TBP Balochi

دی بلوچستان پترھال ءَ سر بیتگیں ھالانی رد ءَ انسانی ھکانی باسک راشد حسین بلوچ ءِ لوگ ءَ ھوار آئی ءِ سیادانی لوگانی سر ءَ پاکستانی پوج ءُ چیریں ادارھانی کارمنداں گوستگیں شپ ءَ بیڑ برتگ، ھمے وھد ءَ پت ءُ ماتانی لَٹ ءُ کُٹ کنگ ءَ پد راشد حسین ءِ پِس، کسان سالیں براتزتک ءَ ھوار زامات بیگواہ کنگ بیتگ اَنت –

کارندھاں گوستگیں شپ ءَ نیول کالونی ءَ کراچی ءَ راشد حسین ءِ پِت ءُ ماتانی لوگ ءِ سر ءَ بیڑ برتگ کہ اود ءَ پِت ءُ ماتاں ھوار بازیں مردم لَٹ ءُ کُٹانی نشانگ کرتگ اَنت ءُ نُھ تبک ءِ نودربر راشد ھسین ءِ براتزتک شاہ میر شفیق ءُ آئی ءِ پس ءِ ھمراھی ءَ دزگیر کرتگ اَنت ءُ ھمے وھد ءَ راشد حسین ءِ زامات علی جان ء تاج مھمد ھم دزگیر کرتگ ءُ ناشناسیں جاھاں برتگ اَنت –

دمگ ءِ مردماں گوں ٹی بی پی ءَ گُشتگ کہ دزگیر کنگ بیتگیں کسان سالیں نودربر شاہ میت شفیق ءَ پس مروچی یلو بیتگ اَنت بلے راشد حسین ءِ زامات علی جان انگت بیگواہ اِنت علی جان انسداد پولیو ءِ کار ءِ ھواری ءَ سی ایس ایس ءِ چکاس ءِ چِن ءُ لانچ ءَ بیتگ –

ھمے درگت ءَ راشد حسین ءِ گوھار فریدہ بلوچ ءَ ٹی بی پی ءَ گوں گپ کنان ءَ گوشتگ کہ گوستگیں شپ ءَ پاکستانی پوج، چیریں ادارہ ءُ سیاھیں ماسک بستگیں کارمنداں بازیں کچے ءَ نیول کالونی ءَ منی مات ءُ پت ءُ زامات یکیں لوگ ءَ نندوک بیتگ اَنت بیڑ اش برتگ، بیڑ برتگیں کارندھاں منی پِت ءُ مات زھنی ءُ جسمانی لَٹ ءُ کُٹانی آماچ کرتگ اَنت وھدیکہ چاردہ سال ئیں براتزتک لَٹ ءُ کُٹ کنگ ءَ پد منی پت ءُ براتزتک وتی ھمراھی ءَ برتگ –

فریدہ بلوچ ءَ گُشتگ کہ پاکستانی پوج ءُ چیریں ادارھانی کارمنداں نیول کالونی ءَ منی زامات ءِ لوگ ءَ بیڑ برتگ ءُ اود ءَ لَٹ ءُ کُٹ کنگ ءَ زامات علی جان وتی ھمراھی ءَ بیگواہ کرتگ کہ انگت ءَ بیگواہ اِنت –

آئی ءَ گُشتگ کہ ھردوکیں لوگاں کارمنداں پروشت ءُ پروش، مباھل، لیپ ٹاپ ءَ ھوار سھر ھم دز اِتگ ءُ برتگ اَنت –

فریدہ بلوچ ءَ گُشتگ کہ سیاد ءُ وارسانی باز باز جُست ءُ پرس کنگ ءَ پد بیڑ برتگیں مردماں جست کنگ ءَ ابید لوگ ءَ دور کرتگ ابید ءِ جست ءَ ھچ گپ نہ کرتگ ءُ ھچ کانودی کاگد پیش نہ برتگ –

زانگ بہ بیت راشد ھسین بلوچ دو سال ءُ شش ماہ ءَ گیش زورانسری ءِ آماچ اِنت – راشدحسین ھما وھد ءَ بیگواہ کنگ بیتگ کہ آ ارب امارات ءَ جھمنند بیتگ کھول ءِ گُشگ اِنت کہ آ ارب امارات ءِ چیریں ادارھاں سیادانی دیم ءَ آوار جتگ ءُ برتگ چریشی ءَ پد ھمے ادارھاں راشد حسین وتی ھمراھی ءَ آورتگ ءُ پاسپورٹ ءِ لوٹ کرتگ –

کھول ءِ گُشگ اِنت کہ پاسپورٹ ءِ گرگ ءِ بے سوبی ءَ پد ارب امارات ءِ سرکار ءَ راشد حسین داں شش ماہ ءَ داشتگ ءُ گیرکانودی رنگ ءَ پاکستان ءَ برتگ ءُ داں انگت ءَ آ بیگواہ اِنت –

بلوچ راجدپتر ءَ مارا چوشیں تاک دز نہ کپ ایت جنسی زد ءِ سر ءَ زالبولانی جتائی بہ بیت – ماما قدیر بلوچ

شال ءِ پریس کلب ءِ دیم ءَ برجاھیں زھرشانی بنجل ءِ ھرتال ءَ چار ھزار ءُ سَے سد ءُ نود ءُ سَے روچ سرجم بیتگ – مروچی نودربر رھشون ڈاکٹر مھرنگ بلوچ، شلی بلوچ ءَ ھوار جتا جتائیں پھناتاں بندوکیں مردم اتکگ ءُ پدردی اش درشان اِتگ –

وی بی ایم پی ءِ وائس چیئرمین ماما قدیر بلوچ ءَ اتکگیں مردمانی میان ءَ گپ کنان ءَ گوشتگ کہ مردین ءُ زالبولانی جسمانی ءُ نپسیاسی زد جاڑیگ اِنت اے راستی اِنت کہ مردین چہ زالبولاں جسمانی دروشم ءَ گیشتر مھکم اَنت ءُ پھل کنوک ءُ گرز دوست بنت ھمیشی ءِ ھواری ءَ بروبری ءَ زالبول ھروھد ءَ روھانی ءُ زھنی دروشم دز کپ اَنت –

آئی ءَ گُشتگ کہ راجدپتر ءَ زالبول ھمک تکاں جوان جوانیں کردانی پیلو کنگ ءَ گندگ بیتگ اَنت بلوچ زالبولانی ھمت ھچ رنگ ءَ کسے ءَ کم نہ اَنت مئے کلاسیکی شائری ءِ تہ ءَ ھمے رنگ ءَ زالبولانی کرد گندگ ءَ کیت اِنت ھروھد ءَ وتی ننگ ءُ ناموس ءِ واستا گرانکدریں ھدمت ءِ پیلو کرتگ اَنت – مروچی لھتے شیپتال بلوچاض پردہ یا دومی چیزاں بندوک کنگ ءِ جھد ءَ اَنت- بلوچ راجدپتر ءَ اے وڑیں ھچ مسال نیست بلکیں راستیں بلوچ راجدپتر ءَ مارا اے وڑ ءَ گندگ ءَ نئیت اِنت جنسی زد ءِ سبب ءَ زالبولانی جتائی بہ بیت یا زالبول چادر ءُ دیواری یا چُل ءَ داں بندوک بہ بیت مروچی ھما رنگ ءَ بلوچ زالبولاں ھنر ءُ پندلے ءَ دیوال ءَ جنگ ءِ جھد ءَ کنگ ءَ اَنت راستی ایش اِنت کہ اے زورگر ءِ ترس اِنت آ بلوچ زالبولانی راستی ءَ سرپد اِنت پرچاکہ بلوچ زالبول ھروھد ءَ گھگیری ءَ دیر نہ کنت –

ماما قدیر بلوچ ءَ گُشتگ کہ ھنچش وتگڑیں بازیں ٹیکودار ھروھد ءَ گیرت ءِ اوگام ءَ جن اَنت بلے راستی ایش اِنت ھمود ءَ ریاست بلوچ زالبولانی سر ءَ زُلم ءُ زوراکیاں کنگ ءَ اَنت ھمود ءَ آیاں بے تواری ءَ دپ بند کرتگ پرچا آ زرینہ مری ءُ حنیفہ بگٹی ءِ بارو ءَ ھچ نہ گوش اَنت؟ –

ٹی بی پی پتر ءَ سربوتگیں ھالانی رِد ءَ تمپ ءِ دمگ گومازی ءَ شنکن بازار ءَ مروچی مگرب ءِ وھد ءَ پاکستانی پوج ءَ بیڑ برتگ ءُ یک مردمے زورانسری آوار جتگ ءُ گوں وت برتگ – آوار جنگ بوتگیں مردم ءِ پجار راشد ء موسی نام ءَ بوتگ – دمگی اھوالکار ءِ رِد ءَ راشد ءِ ھواری ءَ دگہ یک مردمے مکبول ء ابراھیم ھم آوارجنگ بوتگ بلے پد ءَ رند ءَ یل کنگ بوتگ –

دومی نیمگ ءَ تمپ ءِ کوھی دمگ ءَ مروچی دو روچ انت کہ پاکستانی پوج ءِ انگیر ءَ انت دامگ ھم بند کنگ بوتگ اَنت کہ ھچ سرجمیں ھال سربوگ ءَ نہ انت –

اھوالکار ءِ رِد ءَ تمپ ءِ دمگ میرآباد بالیچہ ءِ کوھی دمگ گھاٹی، انجیرکھن، گازن گوستگیں دو روچ انت کہ پوجی انگیر ءَ انت، پوج مزنیں کساسے ءَ دمگ ءَ ساڑی انت –

اھوالکار ءِ رِد ءَ پوج ءِ نیمگ ءَ کوھانی تہ ءَ لشکر کشی برجاہ انت –

ھمے وڑ چہ پنجگور ءَ سربوتگیں ھالانی رِد ءَ مروچی سھب ءِ ادار نُھ ءَ پاکستانی پوج ءِ جنگی بالگرداں کیلکور ءِ دمگ چاب، ھاجی آباد ءُ چپ ءُ چاگردی دمگاں شیلنگ کرتگ – دومی نیمگ ءَ کولواہ ءِ دمگ کاشت ءَ پوج ءِ پیادگ ٹولی کیلکور ءَ شُتگ اَنت-

دمگی مردمانی رِد ءَ کیلکور ءَ یکرندے پد ءَ مزنیں لشکر کشی ءِ چِن ءُ لانچ بوگ ءَ انت –

زانگ بہ بیت بلوچستان ءِ جتاجتائیں دمگاں پوجی لشکر کشی ءِ ھال پیداک انت چیزے روچ پیسر کیچ گومازی ءَ پوج ءِ دست ءَ کیگد بلوچ ءِ لٹ ءُ کُٹ پد بیرانی ءِ ھال ھم اتکگ انت –

بلوچ آجوئی لوٹوکیں گل بی این ایم ءِ رِد ءَ کیگد سیادی گون آھانی گل ءَ بوتگ ءُ کیگد پاکستانی پوج ءِ لٹ ءُ کٹ ءَ پد شھید بوتگ –

وھدیکہ بلوچستان ءَ بیگواھیں مردمانی گل وائس فار بلوچ مسنگ پرسنز رھشون ماما قدیر بلوچ ءِ گوشگ انت کہ بلوچستان ءِ چپ ءُ چاگردی دمگان پوجی لشکر کشی برجاہ انت بازیں مردم ءِ زورانسری آوار جنی ءُ بیگواھی ھال ھم آیگ ءَ انت –

سر بیتگیں ھالانی رد ءَ گوستگیں سپ ءَ تربت ءِ دمگ شھرگ ءَ ناشناسیں مردمانی تیرگواری ءَ دو کس بیران بیتگ اَنت –

بیران بیتگیں مردمانی پجار شاکر ء غلان سرور ءُ زاھد ء دھکان کھور ءِ ناماں زانگ بیتگ اَنت-

دمگی مردمانی رد ءَ شاکر گوستگیں وھداں یک سلاہ بندیں گلے ءِ سرمچار بیتگ ءُ آئی ءَ وتی سلاہ چگل داتگ اَنت ءُ دومی کس شاکر ءِ ھمراہ بیتگ ءُ آ اے وھد ءَ آئی ءِ گوت ءَ نندوک بیتگ –

دومی نیمگ ءَ بلوچستان ءِ آجوئی ءِ واستا جنگ کنوکیں گل یونائیٹڈ بلوچ آرمی ءَ ھردوکیں مردمانی کوش ءِ زمہ واری منّ اِتگ اَنت ءُ آئی ءَ گُشتگ کہ گوستگیں شپ ءِ ساھت دہ ءَ گل ءِ سرمچاراں شھرک ءَ تیرگواری کرتگ ءُ سلاہ چگل دیوکیں شاکر پنام ءِ شاھین کُشتگ –

گل ءِ جارکش مرید بلوچ ءَ گُشتگ کہ شاکر پنام ءِ شاھین گوستگیں وھداں گل ءَ گوں بندوک بیتگ ءُ اشی ءَ ھوار آ آجوئی لوٹوکیں گل بی آر اے ءُ بی ایل ایف ءِ پتر ءَ ھم بیتگ –

آئی ءَ گُشتگ کہ چریشی ءَ پد آ کولواہ ءِ ھند بدرنگ ءَ پوجی بنجل ءَ شتگ ءُ وتی سلاہ ءِ چگل داتگ اَنت ءُ ڈیتھ اسکواڈ ءَ ھوار بیتگ ءُ بلوچانی ھلاپ ءَ پُرکار بیتگ –

آئی ءَ گُشتگ کہ آجوئی لوٹوکیں مردمانی رندگیری ءَ بازیں رنداں پاکستانی پوج ءِ ھمراھی ءَ لشکر کشیاں ھم گندگ بیتگ ءُ دمگ ءَ دُزی ءُ ڈنگیاں ھم دزمانجن بیتگ –

آئی ءَ گُشتگ کہ شاکر پنام ءِ شاھین ءِ یک سنگتے کہ آئی ءِ نام زاھد ء دھکان کھور ھمے اُرش ءَ جنگ بیتگ آ بے گناھے بیتگ ءُ آئی ءَ شاکر ءِ رکینگ ءِ جھد کرتگ ءُ چریشی ءِ سر ءَ آ بیران بیتگ ءُ گل زاھد دھکان کھور ءِ کھول ءِ گون ءَ درپدردی درشان کنت –

سر بیتگیں ھالانی رد ءَ اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 171 تالبانی جنگول کُشگ ءُ 143 سکی ءَ ٹپی بیتگ اَنت۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 171 تالبان جنگول کُشتگ ءُ 143 سک ٹپی ھم کُتگ اَنت، ایشی ءَ ابید اگان راجی لشکر ءَ تالبان ءِ دست ءَ دگ ءُ راھانی سر ءَ چیر ءُ بار کُتگیں بمب ءُ شور ھم پَٹ اِت ءُ ناکار کُتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت کُنر، لوگر، پکتیا، پکتیکا، گزنی، جوزجان، پریاب، ھِلمند، کندوز ءُ کاپیسا ءِ ھند ءُ دمگاں کُتگ اَنت-

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 189 تالبان جنگول کُشگ ءُ 138 سکی ءَ ٹپی ھم بوت اَنت۔ اوگان راجی لشکر ءَ ھمے جنگی اُرش کندھار، زابُل، ھیرات، جوزجان ءُ ھِلمند ءِ ھند ءُ دمگاں کُتگ اِت اَنت۔

دومی نیمگ ءَ تولو نیوز ایجنیسی ءِ رِد ءَ اوگان راجی لشکر ءَ بیست ولایتاں وتی تْرُندیں جنگی اُرش برجاہ کُتگ اَنت ءُ ماں اِے تْرُندیں جنگی اُرشاں جنگی بالیگراب ھم کارمرز بیگ ءَ اَنت ءُ اِے درگت ءَ راجی پھزگ کارگشاد واجہ پواد امن ءَ وتی جارے ءَ گْوشتگ ناشرکاریں تالبان ءِ سر ءَ گوں بالیگرابانی بمب گْواری ءَ اوگان راجی لشکر اُرش برجاہ اَنت چریشی ءَ تالبان ءِ بیرانی سک گیش اِنت ءُ ھمُک روچ یک یکی ءَ کوچگ ءُ دمگ چہ تالبان ءِ دست ءَ آجو بوگ ءَ اَنت۔

ننشتانک: منی گار بوگ ءَ ساری

نبشتہ کار: براھیم گُؔل

    (ھپتُمی بَھر)

دی بلوچستان پوسٹ

مِھروان! من ءُ تو ھما وش بَھتیں کوم ایں کہ منی تئی زُبان جھان ءِ ھر کُنڈ ءُ دمگاں زندگ اِنت،اَنچو کہ ” اھمد شاہ ابدالی ءَ چہ بلوچ ھان میر نسیر نوری (ھکومت کنگ ءِ اھد 1755 تا 1795) ءَ پول ( جُست ) کُت  کہ تئی مُلک ءِ سیمسر داں کُج ءَ کُج ءَ سر اِنت؟ گُڑا میر نسیر ھان نوری ءَ اے وڑ ءَ پسّہ دات کہ داں ھر “ھما ھَند ءَ یک بلوچے نِندوک اِنت ھمود ءَ منی مُلک ءِ سیمسر اِنت-

گُشگ ءِ مول ءُ مُراد کہ تو ھما وش بَھتیں راج ءِ پرزند ءِ کہ تئی جھان ءِ ھر کُنڈ ءَ یک جِتائیں پجّارے ھست ، پرچا کہ جھان ءِ چُشیں کُنڈ ءُ دمگے نیست کہ اود ءَ تو بلوچے مہ گِند ئے یا بلوچے جامِنند مہ بیت-

مِھروان! پد ءَ تئی زُبان اَنچو مزن ءُ سنگین انت کہ جھان ءِ ھر کُنڈ ءِ مُلکانی چم تئی زُبان ءَ سَک اَنت ، پرچا کہ تو یک اَنچیں زُبانے یے مالک ءِ کہ تئی لبزی مانا ءَ اگاں مردُم سرپد بِہ بنت گُڑا لرزگ ءَ بِنا کنت،اگاں ما بِہ چار ایں کہ اے وھد ءَ بلوچے کوہ ءِ البُرز ءَ نِندوک بہ بیت گُڑا آ سرجمیں ایران ءِ ھزگاریں مردُماں پُل اِیت ءُ وارت بَلے کَس ھِچ ئِے گْوشت اوں نہ کنت ، چی ءَ کہ بلوچ ھما کوم اِنت ، ھما راج اِنت ، ھما کَس اِنت کہ وتی ندّر کنگ ءَ پہ ھِچ نہ تُرس اِیت ۔

مھروان! ترا یات کنت گِند ئے کہ کامریڑ اسلم ءَ وتی زھگ رِھان گوں بِچکنداں پِدائی کُت ءُ پہ وتن ندّر کُت-

ترا یات کنت کہ سَید زھور شاہ ھاشمی پہ زُبان ءَ وتی جِند ندّر کُت، مِھروان! پد ءَ تئی بلوچی زُبان بلوچستان ءِ زیبائی اِنت ءُ ترا الّم اے زیبائی داں مھشر نزّآرگی اِنت ءُ پلگارگی اِنت ۔

جاھے ءَ گوس بَھار وتی کِتاب ءِ تہ ءَ نبشتہ کنت کہ ” اولی رند ءَ انگریز ماں 1838 ءَ بلوچستان ءَ اتک ، آئی اولی بھانہ اِیش اَت کہ آ اوگانستان ءِ پُروش وارتگیں باداہ کہ اے وھدی بلوچانی باھوٹ اَت ، آئی اگبال رسی ءَ کن انت انگریزاں اے گپ ءِ سما اَت کہ داں وھدے کہ بلوچستان ءَ وتی دست ءَ میار انت گُڑا ھچبر اوگانستان ءُ ایران ءَ پروش دات نہ کن ایں ،پرے مراد ءِ دست آرگ ءِ ھاتر ءَ الّمی اَت کہ انگریز بلوچان ءَ زیر دست بِہ کن اَنت ءُ اے کار ھما وھد ءَ بوتگ اَت کہ بلوچانی تہ ءَ ناتپاکی دور بہ دے انت پرے سُستی ءُ بےسوب کنگ ءِ کِشک ءَ انگریزاں زُبان ءِ بُنیاد ءَ براھوی بلوچاناں یک جِتائیں راجے کرار دات داں کہ بلوچ راج وت ماں وت سر ءُ جیگ بِہ بنت،اے وڑ کہ بیت گُڑا پروش دیگ بیت ءُ بلوچستان دیم ءَ پد ءَ ایران ءُ اوگانستان ءَ دَیگ بیت پرچا کہ اود ءَ بلوچ سک باز بوتگ ، اَنچو 1998 ءَ کہ ایران ءَ  ھژدہ لک مردُم نِندوک اَت ءُ اوگانستان ءَ ھپت لک مردُم ، بِزاں بلوچانی سکّیں مزنے کُٹمبے نِندوک بوتگ اَت –

مِھروان ! تئی دست بےکساس شاھگان اِنت ءُ جھان ءِ ھر کُنڈ ءَ تئی دست مان اِنت،اگاں تو زُبان ءِ مھار ءَ تُرند بِہ دار ئے گُڑا تئی زُبان زوت چہ ھزاباں در کَیت ءُ مُچ زُبانی پاگواجہ بیت۔

مِھروان! تو بلوچستان ءِ ھما مُھکمیں پرزند ءِ کہ ترا چو سَید ءُ سبا ءِ وڑ ءَ پہ زُبان ءَ ندّر بوگ اِنت ، منی گار بوگ ءَ رند ترا تئی زُبان بڈ ءَ زورگ ءُ روگی اِنت۔

پد ءَ انیگیں دور ءَ تئی زُبان ءِ سر ءَ بازیں مُلکے بش بش وارت ، چو مہ بیت کہ تو پہ ساڑا رَد بِہ کپ اِت ءُ چو اوگانستان ءُ ایران ءَ بِہ بَہ ئے ۔

اِنّاں مِھروان ! ھرچی بیت بِلّے بیت بَلے ترا چو بنگال ءَ مُدامی مُھکم بوگی اِنت ءُ زُبان دیم ءَ آرگی اِنت-
روان اِنت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءَ آپ ءُ بجلی ءَ ھوار زند ءِ دگہ تکانی آسراتیانی نہ بوگ ءِ سر ءَ شھریاں زھرشانی بندات کرتگ ءُ چریشی ءُ گوادر شھر ءَ ھوار سی پیک ایکسپریس وے ءِ کار اش بند کرتگ –

پشمبے ءِ سھب ءَ شھر ءِ مزن مزنیں دگانی سر ءَ شھریاں ٹائر مانداشتگ ءُ ھر وڑیں روگ ءُ آیگی مھتل کرتگ اَنت ءُ بازیں جاھاں نندانک برجاہ اَنت ءُ نندانکی زھرشانیاں زالبولانی ھم بازیں کچے ءَ گندگ ءَ کیت اِنت –

دی بلوچستان پوسٹ پترھال ءَ سر بیتگیں ھالانی رد ءَ جاوید کمپلیس، مرین ڈرائیور ءِ سر ءَ شھریاں بازیں کچے ءَ ٹائر مانداشتگ ءُ زھرشانی کنگ ءَ اَنت –

زھرشانی کنوک شھریاں سرکار، سیاسی رھشونانی ھلاپ ءَ گم ءُ زھر درشان کنگ ءَ بے سوبی ءَ جیڑگانی نہ گشینگ ءِ تھمت جنگ ءَ اَنت ءُ زھرشانی کنوکاں اے گپ تچک کرتگ ءُ گُشتگ کہ تنا وھدی تانکہ بجلہ ءُ آپ سرجم نہ بنت اے زھرشانی برجاہ بیت ءُ آپ ءِ نہ بوگ ءِ سر ءَ ما یکدم تنگدست اِنت ءُ ما ٹوھیں جیڑھانی آماچ اِنت –

دمگی مردمانی رد ءَ زالبولانی بازیں کچے ءَ نیشنل پاٹی ءِ نیمگ ءَ جتگیں نندانک ءُ اتکگ ءُ گشتگ کہ شما وتی نندانک ءَ ھلاس بہ کن اِت ءُ ما سَے روچاں اد ءَ زھرشانی کنگ ءَ اِنت کس مئے جست کنگ ءَ نیتکگ اَنت ءُ مروچی شما وتی سیاست ءِ چرپیں روگن جنگ ءَ اتکگ اِت؟

آیاں گُشتگ کہ بیرک ءَ ایر گیج ایت ءُ ابید ءِ پاٹی ءَ نندانک ءَ بہ نند ایت ءُ ما سرپد بہ ایں شما گوادر ءِ گون ءَ ھوار اِت –

مروچی ءِ بندش جتگیں ھرتال ءَ ھواریں آسیہ بی بی ءَ گُشتگ کہ گوادر مروچی ھمگرنچ اِنت پاٹیاں یل بہ کن اِت ءُ گوادر ءَ بہ رکین اِت –

آیاں گُشتگ کہ دمگی مردم تن ءَ مرگ ءَ اَنت اے کجام دیمروئی اِنت؟

آیاں گُشتگ کہ اد ءَ دراھیں سیاسی ءُ نیکراھی مردماں باید ھمگرنچ بیگ ءُ گوادر رکینگی اِنت –

نوکتریں ھالانی تہ ءَ گُشگ بیتگ کہ شھر ءِ بازیں جاھ بند اَنت ءُ بازیں کچے ءَ مھلوک زھرشانی کنگ اِنت ءُ سی پیک ایکسپریس وے ءِ کار ھم بند کنگ بیتگ –

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ چھبار ءَ ھواریں دمگ جماعت زئی ءَ یک جنکویں زھگے آپ ءُ کپتگ ءُ بیران –

بیران بیتگیں زھگ ءِ نام انیتا ءِ نام ءَ زانگ بیتگ کہ زھگ ھما وھد ءَ آپ ءَ کپتگ آ اود ءَ لیب ءَ بیتگ ءُ چریشی ءِ آ شِترتگ ءُ ھوٹگ ءِ تہ ءَ کپتگ ءُ بیران بیتگ –

دمگی مردمانی گوشگ اِنت ھوٹگ یلو در گلو اَنت ءُ چریشی ءِ سبب ءَ زھگ کپگ ءُ بیران بیگ ءَ اَنت –

آیانی گُشگ اِنت سرکار ءِ نیمگ ءَ سیستان ءُ بلوچستان ءَ دیگ بیتگیں آب نوشی ءَ ھوٹگانی سر پچ اِنت ءُ آیانی کش ءَ گور ٹٹ ھم نہ اَنت چریشی ءِ سبب ءَ کسانیں زھگ ھمے رنگ ءَ آپ ءَ کپ اَنت ءُ بیران بنت –

روکپتی بلوچستان ءَ ھمک سال بازیں کچے ءَ زھگ ھمے وڑ ءَ ھوٹگانی تہ ءَ کپگ ءُ بیران بیگ ءَ اَنت کہ گوستگیں پنچ سالانی تہ ءَ کساس بیست ءَ گیش زھگ آپ ءَ کپتگ ءُ بیران بیتگ اَنت –

بلوچستان ءِ دمگ پنجگور ءَ پولیس ءَ ڈنگانی سر ءَ بیڑ برتگ ءُ دو ڈنگ دزگیر کرتگ ءُ آیانی گور ءَ سِلاہ دستیگ کنگ بیتگ اَنت –

پنجگور پولیس ءِ رد ءَ پنجگور تسپ ءَ بیڑ برتگ ءُ اود ءَ دو ڈنگ اعجاز پنام ءِ پپو ءُ سمیر نامیں دو کس دزگیر کرتگ اَنت آیانی گور ءَ سِلاہ ھم دستیگ کرتگ اَنت –

پنجگور ایس پی کیپٹن ریٹائر زوھیب مھسن ءِ سروکی ءَ ڈی ایس پی اھمد الی ءُ ایس ایچ او امیر جان ءِ ھمراھی ءَ پنجگور تسپ ءَ بیڑ برتگ ءُ اود ءَ اعجاز پنام ءِ پپو ء عبدالطیف جھمنند تسپ کہ پنجگور ءَ بازیں لوگانی تہ ءَ دُزی ءُ ڈنگیاں ھوار بیتگ –

پولیس ءِ رد ءَ بیڑی ءِ وھد ءَ اعجاز پپو ءَ تیرگواری کرتگ ءُ چریشی ءَ پولیس ءِ یک کارمندے زدگ بیتگ ءُ ھمے وھد ءَ پولیس ءَ اعجاز پپو ءُ آئی ءِ ھمراہ سمیر دزگیر کرتت اَنت –

پولیس ءِ رد ءَ آیانی گور ءَ دو کلاشنکوپ، گرنیڈ لانچر پِٹ اش بیتگ اَنت ءُ یک سد ءُ ھپتاد ءُ دو دانگ تیر، یازدہ دانگ چِل ملی میٹر گرنیڈ ءُ یک جیمر ءِ دستیگ کرتگ اَنت –

پولیس ءِ رد ءَ ھردوکیں جرمکانی نام ءَ پولیس ءِ سر ءَ اُرش، سرکاری رکاوٹ، ناشرکاری، سلاہ آرڈیننس ءُ ایکسپولسز ایکٹ ءِ رد ءَ ارزی نبشتگ کنگ بیتگ –

پولیس ءِ رد ءَ پنجگور ءُ کش ءِ گوری دمگاں ڈنگ پرکار اَنت ءُ چریشی ءَ پولیس وتی گاماں تیز کنت ءُ دمگ ءَ ڈنگ ءُ ڈُزانی ھلاسی ءَ کنت –

پنجگور بلوچستان ءِ ھما دمگاں ھوار اِنت کہ اود ءَ ھمک روچ دُزی ءُ ڈنگی بیگ ءَ اَنت کہ چریشی ءِ سبب ءَ پیش اتکگیں وئیلاں گوستگیں چاردہ ادارانی تہ ءَ دو کس زدگ بیتگ اَنت ءُ لکانی کلدار ڈنگاں دُز اِتگ ءُ برتگ اَنت –

دمگ ءِ نیمگ ءَ لس مھلوک یکشل ءَ دمگ ءِ سر ءَ ناوشیانی ھلاپ ءَ زھرشانی ءَ ھم گندگ ءَ اتکگ اَنت ءُ مھلوک ءِ گوشگ اِنت کہ سرکار مھلوک ءِ جان ءُ مال ءِ پھریزگ ءَ بے سوب بیتگ –

بلوچ سیاسی تکاں ھمے گوشگ بیت کہ بلوچستان ءَ گیشتریں دُز ءُ ڈنگیاں ھما مردم ھوار اَنت کہ سرکار ءَ سلاہ بند کرتگ اَنت لس دمگی مردمانی نیمگ ءُ دُزیاں بزانکہ “ڈیتھ اسکواڈ ” ءِ نام دیگ بیگ ءَ اَنت –

سیاسی تکاں گوشگ بیت کہ پاکستانی چیریں ادارھانی کارمنداں “ڈیتھ اسکواڈ ” بلوچستان ءَ ھمے واستا دُزی ءُ دگہ ناوشیانی سر ءَ یلو کرتگ کہ آ سرکار ءِ ھلاپ ءَ پُرکاریں سیاسی باسک ءُ چاگردی مردماں نشانگ بہ کنت –

چوشیں وئیل پنجگور ءَ ھوار بلوچستان ءِ دگہ جاھاں ھم دیم ءَ اتکگ اَنت کہ اود ءَ دُزاں لوگانی سر ءَ بیڑ برتگ ءُ اود ءَ مردماں گھگیری کرتگ ءُ چریشی ءَ لس شھریانی جان ءُ ساہ زوال بیتگ اَنت –

وائس فار بلوچ مسنگ پرسنز ءِ نیمگ ءَ شال ءِ پریس کلب ءِ دیم ءَ زھرشانی برجاہ، مروچی زھرشانی ءَ چار ھزار ءُ سَے سد ءُ نود ءُ دو روچ سرجم بیتگ، زھرشانی ءَ نیشنپ ڈیموکریٹک پاٹی ءِ کلانیں رھشون ثناء بلوچ، سی سی ممبر محب شاہ ءُ دگہ مردماں اتکگ ءُ بیگواھیں مردمانی کھولانی گون ءَ پدردی درشان اِتگ –

بنجل ءَ اتکگیں مردمانی میان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گوشتگ اَت کہ بولان، جھالاوان،ساروان ءَ ھوار مکران ءُ چاگی ءَ پاکستانی پوج ءِ نیمگ ءَ ترندیں لشکر کشی بندات کنگ بیتگ اَنت – اے لشکر کشیانی وھداں دست ءُ گوشیں آبادیانی سر ءَ لَٹ ءُ کُٹ ءُ لوگانی مڈیانی ساز ءُ سامانانی دزگ ءُ برگ ءُ لوگ پروشگ بیگ ءَ اَنت ءُ بازیں کَچے ءَ مردم دزگیر کنگ ءُ ناشناسیں جاھاں برگ بیتگ اَنت –

ماما قدیر بلوچ ءَ گُشتگ اَت کہ بازیں جاھاں بیوکیں لشکر کشیاں بازیں مردمانی لَٹ ءُ کُٹ کنگ ءِ ھال ھم سر بیتگ اَنت، لَٹ ءُ کُٹانی سبب ءَ مھلوک ءِ جانی تاوانانی ھال ھم ھست اَنت ءُ اے لشکر کشیانی پژدر ءَ بلوچ تکاں برانزی ھم گندگ ءَ اتکگ اَنت، بلوچانی سر ءَ زُلم پرینوکیں ریاستی زلم، انسانی ھکانی پامالیاں بہ گر بیگواھی، زانگول کرتگیں جون زُلم پرینگ بیتگ اَنت –

ماما قدیر بلوچ ءَ گُشتگ اَت کہ گوستگیں لشکر کشیاں ھما بلوچ کہ شھید کنگ بیتگ اَنت آیانی دیمونی نا ایوک ءَ بلوچ راج ءِ دلاں ھست اَنت بلکیں راجدپتر ءَ آیانی جوان جوانیں نام ھست اَنت ءُ پُر ایمنیں بیگواھیں مردمانی زرمبشت سبزینتگ ءُ بلکیں دنیا ءِ دیم ءَ زردست ءُ مزن پنجگیں ھاکم پاشک کرتگ اَنت ءُ بلوچ وتی اے شھیدانی ستاشانی ءَ ھروھد ءَ کنت –

اتکگیں مردمانی میان ءَ ماما قدیر بلوچ ءَ گوشتگ اَت کہ زوراکیں زور دستاں ھمے وڑ ءَ پشتون راجدوست رھشون عثمان کاکڑ ھمے واستا شھید کرتگ کہ عثمان کاکڑ ءَ پشتون بلوچاں ھوار پاکستان ءَ زُلم آماچیں ھما مھلوک ءِ واستا توار چِست کرتگ، بلوچ عثمان لالا ءَ ھچبر بے ھیال کرت نہ کنت –