیم ءَ اے کاروان ءَ وشی بیت یا نہ بیت بلے من اے سدک ءُ دلجم ات آں اے راہ ءِ مردماناں آسرے جنجال دائم ھست دانکہ گڈی سیمسراں مردم سر مہ بیت ۔

ھمے راہ ءُ رھسراں یک رندے من واب ءَ بست کت نوک ردوم زرتگ ات پد ءَ پر مھری ات آ وھد ءِ دوست ھمبل پد ءَ شال ءِ مردم ابیتکی ءِ مجانی بھ دیمپان نہ ات بلوچستان ءِ مزن شاھدربر بہ بیت ، ڈگری کالج ءِ کوٹی نمبر سی ءُ چار بہ بیت ، اولڈ گراسی بہ بیت یا بی ایم سی ءِ دِگ بہ بنت مردم دائم مچیانی توک ءَ ات دل ءَ بِھ ھجکہ ءُ ایوکی ءِ گمان نیستگ ات نہ کہ وتی نیستی ءِ، چی کہ مردم ءِ ھاجت یک سندے سر ءَ بہ بنت گڑا وتی واری ءُ نیزگاری ءَ ھچبر نہ چار ایت اے رمیں ھمبلانی تہ ءَ مردم زانت ءُ سوھوئیں رھشونیں سنگتانی نیام ءَ ات مدام یک راستیں چیدگے ءِ نام ءَ یک گال پر بستگ ءُ لانک انت بے بھائیں زند ءِ کاروان ءَ ساڑا ایت، ھمے نیام ءَ یک رندے منی زند ءِ چکاسے گوں زوراکیں وھد ءَ چَک ماں چک بوت من مرگ ءِ سَتَل ءَ سر بوت آں، پد ءَ وابیں ھیالانی رَم ءَ زند ءِ دریگ ءَ یک رندے پد ءَ موہ رس ات ،بلے من اے بھ نہ جیڑ ات کہ اے کشک ءَ مردم ایوک ءَ چَک پروش بیت چی ءَ کہ یک مھکمیں ادارھے ات مدام تئی سکین زانت ءُ زند ءِ چکاس ءَ وت واجھی ءِ گَت پد منتگی ءِ ھیال ءُ ڈالچاریں زند ءِ گوازینگ ءَ ترا مدام بُست کنگ ءِ سکین ئِے دات-

وھد گْوزان ءُ دیم ءَ روان بوت من ھم ھمے کشک ءَ رھادگ ات آں برے یک مردمے گرانبھائیں نوک بروتانی گسر بوگ ءَ ھچ بژنیگ نہ ات آں بلے ھمئے کسہ ءِ گوستگیں ھر داب ءُ ڈول مَٹ بوت انت چہ چندے ھوکانی ایرکپگ ءَ درچک ءُ دار، لگتمالیں ھیال ءَ درپشناکیں کشار ءُ کیلگ گیمر اِت انت ھمے نیام ءَ ارواھیں زید گش ئے مھشر بوت، چندے ھیال ءُ ھشکین ڈیل ءُ پرشتگیں دار پشت کپت انت ،مردم بے سمائی یے ءِ چاتے ءَ کپت، زند ءِ درستیں واب گُٹ گیر بوت انت، مردم بس وابانی تہ ءَ بُست کن انت ءُ وتی ھیالانی ڈوبھاں پہ تسلہ گم ءِ بازار ءَ ایمن بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

خاتم الانبیاء نادراہ جاہ ءِ سروک ذبیح اللہ ھاشمزئی ءَ گُشتگ کہ انی اے ساھت ءَ سیستان و بلوچستان ءِ بنجاھی شھر دزاپ ءَ جھانی نادراہ تُشے کمتر بیتگ –

آئی ءَ گُشتگ حاتم الانبیاء نادراہ جاہ ءَ دوازدہ تھت ھالیگ بیتگ اَنت کہ آیانی سر ءَ کرونا نادراہ وپتوک بیتگ اَنت-

آئی ءَ گُشتگ کہ نادراہ جاہ ءَ درستی تھت دو سد ءُ ھشتاد ءُ چار تھت ھست بیتگ اَنت کہ چریشانی تہ ءَ ھپتاد ءُ پنچ تھت بس کرونا نادراھی ءِ واستا کارمرد بیتگ اَنت ءُ اشانی ھواری ءُ دو تھت باز نگھداشتیں مردمانی واستا گچینگ کنگ بیتگ اَنت –

آئی ءُ گُشتگ کہ اے نادراھی برے کم بیت ءُ برے گیش بلے گیشتر اشی ءِ گیشتریں گر ءُ دار وتی پھریزی اِنت ءُ اے ائید ءَ ھم باز مردم یکجاہ، مچی میڑی بیتگ اَنت بلے گمان بیت کہ چوشین مُچیانی تہ ءَ کرونا گیشتر ود اِت بہ کنت –

آئی ءَ گُشتگ کہ ویکسین کرونا نادراھی ءِ سرجمیں درمان نہ اِنت بلے مردماں اے نادراھی تکلیف ءُ مرگ ءِ گمان یکدم کم بیت اِنت –

بلوچستان ءَ جھانی نادراھی کرونا ویروس روچ پہ روچ گیش بیان اِنت ءُ چریشی ءَ بازیں جاھاں لاک ڈاؤن کنگ بیتگ اَنت –

گوستگیں روچ ءَ جانسلامتی ءِ نیمگ ءَ شنگ بیتگیں رپورٹ ءِ رد ءَ گوستگیں روچ ءَ سَے کس بلوچستان ءَ اے نادراھی ءَ بیران بیتگ اَنت ءُ اشانی ھواری ءَ بلوچستان ءَ بیرانیانی کچ سَے سد ءُ بیست ءُ پنچ ءَ سر بیتگ اَنت –

جانسلامتی ءِ رد ءَ بلوچستان ءَ گوستگیں روچ ءَ پنچ سد ءُ سَے مردمانی ٹِسٹ کنگ بیتگ اَنت کہ چریشانی تہ ءَ پنجاہ کس ءَ نادراھی پدر بیتگ اَنت –

جانسلامتی ءِ رد ءَ اے وھد ءَ بلوچستان ءِ دو شھر کیچ ءُ گوادر ءَ کرونا نادراھی گیش اِنت کہ گوستگیں روچ ءَ کیچ ءَ بیست کس، گوادر ءَ سیزدہ کس ءُ شال ءَ ھبدہ کس اے نادراھی ءِ آماچ بیتگ اَنت –

جانسلامتی ءِ رد ءَ بلوچستان ءِ بیست ءُ ھشت ڈسرکٹانی تہ ءَ ھچ ٹیسٹ کنگ نہ بیتگ اَنت،جانسلامتی ءِ رد ءَ بلوچستان ءَ ڈیلٹا رنگیں ویروس ھست اِنت ءُ بازیں مردمانی ھمے ویروس پدر بیتگ اَنت –

ھمے درگت ءَ بلوچستان ءِ سرکار ءِ جارکش لیاقت شاھوانی ءَ گُشتگ کہ بلوچستان ءَ کرونا نادراھی ءِ چارومی لڑ ناوشیں جاوراں ودینگ ءَ اِنت –

لیاقت شاھوانی ءِ گوشگ اِنت کہ بلوچستان ءَ کرونا نادراھی ءِ برزی بیست درسد ءَ سر بہ بیت سرجم ءَ لاک ڈاؤن ءَ ابید دگہ ھچ راہ نیست اِنت –

لیاقت شاھوانی ءِ گوشگ اِنت کہ کرونا نادراھی ءِ سبب ءَ گوادر ءَ پانزدہ روچ ءِ لاک ڈاؤن کنگ بیتگ ءُ ویکسین نہ جنوکیں مردمانی واستا بھاداری زیروکانی سر ءَ ھم بندش جنگ بیت اِنت –

دومی نیمگ ءَ کیچ ءَ دیم پہ شال ءَ رؤکیں شھدربر جاہ ءِ نودربر ھم ھم جنجالانی دیمپان اَنت –

سوشل ایکٹیوسٹس شے مرید رشید بلوچ ءَ ڈی سی کیچ ءَ گوں دزبندی کرتگ ءُ گُشتگ کہ ایس او پیز ءِ ھواری ءَ نودربراں اجازت بہ دنت کہ آ وتی وانگجاھاں سر بیت بہ کن اَنت –

آئی ءَ گُشتگ کہ اگست ءَ جتا جتائیں شھدربرجاھاں انٹری ٹیسٹاں ھوار پیپرز ھم بوگی اَنت ءُ چریشی ءَ نودربر بازیں جیڑھانی آماچ بیت کُت کن اَنت –

آئی ءَ گُشتگ کہ ڈی سی کیچ اسسٹنٹ کمشنر کیچ نودربرانی واستا چیزے بہ کن اَنت دانکہ اے سال ءَ آیانی وانگ زوال ءُ توال ءِ آماچ مہ بیت اِنت –

آئی ءَ گُشتگ کہ سول سوسائٹی تربت ءِ نیمگ ءَ فری آف کاسٹ کراچی ءُ شال ءِ واستا یک یک بسے نودربرانی واستا تیار کنگ ستاہ کرز اِنت –