TBP Balochi

سربوتگیں ھالانی رِد ءَ ھزدار ءِ دمگ گروک نال ءِ ھند سیندل کاریز ءُ مھرگی ءَ سُھرک ءِ نادراھی ءِ تالان بوتگ چریشی ءَ بازیں گونڈوے نادراھی ءِ آماچ انت ، تنی وھدی دو گونڈو بیران بوتگ اَنت ءُ گیشتر گونڈوانی بیرانی ءِ ترس ھست انت-

دمگی مردمانی رِد ءَ انوگیں بوتگیں ھورانی سوب ءَ گروک نال ءِ بی ایچ یو ءِ سولر سسٹم ھراب بوتگ انت چریشی ءِ سوب ءَ پریج ءَ ایربوتگیں درسیں ھراب بوتگ انت – آھاں لوٹ کتگ زوت ءَ چہ زوت دمگ ءِ تہ ءَ ٹیم دیم دیگ بہ بیت تانکہ گیشتر مرگ ءِ دیمپانی ءَ چہ رکّ ایت بہ کن انت –

دمگی اھوالکارانی رِد ءَ ھزدار ءِ جانسلامتی ءِ بنشون ءِ نیمگ ءَ چہ اے درگت ءَ گامگیج زورگ بوتگ ءُ نادراھی ءِ آماچ بوتگیں دمگاں ٹیم دیم دیگ بوتگ اَنت –

بلوچستان ءِ دمگ مستونگ ءَ سر بیتگیں ھالانی رد ءَ سراوان پریس کلب مستونگ ءَ سمالانی ٹک ءَ بندوکیں یک زالبولے ءَ پریس کانفرنس کنان ءَ گُشتگ کہ پولیس ءَ مئے سر ءَ زوراکی کرتگ ءُ مئے لوگ ءِ دود مان لگتمال کرتگ اَنت –

آئی ءَ گُشتگ کہ پولیس ءُ لیویز انتزامیہ ءَ دُز ءُ ڈنگانی گرگ ءَ ابید وتی کردانی سھرا کنگ ءَ بے گناھیں مردماں دزگیر کنگ ءُ آیاں انسانیت ءِ سودمان ءِ نشانگ کنگ ءَ اِنت –

زالبول ءَ گُشتگ کہ چار شمبے ءِ روچ ءَ تھسیلدار مستونگ ءَ لیویز کارمندانی ھمراھی ءَ مئے لوگ دشت بابا ءَ ابید ءِ ارزی گرزی نامہ ءَ بیڑ برتگ ءُ اود ءَ لوگ ءِ دود مان لگتمال کنان ءَ منی سَے زھگ سبزل خان سمالانی، ایوب سمالاانی ءُ مھمد رفیق وسرا دزگیر کرتگ اَنت –

آئی ءَ گُشتگ کہ منی زھگ بیست ءُ چار اداراں بندیگ کنگ بیتگ اَنت ءُ آ باز زھنی ترسینگ ءُ لَٹ ءُ کُٹ کنگ ءَ پد یلو کرتگ اَنت –

آئی ءَ گُشتگ کہ پشمبے ءُ آدینگ ءِ میانی شپ ءَ ایس ایچ او مستونگ مھمد یونس ءَ پولیس ءِ بازیں کچے ءَ کارمندانی ھواری ءَ دوبر ھمے رنگ ءَ کرتگ ءُ پد ءَ منی ھرسئیں زھگ دزگیر کرتگ ءُ برتگ اَنت –

آئی ءَ گُشتگ کہ دزگیری ءِ وھد ءَ ما زالبولاں آیانی دیم ءَ پاک تاک “قران ” ایر کرتگ ءُ گشتگ کہ منی زھگ بے میار اَنت اشاں مک بر بلے ایس ایچ او ءَ مئے گپ گوش نہ داشتگ ءُ بلکیں زالبول جتگ اَنت منی زھگ برتگ اَنت –

آئی ءَ گُشتگ کہ منی زھگانی گون ءَ جانورانی رنگ ءَ رویش کنگ بیتگ اَنت ءُ آ بے کساس ءَ لَٹ ءُ کُٹ کرتگ اَنت مرگ ءِ دیمپان اَنت –

آئی ءَ گُشتگ کہ پاک “قران ” ءَ من چِست کن آں کہ منی زھگ بے میار اَنت ءُ آ مزوری ءَ ابید دگہ ھچ دندا نہ کن اَنت اگاں دُزی ڈنگی ءَ دزمانجن بوتیناں گڑا بیڑی ءِ وھد ءَ مئے لوگ ءَ یک نا یکے چیزے منانک دزکپتگ اَت-

آئی ءَ گُشتگ کہ انتزامیہ وتی بے سوبی ءِ چیر دیگ ءَ مارا پریشان کنگ ءَ اِنت ءُ منی زھگاں زورانسری دُزی ءِ بھتام ءَ جنگ ءَ اِنت –

آئی ءَ گُشتگ اگاں منی زھگاں کجام ھم رنگ ءَ چیزے بوت گڑا آئی ءِ زمہ واری ایس ایچ او بیت اِنت –

آئی ءَ گُشتگ من سروزیر بلوچستان آئی جی پولیس بلوچستان ءَ گوں دزبندی کن آں مستونگ انتزامیہ ءِ گیر کانودی رویشانی ھلاپ ءَ گامگیج بہ زوریت ءُ زالبولانی گون ءَ زُلم ءُ زوراکیانی گامگیج ءَ بہ زور ایت ءُ مارا انساپ بہ دنت –

سر بیتگیں ھالانی ھالانی رد ءَ گوستگیں روچ بزانکہ آدینگ ءِ روچ ءَ سلاہ بندیں مردماں پاکستان ءِ اُستان خیبرپختونواہ ءِ بنجاھی شھر پشاور ءَ پولیس ءِ گاڑی ءِ سر ءَ دزبمبے چگل داتگ –

ھالانی تہ ءَ گْوشگ بیتگ کہ اُرش پولیس ءِ گاڑی ءِ سر ءَ کنگ بیتگ ءُ اُرش ءَ پولیس ءَ جانی ءُ مالی تاوانانی دیمپانی کنگ کپتگ –

خیبرپختونواہ ءِ بازیں جاھاں چوشیں اُرشانی زمہ واری گیشتر پاکستان ءَ پرکاریں گل تھریک تالبان پاکستان ءَ منّ اِتگ اَنت، ھمے وڑ اے اُرش ءِ زمہ واری ھم تھریک تالبان پاکستان ءِ جارکش مھمد ھراسانی ءَ منّ اِتگ –

گوستگیں روچاں تھریک تالبان پاکستان ءِ سروک نور ولی مھسود ءَ وتی یک شنگ کرتگیں درشانے ءَ گُشتگ اَت کہ مئے جنگ پاکستان ءُ آئی ءِ سیکورٹی ادارھانی گون ءَ اِنت –

اے گپ آئی ءَ اولی رند ءَ امریکی سی این این ءَ یک جُست ءُ پُرسے ءِ وھد ءَ کرتگ اِتگ اَنت ءُ ءُ گوشتگ اَت کہ مئے جنگ پاکستان ءُ پاکستان ءِ سیکورٹء اداھانی گون ءَ اِنت ءُ اوگانستان ءِ تالبان ءِ سوبمندی سرجمیں اُمت ءِ مسلمہ ءَ اِنت ءُ مئے نزیکی براتی دوستی ءُ نیکراھی رھبندانی سر ءَ اِنت –

چرے درشان ءَ پد پاکستان ءَ تھریک تالبان پاکستان ءِ اُرش یک گامے ءَ جُنز اِتگ اَنت ءُ گوستگیں روچ ءَ پاکستان ءِ اُستان خیبرپختونواہ ءِ بنجاھی شھر پشاور ءُ دگہ جاھاں ھم پاکستانی پوج ءِ سر ءَ اُرش بیتگ اَنت –

تھریک تالبان پاکستان ءَ وتی شنگ کرتگیں درشانی تہ ءَ جتا جتائیں اُرشانی زمہ واری من اِتگ اَنت –

گوستگیں روچ ءَ تھریک تالبان پاکستان ءِ جارکش مھمد ھراسانی ءَ وتی شنگ کرتگیں درشانیانی تہ ءَ پاکستانی پوج ءِ سر ءَ چار جتا جتائیں اُرشانی زمہ واری منّ اِتگ-

جارکش ءَ شنگ کرتگیں درشانی ءَ یک اُرشے کے پی ءِ بنجاھی شھر پشاور ءِ دمگ ھیات آباد کارھانو مارکیٹ ءَ گوں دزبمبے ءَ اُرش کتگ ءُ اُرش ءِ آسر ءَ پولیس ءِ یک کارندھے کُشتگ ءُ یکے ٹپی بوتگ – وھدیکہ پولیس گاڑی ءَ کمو باز تاوان ھم رس اتگ-

آئی ءَ رسانکدراں شنگ کرتگیں درشانی ءَ گُشتگ دومی اُرش زرباری وزیرستان ءِ تھسیل لدھا ءَ بدر بریج ءَ لشکر ءِ چیک پوسٹانی سر ءَ کنگ بوتگ ءُ گوں مزنیں سلاھاں اُرش کنگ بوتگ اے اُرش ءِ آسر ءَ چار لشکر ءِ کارندہ کشتگ اَنت ءُ لھتے ٹپی بوتگ اَنت –

آئی ءَ دیمتر ءَ وتی شنگ کرتگیں درشان ءِ تہ ءَ گُشتگ دگہ اُرشے باجوڑ ایجنسی ءِ تھسیل لوی مامونڈ ءِ دمگ ڈنڈو سر ءَ کرتگ چریشی ءِ آسر ءَ یکے اسناپئر اُرشے ءَ یک پوجی ءِ کُشتگ –

اے سرجمیں اُرشانی زمہ واری تھریک تالبان پاکستان ءِ جارکش مھمد ھراسانی ءَ منّ اِتگ اَنت – گوستگیں ماہ ءَ اے وڑ دو رند بوتگ کہ سلاہ بنداں یک روچے ءَ چار اُرش کتگ-

مار ءَ ھمک روچ دھمکی دیگ ءُ ترسینگ ءِ جھد کنگ بیت تانکہ اے جھد اوشت ءِ آماچ بہ بیت بلے مرگ بر ھک انت ما مرگ ءِ تُرس ءَ اے جھد ءَ دستکش نہ بہ ایں- ماما قدیر بلوچ

شال ءِ پریس کلب ءِ دیم ءَ برجاھیں زھرشانی بنجل ءِ ھرتال ءَ چار ھزار ءُ سَے سد ءُ نود ءُ چار روچ سرجم بیتگ – مروچی بی ایس او پجار ءِ سرکماش زبیر بلوچ گوں وتی کابینہ ءِ سنگتاں بنجل ءَ اتکگ ءُ پدردی اش درشان اِتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ جھدکارانی ھوناں مروچی زرمبشت ناکہ تھنا دنیا ءِ دیم ءَ آرتگ بلکیں ریاست ھم ترس ءِ آماچ کتگ کہ مرگ ءِ نزدیک انت –

ماما قدیر ءِ گوشگ ات کہ وی بی ایم پی ءِ جھد بازیں وھد ءَ برجاہ انت ءُ مئے لوٹ بس بیگواھیں مردمانی یل کنائینگ انت کہ گڈی ساہ ءَ تاں برجاہ بیت ءُ زرمبشت ءَ بلوچ مات ءُ گوھارانی ھوار بیگ ءَ یک نوکیں دروشمے داتگ –

ماما قدیر ءِ گوشگ ات کہ اے میان ءَ مار ءَ ھمک روچ نوکیں وڑ ءُ ڈولاں دھمکی دیگ ءُ ترسینگ ءِ جھد کنگ بوتگ تانکہ اے جھد اوشت ءِ آماچ بہ بیت بلے مرگ بر ھک انت ما مرگ ءِ تُرس ءَ اے جھد ءَ دستکش نہ بہ ایں – اے زرمبشت بلوچ راج ءِ زرمبشت انت ءُ آئی ءِ تاکت بلوچ راج انت ءُ اے زرمبشت ءَ کھولانی ھوار بوگ ءَ روچ پہ روچ مھکم تر بوان انت –

سربوتگیں ھالانی رِد ءَ بلوچستان ءِ دمگ شال، ماشکیل، ھب ءُ مستونگ ءَ تیرگواری ءُ دگہ وئیلاں زھگے ءَ ھوار دو مردم بیران بیتگ اَنت ءُ دو ٹپی بیتگ انت –

گیشیں ھالانی رِد ءَ مستونگ ءِ دمگ روڈ ال آسپ ھوٹل ءِ نزیک ءَ ناشناسیں سلاہ بندیں مردماں پرپٹ سوارانی سر ءَ تیرگواری کتگ ، تیرگواری ءَ یک مردمے بیران بوتگ –

بیران بوتگیں مردم ءِ پجار احمد ء اللہ بکش بادینی جھمنند کیچی بیگ شال ءِ نام ءَ چہ بوتگ – وئیل ءِ درگت ءَ پٹ ءُ پول برجاہ انت –

ھمے وڑ ھب ءَ ناشناسیں مردمانی تیر گواری ءَ یک مردمے ٹپی بوتگ –

وئیل سول نادراھجاہ ءِ نزیک ءَ دیم ءَ اتکگ کہ ناشناسیں مردماں شاھد نامیً مردمے ءِ سر ءَ تیرگواری کتگ ءُ ٹپی کتگ – ٹپی بوتگیں مردم نادراھجاہ ءَ سر کنگ بوتگ –

دگہ وئیلے ماشکیل ءَ گوستگیں شپ ءَ دیم ءَ اتکگ کہ ناشناسیں مردماں دالبندین ءَ چہ ماشکیل ءَ آؤکیں گاڑیانی رندگیری کُتگ ءُ آھانی سر ءَ تیر گواری کتگ چریشی ءَ پسند خان ء محمد حیات نامیں مردمے ٹپی بوتگ –

دومی نیمگ ءَ بلوچستان ءِ بنجاھی شھر شال ءِ دمگ سریاب دگ ءَ کلی بنگلزئی ءَ گِس ءِ تہ ءَ کسانیں زھگے ءِ جون دست کپتگ –

ھمے گوشگ بوگ ءَ انت کہ زھگ ءِ گُٹتوس کنگ ءُ کُشگ بوتگ آئی ءِ پجار حبیب اللہ ء حاجی عبدالحفیظ ءِ نام ءَ چہ بوتگ –

سربوتگیں ھالانی رِد ءَ بیست ءُ نھ جولائی ھاران ءَ ناشناسیں مردماں پاکستانی پوج ءِ بمب ڈسپوزل اسکواڈ تراک ناکیں شوروانی نشانگ جوڑ کرتگ، تراک ءِ زمّہ واری بلوچ سلاہ بندیں گل بی آر اے ءَ منّ اِتگ –

دمگی اھوالکارانی رِد ءَ اے تراک ساروان دگ ءِ سر ءَ بڈو کور ءَ ھما وھد ءَ کنگ بوتگ کہ بم ڈسپوزل اسکواڈ ءِ کارمند جنرل قادر ءُ آئی جی ایپ سی ءِ تر ءُ تاب ءِ ھاتر ءَ دگ ءَ چار ءُ ٹپاس ءَ بوتگ انت – چریشی ءَ بمب ڈسپوزل ءِ کارمنداں جانی تاوان ءِ دیمپانی بوتگ-

مئے نشانگ پوج ءِ چیردستی ءَ زرمبشت ءِ بگیری ءَ کار کنوکہں جنرل قادر بیتگ – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں بیست ءُ نھ جولائی ءَ ھاران سراوان دَگ ءِ سر ءَ بڈو کور ءَ پوج ءِ بمب ڈسپوزل اسکواڈ ءِ کارمندانی سر ءَ ھما وھد ءَ دیرواگیں تراکناکیں شوروانی سر ءَ اُرش کتگ کہ آ گوستگیں پوجی جنرل قادر بلوچ ءُ آئی جی ایپ سی ءِ تر ءُ تاب ءِ ھاتر ءَ دگ ءَ چار ءُ ٹپاس ءَ بوتگ اَنت-

جارکش ءَ گوشتگ کہ بمب تراک ءَ بمب ڈسپوزل اسکواڈ ءِ دو کارمند مرتگ اَنت – مئے گَل ءِ نشانگ ءَ پوج ءِ گوستگیں جنرل قادر بلوچ بوتگ کہ بلوچ ءِ پوشاک ءِ تہ ءَ ریاست ءِ واھگانی پد ءَ بلوچ راجی زرمبشت ءِ بگیری ءَ کار کنگ ءَ انت –

آئی ءَ گوشتگ کہ ما اے ھبر ءَ تچک کنگ لوٹ ایں پاکستان ءِ زورگیری ءَ دراجتر ءُ تالان کنگ ءِ ھاتر ءَ لھتیں بلوچ پارلیمانی کارمند بلوچ زرمبشت ءِ بگیری ءَ ھوار بوتگ اَنت دلّاری ءِ کردار ءَ پیلو کنگ ءَ اَنت داں ھما وھد اے مردم چہ وتی رَدیں کِرداں دست کش نہ بنت آھانی بگیری ءَ ما گوں جوانتریں دروشمے ءَ وتی کاراں ترند تر کن ایں-

جارکش ءَ گڈسر ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

زورانسری ءِ آوار جنگ ءُ بیگواہ بیتگیں انسانی ھکانی باسک راشد حسین بلوچ ءِ کھول ءَ کراچی ءِ پریس کلب ءَ پریس کانپرنس کرتگ، گوستگیں شپ ءَ پوج ءِ نیمگ ءَ لوگانی سر ءَ بیڑ برتگ ءُ راشد حسین ءِ زامات زورانسری ءِ آوارجنی ءِ بارو ءَ سرپدی داتگ –

پریس کانفرنس ءَ گپ کنان ءَ راشد حسین ءِ مات ءَ گوشتگ اَت کہ منی زھگ راشد حسین 26 دسمبر 2018 ءَ متھدہ ارب امارات ءَ زورانسری آوار جتگ ءَ یک سالے ءَ پد گیر کانودی رنگ ءَ پاکستانی ادارھانی دست ءَ داتگ کہ تنی وھدی بیگواہ اِنت ما راشد حسین ءِ یل کنگ ءِ واستا زھرشانی ءِ دراھیں راہ ءُ رھبند ءُ آمیدگس چکاس اِت اَنت بلے چریشی ءَ ابید راشد ءَ یل بہ کنت ریاستی ادارھانی کارمند شپ تھاروکی ءَ مئے لوگانی تہ ءَ دور کنگ ءَ مئے کھول ءِ دگہ مردماں گرگ ءُ بیگواہ کنگ ءَ اَنت ءُ ما لَٹ ءُ کُٹ ءُ توپکانی کندانکاں گوں جنگ بیگ ءَ ایں –

راشد حسین ءِ مات ءِ رد ءَ گوستگیں شپ ءَ دو ءُ سَے سھت ءِ میانی وھد ءَ بازیں گاڑیانی ھمراھی ءَ سواریں رینجرز ءُ سیول پوشاکیں مردماں سلاہ بندیں مردم کہ لھتے سادھیں وردی والا دیم اندیمیں مردم ھوار اَنت مئے لوگ کہ نیول کالونی ءَ بیڑ اش برتگ لوگ ءِ مردم اش توپکانی کنداں گوں مان بندگ ءَ پد راشد حسین ءِ پت ءُ آئی ءِ براتزتک شاہ میر کہ نُھ تبکے نودربرے لَٹ ءُ کُٹ کنگ ءَ پد گوں وت برتگ اَنت چریشی ءَ پد سھب ءَ یلو اش کرتگ اَنت –

آئی ءَ گُشتگ کہ ھمے وھد ءَ راشد ءِ گوھار ءِ لوگ ءَ ھم پوج ءَ بیڑ برتگ ءُ اود ءَ راشد ءِ گوھار ءُ آئی ءِ لوگ والا ھم لَٹ ءُ کُٹ ءُ لوگ والایانی مباھل برتگ اَنت ھمے وڑ ءَ راشد ءِ زامات علی جان ء تاج مھمد آوار جتگ ءُ برتگ کہ تنی وھدی آیانی گور ءَ بندیگ اِنت –

راشد ءِ مات ءِ رد ءَ علی جان انسداد پولیو ٹیم ءَ گوں بندوک اِنت یہ سوشل ورکرے ءُ اشانی ھواری ءَ سی ایس ایس ءِ چکاس ءِ چن ءُ لانچ ءَ بیتگ، پوج ءَ شپ ءِ تھاری ءَ اتکگ ءُ چادر ءُ چاردیواری لگتمال کرتگ اَنت بہ گوش اَنت ما اے کجام جرم کرتگ کہ مئے گون ءَ اے وڑیں گیر انسانی ءُ گیر دودمانیں رویش کنگ بیگ ءَ اِنت؟

آئی ءَ گُشتگ اَت کہ ما وتی پریات ءَ اد ءَ آورتگ مروچی اد ءَ کراچء پریس کلب ءَ اتکگ اِنت مئے توار ءَ داں ھما ادارں توار ءَ سر بہ کن اَنت ءُ مئے کمک ءَ بہ کن اَنت ما جست کنگ لوٹ ایں چون اے ملک ءِ شھری بیگ ءَ مارا ھچ ھک نیست کہ ما ایمنی ءَ نشت بہ کن ایں؟ ھا وتی چک ءِ یلو کنگ ءَ توار چںست کنگ جرم اِنت؟ ھدا ءَ بہ چار اِت ما اے وڑیں زھنی نادراھی ءَ در بہ کن اِت ما گوستگیں شپ ءَ بہ گر داں انیگ ءَ زھنی نادراھی ءِ آماچ اِنت ما کجام جرم ءِ سزا ءِ سر ءَ اے زوراکیانی دیمپان اِنت مئے لوگ ءِ کماش ءُ چُک لَٹ ءُ کُٹ ءِ نشانگ کنگ بیگ ءَ اَنت مئے زالبول لَٹ ءُ کُٹ ءُ کمشرپ کنگ بیگ ءَ اَنت ءُ مئے زامات علی جان کجام جرم ءِ سر ءَ زورانسری ءِ آوار جنگ ءُ بیگواہ کنگ بیتگ -؟

آئی ءَ گُشتگ کہ اگاں ما کجام ھم جرمے کرتگ گڑا کانونی رھبند کاربندگ بہ بیت بلے اے وڑ ءَ شپ تھاری ءَ اے وڑ ءَ چِست کنگ ءُ بیگواہ کنگ گیرکانونی راہ ئِے –

راشد حسین ءِ مات ءِ رد ءَ انگیری ءِ وھد ءَ ریاستی کارمنداں راشد ءِ کسان سالیں براتزتک ءُ کماش لَٹ ءُ کُٹ کرتگ اَنت ءُ مارا گُشگ بیتگ کہ راشد حسین ءِ بارو ءَ زھرشانی ءُ دگہ چِست ءُ ایراں گستا بہ بیت اگاں ناں گڑا ما شمئے کھول ءِ آ دگہ مردماں گیش تاوان دے ایں –

پریس کانفرنس ءِ وھد ءَ راشد حسین ءِ کھول ءِ ھمراھی ءَ بلوچ یکجھتی کمیٹی کراچی ءِ رھشون ءُ ایچ ار سی پی ءِ اسد بٹ ھم جاڑیگ بیتگ – بلوچ یکجھتی کمیٹی ءِ آرگنائزر آمنہ بلوچ ءِ رد ءَ بلوچ یکجھتی کمیٹی اے زُلم ءِ ھلاپ ءَ راشد حسین ءِ کھول ءِ ھمراہ اِنت –

رسانکدرانی نمائندگاں گوں گپ کنان ءَ ایچ ار سی پی ءِ اسد بٹ ءَ گُشتگ کہ بیگواھیں مردمانی جیڑہ سنگین اِنت، ابید اشی ءَ بیگواھیں مردمانی جیڑہ ھلاس بہ بیت ریاستی ادارہ بیگواھیں مردمانی کھولاں لَٹ ءُ کُٹ کنگ ایانی کانونی ءُ بنکی ھک ءِ زھرشانی ءِ دارگ ءِ جھد ءَ یک کڑے ئے –

ھیومین رائٹس کونسل آف بلوچستان ءَ وتی یک بیانے ءِ تہ ءَ گُشتگ ما نیول کالونی کراچی ءَ راشد حسین ءِ لوگ ءِ سر ءَ ریاستی ادارانی بیڑی ءَ ترندی ءَ ایر جن ایں – پوج ءَ راشد حسین ءِ کھول ءِ مردمانی ترسینگ ءُ آئی ءِ زامات ءِ آوار جنگ ءُ بیگواہ کنگ –

آئی ءَ وتی بیان ءِ تہ ءَ گُشتگ کہ اے گاریں مردم زوت ءُ چہ زوت یلو کنگ بہ بیت یا آمیدگساں پیش کنگ بہ بنت –

بلوچستان ءِ دمگ کیچ ءَ پاکستانی پوج ءِ دست ءَ بیگواھیں بیتگیں ورنایے پوج ءَ بندیگجاہ ءَ کُشتگ ءُ جون نادراہ جاہ ءَ سر کرتگ –

گیشیں ھالانی رد ءَ گوستگیں روچاں کیچ ءِ دمگ ھیرونک سنگ آباد ءَ لشکر کشی ءِ وھد ءَ آوار جنگ بیتگیں غلام ء شیھی پوج ءَ بندیگ جاہ ءَ کُشتگ ءُ جون ھسپتال ءَ سر کرتگ ءُ ھمے وڑ اشی ءِ ھمراھی ءَ آوار جنگ بیتگیں اللہ داد انگت ءَ بیگواہ اِنت –

کُشگ بیتگیں مردم سر بروبر نہ بیتگ ءُ گوستگیں روچاں پوج ءَ یک مردمے ءِ ھمراھی ءَ دزگیر کرتگ ءُ بیگواہ کرتگ-

زانگ بہ بیت اے اولی وئیل نہ اِنت چریشی ءَ پیسر ھم پوج ءَ دزگیر کرتگیں مردم ھمے رنگ ءَ بندیگجاھاں کُشتگ اَنت ءُ چگل داتگ اَنت ءُ چریشی ءَ پیسر جون ءِ ماہ ءَ پوج ءَ تمپ ءَ چار مردم آوار جتگ اَت کہ چریشی ءَ پد گوھرام نادل نامیں ورنایے ھم بندیگجاہ ءَ کُشتگ ءُ جون کھول ءِ ھولگ ءَ کرتگ اَت –

چریشی ءَ پیسر کیچ مند ءَ ھم جاوید نامیں ورنایے پوج ءَ بندیگجاہ ءَ جتگ اَت ءُ آئی ءِ گُٹگ ناکارہ کرتگ اِت اَنت ءُ پد ءَ آ کراچی ءَ یک نادراہ جاھے ءَ بیران بیتگ اَت –

بلوچستان ءَ سیاسی ءُ انسانی ھکانی واستا توار چِست کنوکیں مردمانی گوشگ اِنت کہ پوج ءَ وتی کُشت ءُ کوشی پالیسیانی تہ ءَ گیشی آورتگ ءُ آ اے نِی نوکیں رنگے ءَ بلوچستان ءَ بلوچانی کُشت ءُ کوش ءَ کنگ ءَ اِنت –

آیانی گوشگ اِنت کہ بندیگجاھاں ھوار بلوچ بیگواھیں مردماں دیم پہ دیمی جنگ ءِ نام ءَ کُشگ ءُ چگل دیگ ءَ اِنت –

بلوچستان ءَ بندیگجاھاں کُشگ ءُ چگل دیگ بیتگیں مردمانی جونانی دزکپگ ءُ بلوچستان ءَ دگہ بیگواھیں مردمانی کھولانی دلانی شک ءُ گمان گیش آیاں جیڑین اَنت –

نبشتانک: بلوچ راج ءَ کرونا کُش ایت یا گُژن؟
 
نبشتہ کار: ھدایت بلوچ

دی بلوچستان پوسٹ

کرونا یک ھنچیں سِلّیں ءُ بلاھیں مردُم کُشیں وباہ ءِ کہ جھان ءِ چاریں کُنڈاں اے بیماری ءَ وتی بیم دور داتگ ءُ کُلیں جھان اشی ءَ وتی ھمبازاں کُتک۔

جھان ءِ مردمانی تہ ءَ کرونا ءِ تُرس ءُ بیم ھنچو گیش بوتگ کہ ھچ کس چہ وتی لوگ ءَ در اھت اوں نہ کنت ، کسے برات ءِ لوگ ءِ دپ شُت نہ کنت ءُ کسے دومی ءِ سلام ءِ دیگ ءُ دست ءُ دُروت بوگ ءَ رازی نہ انت ، کسے مسیت ءَ پہ نمازے وانگ ءَ شُت نہ کنت، براتانی گون ءَ پکنک ءُ سیل ءُ سوادی بوگ ھلاس انت ھر کس ءَ بگند ماسک ءِ دپ ءَ بستگ ءِ چہ دور سلام دنت ءُ وتی راہ گیپت ءُ روت۔

کروناء 2019 جھان ءَ وتی بیم دور داتگ مردمان ءَ بزگ ءُ بیچارگ کُرتگ بلے بلوچ راج ھپتاد سال ءَ گیش انت کہ بزگ ءُ بیچارگ انت دری راجانی گُلام انت درامدانی زوراکیانی آماچ انت ھمک گدان پُرسیگ انت ۔ بازینے گار ءُ بیگواہ انت ءُ بازیں ءِ زوراکانی دست شھید بوتگ ءُ اے زوراکی بلوچ راج ءِ سر ءَ پہ بے روزگاری ءُ گُژن اوں دوردیگ بوتگ نہ کہ کسے ءَ روزگارے بوتگ ءُ نہ است نا کہ دگہ گیشیں سرمایہ کاری ءِ بس ھمے باڈر کہ روچ دراھتی ءُ روچ ایر شُتی بلوچستان سیم سر انت کہ اد ءَ بلوچ راج ءِ دُرستیں اوست ھمدا بندوک بوتگ ۔

کسے وتی گوکے بھا کُرتگ ءُ کسے ءَ وتی زمینی چُنڈے بھا کُرتگ ءُ یک کلنڈیں گاڑی زُرتگ ءُ کسے ءَ برات ءِ کرا زر پہ وام زُرتگ ھمے باڈر ءِ اوست کہ منی گاڑی دہ گیلن تیل ایدست ءُ آ دست کنت منی کھول ءِ مردمانی دپ چہ گُژن جُپت بیت-

نوں اگاں ھمے باڈر پہ کُرونا ءِ نام ءَ بند کنگ بہ بیت بلوچ راج وَ چوناہ ءَ بزگ ءُ بیچارگ انت اشانا اگاں کرونا مہ کُش ایت گُژن اش الم ءَ کُش ایت اش پرچہ کہ کسے ءَ دکان است ڈال ءُ مسالہ ءِ بھا کنت یا کسے ءَ راہ ءِ سر ءَ نشتگ تیل ءِ بھا کنت کسے پنچرے دکان ءِ است دُرسینانی روتگ گوں ھمے باڈر ءَ بندوک انت۔

بیچارگی ءِ چامپٹ بلوچ راج ءِ سر ءَ وَ پیسرا لگ اتگ پہ ھُدا ءِ نام اے چامپٹ پہ روزگارے بند گنگ ءَ مستر مہ کن اِت ءُ اشانی سرے نپت مجن ات کہ اے بیوس چِد ءُ گیشتر ازیت سگّیت نہ کن انت گژن ءِ ھولا گار ءُ گور بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اوگانستان ءِ راجی پھزگ ءِ کارگس ءِ رِد ءَ ماں بیست ءُ چار ادارانی تہ ءَ اوگان راجی لشکر ءِ تْرُندیں جنگی اُرشانی آسر ءَ 226 تالبانی جنگول کُشگ ءُ 135 سکی ءَ ٹپی بیتگ اَنت-

زانگ بہ بیت کہ اوگان راجی لشکر ءِ بالیگرابانی اُرشاں ھِلمند ولایت ءَ تالبان ءِ ریڈ یونیٹ ءِ جنگی کُمکّار مُلا کدرت گوں وتی 17 جنگی باسکاں ھم کُشگ بوتگ۔

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 226تالبان جنگول کُشتگ ءُ 135 سک ٹپی ھم کُتگ اَنت۔

شنگ بیتگیں ھالانی رپورٹ ءِ رد ءَ ایشی ءَ ابید اگان راجی لشکر ءَ تالبان ءِ دست ءَ دگ ءُ راھانی سر ءَ چیر ءُ بار کُتگیں 15 دانگ بمب ءُ شور ھم پَٹ اِت ءُ ناکار کُتگ اَنت۔

آئی ءِ نیمگ ءَ شنگ بیتگیں رپورٹ ءِ رد ءَ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت کُنر، پکتیا، میدان، واردک، کندھار، ھِرات، جوزجان، ھِلمند، بلگان ءُ کابُل ءِ ھند ءُ دمگاں کُتگ اَنت-

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشانی سبب ءَ 171 تالبان جنگول کُشگ ءُ 143 سکی ءَ ٹپی ھم بوت اَنت اوگان راجی لشکر ءَ ھمے جنگی اُرش کُنر، لوگر، پکتیا، پکتیکا، گزنی، جوزجان، پریاب، ھِلمند، کندوز ءُ کاپیسا ءِ ھند ءُ دمگاں کُتگ اِت اَنت۔

دومی نیمگ ءَ اوگانستان ءِ اُگدہ اسٹیٹ منیسٹری پار پیس اپئرز ءِ رِد ءَ چار ماہ ءِ توک ءَ ناشرکاریں تالبان ءَ اوگان راجی لشکر ءِ سر ءَ 22000 کسان ءُ مزنیں جنگی اُرش کُتگ اَنت ءُ ھمے اُرشاں اوگان راجی لشکر ءَ جنگی پِڑ ءَ 24000 تالبان جنگول کُشتگ۔ ھمے میان ءَ چہ کِر ءُ کش ءِ ھمساھِگاں ھم بازیں نیکراھی جنگولے آتکگ چریشی ءَ اِے زانگ بیت کہ ڈنی مُلکانی ناشرکار ھم گوں تالبان ءَ ھوار اَنت۔

اِے درگت ءَ اوگان راجمستری ءِ سُھلاکار بانُک پوزیا کوپی ءَ وتی یک درشانی یے ءَ گُشتگ کہ گوریچی ولایتاں اوگان تالبان ءَ ھوار دائیش، رودرآتکی تُرکستان اسلامک جُنز ءُ الکائدہ ءِ وڑیں بازیں گل ءُ دگہ راجانی ناشرکار ھم مُچّ اَنت اِے ڈنی راجانی ناشرکار پہ کِر ءُ کش ءِ مُلکاں یک بیرانی یے بیت۔