TBP Balochi

بلوچستان ءِ بنجاھی شھر شال ءَ بیگواھیں بلوچانی ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ ھشتاد ءُ یک روچ سرجم بوتگ – نیشنل پاٹی ءِ رھشون میر عبدالغفار قمبرانی، ایڈوکیٹ خالدہ قاضی ءُ دگہ مردماں بنجل ءِ ترءُ تاب کتگ ءُ بیگواھیں مردمانی کھول ءَ گوم ءَ دلپدردی درشانتگ –

بیگواھیں مردمانی پانکجیں گل وی بی ایم پی ءِ رھشون ماما قدیر بلوچ ءِ گوشگ ات کہ بلوچستان ءِ سیاسی جیڑھاں تاکت ءِ زور ءَ گیش گیوار کنگے بیمناکیں رزلٹ درکیت –

آئی ءِ گوشگ ات کہ بلوچستان ءَ زورانسری آوارجنی ءُ بیگواھی درچ یکشل ءَ برجاہ انت ءُ سالاں چہ بیگواھیں مردم دروگیں میڑ ءِ نام ءَ جنگ بوھگ انت مروچی ھم ادا نادراھجاھاں ھما جون ایر انت کہ بازیں وھد ءَ آوار جنگ ءُ بیگواہ بوتگ انت –

آئی ءِ گوشگ ات کہ بلوچستان ءَ اے وڈیں بازیں وئیلے بوتگ کہ بیگواھیں مردم بے وارس گوشتگ ءُ کَل کُتگ انت –

آئی ءِ گوشگ ات کہ ریاست میاں استمانی پڈ ءَ بلوچانی راجی جُھد ءَ ناشرکاری نام ءَ دئیگے کوشست انت بلے مئے پُرایمنیں جُھد ءُ ورناھانی کربانیاں چہ جھد برجاہ انت –

آئی ءِ گوشگ ات کہ اے نگیگیں جاور ھالاں مار ءَ یکجاہ بوھگ ءُ وتی توار دنیا ءَ سر کنگی انت –

ماما قدیر بلوچ ءِ گوشگ ات کہ اے وھدی بلوچستان ءِ کُنڈ کنڈ ءَ نہ اوشتوکیں پوجی لشکر کشی ءُ زورانسری آوارجنی ءِ درچ یکشل ءَ برجاہ انت –

نودربر گل بلوچ اسٹوڈنس ایکشن کمیٹی ءِ بنجاھی سرکماش ڈاکٹر صبیحہ بلوچ ءِ برات ءُ وارس ءِ یل کنائینگ ءِ ھاتر ءَ مروچی بلوچستان ءِ بنجاھی شھر شال ءَ نودربر گلانی نیمگ ءَ زھرشانی روانکے کشگ بوتگ – زھرشانی ءَ نودربراں ھوار جتا جتائیں پگرانی منوگراں بھر زرتگ –

زھرشانی روانک ءَ نودبر گلانی رھشوناں ھوار نیشنل ڈیموکریٹک مومنٹ ءُ بلوچستان نیشنل پاٹی رھشوناں تران کتگ –

زھرشانی ءَ تران کنان ءَ آھانی گوشگ ات کہ بلوچستان یک ھنچیں دمگے کہ ادا انسانی ھکانی لگتمالی سک باز بوگ ءَ انت، وڑ وڑیں ھنر ءُ پندلاں راجی سیاست ءَ ھلاس کنگ انت ءُ نودربر سیاست کہ ھر وڑیں چاگردی ءِ دیمروئی ءِ ھاتر ءَ بنکی کرد ءَ پیلو کنت آئی ءِ سر ءَ بندش جنگ بوگ ءَ انت –

آھانی گوشگ ات کہ بلوچستان زانشجاہ پیسر ءَ چہ بدھالی ءِ آماچ انت – ھمک روچ نودربر وتی بنکی ھکانی ھاتر ءَ زھرشانی کنگ ءَ انت دومی نیمگ ءَ نودربرانی ھاتر ءَ زانشجاہ نوں ترس ءِ نشان جوڑ بوان انت – سدانی کچ ءَ پھازگی کارمند ءُ چیریں کیمراھاں ابید نودربر زانشجاھاں چہ آوار جنگ ءُ بیگواہ کنگ بوگ ءَ انت – ڈاکٹر صبیحہ بلوچ کہ بلوچستان ءِ مھکمیں نودربر گل ءِ سرکماش انت آئی برات ءُ وارس ھمے زورانسری آوارجنی ءِ آماچ انت –

تران کنوکانی گوشگ ات کہ ھر وڈیں مردم ءَ یا آئی ءِ کھول ءَ سیاسی سُرپرانی بنیاد ءَ سزائے آماچ کنگ سنگینیں انسانی ھکانی بگیری دارگ انت – ڈاکٹر صبیحہ بلوچ بلوچ نودربر ھکانی بُرزیں توارے ءُ ھاسکر بلوچستان ءِ وڑیں لگتمالیں چاگرد ءِ تہ ءَ یک زالبولے ءِ اے وڑ دلیری ءَ رھشونی کنگے کرد کابل ءِ ستا انت – زوراکی ءِ اے جاورھالاں آ بلوچستان ءَ ھوار سرجمیں ملک ءَ زالبولانی ھاتر ءَ جھدے یک زندگیں نشان اِنت بلے گوستگیں چار ماھاں ڈاکٹر صبیحہ بلوچ ءَ ھوار آئی کھول ازاب ءِ تہ ءَ انت –
سیاسی سُرپُرانی بنیاد ءَ اے یکجاھی سزا اولی درور نہ انت ناکہ گڈی بیت انت بلے اے امل ءِ ھاتر ءَ یکجاھیں جُھد وھدے لوٹ انت –

زھرشانی ءَ تران کنوکاں گڈسر ءَ گوشت کہ سرجمیں ملکے نودربرگلاں ءُ انسانی ھکانی باسکاں چہ لوٹ کنیں کہ آ صبیحہ بلوچ ءَ اے ازاب ءِ تہ ءَ در کنگے ھاتر ءَ وتی توار ءَ چست بہ کن انت – پرچاکہ صبیحہ بلوچ ءِ وڈیں کِرد زندگیں چاگردانی زینت بنت ءُ آھان ھاموش کنگ ءِ ھر امل ایر جنگی انت

سر بیتگیں ھالانی رد ءَ پنجگور ءِ ایف سی ءِ گاڑی ءِ سر ءَ بمب تراک ءِ آسر ءَ دو رھگوزی بیران،ھمے وڑ ءَ سَے ایف سی ءِ کارندہ زدگ بیتگ اَنت-

گیشیں ھالانی رد ءَ پنجگور ءِ بنجاھی بازار چتکان ءَ پیراملٹری پورس ایف سی ءِ گاڑی ءِ سر ءَ پرپٹ ءَ پِٹیں بمب ءِ ترگ ءِ آسر ءَ دو رھگوزی بیران ءُ ایف سی ءِ سَے کارندہ زدگ بیتگ اَنت –

بیران بیتگیں دویں رھگوزیانی لاش سیول ھپستال پنجگور ءَ برگ بیتگ اَنت کہ اود ءَ یکے ءِ پجار نور اللہ ءِ نام ءَ زانگ بیتگ کہ پنجگور ءِ جھمنند اِنت-

پوج ءَ دمگ انگیر ءَ زرتگ ءُ اُرشکارانی پَٹ ءُ پول بندات کرتگ تراک ءَ پد بازار سرجم ءَ بند کنگ بیتگ –

دمگی مردمانی گوشگ اِنت کہ اُرش ءِ نشانگ ایف سی ءِ گاڑی ءِ سر ءَ بیتگ کہ ءُ زدگ بیتگیں مردمانی بارو ءَ گوشگ بیگ ءَ اِنت کہ آیانی جاور ناگیگ اَنت-

بلوچستان ءَ پوج ءِ سر ءَ بیتگیں اُرشانی زمہ واریاں بلوچ آجوئی ءِ واستا جنگ کنوکیں سلاہ بندیں گل منّگ ءَ اَنت بلء تنی وھدی اے ارش ءِ زمہ واری ھچ گل ءَ نہ زرتگ-

ھمے وڑ ءَ ڈیرہ بگٹی ءَ بند ءُ ساچی کمپنی ءِ واستا کار کنوکیں گاڑی ءِ چیر کرتگیں شورواں گوں تباہ کنگ بیتگ –

ھالانی تہ ءَ گوشگ بیتگ کہ ڈیرہ بگٹی ءِ ھند اوچ ءَ گیس فیلڈ ءِ نزیک ءَ کلیں شوروانی تراک ءَ کچی کینال ءِ واستا ریک بروکیں ڈمپر ءَ تاوان رس اِتگ-

بلوچستان ءَ زورانسری آوار جنیانی درچ یکشل ءَ برجاہ اَنت – گوستگیں شپ ءَ بنجاھی شھر شال ءُ زیارت ءِ ھند منگچر ءَ یکیں کھول ءَ سیادی داروکیں دگہ چار کس زورانسری آوار جنگ ءُ بیگواہ کنگ بیتگ اَنت ھمے وڑ گوستگیں روچاں چہ پنجگور ءَ یک مردمے آوار جنگ ءَ پد بیگواہ کنگ بیتگ –

دمگی مردماں گوں ٹی بی پی ءَ گپ کنان ءَ گشتگ کہ شال ءِ دمگ سریاب کلی سردے ءَ دو برات دوست مھمد ءُ حمزہ ء مھمد عمر گوستگیں شپ ءَ پاکستانی پوج ءُ چیریں ادارھاں آوار جتگ ءُ بیگواہ کرتگ اَنت –

دمگی مردمانی گوشگ اِنت کہ کارندھاں لوگ انگیر کنگ ءَ پد چاردر ءُ چار دیواریاں پامال کنان ءَ لوگ ءَ جاڑیگیں مردم لٹ ءُ کٹ اِش کتگ اَنت ءُ اے دویں مردم گون وت اش برتگ اَنت – برگ بیتگینانی تہ ءَ دوست مھمد گیس کمپنی ءَ ملازم اِنت ھمے وڑ حمزہ رکشہ ھلائینگ ءِ کار ءَ کنگ ءَ بیتگ –

ھمے وڑ ءَ گپتگیں مردمانی دگہ دو سیاد ھم گوستگیں شپ ءَ منگچر ءَ پوج ءُ چیریں ادارھانی کارندھاں آوار جنگ ءَ پد ناشناسیں جاھاں برتگ اَنت کہ چریشی ءَ پد آیانی ھچ ھال نیست اِنت –

منگچر ءِ دمگ کورکی آدم زئی ءَ بیگواہ کنگ بیتگیں مردم دو برات سعد اللہ ءُ مھمد علی ء خان مھمد ھوار اَنت –

اے مردم سعد اللہ مستری، مھمد علی ٹینکر ھلائینت وتی زند ءِ روچ ءَ تیلانک دنت –

اے گپتگیں مردمانی بارو ءَ واکداراں تنی وھدی ھچ گپ پیش نہ کرتگ –

دومی نیمگ ءَ گوستگیں روچاں پنجگور ءَ احسان ء اعظم چتکان بازار ءَ دیم پہ لوگ ءَ روگ ءَ بیتگ کہ ناگتی بیگواہ بیتگ –

دمگی مردماں دی بلوچستان پوسٹ ءَ گوں گپ کنان ءَ گشتگ کہ اے گار بیتگیں ورنا دکانداری ءِ کار ءَ بیتگ کہ بیگاہ ءَ دکانے بند کتگ ءُ لوگ ءَ روگ ءَ بیتگ کہ ڈیتھ اسکواڈ ءِ کارمنداں آوات جتگ ءُ پوج ءِ دست ءَ داتگے –

زانگ بہ بیت بلوچستان ءَ زورانسری آوار جنیانی وئیل دو دھکاں گیش برجاہ اَنت وھد وھد ءِ سر ءَ لھتے مردم یلو کنگ بیتگ اَنت بلے اشانی ھمراھی ءَ دگہ گیش مردم گار کنگ ءِ ھال بیتگ اَنت-

گوستگیں روچاں سی ٹی ڈی ءَ دروگیں میڑاں بیگواھیں مردمانی جنگ ءَ پد بیگواھیں مردمانی کھولاں ترس گیشتر بیتگ اَنت –

آبؔد رھشون

دی بلوچستان پوسٹ

پہ ھون جنگ ءِ کسّھاں کہ شائر ءِ کلم نبشت کنت
مران ءُ ندر باں پہ مادر ءَ وتی چو ھَم نبشت کنت

پہ مرگ ساڑی ئیں گَلانی توکل ءَ چو پُلّ ءُ گواڑگ ءَ
پہ براہ سنگراں رُدیت گوں بوّاں درد ءُ گم نبشت کنت

چو سنجے ءَ بُج ئے دل ءَ چو برمشے ءَ بلان ئے کوھسراں
تئی بُت نگاہ ءَ ایر بیت ، دو ترمپ اَرس اے چم نبشت کنت

تئی گپّ ءُ تران ءُ ٹوک ءُ مھلبیں ھیال ءِ شیرکنی ، منی
کہ کاینت گیر ءِ بادگیر ءِ ساھگ ءَ پہ جَم نبشت کنت

من ءَ بہ بکش اگاں ند ءِ شھار نہ سبز اِتگ پہ تو اُو دوست
پہ نام ءَ تئی وپا ءِ سیرکگاں دل ءِ ھَتم نبشت کنت

بلوچستان ءِ دمگ کیچ ءِ ھند مند ءَ ناشناسیں سلاہ بندیں مردماں اُرش کتگ، اُرش ءَ پوج ءِ سر ءَ تاوانانی گمان کنگ بیتگ –

دمگی مردمانی رد ءَ مند ءِ کوھی دمگ شیپ چار ءَ ناشناسیں مردماں سیمسراں ٹٹ جنوکیں پوجی کارمندانی سر ءَ اُرش کرتگ –

اُرش گوستگیں بیگاہ ءِ ساھے پنچ ءَ بیتگ، اُرش ءَ پوجی کارمندانی تاوان بیگ ءِ گمان کنگ بیتگ اَنت، سرکاری تکاں اے اُرش ءِ راستی دیم ءَ نیتکگ اَنت ءُ نانکہ دگہ سلاہ بندیں گلاں اے اُرش ءِ زمہ وار منّ اِتگ –

اے دمگاں گوست ءَ ھم چوشیں اُرش بیتگ اَنت ءُ کہ آیانی زمہ واری گیشتر بلوچ سلاہ بندیں گلاں منّ اِتگ اَنت –

بلوچ اسٹوڈنس آرگنائزیشن ءِ بنجاھی کمیٹی مراگش آنلائن ترامجاہ زوم ءِ تہ ءَ برجاہ دارگ بوتگ، مراگش ءِ بنجاھی سرکماش ظریف رند ءِ سرکماشی ءَ برجاہ دارگ بوتگ وھدیکہ مراگش ءِ کار سیکرٹری جنرل ءَ چلائینتگ انت –

مراگش ءِ مول مراد گوستگیں بنجاھی پتر ءِ پیسلہ رِد ءَ راجی کونسل سیشن ءِ درگت ءَ چار ءُ بچار ءُ پیسلھانی سر ءَ چار ءُ بچار کنگ – کہ آئی ءِ تہ ءَ بنجاھی رھشوناں بھر زرتگ کونسل سیشن جتائیں جتائیں جیڑھانی سر ءَ باوست کنگ بوتگ –

گل ءِ اے مراگش ءَ سرکماش زریف رند ءَ گل ءِ کار ءُ انوگیں دیمروئی ستا کتگ گوشتگ کہ بی ایس او ءَ نگیگیں جاورھالاں تہ ءَ نزریات ءِ دامن داشتگ ءُ بلوچ چاگرد ءِ کاراں کنگ انت ستاہ ءِ پھر انت – ھمود ءَ کہ سیاسی بے وانکی ءُ ترس وتی گڈی سر بوتگ ھمود ءَ بی ایس او سنگتانی پگری ءُ املی جھد امیت ءِ چراگ انت –

سرکماش ءَ دیمتر ءَ گوشتگ کہ اے وھد ءَ بی ایس او ءِ بیست ءُ دومی کونسل سیشن گل ءِ دیمروئی ءَ جوانیں کردے پیلو کنت ءُ ادارہ ءَ مھکم جھد شاھگانتر بیت – بی ایس او ءِ جھد مروچی یکرندے پد ءَ نودربراں سیاست ءِ نیمگ ءَ آرگ ءَ سوبین بوتگ کہ وت راجدپتری سوبمندی ئے –

مراگش ءَ کونسل سیشن درگت ءَ باوست بوت ءُ بازیں رپورٹ دیم ءَ آرگ بوت وھدیکہ بنجاھ ءِ تر ءُ تابی شیڈول ھم ترتیب دیگ بوت ءُ کونسلران گچینی ءِ درگت ءَ ھم گپ بوت اشی ءَ ابید سیشن ءِ ھاتر ءَ فنڈنگ ءِ درگت ءَ ھم جوانیں شون ٹھینگ بوت –

بنجاھی پتر ءَ بیست ءُ دومی راجی کونسل سیشن ءُ پنجاہ ءُ چارمی تاسیس بنام بی ایس او ءِ پھازگ ءُ بنام شھید کامریڈ ھانی بلوچ ءِ نام ءَ ایرکنگ ءِ پیسلہ ءَ درسانی نیمگ ءَ چہ منّگ بوت –

بنجاھی مراگش ءَ اے گیشینگ بوت کہ بیست ءُ شش ءُ بیست ءُ ھپت نومبر ءَ بند اجلاس وھدیکہ بیست ءُ ھشت نومبر ءَ سوگندی مراگش ءُ جلسہ عام شال ءَ کنگ بیت انت کہ درسیں دیمروئی لوٹوکیں گل ءُ نودربر گلانی رھشون داوت دیگ بنت –

بلوچستان ضلع کیچ ءِ بُنجاھی شھر تربت ءَ شمبے ءِ روچ ءَ شھید فدا چار راہ ءِ سر ءَ جماعت اسلامی بلوچستان ءِ جنرل سیکرٹری مولوی ھدایت الرحمن بلوچ ءِ سروکی ءَ یک راجی مُچّی یے اَڑ داتگ-

مُچّی ءِ تہ ءَ سیمسر بندی ءَ ھوار مکران ءَ دگہ راجی جیڑھانی سر ءَ شھریاں وتی ھیال لیکہ ایر کتگ اَنت-

مُچّی ءَ باپاری مردماں ھوار دگہ پڑ ءِ مردماں بھر زرتگ-

ھمے وھد ءَ ھدایت الرحمن بلوچ ءَ گپ ءُ تران کنان ءَ گْوشتگ کہ گوادر ءَ دریاورد ، سیمسر ءِ بندی ءُ دگہ پانزدہ لوٹ منّگ نہ بوتاں گُڑا گوادر ءَ گوادر ءِ پورٹ ءُ پی سی ھوٹل ءَ رؤکیں دگ ءِ سر ءَ 30 روچ ءَ زھرشانی برجاہ دار ایں-

آئی ءَ گْوشتگ کہ زھرشانی ءِ تاریک ءِ جار ءَ باند ءَ یکشمبے ءِ روچ ءَ کنگ بیت-

آئی ءَ گْوشتگ کہ ٹوکن ءِ سسٹم ھلاس کنگ بہ بیت سیمسر ءَ باپاری ءِ ھاتر ءَ سیمسر سرجم ءَ پچ کنگ بہ بیت ءُ وتسریں چیک پوسٹ چست کنگ نہ بوت اَنت گُڑا 16 نومبر ءَ تربت ءَ دوبر یک راجی مُچّی یے کنگ بیت ءُ وتی لوٹانی ھک ءَ کمشنر مکران گِس ءِ دیم ءَ دگ بند کن ایں ءُ زھرشانی ءِ جار ءَ جن ایں-

ھمے میان ءَ شھریاں گوشتگ کہ ٹوکن ءِ نزام ءَ ھچ وڑ کبول کنگ نہ بیت ، ایف سی ءُ واجکار تھنا وتی مردماں گوازینگ ءَ اَنت –

آھاں گْوشتگ کہ اشی ءِ بگیری ءَ زھرشانی گیش کنگ بیت-

کاؤنٹر ٹیررازم ڈیپارٹمنٹ سی ٹی ڈی ءِ یک دگہ کاروائی دروگ کنگ بوتگ، بیست ءُ دو اکتوبر ءِ شپ ءَ سی ٹی ڈی ءَ مستونگ ءَ کاروائی ءِ میان ءَ تیرگواری ءَ نھ مردمانی جنگ ءِ ٹاہ داتگ ات آھانی تہ ءَ یک مردمے ءِ پجار بوتگ ات کہ پیسر ءَ پاکستانی پوج ءَ زورانسری اوار جتگ ءُ بیگواہ کتگ –

دی بلوچستان پوسٹ پتر ءَ اے درگت ءَ پٹ ءُ پول کتگ گڑا کھول ءُ دمگی مردماں چہ ھمے سرپدی رس اتگ دروگیں میڑ ءِ نام ءَ جنگ بوتگیں مردمانی تہ ءَ یار محمد نامیں مردمے ھم ھوار انت –

یار محمد ء ڈاڈا خان بنکی ءَ مارواڈ ءِ جھمنند بوتگ کہ دمگ ءَ پوجی لشکر کشی ءَ چہ شال ءَ شُتگ –

یار محمد شال ءِ دمگ ھزار گنجی سال دوھزار ءُ شانزدہ ءَ مارچ ءِ ماہ ءَ زورانسری آوار جنگ ءُ بیگواہ کنگ بوتگ –

کھول ءِ مردماں ٹی بی پی ءَ گوں تران کنان ءَ گوشتگ کہ یار محمد شپ ءِ ادار نھ ءَ پاکستانی پوج ءُ چیریں ادارھانی کارمننداں زورانسری آوار جتگ ءُ ناشناسیں جاھے ءَ برتگ آئی ءَ چہ پد ھچ وڑیں ھال ءُ اھوالے نیست-

زانگ بہ بیت سَے روچ ساری سی ٹی ڈی ءِ جارکش ءَ ٹاہ داتگ ءُ گوشتگ ات کہ مستونگ ءِ دمگ روشی آپریشن کتگ ءُ تیرگواری ءَ نُھ مردم جنگ بوتگ اَنت کہ آھانی سیادی بلوچ لبریشن آرمی، بلوچستان لبریشن فرنٹ ءُ یونائیٹڈ بلوچستان آرمی ءَ چہ بوتگ –

اے دیم ءَ اتکگیں اولی وئیل نہ انت اشی ءَ پیش ھم سی ٹی ڈی ءَ زورانسری آوار جنگ بوتگیں مردم کُشتگ انت – مستونگ ءَ جنگ بوتگیں مردمانی مزنیں مید ءُ ریش ءُ دروشم ءَ چہ پددر بیت کہ پیسر ءَ چہ آوار جنگ بوتگیں مردم بوتگ انت ءُ آھانی سر ءَ تیر جنگ ءُ کُشگ بوتگ انت –

دومی نیمگ ءَ بیگواھیں مردمانی ترس گیشتر انت وھدیکہ کھولانی مردم ھم اے مردماں چارگ ءِ اجازت دیگ بوگ ءَ نہ انت