TBP Balochi

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ وتی یک درشانی ءَ گُشتگ کہ جینوا کنونشن ءِ آرٹیکل ءِ تہ ءَ زالبول ءُ بید سلاہ بستگیں مردم کہ آئی ءِ سیادی ھر کجام جنگی مردمان انت آئی ءِ کُشگ وتی جاہ ءَ آئی ءَ تاوان دیگ جنگی جرم ءُ انسانیت ءِ بگیری ءَ ھوار بیت – پاکستان ءِ تہ ءَ ناکہ تھنا جنگی جرم یا انسانی ھکانی لگتمالی بوگ ءَ انت بلکیں وتی ھم رھبندانی بگیری ءَ دارگ انت –

ماما قدیر ءَ وتی شنگ کرتگیں تامری درشان ءِ تہ ءَ گوشتگ کہ مروچی پاکستانی پوج ءَ کیچ ءِ دمگ تمپ گومازی ءَ لشکر کشی ءِ میان ءَ سیاسی رھشون گلام نبی ءِ وارس بی بی کیگد بلوچ شھید کرتگ ءُ پنچ مردم زورانسری آوار جتگ ءُ بیگواہ کرتگ انت کہ آھانی پجار مکبول ء ابراھیم، خفا ء سیٹ علی، عالم ء سلام، زمیر ء حسین ناماں بوتگ انت –

ماما قدیر ءِ گوشگ ات کہ بی بی کیگد اولی زالبول نہ انت کہ آ پاکستانی پوج ءَ یکجاھی سزا ءَ شھید کرتگ اے بیست سالانی تہ ءَ پاکستان ءَ حلیمہ بلوچ، شھناز بلوچ، بختی بلوچ ءَ ھوار دگہ زالبول شھید کرتگ انت بازینے آوار جتگ اَنت –

ماما قدیر ءَ گوشتگ کہ مئے ھچ نگوشگ ءَ یکشل ءَ پاکستانی پوج ءَ زلم زوراکی ءَ گیش کنگ انت من پاکستان ءِ سول سوسائیٹی ءَ چہ لوٹ کناں کہ آ پاکستان ءِ بگیری ءَ رھبند ءُ کانودانی رِد ءَ توار چست بہ کن انت اشی ءِ ھمراھی ءَ میان استمانی ادارھاں چہ لوٹ کن آں جنیوا کنونشن ءِ رِد ءَ بلوچ چکچینی ءِ درگت ءَ گامگیج بہ زوریت ءُ پاکستان ءِ سر ءَ زور بہ دنت اشی ءَ ابید من سوشل میڈیا ایکٹویسٹ آں لوٹ کناں کہ آ ترامجاھاں بلوچانی توار جوڑ بہ بنت –

دومی نیمگ ءَ گومازی وئیل ءِ درگت ءَ بلوچ یکجاھی کمیٹی کراچی ءَ وتی درشان ءَ گوشتگ کہ اے اولی وئیل نہ انت کہ پوج ءِ نیمگ ءَ چہ بوتگ بلکیں اے وڑیں وئیل ھمک روچ گیشتر بوان انت –

درشان ءَ گوشگ بوتگ کہ سیکورٹی پوج ءِ نیمگ ءَ بؤکین اے وئیلانی تہ ءَ حیات بلوچ ءِ مرگ ءَ چہ پیش ھم بازیں اے دابیں وئیل بوتگ انت ءُ آئی ءَ چہ پد ھم یکشل ءَ برجاہ انت بندی ءِ نام ءَ نہ زان انت کہ آئی ءِ ھستیں درور بانک کیگد بلوچ وئیل انت کیگد بلوچ ءِ وئیل ایشی ءِ گواھی دنت کہ سیکورٹی پوج پھازگی ابید وتی سرکشی ءَ دراتکگ کہ سک باز ھترناک انت –

بلوچ یکجھتی کمیٹی ءِ گوشگ انت کہ ما بلوچستان ءِ سرکار ءَ ھوار وزیر آعظم ءَ چہ لوٹ کن ایں کہ اے وئیل ءِ درگت ءَ جوانی ءَ پٹ ءُ پول بہ کنت –

بلوچستان لبریشن فرنٹ ءِ جارکش میجر گوھرام بلوچ ءَ بلوچ رھشون ڈاکٹر اللہ نزر بلوچ ءِ کندھار ءَ کوش ءِ گپ رد کرتگ ءُ دروگ گُشتگ ءُ اے دروگیں گپ پاکستانی چیریں ادارہ آئی ایس آئی ءِ سوشل میڈیا ٹرولرزاں شنگ کرتگ –

میجر گوھرام بلوچ ءَ گُشتگ کہ دروگیں پندل کنگ، دروگیں گپ، ردیں ھال ءُ گپانی شنگ کنگ ءَ پاکستان ءُ آئی ءِ چیریں ادارہ ءُ غلامیں میڈیا ءِ پدراھی اِنت – اے دروگیں گپ ءِ شنگ کنگ ءَ آئی ایس آئی یک نیمگے ءَ دو ھمساھگیں ڈیھ اوگانستان ءُ ھندوستان ءِ بارو ءَ شکی ءِ تالان کنگ لوٹ اَنت دومی نیمگ ءَ بلوچ آجوئی زرمبشت ءَ ھمساھگانی ھلاپ ءَ پاکستان ءِ ھلاپ ءَ تلبداری ءِ جنگ ءِ وڑ ءُ پیم ءَ پیش کنگ ءُ زیردستیں بلوچستان ءَ پاکستانی پوج، چیریں ادارہ ءُ آئی ءِ تلبداریں ڈیتھ اسکواڈز ءِ جنگی جرم ءُ انسانیت ءِ ھلاپ ءَ جرمانی پیش کنگ ءِ جھد ءَ کنگ ءَ اِنت –

جارکش ءَ گُشتگ کہ اے وڑیں بے بنیں گپانی زور ءَ دمگ ءَ گیشتر اوگانستان ءِ ھلاپ ءَ پاکستانی برجاھیں پالیسی ءُ تلبداری جنگ ءَ دلگوش ءَ ترینگ لوٹ ایت –

بلوچستان ءِ دمگ کیچ ءِ بنجاھی شھر تربت ءَ سر بیتگیں ھالانی رد ءَ کیچ سول سوسائٹی ءُ انجمن تاجران ءُ سیاسی پاٹیانی ھمگرنچیں نیاد سخی ھاؤس ءَ کیچ سول سوسائٹی کنوینر التازسخی ءِ چیردستی ءَ برجم دارگ بیتگ –

نیاد ءِ بندات پاک تاک ءِ ھواری ءَ بیتگ ءُ نیاد ءَ آل پارٹیز کیچ ءَ کنوینر نصیر احمد گچکی ءِ مات ماجدہ، کیچ ءِ کلانیں وکیل مصطفیٰ احمد گچکی ءُ ھدامرزیانی واستا دوا کنگ بیتگ اَنت –

نیاد ءَ تربت پریس کلب ءِ باسک اسد اللہ بلوچ، ایاز اسلم، طارق مسعود جاندراھی ءِ واستا دوا کنگ بیتگ اَنت –

نیاد ءَ کرونا نادراھی ءِ جاورھالانی سر ءَ گپ ءُ تران بیتگ ءُ گوشگ بیتگ کہ تربت ءِ کش ءُ گوراں ھر روچ کرونا نادراھی ءِ سبب ءَ مردم مرگ ءِ ارجان بیگ ءَ اَنت –

آیاں گُشتگ کہ انتزامیہ ءِ نیمگ ءَ لاک ڈاون کنگ ءِ پیسلہ کنگ جوان اِنت بلے لاک ڈاؤن ءِ سبب ءَ پیش اتکگیں جاورھالانی سر ءَ چار ءُ ٹپاسی کنگ المی اِنت لاک ڈاؤن ءِ سبب ءَ روزانداری مزدور ءُ گریب ءُ نیزگاریں باز اسرمند بنت-

وھدیکہ اے جاور ھال ءِ ڈسٹرک سول ھسپتال ءِ جاورھال نا بروبری اِنت اود ءَ ڈیٹا انٹری ءَ ھوار ڈاکٹر نیستی اِنت چریشی ءَ نادرھاں بازیں جیڑھانی دیمپانی اِنت ءُ ویکسینیٹڈ ءِ مھلوک ءِ انٹری ءَ ھم دشواری اِنت –

آیاں گُشت کہ مھلوک ءِ انٹری ءِ ھم اسرمند اَنت ھمے وڑ ءَ کیچ ءِ بازیں جاھاں پیسر ءَ مھلوک ءَ اولی ڈوز جنگ بیتگ اَنت بلے دومی ڈوز جنگ نہ بیتگ اَنت –

نیاد ءَ گوشگ بیتگ کہ چریشانی تہ ءَ شیخانی بازار، خلیل آباد ھوار اَنت نیاد ءَ لوٹ کنگ بیتگ کہ کرونا نادراھی ءِ سبب ءَ جاورھال ءِ چاران ءَ کیچ ءِ ایمرجنسی جنگ بہ بیت ءُ ڈی ایم اے ءِ رول اے وھد ءَ ناسرجم اِنت پی ڈی ایم اے وتی زمہ واریاں سرجم بہ کنت ءُ اے جاورھالاں مھلوک ءِ کمک ءَ بہ کنت ءُ مھلوک ءَ ریلیف ءِ سرکنگ ءِ واستا سیاسی پاٹی ءُ انجمن تاجراں کیچ ءَ ھم وتی ھمراھی ءَ بہ زور ایت دانکہ ھکداریں ھک دیگ بہ بیت اِنت –

نیاد ءَ بھر زیروکیں مردماں گوست ءَ بجلی ءِ نہ بوگ ءِ پریشانی ءِ بارو ءَ گپ کنان ءَ گوشتگ کہ مھلوک اے گرمی ءَ ناوشیں جاورانی دیمپانی اِنت واپڈا یک بس بنڈے ایران یک ریاستے ءِ آ مسامانی پاسداری ءَ بہ کن اَنت –

اے واپڈا ءِ تھ ئِے پیسلہ ءُ پندلی اَنت دانکہ مھلوک ناوشیانی دیمپانی کنگ ءُ مھلوک ءَ کابل بہ دنت وھدیکہ بدل ءَ مھلوک ءَ بجلی دیگ بیگ ءَ نہ اِنت –

وھدیکہ مھلوک ءِ دشمنی ءِ پالیسی اِنت واپڈا ءَ اگاں وتی اے رویش بدل نہ بیت اَنت گڑا مھلوک لاچار بیت زھرشانی ءِ درچ ءِ راہ ءَ گپت اِنت ءُ چریشی ءَ بدامنی ءَ پیداک بیت کُت کنت –

سربوتگیں ھالانی رِد ءَ گوستگیں شپ ءِ ادار دہ ءَ تمپ ءِ دمگ گومازی ءَ ناشناسیں سلاہ بندیں مردماں پوجی پانگس ءِ سر ءَ اُرش کتگ، اُرش زمہ واری سلاہ بندیں گل بی ایل ایف ءَ منّ اِتگ –

دمگی مردمانی رِد ءَ اُرش گومازی سری بازار ءَ برجاھیں ماروار پوجی پانگس ءِ سر ءَ کنگ بوتگ، اُرش ءَ پاکستانی پوج ءَ جانی ءُ مالی تاوان ءِ دیمپانی بوتگ ارشکار درآیگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءِ ادار دہ ءَ گومازی سری بازار ءَ پاکستانی پوج ءِ ماروار پانگس ءِ سر ءَ راکٹ اُرش ءِ کتگ – جارکش ءَ گوشتگ اُرش ءِ آسر ءَ زورگیریں پاکستانی پوج ءَ جانی ءُ مالی تاوان ءِ دیمپانی بوتگ –
آئی ءَ گوشتگ کہ بلوچستان ءِ آجوئی ءَ تاں اے اُرش ھمے وڑ برجاہ مان انت –

بلوچستان ءِ تیابدپی شھر گوادر ءَ تَھ آپی ءِ جاوراں مھلوک تکانسر، شمبے ءِ سھب ءَ شھری یک رندے پد ءَ دگانی سر ءَ درکپتگ ءُ زھرشانی اش بندات کرتگ –

شھریاں بازیں کچے ءَ ڈیپ دی روڈ بند کرتگ ءَ ھر وڑیں روگ ءُ آیگی راہ ءُ در بند کرتگ اَنت –

ھمے وھد ءَ زھرشانی کنوکاں گوشتگ کہ سی پیک ءِ نام ءَ گوادر ءِ شھر ءِ مردم تنیگیں لُنٹاں کنگ بیگ ءَ اَنت –

آیاں گُشتگ کہ سرکار گوادر ءَ آپ سر کنگ ءُ دگہ بنکی آسراتیانی سرجم کنگ ءَ یک تک ءَ بے سوب بیتگ ءُ گوادر ءِ دیمروئی ءِ نام ءَ رسانکدراں سرکاری نیاد بس برجاہ اَنت راستیں گپ ایش اِنت کہ گوادر روچ پہ روچ پُشت ءَ روان اِنت ءُ اد ءَ بنکی جھمنند جتا جتائیں پندلانی رنگ ءَ لَڈ ءُ بار ءَ لاچار کنگ بیگ ءَ اَنت –

زھرشانی کنوکاں گوشتگ کہ ھما شھر ءَ کہ ترمپے آپ پہ نک ءِ تر کنگ ءَ مہ بیت گڑا اود ءَ دیمروئی ءِ نام ءَ مھلوک ءِ زند ءِ گھتر بیت نہ کنت –

زانگ بہ بیت بلوچستان ءِ تیابدپی شھر گوادر ءَ ھمے ماہ ءِ بنداتی ھپتگ ءَ داں انیگ ءَ یکشل ءَ آپ ءُ بجلی ءِ نہ بوگ ءِ سر ءَ مھلوک دگانی سر ءَ گندگ بیگ ءَ اَنت، تنی وھدی آپ ءُ زند ءِ دگہ بنکی آسراتیانی سرجم کنگ ءَ سرکار ءِ گامگیج گندگ بیگ ءَ نہ اَنت –

سرکاری تکاں اے ٹاہ یکشل ءَ پیداگ اِنت گوادر ءَ دراھیں آسراتی سرجم کنگ بیگ ءَ اَنت بلے گوادر ءِ مھلوک ءِ نُک تنی وھدی پہ ترمپ ءِ آپ ءَ تلوسگ ءَ اِنت –

بازیں سرکار اتکگ ءُ شتگ اَنت ھرکس ءَ وتی وتی باریگ ءَ گوادر ءَ ھوار بلوچستان ءِ دگہ جاھانی دیمروئی ءِ بارو ءَ گپ جتگ اَنت بلے انگت ءَ بلوچستان ءَ بازیں جاھاں نا آپ ورگ ءَ گندگ ءَ کیت نا زند ءِ دگہ آسراتی –

مھلوک ءِ زند ھما آپانی تہ ءَ بندوکیں اِنت کہ اود ءَ موسمی ھورانی پد ءَ داں مھلوک وتی گزران ءَ کنگ اِنت بلے اگاں بلوچستان ءَ پہ وھد ءُ موسماں ھور مہ گوار اَنت گڑا بلوچستان ءِ بازیں جاہ تَھ آپی ءِ دیمپان بنت –

لشکر کشی ءِ وھد ءَ پاکستانی پوج ءَ یک زالبولے لَٹ ءُ کُٹ کرتگ کہ چریشی ءِ سبب ءَ آ بیران بیتگ ءُ ھمے وڑ یک ورنایے ھم پوج ءَ دزگیر کرتگ ءُ برتگ –

بلوچستان ءِ دمگ کیچ ءَ پاکستانی پوج ءَ لشکر کشی کنان ءَ زالبول ءُ چُک لَٹ ءُ کُٹ کتگ اَنت ءُ لوگانی گرانھادیں مڈی دز اِتگ ءُ برتگ اَنت –

گیشیں ھالانی رد ءَ کیچ ءِ دمگ گومازی ءَ پاکستانی پوج ءَ بی این ایم ءِ گوستگیں وائس چیئرمین غلام نبی بلوچ، سیٹ پُلان، کریم داد، مولابکش، سیٹ علی ءُ غلام نبی ءِ سیادانی لوگانی سر ءَ بیڑ برتگ ءُ چُک ءُ زالبول لَٹ ءُ کُٹانی نشانگ کرتگ اَنت ءُ لوگانی مڈی دز اِتگ ءُ برتگ اَنت –

دمگی مردمانی رد ءَ بیڑی ءِ وھد ءَ یک ورنایے پوج ءَ دزگیر کرتگ ءُ کہ آئی ءِ پجار عالم ء سلام جھمنند چیری بازار گومازی ءِ نام ءَ زانگ بیتگ –

دمگی مردمانی رد ءَ بیڑی ءِ وھد ءَ ترندیں لٹ ءُ کُٹانی سبب ءَ یک زالبولے بیران بیتگ کہ آئی ءِ پجار کیگد ء عبداللہ ءِ نام ءَ زانگ بیتگ –

زانگ بہ بیت گومازی یکشل ءَ لشکر کشیانی دیمپان اِنت اشی ءَ پیسر ھم اے لوگانی سر ءَ پوج ءَ بیڑ برتگ –

وھاب بلوچ ء ھاشم جھمنند مشکے آواران آئی ءِ کھول ءَ چہ سرکاری ادارھاں وھاب بلوچ ءِ یلو کنگ ءِ لوٹ کرتگ ءُ گشتگ بازیں سالاں بیگواھیں وھاب بلوچ ءَ یل بہ کن اِت ءُ مارا انساپ بہ دے اِت –

آیاں گُشتگ کہ وھاب بلوچ ءَ اگاں دگہ جرمے ھست گڑا آ آمیدگساں پیش کنگ بہ بیت اِنت –

آیاں گُشتگ کہ یک پُرایمنیں سیاسی باسکے ءِ دروشم ءَ بی آر پی ءِ پتر ءَ بیتگ بلوچستان ءَ ھکانی واستا جد ءُ جھد ءَ بیتگ ءُ ھمے سبب ءَ آ گرگ ءُ بیگواہ کنگ بیتگ –

آیاں گُشتگ کہ وھاب بلوچ سِیزہ مئی سال دوھزار ءُ سیزدہ ءَ بلوچستان ءِ شھر ھب چوکی ءَ پاکستانی چیریں ادارھاں دزگیر کنگ ءَ پد بیگواہ کرتگ کہ تنی وھدی بیگواہ اِنت –

کھول ءَ دراھیں انسان دوست ءُ انسانی ھکانی ادارھاں گوں دزبندی کرتگ ءُ گشتگ کہ وھاب بلوچ ءِ یل کنائینگ ءَ وتی کرد ءَ پیلو بہ کن اَنت –

ھمے وڑ ءَ بلوچ سوشل میڈیا ایکٹیویسٹس ءِ نیمگ ءَ بیست ءُ پنچ جولائی ءَ وھاب بلوچ ءِ بیگواھی ءِ ھلاپ ءَ یک ٹوئٹر کمپئین ءِ برجم دارگ بیت اِنت –

سربیتگیں ھالانی رد ءَ زھری دوگن ءَ بشام لوکل سپورٹ آڑگنائزیشن ءِ نیمگ ءَ یک روچی ءِ فری میڈیکل کیمپے جنگ بیتگ کہ چریشی ءَ بازیں نادراہ دارو درمان کنگ بیتگ اَنت –

چریشی ءَ ماھر امراض جنرل سرجن ڈاکٹر شکیل اکبر سمالانی، ڈاکٹر سلیم مصطفیٰ، جنرل فزیشن ڈاکٹر مقبول جبار، ڈاکٹر عبدالغفار جنرل فزیشن، ڈاکٹر یاسر لاشاری جنرل سرجن، ڈاکٹر امان اللہ فزیشن، ڈاکٹر ذکا اللہ جنرل فزیشن، ڈاکٹر خالد محمود شاہ جنرل فزیشن ءُ ماھر ڈاکٹراں بھر زرتگ ءُ شش سد ءِ کچ ءَ نادراھانی چار ءُ ٹپاس کرتگ اَنت ءُ مپت ءَ دارو درمان کرتگ اَنت –

یونین کونسل دوگن ءَ ابید جام شھر، چشمہ ءُ دگہ جتا جتائیں جاھاں بازیں نادراہ اتکگ ءُ فری میڈیکل کیمپ ءَ وتی جاندراھی ءِ واستا –

ھمے وھد ءَ دمگ ءِ سروک ءُ رھشوناں ھم فری میڈیکل کیمپ ءَ اتکگ ءُ برجم کرتگیں کیمپ ءِ ساڑا کرتگ ءُ بشام لوکل سپورٹ آرگنائزیشن ءِ نیمگ ءَ برجم کرتگیں آرگنائزر ءِ منت گپتگ اَنت –

اتکگیں مردماں گُشتگ کہ ما دیم ءَ ھم ھمے اُمیت ءَ داریں کہ بشام لوکل سپورٹ آرگنائزشین چوشیں بنجل برجم داریت ءُ زھری ءِ وڑیں ھندانی نادراہ ءُ نیزگاریں مھلوک ءَ مپت ءَ دارو درمان کنت –

ڈپٹی کمشنر کیچ ءَ کرونا وائرس ءِ گیش بیگ ءِ سر ءَ کیچ ءَ نہ کُٹوکیں لاک ڈاؤن کنگ ءِ جار جتگ –

بلوچستان ءِ دمگ کیچ ءَ سر بیتگیں ھالانی رد ءَ مروچی کیچ تربت ءَ گران نھاد ءُ لاک ڈاؤن ءِ مان نیاروکیں دکان اسسٹنٹ کمشنر تربت ءِ چیردستی ءَ بند کنگ بیتگ اَنت –

دمگدار ءِ نیمگ ءَ کرونا نادراھی ءِ گر ءُ دار کنگ ءِ سر ءَ دو روچ ءَ لاوک ڈاؤن ءِ اولی روچ ءَ ڈپٹی کمشنر کیچ ءِ گوشگ ءَ اسسٹنٹ کمشنر تربت ءِ نیمگ ءَ بیڑ بیتگ ءُ چریشی ءَ لاک ڈاؤن ءِ مان نیارؤکیں دکان بند کنگ بیتگ اَنت اشی ءَ ابید عید ءِ درگت ءَ گران نھاد کنوکیں دکاندار گرگ ءُ دکان بند کنگ بیتگ اَنت –

ھمے وڑ ڈپٹی کمشنر کیچ ءَ کرونا نادراھی ءِ ناوشیں جاورھال ءِ سر ءَ کیچ ءَ سرجم ءَ نہ کُٹوکیں لاک ڈاؤن ءِ جار پِرینگ بیتگ ءُ مان نیارؤکیں مردمانی ھلاپ ءَ گامگیج زورگ بیت اِنت –

ڈپٹی کمشنر کیچ حسین جان بلوچ ءَ کیچ ءَ کرونا نادراھی ءِ گیش بیگ ءُ ڈیلٹا ویریئنٹ ءِ سر ءَ شھریانی ساہ ءِ پھریزگ ءَ مروچی ءَ داں نہ کُٹوکیں لاک ڈاؤن ءِ جار جتگ –

ڈی سی کارگس ءَ سر بیتگیں ھالانی رد ءَ مھلوک ءِ گون ءَ دزبندی کنگ بیتگ کہ ابید زلورتی ءَ لوگاں ڈن در مہ کپ اِت اژدری جاورھال ءِ سر ءَ ایس او پیز ءِ سر ءَ سرجم ءَ بندش بہ بیت ءُ بیڑی ءُ مچی مہ بیت ءُ اژدری کارانی کنگ ءَ پد واتر لوگ ءَ روگ بہ بیت اِنت –

جار ءَ گُشگ بیتگ کہ دراھیں دکاندار، ھوٹک ءُ ریسٹورنٹانی واھند لاک ڈاؤن ءِ سرجم ءَ رھبنداں بہ دار اَنت دانکہ کرونا نادراھی ءِ گر ءُ دار کنگ بہ بیت اِنت –

آئی ءَ گُشتگ کہ کیچ ءَ کرونا وائرس ءِ جاور یکدم ناگیگ اَنت ءُ شھریانی زندگی ءِ باز ناگیگی ءِ گمان اِنت –

جار ءَ گُشگ بیتگ کہ کرونا وائرس یک جان کُشیں نادراھی ءِ اشی ءِ پنجگانی تہ ءَ کیچ کپتگ ءُ اشی ءِ مستریں گر ءُ دار لاک ڈاؤن ءُ ایس او پیز اِنت –

شھری ءُ انجمن تاجراں گوں ھمے اُمیت اِنت آ دمگدار ءِ ھمراھداری ءَ کن اَنت کرونا نادراھی ءِ پروش دیگ ءَ وتی راجی پرز ءَ پیلو کن اَنت –

بلوچستان ءَ جتا جتائیں وئیلاں ھپت مردم بیران، بیران بیتگیں مردمانی تہ ءَ دو کسانی لاش دزکپتگ اَنت ءُ ھب ءَ دو زالبولاں ھوار سَے آپ ءَ کپتگ ءُ بڈ اِتگ اَنت – شال ءَ پرپٹانی ٹکر ورگ ءَ دو مردم بیران بیتگ اَنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ کوھلو ءِ ھند بوھڑی ءُ تمبو ءِ کراس ءَ گوستگیں شپ ءَ یک زالبولے ءِ لاش دزکپتگ –

دمگی مردمانی رد ءَ لاش گوستگیں شپ ءَ دزکپتگ ءُ تنی وھدی زانگ نہ بیتگ کہ اشی ءِ مرگ چون بیتگ، دزکپتگیں زالبولے جنوزامے گوشگ بیگ ءَ اِنت ءُ لانگھانی مری ٹک ءَ سیادی داروک اِنت –

وئیل ءِ بارو ءَ دمگی مردمانی سرکاری واکداراں گامگیج زورگ ءِ دزبندی بیتگ اَنت بلے تنی وھدی دمگدار ءُ دگہ واکداراں وئیل ءِ گیشیں پَٹ ءُ پول ءِ زورگ ءَ گامگیجی ءَ گندگ بیگ ءَ نہ اَنت –

ھمے وڑ بلوچستان ءِ دمگ کیچ مند کترینز ءُ دشت ءِ میانی ءَ یک مردمے ءِ جون دزکپتگ –

دزکپتگیں جون ءِ پجار واھد ء یوسف ءِ نام ءَ زانگ بیتگ کہ دشت کاشاپ ءِ نندوک گوشگ بیگ ءَ اِنت –

دمگی مردمانی رد ءَ تنی وھدی آئی ءِ مرگ ءِ سبب زانگ بیگ ءَ نہ اِنت کہ چون بیتگ –

ھمے وڑ ءَ بلوچستان ءَ دگہ دو جتائیں وئیلاں دو زالبولاں ھوار پنچ کس بیران بیتگ اَنت –

شال ءَ سئیل ءُ سواد ءَ رؤکیں دو پرپٹانی میان ءَ ٹکر وری بیتگ کہ چریشی ءَ دو ورنا بیران بیتگ اَنت –

وئیل شال ءِ دمگ سئیل ءُ سوادی جاہ سلیازہ ءَ پیش اتکگ کہ اود ءَ دو کس بیران بیتگ اَنت، بیران بیتگیں مردمانی سیادی ژوب سھراب گوٹھ ءِ گوشگ بیگ ءَ اِنت ءُ اشانی ھواری ءَ دو کس سک زدگ بیتگ اَنت ءُ لاش ءُ زدگ بیتگیں مردم سیول ھسپتال شال ءَ برگ بیتگ اَنت –

ھمے وڑ ءَ ھب ءَ سئیل ءُ سواد ءَ اتکگیں زالبول ھب پھل ءِ نزیک ءَ آپ ءَ جان شودگ ءِ وھد ءَ بڈ اِتگ ءُ بیران بیتگ اَنت-

وئیل ھب پھل ءِ نزیک ءَ پیش اتکگ کہ اود ءَ دو زالبولاں ھوار سَے آپ ءَ بڈ اِتگ اِت اَنت ءُ دو زالبولانی لاش کشگ بیتگ اَنت ءُ آ دگہ یکے ءِ لاش ءِ شوھاز برجاہ اِنت –

ریسکیو ءِ رد ءَ بیران بیتگیں ھر سئیں مردم یکین کھول ءِ مردم اَنت کہ جانشودگ ءِ وھد ءَ آپ ءَ بڈ اِتگ ءُ بیران بیتگ اَنت –