TBP Balochi

سربوتگیں ھالانی رِد ءَ بلوچستان ءِ دمگ کیچ بلیدہ ءَ سلاہ بندیں مردماں ورناھے تیرباران کُتگ ءُ کُشتگ –

گیشیں ھالانی رِد ءَ کیچ ءِ دمگ بلیدہ ءَ ناشناسیں سلاہ بندیں مردمانی تیر گواری ءَ سھیل ء لطیف نامی ورناھے بیران بوتگ – سھیل پیسر ءَ پروم ءِنندوک بوتگ ھستیں وھد ءَ آ بلیدہ ءَ جاھمنند بوتگ، کہ مروچی بیگاھے ادار سَے ءِ نزیک ءَ وتی دکان ءَ نندوک بوتگ –

دمگی مردمانی رِد ءَ سھیل گریب ءُ بزگریں ورناھے بوتگ کہ سلو ءَ وتی گریس ءِ دکان ءَ نندوک بوتگ کہ سلاہ بندیں مردماں سر بازار اتکگ ءُتیرباران کتگ ءُ کُشتگ –

زانگ بہ بیت چدوپیسر پاکستانی پوج ءَ اے ورناہ دہ جون سال دوھزار ءُ شانزدہ ءَ زورانسری آوار جتگ ءُ بیگواہ کتگ ءُ پدا شانزدہ جنوریدوھزار بیست ءَ چار سالاں بیگواھی ءَ پد یل کنگ بوتگ – 

بلے مروچی بوتگیں آئی کوش ءِ درگت ءَ ھچ وڑیں سرجمیں ھال دیم ءَ نہ اتکگ – دمگی مردمانی رِد ءَ ھمے گمان بیت گوست ءِ وڑءَ اے ورناہ ھمدمگی کُشندہ ٹولیانی کارمنداں جتگ –

نبشتانک: وام دار

نبشتکار: سوتیوزاز کورووچ (سربیا)

اردو رجانک: خالد بن اسلام

بلوچی رجانک: مھروان کمبر

دی بلوچستان پوسٹ

ما یکیں منزل ءِ مساپر اِتیں سپر ءِ میان ءَ منی ءُ آئی ءِ پجاروکی بوت ما دوئیناں شپ یکیں کوٹی ءَ گوازینت اے پہ منا پھر ءِ گپ اَت کہ من آئی ءِ ھمسپر اِتاں آ مُلک ءِ نامداریں مردمے اَت آئی ءِ نام سرجمیں ھرزیگووینا ءَ جکس اِتگ اَت ما دوئیں ھمرائی ءَ سپر کنگ ءَ اِت اِنت من یک شریں نسل ءِ اپسے ءَ سوار اِتاں۔ شریں نسل ءِ نشانی اِش انت کہ منا باز رند ءَ دَور داتگ ءِ منا ھما اپس دَور دات کنت کہ جوانیں نسلے ءِ بہ بیت منی اپس ءَ وتی سینگ مِک کُتگ اَت ءُ گردن ءِ آزمان ءِ نیمگ ءَ کُتگ ات ءُ کدم جنان اَت۔
منی ھمسپر، سپر ءِ بندات ءَ بے ترک ءُ توار ءُ وتی اسپیتیں اپس ءَ سوار اَت آئی ءَ چار پنچ دگہ اَپس گون اَت ءُ اپسانی سرا رَھت (زین) بستگ اَت بلے آیاں ھچ وڈیں سامان نہ لڑاتگ اَت آ یک بُرز ءُ جان ءَ پُریں مردے اَت، پرائیں سینگ ءَ گوں پیراں سالی ءَ ھم جوان گندگ ءَ اَتک۔ آئی ءَ وتی دود ءُ ربیدگی پُچ ءُ پوشاک گوْر ءَ کُتگ اَت۔ آئی ءِ پیشانی ءَ رومال ءِ بندوک اَت رومال ءِ دوئیں سر آئی ءِ سینگ ءَ لونجان اِتنت آ وتی کد ءُ بالاد، پچ ءُ پوشاک ءَ چہ باز زیبدار گندگ ءَ اَتک، پرے ھاتر ءَ دل ءَ لوٹ اِت کہ آئی ءَ وتی نیمگ ءَ دِلگوش بہ کناں، آئی ءِ گون ءَ گپ ءُ تران بہ کناں آئی ءِ نام ڈیکو مراوٗ وچ اَت۔ آئی ءِ بارو ءَ وڑ وڑیں کسہ شنگ ءُ تالان اَت ھر نیمگ ءَ آئی ءِ دلیری، شیواری ءُ نہ ترسی ءِ گپ اَت آ وتی بے رھبندیں جدوجھد ءَ چہ ھرزیگووینا ءِ بلاھیں دمگ ئے وتی ترس ءُ بیم ءِ آماچ کتگ اَت ما یک ءُ دومی ءَ چہ درامد، بے تواری ءَ سپر کنگ ءَ اِتیں۔ من اے بے تواری پُروش دات ءُ جُست گپت، ” برات! ترا اِنچو اپس گون بلئے یکے ءَ ھم بار نہ لڑاتگ چیا؟ من سامان زرتگ ءُ شھر ءَ شُتگاں، نی اُود ءَ چہ ھالی واتر بیتگاں۔

تو سامان کسے ءِ ھاتر ءَ بُرتگ اَنت یا سوداگری کنگ ءَ ئے؟
آئی ءَ منا ھورت ھورت ءَ چارت اَنچو گمان بوت کہ منی جُست آئی ءَ وش نہ لگ اِت، من کمے دگہ وڑ بیتاں، لھتیں دمان ءَ رند آئی ءَ پسو دات “من اے سامان ھدامرزی الی میویاگچ ءِ چُکانی ھاترا بُرتگاں” من ھیرانی ءَ گوں آ چارات، پرچا کہ الی میویاگچ آئی ءِ دژمن ءِ نام اَت: “تو اے سامان الی ءِ چکانی ھاترا برتگ انت؟ ناگھانی منی دپ ءَ چہ ھمے ھبر دراتک “ھو، پرے ھاتر ءَ کہ من الی میویاگچ ءِ وامداراں، آئی ءِ بازیں واماں چہ من چیر تراتگاں آئی ءَ وتی سر جھل کُت ءُ اپس ءِ گردن ءَ چابک ءِ جت، اپس چوناھاں تیز روگ ءَ اَت، نی چدو گیش دور جنان ءَ منا پشت ءَ پش گیتکے ءُ من ءَ اے موہ ھم نہ داتے کہ گیشتر جُست ءُ پُرس بہ کناں۔ بلئے من ھم وتی اپس ءِ مھار شُل کُت ءُ سوتے الھان کناں آئی ءِ ھمرائی ءَ جنزان بیت اَنت، منا انی یات نہ کنت کجام سوت ءَ گشگ ءَ اِت اَنت بگندے آئی ءَ منی سوت وش بوت، کہ وتی رپتار کمتر کُت ءُ گوں دلگوش ءَ گوشدارگ ءِ بندات کُت:”بُرزیں توار ءَ بُگش آئی ءَ پرمائش کُت، من وتی توار بُرز تر کُت۔ آئی ءَ وتی پیشانی ءِ بستگیں رومال شُل کُت، رومال آئی ءِ گردن ءَ اتک ڈیکو منی آواز ءِ جھلی بُرزی ءِ ھمرائی ءَ وتی سر ءَ چنڈینگ ءَ اَت کمے دیر ءَ پد من بے توار بیت اَنت آئی ءَ گشت: ” دیم ءَ بُگش “من ءَ دیم ءِ بند یات نہ انت” بگندے منی پسو آئی ءَ وش نہ لگ ات، آئی ءَ یکرندے پد ءَ من ءَ چہ گوست ءُ ساری بوت یکدم اپس ءِ دیم ءِ ترینت ءُ دیم پہ درچکانی نیمگ ءَ من جُست کُت کجا روگ ءَ ئے؟ “درچکانی چیر ءَ مارا کمے آرام کنگ لوٹیت”آ پیسر بوت ءُ من آئی ءِ رند ءَ درچکے ءِ ساھگے ءَ سر بوتیں وتی آپس پہ چرگ ءِ ھاتر ءَ یلہ دات اَنت پد ءَ ما یک شریں ساھتے ءَ بے تواری ءَ درچکانی ساھگ ءَ نشت ءُ چلیم کش اِت۔ ھچ چیزے برمش ءُ چڑکہ نیست اَت بیدئے اپسانی چرگ ءُ یک چرتے ءِ توار ءَ کمے دیر ءَ رند من آ جُست کُت: تو کدی الی ءِ وامدار بیتگ ئے۔؟ آئی ءَ بلائیں گین ءِ کش اِت ءُ دست سُرینت:بلائیں مُدتے گوستگ یک مزنیں مُدتے من اجکھی ءَ گشت وام انگت توام نہ بیتگ انت “ھو! اے وامانی ادا کنگ ءَ بلائیں مُدتے پکار اِنت دپ ءَ چہ دو سے رند ءَ دوتانی کشگ ءَ رند یکبرے من ءَ چارِت ءُ پدا آزمان ءِ چارِت ءُ دراھینیت ئے ” منی دوست اے یک دراجیں کسھے ءُ منی واستا باز دردناک اِنت”من ءَ گوشت کن ئے؟” من دزبندی کُت ءُ گُشت “آ منی بازیں دزبندیاں چہ لاچار بوت ءُ گوں ابیتکی ءَ دراھینت ئے: اِش کُن ءِ چئے کنے؟”پد ءَ گُشگ ءِ بندات کُت: ترا سما بہ بیت کہ تُرک سرکار ءِ زُلم ءُ زوراکی آں من ءَ دُز ءُ ڈنگ ءِ جوڑ کُت ما سرب مھلوک وتی زمینانی سر ءَ بزگ ءُ ازابیں زندئے گوازینگ ءَ لاچار بیتگ اِیں۔ اشاں مار ءَ انسان ءِ ھم نہ لیکتگ کجام بی مردم ءِ بہ بیت یا راج ءِ داں چُنت ءَ زوراکی سگیت ھر ترک ءِ دیم ءَ سر ءِ جھل کنگ ءُ آئی ءِ گُلامی ءِ منگ مئے واستا سک گران اَت۔ من آ وھد ءَ ورنا اِت اَنت تُرکانی بگیری ءَ مئے زھرشانی گیش بوان بوت دگہ لھتیں ھم ھیالیں سنگت یکجاہ بوت اِنت ءُ مُدام ما تُرکانی گون ءَ بیر گرگ ءُ آیان ءَ تاوان بار کنگ ءِ بارو ءَ جیڑاِت منی ھمراہ بس شش اِت انت ما درستاں سلاہ زرت ءُ جنگل ءَ چیر بوت اِنت جنگل ءَ ما ترکانی سرا وتی نزر ایر کت انچو کہ زاھر بیتاں ما اشانی سر ءَ اُرش کُت چوشیں روچے نہ گوست کہ ما آ تاوان نہ دات انت کم کم مئے ھمراہ گیش بوھان بیت اَنت یکروچے دیریگیں ھسابے ءِ گِرگ ءِ ھاتر ءَ ما الی میویا گچ ءِ لوگ ءِ سر ءَ اُرش کُت مار ءَ کس ءَ اے سرپدی نیست اَت کہ الی وتی دمگ ءِ درستیں زمیندارانی مستر اَت مئے اُرش ءَ چہ آئی ءِ کھول ءِ سے مردم جنگ بوت بلے آ وت دراھگ ءَ سوب مند بوت ما سک باز شوھاز کُت بلے ما نہ دیست ما آئی ءِ لوگ سرجم ءَ لُٹ ءُ پُل کُت لُٹ ءُ پُل کُتگیں سامان زُرت اَنت ءُ دیم ءَ پہ جنگل ءَ وتی بُنجل ءَ شُتیں۔
اے اُرش ءِ پسو ءَ الی ءَ مار ءَ چہ گیش ھمراہ یکجاہ کُت ءُ مئے رَند ءَ کپت آ مئے رند ءَ کوہ ءُ جنگلاں ھما جاہ ءَ ھم اَتک کہ اُود ءَ کوھی سید ءُ آسک ھم اتک نہ کن انت مئے گور ءَ آیانی گون ءَ جنگ کنگ ءَ ابید دگہ ھچ راہ ءُ در پشت نہ کپتگ اَت پرچا کہ الی ءَ مار ءَ چاریں نیمگاں انگیر ءَ کُتگ اَت مئے گور ءَ نہ آپ ھست اَت نہ دگہ ورگی سامان مار ءَ تُن ءُ گُژن ءَ وتی وڈ ءَ کُتگ اَت ءُ ما زندگی ءَ چہ نہ اُمیت بیتگ اِتنت۔ کس ءَ انچو توکل نیست اَت کہ دُژمن ءِ انگیر ءَ چہ دربئیت ءُ بروت ما دُرست مرگ ءِ ودار ءَ کنگ ءَ اِت اِنت بازیں جیڑگاں چہ پد ما ھمے آسر ءَ سر بیتیں کہ نی آیانی گون ءَ دیم پہ دیم جنگ ءَ ابید دگہ ھچ راہ ءُ در پَشت نہ کپتگ۔ من وتی ھمراھاں گوں گُشت: “براساں ما چاریں آتراپاں دُژمن ءِ انگیر ءَ اِنت مئے گور ءَ نہ آپ ھست نہ ورگی سامان۔ مار ءَ ساری ءَ دُژمن ءِ سر ءَ اُرش کنگی اِنت ءُ پہ دلیری وتی ساہ نَدر کنگی اِنت مرگ ھر وڑ ءَ ھست اِنت پرچا ما اے ترک ءَ مہ جنیں ءُ بہ مریں اگاں مئے کسمت جوان بوت ما چرئے جنگ ءَ چہ باج بریں ءُ درکپگ ءَ سوب مند بہ ایں ھمراھاں منی دانکانی سر ءَ تپاک کُت۔ دُرستاں چہ پیسر من توپک چِست کُت ءُ سنگر ءَ چہ دراتکاں منی ھمراہ ھم منی پُشت ءَ در کپان بوت اَنت تُرکاں تیرانی رگام مئے سر ءَ گوارینت اَنت من وتی دو ھمراہ کپگ ءَ دیست پُشت کنزگ ءِ ھچ وڑ نیست اَت من تیر گواری کنان ءُ دیم ءَ جُنزان اِتاں منی ھمراہ ھم منی ھمراہداری کنان اِتنت۔ منی چم ھون چکار اِت انت ءُ منا ھچ گندگ ءَ نہ یتک اناگہ ءَ منی پشت ءَ زوراں گوں چیزے لگ اِت من تتراِتاں ءُ بے ھوش بیتاں۔ وھدے ھوش ءُ سار ءَ اتکاں من الی میویا گپچ ءِ لوگ ءَ اِتاں۔من یک جوانیں نپادے ءِ سر ءَ تچک اِتاں الی ءَ ھوار بازیں ترک ءِ منی تھت ءِ چاریں نیمگاں اُوشتاتگ اِت انت وھدے منی چم پچ بیت اَنت الی جھل بوت وتی دست ءِ منی دست ءَ کُت ءُ جُست ءِ کُت، نی چون ئے تو؟من پاد آھگ لوٹ اِت بلے درد ءُ دُوراں مان پاد آھگ ءَ نیشت من ءَ انچو گُمان بوت کہ منی پُشت ءَ پدا یک تیرئے لگ اِت من پدا بے ھوش بیتاں سرجمیں یک ماھے ءَ من زندگی ءُ مرگ ءِ میان ءَ جنگ ءَ اِتاں۔ الی ءَ من ءَ یک دمانے ھم تھنا یل نہ دات آ جوانیں رنگے ءَ منی ھیالداری ءَ کنگ ءَ اَت۔ آئی ءَ وت منی ٹپ شُشتگ ءُ دارو ءُ درمان کُتگ اَنت وتی دستاں گوں منا ورگ وارینتگ ئے من اگاں کم وارتگ گُڑا آئی ءَ زور من ءَ وارینتگ مُدام منی سر ءِ وتی کُٹ ءَ کُتگ ءُ منی مید سمارتگ اَنت داں من واب شُتگاں آئی ءِ بازیں مھر اِت انت کہ من مَرگ پروش دات ٹپ وش بوھان بوت اَنت۔ یکروچے اَتک کہ من وت دیوال داشت ءُ وتی پاداں گوں اُوشتاتاں ھمک روچ الی ءَ منا باگ ءَ بُرت ءُ منی جان ءِ شُشت وھدے من دمبرتگ آئی ءَ من ءَ درچکے ءِ ساھگ ءَ نادینتگ منی تاکت گیش بوھان بوت۔ منا دُراہ بوگ ءَ الی ءَ دیست گُڈ آ باز گل ءُ شادان بوت ” نی چونے باریں؟ تتک کنئے یا نہ؟ یکروچے آئی ءَ بچکند ات ءُ منا جُست کت انا! من انگت گُشے نادراھاں آئی ءَوتی لنکک تراکینتنت ءُ بلاھیں ٹھکے جت ئے ءُ گُشت ئے زوت، باز زوت تو وش ءُ دُرْا بئے آئی ءَ منا باگ ءِ تھا تھنا یل دات ءُ لوگ ءَ شُت “ساھتے ءَ رند واتر بوت گڑا توپک ءِ آئی ءِ دست ءَ اَت ءُ آئی ءِ دیم ءِ رنگ مٹ بیتگ اَت ءُ آئی ءِ چم چو شُدیگیں پشی ءِ داب ءَ اِتنت “نی تو پیسری داب ءَ دراہ ءُ جوڑے، ھما وڈ ءَ تو ٹپی بوھگ ءَ چہ پیسر بیتگ ئے نی تو اے قابل ءِ کہ منی واماں تو دات بہ کن ئے منی بازیں وام ئے ترا گون سے سرانی وام کہ اشانی تہ ءَ دو منی برات اِتنت-

آئی ءِ چماں چہ ھون شنزگ ءَ اَت، چیری لُنٹ درھگ ءَ اَت وھدے تو زدگ اِت ءِ منی پادانی دیم ءَ کپتگ اِتے ، من ترا ارزانی ءَ جت کُتگ ات، بلئے بے سر ءُ گوشیں دژمن ءِ جنئگ تُرکانی ربیدگ نہ انت، من ترا پد ءَ ھما مردم جوڑ کنگ ءَ پد جنگ لوٹ اِت الی میویاگچ ءَ وتی بے دست ءُ گوش ءُ مجبوریں دژمن کدی ھم نہ جتگ انت ترا بے ھوشی ءِ جاور ءَ جنگ ءَ من وتی دامن ءَ چو پولنگ کت کناں”-

آئی ءَ توپک ءِ منی دست ءَ دات۔ اے توپک گُشے منی توپک ءِ ڈول ءَ اَت۔ منی توپک ءِ وڑ ءَ آئی ءَ ھم تیر پر اَت۔ ما دوئیں جنگل ءَ رویں وتی وتی نشانگ ءِ چکاس ءَ گریں منی زبان ءَ گُشے یکے ءَ کبلے جتگ ات۔ منی سر جھل اَت ءُ آئی ءِ ھمرائی ءَ راہ گپتاں ما انچو کہ جنگل ءَ سر بوتیں، آ منی دیم پہ دیم ءَ اُوشتات ءُ پرمان ءِ کت “ھمودا کہ توئے ھمودا بہ اُوشت “ما دوئیں پجیگ ءَ تیر گواری کنیں” آ منا جنگ ءِ رھبنداں گشگ ءَ اَت “نی منی اکل ءَ کار کُت من وتی توپک دور دات ءُ یک کر ءَ اُوشتاتاں” الی ءَ کوکار کت ءُ گشت تو چئے پَھم اِتگ کہ من ترا یک نیمگے اُوشتارین ءَ تئی سر ءَ تیر گواری کناں تاکہ دنیا منی سر ءَ بہ کندیت، کہ الی ءَ یک غیر مسلمے کُشتگ گوشان پچ کن شر گوشدار، ھما وڑ من گُشاں ترا ھما وڑ کنگی اِنت آئی ءِ لُنٹانی سر ءَ سوب مندیں بچکندے تالان بوت۔ من بے ترک ءُ توار اُوشتاتگ اِتاں “توپک ءَ چِست کن” آئی ءَ کوکار کت ءُ گشت “اگاں نہ من ترا کرگوشگ نام ءَ توار جناں”من جھل بیتاں زمین ءَ چہ توپک چست کُت “اے نیمگ ءَ پَچ تر” من آئی ءِ پرمان ءِ رد ءَ پچ تراِتاں۔

“منی نیمگ ءَ ٹک کن” من توپک آئی ءِ نیمگ ءَ ٹال کت، آئی ءَ ھم وتی توپک منی نیمگ ءَ ٹال کُت۔ آئی ءَ فائر کُت تیرے توار ءَ جنگل ءِ مُرگاں بال کت ءُ منا یات نہ اِنت کہ من ھم ٹیگر زور داتگ اَت یا نہ بس ھمے گندگ ءَ اَتک کہ آ ھوناں میچل اَت ءُ زمین ءِ امبازاں کپتگ اَت۔ من گمیگ ءُ ارمانیں دل ءِ تچان آ وتی امبازاں زُرت، بلئے ھزار اپسوز ءُ ارمان آئی ءِ ارواہ ءَ بال کُتگ ات۔ ھما روچ ءَ چہ پد من آئی ءِ چکانی ھاتر ءَ ورگی سامان پس گوک دگہ زلورتے سامان سر کناں کہ وتی پش کپتگیں روچاں بہ ٹگلین انت۔

ڈیو ءَ وتی کسہ ھلاس کُت ءُ سرے جھل کت ءُ زمین ءِ چنڈگ بندات کت۔ من گندگ ءَ اِتاں کہ آ وتی ارسانی دارگ ءَ بے سوب اِنت ءُ ارس چہ آئی ءِ انارکاں جھلاد دیم پہ گور جیگ ءَ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: لاگریں کپودر ءُ مئے چاگرد

نبشتہ کار: گلستان بلوچ

دی بلوچستان پوسٹ

یک روچے شَھر ءِ میانجی ءَ یک مردے کپودر بھا کنگ ءَ اَت گڑا یک مردے اتک ءُ ھمے دکان والا ءِ کِرّ ءَ جست ئِے کُت کہ کپودر ءِ نھِاد چِنچک انت ؟ دکاندار ءَ پسّو دات ءُ گْوشت کہ یک کپودرے ءِ نِھاد ھزار کلدار انت اناگت ءَ ھمے مرد ءِ چم یک لاگریں کپودرے ءَ کپت آئی ءَ نِھاد ءِ جُست کرت گُڑا دکاندار ءَ پسّو دات ءُ گْوشت کہ من اِے کپودر ءَ من بَھا کرت نہ کن اِیں پرچے کہ اِے منی گوھر کیمتی اِنت۔ گُڑا مردک ھیران بوت، دکاندار ءَ را جُست ئِے کرت اِے چون ؟ اِے کپودر وَ چَٹ لاگر ءُ ھلاس اِنت باند ءَ پوشی ءَ مِر اِیت دکاندار ءَ پَسّو دات ءُ گْوشت کہ اگاں اِے لاگریں کپودر مرچی منی کِرّ ءَ مہ بوتیں من ءَ اِے جاہ ءَ سر نہ بوتگ اِت آں، اولی ھُداوند ءُ دومی اِے لاگریں کپودر ءِ برکت اِنت۔

مرد ءَ اَبکّہ ءُ ھیران بوت جُست ئِے کرت کہ من تئی اِے گپّاں پَھمگ ءَ نہ اوں گُڑا دکاندار ءَ پسّو دات ءُ گْوشت ئِے ھر وھد ءَ منی کپودر ھلاس بنت گُڑا من ھمے لاگریں گپودر ءِ زُور اِین ءُ جنگل ءَ رو اِیں وتی دام ءَ جَن اِیں گُڑا ھمے لاگریں کپودر کُوکو کنت جنگل ءِ دُرھیں کپودر کاینت دام ءِ تہ ءَ من آیاں گِر اِیں پمیشکہ اِے لاگریں کپودر منی واست ءَ بلاھیں ارزشتے دار اِیت۔

اِے درستیں گپّانی اِشکنگ ءَ پد ءَ مرد ءَ ھمے لاگریں کپودر ءَ را بھا زُرت دیم پہ جنگل ءَ رھادگ بوت وھدے کہ جنگل ءِ سر بوت گُڑا ھمے لاگریں کپودر ءَ را یلہ ئِے دات ءُ دیم ءَ پہ وتی لوگ ءَ شُت دومی روچ ءَ وھدے کہ مرد بازار ءَ اتک گُڑا دکاندار ءَ توار کرت ءُ جُست کرت کہ ھالاں بہ دے چْوں بوت تئی کپودر ؟ مرد ءِ پسّو دات ءُ گْوشت کہ آ کپودر من جنگل ءَ برتگ ءُ یلہ کرتگ-

دکاندار سک ھیران بوت ءُ گْوشت ئِے کہ آ منی گوھر کیمتی بوتگ من ءَ پہ چارگ ءَ ھم دل نہ بوتگ تو برتگ ءُ جنگل ءَ یکہ کرتگ گُڑا مرد ءَ پسّو دات ءُ گْوشت کہ اگاں کسّے ءَ را پہ وتی راج ءَ دوستی ءُ مِھر نیست گُڑا آئی ءِ زند پہ من ارزِشت نہ دار اِیت۔

اگاں بِہ چار ئے مئے چاگرد ءِ تہ ءَ چُشیں بازیں لاگریں کپودر ءِ دروَر ھست کہ آ وتی براتانی کُشگ ءِ رَند ءَ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

رودراتکی بلوچستان ءِ جھمنندے ءِ لاش روکپتی بلوچستان ءِ تیابدپی شھر ءَ دزکپتگ –

ھالانی رد ءَ کشگ بیتگیں مردم رودراتکی بلوچستان ءِ دمگ دشت زریں بگ ءِ جھمنند بیتگ کہ روکپتی بلوچستان ءَ انی جھمنند بیتگ ءُ گوستگیں روچ ءَ وتی سنگتانی ھمراھی ءَ چھبار ءَ شتگ ءُ اود ءَ پد ءَ آئی ءِ لاش مروچی دزکپتگ –

بیران بیتگیں مردم ءِ پجار یونس ء ملا داؤد پنام ءِ کامریڈ میراس ءِ نام ءَ زانگ بیتگ کہ آ ساگر گوادری نام ءَ ھم پجارگ بیتگ –

وئیل ءِ سبب زانگ نہ بیتگ اَنت بلے گوست ءَ چوشیزن وئیلانی بارو ءَ راجدوستانی تکاں پاکستانی چیریں ادارھاں دزمانجنی ءِ بھتام اش جتگ-

زانگ بہ بیت رودراتکی بلوچستان ءَ پوجی زوراکی ءُ لشکر کشیانی سبب ءَ ھزارانی کچ ءَ مردم روکپتی بلوچستان ءَ جھمنند اَنت کہ اود ءَ آیانی کُشت ءُ کوش ھم بیگ ءَ اَنت-

دبئی انٹرنیشنل کرکٹ پٹ ءَ دو شمبے روچ ءَ بوتگیں ٹی ٹوئنٹی ورلڈ کپ کرکٹ گوازی ءَ افغانستان ءَ اسکاٹ لینڈ پروش داتگ –

افغانستان ءِ کپٹن محمد نبی ءَ ٹاس کٹیتگ ءُ اولسر ءَ بیٹنگ کنگے پیسلہ کتگ – افغانستان ءِ لیبیاں جوانی ءَ گوازی کنان ءَ بیست اووراں چار وکٹانی تاوان ءَ یکسدو ءُ نود رن جوڈ کرتگ –
پسوئی ءَ اسکاٹ لینڈ ءِ لیبیاں بیٹنگ کنان ءَ بس شست رن جوڈینت چدو دیم افغانستان ءِ بولراں گیشتر رن جوڈ کنگ ءَ نہ اشت درُست آؤٹ کتاں –

افغانستان ءِ نیمگ ءَ نجیب اللہ ءَ جوانیں لیب پیش داشت ءُ پنجاہ ءُ نُھ رن جوڈ کرت وھدیکہ رحمان اللہ چِل ءُ شش ءُ حضرت اللہ ززئی ءَ چِل ءُ چار رن جوڈ کت –

اسکاٹ لینڈ ءِ نیمگ ءَ سفیان شریف ءَ دو وھدیکہ جوش ڈیوی ءُ مارک واٹ ءَ یک یک وکٹ گپت – افغانستان ءِ نیمگ ءَ مجیب الرحمن ءَ پنچ راشد خان ءَ چار ءُ نورالحق ءَ یک یک لیبی ءِ آؤٹ کت –

ٹی ٹوئنٹی ورلڈ کپ ءِ دیم گوازی ساؤتھ افریقہ ءُ ویسٹ انڈیز ءُ نیوزلینڈ ءُ پاکستان ءِ میان ءَ مروچی بوھگ انت –

شال ءَ بلوچ اسٹوڈنٹس ایکشن کمیٹی سنگت الیاس بنزہ ءَ واحد بکش بلوچ ءِ سروکی ءَ یک نیادے برجم دارگ بیتگ، نیاد ءَ کنر رفیق بنزہ ءِ سروک ءُ نبیل نود کارگشاد گچین بیتگ –

نیاد ءَ دیوان ءِ بنگپ پجاری باوست، ھنکینی سرکیول، گل ءِ رھبند، دمگی ءُ میان استمانی سیاسی جاورھال، آؤکیں گامگیجاں دیوان ءِ بندات چہ پجاری باوست ءَ بندات بیتگ –

دیمتر ءَ دومی بن گپ ءَ ھنکینی باسک ءَ ھنکینی درونت ونتگ ءُ ھنکین ءِ نیمگ ءَ چہ زرتگیں شَور ءُ سَلہ گُشتگ انت۔ گل ءِ رھبندانی تہ ءَ دیوان ءَ تران کنوکاں گپ کنان ءَ گُشتگ کہ کسے کہ گل ءَ ھوار بیت گڑا بزاں کہ آئی ءَ وت ءَ پہ گل ءَ ندر کُت ءُ وتی کُربانی ءُ تچکاری ءَ گوں ادارہ ءَ دیم ءَ برگ ءِ ڈُبہ زوریت۔ مئے گل ءِ کار بلوچ راجدوستی اِنت کہ بلوچ راج ءَ جمھوری بنیاد ءَ یک مُشت ءُ تپاک کنگ اِنت۔ بلوچ ءَ را بلوچ بیگ ءِ سکین دیگ اِنت۔ اے مئے درستانی زمہ واری اِنت کہ ھر کجام پڑ ءُ جاہ ءَ مارا بساک ءِ لیکہ دیم ءَ برگی اَنت ما کہ گوں وتی گل ءَ ستک بہ ایں تاں وتی راج ءَ ستک بہ ایں مارا گل سینگارگی اِنت ءُ گل ءِ شِگل ءَ راج سینگارگ بیت اِنت مارا وتی ادارھاں بِگر داں وتی ھلک ءُ دمگاں وتی لیکہ سر کنگی اِنت۔ وتی ایردستیں راج ءُ آئی ءِ نودربر بڈ ءَ بندگی انت ءُ آیاں سیاست ءِ سکین دیگی اِنت چیا کہ سیاست بیت گر ا راج سینگارگ بیت راج پوہ بیت ءُ وتی ارزشت ءَ زانت۔ بگیر ءِ سیاست کنگ ءَ پہ ما ھچ پش نہ کپتگ۔

تران کنوکاں گشت کہ بساک ءِ ھر سنگت ءَ کتاباں گوں مھر کنگی اِنت ءُ کتاب ءِ دود ودی کنگی اِنت ۔ ھر سنگت ءَ را وتی کش ءُ گْوراں سیاسی چاگردی ودی کنگی اِنت۔ وانگ ءُ زانشت ءِ راہ یلہ دیگی نہ اِنت گُڑا ما سوبمندی ءِ نیمگ ءَ جُنزان بیت کنیں۔

تران کنوکاں دمگی ءُ میان استمانی سیاسی جاورھال ءِ سر ءَ گپ کنان ءَ گوشت کہ دنیا ءِ سیاست مُدام تاکتور ءِ لنکُک ءِ سر ءَ اِنت ھما کہ تاکتور اِنت آ دنیا ءَ ھُکمرانی کنت۔ دنیا ءِ تہ ءَ ھر وھد ءَ چندے تاکتاں وتی بُرزی دارگ ءِ واستا دگہ راج گٹگیر کرتگ ءُ آیانی زمین، دود، زبان، زرکاری ءُ چاگردی سنچ تباہ کُتگ اَنت۔ دنیا ءِ چاگردانی تہ ءَ گیشتر تباھی ہما وھد ءَ کیت کہ باپاری دور دیم ءَ کیت۔ باپاری دور ءِ تہ ءَ انسان چہ اشتراکی سوچ ءَ درتک ءُ فردی سوچ ءِ تہ ءَ سرجم بیت اِنت دنیا ءِ تہ ءَ مدام جنگاں بدلی آورتگ لھتے ءَ پہ چاگرد ءِ شرّی ءَ جنگ کُتگ ءُ لھتے ءَ وتی تاکت ءِ ودّینگ ءِ واستا کسانیں راج ایردست کُتگ انت۔ مرچی دنیا ءِ تہ ءَ زرکاری جنگ اِنت کہ تاکتور دیمروئی ءِ نام ءِ سر ءَ وتی کار ءَ بار ءَچلائین ایت مرچی دیمروئی ءِ نام ءِ سر ءَ تاکتوراں این جی او دروشم ءَ راجانی سر ءَ وتی تاکت برجم داشتگ۔ کسانیں راج انچو ایر جتگ انت ءُ مرچی ھیراتی جور کُتگ انت انسانی ھکانی ادارہ کہ جوڑ بیتگ انت بلے ھمے ادارہ تاکتور ءِ کاردار جور بیتگ انت۔ مئے بلوچ راج ءِ جاور مرچی انچوش انت کہ بلوچ وتی جند ءَ چہ درتکگ ءُ دنی چیزانی رند ءَ کپتگ ما مرچی وتی جند ءِ راجی تاکت ءِ ارزشت ءَ نہ زانگ ءَ ایں ءُ کسان کسانیں ٹولیاں بھر بیتگیں مئے جیڑہ امینچو باز کنگ بیتگ انت کہ ما یک جیڑھے گریں دومی جیڑہ سر ءَ چست کنت۔ ما انچو کسان کسانیں جیڑھاں گیروشگ اِنت کہ مئے جیڑگ ھم کسان بیتگ۔ مارا لوٹ ایت کہ وتی راجءُ وتی راج ءَ گوں بندوکیں ھر ھما چیز ءَ بہ زیریں کہ مارا یک راجے جوڑ بئیگ درکار انت۔ وتی راج ءَ گوں سنجیدگی بیگی اِنت کہ لوٹ ءِ زلورت اِنت اگاں ما مرچی نہ جیڑیں ءُ املی پڑا اھوار نہ بہ ایں گڑا پہ ما ھچ نہ بچیت۔

دیوان ءِ گُڈی بھر ءَ بنزہ ءِ کابینہ سنگت گچین کنگ بیت انت۔ بنزہ کابینہ ءِ تہ ءَ بنزہ کارمستر : کنّر بلوچ، کمک کارمستر: قدیر بلوچ، کارگشاد: نبیل نود بلوچ، کمک کار گشاد: داؤد بلوچ، شنگکار: سلام بلوچ گچین کنگ بیت انت گُڈسر ءَ نوکیں گچین بیتگیں سنگت گل ءِ آئین ءِ ھساب ءَ سوگند دیگ بیت انت۔

بیگواھیں انسانی ھکّانی باسک ءُ ایکٹویسٹ راشد حسین ءِ زورانسری آوار جنی ءِ بگیری ءَ دوشمبے ءِ روچ ءَ چاگردی رسانکدر ٹوئیٹر یک کمپئینے برجم دارگ بوتگ ، چریشی ءَ بلوچ سوشل میڈیا ایکٹیویسٹس ءَ ھوار پشتون ، سندھی ءُ نودربراں ٹویٹ کتگ ءُ راشد حسین ءِ زورانسری آوار جنی ایر جتگ ءُ دیم ءَ آرگ ءِ لوٹ کتگ-

سندہ ءَ چہ بیگواھیں مردمانی ھاتر ءَ کار کنوکیں انسانی ھکّانی گل وائس آف سندھی مسنگ پرسنز ءَ گْوشتگ کہ راشد حسین بلوچ ءَ فری ٹرائل ءِ موہ دیگ بہ بیت-

چاگردی رسانکدر ٹوئٹر ءَ بیگواھیں بلوچ باسک راشد حسین ءِ سے سال ءَ دراجیں بیگواھی ءِ بگیری ءَ ٹوئیٹر کمپئین برجم دارگ بوتگ-

ٹوئٹر کمپئین ءِ جار بلوچ سوشل میڈیا ایکٹویسٹس ( بی ایس ایم اے) نیمگ ءَ چہ کنگ بوتگ-

وائس فار سندہ مسنگ پرسنز گل ءِ ہینڈل ءَ چہ یک ٹویٹے ءِ تہ ءَ گْوشتگ کہ بلوچ باسک ءِ زورانسری آوار جنی ءُ پاکستان ءَ آرگ ءِ گپ پاکستانی رسانکدراں وت پدر کتگ-

گل ءَ دیمتر ءَ گْوشتگ کہ بلوچ باسک آمیدگس ءَ بیار اَنت ءُ فری ٹرائل جِ موہ بدے اَنت ئِے اگاں آئی ءِ سر ءَ چُشیں بھتامے ھست گُڑا آمیدگِس آئی ءَ سزا دنت-

بیگواھیں راشد حسین ءِ گْھار فریدہ بلوچ ءَ ٹوئیٹ کتگ ءُ گْوشتگ کہ راشد ءِ گناہ ھمے بوتگ کہ آ وتی مردمانی ھک ءُ زند ءِ درگت گپ ئِے کتگ اگاں گناھگارے گُڑا آمیدگس تئیگ اَنت ءُ لککوک ھم تئی ، وکیل ھم تو پاھو دیوکیں جلاد ھم تو بس مارا ھمے بہ گوش اِت منی برات گوستگیں سے سالاں شمئے کر ءَ اِنت آ کجام ھال ءِ تہ ءَ اِنت مارا پسّہ بہ دے اِیت-

بلوچ نودربر راھشون ڈاکٹر مھرنگ بلوچ ءَ وتی ٹوئیٹ ءِ تہ ءَ گْوشتگ کہ راشد حسین بیگواھی ءَ سے سال سرجم بوتگ بلے تاں مروچی آئی ءِ درگت ءَ گوشگ بوگ ءَ نہ اِنت ، وفاقی وزیر انسانی ھکوک ءَ ھم راشد حسین آوار جنی ءِ گپ پدر کتگ-

مھرنگ بلوچ ءَ گْوشتگ کہ راشد یل کنائینگ ءَ آئی ءِ مات ھمراہ بہ بیت-

بلوچ سوشل میڈیا ایکٹیویسٹ فتح بلوچ ءَ وتی ٹوئیٹ تہ ءَ گْوشتگ کہ راشد حسین مئے مُھریں توار بوتگ کہ ریاست وتی وتگڑیں بھتاماں چہ راشد بیگواہ کنگ بے زمہ بوت نہ کنت-

بیگواھیں بلوچ راھشون ڈاکٹر دین محمد بلوچ ءِ چُک ءُ وائس فار بلوچ مسنگ پرسنز ءِ راھشون سمی دین محمد ءَ وتی ٹوئیٹ ءِ تہ ءَ گْوشتگ کہ راشد ءِ بیگواھی ءَ سے سال سرجم بوتگ راشد زندگی ءُ سلامتی ءِ ھال ءِ ھچ وڑیں گپ دیم ءَ نیتکگ-

دیمتر ءَ گْوشتگ ئِے دزگیری ءِ پدری پاکستانی رسانکدراں کتگ بلے پد ءَ ھم آ آمیدگِس ءَ نیاورتگ -فری ٹرائیل ءِ ھک ھرکس ءَ دیگ بہ بیت اگاں راشد کُتکار ایں گُڑا آئی ءِ پیسلہ ءَ آمیدگِس کنت-

زانگ بہ بیت راشد حسین دو سال ءَ ساری 26 دسمبر 2018 ءَ متھدہ ارب امارت ءَ چہ دزگیر کتگ ءُ پد ءَ بیگواہ کتگ چریشی ءِ ھاتر ءَ ایمنسٹی انٹرنیشنل ءَ ھوار دگہ انسانی ھکّانی ادارھاں متھدہ ارب امارات ءَ چہ آئی ءِ دیم آرگ ءِ لوٹ کتگ وھدے کہ بلوچ نیشنل موومنٹ ءُ ریلیز راشد حسین کمیٹی ءِ نیمگ ءَ یورپ ءَ ھوار دگہ ڈیھاں راشد حسین ءِ زورانسری آوار جنی ءِ بگیری ءَ زھرشانی کنگ بوتگ-

راشد حسین ءِ مات ءُ برازتک مھزیب بلوچ ءَ گوستگیں دو سالوں شال ءَ کراچی ءَ پریس کلب ءِ دیم ءَ وتی رھرشانی ءَ نکش کنگ ءَ اَنت ءُ اسلام آباد بیگواھیں مردمانی نندانک ءُ زھرشانی ھوار بوتگ اَنت-

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی ءَ چار ھزار ءُ چار سد ءُ ھپتاد ءُ پنچ روچ سرجم بوتگ – حواران بلوچ، دشتی بلوچ ءُ دگہ مردماں بنجل ءَ اتکگ ءُ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ھر انسان ءِ زندگ بیت ءُ مریت ھکئیں انسان دوست ھما بنت کہ وتی ھاتر ءَ ناں بلکہ دلیری ءُ تمردی ءَ انسانیت ءِ ھاتر ءَ زندگ بنت ءُ نمیران بنت – پرایمنیں جھد ءِ ھاتر ءَ وڈ وڈیں سکی ءُ سوریانی تہ ءَ گوز انت بلے دپ ءَ چہ اُپ ءِ نہ کش انت ءُ ناکہ مایوس بنت وتی سیاد وارس ھمبل لوگ جاہ ءُ چک دگہ دراھیں وشیاں یک نیمگ ءَ کن انت ءُ وتی پگر نزریہ گوں پُرایمنیں جھد کن انت ھنچوش کہ مئے کماشاں انسانیت ءِ ھاتر ءَ بازیں اڈ ءُ جنجالانی دیمپانی دلیری ءَ گوں کتگ –

ماما قدیر بلوچ ءِ گوشگ ات کہ مئے وشیانی ناں بلے سکی ءُ سوریانی امبار ئے- اے وھدی بلوچستان ءَ پنچمی پوجی لشکر کشی بوتگ سال دوھزار ءَ بگر تاں روچ مروچی ما وتی ھزاراں بلوچ پرزند شھیدی ءَ دیستگ انت بلکیں آھاں جون چِست کُتگ انت – ھزارانی کچ ءَ بلوچ ورناہ چُک ءُ زالبول کماش زنداناں ازیت سگگ انت – لکانی کچ ءَ در پہ در بوتگ انت – جاہ ءُ دیار سوچگ بوتگ انت، مال ءُ مڈیانی لٹ پُل برجاہ انت زوراکی ءِ سیمسر سرگوز بوتگ انت گوستگیں درسیں چہ اے رندی ھاکم وتی درسیں تاکت ءَ کارمرز کنگ ءَ انت بلے ھاکم مروچی ھم تُرس پریشانی تہ ءَ انت –

زورگیریں پاکستانی پوج ءِ بنجاھی بنجل ءِ سر ءَ بی ایم گولہ آس داتگ – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ کاھان ءَ پوجی بنجل ءِ سر ءَ بوتگیں اُرش ءِ زمّہ واری منّ اِتگ گوشتگ کہ مئے سرمچاراں کاھان ءَ میٹ وڈھ ءِ میتگ ءَ زورگیریں پاکستانی پوج ءِ بنجاھی بنجل ءِ سر ءَ بی ایم گولہ آس داتگ –

جارکش ءَ گوشتگ کہ بی ایم گولہ بنجل ءِ تہ ءَ کپتگ انت ءَ چریشی ءَ دژمن پوج ءَ جانی ءُ مالی تاوان ءِ دیمپانی بوتگ –

جارکش جئیند بلوچ ءَ گڈسر ءَ وتی درشان ءِ تہ ءَ گوشتگ کہ مئے گل بی ایل اے اُرش زمّہ واری منیت ءُ مئے اُرش وتی مکسد ءِ گرگ تاں برجاہ مان انت –

بلوچستان لبریشن فرنٹ ءَ دشت ءَ پاکستانی پوج ءِ بنجل ءِ سر ءَ بیتگیں اُرش ءِ زمہ واری منّ اِتگ-

بی ایل ایف ءِ جارکش میجر گوھرام بلوچ ءَ رسانکدراں شنگ کرتگیں درشان ءِ تہ ءَ گشتگ کہ کیچ ءِ دمگ دشت کڈان ءَ ھستیں چوکی ءِ سر ءَ یکشمبے ءِ بیگاہ ءَ راکٹ ءُ مزنیں سلاھانی گون ءَ اُرش کرتگ – اُرش ءَ زورگریں لشکر ءَ بازیں کچے ءَ جانی ءُ مالی تاوانانی دیمپانی کنگ کپتگ –

میجر گوھرام بلوچ ءَ گشتگ کہ زورگریں لشکر ءِ سر ءَ اُرش بلوچستان ءِ آجوئی ءَ داں برجاہ بنت –